“Pensionet, Drejt Shqipërisë 2030” ishte diskutimi publik i radhës i zhvilluar sot në mjediset e Kryeministrisë nën drejtimin e Kryeministrit Rama me fokus rëndësinë e luftës kundër informalitetit të pagave, si armiku kryesor i pensioneve.
“Është i domosdoshëm një front i madh përbashkët shoqëror mes qeverisë, kompanive dhe individëve sepse sigurimet shoqërore nga të cilat buron pastaj fondi i pensioneve janë një detyrim, jo vetëm ligjor, por edhe moral i patjetërsueshëm për të krijuar mundësinë që zinxhiri i solidaritetit të funksionojë që do të thotë që sigurimet shoqërore janë detyrimi i parë i kujtdo që merr një pagë dhe ai detyrim sapo shlyhet shkon direkt tek dikush që merr një pension.” – theksoi ndër të tjera kryeministri lidhur me procesin në tërësi.”
Ndërsa Ministri i Ekonomisë, Kulturës dhe Inovacionit Blendi Gonxhja, pjesë e grupit drejtues të punës për pensionet tha se “Është me një rëndësi të jashtëzakonshme që të garantojmë, që çdo punëdhënës të ndërgjegjësohet dhe t’i paguajë kontributet dhe t’i japë atë që i takon çdo punëmarrësi, aq sa janë dakordësuar, për aq sa është puna ligjërisht.”
Të njëjtën rëndësi theksoi edhe Ministrja për Sipërmarrjen dhe Klimën e Biznesit Delina Ibrahimaj, e cila solli mes shifra dhe fakte masat konkrete të qeverisë për të përmirësuar klimën e biznesit në tërësi, përmes lehtësive fiskale.
Në takim merrnin pjesë edhe drejtues të institucioneve dhe ekspertë, pjesë e grupit drejtues të punës për pensionet.
* * *
Kryeministri Edi Rama: Përshëndetje të gjithëve! Sot është dita e tretë e diskutimeve publike lidhur me temën e pensioneve, diskutime të cilat synojnë një informim të hapur, të plotë dhe të detajuar të pasqyrës mbi pasqyrën e pensioneve për të gjithë pensionistët, në radhe të parë, por dhe për të gjithë shoqërinë për të kuptuar se cila është përmbajtja komplekse e kësaj pjese të administrimit të të ardhurave që ne krijojmë dhe cila është vështirësia shumë komplekse për të adresuar siç dëshirojmë që të gjithë nevojën për rritjen e pensioneve.
E nga ana tjetër për të theksuar se në një proces si ky është i domosdoshëm një front i madh i përbashkët shoqëror në kuptimin më të mirë të fjalës, mes qeverisë, kompanive dhe individëve sepse sigurimet shoqërore nga të cilat buron pastaj fondi i pensioneve janë një detyrim, jo vetëm ligjor por edhe moral i patjetërsueshëm për të krijuar mundësinë që zinxhiri i solidaritetit të funksionojë. Që do të thotë sigurimet shoqërore janë detyrimi i parë i kujtdo që merre një pagë dhe ai detyrim sapo shlyhet shkon direkt tek dikush që merr një pension. Institucioni i sigurimeve shoqërore nuk është një institucion buxhetor si të tjerët, nuk është as një institucion fitimprurës. Institucioni i sigurimeve shoqërore është një institucion që garanton transferimin e fondeve nga përfituesit e të ardhurave nga puna në sektorin publik ose privat që kanë detyrim të paguajnë detyrimet shoqërore tek përfituesit e pensioneve. Sot do të fokusohemi pikërisht në këtë pikë, tek informaliteti i pagave si një armik i pensioneve dhe i pensionistëve dhe po ia kaloj fjalën menjëherë Ministrit të Ekonomisë e pastaj me radhë të pranishmëve këtu.
——
Këtu është një grup i rëndësishëm interesi dhe praktikisht është ana tjetër e medaljes së nevojës për të rritur pensionet, që është sipërmarrja dhe për rastësisht dje u ndodha në një mjedis shërbimi në Tiranë edhe e pyeta atë pronarin, sa e kishte pagën minimale? 600 euro pagën minimale për sanitaren, edhe 1120 euro pagën mesatare.
