Komunikim me median i Kryeministrit Edi Rama:

 

Desha të komunikoj sot, disa gjëra besoj të rëndësishme, që duhen implementuar plotësisht, të mënyrës si administrohen plazhet. Besoj se keni të gjithë parasysh se vitin e kaluar e ndryshuam qasjen dhe e bëmë shumë të qartë që hapësirat e plazheve duhet të jenë hapësira të ndara në mënyrë të arsyeshme mes subjekteve private që kanë të drejtë të administrojnë hapësira përpara strukturave hoteliere në vijën e parë dhe pjesës tjetër, e cila duhet të mbetet hapësirë në funksion të publikut. Duke parë hartën dhe zbatimin e këtij procesi jemi përgjithësisht të kënaqur me faktin që … [fjalë e pakuptueshme] është e arsyeshme. Por nga ana tjetër hasen vështirësi për shkak se jo të gjitha subjektet private duan ta kuptojnë se si funksionon ky proces për shkak se në ndonjë rast, edhe vetë bashkitë, ndonjë bashki e caktuar nuk ka kuptuar procesin apo nuk do ta kuptojë procesin, duke krijuar konfuzion ose duke krijuar premisa për konflikte. Megjithatë një gjë është e padiskutueshme, ajo çka është përcaktuar si kornizë e këtij procesi do ta zbatohet me hir ose me pahir.

Unë dua t’i bëj thirrje sot, të gjitha atyre subjekteve që nuk janë në rregull me dokumentacionin dhe që kanë operuar me teorinë e faktit të kryer, që të largohen nga sipërfaqet që nuk ju takojnë me ligj dhe me rregull. Policia e Shtetit do të jetë e pranishme në të gjithë vijën bregdetare dhe do të konfiskojë në vend çdo lloj çadre, shezlloni apo strukture tjetër ndihmëse, që nuk është e përputhur me bazën dokumentare të subjektit. Plazhet janë të popullit, janë të qytetarëve e për aq sa subjektet private janë të përfshirë në procesin e garantimit të një sezoni turistik, janë dhe të tyre si përgjegjësi aty ku kjo përgjegjësi u është njohur ligjërisht.

Është shumë e qartë dhe nga pikëpamja financiare, përveçse në aspekte të tjera, që kjo skemë e re e administrimit të hapësirës së plazheve ka krijuar më shumë të ardhura për sektorin publik, për institucionet publike, në këtë rast bashkitë, e më shumë hapësira për qytetarët që nuk dëshirojnë të jenë pjesë e hapësirave ku plazhi administrohet nga privati.

Besoj që përtej disa rasteve që janë bërë publike, por dhe disa rasteve të tjera që nuk janë bërë publike, por që janë problematike, në tërësi baza është pozitive. Por në ditët në vijim, kjo bazë pozitive duhet konsoliduar në mënyrë që piku i sezonit, korriku dhe gushti të jenë absolutisht të garantuara në këtë aspekt. Dua ta përsëris, subjektet që nuk janë aty ku janë vendosur me teorinë e faktit të kryer, duhet të largohen vetë dhe të mos humbasin edhe atë bazë materiale që kanë siguruar për aktivitetin e tyre, sepse ajo do t’u merret e nuk do t’u jepet më mbrapsht, si mjet uzurpimi i paligjshëm i hapësirës që nuk është e tyre, por është e popullit shqiptar, është e publikut, është e qytetarëve.

Kjo është pak a shumë ajo çka desha të them shkurtimisht dhe ma ha mendja qartësisht, për të mos u zgjatur me shumë elementë e natyrisht, duke qenë se ju ftova që të vini, jam i hapur për pyetjet tuaja.

 – Zoti Kryeministër, a jeni i shqetësuar ju për gjendjen e kriminalitetit dhe sigurisë publike dhe asaj rrugore? Duke patur parasysh që jemi në kulmin e sezonit turistik, ka një sërë ngjarjesh me viktima, një numër të madh viktimash e po ju bëjmë thirrje turistëve të vijnë në Shqipëri sepse nuk kemi COVID-19, por duket sikur rreziku është më i madh, sesa të infektohesh nga COVID-i në Shqipëri në këtë periudhë? Çfarë masash do të merrni? Kemi dëgjuar ministrin e Brendshëm që ka fajësuar gjyqtarët dhe prokurorët. Vettingu mund të zgjasë për shumë kohë. Sa do të presin qytetarët që të kenë siguri?

Kryeministri Edi Rama: Pikë së pari, unë nuk jam i shqetësuar, që të jemi të qartë, në aspektin e trendeve të kriminalitetit apo të aksidenteve, sepse trendët shikohen përtej një ngjarjeje, dy, tre apo katër ngjarjesh. Mjafton t’i shikoni e do shikoni që trendet janë krejt brenda një limiti që përcakton edhe shkallën se si kriminaliteti apo aksidentet ulen apo ngrihen, apo nëse uljet dhe ngritjet e tyre janë brenda kufijve të arsyeshmes në raport me të përgjithshmen. Natyrisht që ngjarjet e ndodhura janë tronditëse, nuk diskutohet, janë shumë tronditëse, por për turistët mos kini asnjë merak.

