Konferenca tradicionale për shtyp e kryeministrit Edi Rama në mbyllje të vitit:

Mirëdita të gjithëve!

Kjo është konferenca tradicionale e shtypit për fundvitin dhe besoj që në këtë ditë do t’ia vlente më shumë të përqendrohesha në disa aspekte të 100 ditëve të para të qeverisjes, sesa në të gjithë harkun e vitit. Ndërkohë, pas paraqitjes sime, ju jeni të lirë të bëni të gjitha pyetjet e dëshiruara.

Dua ta filloj me faktin se sot jemi në kushtet e një tjetër stimulimi të një krize artificiale dhe përsëri, kjo lidhet qartësisht me reformën në drejtësi, me ecurinë e procesit të reformës dhe me pamundësinë e një pale për të pranuar pandalshmërinë dhe domosdoshmërinë, njëkohësisht, të reformës në drejtësi.

Sidoqoftë, reforma ka bërë përparim të konsiderueshëm. Institucionet e vettingut tanimë janë në punë me orë të plota dhe besoj që në fillim të vitit të ardhshëm do të shikojmë rezultatet e para konkrete të punës për pastrimin e pallatit të drejtësisë nga gjykatësit dhe prokurorët e korruptuar.

Nga ana tjetër, zgjedhja e Prokurores së Përgjithshme me mandat të përkohshëm është bërë, duke siguruar vazhdimësinë e punës së institucionit të Prokurorit të Përgjithshëm dhe në të njëjtën kohë, duke garantuar se në asnjë moment reforma nuk mund të merret peng për axhenda të ndryshme politike.

Po ashtu është e rëndësishme të theksohet se procesi ka hyrë tanimë në një fazë të re zbatimi dhe paralelisht me vetting-un dhe rezultatet e para konkrete, në aspektin e pastrimit të pallatit të drejtësisë, do të kemi ngritjen e institucioneve të reja të sistemit të reformuar rrënjësisht të drejtësisë.

Së dyti; do doja të ndalesha në faktin se ky vit shënon shifrën më të ulët historike të vrasjeve dhe shënon edhe vitin e kthesës historike, në raport me fenomenin  e kultivimit të kanabisit. Është viti që e nxjerr Shqipërinë nga harta e vendeve që kultivojnë dhe trafikojnë masivisht lëndë narkotike.

Ndërkohë që rikonfirmon ecurinë e Policisë së Shtetit, në funksion të garantimit të rendit dhe të sigurisë publike, me një shifër shumë domethënëse që është ajo e vrasjeve. Nëse do të shikoni të gjitha shifrat e kriminalitetit në raport me trendin historik, do të vini re qartësisht se ka një vazhdimësi në një trend rënës pozitiv. Sot jemi në shifra që i afrohen mesatares së vendeve të BE. Kjo është tejet e rëndësishme të mbahet parasysh, edhe pse nuk diskutohet se jo vetëm në Shqipëri, por kudo, lajmi i keq bën lajm, lajmi i mirë s’bën lajm dhe në një vend si Shqipëria, ku ka lajme deri në pikën që një makinë goditi për vdekje një gjyshe, e cila shpëtoi për një qime, krijohet një atmosfere, sikur këtu, në çdo minutë ndodhin vetëm hatara.

Por thelbi mbetet në pasqyrën statistikore të atyre që janë figura reale të krimit. Nëse televizionet italiane, apo britanike do të merreshin me të gjitha llojet e tjegullave që bien mbi kokë nëpër fshatra, atëherë lajmet në ato vende do zgjasnin 6 orë, 8 orë, 12 orë. Dy vetë u përplasën te kthesa dhe njëri nxori thikën plagosi tjetrin, lajm kryesor në televizion kombëtar. Po të merreshin me këto lajme bota, do të ishte kronika e zeze 18 orë pa pushim. Gjithsesi, ju bëni punën tuaj, ne bëjmë punë tonë.

Së treti, por jo për nga rëndësia, në këto 100 ditë të para, ne kemi përshkallëzuar atë që do ta quaja një aksion në shkallë të gjerë diplomatik për të siguruar hapjen e negociatave për anëtarësim në Bashkimin Europian, në 6 mujorin e parë të vitit të ardhshëm dhe do vazhdojmë ta bëjmë këtë intensivisht, edha pas vitit të ri.

Në këtë aspekt nuk mund të mos e shpreh keqardhjen e thellë për faktin se nuk jemi të gjithë bashkë, të unifikuar, në një qëndrim dhe një zë për çeljen e negociatave, përkundrazi, kemi një situatë ku opozita po luan me zjarrin, simbolikisht e thënë kjo, duke u kthyer në pengesë, për të përcjellë mesazh të qartë, të plotë dhe të unifikuar të politikës shqiptare, lidhur më këtë element kyç të ecurisë historike të pas rënies së regjimit komunist.

Negociatat nuk çelen për qeverinë dhe nuk çelen me PS. Negociatat çelën për Shqipërinë dhe me Shqipërinë. Negociatat nuk zgjasin sa një mandat qeverisës dhe negociatat janë përgjegjësi kombëtare e të gjitha palëve.

Në këtë aspekt besoj që konvulsionet opozitare kundër reformës në drejtësi, konvulsionet opozitare për të vonuar, duke e penguar dhe bllokuar procesin e vetting-ut për muaj të tërë përpara zgjedhjeve dhe duke u rikthyer në formën e tentativës, për ta transformuar zgjedhjen e ligjshme të Prokurores së Përgjithshme në një moment krize artificiale, janë në dëm të interesit të Shqipërisë dhe shqiptarëve, në aspektin e çeljes së negociatave për anëtarësim.

Së katërti; Në këto 100 ditë kaluam një moment shumë të vështirë për shkak të fatkeqësisë natyrore dhe jam shumë krenar që qeveria ishte në lartësinë e detyrës, shteti ishte në lartësinë e detyrës dhe mbi të gjitha jam shumë krenar që Forcat e Armatosura, Forcat e Ndërhyrjes së Shpejtë në mënyrë të veçantë, u treguan realisht në një lartësi që meriton të gjithë mirënjohjen dhe respektin tonë. Këtu dua të nënvizoj po ashtu, se pasi ka mbaruar kriza dhe pasi vëmendja dhe sytë e kamerave tuaja me të drejtë janë drejtuar në tema të tjera të aktualitetit, ne kemi vazhduar dhe vazhdojmë edhe tani që flasim, procesin e riparimit të pasojave të asaj krize në të gjitha zonat e prekura nga uji. Ndërkohë po punojmë edhe për një plan apo program afatgjatë, me investime qysh në vitin e ardhshëm, për të adresuar intensivisht të gjithë ato pika të dobëta të një zinxhiri që kemi nisur ta rivëmë në vend, qysh pas përmbytjes së vitit 2015.

Së pesti; ka nisur dhe vazhdon një operacion i rëndësishëm kombëtar për të pastruar Shqipërinë. Janë bërë disa hapa dhe do vazhdojnë të bëhen hapa të tjerë. Operacioni, nga njëra anë do të synojë intensifikimin e pjesëmarrjes së komuniteteve në këtë proces, duke synuar që në sezonin ardhshëm turistik të kemi një Shqipëri më të pastër se asnjëherë më parë dhe paralelisht do të fillojmë zbatimin e programit për mbjelljen e 20 milionë e 200 mijë pemëve në 4 vitet e ardhshme.

