Vendime të miratuara në mbledhjen e Këshillit të Ministrave 02 Mars 2016

V E N D I M

PËR

DISA NDRYSHIME NË VENDIMIN NR.752, DATË 5.9.2013, TË KËSHILLIT TË MINISTRAVE, “PËR SHPRONËSIMIN, PËR INTERES PUBLIK, TË PRONARËVE TË PASURIVE  TË PALUAJTSHME, PRONË PRIVATE, QË PREKEN NGA ZBATIMI I PROJEKTIT “BULEVARDI VERIOR DHE REHABILITIMI I LUMIT TË TIRANËS”, FAZA I, NË BASHKINË E TIRANËS”

Në mbështetje të nenit 100 të Kushtetutës dhe të neneve 5, pika 1, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, me propozimin e ministrit të Financave, Këshilli i Ministrave

V E N D O S I:

Në vendimin nr.752, datë 5.9.2013, të Këshillit të Ministrave, bëhen ndryshimet, si më poshtë vijon:

1.    Pika  3 ndryshohet, me këtë përmbajtje:

“3. Vlera e plotë e shpronësimit, prej 1 757 476 521 (një miliard e shtatëqind e pesëdhjetë e shtatë milionë e katërqind e shtatëdhjetë e gjashtë mijë e pesëqind e njëzet e një) lekësh, do të përballohet në masën 550 000 000 (pesëqind e pesëdhjetë milionë) lekë nga llogaria “Fondi i shpronësimeve” në Bankën e Shqipërisë dhe, pjesa e mbetur, nga Bashkia e Tiranës.”.

2.    Pika 9 ndryshohet, me këtë përmbajtje:

“9. Ngarkohen Bashkia e Tiranës, Ministria e Financave, Ministria e Punëve të Brendshme, Zyra Qendrore e Regjistrimit të Pasurive të Paluajtshme dhe Zyra Vendore e Regjistrimit të Pasurive të Paluajtshme Tiranë për zbatimin e këtij vendimi.”.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M 

PER

 MIRATIMIN E LISTËS SË VENDEVE TË TRETA TË SIGURTA

Në mbështetje të nenit 100 të Kushtetutës dhe të pikës 2, të nenit 10, të ligjit nr.121/2014, “Për azilin në Republikën e Shqipërisë”, me propozimin e ministrit të Punëve të Brendshme, Këshilli i Ministrave

V E N D O S I:

1.    Miratimin e listës së vendeve të treta të sigurta, sipas shtojcës bashkëlidhur këtij vendimi.

2.    Kur zhvillimet në një ose më shumë vende mund të sjellin ndryshime në kushtet e atyre vendeve, ministri i Punëve të Brendshme, sipas parashikimeve të nenit 10, të ligjit nr.121/2014, “Për azilin në Republikën e Shqipërisë”, pas marrjes së mendimit zyrtar të Ministrisë së Punëve të Jashtme, propozon ndryshimin e kësaj liste.

3.    Në përgatitjen e ndryshimeve në listën e vendeve të treta të sigurta mbahen parasysh të dhënat që merren nga institucionet e specializuara të Republikës së Shqipërisë për përfitimin e informacionit nga vendet e origjinës, listat e hartuara për qëllime të ngjashme nga shtete apo organizata ndërkombëtare, si dhe mendimi përkatës i UNHCR-së ose i organizatave ndërkombëtare për të drejtat e njeriut.

4.    Ministria e Punëve të Jashtme, në bazë të të dhënave që ka dhe vlerësimeve që bën, mund t’i rekomandojë në çdo kohë Ministrisë së Punëve të Brendshme ndryshim të listës bashkëlidhur këtij vendimi.

5.    Vendimi nr.1260, datë 23.12.2009, i Këshillit të Ministrave, “Për miratimin e listës së vendeve të treta të sigurta”, shfuqizohet.

6.    Ngarkohet Ministria e Punëve të Brendshme për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

RREGULLAT, PROCEDURAT DHE MËNYRAT E VËNIES NË DISPOZICION TË PASURIVE TË PALUAJTSHME SHTETËRORE NË ZONAT ME PËRPARËSI ZHVILLIMIN E TURIZMIT

Në mbështetje të nenit 100 të Kushtetutës dhe të pikës 4, të nenit 35, të ligjit nr.93/2015, “Për turizmin”, me propozimin e ministrit të Zhvillimit Ekonomik, Turizmit, Tregtisë dhe Sipërmarrjes, Këshilli i Ministrave

V E N D O S I:

I.    PASURITË SHTETËRORE QË VIHEN NË DISPOZICION, E DREJTA, KOMPETENCAT DHE AFATET
1.    Pasuritë e paluajtshme shtetërore, në zonat me përparësi zhvillimin turizmin, u vihen  në dispozicion të tretëve për zhvillimin e projekteve në turizëm.

2.    Vënia në dispozicion e pasurive të paluajtshme shtetërore, në zonat me përparësi zhvillimin e turizmit, miratohet nga Këshilli i Ministrave, me propozimin e ministrit përgjegjës për turizmin.

3.    Vënia në dispozicion e pasurive të paluajtshme shtetërore, në zonat me përparësi zhvillimin e turizmit, bëhet me afat deri në 99 vjet.

4.    Procedurat për vënien në dispozicion të pasurive të paluajtshme shtetërore, në zonat me përparësi zhvillimin e turizmit, përcaktohen në kreun II.

5.    Në rastin e investitorëve me status “Investitor strategjik i veçantë”, sipas përcaktimeve në ligjin nr.55/2015, “Për investimet strategjike në Republikën e Shqipërisë”, Këshilli i Ministrave mund të vendosë, rast pas rasti, dhe nëse kjo kërkohet nga investitori, transferimin e të drejtës së pronësisë së pasurive të paluajtshme shtetërore te investitori privat, duke e kushtëzuar transferimin me realizimin e plotë të investimit. Kur vlerësohet nga Këshilli i Ministrave, marrëveshja për realizimin e investimit strategjik propozohet për miratim, me ligj të posaçëm, në Kuvendin e Republikës së Shqipërisë.

II.    PROCEDURAT E DHËNIES NË DISPOZICION TË PASURIVE TË PALUAJTSHME SHTETËRORE

1.    Pasuritë e paluajtshme shtetërore vihen në dispozicion sipas:

a)    procedurës “Thirrje për aplikim”, të shpallur nga ministria përgjegjëse për turizmin;
b)    procedurës me aplikim, të paraqitur nga subjekti zhvillues.

2.    Procedura “Thirrje për aplikim”

2.1 Procedura “Thirrje për aplikim” fillon me shpalljen, nga ministria përgjegjëse për turizmin, të thirrjes për vënien në dispozicion të pasurisë së paluajtshme shtetërore në zonat me përparësi zhvillimin e turizmit. Pasuritë e paluajshtme shtetërore, të përcaktuara në thirrje, duhet të jenë në përputhje me politikat, strategjitë, instrumentet e planifikimit dhe planet ekzistuese sektoriale.

