Vendime të miratuara në mbledhjen e Këshillit të Ministrave, datë 13 Dhjetor 2024:
V E N D I M
PËR
KRIJIMIN, ORGANIZIMIN DHE FUNKSIONIMIN E ZYRËS SË ADMINISTRIMIT TË PARKUT KOMBËTAR “LUMI I VJOSËS”
Në mbështetje të nenit 100 të Kushtetutës, të nenit 39/1, të ligjit nr.81/2017, “Për zonat e mbrojtura”, të ndryshuar, dhe të nenit 6, të ligjit nr.90/2012, “Për organizimin dhe funksionimin e administratës shtetërore”, me propozimin e ministrit të Turizmit dhe Mjedisit, Këshilli i Ministrave
V E N D O S I:
I. DISPOZITA TË PËRGJITHSHME
1. Krijimin, organizimin dhe funksionimin e Zyrës së Administrimit të Parkut Kombëtar “Lumi i Vjosës” (në vijim ZAPK Vjosë), si person juridik, buxhetor, në varësi të ministrit përgjegjës për zonat e mbrojtura, me seli në Tepelenë.
2. ZAPK-ja Vjosë financohet nga buxheti i shtetit dhe nga burime të tjera të ligjshme, sipas legjislacionit në fuqi. Buxheti i ZAPK-së Vjosë përbën zë të veçantë në buxhetin e ministrisë përgjegjëse për zonat e mbrojtura. ZAPK-ja Vjosë siguron të ardhura edhe nga shërbimet e kryera prej saj ndaj palëve të tjera dhe tarifat e të cilave përcaktohen sipas legjislacionit në fuqi për tarifat në zonat e mbrojtura.
3. Të ardhurat e mbledhura nga tarifat derdhen 100% në buxhetin e shtetit.
4. Misioni i ZAPK-së Vjosë është të sigurojë ruajtjen dhe mbrojtjen e territorit të Parkut Kombëtar “Lumi i Vjosës”, në zbatim të legjislacionit në fuqi për zonat e mbrojtura, nëpërmjet administrimit efektiv të Parkut Kombëtar dhe koordinimit të punës me institucionet përgjegjëse, në nivel qendror dhe vendor për zbatimin e planit të menaxhimit të Parkut Kombëtar.
II. PËRGJEGJËSITË FUNKSIONALE TË ZYRËS SË ADMINISTRIMIT TË PARKUT KOMBËTAR “LUMI I VJOSËS”
Zyra e Administrimit të Parkut Kombëtar “Lumi i Vjosës” ka përgjegjësi të organizojë punën për:
a) hartimin dhe zbatimin e planit të menaxhimit, projekteve restauruese dhe konservuese, projekteve kërkimore-shkencore;
b) kryerjen e punimeve të mirëmbajtjes dhe punimeve me karakter restaurues e konservues, në funksion të masave ruajtëse dhe mbrojtëse në zonat e mbrojtura, që ka në administrim;
c) mbikëqyrjen e efekteve mjedisore të çdo ndërhyrjeje apo zhvillimi të propozuar, brenda territorit gjeografik të Parkut Kombëtar;
ç) koordinimin e punës me institucionet e administratës publike, në nivel qendror dhe vendor, partnerët ndërkombëtarë, investitorët dhe palët e interesuara për zbatimin e standardeve dhe aktiviteteve të planit të menaxhimit;
d) edukimin mjedisor, promovimin dhe ruajtjen e mbrojtjen e Parkut Kombëtar “Lumi i Vjosës”.
III. ORGANIZIMI DHE FUNKSIONIMI I ZYRËS SË ADMINISTRIMIT TË PARKUT KOMBËTAR “LUMI I VJOSËS”
1. ZAPK-ja Vjosë e shtrin veprimtarinë e saj në territorin e Parkut Kombëtar “Lumi i Vjosës”, sipas koordinatave të përcaktuara në vendimin nr.155, datë 13.3.2023, të Këshillit të Ministrave, “Për shpalljen e ekosistemit natyror të lumit Vjosë “Park Kombëtar”, kategoria II”, dhe organizohet në nivel rajonal.
2. ZAPK-ja Vjosë drejtohet nga drejtori, i cili organizon dhe drejton veprimtarinë e saj, përfaqëson ZAPK-në Vjosë në marrëdhënie me të tretët dhe përgjigjet para ministrit.
3. Drejtori emërohet, lirohet dhe shkarkohet nga ministri. Drejtori duhet të plotësojë kriteret e mëposhtme:
a) Të jetë shtetas shqiptar;
b) Të ketë zotësi të plotë për të vepruar;
c) Të zotërojë diplomë të ciklit të dytë të studimeve, sipas legjislacionit në fuqi për arsimin e lartë.
ç) Të ketë përvojë pune të paktën 3 (tre) vjet në profesion;
d) Të mos jetë i dënuar me vendim të formës së prerë për kryerjen e një vepre penale;
dh) Ndaj tij të mos jetë marrë masë disiplinore e largimit nga puna, që nuk është shuar, sipas legjislacionit në fuqi;
e) Të mos ketë konflikt interesi në ushtrimin e detyrës.
4. Drejtori shkarkohet nga detyra kur:
a) dënohet me vendim gjyqësor të formës së prerë për kryerjen e një krimi apo për kryerjen e një kundërvajtjeje penale me dashje;
b) kryen shkelje të rënda gjatë detyrës;
c) nuk përmbush objektivat strategjikë të institucionit;
ç) ka performancë të dobët në ushtrimin e detyrës.
5. Drejtori lirohet nga detyra kur:
a) plotëson kushtet për pensionin e plotë të pleqërisë;
b) deklarohet i paaftë për punë nga komisioni kompetent mjekësor;
c) ristrukturohet institucioni;
ç) gjendet në një situatë konflikti të vazhdueshëm interesi;
d) jep dorëheqjen nga detyra.
6. Marrëdhëniet e punës së drejtorit, nëpunësve, si dhe të punonjësve administrativë rregullohen sipas dispozitave të Kodit të Punës.
7. ZAPK-ja Vjosë, në zbatim të misionit, fushave të përgjegjësisë dhe përgjegjësive funksionale të saj, kryen këto detyra:
a) Monitoron zbatimin e planit të menaxhimit të Parkut Kombëtar “Lumi i Vjosës”;
b) Mbështet ministrinë përgjegjëse për mjedisin për të përgatitur propozimet për ndryshime dhe përmirësime të kuadrit ligjor dhe nënligjor, që lidhet me zonat e mbrotjura dhe natyrën;
c) Koordinon dhe monitoron zbatimin e projekteve në Parkun Kombëtar “Lumi i Vjosës”;
ç) Koordinon së bashku me njësitë e vetëqeverisjes vendore, institucionet e administratës publike dhe partnerët ndërkombëtarë planifikimin e nevojave për investime, bazuar në politikat e qeverisë dhe në planin e menaxhimit të Parkut;
d) Koordinon nga pikëpamja teknike projektet për menaxhimin e Parkut Kombëtar “Lumi i Vjosës”, të financuara nga buxheti i shtetit apo burime të tjera financiare kombëtare dhe ndërkombëtare, me qëllim garantimin e rregullave/procedurave teknike;
dh) Bashkëpunon dhe koordinon me institucionet e fushave përkatëse për ushtrimin e veprimtarive të ndryshme në territorin e Parkut Kombëtar “Lumi i Vjosës”;
e) Mban lidhje të vazhdueshme dhe informon strukturat e qeverisjes qendrore e vendore për zhvillime të karaktereve të ndryshme, që kryhen jashtë territorit të Parkut Kombëtar, por që mund të kenë impakt në të;
ë) Raporton dhe zbaton detyrat për mbrojtjen dhe zhvillimin e zonave të mbrojtura mjedisore, që ndodhen në Parkun Kombëtar;
f) Planifikon nevojat për trajnime dhe koordinon punën për realizimin e tyre;
g) Koordinon dhe asiston ministrinë përgjegjëse për mjedisin dhe njësitë e vetëqeverisjes vendore për nismat për menaxhimin Parkut Kombëtar “Lumi i Vjosës”;
gj) Monitoron zbatimin e udhërrëfyesit (Green List) të IUCN-së për plotësimin e standardeve të Parkut Kombëtar;
h) Ushtron çdo detyrë tjetër, të përcaktuara në akte ligjore e nënligjore.
8. ZAPK-ja ndjek porositë e dhëna nga Agjencia Kombëtare e Zonave të Mbrojtura për zbatimin e projekteve dhe legjislacionit në fuqi për zonat e mbrojtura dhe është anëtare e komiteteve të menaxhimit të zonave të mbrojtura për qarqet Korçë, Gjirokastër, Fier dhe Vlorë.
9. Struktura dhe organika e ZAPK-së Vjosë miratohet me urdhër të Kryeministrit, sipas përcaktimeve në legjislacionin në fuqi për organizimin dhe funksionimin e administratës shtetërore.
10. Rregullorja për metodat e brendshme të punës dhe sjelljen e personelit të ZAPK-së Vjosë miratohet nga ministri, me propozimin e drejtorit të saj.
11. ZAPK-ja Vjosë ka stemën, logon dhe vulën e vet zyrtare. Stema përbëhet nga stema e Republikës së Shqipërisë, me shënimet: “Republika e Shqipërisë, Ministria (emri i ministrisë përgjegjëse), Zyra e Administrimit të Parkut Kombëtar “Lumi i Vjosës””, në përputhje me përcaktimet e vendimit të Këshillit të Ministrave për mënyrën e përdorimit të stemës së Republikës së Shqipërisë.
12. Vula e ZAPK-së Vjosë ka formën dhe elementet e përcaktuara në vendimin e Këshillit të Ministrave për rregullat e prodhimit, të administrimit, kontrollit dhe ruajtjes së vulave zyrtare. Vula prodhohet, administrohet dhe ruhet, në përputhje me legjislacionin në fuqi.
IV. DISPOZITA KALIMTARE DHE TË FUNDIT
1. Efektet financiare, që rrjedhin nga zbatimi i këtij vendimi, përballohen nga buxheti i shtetit.
2. Ngarkohen Ministria e Turizmit dhe Mjedisit, Agjencia Kombëtare e Zonave të Mbrojtura dhe Zyra e Administrimit të Parkut Kombëtar “Lumi i Vjosës” për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
LIRIMIN NGA DETYRA TË DREJTORIT TË PËRGJITHSHËM TË TEATRIT KOMBËTAR TË OPERËS, BALETIT DHE ANSAMBLIT POPULLOR
Në mbështetje të nenit 100 të Kushtetutës dhe të pikës 4, të nenit 9, të ligjit nr.10352, datë 18.11.2010, “Për artin dhe kulturën”, të ndryshuar, me propozimin e ministrit të Ekonomisë, Kulturës dhe Inovacionit, Këshilli i Ministrave
V E N D O S I:
1. Znj. Abigeila Voshtina, drejtor i Përgjithshëm i Teatrit Kombëtar të Operës, Baletit dhe Ansamblit Popullor, lirohet nga kjo detyrë.