Së gjashti; kemi ecur me reduktimin e lejeve, të licencave, të autorizimeve dhe dokumenteve dhe deri ne fund të janarit do të kemi një konfigurim tërësisht të ri të të gjithë ngrehinës së burokracisë, në raport me qytetarët që marrin shërbime. Vazhdon dhe do të vazhdojë edhe më intensivisht përfshirja e shumë shërbimeve online në portalin e-albania. Njëkohësisht, reduktimi drastik i lejeve, licencave, autorizimeve, dokumenteve do të lehtësojë shumë qytetarët dhe bizneset, do të kursejë shumë kohë dhe natyrisht do të ndikojë në një reduktim të ndjeshëm të korrupsionit, të rryshfetit apo bakshishit e me radhë.

Së shtati; kemi nisur të adresojmë me shumë këmbëngulje çështjen e sigurisë ushqimore. Kjo ka filluar dhe ka ecur mjaft mirë me atë që është aspekti më problematik, ose nga më problematikët, i mishit, me mbylljen e subjekteve të paligjshme të therjes së mishit, me risistemimin e një numri të caktuar thertoresh të licencuara, por që nuk i përmbushnin kushtet dhe me vënien plotësisht në punë të thertoreve me standarde europiane, që kishin mbetur pa punë për shkak të një tregu tërësisht informal dhe barbar në këtë aspekt.

Së teti; ka përfunduar procesi i akreditimit ndërkombëtar të universiteteve, pasi është kryer me shumë sukses një proces i hyrjes në universitete dhe i nisjes së vitit të ri akademik pa asnjë ankesë, zero.

Ju mbahet mend seç u bë vjet, kur filloi të aplikohet ky element i reformës në Arsimin e Lartë. Agjencia britanike e akreditimit ka përfunduar raportet për 35 institucionet e Arsimit të Lartë dhe raportet, vendimet janë publike në faqen zyrtare të Ministrisë së Arsimit dhe Sportit.

Së nënti; kemi kryer një operacion të rëndësishëm për të pastruar akset kombëtare dhe për të larguar prej tyre mijëra tabela, qindra ngrehina dhe objekte të tjera, si dhe plot shesh-pushime, të mbushura me mallra dhe me hekurishte, që përbënin një kërcenim, jo vetëm mjedisor, por dhe drejtpërdrejtë për jetën e njerëzve. Natyrisht, kjo është një fazë e parë. Vitin e ardhshëm do të fillojë puna konkrete për zbatimin e programit të investimeve në akset kryesore, të cilat duam që brenda këtyre 4 viteve të kthehen në akse me standarde europiane. Sot nuk kemi asnjë rrugë me standarde europiane në Republikën e Shqipërisë.

Së dhjeti; kemi miratuar buxhetin e vitit 2018, i cili faktikisht është një pasqyrë e qartë e ecurisë pozitive të vendit dhe e ambicies për të bërë shumë më tepër, pasi kjo që është bërë, nuk mjafton, ajo që duhet bërë, është më shumë seç është bërë.

Zoti kryeministër, pas qëndrimit që mbajtët përsa i përket qëndrimit të opozitës në raport me reformën në drejtësi, a jeni i gatshëm të negocioni me opozitën, sidomos në momentet kur do të zgjidhet Prokurori i Përgjithshëm, pas kalimit të procedurës dhe ngritjes së KLP, marrë kjo parasysh edhe në frymën e marrëveshjes së 18 majit?  Apo 18 maji ka vdekur tashmë?

Kryeministri Edi Rama: Unë besoj se ju kam dëshmitarë të gjithë ju që, qysh në momentin kur lindi nevoja për të adresuar çështjen e përfundimit të mandatit të Prokurorit të Përgjithshëm dhe zgjedhjen e një Prokurori të Përgjithshëm me mandat të përkohshëm, i kam kërkuar në mënyrë të përsëritur kryetarit të Partisë Demokratike që të dialogojmë dhe ta shfrytëzojmë këtë moment për të gjetur jo vetëm një zgjidhje të përbashkët lidhur me Prokurorin e Përgjithshëm me mandat të përkohshëm, por dhe për të bërë një pakt për Europën, në funksion të 6-mujorit kyç të gjysmës së parë të vitit që vjen.

Kërkesat e mia kanë rënë në vesh të shurdhër dhe përgjigjet kanë qenë heroike, refuzuese, me një patos të pakuptueshëm.

Unë e kam bërë të qartë që në fillim, se ne mund ta zgjedhim Prokurorin e Përgjithshëm, çka i bënte kërkesat e mia, qartësisht kërkesa për të pasur mirëkuptim me opozitën, jo si nevojë nga halli se s’kishim votat, por si filozofi dhe si qasje që për mua mbetet e pandryshueshme. Për t’i dhënë përgjigje pyetjes tuaj; patjetër, në çdo hap unë do të bëj përpjekje për të komunikuar dhe për të dialoguar me kryetarin e opozitës.

Partia Socialiste do të jetë e gatshme për të dialoguar dhe për të gjetur zgjidhje të përbashkëta me opozitën. Opozita është ajo që kemi, jo ajo që duam, se kështu është rregulli themelor i sistemit demokratik. Na pëlqen, s’na pëlqen; është e mirë, s’është e mirë; është e aftë, s’është e aftë; ka vizion, s’ka vizion; këto mund t’i themi, por në fund ditës, opozita është aty dhe është ajo që kanë zgjedhur njerëzit. Është detyra e shumicës që të shtrijë dorën dhe të ofrohet në mënyrë të vazhdueshme për dialog, për mirëkuptim, për zgjidhje të përbashkëta, pavarësisht i ka, apo nuk i ka votat. Ne do ta bëjmë këtë në vazhdimësi, por, sigurisht, ne do vazhdojmë të udhëheqim dhe do vazhdojmë të marrim vendime. Nuk do të mbetemi për asnjë moment peng i taktikave absurde apo obstruksioniste të opozitës.

Ngritja e institucioneve të reja, KLP dhe KLGJ, ligjërisht dhe teknikisht nuk mund të bllokohet më, përveçse nga ju, pasi nevojitet një shumicë, por opozita ka paralajmëruar 3 opsione për janarin: bojkot parlamenti, djegie mandatesh dhe marrëdhënie të kushtëzuar me parlamentin, çka lë një skenar edhe për bojkot të parlamentit, që do të thotë mosmarrje pjesë në ngritjen dhe votimin e këtyre institucioneve. Ju do ta prisni opozitën, për të ngritur këto dy Këshilla që janë të rëndësishëm për reformën, apo do vazhdoni vetëm me votat tuaja, njësoj si me kryeprokuroren? Dje, në intervistën në “Top Story” u shprehët se jeni i sigurt që kjo reformë do i bëjë politikanët të paguajnë për çfarë kanë bërë gjithë këto vite. Ju keni 20 vjet në politikë. Unë nuk di asgjë për raportin tuaj me drejtësinë, por kam dëgjuar dhe kam lexuar shumë. Ju personalisht keni ndonjë merak?