Atmosfera e një vendi ku medemek turistët nuk duhet të vijnë sepse rrezikojnë të vriten rrugëve është në ekran, nuk është në realitet. Fakti e tregon që turistët po vijnë e do të vijnë dhe nuk ka asnjë ndryshim në raport me dëshirën apo me prenotimet e tyre. Sepse turistët nuk vijnë nga hëna, vijnë nga vende ku jetohet, ku ka edhe probleme, ku ka dhe situata të vështira dhe një, dy, tre, apo katër ngjarje, në vetvete tragjike nuk diskutohet, nuk përcaktojnë nivelin e sigurisë apo nivelin e pasigurisë në një vend. E të thuash pastaj që është bërë më keq sesa të kishte COVID, kjo mund të thuhet, por është komplet… – nuk di si ta quaj. Unë mendoj që duhet të jemi shumë realistë e duhet të kuptojmë mirë si është dinamika e çdo ngjarjeje, se me çfarë lidhet dinamika e çdo ngjarjeje e  natyrisht, çfarë do të bëjë secili.

Ne nuk jemi në asnjë sekondë të kënaqur me punën tonë, me punën  e strukturave tona, që nga puna ime, deri tek puna e cilitdoqoftë që ka detyrë t’i çojë gjërat përpara e të bëjë që gjërat të bëhen më mirë, por që të kalojmë në ekzagjerime të kësaj natyre, nuk zgjidhim asgjë e nuk ndihmojmë veten, për të kuptuar se çfarë do të bëjmë. Unë nuk e di se si Policia e Shtetit mund të shmangë një aksident që është rezultat i çmendurisë së një individi në rrugë. Apo nuk di si Policia e Shtetit mund të gjendet pas mesnate në një vend ku bëjnë sherr dy komshinj. Natyrisht që përtej dy apo tre, katër apo pesë ngjarjeve, që mos t’i kufizoj, ka gjëra patjetër për të kuptuar e për të shfrytëzuar në funksion të përmirësimit  të punës, por një gjë nuk ndryshon dot. Policia e Shtetit nuk dënon. Policia e Shtetit reagon, ndalon dhe çon përpara gjykatës persona që shkelin ligjin. Në rast se, fjala vjen, mund të konsiderohet një arsye e një tragjedie fakti që personat e përfshirë në tragjedi kanë armë pa leje dhe patjetër që armëmbajtja pa leje këtu në vendin tonë dënohet më rëndë sesa në shumë vende të tjera të Europës, nuk është Policia e Shtetit që mund të çojë në burg ata, të cilët i çon përpara gjykatësve e gjykatësit nuk i dënojnë as me minimumin që jep ligji.

Do të thoni, çfarë duhet të bëjmë ne?

Ju të parët duhet të bëni demaskimin e këtyre gjykatësve, përshembull, se e keni në dorë ta  bëni. Sepse janë fakte skandaloze që ndodhin dhe gjykatat, duam apo nuk duam ne,  na  pëlqejnë apo s’na pëlqejnë ne, ata, të cilët janë ende në detyrë, sepse nuk kanë kaluar në procesin e vettingut dhe abuzojnë, nuk ka një instrument qeveria që t’i bëjë zap dhe shumë mirë që nuk e ka sepse kemi zgjedhur të jetojmë në  një vend demokratik, nuk kemi zgjedhur të jetojmë në një vend ku qeveria bën edhe prokurorin, edhe gjykatësin, edhe policinë, të gjitha bashkë. Duhet të gjithë të bëjnë pjesën e tyre.

Pjesa jonë është e qartë. Vazhdimi i procesit të reformimit dhe të fuqizimit të Policisë së Shtetit, në sensin e ristrukturimit të vazhdueshëm për të arritur të gjithë objektivat që kanë të bëjnë me moshën në Policinë e Shtetit, me integritetin, me performancën e secilit. Nga ana tjetër, fuqizimin e Policisë së Shtetit me teknologji, në mënyrë që shumëçka në aspektin e monitorimit të territorit të bëhet më mirë. Kjo është rruga jonë, nuk kemi një rrugë tjetër. Ndërkohë kur flasim për shtetin, shteti është edhe qeveria, edhe policia, edhe prokuroria dhe gjykata, kështu që nuk është çështje e lënies së fajit. Jetojmë në një sistem ku përgjegjësitë janë personale. Shkelja e ligjit është përgjegjësi personale, nuk është përgjegjësi kolektive dhe kush shkel ligjin, duhet të ndalohet e duhet të dënohet. Kaq e thjeshtë është kjo. E nëse një nga hallkat nuk funksionon, atëherë gjëja bëhet më e vështirë. Në tërësi, unë po ju them përsëri, mjafton të shikoni trendet. Shumë njerëz e me të drejtë mbase, në emocionin krejt natyrshëm të një ngjarjeje tragjike, nuk duan të dëgjojnë as për shifra, as për fakte, as për kontekste, por shifrat, faktet dhe kontekstet janë ato që orientojnë punën e qeverisë. Dhe shifrat, faktet dhe kontekstet na e bëjnë ne shumë të qartë se cilat janë detyrat tona e çfarë duhet të bëjmë ne si qeveri.