2. Ngarkohet Ministria e Ekonomisë, Kulturës dhe Inovacionit për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN E MARRËVESHJES SË GRANTIT, NDËRMJET REPUBLIKËS SË SHQIPËRISË DHE BANKËS PËR ZHVILLIM TË KËSHILLIT TË EVROPËS, PËR FINANCIMIN E PROJEKTIT “NGRITJA E LABORATORËVE INTELIGJENTË (SMART LABS) – RRJETI I LABORATORËVE TË TIK-UT PËR SISTEMIN ARSIMOR PARAUNIVERSITAR (PROJEKTI I GRANTIT SIPAS KORNIZËS SË INVESTIMEVE TË BALLKANIT PERËNDIMOR)”
Në mbështetje të nenit 100 të Kushtetutës dhe të nenit 19, të ligjit nr.43/2016, “Për marrëveshjet ndërkombëtare në Republikën e Shqipërisë”, të ndryshuar, me propozimin e ministrit të Financave, Këshilli i Ministrave
V E N D O S I:
Miratimin e marrëveshjes së grantit, ndërmjet Republikës së Shqipërisë dhe Bankës për Zhvillim të Këshillit të Evropës, për financimin e projektit “Ngritja e laboratorëve inteligjentë (smart labs) – Rrjeti i laboratorëve të TIK-ut për sistemin arsimor parauniversitar (projekti i grantit sipas Kornizës së Investimeve të Ballkanit Perëndimor)”, sipas tekstit që i bashkëlidhet këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN, NË PARIM, TË MARRËVESHJES SË GRANTIT, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE SUEDISË, LIDHUR ME FAZËN E TRETË TË PROGRAMIT PËR FORCIMIN E POLICIMIT NË KOMUNITET NË SHQIPËRI
Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Brendshëm, Këshilli i Ministrave
V E N D O S I:
Miratimin, në parim, të marrëveshjes së grantit, ndërmjet Këshillit të Ministrave të Republikës së Shqipërisë dhe Suedisë, lidhur me fazën e tretë të programit për forcimin e policimit në komunitet në Shqipëri, sipas tekstit që i bashkëlidhet këtij vendimi dhe është pjesë përbërëse e tij.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
DHËNIE MENDIMI KUVENDIT TË REPUBLIKËS SË SHQIPËRISË PËR PROJEKTLIGJIN JOQEVERITAR “PËR RIVLERËSIMIN E PASURISË SË PALUAJTSHME”
Në mbështetje të neneve 82, pika 2, dhe 100, të Kushtetutës, me propozimin e Kryeministrit, Këshilli i Ministrave
V E N D O S I:
Dhënien e mendimit Kuvendit të Republikës së Shqipërisë për projektligjin joqeveritar “Për rivlerësimin e pasurisë së paluajtshme”, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
NJË NDRYSHIM NË VENDIMIN NR.518, DATË 20.9.2017, TË KËSHILLIT TË MINISTRAVE, “PËR KALIMIN NË PËRGJEGJËSI ADMINISTRIMI TË MINISTRISË SË DREJTËSISË TË NJË PJESE TË GODINËS, KU USHTRON VEPRIMTARINË KONTROLLI I LARTË I SHTETIT, PËR KOLEGJIN E POSAÇËM TË APELIMIT DHE KOMISIONERËVE PUBLIKË, INSTITUCIONE TË RIVLERËSIMIT TË GJYQTARËVE DHE PROKURORËVE NË REPUBLIKËN E SHQIPËRISË, I PARASHIKUAR NGA LIGJI NR.84/2016”, TË NDRYSHUAR
Në mbështetje të nenit 100 të Kushtetutës dhe të neneve 13 e 15, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e Kryeministrit, Këshilli i Ministrave
V E N D O S I:
1. Në titullin e vendimit nr.518, datë 20.9.2017, të Këshillit të Ministrave, “Për kalimin në përgjegjësi administrimi të Ministrisë së Drejtësisë të një pjese të godinës, ku ushtron veprimtarinë Kontrolli i Lartë i Shtetit, për Kolegjin e Posaçëm të Apelimit dhe Komisionerëve Publikë, institucione të rivlerësimit të gjyqtarëve dhe prokurorëve në Republikën e Shqipërisë, i parashikuar nga ligji nr.84/2016”, të ndryshuar, dhe kudo në përmbajtje të këtij vendimi, fjalët “… Komisionerëve Publikë, institucione të rivlerësimit të gjyqtarëve dhe prokurorëve në Republikën e Shqipërisë, i parashikuar nga ligji nr.84/2016” zëvendësohen me “… Prokurorinë e Posaçme kundër Korrupsionit dhe Krimit të Organizuar …”.
2. Ngarkohen Ministria e Drejtësisë, Prokuroria e Posaçme kundër Korrupsionit dhe Krimit të Organizuar dhe Agjencia Shtetërore e Kadastrës për zbatimin e këtij vendimi.
Ky vendim hyn në fuqi menjëherë, botohet në “Fletoren zyrtare” dhe i shtrin efektet nga data 1.1.2025.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
DISA NDRYSHIME NË VENDIMIN NR.276, DATË 16.5.2018, TË KËSHILLIT TË MINISTRAVE,“PËR MIRATIMIN E MËNYRËS SË ORGANIZIMIT, TË STRUKTURËS, ORGANIKËS DHE STATUTIT TË AUTORITETIT RRUGOR SHQIPTAR”, TË NDRYSHUAR
Në mbështetje të nenit 100 të Kushtetutës, të nenit 3, të ligjit nr.10164, datë 15.10.2009, “Për Autoritetin Rrugor Shqiptar”, dhe të nenit 4, të ligjit nr.90/2012, “Për organizimin dhe funksionimin e administratës shtetërore”, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave
V E N D O S I:
1. Në vendimin nr.276, datë 16.5.2018, të Këshillit të Ministrave, “Për miratimin e mënyrës së organizimit, të strukturës, organikës dhe statutit të Autoritetit Rrugor Shqiptar”, të ndryshuar, bëhen ndryshimet, si më poshtë vijon:
a) Skemat me numrat 1, 2, 2/1, 2/2, 2/3 dhe 2/4, që përmenden përkatësisht në pikat 1, 5, 6, 7, 8 dhe 8/1, të kreut IV, zëvendësohen me skemat me të njëjtët numra e tituj, që i bashkëlidhen këtij vendimi dhe janë pjesë përbërëse të tij;
b) Në pikën 9, të kreut IV, numri “286” zëvendësohet me numrin “386”.
2. Efektet financiare, që vijnë nga shtimi i numrit të punonjësve, sipas këtij vendimi, fillojnë nga data 1 janar 2025.
3. Ngarkohet Autoriteti Rrugor Shqiptar për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
DISA NDRYSHIME DHE SHTESA NË VENDIMIN NR.332, DATË 17.3.2010, TË KËSHILLIT TË MINISTRAVE, “PËR PËRCAKTIMIN E FORMËS, ELEMENTEVE PËRBËRËSE, MËNYRËS SË MBAJTJES E AFATIT TË PËRDORIMIT TË DOKUMENTEVE BAZË, QË MBAHEN DHE LËSHOHEN NGA SHËRBIMI I GJENDJES CIVILE”, TË NDRYSHUAR
Në mbështetje të nenit 100 të Kushtetutës dhe të pikës 4, të nenit 25, të ligjit nr.10129, datë 11.5.2009, “Për gjendjen civile”, të ndryshuar, me propozimin e ministrit të Brendshëm, Këshilli i Ministrave
V E N D O S I:
I. Në vendimin nr.332, datë 17.3.2010, të Këshillit të Ministrave, “Për përcaktimin e formës, elementeve përbërëse, mënyrës së mbajtjes e afatit të përdorimit të dokumenteve bazë, që mbahen dhe lëshohen nga shërbimi i gjendjes civile”, të ndryshuar, bëhen këto ndryshime dhe shtesa:
1. Pika 2/1 ndryshohet, si më poshtë vijon:
“2/1. Certifikatat, të ofruara përmes shërbimit publik elektronik, në përputhje me legjislacionin që rregullon identifikimin elektronik dhe shërbimet e besuara, lëshohen me nënshkrimin dhe/ose vulën elektronike të Drejtorisë së Përgjithshme të Gjendjes Civile, sipas modeleve në version elektronik, bashkëlidhur këtij vendimi si pjesë përbërëse e tij.”.
2. Në lidhjen nr.1, bashkëlidhur vendimit, pas modelit nr.2 elektronik shtohen modelet nr.3 deri në nr.19, që i bashkëlidhen këtij vendimi dhe janë pjesë përbërëse të tij.
3. Në lidhjen nr.2, bashkëlidhur vendimit, në faqen e parë, që i korrespondon Qarkut Berat, fjalët “Ura Vajgurore” zëvendësohen me fjalën “Dimal”.
II. Kërkesat dhe procedurat administrative, që, në datën e hyrjes në fuqi të këtij vendimi, janë në proces shqyrtimi nga shërbimi i gjendjes civile, përfshirë edhe atë pranë konsullatave dhe/ose ambasadave, zhvillohen sipas dispozitave në fuqi të këtij vendimi, në kohën e paraqitjes së tyre.
III. Procedura për lëshimin e dokumenteve bazë, që mbahen e lëshohen nga shërbimi i gjendjes civile, do të vijojë të kryhet sipas mënyrës ekzistuese deri në momentin e krijimit të infrastrukturës teknike të nevojshme për ofrimin e shërbimit nëpërmjet portalit “e-Albania”.
IV. Ngarkohen Ministria e Brendshme, Drejtoria e Përgjithshme e Gjendjes Civile dhe Agjencia Kombëtare e Shoqërisë së Informacionit për ndjekjen dhe zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
DISA NDRYSHIME DHE SHTESA NË VENDIMIN NR.531, DATË 7.9.2023, TË KËSHILLIT TË MINISTRAVE, “PËR KRIJIMIN E SHOQËRISË AKSIONARE SHTETËRORE “OPERATORI I BLERJEVE TË PËRQENDRUARA”, SH.A., PËR KRYERJEN E PROCEDURAVE TË VEÇANTA TË PROKURIMIT PUBLIK, NË EMËR DHE PËR LLOGARI TË KRYEMINISTRISË, MINISTRIVE DHE INSTITUCIONEVE TË VARËSISË”, TË NDRYSHUAR
Në mbështetje të nenit 100 të Kushtetutës, të nenit 105, të ligjit nr.9901, datë 14.4.2008, “Për tregtarët dhe shoqëritë tregtare”, të ndryshuar, dhe të pikës 2, të nenit 53, të ligjit nr.162/2020, “Për prokurimin publik”, të ndryshuar, me propozimin e ministrit të Ekonomisë, Kulturës dhe Inovacionit, Këshilli i Ministrave
V E N D O S I:
I. Në vendimin nr.531, datë 7.9.2023, të Këshillit të Ministrave, të ndryshuar, bëhen këto ndryshime dhe shtesa:
1. Kudo në përmbajtje të vendimit, emërtesa “Drejtor” zëvendësohet me “Administrator”.
2. Në fund të fjalisë së parë, të pikës 7, shtohen fjalët “…, sipas parashikimeve të ligjit nr.9901, datë 14.4.2008, “Për tregtarët dhe shoqëritë tregtare”, të ndryshuar, dhe statutit të shoqërisë.”.