Kryeministri Rama: Po filloj nga e dyta. Nuk ka rëndësi se çfarë them unë. Fjala ime është sidoqoftë në konflikt interesi. Ka rëndësi se çfarë thotë drejtësia për këdo. Ju keni dëgjuar shumë politikanë t’i bien gjoksit, për të treguar virgjërinë e tyre. Unë nuk hyj tek ata që e bëjnë këtë, sepse nuk ka asnjë kuptim. Por di një gjë, që reforma në drejtësi është një nga obsesionet që unë kam pasur, në kuptimin e një prej pikave fikse, në idenë time sesi mund dhe duhet të bëjmë shtet këtu. Për këtë arsye kam insistuar që të futej në programin e Partisë Socialiste, edhe pse Reforma në Drejtësi kërkonte ndryshime kushtetuese, në radhë të parë, sepse kam qenë i bindur që është një reformë, të cilës i ka ardhur koha dhe gjërave që koha u vjen, është e pamundur që t’u dalësh përpara dhe t’i bllokosh. Në këtë pozicion, siç kam bërë gjithçka që kam pasur në dorë për ta garantuar ecurinë e reformës në drejtësi, do vazhdoj ta bëj. Kjo është ajo që unë mund t’ju them me siguri të plotë. Nëse kjo tregon se unë kam frikë nga drejtësia, ky s’është problemi im.

Problemi im është si të bëhet e mundur që të ndahet zullumi mënjanë dhe të mos vazhdojë historia “të gjithë janë njësoj”, të gjithë janë të zhytur në zullum, të gjithë hyjnë e dalin në zullum. Kjo është e neveritshme. Për mua ka qenë e papranueshme gjithmonë. Mënyra për ta zgjidhur është të kemi një drejtësi të drejtë, që të ndajë qartësisht të vërtetën nga gënjeshtra, fajin nga akuzat dhe shpifjet, turpin që i mbetet çdokujt që abuzon me besimin e njerëzve, nga turpërimi i njërit apo tjetrit përmes propagandës së shfrenuar të politikës së baltës.

Opozita mund të bëjë çfarë të dojë, por një gjë është e sigurt, që s’ka shans të përsërisësh të njëjtën gjë dhe të marrësh rezultate të tjera. Opozita i ka provuar të gjitha këto që thotë se do t’i bëjë përsëri e përsëri. Le t’i provojë përsëri, po të dojë, por rezultat ndryshe nuk ka si të ketë, sepse është një përsëritje e njohur dhe e stërnjohur e një rruge që i dihet fundi. Nuk merret pushteti me bojkote, me djegie mandatesh e me marrëdhënie të kushtëzuara. Këto janë instrumente që mund të vlejnë në një moment të caktuar, për të ngritur një problem, por nuk janë instrumente të një lufte politike që zëvendëson votën dhe që ngrihet mbi Kushtetutën dhe mbi ligjin.

Edhe ne kemi bërë bojkot. Do ta bëja përsëri, po të kthehesha aty ku jemi nisur, kur kemi bërë bojkotin. E kam thënë atëherë dhe e përsëris sot që jam në pozicion tjetër; Bojkoti nuk është antidemokratik, por është një çmim që e merr përsipër ai që e bën. Ne e kemi bërë bojkotin, sepse kërkonim një komision hetimor për kutitë e famshme. Këta thonë të bëjmë bojkot, se duam qeveri tjetër. Kjo është “hane Shan, hane Bagdad”, po punë e tyre. Unë besoj se në këtë rast, faturën e merr Shqipëria, sepse momenti është jashtëzakonisht delikat. Janë 6 muaj kyç, për të lidhur përfundimisht Shqipërinë me familjen europiane. Çdo gjë, sado e vogël në dukje, mund të kthehet në pengesë në një moment të caktuar, për të mos u realizuar kjo ëndërr kaq e madhe dhe kaq e gjatë, sepse procesi tani nuk është më në dorën tonë.

Ne i kemi kryer të gjitha ato detyra shtëpie që na kanë lënë dhe nga janari do fillojë të japë edhe vetting-u rezultatet konkrete dhe kështu, gjithçka na është thënë, është kryer. Mirëpo janë vendet anëtare që duhet të marrin vendim dhe çdo vend anëtar ka pozicionin e vet, jo domosdoshmërisht lidhur me Shqipërinë, apo me Maqedoninë, por ka pozicionin e vet, lidhur me zgjerimin dhe çdo luhatje e jona nuk forcon pozicionin tonë, por e dobëson pozicionin tonë në raport me një vend, apo një vend tjetër. Është katastrofë të mos e shikosh këtë, apo ta shikosh e të mos duash t’ia dish fare për këtë dhe të merresh me bojkote e me përralla të tjera, që nuk çojnë asgjëkund, nuk japin asnjë lloj rezultati në raport me objektivin. Nuk ndryshohet qeveria me bojkote. Nuk ndodh. Ne nuk e kemi kërkuar kurrë këtë gjë, kur ishin në opozitë dhe kur bëmë bojkotin.

Natyrisht, ne nuk do ta presim opozitën, siç nuk e pritëm në rastin e Prokurores së Përgjithshme, në rast se opozita nuk shfrytëzon kohën që është për dialog, për të bërë dialog. Ka një kohë për të bërë dialog, ka një kohë për të vendosur. Kohën për të vendosur e përcakton në këtë rast legjislacioni, nuk e përcaktojmë ne. Ne respektojmë kohën që përcakton legjislacioni. Deri kur të vijë ajo kohë, është koha për dialog. Nëse kohën për dialog, opozita nuk e shfrytëzon, kjo është përgjegjësi e opozitës. Përgjegjësia jonë është që të jemi të hapur dhe të jemi të vërtete në kërkesën për të bërë dialog dhe për të gjetur zgjidhje. Dialogu dhe zgjidhjet gjenden në tavolinë, nuk gjenden në distancë, siç ndodhi në 18 maj.

Paaftësia për t’u ulur në tavolinë është një gjë e pakuptueshme për mua. Nuk është e thënë që të biesh dakord. Ulja në tavolinë është detyrë parësore, e patjetërsueshme, e çdo njeriu që përfaqëson të tjerë në skenën politike. Të ulesh në tavolinë e ke detyrë ta bësh këtë. Pastaj, bie dakord, nuk bie dakord, këtë e ke përgjegjësi personale dhe politike tënden. Nuk e  ke detyrë të biesh dakord.

Zoti Rama, kisha 3 pyetje që kanë të bëjnë me çështjen e Prokurorit të Përgjithshëm të përkohshëm. E para ka të bëjë sidomos me ftesën tuaj ndaj zotit Basha, për t’u ulur dhe për të zgjidhur çështjen me dialog. Një ftesë, kanë qenë disa në fakt, por e para ka ardhur në 6 dhjetor përmes një postimi në Facebook, një ditë para se zotit Llalla t’i mbaronte mandati. Ndërkohë në Kuvend, në datë 13 nëntor ka mbërritur një përgjigje nga misionet e OPDAT dhe EURALIUS në përgjigje ndaj kërkesës për këshillë të zotit Manja. Pra, duket se mazhoranca i kishte nisur lëvizjet për çështjen e Prokurorit të Përgjithshëm më herët, diku nga fillimi i nëntori. Pse pritët kaq gjatë për të ftuar zotin Basha në dialog e për ta zgjidhur bashkërisht këtë çështjen? Ka diku rreth një muaj në mes. A ishte e sinqertë ftesa juaj?