E sjell këtë shembull për të thënë që këto janë pagat reale në sektorët përkatës, kjo është paga reale në të gjitha shërbimet e kësaj natyre, në Tiranë dhe pak më e ulët në zonat e tjera. Mirëpo kur vjen puna tek deklarimi i pagave, pasqyra është komplet tjetër. Tani, ne jemi i vetmi vend në rajonin tonë që e kemi biznesin e vogël me zero taksa dhe për një kuriozitet, nuk ka vend tjetër në botë besoj, por po flasim për rajonin, – se Europa i ka shumë më të larta, – ku vetëm 10 % e bizneseve paguajnë tatim fitimin, vetëm 10%.
90% e bizneseve janë të çliruara nga barra e tatim fitimit, si rezultat i një strategjie dhe i një vendimmarrje të qeverisë sonë prej vitesh tanimë, që kemi vendosur që deri në 2029 biznesin e vogël ta lëmë pa taksa dhe pa Tvsh deri në 100 mijë euro xhiro, për t’i dhënë frymëmarrje, për t’i dhënë krah, për t’i dhënë mundësi që të zhvillohet.
Po ka një shifër tjetër akoma më të jashtëzakonshme në unikalitetin e vet.
Në Shqipëri vetëm 27% e bizneseve paguajnë Tvsh, pra 1/4 e bizneseve, ndërsa 2/3 nuk paguajnë as Tvsh, për të njëjtat arsye që thashë dhe nga të gjitha lehtësirat – se s’është vetëm kjo, -nga të gjitha lehtësirat që u janë bërë biznesit, këtu shoh njerëz nga sektori turizmit. E kishit 20% Tvsh deri përpara disa vitesh edhe kërkonin me të drejtë të kishin një tjetër Tvsh për shkak të konkurrueshmërisë në rajon dhe ne kemi rënë në një rajon, ku në aspektin e turizmit janë të gjithë peshkaqenët e Mesdheut, në aspektin e kapaciteteve. Ua bëmë më të ulëtën 6% apo të tjera lehtësira dhe e dini sa është shumë që shkon në arkën e sipërmarrjeve nga këto lehtësira, pra shuma nga e cila qeveria ka hequr dorë dhe në vend se ta mbledhë dhe ta çojë në arkën e shtetit e ka lënë në arkën e sipërmarrjeve? Është 1.1 miliard euro në vit. 1.1 miliard euro dhe po flasim 1.1 miliard euro në buxhetin e Republikës së Shqipërisë, nuk po flasim në një buxhet ku 1.1 miliard euro mund të mos jenë edhe aq shumë të rëndësishme.
Tani nuk ka diskutim që ne kemi bërë mirë me këto masa, sepse i kemi dhënë shumë frymëmarrje sipërmarrjes dhe nuk ka diskutim që frymëmarrja e sipërmarrjes është frymëmarrja e ekonomisë. Ekonominë e bën sipërmarrja, nuk e bën qeveria, në kuptimin e krijimit të vendeve të punës, në kuptimin e rritjes së volumeve, në kuptimin e rritjes ekonomike në tërësi, por problemi është që jemi sot në kushtet kur kemi një tjetër1/4 që është 1/4 e buxhetit, që shkon për pensionet dhe na mungon kontributi i sipërmarrjes, kontributi ligjor i detyruar i sipërmarrjes në këtë. Tani si do t’i bashkojmë ne këto të dyja që edhe i është dhënë sipërmarrjes gjithë kjo hapësirë lehtësie që nuk e ka asnjë sipërmarrje në rajonin tonë edhe sipërmarrja vjedh pensionistët. Më falni për fjalën, është shumë e rëndë, por unë nuk di çfarë emri t’i vë tjetër, mund t’i vë edhe një emër tjetër, grabit. Grabit pensionistët, duke mos paguar detyrimet bazë dhe po filloj nga detyrimi i detyrimeve, që edhe me ligj është i shkruar, është detyrimi i parë, është përpara taksave, sigurimet shoqërore.
Po vazhdoj pak përsëri me punëmarrësit, nëse ne do të vazhdonin, nëse Shqipëria do të vazhdonte, se ne nuk vazhdojmë, me taksën e sheshtë mbi pagën ne do të kishim më shumë të ardhura, edhe për sigurimet shoqërore. Por do merrnim më shumë nga xhepi i punëmarrësve, pra nga ata që jetojnë me një pagë në shtet ose privat. Ne e hoqëm taksën e sheshtë, e bëmë taksë progresive dhe faktikisht kemi hequr dorë nga jo pak, por kemi hequr dorë nga një shumë e konsiderueshme që ia kemi lënë mësuesve, infermierëve, ia kemi lënë punonjësve në të gjitha hallkat e zinxhirit ekomomik, që nga kamerierët, menaxherët e kështu me radhë.
