Vendime të miratuara në mbledhjen e Këshillit të Ministrave, datë 16 Maj 2018:
V E N D I M
PËR
KRIJIMIN E BAZËS TË TË DHËNAVE SHTETËRORE “REGJISTRI KOMBËTAR I PASURIVE KULTURORE (RKPK)”
Në mbështetje të nenit 100 të Kushtetutës dhe të nenit 4, të ligjit nr.10325, datë 23.9.2010, “Për bazat e të dhënave shtetërore”, me propozimin e ministrit të Kulturës, Këshilli i Ministrave
V E N D O S I:
1. Krijimin e bazës të të dhënave shtetërore “Regjistri Kombëtar i Pasurive Kulturore (RKPK)”.
2. Funksioni i bazës të të dhënave shtetërore “Regjistri Kombëtar i Pasurive Kulturore (RKPK)” është krijimi dhe përditësimi i regjistrit të pasurive kulturore materiale dhe jomateriale për të gjitha kategoritë e poseduesve, përmes Sistemit Informatik Kombëtar të Regjistrimit dhe Administrimit të Pasurive Kulturore, me qëllim identifikimin, regjistrimin, ruajtjen dhe lidhjen në kohë reale on-line të këtij shërbimi me:
a) institucionet shtetërore, subjektet private (fizike/juridike) që posedojnë dhe administrojnë fonde të pasurive kulturore, për regjistrimin dhe pajisjen me pasaportë për objektet pasuri kulturore në pronësi publike dhe private.
b) shërbimin doganor të Republikës së Shqipërisë, për monitorimin e lëvizjeve dhe të pronësisë së objekteve të pasurive kulturore në pronësi publike dhe private, brenda dhe jashtë territorit të Republikës së Shqipërisë;
c) Policinë e Shtetit për shkëmbim informacioni në sistem lidhur me rastet e grabitjeve dhe të vjedhjeve të objekteve të trashëgimisë kulturore në vend dhe denoncimet nga institucionet ndërkombëtare që operojnë brenda dhe jashtë Republikës së Shqipërisë;
ç) qytetarët për informim mbi procedurat e regjistrimit të pasurive kulturore kombëtare në pronësi private dhe publike, procedurat e lëvizjes brenda dhe jashtë territorit të Shqipërisë për objektet trashëgimi kulturore;
d) ndërveprimin në Gov-net për ofrim dhe marrje shërbimi on-line me institucionet dhe qytetarët për regjistrimin e pasurive kulturore kombëtare.
3. Institucioni administrues i bazës të të dhënave shtetërore “Regjistri Kombëtar i Pasurive Kulturore (RKPK)” është Qendra Kombëtare e Inventarizimit të Pasurive Kulturore.
4. Të dhënat parësore dhe dytësore të bazës të të dhënave shtetërore “Regjistri Kombëtar i Pasurive Kulturore (RKPK)” janë, si më poshtë vijon:
4.1. Të dhëna parësore:
a) Tipologjia:
i. Kodi;
ii. Kodi i vjetër;
iii. Titulli;
iv. Fusha;
v. Kultura;
vi. Klasifikimi;
vii. Kategoria;
viii. Materiali;
ix. Numri i regjistrit;
x. Teknika.
b) Të dhëna mbi objektin:
i. Autor;
ii. Vlera;
iii. Gjatësia;
iv. Periudha;
v. Monedha;
vi. Pesha;
vii. Vitet (nga – deri);
viii. Lartësia;
ix. Njësi peshe.
c) Pronari/poseduesi:
i. Pronari;
ii. Lloji i pronarit;
iii. Vendndodhja;
iv. Poseduesi;
v. Lloji i poseduesit;
vi. Objekti prind;
vii. Vendndodhja konkrete;
viii. Vendndodhja e origjinës.
ç) Status:
i. Status autenticiteti;
ii. I humbur;
iii. Status dëmtimi;
iv. Status aktiviteti;
v. Trashëgimia;
vi. Aprovuar;
vii. Miratuar.
d) Përpunim:
i. Dorëzues;
ii. Skedues;
iii. Datë skedimi.
dh) Leja e objektit:
i. Lloji i lejes;
ii. Autorizuesi;
iii. Data e aktit;
iv. Lloji i aktit;
v. Numri i aktit;
vi. Data e skadimit;
vii. Dokumente (pdf, word etj);
viii. Objekte.
e) Transaksionet:
i. Lloj leje;
ii. Poseduesi i ri;
iii. Transportuesi;
iv. Data;
v. Leja;
vi. Shoqërues;
vii. Status i dëmtimit;
viii. Numër regjistri;
ix. Faza;
x. Vend lëvizje;
xi. Pronar i ri;
xii. Objekte;
xiii. Dokumente.
ë) Galeria e objektit:
i. Dokumentacioni administrativ (Urdhra, vendime);
ii. Dokumentacioni fotografik për objektet;
iii. Dokumentacion audiovizual për objektet e trashëgimisë materiale/jomateriale;
iv. Emërtimi;
v. Madhësia;
vi. Lloji;
vii. Pamje ballore.
f) Historiku:
i. Titulli;
ii. Historiku;
iii. Bibliografia.
g) Përshkrime:
i. Akademik;
ii. Përshkrimi;
iii. Të tjera.
4.2. Të dhëna dytësore:
a) Regjistri Kombëtar i Gjendjes Civile nën administrimin e Drejtorisë së Përgjithshme të Gjendjes Civile (ID, emër, mbiemër, atësia, mëmësia, datëlindje, vendlindje, adresë);
b) Regjistri Tregtar nën administrimin e Qendrës Kombëtare të Biznesit (NIPT, emërtimi, administratori, adresa, statusi (aktiv, pezulluar, çregjistruar).
5. Dhënësit e informacionit për sa i përket bazës së të dhënave shtetërore “Regjistri Kombëtar i Pasurive Kulturore (RKPK)” janë, si më poshtë:
a) Institucionet e administratës qendrore:
b) Institucionet e vetëqeverisjes vendore;
c) Institucionet që posedojnë dhe administrojnë fonde të pasurive kulturore;
ç) Organizmat ndërkombëtarë që operojnë brenda dhe jashtë Republikës së Shqipërisë, që kanë në fushën e veprimtarisë së tyre edhe trashëgiminë kulturore;
d) Qytetari;
dh) Personat privatë (fizikë/juridikë);
e) Institucionet e kultit.
6. Subjektet e interesuara për bazën e të dhënave shtetërore “Regjistri Kombëtar i Pasurive Kulturore (RKPK)” janë, si më poshtë:
a) Institucionet e administratës qendrore;
b) Institucionet e vetëqeverisjes vendore;
c) Institucionet që posedojnë dhe administrojnë fonde të pasurive kulturore;
ç) Organizmat ndërkombëtarë që operojnë brenda dhe jashtë Republikës së Shqipërisë, që kanë në fushën e veprimtarisë së tyre edhe trashëgiminë kulturore;
d) Dogana;
dh) Policia;
e) Personat fizikë/juridikë;
ë) Qytetarët;
f) Institucionet e kultit;
g) Studiuesit.
6.1. Niveli dhe mënyra e aksesimit në sistem e subjekteve të interesuara të jetë, si më poshtë:
a) Si konsultues (Viewer) të informacionit nëpërmjet WEB-it:
i. Institucionet e administratës shtetërore;
ii. Institucionet e vetëqeverisjes vendore;
iii. Institucionet që posedojnë dhe administrojnë fonde të pasurive kulturore;
iv. Organizmat ndërkombëtarë që operojnë brenda dhe jashtë RSH-së, që kanë në fushën e veprimtarisë së tyre edhe trashëgiminë kulturore;
v. Dogana;
vi. Policia;
vii. Personat fizikë/juridikë;
viii. Qytetarët;
ix. Institucionet e kultit;
x. Studiuesit.
b) Si administrator dhe editor, QKIPK-ja.
7. Baza e të dhënave shtetërore “Regjistri Kombëtar i Pasurive Kulturore (RKPK)” shkëmben informacione me institucionet publike që ushtrojnë funksione publike sipas ligjit nr.10325, datë 23.9.2010, “Për bazat e të dhënave shtetërore”, lidhur me statusin e standardeve shqiptare dhe fushat që lidhen me to.
8. Baza e të dhënave shtetërore “Regjistri Kombëtar i Pasurive Kulturore (RKPK)” ndërvepron me sistemet e mëposhtme:
a) Regjistrin Kombëtar të Gjendjes Civile nën administrimin e Drejtorisë së Përgjithshme të Gjendjes Civile;
b) Regjistrin Tregtar nën administrimin e Qendrës Kombëtare të Biznesit.
9. Qendra Kombëtare e Inventarizimit të Pasurive Kulturore përfaqëson autoritetin e vetëm, i cili përcakton të drejtat dhe kufizimet e operimit në bazën e të dhënave shtetërore “Regjistri Kombëtar i Pasurive Kulturore (RKPK)” përmes Sistemit Informatik Kombëtar të Regjistrimit dhe Administrimit të Pasurive Kulturore, nëpërmjet aplikimit të skemave të aksesit me nivele të shkallëzuara dhe hierarkike të administrimit të informacionit respektiv për të gjithë punonjësit.
10. Qendra Kombëtare e Inventarizimit të Pasurive Kulturore është përgjegjëse për krjimin, operimin dhe mirëfunksionimin e të gjithë përdoruesve me privilegje aksesi të nivelit të parë në bazën e të dhënave shtetërore “Regjistri Kombëtar i Pasurive Kulturore (RKPK)”. Gjithashtu, miraton krijimin e përdoruesve dhe bën monitorimin e operacioneve për të gjithë përdoruesit e tjerë, të cilët kanë privilegje aksesi të nivelit të dytë.
11. Të gjitha ndryshimet në arkitekturën software dhe hardware të bazës të të dhënave shtetërore “Regjistri Kombëtar i Pasurive Kulturore (RKPK)”, të cilat mund të ndodhin në varësi të nevojave dhe të informacionit të institucionit dhe të praktikave evropiane e ndërkombëtare në fushën e dokumentimit dhe trashëgimisë së kulturore, do të bëhen në përputhje me legjislacionin në fuqi.
