Kryeministri Edi Rama, i cili ndodhet në një vizitë në Spanjë me rastin e pjesëmarrjes në ceremoninë e “Espanol Universal Award” u mikprit sot nga Mbreti Felipe VI, në pallatin Zarzuela, në Madrid, i cili pas takimit me të organizoi një mikpritje për nder të Shqipërisë me anëtarët e bordit të “World Jurist Association”, organizata prestigjioze ndërkombëtare e juristëve, gjyqtarëve, akademikëve dhe profesionistëve të ligjit nga e gjithë bota, në vigjilje të nënshkrimit të marrëveshjes për organizimin e “World Law Congress Albania 2027”, Kongresit Botëror të Ligjit në vitin 2027, i cili do të mbahet në Tiranë e do të sjellë rreth 3 mijë juristë nga gjykatat supreme dhe sistemet gjyqësore të shumë vendeve të botës.

Ndër personalitetet pjesëmarrëse në pritje ishte Avokati Javier Cremades, President i Shoqatës Botërore të Juristëve, si dhe president i firmës Cremades & Calvo-Sotelo, njëkohësisht fitues i Çmimit Universal Spanjoll 2024 nga organizata joqeveritare “Fundación Independiente” i cili ka krijuar Fondacionin Botëror të Drejtësisë në Spanjë, duke e bërë Spanjën, qendër të pranisë ndërkombëtare të anëtarëve të gjykatave më të larta të pesë kontinenteve. 

Në pritje merrnin pjesë gjithashtu edhe Kryetari i Gjykatës Kushtetuese të Spanjës, Cándido Conde-Pumpido; Kryetari i Gjykatës Kushtetuese të Republikës Federale të Gjermanisë, Stephan Harbarth; Ministri i Drejtësisë së Republikës së Shqipërisë, Ulsi Manja dhe personalitete të tjera, nga sistemi i drejtësisë.