Pyetja e dytë ka të bëjë me kandidaturat. Komisioni i dërgoi një raport sallës plenare ku evidentoheshin se ishin tre kandidatë që plotësonin kushtet formale ligjore. Pse zgjodhi PS të mbështeste me firma vetëm një prej këtyre kandidatëve dhe a ishte zonja Marku, një preferencë amerikane?

Zoti Basha ka thënë se i është ofruar pazar për zgjidhen e çështjes së Prokurorit të Përgjithshëm të përkohshme dhe ka deklaruar se ka pasur kontakte edhe me ju për çështjen. A mund të na thoni për çfarë keni biseduar konkretisht?

Kryeministri Edi Rama: Kam dëgjuar në fakt, që ka analistë dhe komentatorë që marrin përsipër të bëjnë deri edhe radiografinë e sinqeritetit të një ftese apo të një propozimi. Janë gjëra që unë nuk i kuptoj dot. Çdo me thënë, a ishte e sinqertë, apo nuk ishte e sinqertë? Ftesa është ftesë, pastaj, a është e sinqertë, a nuk është e sinqertë, këtë e tregon prova e dialogut dhe rezultati. Në fund të ditës, ky është shah. Gjithkush bën lëvizjet e veta. A është e sinqertë lëvizja, apo nuk është e sinqertë lëvizja, kjo është një bisedë e pakuptimtë. Ajo që është e rëndësishëm është, a është lëvizja në funksion të rezultatit, apo nuk është lëvizja në funksion të rezultatit. E rezultati që unë dëshiroja ishte një zgjidhje e mirëkuptuar, zgjidhje me mirëkuptim. Nuk kishte ndonjë shpikje për të bërë aty, por thjesht ishte mundësia për të pasur një zgjidhje me mirëkuptim, duke e kryer procesin sëbashku.

Për të ardhur tek pyetja tjetër, procesi i kryer nga ana jonë nxori si rezultat mbështetjen e plotë për prokuroren aktuale, të zgjedhur me votat tona. Nëse do ta kishim bërë bashkërisht, rezultati mund të ishte i ndryshëm, ose mund të ishte po ky, por zgjedhja do të ishte bërë e mirëkuptuar. Këtë muhabetin e pazarit, unë nuk e kuptoj çdo me thënë realisht, sepse edhe gjatë ditëve që unë kërkoja tryezë e dialog e dëgjoja “nuk bëjmë pazare ne”. Këtë e përcakton vetë ti, bën pazar, apo nuk bën pazar, por tryeza dhe dialogu nuk do të thonë pazar. Do të thonë, njerëz të civilizuar, ulen dhe bisedojnë me njëri-tjetrin, kanë pozicione të ndryshme dhe identifikojnë, nëse kanë apo jo qëllime të përbashkëta. E qëllimi i përbashkët është Shqipëria dhe interesi i vendit për të çuar përpara reformën në drejtësi e për të mos u bërë lolo në sytë e të tjerëve, në radhë të parë, se ne Prokurorin e Përgjithshëm e zgjidhnim edhe pa opozitën, nga pikëpamja e numrave. Atëherë, pse qenka e pasinqertë ftesa?! Ndërkohë që ne nuk kemi pasur asnjë paragjykim, ose parapërcaktim të një kandidature apo një tjetre, sepse kandidaturat janë ofruar vetë.

Përsa i përket datës së bërjes së ftesës dhe datës së ardhjes së opinionit, nuk e kuptoj lidhjen, sepse unë e kam bërë ftesën, kur ka ardhur momenti për të bërë ftesën. Pastaj seç ka bërë Komisioni i Ligjeve për punën e vetë, duke marrë konsulencë nga misionet e drejtësisë të SHBA dhe BE, është puna e Komisionit të Ligjeve. Nuk i shoh këto të dyja të bashkuara, sepse për ne nuk ka pasur dilemë që duhej zgjidhur kjo çështje. Misionet e SHBA dhe BE thjesht e kanë konfirmuar pozicionin tonë, por dilemë ne nuk kemi pasur. Kështu që nuk kanë lidhje këto të dyja, pasi nuk është se ne nuk e dinim sesi do të zgjidhej ngërçi dhe na e thanë amerikanët apo europianët. Që ne përsëri ishim në një mendje me ta, kjo është e vërtetë. Kjo është pyetja që duhet të bëjë çdo kush, si ka mundësi që në asnjë moment nuk ka pasur diferenca pozicionesh mes Partisë Socialiste, Shteteve të Bashkuara dhe Bashkimit Eurpian, kur ka ardhur puna tek Reforma në Drejtësi dhe Vetting-u? Gjithmonë diferencat kanë qenë mes PS, SHBA dhe BE, nga njëra anë dhe PD, nga ana tjetër dhe sipas rastit, këpucëve të stinës. Sepse ne jemi forca që e kemi kërkuar këtë reformë, jemi forca që e kemi marrë përsipër këtë reformë dhe jemi forca që do ta garantojë deri në fund këtë reformë e që nuk duam t’ia dimë fare llogarive se kë do preki e kë nuk do preki. Pyll pa derra nuk ka. Çdo derr duhet të përgjigjet, në rastin kur është i fshehur nën kostumin e politikanit dhe të japë llogari para drejtësisë, nëse nën atë kostum ka abuzuar me besimin e publikut në çdo zyrë ku ka hyrë. Partitë politike nuk përgjigjen, nuk mbajnë përgjegjësi për faktin nëse kanë, apo nuk kanë derra mes tyre, por për mënyrën si reagojnë, kur derrat zbulohen. Këtu është dallimi.

Ne jemi të qartë e të vendosur në këtë pikë. Për ne nuk ka ekuivok në këtë pikë. Ne duam ta ndajmë historinë e Shqipërisë në dysh; midis historisë se kur je i joni, je i ndershëm, kur je kundërshtar, je i të gjitha të zezave dhe i historisë se kush është i ndershëm dhe se kush është i të gjitha të zezave, këto i përcakton drejtësia. Politikanët nuk janë për të përcaktuar ndershmërinë dhe pandershmërinë e njëri-tjetrit, por janë për të bërë detyra të tjera, janë për të zbatuar ato për të cilat i zotohen njerëzve dhe për t’u përgjigjur para ligjit për gjithçka, qoftë edhe kur akuzohen pa të drejtë. Është ligji që duhet të dominojë dhe është drejtësia që duhet ta thotë fjalën e saj deri në fund. Kjo është filozofia jonë.