2.2  Shpallja publikohet në “Buletinin e njoftimeve publike”.
2.3    Në njoftimin e shpallur, ministria përgjegjëse për turizmin përcakton të dhënat për pasurinë e paluajtshme, pronë shtetërore, përshkrimin e zonës në të cilën ajo ndodhet, formën/modelin e zhvillimit, metodologjinë e vlerësimit dhe afatin, brenda të cilit subjektet duhet të dorëzojnë:

A.    Dokumentacionin administrativo-ligjor:
a)     Të mos jetë në proces falimentimi dhe kapitalet e tij të mos jenë në proces ekzekutimi nga përmbaruesit;
b)     Të mos jetë subjekt i procedurave për deklarimin e falimentimit dhe të mos ketë një urdhër likuidimi të detyruar ose administrimi nga gjykata, ose të mos ketë një marrëveshje me kreditorët apo ndonjë procedurë tjetër të ngjashme;
c)     Të mos jetë dënuar me vendim gjykate të formës së prerë, për vepra që lidhen me veprimtarinë profesionale, si person juridik, ortak apo aksionar i shoqërisë;
ç)     Të ketë përmbushur detyrimet për pagimin e tatimeve, në përputhje me legjislacionin shqiptar ose me dispozitat e zbatueshme në shtetin e origjinës;
d)     Të ketë përmbushur detyrimet për derdhjen e kontributeve të sigurimeve shoqërore, në përputhje me legjislacionin shqiptar ose me dispozitat e zbatueshme në shtetin e origjinës;
dh)      Kërkesat e shkronjave “a”, “b” dhe “c”, plotësohen me dorëzimin e ekstraktit të Regjistrit Tregtar për të dhënat e subjektit, si dhe ekstraktin mbi historikun e subjektit, të lëshuara nga Qendra Kombëtare e Regjistrimit, dhe me vërtetim nga institucionet përgjegjëse, për lëshimin e këtyre dokumenteve;
e)     Kërkesat e shkronjave “ç” dhe “d”, plotësohen me dorëzimin e vërtetimit të lëshuar nga administrata tatimore, vetëm për shoqëritë shqiptare;
ë)     Kandidati/ofertuesi i huaj duhet të vërtetojë se i plotëson të gjitha kërkesat e renditura më sipër. Nëse dokumentet e sipërpërmendura nuk lëshohen në shtetin e origjinës, atëherë mjafton një deklaratë noteriale, me shkrim, nga ana e kandidatit/ofertuesit.

B.    Dokumentacionin teknik:

a) Projekte me vlerë të përafërt investimi në fushën e turizmit, të realizuara dhe të përfunduara me sukses, apo eksperienca të ngjashme, me vlerë të përafërt investimi me projekte në fushën e turizmit;
b)  Propozimin e projektit teknik, i cili duhet të përmbajë:
projektidenë;
projektin arkitekturor;
të dhëna për standardin turistik që do të zbatohet;
të dhëna për cilësinë e infrastrukturës dhe vlerat e investimit;
planin teknik dhe inxhinierik të zonës, në përputhje me standardet e përdoruara për ndërtim dhe planifikimin urban;
planin e zbatimit, planin operacional dhe metodat për funksionimin dhe mirëmbajtjen e investimit;
grafikun, fazat dhe afatet e realizimit të investimit.

C) Dokumentacionin financiar:

a)     Kopje të certifikuara të bilanceve të 3 viteve të fundit, të paraqitura në autoritetet përkatëse, dhe raportet e auditit financiar, të certifikuara nga një subjekt i licencuar auditimi;
b)     Kopje të deklaratave të xhiros vjetore;
c)     Garanci bankare, minimumi 1%, për kapitalin e nevojshëm financiar për kryerjen e investimit;
ç)     Planbiznesin, i cili duhet të përmbajë, të paktën, dokumentacionin e mëposhtëm:
Shpenzimet kapitale për kryerjen e investimit;
Shpenzimet për kostot operacionale dhe të ardhurat;
Tarifën e përdorimit;
Garancinë e aplikimit, në masën 2% të investimit, si masë mbrojtëse për institucionin në rastin e tërheqjes, në mënyrë të njëanshme, nga ana e aplikuesit.

Ç) Dokumentacionin në lidhje me ndikimin mjedisor:

a) Impakti mjedisor i zhvillimit të investimit dhe përmirësimet e propozuara.

D) Dokumentacionin në lidhje me ndikimin social:

Numrin e të punësuarve;
Programin për përgjegjësinë sociale;
Trajnimin e punonjësve dhe transferimin e njohurive;
ç)     Lidhjet me ekonominë vendase.

2.4 Përveç kritereve të mësipërme, ministria përgjegjëse për turizmin mund të vendosë dhe kritere të tjera për përzgjedhjen e aplikuesit, të cilit do t’i vihet në dispozicion pasuria e paluajtshme, në zonat me përparësi zhvillimin e  turizmit.

3. Organizimi i procedurës thirrje për aplikim.

3.1    Ministri përgjegjës për turizmin, me shpalljen e thirrjes për aplikim, nxjerr urdhrin për përcaktimin e anëtarëve të Komisionit për Vlerësimin e Aplikimeve, këtu e në vijim  “Komisioni”.

3.2    Komisioni përbëhet nga jo më pak se 5 persona, specialistë të fushës, në ministrinë përgjegjëse për turizmin, dhe, sipas rastit, nga përfaqësues të ministrive apo të institucioneve të tjera, të cilët gjykohen që kanë lidhje me aplikimin. Komisioni është përgjegjës për shqyrtimin e aplikimeve. Në çdo rast, numri i anëtarëve duhet të jetë tek.

3.3    Nuk mund të marrin pjesë në këtë Komision personat që kanë konflikt interesi me aplikuesit, sipas kuptimit të ligjit “Për konfliktin e interesit”. Anëtarët e Komisionit kanë detyrimin të ruajnë konfidencialitetin e përmbajtjes së aplikimeve.

3.4    Aplikimet duhet të dorëzohen dorazi, në adresën e përcaktuar në dokumentet e procedurës konkurruese, brenda afatit kohor të specifikuar. Çdo aplikim i bërë pas afatit të përcaktuar në thirrjen e ministrisë përgjegjëse për turizmin nuk do të shqyrtohet nga Komisioni dhe do t’i kthehet, i pahapur, aplikuesit.

3.5    Aplikimet do të dorëzohen në dy zarfe, ku në njërin duhet të jetë shënuar “Origjinal” dhe në tjetrin “Kopje”.

3.6    Zarfet do të paraqiten sipas përcaktimeve të bëra në thirrjen për publikim. Zarfet duhet të jenë të vulosura me vulën e aplikuesit.

3.7     Hapja dhe vlerësimi i aplikimeve nga Komisioni bëhet, si më poshtë vijon:

a)    Komisioni i lexon aplikimet në prani të aplikuesve, sipas përcaktimeve të bëra në këtë vendim;
b)    Komisioni lexon emrin dhe adresën e aplikuesit dhe hap zarfin përkatës. Dokumentet e kualifikimit administrativo-ligjor, teknik dhe financiar lexohen me zë të lartë, në prani të aplikuesve. Më pas, hapet dokumentacioni teknik dhe financiar.
Komisioni u komunikon përfaqësuesve ditën, vendin dhe orën për klasifikimin përfundimtar të aplikimeve dhe, më pas, vazhdon punën për shqyrtimin e aplikimeve;
c)    Bazuar në aplikimet e pranuara, Komisioni harton renditjen përfundimtare. Afati i vlerësimit nga Komisioni është deri në 30 (tridhjetë) ditë. Në raste të veçanta, me kërkesë të argumentuar të Komisionit, ministri përgjegjës për turizmin mund t’a ndryshojë këtë afat;
ç)     Nëse më shumë se një aplikim ka të njëjtin numër pikësh, atëherë fituesi do të përcaktohet me short, në prani të aplikuesve.
d)    Komisioni, brenda 10 (dhjetë) ditëve, nga përfundimi i vlerësimit, përgatit raportin përmbledhës dhe i propozon fituesin titullarit të ministrisë përgjegjëse për turizmin;
dh)  Raporti përmban:
i.      objektin e aplikimit;
ii.     një përmbledhje të procedurës së ndjekur;
iii. numrin e aplikimeve të paraqitura dhe një përmbledhje për çdo aplikim;
v.     renditjen e aplikuesve, sipas vlerësimit të Komisionit;
vi.  ankesat, nëse ka.