– Zoti Kryeministër, nesër paradite mbërrin në Tiranë ndihmëssekretari amerikan i shtetit Filip Reeker. Çfarë duhet të presim nga kjo vizitë, ndonjë mesazh politik?

Kryeministri Edi Rama: Ta presim.

– Zoti Kryeministër, a jeni i sigurt që do t’ia dalë policia të çlirojë plazhet nga ata që i kanë zaptuar siç ju thatë në mënyrë të paligjshme e nuk do të pengohen nga ndonjë zyrtar i lartë i Partisë Socialistë, i pushtetshëm, siç është Pjerin Ndreu, përshembull, që është denoncuar në prokuroi nga një oficer policie, i cili u ka thënë prokurorëve se kryebashkiaku nuk ka lejuar forcërisht shoqërimin në komisariat të një pronari lokali që mbante muzikën tej orarit të parashikuar nga ligji.

Kryeministri Edi Rama: Së pari, nuk kuptoj ku është lidhja mes zaptimit të plazhit dhe muzikës. Megjithatë, kur vjen puna për ofendimin e policisë, askush nuk ka të drejtë e askush nuk mund t’ia hedhë lehtë pa u përballur me ligjin, ofendimit të policisë. Por policisë i bëhet dhe një ofendim tjetër i vazhdueshëm, i përditshëm, kur i hidhet faj për çdo gjë që ndodh. Ky është një ofendim shumë më i madh, sesa ofendimi individual i një personi ndaj dy apo tre punonjësve, sepse ai individuali zgjidhet, është aty, është i drejtpërdrejtë, është në shkelje të etikës, të ligjit, të gjithave e ka proces. Unë do shqetësohesha nëqoftëse policia apo strukturat përkatëse nuk do kishin ndjekur rrugën ligjore. Të gjithë mund të gabojnë e të gjithë duhet të përgjigjen për gabimet e tyre. Rëndësi ka që në këtë rast nuk kemi një tolerim të faktit që një zyrtar i lartë ofendon një patrullë apo një grup punonjësish policie, por ofendimi i madh që i bëhet policisë, është ofendimi i përditshëm dhe mungesa e mbështetjes. Ky është ofendim i madh. Përmbytja e opinionit me gjysmë të vërteta që janë dhe gënjeshtrat më të mëdha, sepse, e përsëris, nëse do të ishte kështu, atëherë në Shtetet e Bashkuara ku vriten me dhjetëra njerëz ndonjëherë, në ndonjë rast tragjik, në një moment, do duhej që policia e Shteteve të Bashkuara dhe strukturat e Shteteve të Bashkuara dhe gjithë zinxhiri politik i Shteteve të Bashkuara të çoheshin në gjyqin e fundëm popullor, por nuk ndodh kështu. Kështu që dua ta përsëris. Ne jemi të shqetësuar çdo ditë që puna të bëhet më mirë, por që të thuhet që një, dy apo tre ngjarje shumë fatkeqe, shumë tragjike, shumë të rënda na e bëkan Shqipërinë një vend ku turistët mund të kthehen mbrapsht është shumë qesharake, sepse faktikisht, asnjë turist nuk po kthehet mbrapsht e asnjë turist nuk do kthehet mbrapsht. Kjo është evidente.

– Zoti Rama, dy ditë më parë, nga qyteti i Vlorës ju lajmëruat për ristrukturimin e Policisë dhe pak më herët e përmendët në fjalën tuaj reformimin e policisë. Mund të na zbardhni detaje më tepër rreth këtij ristrukturimi të Policisë dhe me kë është konsultuar ky draft dhe sa kohë ka që është hartuar?

Së dyti; paraditen e sotme, ju keni zhvilluar një takim virtual me homologun tuaj të Maqedonisë së Veriut, Zoran Zaev dhe Presidentin serb, Aleksandër Vuçiç në kuadër të MiniShengenit Ballkanik. Mund të na zbardhni se çfarë është diskutuar në këtë takim online mbi marrëdhëniet mes 3 vendeve dhe çfarë lehtësirash do të ketë në lëvizjen e lirë, por edhe të mallrave?

Kryeministri Edi Rama: Kjo është e zbardhur sepse është një deklaratë e tërë shtypi nga takimi, kështu që mund t’i referoheni deklaratës. Është e zbardhur dhe nëse nuk është iu është vënë në dispozicion, mund ta kërkoni dhe ta merrni sepse ka një deklaratë nga takimi.

