Në mbështetje të nenit 100 të Kushtetutës, të nenit 4, të ligjit nr.7926, datë 20.4.1995, “Për transformimin e ndërmarrjeve shtetërore në shoqëri tregtare”, të ndryshuar, dhe të neneve 3 e 5, të ligjit nr.8744, datë 22.2.2001, “Për transferimin e pronave të paluajtshme publike të shtetit në njësitë e qeverisjes vendore”, të ndryshuar, me propozimin e ministrit të Zhvillimit Ekonomik, Turizmit, Tregtisë dhe Sipërmarrjes, Këshilli i Ministrave

1. Shoqëria “Qendra sportive”, sh.a., Tiranë, me kapital 100 për qind shtetëror, aktualisht në pronësi të Ministrisë së Zhvillimit Ekonomik, Turizmit, Tregtisë dhe Sipërmarrjes, transferohet në pronësi të Bashkisë Tiranë, me të gjitha të drejtat dhe detyrimet, në momentin e hyrjes në fuqi të këtij vendimi.

2. Ngarkohen Ministria e Zhvillimit Ekonomik, Turizmit, Tregtisë dhe Sipërmarrjes, Ministria e Punëve të Brendshme dhe Bashkia Tiranë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës dhe të nenit 4, të ligjit nr.10325, datë 23.9.2010, “Për bazat e të dhënave shtetërore”, me propozimin e ministrit të Financave, Këshilli i Ministrave

1. Krijimin e bazës së të dhënave shtetërore të Sistemit të Menaxhimit të Borxhit dhe Analizës Financiare (SMBAF), i cili përmban të dhëna për kreditorin, huamarrësin, termat dhe kushtet financiare për çdo kredi dhe letër me vlerë, shtetërore e të garantuar, sektorin për të cilin shpërndahen fondet e kredisë/letrës me vlerë si dhe kurset e këmbimit. Sistemi pasqyron të dhëna faktike dhe kryen parashikime në përputhje me termat financiarë të marrëveshjeve përkatëse.

2. Përbërësit e arkitekturës software dhe hardware të sistemit miratohen nga Autoriteti Rregullator Koordinues.

3. Të dhënat që përmban sistemi janë vetëm të dhëna parësore, pasi ai nuk merr të dhëna nga sisteme të tjera. Të dhëna parësore konsiderohen të dhënat e gjeneruara nga SMBAF-i dhe që kanë të bëjnë me:

a) informacion për huadhënësin;

b) huamarrësin;

c) termat dhe kushtet e kredisë/letrës me vlerë;

ç) disbursimet;

d) shërbimet e borxhit;

dh) kurset e këmbimit.

Sistemi bën të mundur prodhimin e raporteve të ndryshme mbi borxhin e jashtëm.

4. Subjekti përgjegjës për administrimin e sistemit SMBAF është Ministria e Financave.

5. Dhënës i informacionit për sistemin është Ministria e Financave.

6. Subjekte të interesuara janë:

a) Ministria e Financave;

b) Banka e Shqipërisë;

c) Banka Botërore;

ç)  Fondi Monetar Ndërkombëtar (FMN);

d) Eurostat-i;

dh)  agjencitë e Credit Ratings;

e) ministritë e linjës/insitucione që zbatojnë projekte që financohen me kredi të huaja, etj.

7. Niveli i aksesit në sistemin dhe në bazën e të dhënave të SMBAF-it është, si më poshtë vijon:

a) Regjistrues: regjistron informacion për marrëveshjet e kredive, kreditorët, huamarrësit, disbursimet, pagesat, kurset e këmbimit, normat e interesit etj.;

b) Përdorues vetëm lexues: kjo kategori përdoruesish nuk është e lejuar të regjistrojë informacion në sistem. Përdoruesit e kësaj kategorie mund të ekzekutojnë vetëm raporte dhe t’i përdorin ato për qëllime raportimi;

c) Administratorët e sistemit: administratorët e sistemit janë administratorë teknikë, të cilët mirëmbajnë e administrojnë teknikisht sistemin dhe përdoruesit e sistemit SMBAF.

8. Ministria e Financave ka të drejta administrative mbi SMBAF-in, në rolet:

a) Administrator;

b) Raportues;

c) Auditues.