3.8  Çdo aplikues mund të kërkojë rishikim administrativ të procesit, kur gjykon se një vendim i ministrisë përgjegjëse për turizmin është marrë në kundërshtim me aktet ligjore dhe nënligjore në fuqi, duke vepruar, si më poshtë vijon:

a)    Ankesa i paraqitet me shkrim ministrisë përgjegjëse për turizmin brenda 7 (shtatë) ditëve pune, nga data kur ankimuesi është vënë në dijeni për mospranimin e aplikimit;
b)    Me marrjen e ankesës me shkrim, ministria përgjegjëse për turizmin pezullon vazhdimin e procedurës, derisa ankesa të jetë shqyrtuar plotësisht, përfshirë dhe nxjerrjen e një vendimi përpara skadimit të afatit kohor;
c)    Ankesa në institucionin përgjegjës bëhet nga aplikuesi, duke shënuar emrin dhe adresën e tij, referimin për procedurën konkrete, bazën ligjore dhe përshkrimin e shkeljes, pretendimin për vendimin përfundimtar dhe dokumentacionin përkatës si dhe vendimin e ministrisë përgjegjëse për turizmin. Elementet e sipërpërmendura janë të domosdoshme për shqyrtimin e ankesës.

3.9 Ministria përgjegjëse për turizmin shqyrton ankesën dhe merr një vendim të arsyetuar, brenda 7 (shtatë) ditëve, pas marrjes së ankesës, të cilin duhet t’ia njoftojë ankuesit jo më vonë se në ditën vijuese të punës.

3.10  Kundër vendimit të ministrisë përgjegjëse për turizmin ankuesi ka të drejtë që, brenda 30 (tridhjetë) ditëve, nga marrja dijeni, të bëjë padi për shqyrtim të mosmarrëveshjes administrative në gjykatën kompetente. Shqyrtimi i këtij ankimi në gjykatë nuk pezullon vazhdimin e procedurave.

3.11 Pas miratimit të raportit përmbledhës nga titullari i ministrisë përgjegjese për turizmin, siç parashikohet në këtë vendim, dhe pasi Këshilli i Ministrave të ketë miratuar propozimin e ministrit përgjegjës për turizmin për lidhjen e kontratës dhe termat kryesore të saj me subjektin aplikues të përzgjedhur, aplikuesi i suksesshëm njoftohet me shkrim për pranimin e aplikimit dhe për lidhjen e kontratës. Ky njoftim publikohet në “Buletinin e njoftimeve publike”.

3.12 Mosdhënia e miratimit nga Këshilli i Ministrave e bën thirrjen për aplikim të pasuksesshme.

3.13    Njoftimi duhet të përmbajë:
a)    emrin dhe adresën e aplikuesit të shpallur fitues;
b)    kohëzgjatjen e kontratës;
c)    emrat e aplikuesve të tjerë;
ç)      emrat e aplikuesve të skualifikuar dhe arsyet e skualifikimit;
d)  informacion nëse ka patur ankesa;
dh)    kërkesën që kontrata të nënshkruhet, me kusht që të jetë bërë sigurimi i saj në masën 10% të investimit.

3.14.  Para nënshkrimit të kontratës, aplikuesi fitues duhet të bëjë sigurimin e kontratës, në masën 10%, si garanci për institucionin, në rastet e shkeljes së kontratës nga ana e tij. Garancia kthehet pas përfundimit të çdo faze të investimit, por jo më shumë se në tri këste, sipas fazave të investimit.

4. Procedura me aplikim, e paraqitur nga subjekti zhvillues.

Për procedurën me aplikim, aplikuesi i nënshtrohet procedurës, si më poshtë vijon:

4.1     Subjekti zhvillues aplikon pranë ministrisë përgjegjëse, duke paraqitur kërkesën e tij;

4.2. Ministria përgjegjëse për turizmin bën një vlerësim paraprak, nëse:

a)    objektivat e projektit përshtaten me planet apo strategjitë sektoriale apo rajonale;
b)    nuk ka kufizime për zbatimin e projektit;
c)    projekti mund të zbatohet siç është planifikuar, duke përdorur zgjidhjet e propozuara;
ç)  projekti ka qëndrueshmëri ekonomike dhe përshtatshmëri financiare;
d)    projekti siguron përshpejtimin e zhvillimit të turizmit.

4.3 Në vlerësimin paraprak, ministria, nëse e gjykon të nevojshme, mund të thërrasë, përveç specialistëve të fushës, në ministrinë përgjegjëse për turizmin, dhe përfaqësues të ministrive apo të institucioneve të tjera, të cilët gjykohen që kanë lidhje me aplikimin.

4.4 Pas kryerjes së vlerësimit paraprak dhe nëse aplikimi vlerësohet i pranueshëm, ministria përgjegjëse për turizmin i kërkon aplikuesit të dorëzojë të gjithë dokumentacionin e kërkuar në pikën 2.3, të procedurës “Thirrje për Aplikim“, brenda një afati të caktuar.

4.5 Me plotësimin e dokumentacionit përkatës, nga ana e aplikuesit, vlerësimi i aplikimit bëhet nga një komision, i ngritur me urdhër të ministrit. Urdhri përcakton dhe metodologjinë e vlerësimit të aplikimit.

4.6 Nëse nga vlerësimi aplikimi rezulton i pranueshëm, ministria përgjegjëse për turizmin i propozon Këshillit të Ministrave miratimin e vënies në dispozicion të pasurive shtetërore si dhe termat kryesorë të kontratës që do të lidhet me subjektin zhvillues.

4.7 Mosdhënia e miratimit nga Këshilli i Ministrave e bën aplikimin të pasuksesshëm.

4.8 Para nënshkrimit të kontratës, aplikuesi fitues duhet të bëjë sigurimin e kontratës, në masën 10%, si garanci për institucionin në rastet e shkeljes së kontratës nga ana e tij. Garancia kthehet pas përfundimit të çdo faze të investimit, por jo më shumë se në tri këste, sipas fazave të investimit.

III.     TARIFAT PËR VËNIEN NË DISPOZICION TË PASURIVE TË PALUAJTSHME SHTETËRORE

Pasuritë e paluajtshme shtetërore, në zonat me përparësi zhvillimin e turizmit, jepen në përdorim, sipas tarifave të përcaktuara në kuadrin ligjor në fuqi, sipas llojit të pasurisë.

IV.    KONTRATA ME TARIFËN SIMBOLIKE 1 EURO 

1.    Pasuritë e paluajtshme shtetërore, në zonat me përparësi zhvillimin e turizmit, në të cilat vlera e propozuar e investimit kalon shumën 50 000 000 (pesëdhjetë milionë) euro, mund t’u jepen të tretëve me kontrata përdorimi, me tarifën simbolike 1 (një) euro, me vendim, rast pas rasti, të Këshillit të Ministrave.

2.    Ministri përgjegjës për turizmin i propozon Këshillit të Ministrave të miratojë lidhjen e kontratës së përdorimit, me çmimin simbolik 1 (një) euro. Propozimi shoqërohet me projektkontratën e negociuar ndërmjet palëve.

3.    Para nënshkrimit të kontratës, ku përmbahen dhe termat e dhënies në përdorim të pasurisë së paluajtshme, me tarifë 1 euro, investitori është i detyruar të kryejë pagesën e garancisë së kontratës, në masën 10% të vlerës së investimit. Garancia kthehet pas përfundimit të çdo faze të investimit, por jo më shumë se në tri këste, sipas fazave të investimit.

4.    Në kontratat me tarifën 1 euro vendosen sanksione për rastet kur investitori nuk realizon kushtet e saj. Për mosrealizim të investimit në përfundim të fazës përkatëse, ai ndëshkohet me 1% të vlerës së investimit të parealizuar në atë fazë dhe, nëse pas 6 muajve investimi nuk realizohet, kontrata zgjidhet nga institucioni shtetëror që e ka lidhur atë, duke marrë si gjobë, masën e garancisë së depozituar në atë periudhë.

V.     LIDHJA DHE MONITORIMI I KONTRATAVE

1.    Kontrata që do të nënshkruhet për përdorimin e pasurive të paluajtshme shtetërore në zonat me përparësi zhvillimin e turizmit, me subjektin investues, përpilohet në përputhje me vendimin e Këshillit të Ministrave, “Për procedurat dhe formatet e marrëveshjeve me investitorët”.