Është hera e parë që e dëgjoj dhe nuk dua të them asgjë të pavend, se di këtë që paska thënë Luli, që ka biseduar me mua dhe që unë i paskam ofruar një pazar. Unë di që e kam kërkuar, i kam telefonuar e natyrisht, në anën tjetër ka qenë Albtelecom-i, i kam çuar mesazh, a mund të komunikojmë dhe sigurisht që në anën tjetër ka qenë pasqyra e ekranit të telefonit. Nuk kemi komunikuar dhe nuk ka pasur asnjë lloj përpjekjeje për ndonjë pazar nga ana ime. Unë nuk di ç’pazar mund të bëhet me këto çështje kaq të rëndësishme dhe pse këtyre u shkon mendja gjithmonë tek pazari, pse e kanë fjalën pazar në majë të gjuhës. Ç’e kanë këtë, sikur janë rritur mes gjelave të detit dhe çdo përpjekje që t’u afrohesh, u kujton ndarjen e gjelave. Diçka kanë që sa herë që i kërkon në mënyrë normale të flasim, menjëherë i kujtohet gjeli i detit dhe thotë nuk vij, sepse ndërkohë kanë frikë se kofshët i merr tjetri dhe u ngelet lafsha këtyre.

Zoti Kryeministër, ju pazgjidhshmërisht e keni parë reformën në drejtësi të lidhur me investimet e huaja. Raportimet e fundit që vijnë nga Instituti i Statistikave, por dhe nga institucionet financiare ndërkombëtare flasin për një rritje ekonomike përtej parashikimeve të qeverisë, kryesisht në tremujorin e fundit të këtij viti. Ju sa të ndjeshme e shikoni pjesëmarrjen e investimeve të huaja në vendin tonë gjatë 2018 dhe sa përqind e tyre do të vijnë nga diaspora?

Në janar të 2018-s pritet të nisë edhe një lloj vetting-u në Policinë e Shtetit. Kur i prisni ju rezultatet e para, duke pasur parasysh disa ngjarje kriminale të shënuara në disa qytete të vendit si Vlora dhe Elbasani?

Kryeministri Edi Rama: Reforma në Drejtësi është vetvetiu e lidhur edhe me forcimin e rendit ligjor ekonomik dhe patjetër që do të sjellë fryte të dobishme edhe në këtë drejtim. Besoj se vitin e ardhshëm, ne kemi arsye të jemi optimistë për nisjen e disa investimeve të rëndësishme. Mund të përmend aeroportin e ri të Vlorës, disa investime të rëndësishëm në turizëm dhe në energjetikë. Ndërkohë që programi ynë “1 miliardë për rindërtim” do të jetë një instrument shumë i rëndësishëm për rritjen e punësimit dhe rritjen ekonomike.

Përsa i përket vetting-ut në polici, është e vërtetë që do të nisë në janar, pasi gjatë 100 ditëve të para është përgatitur gjithë baza për zbatimin e tij. Ndërkohë kemi përgatitur dhe bazën, për të bërë një vetting në administratën shtetërore. Nuk flas për administratën publike, për shërbimin civil që në një farë mënyrë është një sistem i garantuar dhe që ka baza shumë të favorshme për t’u forcuar në vijimësi. Flas për pjesën tjetër të administratës, për të pastruar të gjithë ato raste ku diploma nuk përputhet me vendin e punës, apo ku bëhet fjalë për rekrutime me letra false. Ka shumë të tilla për fat të keq dhe për këtë kemi përgatitur një program e besoj se në 6-mujorin e parë të vitit të ardhshëm do të bëjmë një pastrim të rëndësishëm, edhe në këtë aspekt.

Përsa i përket atyre që ju thatë specifikisht, unë kam shumë besim që ne do realizojmë objektivin. Objektivi është që në fund të këtij 4-vjeçari, Policia e Shtetit të jetë në mesataren e lartë të Bashkimit Europian në çdo aspekt. E kam thënë para 4 vjetësh, e rikonfirmoj sot dhe mbas 4 vjetësh, këtu do jemi e do ta shohim.

E di që për disa nga pyetjet jeni përgjigjur një ditë më parë por duke qenë se TV klan ka audiencën e vet po ju ripërsëris disa. Mes Amerikës dhe Turqisë, me votën e Shqipërisë në OKB, a zgjodhi Shqipëria si aleat strategjik Turqinë? Si e patë ju letrën e Presidentit të Republikës drejtuar homologut të tij amerikan, Donald Trump, për këtë votë?

Një pyetje që mbetet përsëri brenda familjes presidenciale, zonja Kryemadhi ka deklaruar se çizmja që hodhi në drejtimin tuaj në Parlament ishte vetëm një paralajmërim, sepse në Shqipëri mund të rikthehen edhe skenarë të bërjes së drejtësisë si rasti i Esat Pashë Toptanit. Nuk e di nëse zonja Kryemadhi do të jetë Avni Rustemi, apo zoti Petrit Vasili, se dhe ai ka përsëritur të njëjtin kërcënim. A i druheni ju një skenari të tillë?

Edhe një pyetje që ka serish lidhje me Presidentin. Dhënia e nënshtetësisë për Janullatusin, a është një hap në drejtimin e duhur, për të ecur përpara me zgjidhjen e çështjeve të mbetura pezull mes Shqipërisë dhe Greqisë?

Kryeministri Edi Rama: Së pari, pyetja “mes Turqisë dhe Amerikës” është një pyetje që më kujton klanin e vjetër, sepse unë do t’i kthehesha me këtë pyetje, Britania e Madhe mos zgjodhi vallë mes Turqisë dhe Amerikës, Turqinë? Britania e Madhe është aleati më i ngushtë strategjik i SHBA-së. Britania e Madhe ka votuar njësoj si ne. Mos vallë, Britania e Madhe zgjodhi Turqinë dhe braktisi Amerikën? Japonia, një tjetër aleat shumë i rëndësishëm i SHBA-së ka votuar si ne. Më saktë, ne kemi votuar si ata, apo, meqë na bëtë qendrën e botës, me ndihmën e Presidentit tonë, edhe unë po ju flas nga qendra e botës, se kështu u bë kjo punë. S’po flas për të tjerët, Gjermaninë, Francën etj., se këto vende për ju janë të një rëndësisë të dytë.

Përgjigja ime është shumë e thjeshtë. Jemi në një katund politik dhe mediatik dhe që në mes në sheshin e katundit nuk është monumenti i lirisë, por është një kazan, këtë e provon ky debat idiot, që ka gjithë këto ditë këtu në katundin tonë. Një debat që nuk zhvillohet në asnjë vend tjetër nga 100 e disa vendet që kanë votuar si Shqipëria dhe që nuk zhvillohet as në Amerikë, e zhvillojmë vetëm ne. Ne këtu në katundin tonë jemi të shqetësuar se çfarë i ndodhi Amerikës dhe kazani jonë zien. A e kuptoni tani, se kur them katund, kam të drejtë dhe kur them kazan, kam të drejtë e se me çfarë merremi ne, sesa qesharake është. Dhe kam parë të dalin në sheshin e katundit, rreth kazanit si njerëz të dehur, njëri thoshte unë po të isha mi, do hipja në prapanicën e elefantit dhe nuk do e zgjasja fare dhe elefanti dihet kush është. Kushedi si i dukej elefanti, miut të dehur atje.

Kjo është e vajtueshme.