9. Baza e të dhënave të SMBAF-it nuk ndërvepron me baza të tjera të dhënash.

10. Ngarkohet Ministria e Financave për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.147/2015, “Për buxhetin e vitit 2016”, me propozimin e ministrit të Zhvillimit Ekonomik, Turizmit, Tregtisë dhe Sipërmarrjes, Këshilli i Ministrave

1. Pjesëmarrjen e Shqipërisë në Panairin Ndërkombëtar “CMT, Shtutgart 2017”, që do të mbahet nga data 10 deri në 22  janar 2017, si “vend partner”.

2. Në këtë panair Shqipëria përfaqësohet nga Ministria e Zhvillimit Ekonomik, Turizmit, Tregtisë dhe Sipërmarrjes dhe Agjencia Kombëtare e Turizmit (AKT).

3. Autorizohet Agjencia Kombëtare e Turizmit për menaxhimin dhe administrimin e projektit “CMT, Shtutgart 2017” dhe të veprimeve financiare.

4. Autorizohet drejtori i Përgjithshëm i Agjencisë Kombëtare të Turizmit për nënshkrimin e kontratës së pjesëmarrjes në Panairin Ndërkombëtar  “CMT, Shtutgart 2017”.

5. Drejtori i Përgjithshëm i Agjencisë Kombëtare të Turizmit, në nënshkrimin e kontratës, si “vend partner”, udhëhiqet nga tematika kryesore e panairit të turizmit, sipas çështjeve:

a) Turizmi bregdetar;

b) Turizmi i natyrës dhe i aventurës;

c) Turizmi kulturor dhe historik.

6. Gjatë vitit 2016 paguhet shuma prej 58 400 (pesëdhjetë e tetë mijë e katërqind) eurosh, ku përfshihen pagesat si “vend partner”, për një pjesë të organizimit të “Press Trip” me pjesëmarrjen e gazetarëve të huaj si dhe për një pjesë të aktiviteteve përgatitore që do të organizohen gjatë ditëve të Panairit Ndërkombëtar “CMT, Shtutgart 2017”. Shuma tjetër e organizimit të panarit prej 169 800 (njëqind e gjashtëdhjetë e nëntë mijë e tetëqind) eurosh do të paguhet gjatë vitit 2017.

7. Ngarkohen Ministria e Zhvillimit Ekonomik, Turizmit, Tregtisë dhe Sipërmarrjes, Ministria e Financave dhe Agjencia Kombëtare e Turizmit për zbatimin e këtij vendimi.

    Ky vendim hyn në fuqi menjëherë dhe botohet në “Fletoren zyrtare”.

Në mbështetje të nenit 100 të Kushtetutës dhe të neneve 23 e 27, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, me propozimin e ministrit të Financave, Këshilli i Ministrave

1. Miratimin e kuadrit makroekonomik e fiskal për periudhën 2017-2019, sipas lidhjeve nr.1, “Treguesit kryesorë makroekonomikë”, dhe nr.2.1 e nr.2.2, “Treguesit fiskalë sipas buxhetit të konsoliduar”, që i bashkëlidhen këtij vendimi dhe janë pjesë përbërëse e tij.

2. Ngarkohet Ministria e Financave për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

Në mbështetje të nenit 100 të Kushtetutës dhe të neneve 10 e 26, të ligjit nr.114/2015, “Për auditimin e brendshëm në sektorin publik”, me propozimin e ministrit të Financave, Këshilli i Ministrave

1. Njësitë e auditimit të brendshëm krijohen në:

a) ministritë e linjës, institucionet e varësisë të organizuara me degë territoriale dhe bashkitë;

b) çdo institucion tjetër që kryen funksione publike, shoqëritë tregtare, organizatat jofitimprurëse dhe autoritetet e përbashkëta, të cilat zotërohen, kontrollohen, financohen ose garantohen financiarisht nga një njësi e qeverisjes së përgjithshme, si dhe njësi të tjera që shpenzojnë fonde publike sipas një marrëveshjeje ndërkombëtare, të cilat kanë në vit, njëkohësisht jo më pak se 400 000 000 (katërqind milionë) lekë të ardhura financiare dhe 300 punonjës, përgjatë 3 (tri) viteve të fundit të veprimtarisë së tyre, me përjashtim të rasteve kur ngritja e njësisë së auditimit të brendshëm parashikohet nga një ligj i veçantë.

2. Organizimi i njësive të auditimit të brendshëm në nivel sektori apo drejtorie bëhet në varësi të madhësisë dhe kompleksitetit të veprimtarisë së njësisë publike, si dhe në mbështetje të dispozitave të ligjit nr.90/2012, “Për organizimin dhe funksionimin e administratës shtetërore”.