2.    Në kontratën që do të nënshkruhet duhet të kihen parasysh:

a)     natyra dhe objekti i punëve që duhet të kryhen dhe shërbimet që duhet të jepen nga ministria përgjegjëse për turizmin;
b)     kohëzgjatja e kontratës;
c)     vlera e projektit;
ç)     ndihma që mund të japë ministria përgjegjëse për turizmin për marrjen e licencave dhe të lejeve të nevojshme;
d)     pronësia e aseteve të projektit dhe detyrimet e palëve, sipas rastit, për vënien në dispozicion të vendit të projektit, dhe çdo lehtësi tjetër të mundshme;
dh) tarifat apo pagesat për përdorimin e pasurisë;
e)     procedurat për rishikimin dhe miratimin e projekteve inxhinierike, të planeve të ndërtimit dhe specifikimeve nga ministria përgjegjëse për turizmin, si dhe procedurat për testimin dhe kontrollin përfundimtar, miratimin dhe pranimin e mjetit të infrastrukturës, rregullat dhe standardet, në bazë të të cilave janë projektuar projektet, që duhet të jenë në përputhje me praktikat më të mira, me synim zhvillimin e tregut nëpërmjet ndarjes së riskut;
ë)     shtrirja e detyrimeve të zhvilluesit, sipas rastit, për të siguruar ndryshimin e shërbimit, për të përmbushur kërkesat e kohës, vazhdimësinë e tij dhe dhënien, në kushte kryesisht të njëjta për të gjithë përdoruesit, mekanizmat për të trajtuar kostot e mundshme për to;
f)     e drejta e ministrisë përgjegjëse për turizmin ose e një autoriteti tjetër publik për të monitoruar punët që duhet të kryhen dhe shërbimet që duhet të jepen, kushtet dhe masën, në të cilën ministria përgjegjëse për turizmin mund të urdhërojë ndryshime për punët dhe kushtet e shërbimit. E drejta e ministrisë përgjegjëse për turizmin për të marrë masa të tjera të arsyeshme, për të siguruar që mjeti infrastrukturor të operohet si duhet dhe shërbimet të jepen në përputhje me kërkesat e zbatueshme ligjore dhe kontraktuale, si dhe e drejta për të monitoruar mekanizmat dhe trajtimin e shpenzimeve të mundshme për to;
g)     detyrimet e zhvilluesit për t’i dhënë autoritetit kontraktues apo një autoriteti tjetër publik, sipas rastit, raporte dhe informacion tjetër për veprimtarinë;
gj) çdo kufizim ose kusht të zbatueshëm për transferimin e të drejtave dhe të detyrimeve të zhvilluesit, sipas kontratës;
h) çdo kufizim ose kusht për transferimin e një interesi kontrollues të zhvilluesit;
i) përkufizimi dhe pasoja e forcës madhore, ndryshimi në ligj dhe ndryshime të tjera në rrethana (duke përfshirë çdo të drejtë të palëve për të kërkuar kompensimin ose rishikimin e kontratës);
j)  detyrimet e mundshme, nëse ka, të autoriteteve publike përkatëse ose të ministrisë përgjegjëse për turizmin;
k)     çdo të drejtë të ministrisë përgjegjëse për turizmin për të rishikuar dhe miratuar kontratat kryesore, që duhet të lidhen nga zhvilluesi, veçanërisht me aksionarët e zhvilluesit ose persona të tjerë juridikë, ku zhvilluesi është pjesëmarrës apo anasjelltas;
l)     garancitë për t’u përmbushur dhe politikat e sigurimeve që duhet të ndiqen nga zhvilluesi për zbatimin e kontratës;
ll)     procedurat e rregullimit të shkeljes së kontratës, të bërë nga njëra prej palëve;
m)    kushtet dhe procedurat për ndryshimin dhe/ose përfundimin e kontratës; të drejtat dhe detyrimet e palëve, me kalimin e afatit apo përfundimin e kontratës (duke përfshirë mekanizmin e transferimit të sendeve pasurore, të teknologjisë, kompensimit, shërbimin e trajnimit dhe të mbështetjes që duhet të jepet nga zhvilluesi);
n)     ligji i zbatueshëm dhe mekanizmat për zgjidhjen e mosmarrëveshjeve që mund të lindin ndërmjet ministrisë përgjegjëse për turizmin dhe zhvilluesit;
nj) të drejtat dhe detyrimet e palëve për informacionin konfidencial.

3.    Monitorimi bëhet nga ministria përgjegjëse për turizmin.

4.    Njësia monitoruese kryen këto detyra:

a)    Pas lidhjes së kontratës së përdorimit, bën dorëzimin, me procesverbal, te investitori, të objektit të përshkruar në kontratë, sipas genplanit përkatës. Në procesverbal përshkruhen qartë gjendja fizike e pronës, vlera kontabël e objektit që jepet në përdorim, sipas llogarive financiare në fund të vitit paraardhës, dhe shoqërohet me pamje fotografike të momentit;
b)    Kur mbaron afati i kontratës ose kur kontrata zgjidhet para afatit, merr në dorëzim, me procesverbal, objektin që ka në administrim;
c)    Ndjek, në vijueshmëri, respektimin e kushteve të kontratave të përdorimit dhe, çdo 6 muaj, harton akte rakordimi me subjektet investuese;
ç) krijon e mban regjistrin për përdorim nga të tretët të pronës së paluajtshme shteterore, në zonat me përparësi zhvillimin e turizmit,  dhe të dhënat për të ardhurat nga përdorimi i saj. Për çdo ndryshim në dhëniet në përdorim apo lirimin nga këto të drejta, hap pas hapi, kjo njësi bën ndryshimet në regjistrin e krijuar;
d)    harton një raport të hollësishëm, çdo 6 muaj, për ecurinë e kontratave të përdorimit, të konfirmuar për arkëtimet, dhe, nga degët e thesarit të rrethit përkatës, raportin përkatës për realizimin e derdhjes së detyrimeve të përdorimit mujor e treguesve të tjerë të kontratës, dhe ia paraqet atë ministrit përgjegjës për turizmin.

5.    Për kontratat e përdorimit, njësia monitoruese e kontratave ka të drejtë të propozojë te ministri përgjegjës për turizmin, i cili vendos për to, ndërhyrje apo penalitete, sipas kontratës me investitorin, në rastet kur vërehen parregullsi në zbatimin e kontratës.

VI.    SHPËRNDARJA E TË ARDHURAVE

Të ardhurat që krijohen nga kontratat e përdorimit, të rregulluara sipas këtij vendimi, derdhen në masën 100% në buxhetin e shtetit.

VII.   DISPOZITA TË FUNDIT

1.    Ministria e Zhvillimit Ekonomik, Turizmit, Tregtisë dhe Sipërmarrjes, në marrëveshje me zhvilluesin, mund të ndryshojë afatin e kontratave të lidhura, për pasuritë e paluajtshme shtetërore, në zonat me përparësi zhvillimin e turizmit, për të cilat janë dhënë lejet zhvillimore komplekse/ndërtimi.

2.    Ngarkohet Ministria e Zhvillimit Ekonomik, Turizmit, Tregtisë dhe Sipërmarrjes  për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

MIRATIMIN, NË PARIM, TË PROTOKOLLIT NDRYSHUES TË MARRËVESHJES, NDËRMJET QEVERISË SË REPUBLIKËS SË SHQIPËRISË DHE QEVERISË SË REPUBLIKËS SË ARGJENTINËS, PËR BASHKËPUNIMIN SHKENCOR DHE TEKNIK  

Në mbështetje të nenit 100 të Kushtetutës dhe të neneve 5 e 7, të ligjit nr.8371, datë 9.7.1998, “Për lidhjen e traktateve dhe marrëveshjeve ndërkombëtare”, me propozimin e ministrit të Arsimit dhe Sportit, Këshilli i Ministrave

V E N D O S I:

Miratimin, në parim, të protokollit ndryshues të marrëveshjes, ndërmjet qeverisë së Republikës së Shqipërisë dhe qeverisë së Republikës së Argjentinës, për bashkëpunimin shkencor dhe teknik, nënshkruar në Tiranë, më 19 korrik 2007, sipas tekstit që i bashkëlidhet këtij vendimi.

Ky vendim hyn në fuqi menjëherë.