Sa i përket ristrukturimit, jemi në një fazë intensive në të gjithë sektorët, jo vetëm për punët e brendshme apo policinë, por për të gjithë sektorët, për të përgatitur mandatin e tretë dhe është koincidencë, por nuk ka problem në këtë aspekt, përkundrazi, një arsye më shumë, edhe ngjarja që ka ndodhur. Unë dua ta nënvizoj që të mos krijohet asnjë keqkuptim, meqë ministrit të Brendshëm dje, një pjesë e juaja ia morën fjalët dhe ia kthyen përmbys. Nuk është asnjëherë një ngjarje e çfarëdo niveli, në çfarëdo sektori e lëre më pastaj, një ngjarje në sektorin e punëve të brendshme që ka dhe fatalitete, pavarësisht përgjegjësisë direkte ose jo, një arsye për të larë duart. Asnjëherë! Përkundrazi, çdo ngjarje është një arsye për të menduar se si gjërat mund të bëhen më mirë në tërësi, është një motiv i fortë. Kur unë them që në ngjarjet në fjalë, sulmi ndaj Policisë së Shtetit është absurd, nuk kam parasysh që Policia e Shtetit nuk mund të bëjë më mirë apo shumë më mirë punën e vet. Absolutisht jo. Kam thjesht parasysh faktin që nuk është vetëm policia në një vend demokratik apo në çdo vend tjetër, ajo që garanton gjithçka dhe që kontrollon sjelljet e njerëzve dhe individëve rrugëve apo në konflikte mes tyre, që ndodhin në pak minuta dhe që nuk ka polici në botë që mund t’i parandalojë.

Sigurisht që Policia jonë e Shtetit ka nevojë për mbështetje edhe më të madhe sa i përket teknologjisë, në ndërkohë, ristrukturimi i policisë në aspektin organizativ, edhe në burime njerëzore, edhe në drejtimin, që nga niveli i drejtuesve në qarqe e deri në nivele më të ulëta, është proces që ka nisur të diskutohet dhe të konceptohet. Besoj se do materializohet edhe më shpejt seç ishte planifikuar, pikërisht për të reaguar edhe ndaj kësaj situate. Sepse, pavarësisht fakteve dhe detajeve, edhe perceptimi ka një rëndësi shumë të madhe, sepse perceptimi krijon një atmosferë psikologjike të caktuar. Unë e kuptoj shumë mirë që atmosfera psikologjike, edhe falë ngarkesës së madhe emocionale që kanë pasur këto ngjarje, kanë nevojë për një lehtësim dhe për këtë, procesi i ndryshimeve në nivelet e larta të Policisë së Shtetit do bëhet më shpejt, sesa ishte i planifikuar. Por ishte i planifikuar.

-Zoti kryeministër, pyetjes së parë iu përgjigjët se nuk jeni i shqetësuar, ndërkohë ditën e djeshme, ministri Çuçi u shpreh se ngjarje të tilla si aksidentet apo incidenti në Velipojë janë normale, ndodhin kudo në botë. A jeni i shqetësuar se ju dhe kabineti juaj qeveritar po i përcillni mesazhe qytetarëve shqiptarë se shpejtësia tej normave të lejuara, por edhe armëmbajtja me apo pa leje janë çështje shumë normale, duke i çuar kështu mesazhe të rinjve? A i keni kërkuar ju dorëheqjen zotit Çuçi? Çfarë keni diskutuar me Ministrin e Brendshëm në një kohë kur ngjarjet në vend nuk po rreshtin dhe është një situatë e përsëritur çdo fillim vere deri në fundin e saj. Gjithashtu, doja t’ju pyesja se për çfarë foli dje zoti Çuçi ishte se do kishte ndryshime në Policinë e Shtetit. Do ketë ndryshime në rang lokal apo kombëtar? Do të shkojnë këto lëvizje në Policinë e Shtetit sërish vetëm në drejtorë të vegjël qarqesh apo edhe lëvizje të Policisë së Shtetit në thelb të saj?

Kryeministri Edi Rama: Së pari, e vetmja gjë që unë kërkoj shumë përulësisht nga të gjithë ju, është që fjalët e mia mundësisht mos i deformoni. Kuptimin e fjalëve dhe interpretimin e tyre e bëni si të doni, por ato që unë them mos i deformoni sepse është bërë shumë e vështirë realisht për të përcjellë mesazhe tek njerëzit, nëse njerëzit nuk janë prezent sepse kanë punë të tjera dhe pastaj mesazhet i marrin nga ndërmjetësimi juaj.

Unë thashë nuk jam i shqetësuar në raport me tërësinë dhe natyrisht unë nuk mund të kem një imagjinatë aq të fortë sa të barazoj Covidin me ngjarjet, dhe pse nuk jam i shqetësuar në raport me tërësinë, e shpjegova. Unë nuk thashë që ngjarjet në fjalë më lënë indiferent, përkundrazi, e shpjegova shumë qartë dhe këtë dhe nuk e kuptoj si mund të përmbysen fjalët sy për sy sepse të ishte nesër hajde, por jemi sy për sy këtu, në kohë reale. Ju lutem përulësisht që të paktën ato që them mos i shtrembëroni, pastaj ju keni të drejtë ti interpretoni sipas perceptimit apo sipas asaj që ju mendoni se është kuptimi i fjalëve.

Tjetra është që unë nuk e harroj dot, – ju mund ta harroni, por unë jo, – që në këtë vend  para ca vitesh ka pasur më shumë vrasje sesa ditë në vit, dhe nga ana tjetër, që numri i aksidenteve ka qenë dyfish, dhe këtë nuk e harroj dot. A është numri i aksidenteve sot ai që do ishte një numër i aksidentesh i ulët? Jo, nuk është, por në rrugë ka qindra e mijëra individë, të cilët kanë edhe ata secili detyrën e vet karshi ligjit, vetes, familjes së tyre sepse në rrugë mund të vrasësh dhe mund të vritesh. Mund të lësh larg qoftë fëmijët jetimë ose prindërit pa fëmijë dhe nuk është vetëm Policia e Shtetit, por është përgjegjësia e gjithsecilit dhe natyrisht për ata që nuk e kanë atë përgjegjësi, është ligji dhe Policia e Shtetit.