3. Njësia e auditimit të brendshëm përbëhet nga jo më pak se 3 (tre) punonjës, përfshirë dhe drejtuesin e njësisë. Në strukturën e njësisë së auditimit të brendshëm mund të punësohen deri në 1/3 e punonjësve të pacertifikuar si auditues të brendshëm në sektorin publik.

4. Njësitë publike, që krijojnë njësinë e auditimit të brendshëm, sipas pikës 1, të këtij vendimi, nuk programojnë të kryejnë shërbimin e auditimit të brendshëm për njësitë e varësisë, të cilat kanë në strukturën e tyre organizative njësi të auditimit të brendshëm.

5. Në njësitë publike, të cilat kanë varësi nga dy ose më shumë institucione dhe nuk kanë të krijuar njësinë e auditimit të brendshëm, shërbimi i auditimit të brendshëm kryhet nga institucioni në fushën e përgjegjësisë shtetërore të të cilit bën pjesë njësia publike.

6. Njësitë publike, të cilat nuk plotësojnë kriteret për krijimin e njësive të auditimit sipas pikës 1, të këtij vendimi, dhe nuk kanë varësi nga ndonjë organ epror, e sigurojnë shërbimin e auditimit të brendshëm, nëpërmjet:

a) marrëveshjes midis titullarëve të njësive publike përkatëse, të cilat kanë njësi të auditimit të brendshëm dhe kapacitetet e nevojshme për të marrë përsipër kryerjen e shërbimit të auditimit të brendshëm. Kjo marrëveshje miratohet paraprakisht nga ministri i Financave;

b) kontraktimit të personave fizikë ose juridikë, të certifikuar si “auditues të brendshëm”, i cili kryhet vetëm në rastet kur është i pamundur  krijimi i shërbimit të auditimit sipas formave të tjera të parashikuara në nenin 10, të ligjit nr.114/2015, “Për auditimin e brendshëm në sektorin publik”.

Njësia publike, për sigurimin e shërbimit të auditimit të brendshëm me kontraktim, duhet të planifikojë një fond që nuk duhet të jetë më shumë se 30% e pagës mesatare vjetore të një punonjësi, të njëjtë me nivelin e pagës së audituesit në sektorin publik.

Titullari i njësisë publike duhet të njoftojë ministrin e Financave, brenda 30 (tridhjetë) ditëve nga data e kontraktimit të shërbimeve të auditimit të brendshëm, dhe të raportojë për përfundimin e misionit të auditimit.

7. Njësitë publike, brenda 6 (gjashtë) muajve nga data e hyrjes në fuqi të këtij vendimi, të kryejnë organizimin e brendshëm të strukturave organizative për njësitë e auditimit të brendshëm.

8. Vendimi nr.212, datë 30.3.2012, i Këshillit të Ministrave, “Për miratimin e kritereve për ngritjen e njësive të auditimit të brendshëm në sektorin publik”, shfuqizohet.

9. Ngarkohen  ministri i Financave dhe titullarët e njësive publike për zbatimin e këtij vendimi.

     Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës dhe të nenit 4, të ligjit nr.10325, datë 23.9.2010, “Për bazat e të dhënave shtetërore”, me propozimin e ministrit të Financave, Këshilli i Ministrave

1. Krijimin e bazës së të dhënave shtetërore të Sistemit të Programit të Buxhetit Afatmesëm (SPBA).

2. Sistemi i Programit i Buxhetit Afatmesëm (SPBA) përmban:

a) deklaratën e misionit dhe strukturën e programeve;

b) deklaratën e politikës së programit;

c) rishikimin e politikёs sё programit;

ç) tavanet përgatitore të SPBA-së;

d) shpërndarjen e tavaneve për programet;

dh) shpërndarjen e buxhetit për vitin korrent, produkte shtesë dhe monitorimi;

e) shpenzimet e ministrisë, sipas programeve;

ë) shpenzimet e programit, sipas artikujve;

f) shpenzimet e programit, sipas produkteve;

g) menaxhimin e projekteve të investimeve;

gj) faktorët e modifikimit të çmimit;

h) të dhëna për raporte dhe statistika.