Tani si t’ia bëjmë ne kur për 17 sektorë të ekonomisë janë 156 mijë të punësuar që deklarohen me pagë 50 mijë lekë të reja, sepse e dimë të gjithë që kjo pagë është përjashtuar nga taksimi dhe që duke i parë sektorët me radhë, nuk ka asnjë logjikë që ta thotë që duhet ta gëlltisësh këtë gjë dhe ta pranosh se është kështu sepse janë paga të gënjeshtërta.
Mirëpo nga kjo gënjeshtër dhe nga kjo qasje kriminale ndaj pensionistëve, ne kemi një gropë shumë të madhe të cilën e kompensojmë sot që flasim duke vendosur gjysmë miliardë euro për të plotësuar pensionet sepse pa këto gjysmë miliardë euro, pensionet nuk mund të jepen në nivelin që janë sot. Se është kollaj të flasësh kur nuk ke gjë në dorë, është kollaj të premtosh kur e di që nuk do të kesh gjë në dorë, është kollaj të japësh receta kur nuk të ka dhënë kush diplomën për të bërë diagnoza, por problemi i pensioneve nuk zgjidhet me dëshirën e mirë vetëm dhe as nuk zgjidhet me idenë që ”hajde tua rrisim sot”, pa parë që nesër mund të çosh në humnerë të tërë bashkë dhe nga ana tjetër, problemi i pensioneve dhe rritja e pensioneve nuk zgjidhet duke jua marrë fëmijëve dhe me fëmijën nuk kam parasysh fëmijët që janë sipërmarrës që jua marrin prindërve apo jua marrin gjyshërve apo të tjerëve se për prindërit e tyre dhe gjyshërit e tyre jua japin kesh ato që u duhen, por kam parasysh fëmijët që lindin sot në Republikën e Shqipërisë, fëmijët që janë sot të mitur, që kanë nevojë për shumë investime të tjera që duhet të bëjë shteti për ta.
Taksat janë për fëmijët, janë për të ardhmen, janë për të investuar për të nesërmen, janë për çerdhet, janë për kopshtet, janë për shkollat, janë për spitalet, janë për infrastrukturën, janë për të gjitha llojet e shërbimeve.
Sigurimet shoqërore janë për të moshuarit, janë për pensionistët. Janë dy gjëra të ndara komplet. Nuk puqen bashkë. Sigurisht, kur mungon një pjesë, nuk mund të lihet pa u futur pjesa tjera.
Duam të shtojmë ne pensionet. Si do t’i shtojmë ne pensionet? Në mënyrë të njëanshme? Dhe sado që t’i shtojmë ne pensionet në mënyrë të njëanshme nuk i shtojmë dot aq sa do të duhet të shtoheshin nëse nuk futet në lojë pala tjetër që jeni ju, që janë sipërmarrësit që qoftë dhe për një garanci xhanëm, që kur të shkoni të paraqiteni tek dera e botës tjetër dhe aty unë jam informuar prej shumë vitesh që nuk ka karta krediti, nuk funksionon kesh-i, nuk ka lidhje fare as si je veshur, asgjë fare. Aty je ti përpara Zotit. Për katolikët thonë që të del Shën Pjetri e të thotë “Hë, ku do të shkosh?”, – “Dua të shkoj në Parajsë”, – “Të gjithë aty duan të shkojnë, por më thua çfarë ke bërë për të shkuar në Parajsë”?
Qoftë dhe për këtë takim që duhet ta mbajnë në konsideratë dhe ata që i falen Allahut 5 herë në ditë.
Un njoh dhe kam respekt për sipërmarrës që i falen Allahut 5 herë në ditë por di që nuk i paguajnë sigurimet shoqërore ashtu siç duhet. Edhe ata duhet ta kenë parasysh këtë moment kur të shkojnë atje sepse ka Xhenet, ka dhe Xhenem, qoftë dhe për atë moment xhanëm. Qoftë dhe për të pasur mbarësi e për të mos marrë mallkimet e pensionistëve. Ato që ju takojnë pensionistëve nuk duhet të diskutohen. Nuk duhet të diskutohen!