Kështu që unë jam shumë i shqetësuar për se si ne duhet ta përmirësojmë më tutje punën tonë, patjetër,  por që ngjarje që janë kulminante për nga pikëpamja e numrit të viktimave, nga pikëpamja e mënyrës se si ndodhi, të kthehen në arsye për ta parë Shqipërinë si një vend ku turistët u dashkan të kthehen nga rruga e si një vend që qenka frikë të dalësh në rrugë se të vrasin, është e tepërt shumë dhe nuk ndihmon as në adresimin e problemit real. Merreni shikojeni në sa raste, Policia e Shtetit ka çuar përpara gjykatësve shkelës të ligjit edhe për shpejtësi.

Ju kujtohet njëri që bënte akrobacira me makinë e që në atë rast nuk u vra njeri fatmirësisht, por u bë spektakël tmerri përpara ca muajsh? Merreni shikojeni sa herë e ka çuar Policia e Shtetit atë njeri para gjykatës. Por nuk ka një sistem tjetër këtë duhet ta kuptojnë të gjithë dhe ne nuk po rrimë duarkryq sepse ndërkohë po bëhet pastrimi i gjykatave, por kjo kërkon kohë. Kush nuk do donte, unë i pari, që sistemi gjyqësor të ishte si nw Gjermani dhe si në Francë kur ne që shkojmë i gjejmë gati, por për ato sisteme që ne sot i gjejmë gati, është luftuar dhe  punuar me qindra vjet.

Do thoni ju që koha është e gjatë qëkur ka filluar Reforma në Drejtësi dhe Vettingu. Në jetën e një njeriu 5 vjet janë shumë, në historinë e shtet-ndërtimit 5 vjet janë 5 minuta. Ne kemi bërë – e kur them “ne” kam parasysh si institucione, nuk kam parasysh qeverinë këtu, – më shumë sesa mund të bëhej, po të shikojmë vendet e tjera.

Sot, Serbia dhe Mali  Zi, që janë të avancuar në procesin e negociatave, por që edhe për ata është bllokuar procesi, kanë detyra në procesin e negociatave, të lidhura me Reformën në Drejtësi, që ne i kemi kryer. Ata duhet të bëjnë ndryshime kushtetuese, ne i kemi bërë. Ata duhet të hyjnë në procese që ne i kemi kryer. Pra, shpejtësia ka qenë maksimale. Natyrisht, rezultatet kërkojnë kohën e tyre, nuk diskutohet.

– Zoti kryeministër, reforma që ju deklaroni, së bashku me ministrin Bledar  Cuçi që do përfshijë Policinë e Shtetit, a do përfshijë dhe largimin e Ardi Veliut nga detyra e tij, për aq kohë sa ai ka drejtuar, janë regjistruar disa raste të rënda, përmendim këtu Klodian Rashën, vrasjen e tij, atentate të njëpasnjëshme në Vlorë dhe ngjarje të tjera?

Kryeministri Edi Rama: Nuk di se si të shpjegoj që rastet konkrete shikohen në kontekst. Nëse ne do niseshim, jo këtu në Shqipëri, por nëse vendet, qeveritë, shtetet do niseshin nga rastet për të hequr njerëz, nuk do kishte mbetur më njeri që do merrte një detyrë.

Në rastin konkret po e them përsëri, Policia e Shtetit shqiptar nuk është në asnjë situatë problematike. Është vetëm në një proces rritjeje dhe fuqizimi të mëtejshëm. Pra nuk ka asnjë problematikë më të madhe seç kishte përpara këtyre ngjarjeve kur gjërat dukeshin normale dhe nëse i referohemi disa ngjarjeve që kanë të bëjnë me ngrëniet e kokave të kriminelëve mes njëri-tjetrit, edhe aty duhet të shkojmë reagimin e Policisë së Shtetit, kapacitetin e zbardhjes dhe të ndalimit të autorëve.

Kështu që, nuk ka një krizë në Policinë e Shtetit. Kjo është fare e qartë për mua dhe bazuar në fakte në kontekst dhe trende. Puna e Policisë së Shtetit nuk hidhet dot poshtë se ndodhën disa ngjarje tragjike, ku faktikisht mësimet për t’u nxjerrë kanë të bëjnë me çfarë duhet të bëjë secili, përfshirë dhe policinë, por që kontekstet janë komplet palidhje. Çfarë mund të bëjë Policia e Shtetit mes dy fqinjëve, që në mes të natës futen në një sherr dhe sherri përfundon me fatalitete? Dini të ma thoni këtë? Në cilin vend të botës kjo gjë mund të evitohet? Nëse vijmë tek armëmbajta pa leje, po jua them përsëri që nga pikëpamja legjislative, ne kemi një legjislacion, që është nga më të rëndët. Nga pikëpamja e punës së Policisë së Shtetit për të çuar njerëzit me armëmbajtje pa leje në gjykatë, ne kemi një punë që e tregojnë faktet. Nga pikëpamja e dënueshmërisë të këtyre njerëzve, ne kemi probleme. Nëse dënueshmëria nuk është në lartësinë e duhur, atëherë dhe vreshti nuk ruhet sa duhet nga frika e ligjit sepse duke parë rrushi, rrushin që mund të kapesh me armë pa leje, me 6 fishekë dhe me një fishek në fole gati për të bërë ndonjë hata dhe të të lënë në shtëpi. Ky është fakti.