3. Përbërësit e arkitekturës software dhe hardware të sistemit miratohen nga Autoriteti Rregullator Koordinues.

4. Të dhënat që përmban sistemi ndahen në të dhëna parësore dhe dytësore, si më poshtë vijon:

a) Të dhëna parësore konsiderohen të dhënat e gjeneruara nga SPBA-ja dhe që kanë të bëjnë me:

· kodet e projekteve;

· kodet e programeve;

· kodet e kapitujve;

· nivelet e programeve;

· nivelet e funksioneve;

· nivelet e burimeve të fondeve;

· faktorët e modifikimit të çmimeve;

· nivelet e projekteve;

· tavanet buxhetore;

· buxhetin e planifikuar për vitin korrent;

· buxhetin e planifikuar për dy vitet e ardhshme;

· planifikimin e produkteve, aktiviteteve dhe out-put-eve.

b) Të dhëna dytësore konsiderohen ato që kanë të bëjnë me të dhëna referenciale të sistemit SIFQ, si :

· kodet e institucioneve;

· kodet e ministrive të linjës;

· kodet e llogarive ekonomike;

· kodet e entiteteve qeverisëse;

· kodet e nënllogarive;

· kodet e degëve të thesarit.

5. Subjektet përgjegjëse të SPBA-së janë, si më poshtë vijon:

a) Institucioni administrues i SPBA-së është Ministria e Financave;

b) Institucionet, palë të interesuara, janë: Kryeministria, Ministria e Financave, ministritë e linjës, institucionet qendrore buxhetore;

6. Dhënës të informacionit për SPBA-në, janë:

a) Ministria e Financave;

b) ministritë e linjës;

c) institucionet qendrore buxhetore: Presidenca, Kuvendi, Kryeministria, Shërbimi Informativ Shtetëror, Drejtoria e Përgjithshme e Arkivave, Akademia e Shkencës, Kontrolli i Lartë i Shtetit, Prokuroria e Përgjithshme, Zyra e Administrimit të Buxhetit Gjyqësor, Gjykata Kushtetuese, Agjencia Telegrafike Shqiptare, Instituti i Statistikës, Shkolla e Magjistraturës, Qendra Kombëtare e Kinematografisë, Këshilli i Lartë i Drejtësisë, Avokati i Popullit, Komisioneri për Mbikëqyrjen e Shërbimit Civil, Komisioni Qendror i Zgjedhjeve, Inspektorati i Lartë i Deklarimit dhe Kontrollit të Pasurive dhe Konfliktit të Interesave, Autoriteti i Konkurrencës, Këshilli Kombëtar i Kontabilitetit, Drejtoria Sigurimit të Informacionit të Klasifikuar, Agjencia e Prokurimit Publik, Komiteti Shtetëror i Minoriteteve, Agjencia Kombëtare e Teknologjisë dhe Inovacionit, Komisioni i Prokurimit Publik, Inspektorati Qendror, Sekretariati i Ujit, Agjencia e Zbatimit të Reformës Territoriale, Agjencia e Menaxhimit të Qendrave për Hapje dhe Dialog, Agjencia Kombëtare për Zhvillimin Rajonal, agjencitë e zhvillimit rajonal, Agjencia e Zhvillimit Ekonomik Rajonal, Agjencia për Mbështetjen e Shoqërisë Civile, Komisioneri për të Drejtën e Informimit dhe  Mbrojtjen e të Dhënave Personale, Komisioneri për Mbrojtjen nga Diskriminimi, Instituti i Studimeve të Krimeve të Komunizmit, Autoriteti për të Drejtën e Informimit.

7. Subjekte të interesuara për SPBA-në, janë:

a) Kryeministria;

b) Ministria e Financave;

c) ministritë e linjës;

ç) institucionet qendrore buxhetore, të përmendura në shkronjën “c”, të pikës 6, më sipër.

d) çdo subjekt tjetër, i përcaktuar, shprehimisht, me vendim të Këshillit të Ministrave.

8. Niveli i aksesit në sistemin dhe në bazën e të dhënave të SPBA-së, është:

a) administratorët e SPBA-së kanë të drejtë leximi, shkrimi dhe modifikimi të të dhënave në SPBA, dhe ata ndahen në dy grupe: administratorë teknikë dhe administratorë funksionalë.