K R Y E M I N I S T R I

EDI RAMA 

***

V E N D I M

PËR

GRUPIMIN E NJËSIVE TË VETËQEVERISJES VENDORE, PËR EFEKT PAGE, DHE CAKTIMIN E KUFIJVE TË PAGAVE TË FUNKSIONARËVE TË ZGJEDHUR E TË EMËRUAR, TË NËPUNËSVE CIVILË E TË PUNONJËSVE ADMINISTRATIVË TË NJËSIVE TË VETËQEVERISJES VENDORE

Në mbështetje të nenit 100 të Kushtetutës, të neneve 2, shkronja “c”, 4, shkronja “d”, e 5, të ligjit nr.10405, datë 24.3.2011, “Për kompetencat për caktimin e pagave dhe të shpërblimeve”, dhe të neneve 46, 54, 65, 71 e 77, të ligjit nr.139/2015, “Për vetëqeverisjen vendore”, me propozimin e ministrit të Shtetit për Inovacionin dhe Administratën Publike, ministrit të Shtetit për Çështjet Vendore dhe ministrit të Financave, Këshilli i Ministrave

V E N D O S I:

1.    Nivelet e pagave, për funksionarët e zgjedhur të organeve përfaqësuese dhe ekzekutive të njësive të vetëqeverisjes vendore, janë:

a)    Për Bashkinë e Tiranës:

Kryetari                 140 000 – 174 760 lekë;
Nënkryetari                 130 000 – 140 000 lekë.

b)    Për njësitë e vetëqeverisjes vendore me 200 001 – 400 000 dhe me mbi 400 000 banorë:

Kryetari                  130 000 – 155 000 lekë;
Nënkryetari                 100 000 – 129 000 lekë.

c)    Për njësitë e vetëqeverisjes vendore me 100 001 – 200 000 banorë:

Kryetari                  110 000 –  140 000 lekë;
Nënkryetari                    70 000 – 117 500 lekë.

ç) Për njësitë e vetëqeverisjes vendore me 50 001 – 100 000 banorë:

Kryetari                  70 000 – 117 500 lekë;
Nënkryetari                 60 000 – 95 000 lekë.

d)    Për njësitë e vetëqeverisjes vendore me 20 001 – 50 000 banorë:

Kryetari                   60 000 – 95 000 lekë;
Nënkryetari                 45 000 – 80 500 lekë.

dh) Për njësitë e vetëqeverisjes vendore me deri në 20 000 banorë:

Kryetari                   45 000 – 80 500 lekë;
Nënkryetari                  28 300 – 70 500 lekë.

e)    Për Këshillin e Qarkut:

Kryetari                 87 000 – 140 000 lekë;
Nënkryetari                 57 600 – 95 000 lekë.

2.    Struktura dhe nivelet e pagave për nëpunësit civilë në Bashkinë e Tiranës janë sipas lidhjes nr.1, që i bashkëlidhet këtij vendimi dhe është pjesë përbërëse e tij.

3.  Struktura dhe nivelet e pagave për nëpunësit civilë në bashkitë e tjera, janë, përkatësisht, sipas lidhjeve nr.2, 3, 4, 5 e 6, në përputhje me numrin e banorëve për çdo bashki, që i bashkëlidhen këtij vendimi dhe janë pjesë përbërëse e tij.

4.     Struktura dhe nivelet e pagave për nëpunësit civilë në këshillin e qarkut janë sipas lidhjes nr.7, që i bashkëlidhet këtij vendimi dhe është pjesë përbërëse e tij.

5.     Paga e grupit, kolona 2, e lidhjeve nr.1, 2, 3, 4, 5, 6 e 7, është sipas lidhjes nr.9, që i bashkëlidhet këtij vendimi dhe është pjesë përbërëse e tij.

6.     Shtesa për vjetërsi në punë, kolona 3, e lidhjeve nr.1, 2, 3, 4, 5, 6 e 7, jepet në masën 2 për qind pas çdo viti pune, deri në 25 vjet, dhe llogaritet mbi pagën e grupit. Për efekt të llogaritjes së kësaj shtese, vite pune do të konsiderohen vjetërsia e përgjithshme në punë, e dokumentuar në librezën e punës së çdo punonjësi, me përjashtim të viteve të sigurimit vullnetar, vetëpunësimit, shërbimit ushtarak, për meshkujt, vitet e shkollimit në institucionet e arsimit të lartë, për femrat, si dhe periudha e trajtimit me pagesë papunësie.

7. Shtesa për kualifikim, kolona 4, e lidhjeve nr.1, 2, 3, 4, 5, 6 e 7, është 0.

8.    Shtesa për pozicion është sipas kolonës 5, të lidhjeve nr.1, 2, 3, 4, 5, 6 e 7, bashkëlidhur këtij vendimi.

9.    “Specialistët”, “Përgjegjësit e sektorit” apo “Drejtorët e drejtorive”, të cilët punojnë në pozicione që lidhen me procesin e informatizimit të administratës publike dhe kërkojnë, në mënyrë të detyrueshme, diplomë universitare të nivelit “Master i Shkencave/Master Profesional/Bachelor” apo të barasvlershëm me to, sipas legjislacionit të arsimit të lartë, në degët “Inxhinieri Elektronike”, “Inxhinieri Informatike”, “Informatikë”, “Inxhinieri Telekomunikacioni” apo “Shkenca kompjuterike” përfitojnë një shtesë mbi pagë, në masën:

–    7 500 (shtatë mijë e pesëqind) lekë në muaj, për nëpunësit e strukturave të TIK-ut, të Bashkisë Tiranë, të bashkive me mbi 400 000 banorë, të bashkive me 200 001 – 400 000 banorë dhe të bashkive me 100 001 – 200 000 banorë;
–    5 000 (pesë mijë) lekë në muaj, për nëpunësit e strukturave të TIK-ut, të bashkive me 50 001 – 100 000 banorë, të bashkive me 20 001 –  50 000 banorë dhe të bashkive me deri në 20 000 banorë.

10.      Për emërtesën “Sekretar”, niveli i pagës do të jetë:

Sekretar i Kryetarit të Bashkisë Tiranë, sipas kategorisë IV-a, të lidhjes nr.1;
Sekretar i kryetarëve të bashkive të tjera, sipas kategorisë IV-b, të lidhjeve nr.2, 3, 4, 5 e 6, në përputhje me numrin e banorëve të secilës bashki;
Sekretar i Kryetarit të Këshillit të Qarkut Tiranë, sipas kategorisë IV-b, të lidhjes nr.7.

11.  Nivelet e pagave për funksionet e mëposhtme, janë:

Drejtori i kabinetit, në Bashkinë e Tiranës, dhe sekretari i Këshillit Bashkiak të Tiranës – kategoria II-a, e lidhjes nr.1, bashkëlidhur këtij vendimi;
Këshilltari i Kryetarit të Bashkisë së Tiranës dhe zëdhënësi – kategoria II-b, e lidhjes nr.1, bashkëlidhur këtij vendimi;
Drejtori i kabinetit i Këshillit të Qarkut dhe sekretari i Këshillit të Qarkut, – kategoria I-b, e lidhjes nr.7, bashkëlidhur këtij vendimi;
Këshilltari i Kryetarit të Këshillit të Qarkut dhe zëdhënësi – kategoria II-b, e lidhjes nr.7, bashkëlidhur këtij vendimi;
Drejtori i kabinetit dhe sekretari i Këshillit Bashkiak, për bashkitë e tjera, – kategoria II-b, e lidhjeve nr.2, 3, 4, 5 e 6, bashkëlidhur këtij vendimi;
Këshilltari i Kryetarit të Bashkisë dhe zëdhënësi, për bashkitë e tjera, – kategoria III-a/1, e lidhjeve nr.2, 3, 4, 5 e 6, bashkëlidhur këtij vendimi.

12.    Kufijtë e pagave për punonjësit e policisë bashkiake, pranë bashkive, janë sipas lidhjes nr.8, që i bashkëlidhet këtij vendimi dhe është pjesë përbërëse e tij.