12. Ngarkohen Ministria e Kulturës dhe Qendra Kombëtare e Inventarizimit të Pasurive Kulturore për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
MIRATIMIN E DEKLARATËS SË SYNIMIT (SOI – STATEMENT OF INTENT), TË REPUBLIKËS SË FRANCËS PËR T’U BËRË PJESË E MEMORANDUMIT TË MIRËKUPTIMIT, NDËRMJET REPUBLIKËS SË SHQIPËRISË DHE KOMANDËS SUPREME TË FORCAVE ALEATE NË EVROPË DHE SHTABIT TË KOMANDËS SUPREME ALEATE PËR TRANSFORMIMIN, LIDHUR ME MBËSHTETJEN E SHTETIT PRITËS PËR KRYERJEN E OPERACIONEVE DHE TË STËRVITJEVE TË NATO-S
Në mbështetje të nenit 100 të Kushtetutës dhe të nenit 19, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Mbrojtjes, Këshilli i Ministrave
V E N D O S I:
Miratimin e deklaratës së synimit (SOI – Statement of Intent), të Republikës së Francës për t’u bërë pjesë e memorandumit të mirëkuptimit, ndërmjet Republikës së Shqipërisë dhe Komandës Supreme të Forcave Aleate në Evropë dhe Shtabit të Komandës Supreme Aleate për Transformimin, lidhur me mbështetjen e shtetit pritës për kryerjen e operacioneve dhe të stërvitjeve të NATO-s, sipas tekstit bashkëlidhur këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
KALIMIN NË PRONËSI NGA SHOQËRIA “AEROPORTI “NËNË TEREZA””, SH.A., TIRANË, TE SHOQËRIA “ALBCONTROL”, SH.A., TIRANË, TË DY PASURIVE
Në mbështetje të nenit 100 të Kushtetutës dhe të neneve 13 e 15, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e ministrit të Financave dhe Ekonomisë, Këshilli i Ministrave
V E N D O S I:
1. Kalimin në pronësi nga shoqëria “Aeroporti “Nënë Tereza””, sh.a., Tiranë, te shoqëria “Albcontrol”, sh.a., Tiranë, të pasurive me nr.6/57-N9, zona kadastrale 8350, vol.18, fq.161, me sipërfaqe 317.10 (treqind e shtatëmbëdhjetë pikë dhjetë) m2 dhe me nr.6/57-N15, zona kadastrale 8350, vol.18, fq.162, me sipërfaqe 38.40 (tridhjetë e tetë pikë dyzet) m2, Tiranë, me qëllim përfshirjen, si kapital i palës shtetërore, në shoqërinë me përgjegjësi të kufizuar, për krijimin, administrimin dhe operimin e linjës ajrore kombëtare shqiptare “Air Albania”.
2. Ngarkohen Ministria e Financave dhe Ekonomisë, shoqëria “Albcontrol”, sh.a., shoqëria “Aeroporti “Nënë Tereza””, sh.a. dhe kryeregjistruesi i Pasurive të Paluajtshme të Republikës së Shqipërisë për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
KALIMIN NË PRONËSI TË BASHKISË DEVOLL, NË NJËSINË ADMINISTRATIVE “QENDËR BILISHT”, TË DISA PRONAVE ME VENDNDODHJE NË ZONAT KADASTRALE 3637 DHE 1202
Në mbështetje të nenit 100 të Kushtetutës dhe të neneve 3, shkronja “ç”, 5, 8 e 17, të ligjit nr.8744, datë 22.2.2001, “Për transferimin e pronave të paluajtshme publike të shtetit në njësitë e qeverisjes vendore”, të ndryshuar, me propozimin e ministrit të Brendshëm, Këshilli i Ministrave
V E N D O S I:
1. Kalimin në pronësi të Bashkisë Devoll, në njësinë administrative “Qendër Bilisht”, të pronave me numër rendor 1 – 4, me vendndodhje në zonat kadastrale 3637 e 1202, sipas formularit dhe lidhjes 1, bashkëlidhur këtij vendimi, për t’u përdorur për ndërtimin e një burimi gjenerues të energjisë elektrike fotovoltaike.
2. Bashkisë Devoll i ndalohet të ndryshojë destinacionin e pronave të përcaktuara në pikën 1, të këtij vendimi.
3. Ngarkohen ministri i Brendshëm, kryeregjistruesi i Pasurive të Paluajtshme të Republikës së Shqipërisë dhe Bashkia Devoll për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
MIRATIMIN, NË PARIM, TË MARRËVESHJES STATUSORE, NDËRMJET REPUBLIKËS SË SHQIPËRISË DHE BASHKIMIT EVROPIAN, MBI VEPRIMET E NDËRMARRA NGA AGJENCIA E ROJËS BREGDETARE DHE KUFIRIT EVROPIAN NË REPUBLIKËN E SHQIPËRISË
Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Brendshëm, Këshilli i Ministrave
V E N D O S I:
Miratimin, në parim, të marrëveshjes statusore, ndërmjet Republikës së Shqipërisë dhe Bashkimit Evropian, mbi veprimet e ndërmarra nga Agjencia e Rojës Bregdetare dhe Kufirit Evropian në Republikën e Shqipërisë, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
MIRATIMIN, NË PARIM, TË DOKUMENTIT TË NDRYSHIMIT NR.2 TË MARRËVESHJES SË GRANTIT SUEDEZ NR.TF014255, NDËRMJET SHQIPËRISË DHE BANKËS NDËRKOMBËTARE PËR RINDËRTIM DHE ZHVILLIM (IBRD), QË VEPRON SI ADMINISTRATORE E FONDEVE GRANT TË SIGURUARA NGA SUEDIA, E PËRFAQËSUAR NGA AGJENCIA SUEDEZE PËR BASHKËPUNIM DHE ZHVILLIM NDËRKOMBËTAR (SIDA), PËR BASHKËFINANCIMIN E PROJEKTIT TË BURIMEVE UJORE DHE UJITJES
Në mbështetje të nenit 100 të Kushtetutës dhe të neneve 10 e 23, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Bujqësisë dhe Zhvillimit Rural dhe të ministrit të Financave dhe Ekonomisë, Këshilli i Ministrave
V E N D O S I:
Miratimin, në parim, të dokumentit të ndryshimit nr.2 të marrëveshjes së grantit suedez nr.TF014255, ndërmjet Shqipërisë dhe Bankës Ndërkombëtare për Rindërtim dhe Zhvillim (IBRD), që vepron si administratore e fondeve grant të siguruara nga Suedia, e përfaqësuar nga Agjencia Suedeze për Bashkëpunim dhe Zhvillim Ndërkombëtar (SIDA), për bashkëfinancimin e projektit të burimeve ujore dhe ujitjes, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
DISA SHTESA NË VENDIMIN NR.175, DATË 8.3.2017, TË KËSHILLIT TË MINISTRAVE, “PËR TRAJTIMIN ME PAGË DHE SHTESA MBI PAGË TË PUNONJËSVE MËSIMORË NË ARSIMIN PARAUNIVERSITAR”, TË NDRYSHUAR
Në mbështetje të nenit 100 të Kushtetutës, të pikës 2, të nenit 4, të ligjit nr.10 405, datë 24.3.2011, “Për kompetencat për caktimin e pagave dhe të shpërblimeve”, dhe të ligjit nr.107/2017, “Për buxhetin e vitit 2018”, me propozimin e Kryeministrit, Këshilli i Ministrave
V E N D O S I:
1. Në vendimin nr.175, datë 8.3.2017, të Këshillit të Ministrave, të ndryshuar, bëhen shtesat, si më poshtë vijon:
a) Në lidhjen nr.1, që përmendet në pikën 2, bëhen këto shtesa:
i. në numrin rendor 15, pas emërtesës “Psikolog shkolle” shtohet emërtesa “Mësues i praktikës profesionale”;
ii. në numrin rendor 22, pas emërtesës “Mësues në ciklin e ulët, në shkollat 9-vjeçare” shtohet emërtesa “Instruktor i praktikës profesionale”.
b) Në lidhjen nr.2, që përmendet në pikën 3/a, bëhen këto shtesa:
i. Në kolonën e dytë, që i përket grupit 3, shtohet paragrafi, si më poshtë si vijon:
“Personeli instruktor i praktikës profesionale, i punësuar me kontratë të përhershme dhe që ka mbaruar një shkollë të mesme të profilizuar.”.
ii. Në kolonën e tretë, “Niveli i diplomës”, që i përket grupit 3, shtohet paragrafi, si më poshtë si vijon:
“Diplomë e shkollës së mesme profesionale.”.
2. Efektet financiare, që rrjedhin nga zbatimi i këtij vendimi, për vitin 2018, të përballohen nga fondet e parashikuara në buxhetin e miratuar për Ministrinë e Financave dhe Ekonomisë për këtë vit.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
NJË NDRYSHIM NË VENDIMIN NR.717, DATË 23.6.2009, TË KËSHILLIT TË MINISTRAVE, “PËR PAGAT E PUNONJËSVE MBËSHTETËS TË INSTITUCIONEVE BUXHETORE DHE TË NËPUNËSVE TË DISA INSTITUCIONEVE BUXHETORE”, TË NDRYSHUAR
Në mbështetje të nenit 100 të Kushtetutës, të nenit 4/2, të ligjit nr.10405, datë 24.3.2011, “Për kompetencat për caktimin e pagave dhe të shpërblimeve”, dhe të ligjit nr.107/2017, “Për buxhetin e vitit 2018”, me propozimin e Kryeministrit, Këshilli i Ministrave
V E N D O S I:
Në shkronjën “b”, të pikës 9, të vendimit nr.717, datë 23.6.2009, të Këshillit të Ministrave, të ndryshuar, fjalët “… në Ministrinë e Shëndetësisë dhe në Ministrinë e Punës, Çështjeve Sociale dhe Shanseve të Barabarta …” zëvendësohen me “… në ministrinë përgjegjëse për çështjet e shëndetësisë dhe në ministrinë përgjegjëse për çështjet e punësimit …”.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
DISA NDRYSHIME NË VENDIMIN NR.395, DATË 29.4.2015, TË KËSHILLIT TË MINISTRAVE, “PËR MIRATIMIN E PROGRAMIT KOMBËTAR TË PRAKTIKAVE TË PUNËS NË ADMINISTRATËN SHTETËRORE DHE INSTITUCIONET E TJERA PUBLIKE”, TË NDRYSHUAR
Në mbështetje të nenit 100 të Kushtetutës, me propozimin e ministrit të Arsimit, Sportit dhe Rinisë, Këshilli i Ministrave
V E N D O S I:
Në vendimin nr.395, datë 29.4.2015, të Këshillit të Ministrave, të ndryshuar, bëhen ndryshimet, si më poshtë vijon:
1. Kudo në vendim, emërtimi “Ministria e Mirëqenies Sociale dhe Rinisë” zëvendësohet me “Ministria përgjegjëse për rininë”.