“Po të jap 500 euro, 500 euro po t’i jap në bankë se i ke pa taksa” i thotë sipërmarrësi punonjësit, “I ke pa taksa” i thotë dhe “Po të jap dhe nja 30 mijë të tjera kesh” prapë pa taksa. Në fakt, po i bën dy gola. Një, nuk po i jep lekët e pensionit të prindit që ka në shtëpi ky punonjësi dhe dy, po i ha pensionin e vet sepse nesër kur ky punonjësi do dalë në pension do të ndodhi siç i ndodh ISSH që i vijnë me mijëra ankesa e i thonë “nuk më keni llogaritur mirë pensionin se unë nuk kam marrë kaq rrogë, kam marrë më shumë rrogë”, mirëpo atë më shumë rrogë nuk e ke në letër sepse ta ka dhënë ai në dorë. Në letër ke vetëm atë që të ka dhënë pa taksa, taksa që duhet t’i paguajë ai.
Vijmë tek turizmi. Tani, si mund të vazhdojmë ne të pranojmë që ndërkohë që këtu Shqipëria është në invazion nga turistë të huaj dhe nga shqiptarët që vijnë gjithmonë e më shumë për pushime, ne të jemi vendi që figuron me më shumë se gjysmën më pak të akomodimeve në territor për numër sesa të gjitha vendet rreth e rrotull. Tani, mua nuk më figuron që rrugët e Shqipërisë të jenë të mbushura me turistë që flenë jashtë natën, unë nuk kam parë njerëz të shtrirë nga të katërta anët nëpër plazhe, nëpër rrugë, nëpër kodra që flenë jashtë se nuk futen nëpër krevate. Unë vetë nuk i kam parë. Ku janë këta? Këta nuk figurojnë në deklarimet e hoteleve, këta nuk figurojnë fare dhe këtë e dimë ne në deklarimet e këtyre që japin me qera dhoma, por kjo është temë tjetër dhe këtu nuk i hyjmë në hak atyre që nuk ua kemi kërkuar, me qëllim akoma nuk ua kemi kërkuar që të fillojnë t’i deklarojnë.
Prandaj, një gjë dua ta përcjell si mesazh.
Ne nuk duam të bëjmë një operacion represiv, plotësisht të merituar për hir të vërtetës, por ne duam që, në radhë të parë, sipërmarrjet ta marrin mesazhin shumë të qartë. Kemi bërë shumë progres, nuk është se kemi filluar sot sepse po të marrim se ku jemi nisur me informalitetin, me gjysmën e punonjësve që nuk deklaroheshin fare e të tjerë dhe po të shohim sesa e kemi rritur fondin e Sigurimeve Shoqërore, progresi është i konsiderueshëm. Mirëpo Shqipëria ka bërë më shumë progres sesa ç’është bërë progres në këtë pjesë, ekonomia është rritur më shumë sesa figuron si pasqyrë progresi në këtë pjesë dhe nga kjo rritje ekonomike po përfitoni ju të parët siç nuk e kishit menduar ndonjëherë se do të fitonit në Republikën e Shqipërisë dhe ju e dini shumë mirë. Po përfitojnë ata që janë të punësuar në sektorin publik ku nuk ka “Po ta jap pa taksa një pjesë të rrogës dhe po ta jap me taksa pjesën tjetër” duke e çuar pagën mesatare në 900 euro në sektorin publik, po përfitojnë patjetër edhe të gjithë komunitetet në formën e investimeve që bën shteti, por nuk po përfitojnë pensionistët nga kjo rritje ekonomike. Ky është momenti kritik i gjithë kësaj rritjeje ekonomike.
Të gjithë ata që kontribuojnë në rritje ekonomike duhet të marrin pjesën e tyre nga rritja ekonomike ndërkohë që pensionistët, janë pensionistë sepse kontributet i kanë dhënë më përpara. Tani, për ato kontribute që ata kanë dhënë më përpara duhet të marrin atë që u takon. Për këtë arsye, unë mendoj që ky është momenti i faturave të energjisë, momenti i faturave të energjisë ku gjysma paguante dhe për gjysmën tjetër ndërsa gjysma tjetër e vidhte ose nuk e paguante energjinë.
Ky është momenti kur pensionistëve duhet tu shkojë ajo që u takon. Ne do bëjmë tonën pa diskutim, sepse nuk bëhet fjalë që duhet t’ua hapim derën dhe pensionistëve për të marrë pjesë në hapësirën e ekonomisë së rritur, por që ne të bëjmë tonën janë dy gjëra; njëra është që të ndajmë buxhet për pensionistët më shumë e tjetra është që të marrim nga ju atë që duhet tua japim pensionistëve.