3. Në pikën 11 bëhen ndryshimet dhe shtesat e mëposhtme:
a) Paragrafi i parë ndryshohet, si më poshtë vijon:
“Operatori i Blerjeve të Përqendruara, si organ qendror blerës, zhvillon procedurat e mëposhtme në fushën e prokurimit të mallrave, shërbimeve dhe punëve dhe më hollësisht sipas shtojcës 1, që i bashkëlidhet këtij vendimi:”.
b) Shkronja “a” ndryshohet, si më poshtë vijon:
“a) Blerje automjetesh, autoveturash, ambulancash, mjetesh rrugore që përdoren për transport njerëzish, mjetesh rrugore që përdoren për transport mallrash, autobusësh, makinash teknologjike, makinash bujqësore dhe motomjetesh.”.
c) Pas shkronjës “r” shtohen shkronjat “rr”, “s”, “sh”, “t”, “th”, “v”, “x”, “xh” dhe “y”, me këtë përmbajtje:
“rr) Përzgjedhja e subjekteve private me eksperiencë ndërkombëtare si ofrues shërbimi në fushën e prokurimeve, sipas parashikimeve të ligjit nr.162/2020, “Për prokurimin publik;
s) Qira operacionale automjetesh;
sh) Blerje kamerash/sistemesh vëzhgimi dhe alarmi;
t) Blerje dhe/ose mirëmbajtje ashensorësh;
th) Blerje pajisjesh/pjesësh për burimin, ushqimin dhe energjinë (BUE);
v) Ndërtime;
x) Supervizime dhe kolaudime të punimeve që i përkasin procedurave të prokurimit, objekt të veprimtarisë së Operatorit të Blerjeve të Përqendruara;
xh) Blerje materialesh elektrike, hidraulike dhe ndërtimi;
y) Mirëmbajtje e sistemeve/impianteve elektrike, hidraulike.”.
4. Pas pikës 11 shtohet pika 11/1, me këtë përmbajtje :
“11/1. Bëjnë përjashtim nga parashikimet e pikës 11, të këtij vendimi, institucionet që realizojnë vetë procedurat e prokurimit publik, sipas legjislacionit në fuqi, si më poshtë vijon:
a) Shtypshkronjat e letrave me vlerë;
b) Shërbimi Informativ i Shtetit.”.
5. Pas pikës 12 shtohen pikat 12/1 dhe 12/2, me këtë përmbajtje:
“12/1. OBP, sh.a.-ja, zhvillon, gjithashtu, procedura prokurimi për punë/mallra/shërbime për llogari të autoritetit/entit kontraktor, i cili në strukturën e tij organizative ka më pak se 15 (pesëmbëdhjetë) punonjës dhe nuk ka një organ epror.
12/2. Institucionet që kërkojnë të prokurojnë shërbime/mallra/punë të cilat përfshihen në objektet e prokurimit të listuara në pikën 11, të këtij vendimi, me vlerë mbi 1 000 000 (një milion) lekë pa TVSH, dërgojnë kërkesat për prokurim pranë Operatorit të Blerjeve të Përqendruara, pavarësisht numrit të punonjësve që ka institucioni.”.
6. Në pikën 13, fjalët “… miratimi i ligjit për buxhetin për vitin pasardhës …” zëvendësohen me “… detajimi/rialokimi i buxhetit …”.
7. Pas pikës 13 shtohen pikat 13/1, 13/2, 13/3 dhe 13/4, me këtë përmbajtje:
“13/1. Autoritetet/entet kontraktore paraqesin kërkesën për prokurim në formë shkresore dhe elektronike, në të cilën bashkëlidhin në formën e duhur të dhënat e domosdoshme teknike dhe sasiore që janë të nevojshme për procedurën, objekt prokurimi, duke përfshirë:
a) përshkrimin/emërtesën e objektit të prokurimit, i cili të përputhet me zërin përkatës në regjistrin e parashikimit;
b) vlerën e përllogaritur të kontratës (pa TVSH) dhe mënyrën e përllogaritjes, fondi limit, në përputhje me parashikimet e ligjit për prokurimet publike dhe rregullave të prokurimeve publike, shoqëruar me dokumentacionin provues të këtij procesi;
c) sasinë e mallrave/shërbimeve si dhe grafikun e lëvrimit të mallrave/shërbimeve;
ç) specifikimet teknike, të cilat duhet të përshkruajnë minimumin ose tërësinë e elementeve më të rëndësishme përbërëse, projektin apo oponencën teknike, nëse është rasti, të cilat duhet të përshkruajnë minimumin ose tërësinë e elementeve më të rëndësishme referuar parashikimeve konkrete të ligjit për prokurimet publike dhe rregullave të prokurimeve publike, të shoqëruar me procesverbal argumentues;
d) preventivin/at e punimeve, nëse është rasti, projektet teknike, grafikun e zbatimit të punimeve, i cili të përfshijë fazat, afatet e realizimit të punëve, vendin e realizimit të kontratës/furnizimit/dorëzimit të mallit/shërbimit.
13/2. Për kërkesat për prokurim me vlerë mbi kufirin e lartë monetar, dokumentacioni i nevojshëm duhet të dërgohet në gjuhën shqipe dhe në anglisht nga autoritetet/entet kontraktore.
13/3. Pasi OBP, sh.a.-ja, shqyrton dhe verifikon dokumentacionin e paraqitur nga autoriteti/enti kontraktor, lidhur me përputhshmërinë me parashikimet ligjore e nënligjore dhe standardet në fuqi, vlerëson, nëse është e nevojshme, që kërkesat e paraqitura të plotësohen për shkak se dokumentacioni, përmbajtja e kërkesës, specifikimet teknike, termat e referencës, afatet e lëvrimit si edhe llogaritja e fondit limit janë paraqitur jo në përputhje me detyrimet ligjore për prokurimet publike. Nëse gjykohet se specifikimet teknike apo dokumentacioni tekniko-ekonomik, bashkëlidhur në kërkesën e paraqitur, nuk janë përgatitur në përputhje me legjislacionin për prokurimin publik, OBP, sh.a.-ja, i kërkon autoritetit/entit kontraktor t’i korrigjojë ato brenda 10 (dhjetë) ditëve.
13/4. OBP, sh.a.-ja, standardizon/unifikon specifikimet teknike/çmimet për mallra dhe/ose për shërbime që prokurohen në mënyrë të përqendruar, në përputhje me standardet e miratuara, në bashkëpunim me specialistët e fushave të institucioneve përgjegjëse ose specialistë të jashtëm, vendas apo të huaj, dhe harton katalogët e standardeve. Katalogët e standardeve janë orientues dhe rekomandues për autoritetet/entet kontraktore. Katalogët e standardeve përgatiten nga drejtoria përkatëse e OBP, sh.a,-së, miratohen nga administratori dhe publikohen në faqen zyrtare të OBP, sh.a.-së, dhe të APP-së.”.
8. Pika 14 ndryshohet, si më poshtë vijon:
“14. Mënyra e organizimit dhe komunikimit institucional mes OBP, sh.a.-së, dhe autoriteteve kontraktore për çështjet në tërësi dhe veçanërisht për katalogët e standardeve rregullohet në rregulloren e miratuar nga OBP, sh.a.-ja, sipas parashikimit të legjislacionit të prokurimit publik në fuqi.”.
9. Pas vendimit shtohet shtojca 1, që i bashkëlidhet këtij vendimi.
II. Ngarkohen Ministria e Ekonomisë, Kulturës dhe Inovacionit, Operatori i Blerjeve të Përqendruara dhe institucionet shtetërore/entet për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
DISA NDRYSHIME DHE SHTESA NË VENDIMIN NR.822, DATË 19.12.2022, TË KËSHILLIT TË MINISTRAVE, “PËR SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA REALIZIMI I PROJEKTIT “NDËRTIMI I LINJËS 110 KV BURREL-BULQIZË””
Në mbështetje të nenit 100 të Kushtetutës dhe të neneve 5, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave
V E N D O S I:
1. Në vendimin nr.822, datë 19.12.2022, të Këshillit të Ministrave, “Për shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Ndërtimi i linjës 110 KV Burrel-Bulqizë”, bëhen ndryshimi dhe shtesa e mëposhtme:
a) Në pikat 3 dhe 4 vlera “… 218 208 (dyqind e tetëmbëdhjetë mijë e dyqind e tetë) lekë zëvendësohet me “… 228 627.6 (dyqind e njëzet e tetë mijë e gjashtëqind e njëzet e shtatë pikë gjashtë) lekë;
b) Tabelës, bashkëlidhur vendimit, i shtohet tabela që i bashkëlidhet këtij vendimi.
2. Shpenzimet procedurale shtesë, në vlerën 50 000 (pesëdhjetë mijë) lekë, përballohen nga Operatori i Sistemit të Transmetimit, sh.a.
3. Ngarkohen Ministria e Infrastrukturës dhe Energjisë, Operatori i Sistemit të Transmetimit, sh.a., Agjencia Shtetërore e Kadastrës, Drejtoria Vendore Mat, Agjencia Shtetërore për Shpronësimin dhe Drejtoria e Administrimit dhe Mbrojtjes së Tokës pranë Këshillit të Qarkut Dibër për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
ORGANIZIMIN DHE FUNKSIONIMIN E AUTORITETIT SHTETËROR PËR INFORMACIONIN GJEOHAPËSINOR
Në mbështetje të nenit 100 të Kushtetutës, të pikës 3, të nenit 6, të ligjit nr.72/2012, “Për organizimin dhe funksionimin e infrastrukturës kombëtare të informacionit gjeohapësinor në Republikën e Shqipërisë”, të ndryshuar, dhe të nenit 6, të ligjit nr.90/2012, “Për organizimin dhe funksionimin e administratës shtetërore”, me propozimin e Kryeministrit, Këshilli i Ministrave
V E N D O S I:
I. DISPOZITA TË PËRGJITHSHME
1. Organizimin dhe funksionimin e Autoriteti Shtetëror për Informacionin Gjeohapësinor (në vijim ASIG), si person juridik publik, buxhetor, në varësi të Kryeministrit, me seli në Tiranë.
2. ASIG-u financohet nga buxheti i shtetit dhe burime të tjera të ligjshme, sipas legjislacionit në fuqi.
3. Misioni i ASIG-ut është krijimi, funksionimi dhe përditësimi i infrastrukturës kombëtare të informacionit gjeohapësinor në Republikën e Shqipërisë.
4. ASIG-u organizohet dhe funksionon në përputhje me ligjin nr.72/2012, “Për organizimin dhe funksionimin e infrastrukturës kombëtare të informacionit gjeohapësinor në Republikën e Shqipërisë”, të ndryshuar, dhe me përcaktimet e bëra në këtë vendim.
II. PËRGJEGJËSITË FUNKSIONALE TË AUTORITETIT SHTETËROR PËR INFORMACIONIN GJEOHAPËSINOR
ASIG-u ka përgjegjësi të organizojë punën për:
a) projektimin, ndërtimin, mirëmbajtjen, përditësimin e kornizës referuese gjeodezike, si dhe krijimin e mirëmbajtjen e hartës bazë në Republikën e Shqipërisë;
b) mbledhjen, përpunimin, përditësimin, administrimin dhe shpërndarjen e informacionit gjeohapësinor;
c) mbledhjen, administrimin, analizimin, përpunimin e të dhënave Remote Sensing dhe shpërndarjen e informacionit të përpunuar;
ç) sigurimin e bashkëpunimit dhe koordinimit ndërinstitucional, me qëllim bashkërendimin e veprimeve dhe nismave në fushën e informacionit gjeohapësinor.