– Administratorët teknikë kanë të drejtë leximi, shkrimi dhe modifikimi të të dhënave në SPBA, në lidhje me menaxhimin e përdoruesve të Ministrisë së Financave, ministrive të linjës dhe disa institucioneve specifike buxhetore;

– Administratorët funksionalë kanë të drejtë leximi, shkrimi dhe modifikimi, në lidhje me regjistrimin e të dhënave bazë për përgatitjen e sistemit, si:

· ndarjen e buxhetit të vitit korrent sipas ministrisë (Grupit), programit (Titullit) dhe Artikullit;

· tavanet përgatitore të SPBA-së për tri vitet e ardhshme fiskale të miratuara nga Këshilli i Ministrave;

· faktorët e modifikimit të çmimit për tri vitet e SPBA-së së ardhshme.

b) ministritë e linjës dhe Ministria e Financave kanë të drejtë përdorimi të SPBA-së, të ndarë në tre profile, si më poshtë:

· profili që përcakton tavanet e buxhetit në çdo ministri linje;

· profili që ka të drejtë të aprovojë të dhënat e hedhura në sistem, të punojë me projektet, shpenzimet dhe aktivitetet e ministrisë, të cilës i përkasin;

· profili që ka të drejtë vetëm të lexojë të dhënat në sistem, për çdo program që u është përcaktuar.

c) Kryeministria ka të drejtë leximi për buxhetin e shtetit të regjistruar në SPBA nga  ministritë e linjës;

ç)  Ministria e Financave ka të drejta administrative mbi SPBA-në, në rolet:

i. Administrator;

ii. Raportues;

iii. Auditues;

iv. Zhvillues.

9. Baza e të dhënave e SPBA-së nuk ndërvepron me baza të tjera të dhënash.

10. Ngarkohet Ministria e Financave për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës dhe të pikës 2, të nenit 7, të ligjit nr.112/2015, “Për inspektimin financiar publik”, me propozimin e ministrit të Financave, Këshilli i Ministrave

1. Për kryerjen e inspektimit financiar publik, në rastet e mungesës së burimeve njerëzore nga njësia përgjegjëse për inspektimin financiar publik në Ministrinë e Financave, si dhe të mbulimit të fushave specifike të inspektimit financiar publik, me vendim të Nëpunësit të Parë Autorizues angazhohen ekspertë të jashtëm, punonjës të administratës publike apo jashtë saj.

2. Kriteret që duhet të plotësojë eksperti, punonjës i administratës publike, për t’u përzgjedhur inspektor financiar publik, janë:

a) Të jetë i pajisur të paktën me diplomë universitare “Master i Shkencave” ose ekuivalente me të;

b) Të ketë të paktën 5 (pesë) vite përvojë profesionale në njësitë publike.

4. Kriteret që duhet të plotësojë eksperti i jashtëm i administratës publike për t’u përzgjedhur inspektor financiar publik janë:

a) Të jetë i pajisur të paktën me diplomë universitare “Master i Shkencave” ose ekuivalente me të;

b) Të jetë i pajisur me licencë dhe/ose certifikatë profesionale në fushën përkatëse, sipas  legjislacionit në fuqi që rregullon profesionin përkatës;

c) Të jetë i regjistruar në Qendrën Kombëtare të Regjitrimit dhe të ketë status aktiv;

ç) Të mos ketë detyrime të papaguara fiskale dhe të sigurimeve shoqërore;

d) Të mos jetë i dënuar me vendim gjyqësor të formës së prerë për kryerjen e një vepre penale.

5. Në rastet e angazhimit të ekspertëve jashtë administratës publike në inspektim financiar publik, përpara caktimit, njësia përgjegjëse për inspektimin financiar publik kërkon prej tyre:

a) një dokument që vërteton se ka plotësuar detyrimet fiskale dhe ka paguar të gjitha detyrimet e sigurimeve shoqërore, të lëshuar nga administrata tatimore për tre muajt e fundit;

b) vërtetim nga prokuroria dhe gjykata, që nuk është në ndjekje penale, lëshuar muajin e fundit.

6. Kandidatët, që aplikojnë për t’u përzgjedhur në listën e inspektorëve financiarë publikë, duhet të paraqesin në Ministrinë e Financave dokumentacionin e mëposhtëm:

f) Numrin unik të identifikimit, të lëshuar nga Qendra Kombëtare e Regjistrimit, si dhe një kopje të ekstraktit historik, në rast se aplikanti është punonjës jashtë administratës publike;

g) Një dokument që vërteton se aplikanti ka plotësuar detyrimet fiskale dhe ka paguar të gjitha detyrimet e sigurimeve shoqërore, të lëshuar nga administrata tatimore për tre muajt e fundit, në rast se aplikanti është punonjës jashtë administratës publike;

gj) Vetëdeklarim të gjendjes gjyqësore në rast se aplikanti është punonjës jashtë administratës publike.