Unë nuk kam dalë këtu të justifikoj asgjë dhe as të heq asnjë përgjegjësi nga askush, por jemi në një moment shumë të rëndësishëm të vitit, kur Shqipëria ka një nga periudhat më të rëndësishme për ekonominë e vet, për turizmin. Në gjithë tërësinë e ndërveprimeve që kryen, një ngjarje, dy, tre janë arsye për të bërë analiza dhe për të nxjerrë mësimet secili, por nuk janë arsye për të dalë me idenë se këtu të gjithë vdesin po të dalin në rrugë apo turistët të kthehen nga rruga. Janë mijëra parcela plazhesh që administrohen dhe kanë marrë sipas ligjit dokumentacionin dhe nuk kanë asnjë problem. Janë disa me konflikte, janë konflikte mes individëve për arsye se nuk duan të kuptojnë që ka mbaruar koha kur ke një shtëpi matanë që e bën hotel dhe do një plazh. Jo, nuk ndodh. Plazhi është i qytetarëve. Nuk mund të marrësh plazhin, duke ardhur nga 7 radhë më tutje dhe duke u imponuar. Përsa i takon subjekteve private, ato janë subjekte që kanë të bëjnë me shërbimet e hotelerisë buzë detit. Kjo është gjëja që në kemi bërë dhe do ta bëjmë deri në fund për të liruar hapësirën e plazheve që u takon qytetarëve që nuk duan dhe kanë të drejtën e Zotit të mos shkojnë të paguajnë shezllonet. Nuk mund të jetë gjithë plazhi i Shqipërisë një shtrat i mbushur me shezllone dhe roje që të kërkojnë lekë. Kush do të shkojë atje, shkon atje si në gjithë botën. Kush nuk do të shkojë atje, duhet të ketë të drejtën që me shokët, me miqtë, me familjen, me te dashurën e të dashurin të rrijë në rënë e të mos paguajë asgjë se është plazh i vet si qytetarë. Këto konflikte administrohen sipas ligjit.

– Dua t’i rikthehem edhe njëherë pyetjes së koleges për kryebashkiakun e Lezhës, Pjerin Ndreu. Ju keni thënë se Partia Socialiste nuk do të bëhet ndonjëherë mbulesë për ata persona që e shkelin ligjin ose dalin mbi ligjin, të paktën siç raportohet të ketë thënë sot, zoti Ndreu. Është e dyta herë që ai del në një situatë, duke iu referuar dosjes së Dibrës ku zoti Ndreu në përgjimet telefonike del se kërcënon një mësuese se do ta fluturonte nga puna në rast se nuk voton për PS-në. Në këtë situatë, a do ta shkarkoni zotin Ndreu dhe a mendoni se në Shqipëri po futet gjithnjë dhe më shumë kultura e të fortit? Duke iu referuar faktit, – nuk e di zoti kryeministër nëse jeni në dijeni – se policia, po marr shembull policinë bashkiake, e bën shumë mirë punën kur vjen puna për të vendosur gjoba qytetarëve, apo për të hequr shitësit ambulantë, por, kur vjen puna për të ndaluar këta që ju i thoni të çmendur, që ecin në bllok, që lëvizin me makina luksoze,  policia është më e stepur,  ndoshta edhe për faktin se ka  kryebashkiakë apo ministra, të cilët e bëjnë ligjin vetë?

Ky aksion për çështjen e shezlloneve do të shkojë deri në fund apo do të ketë fatin e aksionit që ju niset në 2013-ën për çështjen e ndërtimeve pa leje apo prishjen e tyre, një aksion, të cilin për 8 vite nuk e përfunduat dhe iu rikthyet disa javë më  parë?

Kryeministri Edi Rama: Së pari, nuk kuptoj ku e pe mbulesën e PS-së për rastin konkret. Rasti konkret është një rast për të cilin është bërë një denoncim dhe çështja mes palëve zgjidhjet në rrugë ligjore. Ku e pe mbulesën e PS-së?

Mos vallë, unë thashë që ka bërë mirë dhe s’ka asnjë problem?!

Ka bërë shumë gabim dhe duhet të përgjigjet për gabimin që ka bërë në rrugë ligjore.

Përsa i përket ministrave që i jepkan makinës me shpejtësi…

– [Ndërhyn gazetarja pa mikrofon)

sipas jush po, sipas meje jo. Sa për dijeni, kur të kapni makinën time, autokolonën apo makinën e ministrave që nuk respektojnë semaforët, atëherë ejani më bëni moral këtu. Semaforët. Unë qëndroj në çdo semafor, me përjashtim të ndonjë rasti ekstrem kur ka një urgjencë. Kjo është detyrueshme për të gjithë njësoj. Po iu kujtojë që ministrat e qeverisë sime kanë marrë gjobë nga Policia e Shtetit, pra, shoferët e tyre, për moszbatim të këtij rregulli.