Ne kemi mbajtur qëndrimin që Shqipëria ka zgjedhur përpara sesa ne të vinim në qeveri dhe që ne e konsiderojmë zgjedhje të drejtë, pikërisht për të mos hyrë në këto lloj historish, sa herë ka votime. Zgjedhja e Shqipërisë ka qënë koherente, e drejtë dhe racionale. Shqipëria voton si BE dhe ky vendim i është bërë i qartë të gjithëve, që kur është marrë. E keni lexuar rezolutën që ka votuar Shqipëria në 2011-ën? E keni lexuar sesi Shqipëria voton për të dënuar pushtimin e  territoreve nga Izraeli etj. dhe kundër SHBA? Në atë rezolutë kanë mbajtur qëndrim kundër. Do të thotë kjo që Shqipëria në 2011-n i hapi luftë Amerikës? Shqipëria në 2011-n zgjodhi Turqinë? Nuk arrij ta kuptoj, çështë kjo idiotësi.

Shqipëria ka një pozicion që e ka përcaktuar vetë, me të drejtë. E kanë përcaktuar ata që sot bëjnë kritika kot, në hava. Ne e konsiderojmë pozicion racional, sepse është një pozicion që i takon Shqipërisë si vend kandidat sot për BE. Do thoni që disa vende të BE nuk i qëndruan asaj linje, e kanë bërë për arsye të tyret. Ka vende në BE sot, që bëjnë politikë kundër BE-së. Ne s’jemi nga ato vende. Ka vende në BE që kanë konflikte me BE-në. Ne s’jemi nga ato vende. Mbi të gjitha, unë e kam shumë të qartë sa e madhe është Shqipëria në glob, s’kam asnjë iluzion për fuqinë dominante të Shqipërisë në hartën e botës. Edhe ju e keni të qartë, patjetër. Atëherë, për çfarë i dëgjoni dhe lodheni me këta politikanë, që nuk e kanë të qartë sa e madhe është Shqipëria në hartën e botës. Ne jemi një vend i vogël, shumë i vogël madje dhe kemi disa pozicione që besoj janë pozicione dinjitoze dhe ky besoj është një pozicion dinjitoz. Ne s’kemi pse të jemi një vend dhe i vogël dhe qesharak. Ndërsa këto reagime janë pikërisht reagime prej politikanësh qesharakë, kapedanësh të katundit, që iu duket vetja se mbajnë botën në kurriz dhe se bota i shikon.

Lexoni ‘Viti i mbrapshtë” të Ismail Kadaresë. Bëjani vetes këtë dhuratë, këto ditë pushimi. Aty i keni të gjithë. Si i merrnin monopatet për t’i hapur luftë botës, si mbasi deheshin e si mendonin që kishin fituar zemrat e Portës së Lartë.

Përsa i përket Avni Rustemit, Monika më kujton më shumë Eleonorën e Selitës sesa Avni Rustemin.

Ka bërë shumë mirë Presidenti që i ka dhënë nënshtetësinë Kryepeshkopit, – ky është qëndrimi im. Unë besoj që është një akt, i cili është i vonuar dhe i cili pajton dhe nuk ndan. Kjo është vërtetë ana pozitive e këtij akti. Natyrisht që figura e Kryepeshkopit është e ngarkuar me një simbolikë të rëndë, në kuptimin e peshës, një simbolikë komplekse, por të mos e harrojmë asnjëherë që Kryepeshkopi ishte drejtuesi i një procesi rilindjeje nga hiri i kishës Ortodokse dhe Shqipëria nuk e kishte dot në atë moment të parë, Fan Nolin e vet. E në këtë fazë tranzicioni, sepse unë këtë e konsideroj tranzicion, nuk e konsideroj pikë mbërritjeje të Kishës Autoqefale Shqiptare, Kryepeshkopi ka luajtur një rol të rëndësishëm, që unë e konsideroj pozitiv, edhe pse me Kryepeshkopin jo gjithmonë kemi ndarë të njëjtat pikëpamje. Kompleksiteti i kësaj simbolike lidhet edhe me faktin që në vendin fqinjë dhe me vendin fqinj janë të lidhura shumë fate dhe është e lidhur dhe cilësia e jetës dhe e mirëqenies e popujve tanë. Kjo ka ndikuar nganjëherë negativisht dhe padrejtësisht mbi figurën e Kryepeshkopit. Unë kështu e shikoj dhe besoj që ka qenë gjëja e duhur. Ka bërë shumë mirë Presidenti në këtë rast.

Katundi dhe kazani e ka një të parë dhe kam bindjen që dihet kush është ai, megjithatë, gjatë kohës që Presidenti Meta është ulur në atë zyrë, ju jeni takuar disa herë dhe madje personalisht. Gjatë kësaj kohe nuk kishit një mundësi që të takoheshit me zotin Meta, për të shmangur këtë shfaqje të dykahshme me votën në OKB, ku një votë është kundër dhe një letër shkon pro.

Gjatë këtyre takimeve, a ju ka treguar Ilir Meta se pse nuk e dekreton Helidon Bendon në krye të SHISH.

Kryeministri Edi Rama: Nëse do ta dija që e kishe për Presidentin që është i pari i katundit dhe i kazanit, do kisha qenë edhe më i ashpër në reagimin tim, por e përmbajta veten se mendova se e kishe për mua.

Unë nuk e kam takuar disa herë. E kam takuar disa herë Presidentin, por në zyrë jemi takuar vetëm një herë.

Shqipëria e ka shumë të qartë kushtetutshmërisht natyrën e Republikës së saj dhe politika e jashtme është ekskluzivitet i qeverisë. Sigurisht që mund të kishte pasur konsultime, por, nga ana tjetër, unë nuk di për çfarë do konsultohesha me Presidentin, kur vendimi për një qendrim konform qendrimit të BE-së të Shqipërisë, në të gjitha rastet kur votohet në Asamblenë e Kombeve të Bashkuara, është marrë përpara sesa ne të vinim në qeveri dhe unë të bëhesha Kryeministër. Presidenti e di këtë, sepse ka qenë më parë aty ku është sot, ministri i Jashtëm.

Unë nuk mund ta kisha parashikuar dot letrën e Presidentit, siç nuk parashikova dot këpucën e Monikës. Janë gjëra këto që nuk parashikohen. Fuqia ime për të parashikuar nuk shkon dot deri këtu, kështu që këto ndodhën. Natyrisht, nëse do të kisha pasur ndjesinë se mund të ndodhnin, do kisha bërë diçka për t’i parandaluar. Nuk e pata këtë ndjesi, por kjo nuk do të thotë aspak se në këtë rast, ne kemi vepruar në mënyrë të njëanshme. Ne nuk kemi vepruar në mënyrë të njëanshme, ne jemi bërë pjesë e konsensusit politik, duke iu bashkuar vendimmarrjes së paraardhësve për qëndrimin e unifikuar me Bashkimin Europian. Ju e kuptoni shumë mirë, çfarë është e gjitha kjo.

Ju kujtohet kur fitoi Trump-i dhe këta festonin më shumë se Trump, sikur kishin fituar zgjedhjet këtu. Se menduan se fituan zgjedhjet këtu. A ju kujtohet se çfarë thonin në fjalimet e tyre në Parlament, pas fitores së Donald Trump në Amerikë? Edhe tani është shumë e qartë. Këta mendojnë se erdhi momenti që t’i thonë “si e harrove këtë çunin?” E kuptoni sesa qesharake është kjo? E kuptoni se çfarë mënyre e të parit të botës është kjo? Pastaj thoni, pse unë them katund e pse unë them kazan. Ku ka më katund e më kazan se kjo! Si mundet ta mendojmë Amerikën, sikur është një lagje “Ali Demi” dhe tani të lidhemi me të fortët e “Ali Demit” që të luftojmë me çunat e “Laprakës”. E t’i themi atyre në “Ali Demi” që aty në “Laprakë” janë ca që flasin keq për ju. E të vijnë Ali Demsit e të na ndihmojnë neve të Gjirit të Lalzit. Pse, kështu është Amerika dhe politika? Katundit t‘i marrësh të keqen, se në katund i dinë të gjitha. Ky është katund me kostum dhe me këpucë lustrafini.