III. ORGANIZIMI I AUTORITETIT SHTETËROR PËR INFORMACIONIN GJEOHAPËSINOR
1. ASIG-u e shtrin veprimtarinë e tij në të gjithë territorin e Republikës së Shqipërisë dhe organizohet në nivel qendror.
2. Struktura dhe organika e ASIG-ut miratohet me urdhër të Kryeministrit, sipas përcaktimeve në legjislacionin në fuqi për organizimin dhe funksionimin e administratës shtetërore.
3. ASIG-u drejtohet dhe përfaqësohet nga drejtori i Përgjithshëm, i cili organizon dhe drejton të gjithë veprimtarinë e tij dhe përgjigjet para Kryeministrit.
4. Drejtori i Përgjithshëm i ASIG-ut mbështetet nga një zëvendësdrejtor.
5. Marrëdhëniet e punës së drejtorit të Përgjithshëm dhe punonjësve të ASIG-ut rregullohen sipas dispozitave të Kodit të Punës.
6. Rregullorja për metodat e brendshme të punës dhe sjelljen e personelit të ASIG-ut miratohet nga Kryeministri, me propozimin e drejtorit të Përgjithshëm.
7. Veprimtaria e ASIG-ut mbikëqyret nga Zëvendëskryeministri, të cilit i raportohet periodikisht çdo 3 (tre) muaj.
8. ASIG-u ka stemën, logon dhe vulën e tij zyrtare. Stema e ASIG-ut përbëhet nga stema e Republikës së Shqipërisë dhe ka shënimet “Republika e Shqipërisë, Autoriteti Shtetëror për Informacionin Gjeohapësinor”, në përputhje me përcaktimet e vendimit të Këshillit të Ministrave për mënyrën e përdorimit të stemës së Republikës së Shqipërisë.
9. Vula e ASIG-ut ka formën dhe elementet e përcaktuara në vendimin e Këshillit të Ministrave për rregullat e prodhimit, të administrimit, të kontrollit dhe ruajtjes së vulave zyrtare. Vula prodhohet, administrohet dhe ruhet në përputhje me legjislacionin në fuqi.
10. Drejtori i Përgjithshëm i ASIG-ut realizon këto detyra:
a) Drejton, organizon dhe mbikëqyr veprimtarinë e institucionit, është përgjegjës për mirëfunksionimin e tij, si dhe përfaqëson institucionin në marrëdhëniet me të tretët;
b) I propozon Kryeministrit miratimin e rregullores se brendshme të ASIG-ut;
c) I dërgon Sekretarit të Përgjithshëm të Këshillit të Ministrave propozimin për strukturën dhe organikën e ASIG-ut;
ç) I raporton Zëvendëskryeministrit, në mënyrë periodike, çdo 3 (tre) muaj, për veprimtarinë e ASIG-ut;
d) Emëron, shkarkon dhe liron punonjësit, sipas rregullave të parashikuara në dispozitat e Kodit të Punës;
dh) Drejton dhe koordinon punën për hartimin dhe ndryshimin e akteve nënligjore, që dalin në zbatim të ligjit nr.72/2012, “Për organizimin dhe funksionimin e infrastrukturës kombëtare të informacionit gjeohapësinor në Republikën e Shqipërisë”, të ndryshuar;
e) Siguron bashkëpunimin me institucionet publike dhe me sektorin privat për nisma që lidhen me informacionin gjeohapësinor;
ë) Organizon dhe drejton punën për hartimin dhe programimin e realizimit të objektivave vjetorë (planveprimi vjetor, projektbuxheti etj) të ASIG-ut dhe miratimin e tyre;
f) Nxjerr akte të brendshme, të detyrueshme për menaxhimin administrativ, financiar dhe burimeve njerëzore të ASIG-ut;
g) Administron burimet pasurore, financiare dhe njerëzore të ASIG-ut, në përputhje me legjislacionin në fuqi.
IV. DETYRAT E AUTORITETIT SHTETËROR PËR INFORMACIONIN GJEOHAPËSINOR
1. Në fushën e gjeodezisë dhe hartografisë digjitale, ASIG-u kryen këto detyra:
a) Ndërtimin, mirëmbajtjen dhe përditësimin e rrjeteve përbërëse të Kornizës Referuese Gjeodezike Shqiptare (KRGJSH), në përputhje me përcaktimet e vendimit të Këshillit të Ministrave, për sistemin referues gjeodezik zyrtar në Republikën e Shqipërisë;
b) Prodhimin e hartës bazë digjitale në Republikën e Shqipërisë në shkallë të ndryshme, në përputhje me standardet evropiane përkatëse, si autoritet kombëtar hartografik;
c) Përpunimin e imazheve nga fotografimi tokësor, ajror dhe satelitor, me qëllim krijimin e informacionit gjeohapësinor;
ç) Mbështetjen e autoriteteve publike përgjegjëse me ekspertizë dhe asistencë në fushën e matjeve dhe llogaritjeve gjeodezike.
2. Për mbledhjen, përpunimin, përditësimin, administrimin dhe shpërndarjen e informacionit gjeohapësinor, ASIG-u kryen këto detyra:
a) Mbledhjen, përpunimin dhe përditësimin e informacionit gjeohapësinor për temat e nenit 11, të ligjit nr.72/2012, të ndryshuar, për të cilat është në rolin e autoritetit publik përgjegjës;
b) Hartimin e rregullave dhe standardeve teknike për GIS-in kombëtar dhe GIS-et tematike, për temat e përcaktuara nga neni 11, i ligjit nr.72/2012, të ndryshuar;
c) Hartimin dhe propozimin e kushteve dhe standardeve teknike në lidhje me krijimin, përditësimin, shkëmbimin, aksesin dhe përdorimin e grupeve të të dhënave gjeohapësinore, shërbimeve të të dhënave gjeohapësinore dhe metadatave;
ç) Hartimin dhe ndjekjen e zbatimit të rregullave dhe standardeve teknike për ndërveprueshmërinë e të dhënave dhe shërbimeve gjeohapësinore;
d) Hartimin dhe zbatimin e rregullave në lidhje me aksesin dhe shkëmbimin e informacionit gjeohapësinor nga subjektet publike dhe private;
dh) Projektimin, ndërtimin dhe mirëmbajtjen e GIS-it kombëtar, si dhe përfshirjen në të të dhënave gjeohapësinore dhe sistemeve tematike të informacionit gjeohapësinor;
e) Projektimin, administrimin dhe përditësimin e Gjeoportalit Kombëtar, sipas përcaktimeve të nenit 24, të ligjit nr.72/2012, të ndryshuar;
ë) Shpërndarjen dhe ofrimin nëpërmjet shërbimeve të rrjetit të informacionit gjeohapësinor për subjektet publike dhe private, bazuar në rregullat për shkëmbimin e informacionit gjeohapësinor, të miratuara me vendim të Këshillit të Ministrave.
3. Për vendimmarrjen në fushën e informacionit gjeohapësinor, ASIG-u kryen këto detyra:
a) Merr vendime për përcaktimin e autoriteteve publike përgjegjëse për mbledhjen, përpunimin e përditësimin e informacionit gjeohapësinor dhe afatet e depozitimit të tij pranë ASIG-ut, sipas temave përkatëse, të përcaktuara në nenin 11, të ligjit nr.72/2012, “Për organizimin dhe funksionimin e infrastrukturës kombëtare të informacionit gjeohapësinor në Republikën e Shqipërisë”, të ndryshuar;
b) Merr vendime për nismat e autoriteteve publike përgjegjëse në fushën e gjeoinformacionit, pas marrjes së mendimit të Bordit të Informacionit Gjeohapësinor (në vijim BIG);
c) Merr vendime për miratimin/refuzimin e të dhënave gjeohapësinore dhe përfshirjen ose jo të tyre në GIS-in Kombëtar, pas marrjes së mendimit të BIG-ut;
ç) Merr vendime për miratimin/refuzimin e sistemeve tematike të informacionit gjeografik dhe përfshirjen ose jo të tyre në GIS-in kombëtar, pas marrjes së mendimit të BIG-ut.
4. Për përpunimin e të dhënave Remote Sensing, ASIG-u kryen këto detyra:
a) Administrimin dhe arkivimin e informacionit gjeohapësinor, të kapur (mbledhur) nëpërmjet imazheve satelitore, fotografimeve ajrore, teknologjisë UAV, skanimeve lidar, kamerave 360 gradë etj, të vëna në dispozicion nga Ministria e Mbrojtjes apo nga institucione në varësi të saj, si dhe të krijuara nga ASIG-u, në kuadër të projekteve të brendshme apo me bashkëpunim të huaj;
b) Përpunimin e të dhënave Remote Sensing dhe analizimin e informacionit gjeohapësinor, të kapur (mbledhur) nëpërmjet imazheve satelitore, fotografimeve ajrore, teknologjisë UAV, skanimeve lidar, kamerave 360 gradë etj;
c) Shpërndarjen e informacionit të përpunuar nga të dhënat Remote Sensing, të kapur (mbledhur) nëpërmjet imazheve satelitore, fotografimeve ajrore, teknologjisë UAV, skanimeve lidar, kamerave 360 gradë etj për autoritetet publike, sipas fushave të tyre të përgjegjësisë;
ç) Bashkëpunimin me ministritë apo institucionet për caktimin e personave përgjegjës/pikës së kontaktit, të nevojshëm për analizimin dhe përpunimin e thelluar të informacionit të marrë nga përpunimi i të dhënave Remote Sensing;
d) Hartimin, në bashkëpunim me ministritë apo institucionet, sipas fushës së tyre të përgjegjësisë, të manualeve dhe udhëzimeve të nevojshme për mënyrën e përdorimit të informacionit të përftuar nga përpunimi i të dhënave Remote Sensing me teknologji të avancuar, të cilat miratohen nga drejtori i Përgjithshëm, brenda 6 (gjashtë) muajve nga aplikimi i kësaj teknologjie;
dh) Përpunimin e të dhënave nga sistemet, me qëllim prodhimin e raporteve të ndryshme, në ndihmë të grupeve të interesit, për qëllime vendimmarrjeje apo statistikore.
