Kryeministri Edi Rama priti sot në një takim ministrat e Punëve të Jashtëm të Lituanisë Linas Linkevicius dhe të Rumanisë Titus Corlatean. Kryeministri Rama, pasi i falënderoi për vizitën, i  siguroi për vazhdimin e bashkëpunimit dhe gatishmërinë për një fazë të re në marrëdhëniet mes vendeve. Rama i siguroi, gjithashtu, për vullnetin e fortë të qeverisë për të ecur përpara në procesin e integrimit evropian.

Kryeministri u shpreh se me zgjedhjet e fundit të lira e të ndershme dhe transferimin paqësor të pushtetit, Shqipëria ka përmbushur një nga kushtet kryesore për marrjen e statusit të vendit kandidat, për të cilin shpresojmë një përgjigje pozitive në dhjetor.

Kryeministri Rama theksoi se vizioni dhe prioriteti i politikës së jashtme të Shqipërisë është “zero probleme me fqinjët”.

Ministrat Linkevicius dhe Corlatean e uruan Edi Ramën për fitoren në zgjedhje dhe për marrjen e detyrës së Kryeministrit. Ata theksuan rëndësinë që rajoni ynë dhe partneriteti me Shqipërinë si një faktor rajonal ka për vendet e tyre.