Kam një pyetje për mosdekretimin e kryetarit të SHISH, Helidon Bendo nga Presidenti?

Kryeministri Edi Rama: Presidenti ka kërkuar kohë të mendohet, ka gjithë kohën të mendohet. Katër vjet po të dojë.

Në lidhje me ekonominë, ju e përmendët pak, që një pjesë e rëndësishme në vitet që vijnë do të jenë investimet publike. Do doja t’ju pyesja në lidhje me investimet e huaja. Ka një shqetësim, sepse vitin që vjen përfundojnë punimet e TAP dhe mund të ketë një rënie të tyre. Çfarë do të bëhet që të kemi më shumë investime të huaja dhe a mund të kemi ndonjë emër të madh vitin që vjen? Është folur ndoshta në turizëm, ju përmendët pak dhe energjetikën.

Kryeministri Edi Rama: Besoj se nuk do ndihet një rënie për shkak të përfundimit të investimit që ju përmendët, sepse faktikisht, edhe nëse shihni balancat në investimet e këtij viti, vendi që zënë investimet e TAP-it nuk është i atillë që të krijojë një boshllëk të pazëvendësueshëm. Sigurisht që është një sfidë, por besoj se do ta përballojmë.

Lidhur me paktin për Europën. Për parantezë, kryetari i opozitës zoti Basha nuk ju beson. Ka deklaruar se nuk e quan gabim marrëveshjen e 18 majit, por e quan gabim investimin në një marrëveshje me dikë që nuk i qëndron marrëveshjeve dhe e ka fjalën për ju. Kur kërkoni pakt për Europën, a ka tjetër në këtë ftesë? Ju si Kryeministër, çfarë keni menduar, çfarë duhet të realizohet mes jush dhe opozitës lidhur me këtë pakt? Zoti Basha ka deklaruar ndërkohë që nuk është opozita që po i pengon negociatat për anëtarësim, pasi nuk është detyrë e opozitës që të luftojë krimin dhe korrupsionin. Në këtë situatë, nëse ju uleni për këtë pakt për Europën, çfarë duhet të realizoni mes jush?

Kryeministri Edi Rama: Më lër t’ia them zotit Basha, kur të ulemi, që mos t‘i djegim kështu në distancë, aq më tepër që ai nuk më beson. Është artist. Ai më beson, por ka frikë.

Ju keni qenë në New York dhe keni takuar dhe përfaqësues të diasporës. A ju kanë shprehur ata rezerva apo vërejtje për mungesën e investimeve të diasporës shqiptare të Amerikës, në Shqipëri? Shifrat flasin për numra të ulët, krahasuar me mundësitë që ata kanë për të investuar në Shqipëri. Ka problematika në këtë mes? Sepse ne i dimë dhe këto investimet patriotike. Nga Kosova vijnë bëjnë turizëm, bëjnë investime, por nga Amerika ju janë shprehur?

Kryeministri Edi Rama: Kam përshtypjen që ka pasur një thyerje të hershme në fillim të viteve ’90-të që nuk është rikuperuar. Nga ana tjetër, kjo ka qenë dhe është edhe arsyeja, pse unë kam vendosur kontakte të vazhdueshme me diasporën në SHBA, sepse aty ka një potencial shumë të madh. Kini parasysh që janë 1000 milionerë shqiptarë të regjistruar në SHBA dhe kam besim që do të mund të bëjmë një ndryshim në këtë aspekt, kryesisht në turizëm, por do të kërkojë kohën e vet. Ata janë të interesuar, por me të drejtë duan të kenë një garanci të plotë se gjërat do të funksionojnë, siç janë të shkruara në letër, në ligjet që ne tashmë i kemi miratuar.

Një vit më parë, ne kemi qenë në të njëjtat pozicione. Ju, në konferencën e fundvitit aty ku jeni ulur, unë kam qenë këtu dhe ju kam pyetur për arrestimin e Klement Balilit. Aso kohe më thatë se edhe Eskobari i vërtetë e kishte Amerikën autostradë, bënte autostradën e drogës, ndërsa unë ju kam kujtuar që Shqipëria është shumë e vogël, është sa një autostradë e Amerikës dhe ndaj kapja e tij, sipas jush ishte çështje kohësh. Ka kaluar një vit. Çfarë është bërë me Klement Balilin dhe a do duhet të presim edhe një vit tjetër, në konferencën e ardhshme, për arrestimin e tij. Së dyti, çfarë dhurate do t’i bëni Lulzim Bashës si djalë i mirë dhe artist që është sipas jush?

Kryeministri Edi Rama: Për pyetjen e parë, që të mos humbasim kohë, shikoni në arkiv përgjigjen e parë dhe është e njëjta, si për pyetjen e këtij viti.

Përsa i përket çfarë dhurate do t’i bëj Lulzim Bashës, të them të drejtën këtë nuk e kam menduar, sepse ai artist është, djalë i mirë, por nuk jemi miq, jemi shokë. Kështu që nuk kam ndonjë dhuratë në adresë të Lulzim Bashës për këtë vit.

Në mbledhjen e fundit të qeverisë miratuat disa ndryshime në rregulloren për kthimin dhe kompensimin e pronave. I kanë konsideruar pronarët si një sekuestrim i ligjshëm tashmë sërish i pronave të tyre. Jeni konsultuar ndonjëherë me ta dhe pse lihen gjithmonë në harresë?

Kryeministri Edi Rama: Jemi konsultuar gjithmonë me ta, por sigurisht që nuk ekziston sot, një mundësi për të bërë një ligj që i plotëson 100% dëshirat dhe pritshmërie e tyre. Kjo është e pamundur.

Gjithmonë referuar këtij paktit për Europën. Mu kujtua një deklaratë e juaja, mbrëmë kur flisnit për disa sondazhe në bazë të të cilave, nëse shkoni të dielën në zgjedhje, ju mund të merrni 78 mandate. Nëse ndiheni kaq i sigurtë, ky pakt për Europën me zotin Basha, a mund të përfshijë dhe kalimin në zgjedhje të parakohshme?

E dyta, duket sikur ka një çështje që ju vijoni ta shmangni. Nuk keni shumë dëshirë të flisni dhe është pjesa e bisedimeve me Greqinë. Ka disa detaje të cilat ne, publiku shqiptar po i merr vesh nga mediat greke, sipas të cilave nënshtetësia e zotit Janullatos është kërkuar gjatë bisedimeve në Kretë nga ministri i Jashtëm grek. Gjithashtu nuk kemi asnjë sqarim nga qeveria shqiptare përsa i përket çështjeve të varrezave. A mund të na sqaroni diçka për çështjen e bisedimeve me Greqinë.