8. Përzgjedhja e inspektorëve financiarë publikë, ekspertë të jashtëm, punonjës të administratës publike apo jashtë saj, kryhet nga një komision i ngritur me urdhër të ministrit të Financave, i cili ka për detyrë të shqyrtojë dokumentacionin e paraqitur dhe të hartojë listën e kandidatëve që plotësojnë kriteret e përcaktuara në këtë vendim, të cilën ia paraqet për miratim ministrit të Financave.

9. Datat e shpalljes së përzgjedhjes së inspektorëve financiarë publikë, ekspertë të jashtëm, punonjës të administratës publike apo jashtë saj, afati dhe procedurat e aplikimit caktohen me urdhër të ministrit të Financave. 

10. Inspektorët financiarë publikë, ekspertë, punonjës të administratës publike, janë të detyruar të angazhohen në misione inspektimi financiare publike, në çdo kohë dhe pa u penguar nga eprorët apo drejtuesit e institucioneve respektive. Për mospërmbushjen e këtij detyrimi apo pengimin në angazhimin e kërkuar, Nëpunësi i Parë Autorizues informon drejtuesin e institucionit ku është i punësuar punonjësi, i cili shqyrton rastin në përputhje me legjislacionin në fuqi që rregullon marrëdhënien e punës ku është i punësuar punonjësi. 

12. Nëpunësi i Parë Autorizues, në rastet e angazhimit në inspektim të ekspertëve të jashtëm, punonjës të administratës publike apo jashtë saj, me propozimin e drejtuesit të njësisë përgjegjëse për inspektimin financiar publik, përcakton emrat e inspektorëve financiarë publikë dhe kohëzgjatjen e inspektimit financiar publik në përputhje me vështirësinë dhe volumin e punës. Fillimisht angazhohen inspektorët financiarë publikë, ekspertë të jashtëm, punonjës të administratës publike, dhe, në mungesë të tyre, inspektorët financiarë publikë, ekspertë të jashtëm, punonjës jashtë administratës publike. 

13. Shpërblimi i inspektorëve financiarë publikë, ekspertë të jashtëm, punonjës të administratës publike apo jashtë saj, sipas pikës 11, të këtij vendimi, kryhet me miratimin e Nëpunësit të Parë Autorizues.

14. Efektet financiare, që rrjedhin nga kostoja e angazhimit të inspektorëve financiarë publikë, ekspertë të jashtëm, punonjës të administratës publike apo jashtë saj, përballohen nga fondet e miratuara në buxhetin vjetor të Ministrisë së Financave.

15. Vendimi nr.492, datë 6.7.2011, i Këshillit të Ministrave, “Për shpërblimin e inspektorit financiar publik”, shfuqizohet.

16. Ngarkohet Ministria e Financave për zbatimin e këtij vendimi. 

    Ky vendim hyn në fuqi pas botimit në “Fletoren zyrtare”.

SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA PROJEKTI “NDËRTIMI I TRI SHTYLLAVE PËR PËRÇIMIN  E ENERGJISË ELEKTRIKE”, PJESË E  MARRËVESHJES NDËRMJET SHOQËRISË KONCESIONARE “LENGARICA & ENERGY”, SH.P.K., ME OPERATORIN E SISTEMIT TË TRANSMETIMIT, SH.A., DATË 1.7.2015,  PËR LIDHJEN ME RRJETIN E TRANSMETIMIT

Në mbështetje të nenit 100 të Kushtetutës dhe të neneve 5, pika 1, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, me propozimin e ministrit të Energjisë dhe Industrisë, Këshilli i Ministrave

1. Shpronësimin, për interes publik, të pronarëve të pasurive të paluajtshme, pronë private, që preken nga projekti “Ndërtimi i tri shtyllave për përçimin e energjisë elektrike”, pjesë e marrëveshjes ndërmjet shoqërisë koncesionare “Lengarica & Energy”, sh.p.k., me Operatorin e Sistemit të Transmetimit, sh.a., datë 1.7.2015, për lidhjen me rrjetin e transmetimit, sipas tabelës që i bashkëlidhet këtij vendimi.

2. Shpronësimi bëhet në favor të “OST”, sh.a.-së, me kërkesë të subjektit kërkues “Lengarica & Energy ”, sh.p.k.

3. Pronarët e pasurive të paluajtshme, që shpronësohen, të kompensohen në lekë, në vlerë të plotë, sipas masës përkatëse që paraqitet në tabelën që i bashkëlidhet këtij vendimi, për sipërfaqen 198 (njëqind e nëntëdhjetë e tetë) m², tokë arë, pyll, vlerësuar në shumën e përgjithshme prej 21 470 (njëzet e një mijë e katërqind e shtatëdhjetë) lekësh.