Shumë gjëra janë për t’u bërë, nuk diskutohet, por të harrohen të gjitha gjërat dhe të flitet sikur jemi në kohën e atyre që nuk donin t’ia dinin për semaforë, nuk donin t’ia dinin për asgjë dhe në Shqipëri kishte më shumë vrasje sesa ditë viti, kjo nuk mund të lihet të kalojë kështu.

Përsa i përket ndërtimeve pa leje, nuk kam bërë ndonjë aksion ndonjëherë. Kjo është punë e vazhdueshme, është proces i vazhdueshëm që zhvillohet me operacione të herëpashershme. Nuk është një proces që e bërë, e mbarove dhe nuk ka më. E bën e rikthehesh sepse ndodhin në mënyrë të herëpashershme. Por ama në tërësinë e tyre nuk mund të bëjmë krahasime fare me kohën kur u bë boom i madh i ndërtimtarisë pa leje. Çfarë përgjegjësish kemi ne, kam unë, ka qeveria, ka policia etj., te jeni të bindur që as nuk bëj asnjë përpjekje për t’i shmangur, përkundrazi, vetëm për t’i vënë në pah ndaj vetes, ndaj qeverisë, ndaj të gjithë atyre që presupozohet se varen nga qeveria. Asnjë!

Unë mendoj që lënia e topit për çdo gjë tek Policia e Shtetit, jo vetëm që nuk ndihmon dhe nuk është një mënyrë logjike për të zgjidhur më mirë  gjërat, përkundrazi, ndihmon ata që shkelin ligjin. Teoritë që këtu vetëm populli i varfër ndalohet në rrugë se të tjerët ikin, lëvizin si të duan, këto vetëm shtojnë potencialin që njerëzit të shkelin ligjin. Edhe këto ofendojnë Policinë e Shtetit sepse faktet nuk janë kështu. Faktet janë që shumica dërrmuese e të gjithëve respekton semaforin, respekton ligjin. Natyrisht ka një pjesë që është shumë e vogël, por që bën zhurmë shumë të madhe, e cila krijon probleme. Ne jemi duke punuar për të parë sesi, – që të jetë diçka e argumentuar plotësisht nga pikëpamja ligjore, – të rinj në mosha shumë te reja që përdorin makina luksoze dhe që shkelin rregullat të mos mbarojë aty tek gjoba apo as tek heqja e patentës, por të shkojë në hetimin e të ardhurave që kanë sjellë makinën. Nëse ato të ardhura janë legjitime apo jo. Kjo kërkon pak kohë, për t’u sistemuar nga pikëpamja ligjore.

-Zoti Kryeministër, në mandatin e tretë do të jeni të hapur për ndryshime në Kodin Rrugor, por edhe në Kodin Penal, për të klasifikuar të gjitha aksidentet e rënda që vijnë si pasojë e tejkalimit të shpejtësisë si vrase me dashje, duke parashikuar në këto raste edhe dënimin për drejtuesit e automjeteve që i kanë shkaktuar këto aksidente, për të tejkaluar ose për të shmangur në këtë mënyrë atë pjesë të sistemit të drejtësisë që është e korruptuar.

Kryeministri Edi Rama: Kodi  Rrugor dhe Kodi Penal i Republikës së Shqipërisë, në këtë drejtim janë më të rëndët në Europë, edhe për armëmbajtjen pa leje. Çështja nuk është tek kodet dhe as tek Policia e Shtetit. Në thelb, çështja është në pjesën e fundit të zinxhirit që është realizimi i dënimit. Nëse të gjitha masat e marra nga Policia e Shtetit dhe nëse të gjitha referimet e bëra, të mbështetura me dokumente, fakte, në prokurori e në gjykatë do të ishin marrë parasysh, atëherë ne sigurisht do kishim një përputhshmëri shumë më të madhe me çfarë thotë ligji dhe edhe vetëdijesimi i atyre që kanë timon në rrugë do të ishte më i madh nga kjo anë. Ky është fakti. Sepse mund të vësh gjithë sistemin e monitorimit të rrugëve, – çka për të cilin ne po punojmë, – m teknologji dhe prapë ai që nuk do t’ia dijë për semafor, për ligj, për logjikë dhe as për radar, ai e bën dëmin. Nëse mungon hallka ku ai për atë dëm paguan siç thotë ligji, jo më shumë, atëherë sigurisht kjo përbën një dobësi në këtë betejë.