13.    Struktura dhe kufijtë e pagave për administratorët e njësive administrative janë sipas lidhjes nr.7, që i bashkëlidhet këtij vendimi dhe është pjesë përbërëse e tij.

14.      Këshilli i qarkut, këshilli i bashkisë, miraton vlerën e pagës:

a)    për secilin funksion të zgjedhur apo të emëruar, brenda kufijve të pagave, të përcaktuara, përkatësisht, në pikën 1, të vendimit;
b) për secilën kategori page, brenda kufijve të pagave të përcaktuara në lidhjet nr.1, 2, 3, 4, 5, 6, 7 e 8, bashkëlidhur dhe pjesë përbërëse të këtij vendimi.

15.     Këshillat e njësive të vetëqeverisjes vendore, kur shikohet e nevojshme të krijojnë funksione të reja, të cilat nuk janë përcaktuar në lidhjet që i bashkëlidhen këtij vendimi, bëjnë njehsimin e tyre, për efekt page, me klasifikimin e miratuar në lidhjet përkatëse të pagave.

16.     Këshillat e njësive të qeverisjes vendore, bazuar në numrin e banorëve të fshatit, miratojnë shpërblimin mujor të kryetarëve të fshatrave, në masën deri në 10 për qind të pagës së:

a)    administratorëve të njësive administrative, kur fshati është pjesë e njësisë administrative, sipas kufijve të pagave të administratorëve, përcaktuar në lidhjen nr.10, bashkëlidhur këtij vendimi;

b)    kryetarëve të bashkive, kur fshati bën pjesë në njësitë administrative ku ndodhet qendra e bashkisë, sipas kufijve të pagave të përcaktuara për kryetarët e bashkive, në pikën 1, të këtij vendimi.

17.     Këshillat e njësive të vetëqeverisjes vendore miratojnë pagat e punonjësve të njësive ekonomike dhe institucioneve të varësisë, me përjashtim të rasteve kur, me ligj, është parashikuar ndryshe, duke respektuar hierarkinë e pagave të nëpunësve apo punonjësve të bashkisë përkatëse.

18.     Në raste të veçanta, në bashkitë me deri në 20 000 banorë, kur, për mungesë kapacitetesh, ka punonjës që nuk kanë arsimin e lartë dhe punojnë në pozicione të nivelit ekzekutiv të shërbimit civil, pagat e tyre caktohen nga këshillat përkatës, në kufirin maksimal deri në 36 000 lekë në muaj.

19.     Kufijtë e pagave bazë të punonjësve administrativë të njësive të vetëqeverisjes vendore do të jenë nga 22 000 – 36 500 lekë në muaj.

20.      Punonjësit administrativë, përveç pagës bazë, përfitojnë shtesën për vjetërsi në punë. Kjo shtesë aplikohet në masën 1 për qind mbi pagën bazë të kufirit minimal, të përcaktuar për çdo klasë. Për llogaritjen e kësaj shtese merret për bazë vjetërsia e përgjithshme në punë, por jo më shumë se 25 vjet.

21.      Caktimi i grupit të njësive të vetëqeverisjes vendore, për efekt page, bëhet nga prefekti, mbi bazën e numrit të banorëve të regjistrit të gjendjes civile, në fillim të çdo viti.

22.     Vendimi nr.1619, datë 2.7.2008, i Këshillit të Ministrave, “Për klasifikimin e funksioneve dhe grupimin e njësive të qeverisjes vendore, për efekt page, e për përcaktimin e kufijve të pagave të punonjësve të organeve të qeverisjes vendore”, të ndryshuar, si dhe të gjitha dispozitat e tjera, në kundërshtim me këtë vendim, shfuqizohen.

Ky vendim hyn në fuqi pas botimit në “Fletoren zyrtare” dhe i shtrin efektet financiare nga data 1 shkurt 2016.

K R Y E M I N I S T R I

EDI RAMA

***

V E N D I M

PËR

NJË NDRYSHIM NË VENDIMIN NR.954, DATË 25.11.2015, TË KËSHILLIT TË MINISTRAVE, “PËR PËRCAKTIMIN E KRITEREVE, TË PROCEDURAVE DHE TË FORMULARIT TË LEJES SË LEGALIZIMIT” 

Në mbështetje të nenit 100 të Kushtetutës dhe të nenit 28, të ligjit nr.9482, datë 3.4.2006, “Për legalizimin, urbanizimin dhe integrimin e ndërtimeve pa leje”, të ndryshuar, me propozimin e ministrit të Zhvillimit Urban, Këshilli i Ministrave

V E N D O S I: 

Pika 11, e vendimit nr.954, datë 25.11.2015, të Këshillit të Ministrave, ndryshohet, si më poshtë vijon:

“11. Në rastet kur ka konflikt interesi, sipas kuptimit të ligjit nr.9367,  datë 7.4.2005, “Për parandalimin e konfliktit të interesave në ushtrimin e funksioneve publike”, të ndryshuar, me kërkesë paraprake të subjektit të interesuar, Drejtoria e Përgjithshme e ALUIZNI-t autorizon një drejtori tjetër varësie për kryerjen e procedurave të legalizimit të ndërtimit informal.”.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

RISHPËRNDARJEN E NUMRIT TË PUNONJËSVE NË NJËSITË E QEVERISJES QENDRORE 

Në mbështetje të nenit 100 të Kushtetutës dhe të nenit 11, të ligjit nr.147/2015, “Për buxhetin e vitit 2016”, me propozimin e ministrit të Financave, Këshilli i Ministrave

V E N D O S I:

1.    Rishpërndarjen e numrit të punonjësve në njësitë e qeverisjes qendrore, si më poshtë vijon:

a)    Numri i punonjësve të Ministrisë së Zhvillimit Ekonomik, Turizmit, Tregtisë dhe Sipërmarrjes shtohet me 9 veta, për Inspektoratin Shtetëror të Mbikëqyrjes së Tregut, duke e çuar numrin total të punonjësve të ministrisë në 595 veta.
b)    Numri i punonjësve të Zyrës Shqiptare për të Drejtën e Autorit reduktohet me 9 veta, duke e çuar numrin total të punonjësve të Ministrisë së Kulturës në 1005 veta.

2.    Kalimi i punonjësve nga Zyra Shqiptare për të Drejtën e Autorit te Inspektorati Shtetëror i Mbikëqyrjes së Tregut kryhet pas miratimit të strukturës së Inspektoratit Shtetëror të Mbikëqyrjes së Tregut.

3. Ngarkohen Ministria e Financave dhe institucionet e përmendura më sipër për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

MËNYRËN E FUNKSIONIMIT, KOMPETENCAT DHE PËRBËRJEN E KOMITETIT TË AUDITIMIT TË BRENDSHËM NË NJËSITË PUBLIKE

Në mbështetje të nenit 100 të Kushtetutës dhe të neneve 13 e 26, të ligjit nr.114, datë 22.10.2015, “Për auditimin e brendshëm në sektorin publik”, me propozimin e ministrit të Financave, Këshilli i Ministrave

V E N D O S I:

A.     Miratimin e mënyrës së funksionimit, të kompetencave dhe të përbërjes së Komitetit të Auditimit të Brendshëm në njësitë publike si dhe marrëdhëniet me njësinë e auditimit të brendshëm.

KREU I
ROLI DHE AUTORITETI I KOMITETIT TË AUDITIMIT TË BRENDSHËM

1.    Roli i Komitetit të Auditimit të Brendshëm është të monitorojë, të ofrojë këshilla e rekomandime objektive për titullarin e njësisë publike, në lidhje me funksionimin e sistemeve të kontrollit të brendshëm, si dhe të mbështesë njësinë e auditimit të brendshëm në përmbushjen e përgjegjësive të saj.

2.    Komiteti i Auditimit të Brendshëm i jep titullarit të njësisë publike garanci të arsyeshme për mënyrën e funksionimit të njësisë publike.

3.     Komiteti i Auditimit të Brendshëm ka autoritet të monitorojë çdo çështje që lidhet me sistemet e kontrollit të brendshëm dhe të auditimit, brenda fushës së përgjegjësisë shtetërore të njësisë publike.