2. Pikat 11/1 dhe 11/2 ndryshohen, si më poshtë vijon:
“11/1. Ministria përgjegjëse për rininë administron procesin e punësimit të praktikantëve në thirrjet e radhës, për çdo institucion të administratës shtetërore, deri në 200 praktikantë në çdo vit buxhetor, bazuar në kërkesat e institucioneve për punësimin e praktikantëve për 1 (një) vit kalendarik dhe numrin e praktikantëve që kanë kryer me sukses programin kombëtar të praktikave të punës.
11/2. Ministria përgjegjëse për rininë dërgon në ministrinë përgjegjëse për financat numrin e praktikantëve që do të punësohen në çdo institucion të administratës shtetërore, në kuadër të programit kombëtar të praktikave të punës për çdo vit buxhetor. Ministria përgjegjëse për financat njofton degët e thesarit për numrin e praktikantëve që do të paguhen brenda fondeve të miratuara për institucionin përkatës në ligjin vjetor të buxhetit.”.
3. Pika 13 ndryshohet, si më poshtë vijon:
“13. Praktikantët e punësuar, për efekt pagese, klasifikohen jo më lart se niveli i specialistit të kategorisë IV-b. Fondet e nevojshme financiare për zbatimin e pikave 11/1 dhe 11/2, të këtij vendimi, përballohen nga fondet e buxhetit të miratuara për institucionet e administratës shtetërore për shpenzimet e personelit, për vitin përkatës.”.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
DISA NDRYSHIME DHE SHTESA NË VENDIMIN NR.646, DATË 22.7.2015, TË KËSHILLIT TË MINISTRAVE, “PËR PËRCAKTIMIN E PROCEDURAVE E TË KRITEREVE TË PËRZGJEDHJES SË ZHVILLUESIT NË ZONËN E TEKNOLOGJISË DHE ZHVILLIMIT EKONOMIK”
Në mbështetje të nenit 100 të Kushtetutës dhe të nenit 4, të ligjit nr.9789, datë 19.7.2007, “Për krijimin dhe funksionimin e zonave të teknologjisë dhe zhvillimit ekonomik”, të ndryshuar, me propozimin e ministrit të Financave dhe Ekonomisë, Këshilli i Ministrave
V E N D O S I:
Në vendimin nr.646, datë 22.7.2015, të Këshillit të Ministrave, bëhen ndryshimet dhe shtesat, si më poshtë vijon:
Neni 1
Pika 1, e nenit 3, riformulohet, si më poshtë vijon:
“1. Zhvillues i zonës mund të jetë institucioni i qeverisjes qendrore ose njësia e vetëqeverisjes vendore apo çdo person juridik, vendas ose i huaj.”.
Neni 2
Në nenin 4 shtohet pika 3, me këtë përmbajtje:
“3. Procedurë jokonkurruese për përcaktimin e zhvilluesit, institucion i qeverisjes qendrore ose njësi e vetëqeverisjes vendore.”.
Neni 3
Në pikën 3, të nenit 6, pas fjalëve “… kontraktimi i ekspertëve … ”, shtohen fjalët “… konsulentë nga ministritë ose institucionet shtetërore … ”.
Neni 4
Pas nenit 7 shtohet neni 7/1, me këtë përmbajtje:
“Neni 7/1
Ndryshimi i dokumenteve të konkurrimit
Autoriteti kontraktor, në çdo kohë, përpara mbarimit të afatit të fundit për dorëzimin e ofertave, për çdo lloj arsyeje, me nismën e vet ose me kërkesë për sqarim nga një ofertues, mund të bëjë ndryshime në dokumentet e konkurrimit nëpërmjet hartimit të një shtojce. Çdo shtojcë u komunikohet menjëherë dhe u vihet në dispozicion, edhe në rrugë elektronike, të gjithë ofertuesve që kanë shprehur interesin dhe atyre që janë të interesuar për të marrë pjesë në konkurrim.”.
Neni 5
Në nenin 8 bëhen ndryshimet dhe shtesa, si më poshtë vijon:
1. Në pikën 1, fjalët “… ose vendas sipas rastit …” zëvendësohen me “… Buletinin e Njoftimeve Zyrtare …”.
2. Në fund të pikës 4 shtohet paragrafi, me këtë përmbajtje:
“Sigurimi i ofertës së ofertuesit fitues, kur është kërkuar, do t’i kthehet atij pas dorëzimit të sigurimit të kontratës pranë institucionit përgjegjës.”.
3. Pas pikës 4 shtohet pika 4/1, me këtë përmbajtje:
“4/1. Institucioni përgjegjës, përpara përfundimit të periudhës së vlefshmërisë së ofertave, mund t’u kërkojë ofertuesve të zgjasin këtë periudhë për një afat të caktuar, por jo më shumë se kohëzgjatja e afatit fillestar. Në këtë rast,:
a) ofertuesi mund të refuzojë kërkesën pa humbur sigurimin e ofertës dhe vlefshmëria e ofertës së tij përfundon me mbarimin e periudhës fillestare të vlefshmërisë;
b) kur ofertuesi pranon zgjatjen e periudhës së vlefshmërisë, me të zgjatet edhe sigurimi i ofertës apo paraqitet një sigurim i ri oferte, që mbulon periudhën e zgjatur të vlefshmërisë.
Ofertuesi, që nuk zgjat periudhën e sigurimit të ofertës ose që nuk paraqet një sigurim të ri oferte, vlerësohet se e ka refuzuar kërkesën për zgjatje të periudhës së vlefshmërisë së ofertës.”.
4. Në fund të pikës 5 shtohet paragrafi, me këtë përmbajtje:
“Gjatë ekzekutimit të kontratës, nëse janë parashikuar faza për zbatimin e projektit, sipas grafikut të punimeve të propozuar në ofertë, kontraktori mund të kërkojë parashikimin e reduktimit të përqindjes së vlerës së sigurimit në mënyrë përpjesëtimore, por jo më pak se 25% të vlerës korresponduese të sigurimit të kontratës.”.
Neni 6
Në pikën 5, të nenit 9, hiqen fjalët “… në përputhje me përqindjen e pjesëmarrjes në punë/shërbim, të përcaktuara në aktmarrëveshje …”.
Neni 7
Pas pikës 4, të nenit 12, shtohet pika 5, me këtë përmbajtje:
“5. Procesi i përzgjedhjes së fituesit nga Komisioni i Vlerësimit të Ofertave do të vazhdojë edhe në qoftë se është dorëzuar vetëm 1 (një) ofertë.”.
Neni 8
Në fund të pikës 3, të nenit 13, shtohet paragrafi, me këtë përmbajtje:
“Zgjatja e afatit bëhet për aq sa është e nevojshme për përfundimin e vlerësimit, por jo më shumë se kohëzgjatja e afatit fillestar.”.
Neni 9
Pas nenit 14 shtohet neni 14/1, me këtë përmbajtje:
“Neni 14/1
Procedura jokonkurruese për përcaktimin e zhvilluesit, institucion i qeverisjes qendrore ose njësi e vetëqeverisjes vendore
Përcaktimi i zhvilluesit bëhet nga Këshilli i Ministrave, me propozimin e institucionit përgjegjës, sipas procedurës së mëposhtme:
1. Kandidati zhvillues paraqet kërkesën pranë institucionit përgjegjës, së bashku me studimin e parafizibilitetit, për projektin e ndërtimit të zonës së teknologjisë dhe të zhvillimit ekonomik, dhe informacionin e marrë nga Zyra e Regjistrimit të Pasurive të Paluajtshme për statusin aktual të pasurisë, për sipërfaqen, në të cilën do të ndërtohet zona, të shoqëruar me aktin përkatës të pronësisë.
2. Institucioni përgjegjës bën vlerësimin paraprak, në mënyrë që të përcaktojë nëse:
a) objektivat e projektit i shërbejnë interesit publik dhe përshtaten me strategjitë sektoriale apo rajonale të zhvillimit;
b) nuk ka kufizime për zbatimin e projektit;
c) projekti mund të zbatohet siç është planifikuar, duke përdorur teknologjitë e propozuara dhe pa rreziqe të arsyeshme teknike;
ç) projekti ka qëndrueshmëri ekonomike dhe përshtatshmëri financiare;
d) projekti siguron përshpejtimin e zhvillimit rajonal dhe zgjerimin e lidhjeve ekonomike të tregut shqiptar me atë ndërkombëtar si dhe përshpejtimin e qarkullimit të mallrave e të kapitaleve.
Pas kryerjes së vlerësimit paraprak, institucioni përgjegjës shprehet për pranimin e kërkesës dhe kërkon nga institucioni i qeverisjes qendrore ose njësia e vetëqeverisjes vendore plotësimin e të gjitha kritereve vlerësuese, të cilat duhet të jenë në përputhje me kërkesat e nenit 5, të këtij vendimi, përjashtuar paragrafët e tretë dhe të katërt të shkronjës “a’, të shkronjës “D”, të nenit 5, respektivisht kërkesat për tarifën e përdorimit të tokës dhe garancinë bankare për kapitalin e nevojshëm financiar për kryerjen e investimit në zonë.
3. Në rastet kur kandidati për zhvillues është institucioni përgjegjës, merret informacion nga Zyra e Regjistrimit të Pasurive të Paluajtshme për statusin aktual të pasurisë, për sipërfaqen, në të cilën do të ndërtohet zona, të shoqëruar me aktin përkatës të pronësisë, dhe plotësohet dokumentacioni i përcaktuar në kriteret vlerësuese, në përputhje me nenin 5, të këtij vendimi, përjashtuar paragrafët e tretë dhe të katërt të shkronjës “a”, të ndarjes “D”, të nenit 5, respektivisht kërkesat për tarifën e përdorimit të tokës dhe garancinë bankare për kapitalin e nevojshëm financiar për kryerjen e investimit në zonë.
4. Kandidati për zhvillues, si pjesë të dokumentacionit, jep të dhëna lidhur me burimin e financimit, kapitalin e nevojshëm financiar për zbatimin e projektit dhe mundësinë e sigurimit të këtyre fondeve.
5. Institucioni përgjegjës, në përputhje me nenin 4, të ligjit, i propozon Këshillit të Ministrave shpalljen e zonës dhe zhvilluesin e saj.”.