Kryeministri Edi Rama: Së pari, zgjedhjet nuk janë futboll me porta të vogla midis “Ali Demit” dhe “Laprakës”. Zgjedhjet bëhen kur e përcakton Kushtetuta dhe mund të bëhen të parakohshme kur janë arsyet që parasheh Kushtetuta. Por, përsa i përket çfarë mendon opinioni publik, ju s’keni pse dëgjoni çfarë them unë. Ju keni mundësi t’i bëni vetë anketimet e opinionit publik dhe të verifikoni, nëse ajo që them unë është e vërtetë apo jo, sepse nganjëherë mund të duket gabimisht sikur, nëse unë them që sot, opinioni publik ka këtë opinion, bazuar në anketimin tonë dhe se po të votohet ditën e diel marrim 78 deputetë, kjo do të thotë që ne jemi të përsosur. Absolutisht, kjo s’është kështu. Unë kam besuar dhe besoj gjithmonë e më shumë se shqiptarët janë shumë më të mençur, sesa i di dhe sa i merr politika këtu në Tiranë, sesa i dinë dhe i marrin partitë, drejtuesit e partive, apo deputetë të partive, që i kujtojnë për budallenj.

Ne jemi një forcë që kemi pa diskutim defektet tona, kemi kusuret tona, por jemi pa diskutim ndryshe nga të tjerët dhe jemi qartësisht në anën e duhur të historisë, në të gjitha aspektet. Kjo është arsyeja, pse shqiptarët na votojnë. I duhet bërë një pyetje vetes: Pse duhet shqiptarët të votonin, apo të votojnë këtë që është opozitë? Për të gjuajtur me këpucë? Për cilën ide? Për cilin ekip? Për çfarë programi?

Këto janë gjëra që shqiptarët i shohin. Për cilën besnikëri ndaj tyre e ndaj vendit? Për cilën reformë? Për çadrën që ngritën për të bllokuar vetting-un do ta votonin shqiptarët Partinë Demokratike në qershor? Për çadrën që ngriti 3 muaj, që të bllokonte vetting-un dhe që thoshte vetting s’do ketë kurrë? Ishte gati të hidhte në erë zgjedhjet dhe të drejtën e njerëzve për të zgjedhur, vetëm që të mos bëhej vetting-u. Pse duhet të bliheshin e pse duhet të shiteshin, kur ishte shumë e qartë zgjedhja? Sot, për çfarë, shqiptarët duhet të jenë më shumë besimplotë, seç ishin në qershor, ndaj kësaj opozite; Për ato tym-shpërndarëset e stadiumit në parlament? Për këpucët? Për klithmat histerike? Për skenat qesharake? Për refuzimet absurde për të çuar përpara reformën në drejtësi? Apo për të gjithë batarenë e shpifjeve e të baltës?

Sigurisht, kjo nuk do të thotë që ne jemi të përsosur, apo që ne s’kemi të sharë. Ne kemi të sharë, patjetër. Ju mos prisni që unë t’ju them faleminderit kur shani, por që ju nuk jeni gjithmonë gabim, kjo nuk diskutohet. Ama e vërteta është që ne jemi të vetëdijshëm për gabueshmërinë tonë dhe jemi të vetëdijshëm për vështirësinë dhe përpiqemi seriozisht, përpiqemi me gjithë zemër. Nuk bëjmë gabime të qëllimshme. Natyrisht e kemi shumë të qartë se kush gabon në raport me ligjin duhet të paguajë. Nuk mundet dot t’ia lërë faturën Partisë Socialiste dhe të gjithë familjes tonë politike, kushdo qoftë.

Nuk janë gjëra të mëdha, janë gjëra të thjeshta, por kush i ka bërë këto në 20 e kusur vite, siç i bëjmë ne? Askush. Kush i ka bërë reformat, siç përpiqemi t’i bëjmë ne, me të gjitha problematikat, me të gjitha defektet? Askush.

Ndërkohë që negociatat me Greqinë janë negociata shumë serioze. Janë një mësim shumë i mirë për të gjithë ata që kontestonin qëndrimin tonë. Është ai qëndrim që na ka çuar në negociata dhe ne negociatat kemi dashur. Por jemi ulur dhe po negociojmë gjëra për të cilat deri dje as nuk imagjinohej se mund të negociohej dhe jo domosdoshmërisht për fajin e fqinjëve, por për paqëndrueshmërinë, mungesën e seriozitetit dhe rëndom, servilizmin qesharak të politikës këtu në Tiranë ndaj fqinjëve.

Përsa i përket varrezave duhet ta dini që është thjesht dhe vetëm zhbllokimi i një procesi të dakordësuar nga qeveria e mëparshme. Nuk ka asgjë të re. Është proces i dakordësuar, që zhbllokohet në funksion të të gjitha zgjidhjeve dhe të mirëkuptimit të plotë për të gjitha çështjet, sepse ne Greqinë e dëshirojmë partner strategjik. E kemi pasur qartësisht në programin tonë, trekëndëshin e partneritetit strategjik të Shqipërisë me Italinë, me Turqinë, me Greqinë. Për këtë, ne jemi shumë të inkurajuar nga fakti se jemi në tryezë dhe po negociojmë. Nuk ka as sekrete, as konspiracione, as gjëra për të fshehur, por është negociatë reale, me grupe ekspertësh, negociatë intensive. Raundi tjetër është në janar, në mos gabohem, në Shqipëri. Po negociohet për të mbyllur kapituj që nuk mund të imagjinohej që do të mbylleshin ndonjëherë, që nga ligji i luftës, një absurditet, por që ka pasur një fuqi të madhe në një aspekt shumë të rëndësishëm të marrëdhënieve, që ka të bëjë me pronat. Kështu që, kjo është një arsye për të vlerësuar qasjen tonë të re në politikën e jashtme, jo në linjat kryesore, sepse janë ato që kanë qenë gjithmonë, por në mënyrën e sjelljes dhe të qëndrimit ndaj të tjerëve.

Në Maqedoni, sot po bëhet normë ligjore, ajo që nuk mund të imagjinohej deri dje, gjuha shqipe. Në mbledhjen e përbashkët mes qeverisë së Shqipërisë dhe qeverisë së Maqedonisë ndodh diçka që nuk imagjinohej dot, që një përfaqësues i qeverisë së Maqedonisë, zëvendëskryeministri konkretisht, raporton live për Marrëveshjen e Ohrit përpara dy kryeministrave. Kur ne e përmendnim Marrëveshjen e Ohrit me dyer të mbyllura, përgjigjja ishte, ç’punë keni ju me marrëveshjen e Ohrit, është punë e brendshme.

Këto janë gjërat e mëdha që këtu nuk llogariten, se këtu ka më rëndësi lajmi që një makinë përplasi gjyshen për vdekje, por gjyshja shpëtoi për një qime. Në një territor që jepet ky lajm, patjetër që jemi në qendrën e botës, nuk diskutohet. Këtu pastaj nuk diskutohet që këpucët janë raketa kozmike.

Shumë faleminderit për të gjithë këtë vit!

Të jeni mirë! Të kaloni mirë! Gëzuar me prindërit, bashkëshortët, me të dashurit, të dashurat, fëmijët, të afërmit dhe cilindo që ju do zemra, kuptohet edhe me pronarët!