4.    Komiteti i Auditimit të Brendshëm është i autorizuar:
a)    të japë mendim për planin strategjik e vjetor të njësisë së auditimit të brendshëm, para miratimit nga titullari i njësisë publike;
b)    të monitorojë raportet e njësisë së auditimit të brendshëm drejtuar titullarit, me qëllim arritjen e objektivave të auditimit të brendshëm;
c)    të këshillojë e të japë opinion për titullarin e njësisë publike, për mosmarrëveshjet ndërmjet palës së audituar dhe njësisë së auditimit të brendshëm;
ç) të bashkëpunojë me titullarin e njësisë publike dhe me njësinë e auditimit të brendshëm.

KREU II
PËRBËRJA DHE FUNKSIONIMI I KOMITETIT TË AUDITIMIT TË BRENDSHËM

1.    Komiteti i Auditimit të Brendshëm krijohet nga titullari i njësisë publike dhe përbëhet nga tri anëtarë me të drejta të plota, të cilët nuk duhet të jenë pjesë e strukturës organizative të njësisë publike.

2.    Njësitë publike, të cilat kanë varësi funksionale nga një organ epror dhe kanë në strukturën e tyre organizative njësi të auditimit të brendshëm nuk krijojnë komitet, por mbikëqyren nga Komiteti i Auditimit të Brendshëm i organit epror.

3.    Anëtarët e Komitetit të Auditimit të Brendshëm duhet të kenë njohuri në lidhje me fushën e përgjegjësisë shtetërore të njësisë publike.

4.    Anëtarët e Komitetit të Auditimit të Brendshëm emërohen me urdhër të titullarit të njësisë publike, si më poshtë vijon:

a)    Një ekspert nga fusha e auditimit të brendshëm në sektorin publik;
b)    Një ekspert nga fusha e legjislacionit;
c)    Një ekspert nga fusha e menaxhimit financiar dhe kontrollit.

Eksperti nga fusha e auditimit të brendshëm duhet të jetë i certifikuar si “Auditues i brendshëm në sektorin publik”.

5.    Anëtarët e Komitetit të Auditimit të Brendshëm duhet të plotësojnë këto kritere:
a)    Të kenë shtetësi shqiptare;
b)    Të kenë integritet moral dhe profesional;
c)    Të mos jenë dënuar penalisht me vendim të formës së prerë;
ç)     Të zotërojnë, të paktën, diplomë “Master i shkencave” ose “Master i arteve”, apo të barasvlershëm me to, sipas legjislacionit të arsimit të lartë, dhe 10 vite përvojë pune në fushën përkatëse, ose një gradë apo titull shkencor dhe 7 vite përvojë pune në fushën përkatëse.

6.    Mandati i Komitetit të Auditimit të Brendshëm është 2-vjeçar, me të drejtë riemërimi.

7.    Një nga punonjësit e njësisë së auditimit të brendshëm, i caktuar nga drejtuesi i njësisë, do të jetë sekretar i Komitetit të Auditimit të Brendshëm.

8.    Drejtuesi i njësisë së auditimit të brendshëm duhet të ndjekë të gjitha mbledhjet e Komitetit të Auditimit të Brendshëm.

9.    Komiteti i Auditimit të Brendshëm e zhvillon veprimtarinë sipas një kalendari të miratuar prej tij dhe mblidhet jo më pak se katër herë në vit.

10.    Anëtarët e Komitetit të Auditimit të Brendshëm, në mbledhjen e tyre të parë, zgjedhin kryetarin dhe miratojnë rregulloren e funksionimit të komitetit.

11.    Rregullorja, ndër të tjera, duhet të përcaktojë:
a)    procedurat që duhet të ndiqen për organizimin, administrimin dhe dokumentimin e aktivitetit të Komitetit të Auditimit të Brendshëm;
b)    rolet dhe përgjegjësitë e anëtarëve të Komitetit të Auditimit të Brendshëm;
c)    autoritetin e Komitetit të Auditimit të Brendshëm për të marrë informacionin e nevojshëm;
ç) marrëdhënien me titullarin e njësisë publike dhe njësinë e auditimit të brendshëm.

12.    Mbledhja e Komitetit të Auditimit të Brendshëm thirret nga kryetari, jo më vonë se pesë ditë para mbledhjes, duke u njoftuar anëtarëve rendin e ditës, të shoqëruar me materialet përkatëse.

13.    Në raste të veçanta, Komiteti i Auditimit të Brendshëm mund të mblidhet me kërkesë të:
a)    titullarit të njësisë publike;
b)    të paktën, të dy anëtarëve të Komitetit të Auditimit të Brendshëm, brenda pesë ditëve nga data e marrjes së kërkesës.
14.    Kuorumi i nevojshëm për zhvillimin e mbledhjeve të Komitetit të Auditimit të Brendshëm është me pjesëmarrjen e të gjithë anëtarëve. Sekretari i Komitetit të Auditimit të Brendshëm mban procesverbalin e takimit, i cili, së bashku me vendimet e marra, nënshkruhet nga të gjithë anëtarët.

15.    Për të gjitha çështjet, që nuk përcaktohen nga ky vendim, do të zbatohen parashikimet e legjislacionit në fuqi për funksionimin e organeve kolegjiale të administratës shtetërore dhe të enteve publike.

16.    Drejtuesi i njësisë së auditimit të brendshëm duhet të largohet nga takimi, nëse do të diskutohet performanca e njësisë së auditimit të brendshëm.

17.    Përfundimet e çdo mbledhjeje pasqyrohen në një raport përmbledhës, i cili i dërgohet titullarit të njësisë publike.

18.    Kryetari dhe anëtarët e Komitetit të Auditimit të Brendshëm shpërblehen në përputhje me aktin nënligjor përkatës në fuqi, por jo më shumë se 4 mbledhje në vit.

KREU III
KOMPETENCAT DHE RAPORTIMI I KOMITETIT TË AUDITIMIT TË BRENDSHËM

1.    Komiteti i Auditimit të Brendshëm e ushtron veprimtarinë brenda fushës së përgjegjësisë shtetërore të njësisë publike ku ngrihet dhe mbulon veprimtarinë e auditimit të brendshëm, duke përfshirë edhe njësitë e varësisë, dhe ka kompetencë për:

a)    shqyrtimin dhe dhënien e rekomandimeve për përmirësimin e kartës së auditimit të brendshëm;
b)    shqyrtimin dhe dhënien e rekomandimeve për planin strategjik e vjetor të auditimit të brendshëm dhe të gjitha ndryshimet e planit gjatë vitit;
c)    monitorimin, nëpërmjet raporteve të auditimit të brendshëm, të efektivitetit të sistemit të kontrollit të brendshëm të njësisë publike;
ç) monitorimin e performancës së njësisë së auditimit të brendshëm, duke përfshirë përputhshmërinë e veprimtarisë me standardet ndërkombëtare të auditimit të brendshëm, të pranuara për t’u zbatuar në Republikën e Shqipërisë, dhe Kodin e Etikës, për audituesit e brendshëm në sektorin publik;
d)    këshillimin e titullarit të njësisë publike, për mjaftueshmërinë e burimeve të njësisë së auditimit të brendshëm, në lidhje me numrin dhe aftësitë profesionale të burimeve njerëzore, si dhe burimet financiare të nevojshme për realizimin e planit të auditimit;
dh)  të kërkuar takime me drejtuesin e njësisë së auditimit të brendshëm, për diskutimin e çështjeve që gjykohen të nevojshme;
e)    të analizuar gjetjet dhe rekomandimet e auditimit të brendshëm, me qëllim informimin për funksionimin e sistemeve të kontrollit të brendshëm në njësinë publike;
ë)     të shqyrtuar dhe siguruar mbikëqyrje mbi krijimin, zbatimin, përditësimin, efektivitetin e vlerësimit dhe menaxhimit të riskut si dhe praktikat e raportimit të riskut në njësinë publike;
f)    t’i dhënë opinion titullarit të njësisë publike mbi mosmarrëveshjet ndërmjet palës së audituar dhe njësisë së auditimit të brendshëm;
g)    të shqyrtuar e vlerësuar nivelin e zbatimit të rekomandimeve të dhëna nga njësia e auditimit të brendshëm, nëpërmjet shqyrtimit të planit të veprimit, të hartuar nga pala e audituar dhe titullari i njësisë publike.