Sigurimet shoqërore nuk janë taksa që i paguan ti sot, shkojnë në buxhet, planifikohen, do të bëhen projektet e të tjerë. Sigurimet shoqërore janë, ti i paguan në fund të muajit shtator, kalojnë tek fondi i pensioneve, në fund të muajit tetor i shkojnë pensionistëve, kaq. Është vetëm transferim. Çdo firmë atje për sigurimet shoqërore është firma që “Po, pensionisti Filan Fisteku mund ta marrë pensionin e vet sepse punonjësja Filan Fisteku e mori pagën e vet”. Automatikisht dhe për këtë arsye, Drejtoria e Tatimeve u ka çuar të gjitha kompanive një mesazh.
Mesazhi duhet kuptuar që ne nuk do të pranojmë më deklarime pagash të cilat nuk i besojmë. Shumë e thjeshtë. Dhe mbi ç‘bazë? Jo arbitrarisht. Mbi bazën e çfarë thonë analizat e tregut. Ndërtuesit që do të deklarojnë 60 mijë lekë pagë që nuk ekziston fare, duhet të kuptojnë që nuk do t’iu pranohet, do t’u kthehet mbrapsht deklarimi, do t’iu thuhet ‘’plotësoje se ke bërë një gabim’’ dhe nëse nuk do ta reflektojnë këtë gjë, atëherë do të duhet të përballen me situata siç u përballën hajdutët e energjisë elektrike. Situata që mund të shkojnë deri në kolaps të kompanisë, ma besoni këtë gjë. Për çfarë? Për të mos paguar haraçin pensionistëve, haraçin që e kanë fituar me një jetë të tërë punë edhe që rrinë e torturohen duke parë se si gjithë të tjerët këtu përfitojnë nga rritja ekonomike, ndërkohë që ata presin me padurim të mbarojë dita dhe gdhihen me ankthin se ‘’si do ta shtyj sot’’? Kështu që merreni shumë seriozisht të gjithë, jo ju që jeni këtu, por po flas me të gjitha kompanitë që janë tek kjo zonë ku grabiten pensionistët rregullisht, që deklarimi i pagës duhet të jetë serioz, i vërtetë dhe jemi dëshmitarë të gjithë. Dolën pagat atëherë rrugëve për shkak të sistemit digjital të hakeruar e ku di unë. Vetëm nga ajo dalje pagash rrugëve pati një rritje të deklarimeve sepse u kuptua.
Megjithatë ne jemi duke studiuar edhe mundësinë që ta bëjmë si vendet nordike; t’i detyrojmë nxjerrjen e pagave të gjithëve me ligj, që njerëzit, që të gjithë ta shohin se kush paguan çfarë, por kjo është arma e fundit. Tjetra është hyrja më thellë në inspektime, krimi ekonomik i Ministrisë së Brendshme, etj. Nuk janë fare as kërcënime, as presione, janë thjesht informacion transparent për çfarë ne kemi ndër mend të bëjmë. Kemi qysh në fillim të këtij viti që jemi ulur me një grup pune të gjerë, me ekspertë ndërkombëtarë, me praktikat më të mira të studiuara, të analizuara, për t’iu dhënë përgjigje pensionistëve ‘’çfarë do të bëhet me ne’’? Dhe çfarë do bëhet me ta, nuk ka kush e jep përgjigjen tjetër përveç kësaj qeverie, nuk ia jep tjetërkush. Përgjigjet e tjera janë përgjigje për klubet e mbrëmjeve neuro-mediatike, kurse përgjigjen për ta duhet ta japim ne dhe besoj që do t’i japim përgjigjen që ata presin hap pas hapi, jo menjëherë, duke filluar nga ky fundit kur bonusi, po studiojmë që të ndryshojë si strukturë dhe pastaj falë kontributit të kompanive që të duhet të japin pensionistëve atë që iu “grabisin”. Le ta quajmë një grabitje pa mendje ose pa vëmendje dhe ta ndryshojmë këtë tendencë.
E fundit për biznesin e vogël. Biznesit të vogël i kemi kërkuar vetëm që të paguajë sigurime shoqërore dhe shëndetësore, asnjë taksë dhe mbi të gjitha biznesi i vogël që është i vetëpunësuar, ia paguan vetes së vet, pra paguan për pensionin e vet. Kjo quhet auto grabitje, domethënë të vjedhësh veten tënde. Por, ok, njeriu mund të thotë ‘’ça të duhet ty, unë dua ta vjedh veten time’’? Problemi është që këto paratë që sot nuk janë të tuat, këto para do t’i marrë pensionisti. Kur të dalësh ti në pension, atëherë do ta kuptosh ça i ke bërë vetes se ai tjetri qe do të jetë në punë, nuk t’i jep dot ty ato sepse ti nuk ke paguar për atë që ishte përpara teje. Ky është zinxhiri, prandaj auto grabitjen ne nuk e pranojmë dot dhe do të marrim masa drastike për çdo biznes të vogël që nuk paguan sigurimet shoqërore deri në mbyllje të aktivitetit.