5. Për koordinimin ndërinstitucional dhe nismat në fushën e informacionit gjeohapësinor, ASIG-u kryen këto detyra:
a) Mbështetjen e Këshillit të Ministrave për hartimin e politikës kombëtare në fushën e informacionit gjeohapësinor;
b) Garantimin e zbatimit të politikës kombëtare në fushën e informacionit gjeohapësinor, bazuar në ligjin për infrastrukturën kombëtare të informacionit gjeohapësinor dhe dokumentin e politikave për qeverisjen e sektorit të informacionit gjeohapësinor në Shqipëri, të miratuar me vendim të Këshillit të Ministrave;
c) Koordinimin e nismave për investime dhe projekte të autoriteteve publike përgjegjëse për mbledhjen, përpunimin dhe përditësimin e të dhënave gjeohapësinore apo ngritjen e sistemeve të informacionit gjeohapësinor;
ç) Planifikimin dhe drejtimin e projekteve me donatorë të huaj në fushën e gjeoinformacionit;
d) Bashkëpunimin me botën akademike, si dhe promovimin e investimeve nga sektori privat në fushën e të dhënave gjeohapësinore;
dh) Zhvillimin e trajnimeve, me qëllim rritjen e kapaciteteve të aktorëve, që krijojnë apo përdorin informacion gjeohapësinor dhe ofrimin e produkteve të kërkuara nga grupet e interesit dhe publiku;
e) Ndjekjen e procedurave përkatëse në rolin e sekretariatit teknik të BIG-ut, në përputhje me rregulloren “Për organizimin dhe funksionimin e Bordit të Informacionit Gjeohapësinor (BIG)”, të miratuar me urdhër të Kryeministrit;
ë) Formulimin e kërkesave apo propozimeve për BIG-un lidhur me nismat e autoriteteve publike, përgjegjëse në fushën e gjeoinformacionit;
f) Përgatitjen e rekomandimeve për autoritetet publike përgjegjëse, pas marrjes së mendimit të BIG-ut për nismat e tyre në fushën e gjeoinformacionit;
g) Realizimin e marrëveshjeve të bashkëpunimit me partnerë nga sektori publik dhe privat, të lidhur me sektorin e gjeoinformacionit;
gj) Përgatitjen e rekomandimeve lidhur me masat ligjore dhe organizative për ndryshimin e legjislacionit dhe përputhjen e tij me aktet komunitare;
h) Përfaqësimin në organizatat evropiane dhe ndërkombëtare, anëtarësimi në të cilat i shërben funksionimit dhe modernizimit të infrastrukturës kombëtare të informacionit gjeohapësinor.
V. DISPOZITA KALIMTARE DHE TË FUNDIT
1. Vendimi nr.147, datë 20.2.2013, i Këshillit të Ministrave, “Për miratimin e rregullores “Për organizimin dhe funksionimin e Autoritetit Shtetëror për Informacionin Gjeohapësinor””, i ndryshuar, shfuqizohet.
2. Ngarkohen Autoriteti Shtetëror për Informacionin Gjeohapësinor dhe Bordi i Informacionit Gjeohapësinor për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN E DOKUMENTIT TË PROGRAMIT BUXHETOR AFATMESËM 2025 – 2027, TË RISHIKUAR
Në mbështetje të nenit 100 të Kushtetutës dhe të nenit 28, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, me propozimin e ministrit tё Financave, Këshilli i Ministrave
V E N D O S I:
Miratimin e dokumentit të Programit Buxhetor Afatmesëm për periudhën 2025 – 2027, të rishikuar, sipas tekstit që i bashkëlidhet këtij vendimi dhe është pjesë përbërëse e tij.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
NDRYSHIMIN E PËRGJEGJËSISË SË ADMINISTRIMIT, NGA MINISTRIA E MBROJTJES TE MINISTRIA E INFRASTRUKTURËS DHE ENERGJISË, PËR AUTORITETIN RRUGOR SHQIPTAR, TË NJË PJESE TË PRONËS ME NUMËR RENDOR 771, ME EMËRTIMIN “N/REPART USHTARAK I REPARTIT NR.4006”, ME VENDNDODHJE NË MIRAKË, LIBRAZHD, DHE PËR NJË NDRYSHIM NË VENDIMIN NR.515, DATË 18.7.2003, TË KËSHILLIT TË MINISTRAVE, “PËR MIRATIMIN E LISTËS SË INVENTARIT TË PRONAVE TË PALUAJTSHME SHTETËRORE, TË CILAT I KALOJNË NË PËRGJEGJËSI ADMINISTRIMI MINISTRISË SË MBROJTJES”, TË NDRYSHUAR
Në mbështetje të nenit 100 të Kushtetutës dhe të neneve 13 e 15, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e Kryeministrit, Këshilli i Ministrave
V E N D O S I:
1. Ndryshimin e përgjegjësisë së administrimit, nga Ministria e Mbrojtjes te Ministria e Infrastrukturës dhe Energjisë, për Autoritetin Rrugor Shqiptar, të një pjese të pasurisë me nr.2352, zona kadastrale 2696, Librazhd, me sipërfaqe trualli prej 1 162 (një mijë e njëqind e gjashtëdhjetë e dy) m2 dhe të një pjese të pasurisë nr.2351, zona kadastrale 2696, Librazhd, me sipërfaqe trualli prej 3 328 (tre mijë e treqind e njëzet e tetë) m2, pjesë të pronës me numër rendor 771, me emërtimin “N/repart ushtarak i repartit nr.4006”, me vendndodhje në Mirakë, Librazhd, sipas planrilevimit, që i bashkëlidhet këtij vendimi dhe është pjesë përbërëse e tij, për realizimin e projektit “Studim-projektim, zgjerimi i segmentit rrugor dalje Elbasan – Përrenjas – Qafëthanë”.
2. Në listën e inventarit të pronave të paluajtshme shtetërore, që i kanë kaluar në përgjegjësi administrimi Ministrisë së Mbrojtjes, miratuar me vendimin nr.515, datë 18.7.2003, të Këshillit të Ministrave, “Për miratimin e listës së inventarit të pronave të paluajtshme shtetërore, të cilat i kalojnë në përgjegjësi administrimi Ministrisë së Mbrojtjes”, të ndryshuar, përmasat e pronës me nr.771, me emërtimin “N/repart ushtarak i repartit nr.4006”, me vendndodhje në Mirakë, Librazhd, zëvendësohen me përmasat e përcaktuara në formularin dhe në planin e rilevimit, që i bashkëlidhen këtij vendimi.
3. Ministrisë së Infrastrukturës dhe Energjisë dhe Autoritetit Rrugor Shqiptar u ndalohet të ndryshojnë destinacionin e përdorimit të sipërfaqes së pronës, të përcaktuar në pikën 1, të këtij vendimi, ta tjetërsojnë ose t’ua japin atë në përdorim të tretëve.
4. Për sigurinë dhe ruajtjen e pronës së përcaktuar në pikën 2, të këtij vendimi, Ministria e Infrastrukturës dhe Energjisë dhe Autoriteti Rrugor Shqiptar të ndërtojnë rrethimin në kufirin e ri të pronës, duke zbatuar të njëjtat standarde me rrethimin aktual, të zhvendosin sistemin e vëzhgimit me kamera dhe sistemin e ndriçimit, duke ruajtur parametrat teknikë të tyre dhe duke mos cenuar në asnjë rast sigurinë në objekte e krijimin e aksesit për hyrje-daljet në rrugë, pa ndërprerë aksesin e lëvizjes.
5. Ngarkohen Ministria e Mbrojtjes, Ministria e Infrastrukturës dhe Energjisë, Autoriteti Rrugor Shqiptar dhe Agjencia Shtetërore e Kadastrës për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN E PLANIT KOMBËTAR TË FREKUENCAVE
Në mbështetje të nenit 100 të Kushtetutës dhe të pikës 4, të nenit 7, të ligjit nr.54/2024, datë 30.5.2024, “Për komunikimet elektronike në Republikën e Shqipërisë”, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave
V E N D O S I:
1. Miratimin e Planit Kombëtar të Frekuencave, sipas tekstit që i bashkëlidhet këtij vendimi.
2. Administrimi dhe përdorimi i frekuencave bëhen sipas përcaktimeve të Planit Kombëtar të Frekuencave.
3. Autoriteti i Komunikimeve Elektronike dhe Postare dhe Autoriteti i Mediave Audiovizive vënë në dispozicion të publikut, në formë elektronike, gjendjen e brezave që kanë në administrim.
4. Brezat e frekuencave me përdorim të përbashkët rregullohen me marrëveshje ndërmjet palëve.
5. Vendimi nr.1187, datë 24.12.2020, i Këshillit të Ministrave, “Për miratimin e Planit Kombëtar të Frekuencave”, shfuqizohet.
6. Ngarkohen Ministria e Infrastrukturës dhe Energjisë, Ministria e Brendshme, Ministria e Mbrojtjes, Shërbimi Informativ i Shtetit, Autoriteti i Komunikimeve Elektronike dhe Postare dhe Autoriteti i Mediave Audiovizive për zbatimin e këtij vendimi.
Ky vendim botohet në “Fletoren zyrtare” dhe hyn në fuqi më 1 janar 2025.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN, NË PARIM, TË PROJEKTVENDIMIT TË KOMITETIT TË PËRBASHKËT TË MARRËVESHJES SË TREGTISË SË LIRË, NDËRMJET REPUBLIKËS SË SHQIPËRISË DHE REPUBLIKËS SË TURQISË, PËR NDRYSHIMIN E MARRËVESHJES NDËRMJET REPUBLIKËS SË SHQIPËRISË DHE REPUBLIKËS SË TURQISË, MIRATUAR ME LIGJIN NR.9733, DATË 14.5.2007, TË NDRYSHUAR, DUKE ZËVENDËSUAR PROTOKOLLIN II TË SAJ, NË LIDHJE ME PËRCAKTIMIN E KONCEPTIT TË “PRODUKTEVE ORIGJINUESE” DHE METODAVE TË BASHKËPUNIMIT ADMINISTRATIV
Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, të ndryshuar, me propozimin e ministrit të Ekonomisë, Kulturës dhe Inovacionit, Këshilli i Ministrave
V E N D O S I:
Miratimin, në parim, të projektvendimit të Komitetit të Përbashkët të Marrëveshjes së Tregtisë së Lirë, ndërmjet Republikës së Shqipërisë dhe Republikës së Turqisë, për ndryshimin e marrëveshjes ndërmjet Republikës së Shqipërisë dhe Republikës së Turqisë, miratuar me ligjin nr.9733, datë 14.5.2007, të ndryshuar, duke zëvendësuar protokollin II të saj, në lidhje me përcaktimin e konceptit të “produkteve origjinuese” dhe metodave të bashkëpunimit administrativ, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN E RREGULLAVE PËR ADMINISTRIMIN E REGJISTRIT TË OBJEKTEVE TË KONFISKUARA, TË DHËNAVE PARËSORE E DYTËSORE TË TIJ, SUBJEKTEVE TË INTERESUARA DHE NIVELIT TË AKSESIT
Në mbështetje të nenit 100 të Kushtetutës dhe të pikës 3, të nenit 14, të ligjit nr.66/2023, “Për administrimin e objekteve të konfiskuara si ndërtime pa leje, me qëllim përdorimin e tyre për interes publik apo strehim social, si dhe zbutjen e pasojave sociale të shkaktuara”, me propozimin e Kryeministrit, Këshilli i Ministrave
V E N D O S I:
I. DISPOZITA TË PËRGJITHSHME
1. Ky vendim ka për qëllim:
a) përcaktimin e mënyrës së administrimit të regjistrit të objekteve të konfiskuara dhe të të dhënave të tij;
b) përcaktimin e institucioneve që kanë të drejtën e aksesit në regjistër dhe të kritereve që duhet të plotësojnë.