2.    Komiteti i Auditimit të Brendshëm merr në shqyrtim rastet kur vërtetohet se në një angazhim auditimi kanë marrë pjesë një ose më shumë auditues në kushtet e konfliktit të interesave dhe i propozon titullarit të njësisë publike anulimin e auditimit, sipas përcaktimeve të bëra nga legjislacioni në fuqi.

3.    Komiteti i Auditimit të Brendshëm duhet të përgatitë, në fund të çdo viti, një raport përmbledhës për titullarin e njësisë publike, për veprimtarinë vjetore të komitetit.

4.    Komiteti i Auditimit të Brendshëm shqyrton dhe informon titullarin e njësisë publike nëse përgjegjësitë e përshkruara në Kartën e Auditimit të Brendshëm janë realizuar çdo vit.

B.    Ngarkohen ministri i Financave dhe titullarët e njësive publike për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI  RAMA

***

V E N D I M

PËR

NJË SHTESË NË VENDIMIN NR.668, DATË 7.8.2013, TË KËSHILLIT TË MINISTRAVE, “PËR TRAJTIMIN ME USHQIM TË USHTARAKËVE TË FORCAVE TË ARMATOSURA TË REPUBLIKËS SË SHQIPËRISË DHE PËR DISA NDRYSHIME NË VENDIMIN NR.524, DATË 30.7.2004, TË KËSHILLIT TË MINISTRAVE, “PËR MASËN DHE MËNYRËN E KOMPENSIMIT TË QIRASË SË BANESËS DHE TË USHQIMIT TË USHTARAKËVE TË FORCAVE TË ARMATOSURA TË REPUBLIKËS SË SHQIPËRISË”, TË NDRYSHUAR”

Në mbështetje të nenit 100 të Kushtetutës dhe të nenit 21, të ligjit nr.9210,  datë 23.3.2004, “Për statusin e ushtarakut të Forcave të Armatosura të Republikës së Shqipërisë”, të ndryshuar, me propozimin e ministrit të Mbrojtjes, Këshilli i Ministrave

V E N D O S I:

1.    Në fund të pikës 1, të vendimit nr.668, datë 7.8.2013, të Këshillit të Ministrave, pas fjalës “… fushime …” shtohen fjalët “… ose kur kryejnë kurse institucionale e funksionale të Forcave të Armatosura …”.

2.    Efektet financiare, që rrjedhin nga zbatimi i këtij vendimi, të përballohen nga buxheti i miratuar për Ministrinë e Mbrojtjes.

3.    Ngarkohet Ministria e Mbrojtjes për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I
EDI RAMA

***

V E N D I M
PËR 

DISA NDRYSHIME DHE SHTESA NË VENDIMIN NR.769, DATË 15.7.2009, TË KËSHILLIT TË MINISTRAVE, “PËR MIRATIMIN E STATUTIT TË AGJENCISË PËR MBËSHTETJEN E SHOQËRISË CIVILE (AMSHC)”, TË NDRYSHUAR

Në mbështetje të nenit 100 të Kushtetutës dhe të pikës 4, të nenit 2, të  ligjit nr.10093, datë 9.3.2009, “Për organizimin dhe funksionimin e Agjencisë për Mbështetjen e Shoqërisë Civile”, me propozimin e Kryeministrit, Këshilli i Ministrave

V E N D O S I:

Në vendimin nr.769, datë 15.7.2009, të Këshillit të Ministrave, të ndryshuar, bëhen këto ndryshime dhe shtesa:

1.    Lidhja 1 zëvendësohet me lidhjen me të njëjtin numër dhe titull që i bashkëlidhet këtij vendimi.

2.    Në lidhjen 2 “Organika e Agjencisë për Mbështetjen e Shoqërisë Civile” bëhen shtesa dhe ndryshimi i mëposhtëm:

a)    Pas ndarjes IV shtohet ndarja V, me këtë përmbajtje:

“V. Njësia për Sekretariatin e KKSHC-së

Specialist- marrëdhëniet me jashtë të KKSHC-së     IV- a              1;
Specialist- Draftimi dhe përgatitja e materialeve     IV- a              1;
Specialist- arkivim dhe komunikim                    IV- a              1.”.

b)    Në fund të lidhjes fjalët “Punonjës gjithsej 13” bëhen “Punonjës gjithsej 16”.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M 

PËR

LIRIM NGA DETYRA

Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave

V E N D O S I:

Z. Idlir Peçi, zëvendësministër i Drejtësisë, lirohet nga kjo detyrë.

Ky vendim hyn në fuqi menjëherë.

K R Y E M I N I S T R I

EDI RAMA

***

V E N D I M 

PËR

EMËRIM NË DETYRË

Në mbështetje të nenit 100 të Kushtetutës dhe të pikës 2, të nenit 6, të  ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave

V E N D O S I:

Z. Idlir Peçi emërohet zëvendësministër i Mbrojtjes.

Ky vendim hyn në fuqi menjëherë.

K R Y E M I N I S T R I

EDI RAMA

***

V E N D I M 

PËR

LIRIM NGA DETYRA

Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave

V E N D O S I:

Z. Gentian Elezi, zëvendësministër i Integrimit Evropian, lirohet nga kjo detyrë.

Ky vendim hyn në fuqi menjëherë.

K R Y E M I N I S T R I

EDI RAMA

***

V E N D I M 

PËR

EMËRIM NË DETYRË

Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave

V E N D O S I:

Znj. Eralda Methasani (Çani) emërohet zëvendësministër i Integrimit Evropian.

Ky vendim hyn në fuqi menjëherë.

K R Y E M I N I S T R I

EDI RAMA

***

V E N D I M 

PËR

EMËRIM NË DETYRË

Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave

V E N D O S I:

Z. Kledi Xhaxhiu emërohet zëvendësministër i Mjedisit.

Ky vendim hyn në fuqi menjëherë.

K R Y E M I N I S T R I

EDI RAMA

***

V E N D I M 

PËR

EMËRIM NË DETYRË

Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave

V E N D O S I:

Z. Eridian Salianji emërohet zëvendësministër i Drejtësisë.

Ky vendim hyn në fuqi menjëherë.

K R Y E M I N I S T R I

EDI RAMA

***

V E N D I M 

PËR

EMËRIM NË DETYRË

Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave

V E N D O S I:

Z. Redi Shtino emërohet zëvendësministër i Arsimit dhe Sportit.

Ky vendim hyn në fuqi menjëherë.

K R Y E M I N I S T R I

EDI RAMA

 

*SHËNIM: BAZUAR NË NENIN 117 TË KUSHTETUTËS SË RSH DHE NENIT 29 TË LIGJIT PËR ORGANIZIMIN DHE FUNKSIONIMIN E KËSHILLIT TË MINISTRAVE, VENDIMET E KËSHILLIT TË MINISTRAVE PUBLIKOHEN NË FLETOREN ZYRTARE DHE HYJNË NË FUQI PAS BOTIMIT TË TYRE. DREJTORIA E KOMUNIKIMIT PRANË KËSHILLIT TË MINISTRAVE PËRPIQET TË BOTOJË NË KOHËN MË TË SHPEJTË TË MUNDSHME VENDIMET E MBLEDHJEVE TË QEVERISË, POR VERSIONI ZYRTAR DHE HYRJA E TYRE NË FUQI BËHET VETËM PASI VENDIMI BOTOHET NE QBZ. SHPESHHERË, VENDIMET E KËSHILLIT TË MINISTRAVE KANË NEVOJË PËR ZBARDHJE TË MËTEJSHME, ÇKA E VONON PUBLIKIMIN E TYRE NË KËTË FAQE.