Të gjitha të tjerat mund t’i diskutojmë, edhe taksat mund të diskutohen në kuptimin, ka një sistem në Republikën e Shqipërisë dhe ju e dini mirë, të marrëveshjeve, jo debia, jo ‘’kam ca borxhe, hajde bëjmë një ristrukturim’’ dhe e ka, është me ligj, që do të thotë taksat mund të diskutohen në marrëdhënie me institucionet e të ardhurave. Republika e Shqipërisë dhe asnjë republikë tjetër nuk e ka një të tillë për sigurimet shoqërore dhe kemi sot aktualisht, një numër të konsiderueshëm biznesesh që figurojnë debitorë ndaj pensionistëve. E kanë aty, debitorë. Nuk e ka Republika e Shqipërisë këtë mundësi që t’i thuash “hajde ta bëjmë me këste, të falim atë”, por edhe këtë ne po e studiojmë për të mos e përdorur si një pengesë për formalizmin, pra për të mos i vënë përpara bizneseve si gurë në rrugë, por fillimisht duke ia lënë bizneseve topin tani që kur të bëjnë atë deklarimin e pagave, ta bëjnë si pranim të këtij kushti moral, edhe si pranim të këtij detyrimi ligjor dhe ju lutem mos na e bëjnë si ftesë për inspektim, mos na e bëjnë si ftesë për hetim, mos na e bëjnë si sfidë për dënim. Ju lutem mos provokoni më shtetin me deklarime që janë ofenduese për inteligjencën e njeriut. Nuk mundet dot të ngresh pallate e të shesësh apartamente me mijëra euro dhe në kushtet e një tregu pune ku të gjithë ndërtuesit thonë “aman, vetëm punëtorë më duhen, s’ka rëndësi sa i paguaj’’ dhe shtetit ti t’i thuash që këta i paguan me 60 mijë lekë të reja? Këtë nuk mundet, nuk mundet!
Këto ishin ato që unë doja të ndaja me ju dhe ju falënderoj shumë ju që u munduat edhe erdhët deri këtu duke na ndihmuar qe të përcjellim këtë mesazh. Ndjesë kudo ndër juve, kudo ndër ata që nuk i përkasin kësaj kategorie të gjerë grabitësish të pensioneve sepse e vërteta është që kemi dhe plot kompani që deklarojnë. E solla shembullin dhe më bëri përshtypje dhe pastaj pyeta dhe verifikova që a më kishte thënë të vërtetë, se thashë helbete, mos iu duka unë sikur po shkoja t’i merrja sigurimet shoqërore meqë kemi filluar këtë proces, po ishte i saktë. Shumë e saktë kështu që ndjesë të gjithë atyre që nuk i meritojnë këto fjalë, por shumica ju lutem, merreni shumë seriozisht mesazhin që ju ka ardhur nga drejtoria e Tatimeve sepse është vetëm fillimi i një ndërveprimi mes nesh dhe jush që ne duam të jetë sa më konstruktiv dhe sa më çlirues për shpirtrat e të gjithëve në raport me pensionistët, por që jemi të gatshëm ta bëjmë edhe një ndërveprim dramatik për ata që nuk do ta marrin seriozisht.
Shumë faleminderit!
Tani meqë keni ardhur deri këtu nuk mund t’ju themi mirupafshim kështu që për çfarëdo qoftë dikush mund të ketë pyetje, mendim, ide, kritikë, sharje, të gjitha i pranojmë sidomos këto të fundit një herë i presim pa asnjë problem se na janë bërë si ajri që thithim. Ka ndonjë? Normalisht unë e kuptoj pse s’ka, se fjalimet tona ishin të gjata dhe ju mezi po prisni të ikni tani dhe të vazhdoni punët tuaja.
Shumë faleminderit dhe një herë tjetër dhe për çdo gjë jashtë kësaj teme në kuptimin që për çdo gjë tjetër, qeverinë e keni në dispozicion, institucionet i keni në dispozicion. Për këtë na keni në dispozicion vetëm që t’i paguajmë kokërr më kokërr sigurimet shoqërore.
Faleminderit!