Neni 10
Pas nenit 15 shtohet neni 15/1, me këtë përmbajtje:
“Neni 15/1
Shqyrtimi i ankimit administrativ
Për shqyrtimin e ankesave administrative, institucioni përgjegjës ndjek hapat, si më poshtë vijon:
1. Titullari i institucionit përgjegjës urdhëron ngritjen e një komisioni të përbërë nga 3 (tre) anëtarë, ku, të paktën, njëri është ekspert i fushës, për të shqyrtuar ankesën dhe për marrjen e një vendimi të arsyetuar. Komisioni i ngarkuar është përgjegjës për vendimin e dhënë në përfundim të shqyrtimit të ankesës.
Anëtarët e komisionit, të ngarkuar për shqyrtimin e ankesës, nuk duhet të kenë qenë pjesë e vendimmarrjes, për të cilën është paraqitur ankesa.
Në rast se ankimi lidhet me dokumentet e konkurrimit, titullari i autoritetit kontraktor mund t’ia ngarkojë shqyrtimin e ankesës Komisionit të Vlerësimit të Ofertave.
2. Njësia e hartimit të dokumenteve mbledh dhe vendos në dispozicion të komisionit të ngarkuar për shqyrtimin e ankesës gjithë informacionin e nevojshëm për shqyrtimin e saj.
3. Vendimi në lidhje me ankesën duhet të merret brenda 7 (shtatë) ditëve nga marrja e saj. Nëse nga ankuesi kërkohet informacion shtesë, atëherë afati kohor i sipërpërmendur ndërpritet dhe rifillon pasi institucioni përgjegjës ta sigurojë këtë informacion.
3. Në përfundim të shqyrtimit të ankesës, komisioni i ngarkuar për shqyrtimin e saj merr vendim të arsyetuar për refuzimin ose pranimin e ankesës, i cili i komunikohet menjëherë titullarit të institucionit përgjegjës.
Në rastin kur ankesa është pranuar, titullari i institucionit përgjegjës i adreson vendimin për zbatim Komisionit të Vlerësimit të Ofertave.
Në çdo rast, vendimi i institucionit përgjegjës i komunikohet me shkrim ankimuesit. Për efekt të shkurtimit të afateve kohore të procesit të ankimimit, komisioni i ngarkuar për shqyrtimin e ankesës ia komunikon vendimin ankimuesit edhe në adresën elektronike të përcaktuar prej tij në formularin e ankesës, jo më vonë se ditën e nesërme të punës, pas marrjes së vendimit.
4. Institucioni përgjegjës, nëse nevojitet, duhet të zgjatë afatin kohor të procedurës së konkurrimit aq sa zgjat periudha e pezullimit. Në rastet kur afatet kohore të procedurës së konkurrimit, për të cilat janë njoftuar ofertuesit, ndryshojnë, për shkak të marrjes parasysh të ankesës, autoriteti kontraktor u shpërndan ofertuesve një njoftim të posaçëm, ku jepen arsyet për zgjatjen e këtyre afateve.”.
Neni 11
Në fund të nenit 18 shtohet paragrafi, me këtë përmbajtje:
“Në raste të veçanta, me kërkesë të argumentuar të grupit të negociimit të kontratës, institucioni përgjegjës mund ta ndryshojë këtë afat. Zgjatja e afatit bëhet për aq sa është e nevojshme për përfundimin e procedurës, në proporcion me vështirësinë e çështjes konkrete, por jo më shumë se kohëzgjatja e afatit fillestar.”.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
PËRCAKTIMIN E OPERATORIT TË ENERGJISË SË RINOVUESHME
Në mbështetje të nenit 100 të Kushtetutës dhe të nenit 11, të ligjit nr.7/2017, “Pёr nxitjen e pёrdorimit tё energjisё nga burimet e rinovueshme”, me propozimin e ministrit të Infrastrukturës dhe Energjisë, Këshilli i Ministrave
V E N D O S I:
1. Deri në krijimin e Operatorit të Energjisë së Rinovueshme, funksionet do të kryhen nga Operatori i Shpërndarjes së Energjisë Elektrike, sh.a.
2. Ngarkohen Ministria e Infrastrukturës dhe Energjisë dhe Operatori i Shpërndarjes së Energjisë Elektrike, sh.a. (OSHEE) për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
MIRATIMIN E MËNYRËS SË ORGANIZIMIT, TË STRUKTURËS, ORGANIKËS DHE STATUTIT TË AUTORITETIT RRUGOR SHQIPTAR
Në mbështetje të nenit 100 të Kushtetutës, të nenit 3, të ligjit nr.10164, datë 15.10.2009, “Për Autoritetin Rrugor Shqiptar”, dhe të nenit 4, të ligjit nr.90/2012, “Për organizimin dhe funksionimin e administratës shtetërore”, me propozimin e ministrit të Infrastrukturës dhe Energjisë, Këshilli i Ministrave
V E N D O S I:
I. Organizimi dhe funksionimi
1. Autoriteti Rrugor Shqiptar është person juridik publik, me qendër në Tiranë, dhe e shtrin veprimtarinë në të gjithë territorin e Republikës së Shqipërisë. Ai organizohet në nivel qendror, nëpërmjet zyrës qendrore, dhe në nivel rajonal, nëpërmjet drejtorive rajonale. Hapja dhe mbyllja e drejtorive rajonale bëhet në kuadër të miratimit të strukturës dhe organikës së Autoritetit Rrugor Shqiptar.
2. Autoriteti Rrugor Shqiptar, më poshtë Autoriteti, ushtron veprimtarinë e tij në bazë të ligjit për Autoritetin Rrugor Shqiptar dhe akteve nënligjore të dala në zbatim të tij, i cili organizohet dhe funksionon mbi bazën e këtij statuti dhe të rregullores së miratuar nga Bordi Drejtues.
3. Organet e Autoritetit janë:
a) Bordi Drejtues;
b) Drejtori i Përgjithshëm.
4. Drejtori i Përgjithshëm mbështetet në veprimtarinë e tij nga një zëvendësdrejtor i përgjithshëm.
5. Drejtoritë rajonale përfaqësohen nga drejtori i drejtorisë rajonale. Ato zbatojnë dhe kontrollojnë veprimtarinë e Autoritetit në hapësirën e tyre administrative.
6. Marrëdhëniet e punës së drejtorit të Përgjithshëm, nëpunësve të tjerë dhe punonjësve të Autoritetit, në nivel qendror dhe rajonal, rregullohen në bazë të dispozitave të Kodit të Punës.
7. Emërimi i drejtorit të Përgjithshëm dhe i drejtorëve të drejtorive rajonale bëhet sipas përcaktimeve në ligjin për Autoritetin Rrugor Shqiptar.
8. Emërimet e nëpunësve të Autoritetit bëhen sipas një procedure konkurrimi. Rregullat dhe organet e ngarkuara për zhvillimin e procedurës së konkurrimit, të ngritjes në detyrë, lëvizjes paralele, transferimit, disiplinës në punë dhe të procedurave disiplinore përcaktohen në rregulloren e brendshme të Autoritetit.
9. Autoriteti, për realizimin e funksioneve të përcaktuara në ligj dhe në këtë vendim, harton buxhetin vjetor, që miratohet nga Bordi Drejtues. Ministri, në përputhje me ligjin për Autoritetin Rrugor Shqiptar, autorizon për çdo vit financiar përdorimin e fondeve të miratuara në buxhetin e shtetit për funksionimin e Autoritetit.
10. Të ardhurat e autoritetit krijohen nga:
a) fondet e miratuara në buxhetin e shtetit për Autoritetin;
b) të ardhurat e mbledhura nga veprimtaria e Autoritetit;
c) burime të tjera, dhurime, grante nga burime kombëtare e ndërkombëtare.
11. Autoriteti mban dokumentacionin në përputhje me legjislacionin financiar në fuqi. Ai përgatit raportin dhe llogaritë financiare në fund të çdo viti financiar.
12. Raporti vjetor dhe programi i veprimtarisë së ardhshme financiare miratohen nga Bordi Drejtues.
13. Autoriteti u përgjigjet kërkesave specifike të informacionit, që mund të kërkojë gjatë vitit ministria përgjegjëse për financat për pjesën e buxhetit që financohet nga buxheti i shtetit.
14. Mbajtja e kontabilitetit dhe auditimi, nga ana e Autoritetit, bëhen në përputhje me legjislacionin shqiptar në fuqi.
15. Bordi mund të vendosë të kërkojë auditim të jashtëm, nëse e konsideron të nevojshëm.
16. Autoriteti ka stemën, logon dhe vulën e vet zyrtare. Stema e Autoritetit përbëhet nga stema e Republikës së Shqipërisë, me shënimet “Republika e Shqipërisë, Ministria e Infrastrukturës dhe Energjisë, Autoriteti Rrugor Shqiptar”, në përputhje me përcaktimet e vendimit të Këshillit të Ministrave për mënyrën e përdorimit të stemës së Republikës së Shqipërisë.
17. Drejtoritë rajonale të Autoritetit kanë stemat, logot dhe vulat e tyre zyrtare. Stema e secilës drejtori rajonale përbëhet nga stema e Republikës së Shqipërisë, me shënimet “Republika e Shqipërisë, Ministria e Infrastrukturës dhe Energjisë, Autoriteti Rrugor Shqiptar, Drejtoria Rajonale……”, në përputhje me përcaktimet e vendimit të Këshillit të Ministrave për mënyrën e përdorimit të stemës së Republikës së Shqipërisë.
18. Vula e Autoritetit dhe vulat e secilës drejtori rajonale kanë format dhe elementet e përcaktuara në vendimin e Këshillit të Ministrave për rregullat e prodhimit, të administrimit, kontrollit dhe ruajtjes së vulave zyrtare. Vulat prodhohen, administrohen dhe ruhen në përputhje me legjislacionin në fuqi.
