Ditën e dielë më 23 shkurt, Kryeministri Rama do të mikpresë në Tiranë, Presidentin e Emirateve të Bashkuara Arabe Mohamed bin Zayed Al Nahyan, i cili vjen për herë të parë në Shqipëri si President i EBA, në krye të një delegacioni të nivelit të lartë.

Kryeministri Rama do të presë në një ceremoni mirëseardhjeje Presidentin Mohammed bin Zayed Al Nahyan, i cili do të mbërrijë në Rinas në mesditë.

Më pas, Kryeministri dhe Presidenti Mohamed bin Zayed Al Nahyan do të zhvillojnë një takim kokë më kokë në zyrën e Kryeministrit Rama, në Kryeministri dhe në vijim do të firmoset një marrëveshje bashkëpunimi mes palëve.

Duke folur për këtë ngjarje, Kryeministri Rama tha se vizita e Presidentit të Emirateve të Bashkuara Arabe dhe njërit prej udhëheqësve më të respektuar të botës së sotme shënon një gur shumë të rëndësishëm kilometrik në rrugën e një miqësie dhe partneriteti që është forcuar shumë vitet e  fundit.

“Miku ynë i çmuar vjen nesër me një delegacion të nivelit më të lartë për të vendosur të tjera piketa në rrugën e një partneriteti që bazohet tek interesat e përbashkëta, por ushqehet nga një miqësi shumë e sinqertë shtetërore, por edhe personale. Jam shumë shumë krenar që Shqipëria mikpret miq si Presidenti Mohamed bin Zayed Al Nahyan, diçka që deri pak vite më parë, as nuk mund të imagjinohej.” – shprehet Kryeministri Rama për këtë vizitë.