2. Në këtë vendim, termat e mëposhtëm kanë këto kuptime:
a) “Leje ndërtimi”, akti administrativ, i përkufizuar në pikën 16, të nenit 3, të ligjit nr.107/2014, “Për planifikimin dhe zhvillimin e territorit”, të ndryshuar;
b) “Leje zhvillimi”, akti administrativ i përkufizuar në pikën 17, të nenit 3, të ligjit nr.107/2014, “Për planifikimin dhe zhvillimin e territorit”, të ndryshuar;
c) “Ligj”, ligji nr.66/2023, “Për administrimin e objekteve të konfiskuara si ndërtime pa leje, me qëllim përdorimin e tyre për interes publik apo strehim social, si dhe zbutjen e pasojave sociale të shkaktuara”;
ç) “Vendimi i konfiskimit”, vendimi, i cili merret nga Këshilli
Kombëtar i Territorit, në zbatim të ligjit nr.66/2023, “Për
administrimin e objekteve të konfiskuara si ndërtime pa leje, me
qëllim përdorimin e tyre për interes publik apo strehim social, si dhe
zbutjen e pasojave sociale të shkaktuara”.
3. Institucioni administrues i regjistrit të objekteve të konfiskuara është Agjencia Shtetërore e Kadastrës.
4. Mënyra e plotësimit dhe e përpunimit të të dhënave, shpërndarja e ekstrakteve nga ky regjistër bëhet duke garantuar sigurinë e sistemit, standardet dhe parimet për mbrojtjen e të dhënave personale, nëpërmjet disa niveleve të sigurisë.
5. Regjistri i objekteve të konfiskuara ndërvepron me bazën e të dhënave shtetërore të institucioneve të tjera, duke përdorur si të dhëna dytësore të dhënat parësore të tyre.
6. Ndërlidhja dhe bashkëveprimi i regjistrit të objekteve të konfiskuara me regjistrat e tjerë elektronikë publikë, të parashikuar në pikën 2, të kreut II, të këtij vendimi, bëhet nëpërmjet Platformës Qeveritare të Ndërveprimit, sipas specifikimeve teknike të ndërveprimit të bazave të të dhënave shtetërore, e cila koordinohet, zhvillohet e administrohet nga Autoriteti Rregullator Koordinues i Bazave të të Dhënave Shtetërore, në përputhje me legjislacionin në fuqi për bazat e të dhënave shtetërore, duke dhënë akses në të dhëna, sipas parashikimeve të këtij vendimi.
II. TË DHËNAT DHE MËNYRA E ADMINISTRIMIT TË REGJISTRIT TË OBJEKTEVE TË KONFISKUARA
1. Të dhëna parësore të regjistrit të objekteve të konfiskuara janë dokumentacionet tekniko-ligjor të pasurisë, i cili përfshin praktikën administrative të vendimit të konfiskimit dhe miratimit të programeve të zhvillimit.
2. Të dhënat dytësore të regjistrit janë:
a) të dhënat identifikuese për personat, të cilat merren nga baza e të dhënave “Regjistri Kombëtar i Gjendjes Civile”, administruar nga Drejtoria e Përgjithshme e Gjendjes Civile, si:
i. NID;
ii. emri;
iii. mbiemri.
b) të dhëna identifikuese për subjektin, të cilat merren nga baza e të dhënave “Regjistri tregtar”, administruar nga Qendra Kombëtare e Biznesit, si:
i. NIPT/NUIS;
ii. emërtimi tregtar;
iii. administrator.
c) të dhënat identifikuese të pronës, të cilat merren nga “Baza shtetërore e të dhënave kadastrale – ALBSCAD”, administruar nga Agjencia Shtetërore e Kadastrës, si:
i. numri i pasurisë;
ii. sipërfaqja e pasurisë;
iii. pronari i pasurisë;
iv. zona kadastrale;
v. adresa e pasurisë;
vi. të dhënat e akteve juridike paraprake, si lloji i aktit, numri, data e aktit dhe të dhënat e personave të tretë.
ç) Të dhënat e lejes së ndërtimit, të cilat merren nga baza e të dhënave
“Databaza e lejeve të ndërtimit “e-Leje”, administruar nga Agjencia
e Zhvillimit të Territorit, si:
i. numri i aktit;
ii. sipërfaqja totale e pronave, të cilat preken nga ky projekt;
iii. sipërfaqja e tokës së zënë nga struktura, sipas lejes;
iv. numri i kateve mbi dhe nën tokë;
v. numri i njësive nga leximi i projektit arkitektonik (shërbim,banim, parkim);
vi. zhvilluesi.
d) informacione të tjera plotësuese, që, sipas rastit, mund të jenë aktet administrative (urdhra, vendime, etj), dhe akte të tjera të krijuara nga veprimtaria e autoriteteve përgjegjëse sipas ligjit, në funksion të procesit të konfiskimit dhe të programeve të zhvillimit apo vendime gjykate.
3. Regjistri i objekteve të konfiskuara plotësohet dhe administrohet në format digjital.
4. Institucionet e përcaktuara në ligj kanë detyrimin të përcjellin pranë Komisionit të Objekteve të Konfiskuara të gjithë informacionin e administruar prej tyre, të nevojshëm për përditësimin e regjistrit të objekteve të konfiskuara.
5. Modeli i regjistrit të objekteve të konfiskuara është sipas aneksit nr.1, që i bashkëlidhet këtij vendimi dhe është pjesë përbërëse e tij.
6. Përdoruesit e regjistrit të objekteve të konfiskuara janë të përcaktuar në këto nivele:
a) Administratori, i cili administron bazën e të dhënave dhe konfiguron rolet e përdoruesve të regjistrit;
b) Redaktues, i cili plotëson të dhënat për objektet e konfiskuara;
c) Aprovues, i cili aprovon të dhënat e hedhura nga redaktuesi;
ç) Lexues, i cili konstulton të dhënat e regjistrit;
d) Auditues, i cili mbikëqyr të dhënat e regjistrit.
III. SUBJEKTET E INTERESUARA DHE NIVELI I AKSESIT
1. Institucionet shtetërore, që ushtrojnë ndjekjen penale dhe agjencitë ligjzbatuese, kanë akses të drejtpërdrejtë si lexues në regjistrin e objekteve të konfiskuara. Lista e institucioneve, që kanë të drejtën e aksesit në regjistrin e objekteve të konfiskuara, është sipas aneksit 2, që i bashkëlidhet këtij vendimi dhe është pjesë përbërëse e tij.
2. E drejta e hyrjes në regjistrin e objekteve të konfiskuara mundësohet me paraqitjen e kërkesës nga institucioni përkatës, sipas aneksit 3, që i bashkëlidhet këtij vendimi dhe është pjesë përbërëse e tij. Brenda 2 (dy) ditëve nga paraqitja e kësaj kërkese, Drejtoria e Përgjithshme e Agjencisë Shtetërore të Kadastrës pajis institucionin me kod hyrës.
3. Regjistri aksesohet vetëm nga persona të autorizuar të institucionit përkatës dhe ndërvepron me baza të tjera të dhënash shtetërore nëpërmjet platformës qeveritare të ndërveprimit.
4. Në asnjë rast, kodi hyrës nuk mund t’u bëhet i ditur personave të tretë, të ndryshëm nga personi i autorizuar, pa njoftuar më parë Agjencinë Shtetërore të Kadastrës, e cila ka për detyrë të verifikojë kriteret. Ndryshimi i personit të autorizuar nga institucioni përkatës bëhet sipas pikës 2, të këtij kreu.
5. Institucionet që përdorin regjistrin kanë këto detyrime:
a) Të përcaktojnë personat e autorizuar, që do të kenë të drejtën e përdorimit të sistemit për regjistrin e objekteve të konfiskuara dhe t’ia njoftojnë atë Agjencisë Shtetërore të Kadastrës;
b) Të përdorin bazën digjitale të të dhënave të regjistrit vetëm për qëllime të përmbushjes së detyrave funksionale, duke zbatuar legjislacionin në fuqi.
6. Të dhënat personale, të përfshira në këtë regjistër, përpunohen në përputhje me dispozitat e ligjit nr.9887, datë 10.3.2008, “Për mbrojtjen e të dhënave personale”, të ndryshuar.
IV. DISPOZITA DHE TË FUNDIT
1. Agjencia Shtetërore e Kadastrës, brenda 3 (tre) muajve nga hyrja në fuqi e këtij vendimi, duhet të mundësojë të drejtën e institucioneve për marrjen e ekstrakteve nga regjistri i objekteve të konfiskuara.
2. Ngarkohen Ministria e Ekonomisë, Kulturës dhe Inovacionit, Agjencia Kombëtare e Shoqërisë së Informacionit dhe Agjencia Shtetërore e Kadastrës për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
PËRCAKTIMIN E RREGULLAVE TË FUNKSIONIMIT DHE DETYRAVE TË KËSHILLIT KOMBËTAR TË VITIVINIKULTURËS
Në mbështetje të nenit 100 të Kushtetutës dhe të pikës 3, të nenit 8, të ligjit nr.86/2022, “Për vreshtarinë dhe verën”, me propozimin e ministrit të Bujqësisë dhe Zhvillimit Rural, Këshilli i Ministrave
V E N D O S I:
I. DISPOZITA TË PËRGJITHSHME
1. Ky vendim ka për qëllim të përcaktojë rregullat e funksionimit dhe detyrat e Kࣿëshillit Kombëtar të Vitivinikulturës, si organ konsultativ.
2. Të gjithë termat e përdorur në këtë vendim kanë të njëjtin kuptim me ato të parashikuara në ligjin nr.86/2022, “Për vreshtarinë dhe verën”.
II. FUNKSIONIMI I KËSHILLIT KOMBËTAR TË VITIVINIKULTURËS
1. Mbledhjet e Këshillit Kombëtar të Vitivinikulturës (në vijim Këshilli) janë të mbyllura dhe thirren nga kryetari, si rregull 4 (katër) herë në vit, në bazë të informacionit të marrë nga struktura përgjegjëse. Këshilli mund të mblidhet edhe kur shumica e anëtarëve paraqet kërkesë me shkrim, duke përcaktuar çështjet për të cilat thirret kjo mbledhje ose kur ka propozime, ndryshime të politikave ose akteve ligjore dhe nënligjore, që lidhen me vreshtarinë dhe verën.
2. Njëri nga anëtarët e Këshillit, si përfaqësues i ministrisë, zgjidhet sekretar.
3. Anëtarët e Këshillit njoftohen me shkresë zyrtare ose elektronike për datën dhe agjendën paraprake të mbledhjes, të paktën 7 (shtatë) ditë pune para ditës së mbledhjes.
4. Me përjashtim të pikës 3, të këtij kreu, kryetari mund të thërrasë një mbledhje të jashtëzakonshme të Këshillit, brenda një periudhe më pak se 7 (shtatë) ditë pune nga dita e mbledhjes, në rast të:
a) detyrimeve të parashikuara për raportime që mund të kërkohen nga një shtet anëtar në Bashkimin Evropian ose çdo vend tjetër lidhur me sektorin e vreshtarisë dhe verës;
b) hyrjes në fuqi të akteve të reja ligjore dhe nënligjore në fushën e verës dhe vreshtarisë;
c) problematikave të tregut të verës;
ç) kërkesave nga prodhues, përpunues ose tregtar të produkteve të verës.