II. Funksionet, përgjegjësitë dhe detyrat e Autoritetit Rrugor Shqiptar
1. Autoriteti kryen funksionet dhe detyrat e mëposhtme:
a) Ofron shërbime dhe lëshon autorizime/leje/miratime në përputhje dhe zbatim të Kodit Rrugor e legjislacionit në fuqi;
b) Krijon dhe mirëmban sistemin për administrimin e rrugëve shtetërore dhe të urave;
c) Krijon qendrat e menaxhimit elektronik të trafikut dhe miraton statusin e tyre;
ç) Asiston në përditësimet vjetore dhe rishikimet pesëvjeçare të Planit Kombëtar të Transportit për sektorin e transportit rrugor, në bashkëpunim me Institutin e Transportit;
d) Mirëmban dhe zbaton Manualin Shqiptar të Ndërtimit të Rrugëve dhe Specifikimet Teknike;
dh) Merr nisma për studime, kërkime shkencore dhe eksperimente për efiçencën, trafikun, qarkullimin dhe sigurinë rrugore;
e) Përgatit programe afatmesme zhvillimi dhe programin vjetor të punës për ndërtimin, rikonstruksionin, mirëmbajtjen, ruajtjen dhe zhvillimin e rrugëve shtetërore, në përputhje me përparësitë e përcaktuara në dokumentet strategjike;
ë) Përgatit një raport vjetor për ministrinë përgjegjëse dhe Bordin, ku pasqyron veprimtarinë e kryer dhe planin në vazhdim;
f) Raporton te ministri përgjegjës për veprimtarinë e realizuar, në përputhje me ligjin për Autoritetin Rrugor Shqiptar;
g) Kërkon informacion nga institucionet publike, qendrore apo vendore, në lidhje me fushën e tij të përgjegjësisë dhe realizimin e detyrave të tij;
gj) Bashkëpunon me institucione të huaja dhe organizata joqeveritare në fushën e rrjeteve të transportit rrugor;
h) Negocion, lidh marrëveshje bashkëpunimi me karakter teknik, në fushën e rrjeteve të transportit rrugor, me institucione të huaja homologe, duke ndjekur procedurat ligjore në fuqi;
i) Anëtarësohet në organizma ndërkombëtarë;
j) Ka të drejtë të hartojë e të nxjerrë udhëzime, urdhëresa, rregullore dhe akte të tjera administrative, nëpërmjet organeve të tij drejtuese, në mbështetje dhe zbatim të akteve ligjore e nënligjore dhe të kompetencave që i janë dhënë;
k) Mban librat kontabël, harton të dhënat financiare dhe raportet për gjendjen e ecurisë së veprimtarisë, përfshirë edhe raportet e kontrollit të ekspertëve kontabël të autorizuar, në përputhje me ligjin për kontabilitetin dhe pasqyrat financiare;
l) Çdo funksion tjetër të parashikuar dhe lejuar nga Kodi Rrugor, ligji për Autoritetin Rrugor Shqiptar dhe legjislacioni në fuqi.
2. Drejtoritë rajonale kryejnë funksionet dhe kanë përgjegjësitë, si më poshtë vijon:
a) Në përputhje me programin e miratuar nga organet eprore, marrin të gjitha masat për realizimin e treguesve të këtij programi si dhe të gjithë aktivitetit teknik në mirëmbajtjen e rrjetit rrugor që kanë në administrim;
b) Përgatisin programe afatmesme zhvillimi dhe programin vjetor të punës për ndërtimin, rikonstruksionin, mirëmbajtjen, ruajtjen dhe zhvillimin e rrugëve shtetërore, në përputhje me përparësitë e përcaktuara në dokumentet strategjike;
c) Realizojnë procedurat e prokurimit të investimeve dhe shpenzimeve, në përputhje me legjislacionin përkatës, ndjekin zbatimin e kontratave që kanë në zhvillim dhe mbajnë përgjegjësi të plotë për realizimin e tyre, në përputhje me çfarë parashikohet në to;
ç) Garantojnë siguri për të gjithë përdoruesit e rrugës në të gjitha veprimtaritë që organizojnë për përmbushjen e detyrimeve, sipas Kodit Rrugor;
d) Organizojnë programin e supervizionit të shërbimeve të mirëmbajtjes me performancë (rutinë dhe dimërore), të rehabilitimit të Rrjetit Rrugor Kombëtar në administrim si dhe ndjekin kontratat;
dh) Krijojnë dhe mirëmbajnë sistemin për administrimin e rrugëve shtetërore dhe të urave nën administrim;
e) Mirëmbajnë dhe zbatojnë manualin shqiptar të ndërtimit të rrugëve dhe specifikimet teknike;
ë) Krijojnë qendrat e menaxhimit elektronik të trafikut dhe miratojnë statusin e tyre;
f) Asistojnë në përditësimet vjetore dhe rishikimet pesëvjeçare të PKT-së për sektorin e transportit rrugor, në bashkëpunim me Institutin e Transportit;
g) Marrin nisma për studime, kërkime shkencore dhe eksperimente për efiçencën, trafikun, qarkullimin e sigurinë rrugore;
gj) Marrin masa për ruajtjen dhe administrimin e mirë të pronës shtetërore në administrim dhe përgjigjen për dëmtimet e saj;
h) Ngrenë shtabet e emergjencave për periudhën dimërore (apo kur është e nevojshme), në bashkëpunim me prefekturën dhe Policinë e Shtetit, për mirëmbajtjen e akseve rrugore në administrim.
3. Përgjegjësitë dhe detyrat e drejtorit të Përgjithshëm janë:
a) Siguron drejtimin dhe administrimin efektiv të Autoritetit;
b) Siguron zbatimin e politikave të Autoritetit dhe të kërkesave të tjera ligjore për këtë Autoritet;
c) Përfaqëson Autoritetin në ministrinë përkatëse dhe në marrëdhënie me të tretë;
ç) Bashkëpunon në hartimin e politikave që synojnë përmirësimin e veprimtarisë së Autoritetit dhe vë në dijeni bordin për këto politika;
d) Emëron dhe shkarkon nëpunësit/punëmarrësit dhe personelin e nevojshëm të Autoritetit;
dh) Merr pjesë në mbledhjet e bordit pa të drejtë vote;
e) Propozon për miratim në bord rregulloret e brendshme të Autoritetit, raportet afatmesme të zhvillimit dhe raportin vjetor të punës;
ë) Drejton veprimtarinë e ARRSH-së në përputhje me këtë vendim, rregulloret dhe vendimet e miratuara nga bordi;
f) Miraton përshkrimet e punës së zyrës qendrore dhe të zyrave vendore;
g) Përfaqëson Autoritetin në marrëdhëniet juridike me të tretët, mediat;
gj) Zbaton vendimet e bordit dhe raporton para tij për veprimtarinë e vet;
h) U delegon kompetencat drejtorive rajonale të Autoritetit;
i) Mund të ngrejë komisione ose komitete “ad-hoc” për të ndihmuar në kryerjen e funksioneve të tij;
j) Këshillohet me specialistë të jashtëm për çështje që kanë të bëjnë me njohuri të veçanta;
k) Lidh marrëveshje ndërinstitucionale për shkëmbimin në mënyrë të vazhdueshme të informacionit të nevojshëm për veprimtarinë e Autoritetit me entet private dhe publike;
l) Lidh marrëveshje me institucione të huaja ose organizata joqeveritare në fushën e veprimtarisë, sipas dispozitave ligjore në fuqi;
ll) Miraton marrjen pjesë në aktivitete ndërkombëtare, sipas marrëveshjeve të miratuara;
m) Nxjerr urdhra e udhëzime të ndryshme për mbarëvajtjen e punës së Autoritetit dhe vendos sanksione, në përputhje me legjislacionin në fuqi;
n) Emëron sekretarin e bordit;
nj) Ngre struktura/njësi të brendshme;
o) Kryen detyra të tjera, që i ngarkon bordi.
4. Në Autoritetin Rrugor Shqiptar funksionon këshilli teknik, i cili jep mendime, propozime, kryesisht të karakterit teknik e rregullator, që kanë të bëjnë me strategjitë në fushën e infrastrukturës rrugore, ideimin e objekteve të reja, ecurinë e punimeve në objekte ekzistuese, cilësinë, afatin e realizimit, në objekte kryesisht të karakterit rrugor, si dhe me detyrimet e të drejtat e Autoritetit, kryesisht, në fushën e investimeve, të asistencës teknike në fushën e ndërtimeve rrugore dhe të veprave të artit, që lidhen me to.
III. Bordi Drejtues
1. Bordi Drejtues është përgjegjës për menaxhimin e veprimtarisë së autoritetit. Bordi përbëhet nga 7 anëtarë, përkatësisht:
a) 1 përfaqësues i ministrisë përgjegjëse për transportin rrugor;
b) 1 përfaqësues i ministrisë përgjegjëse për financat;
c) 1 përfaqësues i ministrisë përgjegjëse për pronën shtetërore;
ç) 1 përfaqësues i ministrisë përgjegjëse për pushtetin vendor;
d) 1 përfaqësues nga shoqata e kontraktorëve;
dh) 1 përfaqësues nga Dhoma e Tregtisë dhe Industrisë;
e) 1 përfaqësues nga Shoqata e Inxhinierëve Konsulentë.
2. Anëtarët e bordit emërohen nga Këshilli i Ministrave, me propozimin e institucioneve përkatëse, për një afat pesëvjeçar, me të drejtë rizgjedhjeje, ose për aq kohë sa anëtari është përfaqësues i organit përkatës. Kriteret dhe kushtet për t’u zgjedhur anëtar i bordit si dhe rastet e lirimit të tyre përcaktohen në ligjin për Autoritetin Rrugor Shqiptar.
3. Drejtori i Përgjithshëm ngarkon një punonjës të autoritetit, i cili miratohet nga bordi, që të kryejë funksionin e sekretarit të bordit. Detyrat e hollësishme të sekretarit të bordit përcaktohen në rregulloren e brendshme të Autoritetit.
4. Bordi ka këto kompetenca:
a) Përcakton politikat e biznesit të Autoritetit, duke u bazuar në:
– programet dhe prioritetin e qeverisë lidhur me infrastrukturën rrugore;
– detyrimet kontraktuale, që lindin nga marrëveshjet në fuqi që ARRSH-ja ka me ministrinë e linjës;
– strategjitë e hartuara nga organet drejtuese të ARRSH-së apo prioritetet e identifikuara si të tilla nga ARRSH-ja.
b) Është përgjegjës për vendimet që rregullojnë veprimtarinë e Autoritetit lidhur me:
– veprimtarinë me impakt financiar për ARRSH-në;
– propozimet për zgjerimin apo zvogëlimin e veprimtarisë së ARRSH-së;
– asetet e ARRSH-së.
c) Është përgjegjës për miratimin e rregullores së brendshme të Autoritetit dhe miraton rregulloren dhe ndryshimet përkatëse të saj, duke u bazuar në modelin e propozuar nga drejtori i Përgjithshëm, si një nga organet drejtuese të ARRSH-së.
ç) Është përgjegjës për miratimin e programeve të brendshme vjetore dhe të buxhetit korrespondues të Autoriteti, duke u bazuar në programet financiare/buxhetore të propozuara nga drejtori i Përgjithshëm, ministri i linjës apo ato të përcjella për zbatim nga Ministria e Financave dhe Ekonomisë.