4. Vlera e përgjithshme e kompensimit dhe vlera e shpenzimeve procedurale  përballohen nga shoqëria “Lengarica & Energy”, sh.p.k, si subjekti kërkues i këtij shpronësimi.

5. Shpronësimi fillon brenda muajit shkurt 2016.

6. Çdo pronar, për t’u likuiduar për efekt shpronësimi, dorëzon pranë shoqërisë “Lengarica & Energy”, sh.p.k., dokumentacionin e plotë të pronësisë, vërtetimin bankar, lidhur me numrin e llogarisë dhe IBAN-in, si dhe kopjen e kartës së identitetit, të shoqëruar me një kërkesë.

7. Ngarkohen Ministria e Energjisë dhe Industrisë, Zyra Vendore e Regjistrimit të Pasurive të Paluajtshme Përmet, shoqëria “Lengarica & Energy”, sh.p.k., dhe Operatori i Sistemit të Transmetimit, sh.a., për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

Në mbështetje të nenit 100 të Kushtetutës dhe të neneve 8, pika 3, 10 e 13, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e ministrit të Punëve të Brendshme, Këshilli i Ministrave

1. Në listën e inventarit të pronave të paluajtshme shtetërore, që i bashkëlidhet vendimit nr.250, datë 24.4.2003, të Këshillit të Ministrave, të ndryshuar, shtohet prona me emërtimin “Qendra e Shërbimit dhe Administrimit të Mjeteve të Transportit”, sipas formularit të inventarizimit, bashkëlidhur këtij vendimi.

Lista që i bashkëlidhet këtij vendimi përbëhet nga 1 (një) fletë.

2. Ngarkohen Ministria e Punëve të Brendshme, Qendra e Shërbimit dhe Administrimit të Mjeteve të Transportit dhe kryeregjistruesi i Pasurive të Paluajtshme të ndjekin procedurat e nevojshme për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës dhe të neneve 13 e 15, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e ministrit të Mbrojtjes, Këshilli i Ministrave

1. Ndryshimin e përgjegjësisë së administrimit, nga Ministria e Mbrojtjes te Ministria e Transportit dhe Infrastrukturës, për Autoritetin Rrugor Shqiptar, të sipërfaqeve, truall funksional, (S1) prej 2 674 (dy mijë e gjashtëqind e shtatëdhjetë e katër) m², (S2) prej 4 732 (katër mijë e shtatëqind e tridhjetë e dy) m² dhe (S4) prej 1 237 (një mijë e dyqind e tridhjetë e shtatë) m², me sipërfaqe të përgjithshme 8 643 (tetë mijë e gjashtëqind e dyzet e tre) m², brenda territorit të pronës nr.1019, me emërtim “Reparti ushtarak nr.4030, aerodromi”, me vendndodhje në Urën Vajgurore, Berat, sipas planrilevimit që i bashkëlidhet këtij vendimi dhe është pjesë përbërëse e tij, për ta përdorur për ndërtimin e rrugës kombëtare automobilistike Lushnjë-Berat.

2. Në listën e inventarit të pronave të paluajtshme shtetërore, që i bashkëlidhet vendimit nr.515, datë 18.7.2003, të Këshillit të Ministrave, të ndryshuar, të hiqen sipërfaqet, truall funksional, (S1) prej 2 674 (dy mijë e gjashtëqind e shtatëdhjetë e katër) m², (S2) prej 4 732 (katër mijë e shtatëqind e tridhjetë e dy) m² dhe (S4) prej 1 237 (një mijë e dyqind e tridhjetë e shtatë) m², me sipërfaqe të përgjithshme 8 643 (tetë mijë e gjashtëqind e dyzet e tre) m², nga trualli funksional i pronës nr.1019, me emërtim “Reparti ushtarak nr.4030, aerodromi”, me vendndodhje në Urën Vajgurore, Berat, dhe të shtohen në listën e inventarit të pronave të paluajtshme shtetërore, që i kanë kaluar në përgjegjësi administrimi Ministrisë së Transportit dhe Infrastrukturës.

3. Ministrisë së Transportit dhe Infrastrukturës dhe Autoritetit Rrugor Shqiptar u ndalohet të ndryshojnë destinacionin e përdorimit të sipërfaqeve të pronës, të përcakuara në pikën 1, të këtij vendimi, t’i tjetërsojnë ose t’ua japin ato në përdorim të tretëve.