5. Kryetari mund të paraqesë në rendin e ditës të mbledhjes çështje të tjera, që nuk janë të përfshira në agjendën e paraqitur paraprakisht, nëse të gjithë anëtarët janë të pranishëm.
6. Kuorumi i nevojshëm për realizimin e mbledhjes së Këshillit realizohet kur marrin pjesë të paktën 6 (gjashtë) prej anëtarëve, përfshirë kryetarin dhe sekretarin.
7. Procedura për mbledhjen e Këshillit është, si më poshtë vijon:
a) Mbledhja hapet nga kryetari, i cili kërkon miratimin e agjendës paraprake me ndryshimet, nëse ka;
b) Sekretari paraqet verbalisht përpara Këshillit një pasqyrë të përmbledhur të kërkesave të palëve, të fakteve dhe të provave të depozituara para fillimit të shqyrtimit të çështjeve dhe mban procesverbalin e mbledhjes dhe diskutimeve të anëtarëve;
c) Kryetari shtron për diskutim të gjitha çështjet me radhë, që janë vendosur në agjendë;
ç) Kryetari fton anëtarët të votojnë në përfundim të të gjithë procedurës së shqyrtimit dhe të shkëmbimit të opinioneve. Asnjë nga anëtarët nuk mund të abstenojë nga vendimmarrja. Votimi është i hapur në të gjitha rastet. Mendimi i anëtarit të mbetur në pakicë, i parashtruar me shkrim, bashkohet me propozimin dhe nënshkruhet me fjalën “kundër”;
d) Propozimet e Këshillit miratohen me shumicë të thjeshtë të votave të anëtarëve të pranishëm;
dh) Kryetari merr masa, që në fund të takimit, të përgatisë një propozim të arsyetuar për ministrin, i cili nënshkruhet nga të gjithë anëtarët që kanë marrë pjesë në votimin e tij;
e) Dokumentacioni i prodhuar gjatë gjithë takimeve i nënshtrohet rregullave në fuqi për arkivin.
III. DETYRAT E KËSHILLIT KOMBËTAR TË VITIVINIKULTURËS
1. Detyrat e kryetarit të Këshillit përfshijnë:
a) organizimin dhe drejtimin e punës së Këshillit;
b) thirrjen e mbledhjeve të Këshillit;
c) kryesimin e mbledhjeve të Këshillit;
ç) përcaktimin e agjendës paraprake të mbledhjeve të Këshillit;
d) dërgimin e propozimit për ministrin te struktura përgjegjëse;
dh) konsultimin e propozimeve, me kërkesë të ministrit.
2. Detyrat e anëtarëve të Këshillit përfshijnë detyrat e përcaktuara në nenin 9, të ligjit nr.86/2022, “Për vreshtarinë dhe verën”, si dhe:
a) propozime për ndryshime ligjore ose rregullatorë, që ndikojnë drejtpërdrejt në sektorin e vreshtarisë dhe verës;
b) formulimin e propozimeve konkrete në fushën e vreshtarisë dhe verës, që lidhen me kërkesat e tregut ose të prodhuesve/përpunuesve/tregtarëve/;
c) dhënien e mendimeve dhe propozimeve konkrete për mundësimin e regjistrimeve të verërave cilësore;
ç) propozimin e një kalendari aktivitetesh promovuese në fillim të çdo viti, brenda dhe jashtë vendit.
3.Struktura përgjegjëse për skemat e cilësisë në ministri, në rolin e sekretariatit të Këshillit, kryen detyrat, si më poshtë vijon:
a) Merr masat për sigurimin e logjistikës së nevojshme për realizimin e mbledhjeve të Këshillit, pas marrjes së njoftimit nga kryetari;
b) Përcjell propozimet përkatëse të Këshillit te ministri;
c) U komunikon anëtarëve me e-mail orën dhe datën e mbledhjes, së bashku me rendin e ditës;
ç) Mban të gjithë dokumentacionin e Këshillit, ku përfshihen të gjitha kërkesat dhe propozimet për ministrin dhe/ose grupet e interesit.
IV. DISPOZITA TË FUNDIT
Ngarkohet Ministria e Bujqësisë dhe Zhvillimit Rural për zbatimin e këtij vendimi.
Ky vendim hyn në fuqi pas botimit në “Fletoren zyrtare” dhe i fillon efektet nga data 1 janar 2025.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
SHPRONËSIMIN, PËR INTERES PUBLIK, TË PRONARËVE TË PASURISË SË PALUAJTSHME, PRONË PRIVATE, QË PREKET NGA REALIZIMI I PROJEKTIT “SISTEMIM I RRUGËS “ANDREA STATHI”, BASHKIA KORÇË”
Në mbështetje të nenit 100 të Kushtetutës, të neneve 5, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave
V E N D O S I:
1. Shpronësimin, për interes publik, të pronarëve të pasurisë së paluajtshme, pronë private, që preket nga realizimi i projektit “Sistemim i rrugës “Andrea Stathi”, Bashkia Korçë”.
2. Shpronësimi bëhet në favor të Bashkisë Korçë.
3. Pronarët e pasurisë së paluajtshme, pronë private, që shpronësohen, kompensohen në vlerë të plotë, sipas masës përkatëse, që paraqitet në tabelën bashkëlidhur këtij vendimi, për pasurinë e llojit “truall”, me një vlerë të përgjithshme prej 1 545 197 (një milion e pesëqind e dyzet e pesë mijë e njëqind e nëntëdhjetë e shtatë) lekësh.
4. Vlera e përgjithshme e shpronësimit prej 1 545 197 (një milion e pesëqind e dyzet e pesë mijë e njëqind e nëntëdhjetë e shtatë) lekësh përballohet nga buxheti i Bashkisë Korçë.
5. Vlera e shpenzimeve procedurale, në masën 50 000 (pesëdhjetë mijë) lekë, përballohet nga buxheti i Bashkisë Korçë.
6. Shpronësimi fillon menjëherë pas botimit të këtij vendimi në “Fletoren zyrtare” dhe afati i përfundimit të shpronësimit është brenda 3 (tre) muajve nga data e hyrjes në fuqi të tij.
7. Pronarët e pasurisë së paluajtshme, pronë private, të pasqyruar në tabelën bashkëlidhur këtij vendimi, kompensohen, për efekt shpronësimi, pasi të kenë paraqitur dokumentacionin justifikues për likuidim pranë Bashkisë Korçë.
8. Bashkia Korçë kryen procedurat për likuidimin e pronarëve të shpronësuar, sipas përcaktimeve të bëra në këtë vendim.
9. Afati i fillimit dhe i përfundimit të punimeve është në përputhje me afatet e parashikuara nga Bashkia Korçë.
10. Agjencia Shtetërore e Kadastrës, Drejtoria Vendore Korçë, brenda 30 (tridhjetë) ditëve nga data e miratimit të këtij vendimi, nis procedurat për hedhjen e gjurmës së projektit mbi hartën kadastrale, sipas planimetrisë së shpronësimit të miratuar, dhe regjistron kalimin e pronësisë për pasurinë e shpronësuar, në favor të Bashkisë Korçë, sipas këtij vendimi.
11. Agjencia Shtetërore e Kadastrës pezullon të gjitha transaksionet me pasurinë e shpronësuar deri në momentin e realizimit të procesit të hedhjes së gjurmës së projektit mbi hartën kadastrale dhe regjistrimit të aktit të kalimit të pronësisë, në favor të Bashkisë Korçë, për pasurinë e shpronësuar, sipas këtij vendimi.
12. Ngarkohen Ministria e Infrastrukturës dhe Energjisë, Bashkia Korçë, Agjencia Shtetërore e Kadastrës, Drejtoria Vendore Korçë, dhe Agjencia Shtetërore për Shpronësimin për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA REALIZIMI I PROJEKTIT “ZGJERIMI I RRUGËS ELBASAN – PËRRENJAS – QAFË – THANË (FAZA III)”
Në mbështetje të nenit 100 të Kushtetutës dhe të neneve 5, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave
V E N D O S I:
1. Shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Zgjerimi i rrugës Elbasan – Përrenjas – Qafë – Thanë (faza III)”.
2. Shpronësimi bëhet në favor të Autoritetit Rrugor Shqiptar.
3. Pronarët e pasurive të paluajtshme, pronë private, që shpronësohen, kompensohen në vlerë të plotë, sipas masës përkatëse, që paraqitet në tabelën që i bashkëlidhet këtij vendimi, për pasuritë e llojit “arë”, me një vlerë të përgjithshme prej 684 342 (gjashtëqind e tetëdhjetë e katër mijë e treqind e dyzet e dy) lekësh.
4. Vlera e përgjithshme e shpronësimit, prej 684 342 (gjashtëqind e tetëdhjetë e katër mijë e treqind e dyzet e dy) lekësh, përballohet nga buxheti i shtetit, llogaria “Fondi i shpronësimeve”, në Bankën e Shqipërisë.
5. Vlera e shpenzimeve procedurale, në masën 50 000 (pesëdhjetë mijë) lekë, përballohet nga buxheti i Autoritetit Rrugor Shqiptar.
6. Shpronësimi fillon menjëherë pas botimit të këtij vendimi në “Fletoren zyrtare” dhe afati i përfundimit të shpronësimit është brenda 3 (tre) muajve nga data e hyrjes në fuqi të tij.
7. Pronarët e pasurive të paluajtshme, pronë private, të pasqyruar në tabelën që i bashkëlidhet këtij vendimi, kompensohen, për efekt shpronësimi, pasi të kenë paraqitur dokumentacionin justifikues për likuidim pranë Agjencisë Shtetërore për Shpronësimin.
8. Agjencia Shtetërore për Shpronësimin kryen procedurat për likuidimin e pronarëve të shpronësuar, sipas përcaktimeve të bëra në këtë vendim.
9. Afati i fillimit dhe i përfundimit të punimeve është në përputhje me afatet e parashikuara nga Autoriteti Rrugor Shqiptar.
10. Agjencia Shtetërore e Kadastrës, Zyra Vendore Librazhd, brenda 30 (tridhjetë) ditëve nga data e miratimit të këtij vendimi, nis procedurat për hedhjen e gjurmës së projektit mbi hartën kadastrale, sipas planimetrisë së shpronësimit të miratuar, dhe regjistron aktin e kalimit të pronësisë për pasuritë që shpronësohen, sipas këtij vendimi, në favor të shtetit, në përgjegjësi administrimi të Ministrisë së Infrastrukturës dhe Energjisë për Autoritetin Rrugor Shqiptar.
11. Agjencia Shtetërore e Kadastrës pezullon të gjitha transaksionet me pasuritë e shpronësuara deri në momentin e realizimit të procesit të hedhjes së gjurmës së projektit mbi hartën kadastrale dhe regjistron aktin e kalimit të pronësisë për pasuritë që shpronësohen, sipas këtij vendimi, në favor të shtetit, në përgjegjësi administrimi të Ministrisë së Infrastrukturës dhe Energjisë për Autoritetin Rrugor Shqiptar.