5. Rregullat për mbledhjet, kuorumin dhe vendimet e bordit përcaktohen në rregulloren e brendshme të Autoritetit.
IV. Struktura dhe organika
1. Struktura e Autoritetit Rrugor Shqiptar është sipas skemës 1, që i bashkëlidhet këtij vendimi dhe është pjesë përbërëse e tij.
2. Struktura e Drejtorisë së Rajonit Qendror (Tiranë) është sipas skemës 1/1, që i bashkëlidhet këtij vendimi dhe është pjesë përbërëse e tij.
3. Struktura e Drejtorisë së Rajonit Verior (Shkodër) është sipas skemës 1/2, që i bashkëlidhet këtij vendimi dhe është pjesë përbërëse e tij.
4. Struktura e Drejtorisë së Rajonit Jugor (Gjirokastër) është sipas skemës 1/3, që i bashkëlidhet këtij vendimi dhe është pjesë përbërëse e tij.
5. Organika e Zyrës Qendrore të Autoritetit Rrugor Shqiptar është sipas skemës 2, që i bashkëlidhet këtij vendimi është pjesë përbërëse e tij.
6. Organika e Drejtorisë së Rajonit Qendror (Tiranë) është sipas skemës 2/1, që i bashkëlidhet këtij vendimi dhe është pjesë përbërëse e tij.
7. Organika e Drejtorisë së Rajonit Verior (Shkodër) është sipas skemës 2/2, që i bashkëlidhet këtij vendimi dhe është pjesë përbërëse e tij.
8. Organika e Drejtorisë së Rajonit Jugor (Gjirokastër) është sipas skemës 2/3, që i bashkëlidhet këtij vendimi dhe është pjesë përbërëse e tij.
9. Numri i punonjësve të Autoritetit Rrugor Shqiptar është, gjithsej, 169 veta.
V. Dispozita të fundit
1. Për nëpunësit civilë aktualë të Autoritetit zbatohen dispozitat e legjislacionit për nëpunësin civil në rastin e mbylljes dhe të ristrukturimit të institucionit.
2. Vendimi nr.97, datë 7.2.2012, i Këshillit të Ministrave, “Për miratimin e strukturës dhe të organikës së Autoritetit Rrugor Shqiptar”, i ndryshuar, shfuqizohet.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D IM
PËR
KRIJIMIN E REGJISTRIT QENDROR TË BAZËS TË TË DHËNAVE PËR LLOGARITJEN E TAKSËS VENDORE TË PASURISË SË PALUAJTSHME “NDËRTESË” (KADASTRA FISKALE)
Në mbështetje të nenit 100 të Kushtetutës dhe të pikës 2, të nenit 4, të ligjit nr.10325, datë 23.9.2010, “Për bazën e të dhënave shtetërore”, me propozimin e ministrit të Financave dhe Ekonomisë, Këshilli i Ministrave
V E N D O S I:
1. Regjistri Qendror i Bazës të të Dhënave për Llogaritjen e Taksës Vendore mbi Pasurinë e Paluajtshme “ndërtesë” (RQTVPP) administrohet në formë elektronike pranë Drejtorisë së Përgjithshme të Taksës së Pasurisë (DPTP).
2. DPTP-ja është institucioni përgjegjës për krijimin, mbajtjen, administrimin dhe bërjen të disponueshëm të informacionit që përmban baza e të dhënave të RQTVPP (sistemi elektronik i subjekteve kontrolluese).
Krijimi i RQTVPP-së realizohet në bashkëpunim me Agjencinë Kombëtare të Shoqërisë së Informacionit (AKSHI), në përputhje me përcaktimet e legjislacionit të fushës.
Popullimi i vazhdueshëm i të dhënave në RQTVPP, për efekt të vlerësimit të bazës së taksueshme për ndërtesat, për rrjedhojë edhe të taksës vendore të ndërtesës, bëhet nga njësitë e vetëqeverisjes vendore nën monitorimin dhe asistencën e DPTP-së, në bazë të aksesit për territorin në juridiksionin administrativ përkatës.
3. RQTVPP-ja përmban të dhëna në nivel kombëtar vetëm për qëllimin e llogaritjes së taksës së pasurisë së paluajtshme. Këto të dhëna përpunohen dhe analizohen nga DPTP-ja, që është dhënësi i vetëm i informacionit që përmban ky regjistër.
4. Të dhënat që përmban RQTVPP-ja ndahen në të dhëna parësore dhe të dhëna dytësore, si më poshtë vijon:
4.1. Të dhënat parësore janë:
a) Të dhënat nga vetëdeklarimi dhe/ose verifikimi në terren, si më poshtë vijon:
i. Çmimi për metër katror i pasurisë së paluajtshme, për efekt taksimi;
ii. Sipërfaqja e ndërtesës/njësisë pronësore, e shoqëruar sipas kateve përkatëse;
iii. Vlera e pasurisë së paluajtshme, për efekt të taksës së pasurisë;
iv. Ndarja e kategorisë së ndërtesës/njësisë pronësore, për efekt të taksës së pasurisë;
v. Nënkategorizimi në bazë të vjetërsisë së ndërtesës;
vi. Koordinatat GPS të vendndodhjes së pasurisë së paluajtshme ndërtesë/njësi pronësore;
vii. Nënkategorizimi sipas destinacionit apo destinacioneve të përdorimit të ndërtesës/njësisë pronësore;
viii. Të dhëna të tjera plotësuese nga njësitë e vetëqeverisjes vendore që shërbejnë vetëm për identifikimin e pasurisë për efekt taksimi.
b) Të dhënat nga procesi i korrigjimit;
c) Vlerësimi për detyrimin e taksës vjetore të pasurisë sipas metodologjisë;
ç) Kodi unik për identifikimin e ndërtesës/njësisë pronësore për efekt të taksës së pasurisë;
d) Ndarja zonale për përcaktimin e çmimit të vlerësuar sipas metodologjisë;
dh) Ndarja zonale për përcaktimin e shkallës së taksës sipas metodologjisë;
e) Sipërfaqja e prezumuar sipas vjetërsisë së ndërtesës;
ë) Rastet e përjashtimeve sipas dispozitave ligjore të neneve 6, 21 dhe 22, të ligjit nr.9632, datë 30.10.2006, “Për sistemin e taksave vendore”, të ndryshuar;
f) Kategorizimi i ndërtesës në proces ndërtimi sipas metodologjisë;
g) Pagesat periodike dhe progresive të taksës së ndërtesës të kryera nga taksapaguesi gjatë vitit ushtrimor, sipas të dhënave të pagesave të kryera apo rakordimeve periodike me agjentin e mbledhjes së taksës, kur është përcaktuar një i tillë;
gj) Shuma e detyrimit të mbetur/të papaguar të taksës së ndërtesës/njësisë pronësore për çdo taksapagues apo shuma për të cilën është debitor për mospagimin në kohë të taksës së ndërtesës;
h) Të dhënat për marrëveshjen e pagesës me këste, në rast të dakordësisë për të kryer pagesë me këste, për shkaqe të justifikuara të cilësuara sipas metodologjisë;
i) Apelimet e tatimpaguesve për të siguruar procesin e apelimit të digjitalizuar.
4.2. Të dhënat dytësore janë të dhënat për:
a) sipërfaqen e pasurisë së paluajtshme ndërtesë, shoqëruar sipas kateve përkatëse;
b) vjetërsinë e ndërtesës, si dhe të dhëna teknike, që shërbejnë për vlerësimin e ndërtesës;
c) vlerën e pasurisë së paluajtshme, ndërtesë/njësi pronësore;
ç) adresën e saktë të vendndodhjes së pasurisë së paluajtshme ndërtesë;
d) koordinatat GPS të vendndodhjes së pasurisë së paluajtshme ndërtesë;
dh) njësinë e vetëqeverisjes vendore, si dhe njësinë administrative në territorin e së cilës ndodhet pasuria e paluajtshme ndërtesë;
e) zona dhe nënzonën kadastrale;
ë) identifikimin e taksapaguesit, pronarët/bashkëpronarët apo përdoruesit e ndërtesës/njësisë pronësore, përcaktuar sipas më poshtë:
i. emri;
ii. mbiemri;
iii. numri personal;
iv. gjinia;
v. mosha.
f) numrin e identifikimit të personit të tatueshëm (NIPT).
4.3. RQTVPP-ja ndërvepron me baza të dhënash në administrim të institucioneve, si më poshtë vijon:
a) Regjistrin Elektronik të Pasurive të Paluajtshme në administrim të Zyrës së Regjistrimit të Pasurive të Paluajtshme;
b) Regjistrin Kombëtar të Gjendjes Civile në administrim të Drejtorisë së Përgjithshme të Gjendjes Civile;
c) Operatrorin e Shpërndarjes së Energjisë Elektrike, OSHEE, sh.a;
ç) Regjistrin Tregtar (eRegister) në administrim të Qendrës Kombëtare të Biznesit;
d) Gjeoportalin Kombëtar në administrim të Autoritetit Shtetëror për Informacionin Gjeohapësinor;
dh)Regjistrin Kombëtar për Ndihmën Ekonomike (NE) në administrim Ministrisë së Shëndetësisë dhe Mrojtjes Sociale;
e) Bazën e të dhënave për sistemin ATP-WEBGIS për trajtimin e pronave në administrim të Agjencisë së Trajtimit të Pronave;
ë) Sistemin elektronik të lejeve të ndërtimit (e-Leje) në administrim të Agjencisë së Zhvillimit të Territorit.
5. DPTP-ja orienton dhe asiston njësitë e vetëqeverisjes vendore që të dhënat e mësipërme të hidhen/të përditësohen në Regjistrin Qendror të Bazës të të Dhënave të Pasurisë së Paluajtshme, në bazë të aksesit (të drejtës së ndërhyrjes në sistemin e të dhënave) që çdo njësi ka për pjesën e territorit nën administrim, lidhur me plotësimin dhe përditësimin e tij, sipas vlerësimeve/ rivlerësimeve periodike të realizuara prej tyre. Regjistrimi i të dhënave dhe përditësimi i tyre kryhen nën mbikëqyrjen e DPTP-së.