Unë jam i bindur sidoqoftë, që Policia e Shtetit do të vazhdojë të tregojë kapacitetet për të qenë në lartësinë e detyrës dhe në vijim, edhe falë ristrukturimit, edhe falë forcimit me teknologji. Ne shumë shpejt besoj do të kemi në dispozicion dronë superinteligjent që do të monitorojnë territorin në kohë reale për të gjitha ato çështje që janë në interes, që nga ndërtimet pa leje, tek qarkullimi, tek bujqësia, tek pyjet dhe me radhë. Dronë superinteligjent që në kohë reale sjellin të dhëna sikur ke një ushtri me inspektorë mbi kokë dhe sheh çdo gjë. Përsëri, edhe kjo, nëse në terrenin e jetës së përditshme, ata që shkelin ligjin nuk marrin atë që u takon me ligj kur shkojnë para gjykatësit, është një dobësi. Nuk është fare as për ta deleguar përgjegjësinë, as për ta lënë fajin tek askush. Përgjegjësia jonë është e qartë, përgjegjësia juaj është e qartë, përgjegjësia e të gjithëve është e qartë, por as ne, as ju, as të gjithë bashkë ne nuk arrijmë dot ta mbyllim ciklin e përgjegjësive, në rast se ka një të çarë dhe ajo e çarë është sistemi gjyqësor në nivelin ku ende vettingu nuk ka shkuar e ku ka plot gjykatës akoma që bëjnë “kap çfarë të kapësh”. Pastaj, këta individë që në vend se të jenë në burg janë rrugëve, ripërsëritin të njëjtën gjë se nuk dinë të bëjnë gjë tjetër. Ky është një problem serioz, por në kontekst nuk ka krahasim fare me të shkuarën. E nuk flas për të shkuarën e largët, flas për të shkuarën e afërt.

– Zoti Kryeministër, ju thatë që nuk ka çfarë të bëjë Policia e Shtetit për dy fqinj që zihen në orën 1 pas mesnatës. A duhet të jetë Policia e Shtetit në patrullim të të gjithë territorit, duke qenë se ora policore e lejuar për gjithë subjektet private është ora 11? Po marr shkas dhe nga rast i Sarandës ku pati një shkëmbim zjarri mes një pronari dhe disa qytetarëve.

Kryeministri Edi Rama: Rasti i Sarandës është tjetër. Rasti i Sarandës është përgjegjësi e drejtpërdrejtë e Policisë së Shtetit atje e për këtë arsye janë marrë të gjitha masat e janë bërë të gjitha goditjet e nevojshme brenda përbrenda Policisë së Shtetit. Për këtë ke shumë të drejtë, edhe unë jam plotësisht dakord me ty. Rasti i Sarandës është fiks përgjegjësi e strukturave të policisë në Sarandë.

– A duhen marrë masa ndaj Policisë së Shtetit, efektivëve, të cilët zbatojnë ligjin në mënyrë selektive dhe nuk janë në lartësinë e ligjit?

Kryeministri Edi Rama: Pyetje është kjo! Nuk diskutohet! Por që t’i përgjigjem pyetjes, ose më saktë, që të kesh përgjigjen e pyetjes së plotë, jo vetëm në parim, merr informacionin se sa efektivë policie kanë shkuar përpara ligjit për pikërisht këtë që thua. Sa efektive policie janë hetuar administrativisht e pastaj edhe penalisht, si rezultat i punës së bërë nga Shërbimi i Çështjeve të Brendshme në Policinë e Shtetit. Nuk diskutohet, rasti i Sarandës është një rast ku nuk ka përgjegjësi as gjykata, as media, askush tjetër, sa ka Policia e Shtetit dhe të falënderoj që ma solle, për të bërë dhe qartësisht dallimin në pozicionin tim, sepse unë nuk jam këtu për të justifikuar asgjë që nuk justifikohet. Rasti i Sarandës është i pajustifikueshme dhe struktura në Sarandë është goditur nga brenda policisë, domethënë, është ndëshkuar nga brenda policisë, nuk është pritur të vijë ndonjë ndëshkim nga jashtë. Është ndëshkuar, janë marrë masa dhe merren masa vijimësisht për raste të tilla, sepse rasti i Sarandës ka një flagrancë absurde. Nuk ka ndodhur në ndonjë cep. Vërtetë policia patrullon, por një sherr mes fqinjësh në një zonë mund të kesh shansin ta identifikosh, por mund edhe të mos e identifikosh, kurse rasti i Sarandës është një rast flagrant mu në mes të rrugës, është në qendër, pranë shëtitores. Një lokal përtej orarit, me muzikë e të gjitha. Ai është rast ulëritës për strukturën e Policisë së Shtetit të Sarandës.

– Zoti Kryeministër, më lejoni, dua t’ju bëj një pyetje lidhur me një takim që keni pasur në fundjavë me strukturat e Partisë Socialiste  në qarkun e Vlorës ku nuk i keni kursyer as rezervat që keni ndaj kryebashkiakut Dritan Leli. Do doja të dija zanafillën e kësaj pakënaqësie ndaj kryeebashkiakut. A ka të bëjë me refuzimin e ftesës për sa i përket pjesëmarrjes në zgjedhjet parlamentare si kandidat apo me punën si kryebashkiak apo diçka tjetër. Dhe nëse lidhet me punën si kryebashkiak, pse nuk e keni shprehur më parë rezervën tuaj?

Kryeministri Edi Rama: Nuk e di ku e pe sa u kurseva apo sa nuk u kurseva sepse nuk ke qenë e pranishme aty.

Faleminderit të gjithëve!