12. Ngarkohen Ministria e Infrastrukturës dhe Energjisë, Autoriteti Rrugor Shqiptar, Agjencia Shtetërore e Kadastrës, Zyra Vendore Librazhd, Drejtoria e Administrimit dhe e Mbrojtjes së Tokës pranë Këshillit të Qarkut Elbasan dhe Agjencia Shtetërore për Shpronësimin për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
DISA SHTESA DHE NDRYSHIME NË VENDIMIN NR.869, DATË 18.6.2008, TË KËSHILLIT TË MINISTRAVE, “PËR ZBATIMIN E LIGJIT NR.7889, DATË 14.12.1994, “STATUSI I INVALIDIT”, TË NDRYSHUAR”
Në mbështetje të nenit 100 të Kushtetutës dhe të nenit 7, të ligjit nr.7889, datë 14.12.1994, “Për statusin e invalidëve të punës”, të ndryshuar, me propozimin e ministrit të Shëndetësisë dhe Mbrojtjes Sociale, Këshilli i Ministrave
V E N D O S I:
I. Në vendimin nr.869, datë 18.6.2008, të Këshillit të Ministrave, “Për zbatimin e ligjit nr.7889, datë 14.12.1994, “Statusi i invalidit”, të ndryshuar”, bëhen këto shtesa dhe ndryshime:
1. Pas pikës 1 shtohen pikat 1/1 dhe 1/2, me këtë përmbajtje:
“1/1. Shtesa mujore, sipas pikës 1, të këtij vendimi, indeksohet në të njëjtën mënyrë dhe përqindje si pensionet, sipas përcaktimeve të ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar.
1/2. Shtesa mujore, sipas pikës 1, të këtij vendimi, përjashtimisht për vitin 2025, indeksohet sipas indeksit të parashikuar në vendimin nr.582, datë 18.09.2024, të Këshillit të Ministrave, “Për indeksimin e pensioneve”.”.
2. Pika 3 ndryshohet, si më poshtë vijon:
“3. Shtesa mujore e invalidit paguhet nga Instituti i Sigurimeve Shoqërore së bashku me pensionin e invaliditetit apo të pleqërisë, në qendrat paguese të Postës Shqiptare apo në bankat e nivelit të dytë, sipas kërkesës së përfituesit.”.
II. Ngarkohen Ministria e Financave, Ministria e Shëndetësisë dhe Mbrojtjes Sociale, Ministria e Ekonomisë, Kulturës dhe Inovacionit dhe Instituti i Sigurimeve Shoqërore për zbatimin e këtij vendimi.
Ky vendim hyn në fuqi pas botimit në “Fletoren zyrtare” dhe i shtrin efektet nga data 1 janar 2025.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
TRANSFERIMIN TE KORPORATA E INVESTIMEVE SHQIPTARE TË PRONAVE SHTETËRORE PËR REALIZIMIN E PROJEKTIT TË INVESTIMIT “RIJETËZIMI I STADIUMIT “SELMAN STËRMASI”, TIRANË”
Në mbështetje të nenit 100 të Kushtetutës, të pikës 1, të nenit 7, të ligjit nr.71/2019, “Për Korporatën e Investimeve Shqiptare”, të nenit 53, të ligjit nr.162/2020, “Për prokurimin publik”, të ndryshuar, dhe në zbatim të shkronjës “b”, të pikës 1, të kreut II, të vendimit nr.137, datë 6.3.2024, të Këshillit të Ministrave, “Për përcaktimin e kritereve dhe të procedurës për dhënien e pronës shtetërore me qira, enfiteozë, leasing, shitje, përdorim si kolateral dhe të përdorimit në forma të tjera nga ana e Korporatës së Investimeve Shqiptare”, të ndryshuar, me propozimin e ministrit të Ekonomisë, Kulturës dhe Inovacionit, Këshilli i Ministrave
V E N D O S I:
1. Transferimin në pronësi të shoqërisë aksionare “Korporata e Investimeve Shqiptare”, me NIPT: M01917011D të pronave shtetërore, sipas shtojcës nr.1, që i bashkëlidhet këtij vendimi, për realizimin e projektit të investimit “Rijetëzimi i stadiumit “Selman Stërmasi”, Tiranë”.
2. Autorizohet shoqëria aksionare “Korporata e Investimeve Shqiptare”, vetë apo nëpërmjet entitetit të krijuar prej saj, për të vepruar si zhvillues i pronave të përcaktuara në shtojcat nr.1 dhe nr.2, sipas këtij vendimi, dhe autorizimit të dhënë nga Këshilli Bashkiak Tiranë, nëpërmjet vendimeve nr.95, datë 9.9.2024 dhe nr.112, datë 8.10.2024, në funksion të realizimit të projektit të investimit, të përcaktuar në pikën 1, të këtij vendimi, i cili ka si qëllim, ndër të tjera, përmbushjen e interesit publik.
3. Autorizohet Korporata e Investimeve Shqiptare dhe institucionet e përcaktuara në shtojcën nr.3, që i bashkëlidhet këtij vendimi, apo autoritetet e autorizuara prej tyre që, brenda 30 (tridhjetë) ditëve nga hyrja në fuqi e këtij vendimi, të lidhin marrëveshje bashkëpunimi për përcaktimin e standardit, metodologjisë, termave dhe kushteve të bashkëpunimit për përmbushjen e interesit publik, autoritetit në pronësi apo në përgjegjësi administrimi të të cilit regjistrohet prona e re shtetërore.
4. Autorizohet Korporata e Investimeve Shqiptare për hapjen e procedurës konkurruese për përzgjedhjen e partnerit privat, sipas rregullave të përcaktuara në vendimin nr.137, datë 6.3.2024, të Këshillit të Ministrave, “Për përcaktimin e kritereve dhe të procedurës për dhënien e pronës shtetërore me qira, enfiteozë, leasing, shitje, përdorim si kolateral dhe të përdorimit në forma të tjera nga ana e Korporatës së Investimeve Shqiptare”, të ndryshuar, për zhvillimin e pronës nëpërmjet instrumentit të sipërmarrjes.
Autorizohet Agjencia Kombëtare e Planifikimit të Territorit, që në të njëjtën procedurë, të asistojë Korporatën e Investimeve Shqiptare nëpërmjet hartimit të termave të referencës për projektidetë arkitekturore, hartimin e kritereve të kualifikimit për projektuesit dhe kritereve të vlerësimit paraprak e përfundimtar të projektideve arkitekturore. Shpenzimet për shërbimet e parashikuara në këtë pikë mbulohen nga buxheti i Korporatës së Investimeve Shqiptare.
5. Autorizohet Korporata e Investimeve Shqiptare për negociimin me subjekte private, me qëllim lidhjen e kontratës përkatëse për zhvillimin e pronave të transferuara në pronësi apo për të cilat ka autorizim zhvillimi, në funksion të realizimit të projektit të investimit.
6. Autorizohet Korporata e Investimeve Shqiptare, vetë apo nëpërmjet subjekteve të krijuara prej saj, të kryejë veprimet me Agjencinë Shtetërore të Kadastrës, institucionet publike, kompetente për planifikimin e zhvillimin e territorit, apo me institucione të tjera, në kuadër të realizimit të projektit të investimit, si dhe të sigurojë regjistrimin në emër të Republikës së Shqipërisë/Bashkisë së Tiranës/Korporatës, sipas parashikimeve të marrëveshjes së bashkëpunimit, të pronës së re shtetërore që do të krijohet në kuadër të projekteve të investimit.
7. Në funksion të zhvillimit të pronave të përcaktuara në këtë vendim, në përputhje me parashikimet ligjore përkatëse për planifikimin dhe zhvillimin e territorit, autorizohet Korporata e Investimeve Shqiptare për të proceduar me prishjen e objekteve, pjesë e pronave të përcaktuara në shtojcat nr.1 dhe nr.2, që i bashkëlidhen këtij vendimi.
8. Ngarkohen Ministria e Ekonomisë, Kulturës dhe Inovacionit, Ministria e Arsimit dhe Sportit, Bashkia Tiranë, Agjencia Kombëtare e Planifikimit të Territorit, Agjencia Shtetërore e Kadastrës, Federata Shqiptare e Futbollit dhe Korporata e Investimeve Shqiptare për ndjekjen dhe zbatimin e këtij vendimi.
Ky vendim hyn në fuqi pas botimit në “Fletoren zyrtare”
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN, NË PARIM, TË VENDIMIT TË KOMITETIT TË PËRBASHKËT TË KONVENTËS RAJONALE PËR RREGULLAT PREFERENCIALE TË ORIGJINËS PAN-EURO-MEDITERIANE, PËR NDRYSHIMIN E VENDIMIT NR.1/2023 TË KOMITETIT TË PËRBASHKËT, MIRATUAR ME LIGJIN NR.59/2024, NË LIDHJE ME PËRDORIMIN E CERTIFIKATAVE TË QARKULLIMIT TË LËSHUARA NË MËNYRË ELEKTRONIKE, NË KUADRIN E KONVENTËS RAJONALE PËR RREGULLAT PREFERENCIALE TË ORIGJINËS PAN-EURO-MEDITERIANE, TË ZBATUESHME QË NGA DATA 1 JANAR 2025
Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, të ndryshuar, me propozimin e ministrit të Ekonomisë, Kulturës dhe Inovacionit, Këshilli i Ministrave
V E N D O S I:
Miratimin, në parim, të vendimit të Komitetit të Përbashkët të Konventës Rajonale për Rregullat Preferenciale të Origjinës Pan-Euro-Mediteriane, për ndryshimin e vendimit nr.1/2023 të Komitetit të Përbashkët, miratuar me ligjin nr.59/2024, në lidhje me përdorimin e certifikatave të qarkullimit të lëshuara në mënyrë elektronike, në kuadrin e Konventës Rajonale për Rregullat Preferenciale të Origjinës Pan-Euro-Mediteriane, të zbatueshme që nga data 1 janar 2025, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN, NË PARIM, TË VENDIMIT TË KOMITETIT TË PËRBASHKËT TË KONVENTËS RAJONALE PËR RREGULLAT PREFERENCIALE TË ORIGJINËS PAN-EURO-MEDITERIANE, PËR NDRYSHIMIN E VENDIMIT NR.1/2023 TË KOMITETIT TË PËRBASHKËT, MIRATUAR ME LIGJIN NR.59/2024, ME QËLLIM PËRFSHIRJEN E DISPOZITAVE KALIMTARE PËR NDRYSHIMET E KONVENTËS RAJONALE PËR RREGULLAT PREFERENCIALE TË ORIGJINËS PAN-EURO-MEDITERIANE, TË ZBATUESHME NGA DATA 1 JANAR 2025
Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, të ndryshuar, me propozimin e ministrit të Ekonomisë, Kulturës dhe Inovacionit, Këshilli i Ministrave
V E N D O S I:
Miratimin, në parim, të vendimit të Komitetit të Përbashkët të Konventës Rajonale për Rregullat Preferenciale të Origjinës Pan-Euro-Mediteriane, për ndryshimin e vendimit nr.1/2023 të Komitetit të Përbashkët, miratuar me ligjin nr.59/2024, me qëllim përfshirjen e dispozitave kalimtare për ndryshimet e Konventës Rajonale për Rregullat Preferenciale të Origjinës Pan-Euro-Mediteriane, të zbatueshme nga data 1 janar 2025, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