6. Niveli i aksesimit në RQTVPP është, si më poshtë:
a) Njësitë e vetëqeverisjes vendore për hedhjen, përpunimin, korrektimin e të dhënave mbi të cilat bazohet llogaritja e bazës së taksës vendore të ndërtesës (vlera e taksueshme), si dhe e shumës së taksës për t’u paguar nga çdo taksapagues për territorin administrativ që mbulon;
b) DPTP për:
i. mbikëqyrjen dhe asistencën e procedurës së hedhjes, përpunimit dhe korrektimit të të dhënave nga njësitë e vetëqeverisjes vendore;
ii.përpunimin statistikor, analizën dhe raportimin e të dhënave mbi taksën vendore të pasurisë së paluajtshme ndërtesë;
iii. taksapaguesit, për t’u njohur me të dhënat e pasurisë së paluajtshme ndërtesë në pronësi apo përdorim, për të cilën i llogaritet taksa dhe shuma e taksës vjetore për t’u paguar, që ka paguar dhe që i mbetet për t’u paguar;
iv. institucionet dhe organet e tjera shtetërore, për aq sa u njihet nga legjislacioni shqiptar në fuqi dhe vetëm për qëllime informacioni.
7. Të dhënat e regjistrit qendror të bazës të të dhënave për llogaritjen e taksës vendore mbi pasurinë e paluajtshme pasqyrohen në hartën digjitale të pasurisë së paluajtshme për efekt taksimi, për çdo kod unik identifikues të pasurisë së paluajtshme ndërtesë.
8. Me qëllim që çdo taksapagues të jetë i njohur në kohë reale me detyrimin për taksën e pasurisë, si dhe të ketë mundësinë të kërkojë korrigjimet e mundshme, RQTVPP dhe harta dixhitale e pasurisë së paluajtshme është e hapur edhe për publikun.
9. Detyrimisht, të dhënat për ndërtesat/njësisë pronësore, të cilat janë objekt përjashtimi me ligj nga taksa vendore për ndërtesat, hidhen në RQTVPP, duke u llogaritur vlerën sipas përcaktimit në aktet ligjore dhe nënligjore në fuqi. Të dhënat për ndërtesat/njësitë pronësore në këtë rast, hidhen dhe përditësohen në regjistër nga zyrat vendore të pasurisë së paluajtshme, në bazë të të drejtës për hedhjen dhe përpunimin e të dhënave respektive për pjesën territoriale në juridiskion të secilës njësi të vetëqeverisje vendore.
10. Regjistrimi për ndërtesat/njësitë pronësore, të cilat janë të përjashtuara nga taksa mbi pasurinë e paluajtshme, përmban të njëjtin informacion si edhe regjistrimi i të dhënave për llogaritjen e taksës vendore mbi pasurinë e paluajtshme dhe është pjesë përbërëse e RQTVPP-së, me përjashtim të faktit se shënohet “Ndërtesë/njësi pronësore e përjashtuar nga taksa e pasurisë së paluajtshme”. Edhe këto ndërtesa/njësi pronësore vlerësohen, pavarësisht se nuk i nënshtrohen pagesës së taksës, duke ndjekur të njëjtën metodologji të vlerësimit të vlerës së pasurisë së paluajtshme si edhe për ndërtesat/njësitë pronësore të tjera, që janë objekt i taksës mbi pasurinë e paluajtshme.
11. Ngarkohen Ministria e Financave dhe Ekonomisë, Drejtoria e Përgjithshme e Taksës së Pasurisë, Agjencia Kombëtare e Shoqërisë së Informacionit dhe njësitë e vetëqeverisjes vendore për zbatimin e këtij vendimi.
Ky vendim hyn në fuqi pas botimit në “Fletoren zyrtare”
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
MIRATIMIN E RREGULLORES “PËR DISENJOT INDUSTRIALE”
Në mbështetje të nenit 100 të Kushtetutës dhe të pikës 5, të nenit 119, të ligjit nr.9947, datë 7.7.2008, “Për pronësinë industriale”, të ndryshuar, me propozimin e ministrit të Financave dhe Ekonomisë, Këshilli i Ministrave
V E N D O S I:
1. Miratimin e rregullores “Për disenjot industriale”, sipas tekstit që i bashkëlidhet këtij vendimi dhe është pjesë përbërëse e tij.
2. Për shqyrtimin e aplikimeve për regjistrimin e disenjove industriale, të paraqitura para hyrjes në fuqi të këtij vendimi, të zbatohen dispozitat në fuqi në çastin e aplikimit.
3. Vendimi nr.381, datë 4.8.2009, i Këshillit të Ministrave, “Për miratimin e rregullores për regjistrimin e disenjove industriale”, i ndryshuar, shfuqizohet.
4. Ngarkohet Drejtoria e Përgjithshme e Pronësisë Industriale për zbatimin e këtij vendimi.
Ky vendim hyn në fuqi 30 ditë pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
ORGANIZIMIN DHE FUNKSIONIMIN E SEKRETARIATIT TEKNIK TË KËSHILLIT EKONOMIK KOMBËTAR DHE PËRCAKTIMIN E MINISTRISË PËRGJEGJËSE PËR ZBATIMIN E DISPOZITAVE TË LIGJIT NR.57/2014, “PËR KRIJIMIN DHE FUNKSIONIMIN E KËSHILLIT EKONOMIK KOMBËTAR”, TË NDRYSHUAR
Në mbështetje të nenit 100 të Kushtetutës dhe të neneve 9, pika 1, e 9/1, të ligjit nr.57/2014, “Për krijimin dhe funksionimin e Këshillit Ekonomik Kombëtar”, të ndryshuar, me propozimin e ministrit të Shtetit për Mbrojtjen e Sipërmarrjes, Këshilli i Ministrave
V E N D O S I:
1. Sekretariati teknik i Këshillit Ekonomik Kombëtar (në vijim, sekretariati teknik) është institucion buxhetor publik në varësi të ministrit të Shtetit për Mbrojtjen e Sipërmarrjes, me seli në mjediset e Kryeministrisë.
2. Ministri përgjegjës për zbatimin e dispozitave të ligjit nr.57/2014, “Për krijimin dhe funksionimin e Këshillit Ekonomik Kombëtar”, të ndryshuar, është ministri i Shtetit për Mbrojtjen e Sipërmarrjes.
3. Sekretariati teknik u mundëson bizneseve të adresojnë shqetësimet e tyre dhe të gjejnë përkrahje në mënyrë që propozimet e tyre t’u përcillen institucioneve politikëbërëse dhe vendimmarrëse, për reduktimin e pengesave administrative me të cilat ndeshet biznesi në veprimtarinë e përditshme, të evidentuara si problematike, nëpërmjet përmirësimit të cilësisë së shërbimeve publike ndaj sipërmarrjes dhe klimës së biznesit në Shqipëri.
4. Sekretariati teknik kryen funksionet, ushtron kompetencat dhe përgjegjësitë e përcaktuara në ligjin nr.57/2014, të ndryshuar, dhe mbështet ministrin e Shtetit për Mbrojtjen e Sipërmarrjes për kryerjen e funksioneve administrative, të përcaktuara brenda fushës së tij të përgjegjësisë shtetërore, si më poshtë vijon:
a) Mundëson mbarëvajtjen dhe mirëfunksionimin e mbledhjeve të Këshillit Ekonomik Kombëtar (në vijim, KEK).
b) Përcakton rendin e ditës së mbledhjes, i cili miratohet nga zëvendëskryetari i KEK-ut, pas këshillimit me kryetarin.
c) Njofton të paktën 7 ditë më herët për takimin, kohën, vendin dhe materialet për diskutim në mbledhjet e KEK-ut.
ç) Mundëson organizimin e takimeve të KEK-ut me grupet e interesit.
d) Ndihmon dhe mbështet KEK-un në punën dhe mbarëvajtjen e takimeve.
dh) Administron faqen zyrtare të internetit të KEK-ut dhe përcakton rregullat e aksesit në këtë faqe.
e) Ka të drejtë të publikojë nisma ligjore në webpage-in e saj me propozim të grupeve të interesit kur nuk i publikon ministri përgjegjës, por që vlerësohet se janë brenda fushës së zbatimit të nenit 4, të ligjit nr.57/2014, të ndryshuar.
ë) Grumbullon dhe përpunon komentet, vërejtjet, sugjerimet, denoncimet dhe propozimet e grupeve të interesit në procesin e këshillimit publik.
f) Grumbullon vërejtjet, komentet dhe sugjerimet, të cilat i përpunon e ia transmeton organit shtetëror që ka marrë nismën për përgatitjen e një akti.
g) U dërgon ministrive përkatëse, KEK-ut dhe/ose institucioneve të tjera shtetërore informacionin e përpunuar dhe dokumentacionin shoqërues.
gj) Monitoron dhe zbaton projektet dhe nismat e KEK-ut.
h)Me kërkesë të kryetarit të KEK-ut, kryen anketime, përgatit raporte dhe studime për çështje që lidhen me fushën e veprimtarisë së Këshillit.
i)Analizon fenomenet e praktikave arbitrare apo shqetësime të tjera të identifikuara nga organizatat e biznesit e jep rekomandimet përkatëse për KEK-un dhe për institucionet e tjera.
j)Mundëson rritjen e transparencës në vendimmarrjen publike, duke garantuar përfaqësimin e paraqitjen e interesave të sektorit privat në këtë proces.
k)Mbështet ministrin përgjegjës për ndjekjen dhe trajtimin e ankesave administrative të sipërmarrjeve private, përfshirë ato të investitorëve strategjikë kundrejt institucioneve publike.
l)Mbështet ministrin përgjegjës në procedurat e ndërmjetësimit të komunikimit të sipërmarrjes me institucionet publike për zbatimin e kontratave, si dhe, nëpërmjet raporteve, ofron zgjidhje administrative paraprake të mosmarrëveshjeve midis tyre.
ll)Mbështet ministrin përgjegjës, duke asistuar në mënyrë administrative sipërmarrjen në mbrojtjen e të drejtave të tyre ligjore të lidhura me aktivitetin e tyre, kundrejt institucioneve publike.
m)Mbështet në mënyrë administrative ministrin përgjegjës për promovimin e transparencës dhe bashkëpunimin ndërinstitucional, si dhe inkurajimin e zhvillimin e partneritetit dhe komunikimit midis institucioneve publike dhe sipërmarrjeve.
n)Kryen detyra të tjera të përcaktuara nga kryetari i KEK-ut.
5. Sekretariati teknik financohet nga buxheti i shtetit dhe nga çdo burim tjetër financiar i ligjshëm.
6. Marrëdhëniet e punës së nëpunësve të sekretariatit teknik rregullohen sipas dispozitave në fuqi të Kodit të Punës të Republikës së Shqipërisë.