4. Për sigurinë e fluturimeve të bazës ajrore të dislokuar në pronën nr.1019, me emërtim “Reparti ushtarak nr.4030, aerodromi”, me vendndodhje në Urën Vajgurore, Berat, në segmentin rrugor që prek gjurma e rrugës, për ndalimin e qarkullimit në rastet e operacioneve ushtarake ajrore, Autoriteti Rrugor Shqiptar duhet të vendosë semaforë, të ndërtojë një nënkalim për lidhjen e komunikimin me të dyja pjesët e pronës që i ndan segmenti rrugor dhe përgjatë segmentit rrugor, të mos ndërtojë asnjë vendqëndrim, si dhe të vendosë barriera anësore për të bërë të pamundur komunikimim e këmbësorëve e të mjeteve me pjesët e pronës së bazës ajrore. Ministria e Transportit dhe Infrastrukturës, nëpërmjet Autoritetit Rrugor Shqiptar, para fillimit të punimeve, të hartojë aktmarrëveshje me Shtabin e Përgjithshëm të Forcave të Armatosura të Republikës së Shqipërisë.

5. Ngarkohen ministri i Mbrojtjes, ministri i Transportit dhe Infrastrukturës, Autoriteti Rrugor Shqiptar, Agjencia e Inventarizimit dhe Transferimit të Pronave të Paluajtshme dhe kryeregjistruesi i Pasurive të Paluajtshme të Republikës së Shqipërisë për zbatimin e këtij vendimi.

     Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës, me propozimin e ministrit të Mirëqenies Sociale dhe Rinisë, Këshilli i Ministrave

Miratimin e Dokumentit Politik të Përfshirjes Sociale 2016-2020, sipas tekstit që i bashkëlidhet këtij vendimi.

Ngarkohen të gjitha ministritë për zbatimin e këtij vendimi.

     Ky vendim hyn në fuqi pas botimit në “Fletoren zyrtare”.

V E N D I M
PËR

MIRATIMIN E HARTËS SË VLERËS SË TOKËS NË REPUBLIKËN E SHQIPËRISË

Në mbështetje të nenit 100 të Kushtetutës, të ligjit nr.9235, datë 29.7.2004, “Për kthimin dhe kompensimin e pronës”, të ndryshuar, dhe në vijim të pikës 3, të vendimit nr.658, datë 26.9.2012, të Këshillit të Ministrave, “Për miratimin e metodologjisë për vlerësimin e pronave të paluajtshme në Republikën e Shqipërisë”, me propozimin e ministrit të Drejtësisë, Këshilli i Ministrave

V E N D O S I:

1.    Miratimin e vlerës së tokës në Republikën e Shqipërisë, sipas hartave që i bashkëlidhen këtij vendimi dhe janë pjesë përbërëse të tij.

2.    Vendimi nr.514, datë 30.7.2014, i Këshillit të Ministrave, “Për miratimin e vlerës së pronës për secilin qark të Republikës së Shqipërisë”, i ndryshuar, shfuqizohet.

3.    Ngarkohen Ministria e Drejtësisë, Ministria e Zhvillimit Urban, Ministria e Transportit dhe Infrastrukturës, Zyra e Regjistrimit të Pasurive të Paluajtshme, Agjencia e Kthimit dhe Kompensimit të Pronave dhe Agjencia e Legalizimit, Urbanizimit dhe Integrimit të Zonave/Ndërtimeve Informale për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

 

*SHËNIM: BAZUAR NË NENIN 117 TË KUSHTETUTËS SË RSH DHE NENIT 29 TË LIGJIT PËR ORGANIZIMIN DHE FUNKSIONIMIN E KËSHILLIT TË MINISTRAVE, VENDIMET E KËSHILLIT TË MINISTRAVE PUBLIKOHEN NË FLETOREN ZYRTARE DHE HYJNË NË FUQI PAS BOTIMIT TË TYRE. DREJTORIA E KOMUNIKIMIT PRANË KËSHILLIT TË MINISTRAVE PËRPIQET TË BOTOJË NË KOHËN MË TË SHPEJTË TË MUNDSHME VENDIMET E MBLEDHJEVE TË QEVERISË, POR VERSIONI ZYRTAR DHE HYRJA E TYRE NË FUQI BËHET VETËM PASI VENDIMI BOTOHET NE QBZ. SHPESHHERË, VENDIMET E KËSHILLIT TË MINISTRAVE KANË NEVOJË PËR ZBARDHJE TË MËTEJSHME, ÇKA E VONON PUBLIKIMIN E TYRE NË KËTË FAQE.