7. Sekretari i Përgjithshëm përfaqëson sekretariatin në marrëdhëniet me të tretët për funksionet, kompetencat dhe përgjegjësitë e përcaktuara në ligjin nr.57/2014, të ndryshuar, ndërsa drejtori ekzekutiv i sekretariatit administron të gjitha procedurat administrative që ndjek sekretariati teknik, si dhe administron mbështetjen administrative që ai ofron për ministrin përgjegjës.
8. Rregullorja për organizimin, funksionimin, detyrat dhe kompetencat e administratës së sekretariatit teknik të Këshillit Ekonomik Kombëtar miratohet nga Kryeministri.
9. Për periudhën deri në miratimin e fondeve përkatëse të buxhetit të shtetit për plotësimin me personel organik, detyrat e sekretariatit teknik do të përmbushen nga punonjës të komanduar ose të punësuar me kontratë të përkohshme.
10. Ngarkohen ministri i Shtetit për Mbrojtjen e Sipërmarrjes dhe Ministria e Financave dhe Ekonomisë për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
DISA SHTESA DHE NDRYSHIME NË VENDIMIN NR.184, DATË 29.3.2018, TË KËSHILLIT TË MINISTRAVE, “PËR HAPJEN E PROCEDURËS SË PRANIMIT NË KATEGORINË E ULËT DREJTUESE EDHE PËR KANDIDATË TË TJERË, JASHTË SHËRBIMIT CIVIL, PËR VITIN 2018”
Në mbështetje të nenit 100 të Kushtetutës dhe të pikës 4, të nenit 26, të ligjit nr.152/2013, “Për nëpunësin civil”, të ndryshuar, me propozimin e Kryeministrit, Këshilli i Ministrave
V E N D O S I:
Në vendimin nr.184, datë 29.3.2018, të Këshillit të Ministrave, bëhen shtesat dhe ndryshimet, si më poshtë vijon:
1. Në titullin e vendimit, pas fjalëve “… në kategorinë e ulët … ” shtohen fjalët “… dhe të mesme … ”.
2. Në pikën 1, pas fjalëve “… të kategorisë së ulët …” shtohen fjalët “… dhe të mesme … ”.
3. Pikat 2 e 3 ndryshohen, si më poshtë vijon:
“2. Numri maksimal i pozicioneve, për të cilat do të përdoret procedura e përcaktuar në pikën 1 të këtij vendimi është:
a) 18 pozicione, për kategorinë e mesme drejtuese;
b) 61 pozicione, për kategorinë e ulët drejtuese.
“3. Pozicionet, në të cilat mund të konkurrojnë edhe kandidatë nga jashtë shërbimit civil, për nivelin e mesëm drejtues (gjithsej 18), si dhe për nivelin e ulët drejtues (gjithsej 39), përcaktohen në lidhjen nr.1, që i bashkëlidhet këtij vendimi dhe është pjesë përbërëse e tij.”.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
TRANSFERIMIN E PRONËSISË SË 100% TË AKSIONEVE TË SHOQËRISË “KOMBINATI I SHEQERIT”, SH.A., MALIQ, NGA MINISTRIA E FINANCAVE DHE EKONOMISË TE BASHKIA MALIQ
Në mbështetje të nenit 100 të Kushtetutës, të nenit 4, të ligjit nr.7926, datë 20.4.1995, “Për transformimin e ndërmarrjeve shtetërore në shoqëri tregtare”, të ndryshuar, të neneve 3 e 4 të ligjit nr.8744, datë 22.2.2001, “Për transferimin e pronave të paluajtshme publike të shtetit në njësitë e qeverisjes vendore”, të ndryshuar, dhe të ligjit nr.9901, datë 14.4.2008, “Për tregtarët dhe shoqëritë tregtare”, të ndryshuar, me propozimin e ministrit të Financave dhe Ekonomisë, Këshilli i Ministrave
V E N D O S I:
1. Transferimin e pronësisë së 100% të aksioneve të shoqërisë “Kombinati i sheqerit”, sh. a., Maliq, nga Ministria e Financave dhe Ekonomisë te Bashkia Maliq, me të gjitha të drejtat e detyrimet, në momentin e hyrjes në fuqi të këtij vendimi.
2. Ngarkohen Ministria e Financave dhe Ekonomisë, Ministria e Brendshme dhe Bashkia Maliq për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
SENIDA MESI
***
V E N D I M
PËR
PËRCAKTIMIN E PROCEDURAVE TË KRIJIMIT TË SHOQËRISË “AIR ALBANIA”, SH.P.K.
Nё mbёshtetje tё nenit 100 tё Kushtetutës, të ligjit nr.9901, datë 14.4.2008, “Për tregtarët dhe shoqëritë tregtare”, të ndryshuar, dhe të ligjit nr.10040, datë 22.12.2008, “Kodi Ajror i Republikës së Shqipërisë”, të ndryshuar, me propozimin e ministrit të Financave dhe Ekonomisë dhe ministrit të Infrastrukturës dhe Energjisë, Këshilli i Ministrave
V E N D O S I:
1. Ky vendim përcakton procedurat për krijimin e shoqërisë së përbashkët me përgjegjësi të kufizuar “AIR ALBANIA”, e cila do të operojë në fushën e transportit ajror në përputhje me dispozitat e Kodit Ajror.
2. Shoqëria me përgjegjësi të kufizuar “AIR ALBANIA” do të krijohet ndërmjet ortakëve, “ALBCONTROL”, sh.a., që përfaqëson palën shtetërore shqiptare, dhe subjekteve të interesuara Turkish Airline e “MDN Investiment”, sh.p.k.
3. Shoqëria “ALBCONTROL”, sh.a., autorizohet të përfaqësojë pronarin shtet për negociimin dhe nënshkrimin e marrëveshjes me ortakët e tjerë të përcaktuar në pikën 2, të këtij vendimi, për krijimin e shoqërisë së përbashkët dhe përcaktimin e kuotave të ortakëve në këtë shoqëri, brenda 10 (dhjetë) ditësh nga hyrja në fuqi e këtij vendimi, bazuar në rezultatet e nxjerra nga vlerësimi i kapitalit dhe i të drejtave të ofruara nga shoqëritë gjatë këtyre negociatave. Në përputhje me legjislacionin shqiptar në fuqi pronari shtet, përfaqësuar nga “ALBCONTROL”, sh.a.-ja, së bashku me ortakun tjetër shqiptar “MDN Investiment”, sh.p.k., duhet të zotërojnë jo më pak se 51% të kuotave të shoqërisë së përbashkët “AIR ALBANIA”.
4. Marrëveshja e ortakëve për krijimin e shoqërisë së përbashkët “AIR ALBANIA” duhet të përmbajë detyrimisht kërkesat e legjislacionit në fuqi, si më poshtë vijon:
a) Përkufizime, interpretime, natyrën dhe objektin e punëve që duhet të kryhen dhe shërbimet që duhet të jepen nga partneri privat;
b) Kohëzgjatjen e marrëveshjes;
c) Pronësinë e aseteve dhe detyrimet e palëve;
ç) Qëllimin e aktivitetit të shoqërisë që do të krijohet;
d) Çështjet e kapitalit e të ndarjes së fitimeve;
dh) Çështjet e qeverisjes së shoqërisë sipas përcaktimeve të legjislacionit në fuqi;
e) Të drejtat dhe detyrimet e institucioneve përgjegjëse;
ë) Sanksionet në rast mospërmbushjeje të detyrimeve;
f) Të drejtat e institucionit përgjegjës ose të një autoriteti tjetër publik për të monitoruar punët që duhet të kryhen dhe shërbimet që duhet të jepen nga partneri privat;
g) Principet komerciale, financiare dhe ligjore;
gj) Çdo kufizim ose kusht të zbatueshëm për transferimin e të drejtave dhe të detyrimeve të partnerit privat, marrjen e vendimeve etj., sipas marrëveshjes dhe legjislacionit ndërkombëtar të aplikueshëm në Republikën e Shqipërisë;
h) Trajnimet e stafit, transferimin dhe ngritjen e kapaciteteve;
i) Çdo kufizim ose kusht për transferimin e një interesi kontrollues të partnerit privat;
j) Përkufizimin dhe pasojën e forcës madhore, ndryshimin në ligj dhe ndryshime të tjera në rrethana (duke përfshirë çdo të drejtë të palëve për të kërkuar kompensimin ose rishikimin e marrëveshjes);
k) Përgjegjësinë sociale;
l) Garancitë për t’u përmbushur dhe politikat e sigurimeve dhe të të drejtave të punonjësve që duhet të ndiqen nga shoqëria gjatë ushtrimit të aktivitetit të saj;
ll) Procedurat e rregullimit të shkeljes së bërë nga njëra prej palëve;
m) Kushtet dhe procedurat për ndryshimin dhe/ose përfundimin e marrëveshjes, të drejtat dhe detyrimet e palëve, me kalimin e afatit apo përfundimin e tij;
n) Ligjin e zbatueshëm dhe mekanizmat për zgjidhjen e mosmarrëveshjeve që mund të lindin ndërmjet institucionit përgjegjës dhe partnerit privat;
nj) Procedurat e largimit të partnerit privat nga shoqëria e përbashkët pas kalimit të një afati të caktuar ose për arsye të tjera.
5. Shoqëria “ALBCONTROL”, sh.a., paraqet për miratim tek organet e veta të shoqërisë, përkatësisht në Këshillin Mbikëqyrës dhe Asamblenë raport të detajuar për negociatat dhe për të gjitha elementet e marrëveshjes, përfshirë tekstin përfundimtar të marrëveshjes për krijimin e shoqërisë së përbashkët të sjellë në formën ligjore të kërkuar. Marrëveshja e nënshkruar hyn në fuqi pas miratimit në Këshillin e Ministrave.
6. Pas hyrjes në fuqi të marrëveshjes dhe me hartimin e akteve të tjera për krijimin e shoqërisë së përbashkët “AIR ALBANIA”, autorizohet “ALBCONTROL”, sh.a.-ja, të përfaqësojë pronarin shtet në procedurat ligjore të krijimit dhe regjistrimit si subjekt tregtar të “AIR ALBANIA”, në formën e një shoqërie me përgjegjësi të kufizuar.
7. Emërtimi i shoqërisë “AIR ALBANIA” të regjistrohet si markë pranë Drejtorisë së Përgjithshme të Pronësisë Industriale nga “ALBCONTROL”, sh.a.-ja.
8. Ngarkohen Ministria e Financave dhe Ekonomisë, Ministria e Infrastrukturës dhe Energjisë dhe “ALBCONTROL”, sh.a.-ja, për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
