Qeveria Shqiptare Keshilli i Ministrave

Vendime të miratuara në mbledhjen e Këshillit të Ministrave, datë 26 Korrik 2018:

V E N D I M

PËR

SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA REALIZIMI I PROJEKTIT “RIKONSTRUKSION I RRUGËVE “NAFTËTARI”, “KRISTAQ LACKA” DHE “QEMAL STAFA””, BASHKIA KUÇOVË

Në mbështetje të nenit 100 të Kushtetutës dhe të neneve 5, pika 1, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.109/2017, “Për buxhetin e vitit 2018”, me propozimin e ministrit të Brendshëm, Këshilli i Ministrave

V E N D O S I:

1. Shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Rikonstruksion i rrugëve “Naftëtari”, “Kristaq Lacka” dhe “Qemal Stafa””, Bashkia Kuçovë.

2. Shpronësimi të bëhet në favor të Bashkisë Kuçovë.

3. Pronarët e pasurive të paluajtshme, që shpronësohen, të kompensohen në vlerë të plotë, sipas masës përkatëse që paraqitet në tabelën bashkëlidhur këtij vendimi, për pasuritë “tokë truall”, me sipërfaqe 532,3 m2, “tokë arë”, me sipërfaqe 67 m2, dhe “ndërtesë”, me sipërfaqe 279,61 m2, me vlerë të përgjithshme 7 117 110 (shtatë milionë e njëqind e shtatëmbëdhjetë mijë e njëqind e dhjetë) lekë.

4. Vlera e përgjithshme e shpronësimit, prej 7 117 110 (shtatë milionë e njëqind e shtatëmbëdhjetë mijë e njëqind e dhjetë) lekësh, të përballohet nga të ardhurat e Bashkisë Kuçovë, planifikuar në buxhetin e saj.

5. Vlera e shpenzimeve procedurale të përballohet nga Bashkia Kuçovë.

6. Afati i përfundimit të shpronësimit të jetë tre muaj pas datës së hyrjes në fuqi të këtij vendimi.

7. Afati i përfundimit të punimeve të objektit, në Bashkinë Kuçovë, të jetë në përputhje me afatet e parashikuara nga kjo bashki.

8. Pronarët e pasurive së paluajtshme, që shpronësohen, sipas tabelës bashkëlidhur këtij vendimi, të kompensohen, për efekt shpronësimi, pasi të kenë paraqitur dokumentacionin e pronësisë pranë Bashkisë Kuçovë.

9. Zyra Vendore e Regjistrimit të Pasurive të Paluajtshme Kuçovë, brenda 30 (tridhjetë) ditëve nga data e miratimit të këtij vendimi, në bashkëpunim me Bashkinë Kuçovë, të fillojë procedurat për hedhjen e gjurmës së projektit në hartën kadastrale, sipas planimetrisë së shpronësimit të miratuar dhe të bëjë kalimin e pronësisë për pasuritë e shpronësuara në favor të shtetit.

10. Zyra Vendore e Regjistrimit të Pasurive të Paluajtshme Kuçovë të pezullojë të gjitha transaksionet me pasuritë e shpronësuara deri në momentin kur do të realizohen procesi i hedhjes së gjurmës së projektit në hartën kadastrale dhe kalimi i pronësisë për pasuritë e shpronësuara.

11. Ngarkohen Ministria e Brendshme, Zyra Vendore e Regjistrimit të Pasurive të Paluajtshme Kuçovë dhe Bashkia Kuçovë për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

KRIJIMIN E TASK-FORCËS PËR PËRMIRËSIMIN E NIVELIT TË KONTROLLIT TË MJETEVE MOTORIKE E RIMORKIOVE TË TYRE

Në mbështetje të nenit 100 të Kushtetutës dhe të nenit 88, të ligjit nr.8308, datë 18.3.1998, “Për transportet rrugore”, të ndryshuar, me propozimin e ministrit të Infrastrukturës dhe Energjisë, Këshilli i Ministrave

V E N D O S I:

1. Krijimin e Task-Forcës, si një strukturë e posaçme e përkohshme, për përmirësimin e nivelit të kontrollit rrugor të mjeteve motorike e rimorkiove të tyre, që shërbejnë për përdorimin ekonomik të tyre, për transport pasagjerësh e mallrash, si dhe kontrollin e njësive të autoriparimit, shitblerjes, depozitimit të mjeteve rrugore me motor, të rimorkiove dhe pjesëve të tyre të dala jashtë përdorimit ose të braktisura dhe veprimtaritë që lidhen me to.

2. Kjo Task-Forcë është në varësi të ministrit të Infrastrukturës dhe Energjisë dhe ka në përbërje 40 punonjës të specializuar, të cilët kontraktohen sipas dispozitave të Kodit të Punës. Drejtuesi i kësaj strukture duhet të ketë eksperiencë të mëparshme në fushën e menaxhimit dhe të realizimit të shërbimeve në transportin rrugor.

3. Struktura organizative, përshkrimi i detajuar i detyrave dhe emërimi i punonjësve miratohen me urdhër të ministrit të Infrastrukturës dhe Energjisë. Pagat e punonjësve të Task-Forcës të jenë sipas ankesit 1, që i bashkëlidhet dhe është pjesë përbërëse e këtij vendimi.

4. Task-Forca e përmendur në pikën 1, të këtij vendimi, ka këto funksione:

a) Kontrollin në terren, në përputhje me kushtet e përcaktuara në këtë vendim dhe akteve ligjore në fuqi, për zbatimin e ligjshmërisë së aktivitetit të:

i. njësive të autoriparimit, shitblerjes, depozitimit të mjeteve rrugore me motor, të rimorkiove dhe të pjesëve të tyre, të dala jashtë përdorimit dhe të braktisura, si dhe veprimtaritë që lidhen me to;
ii. ofiçinave e certifikimit të aparateve të regjistruesit të shpejtësisë dhe kohës (tahografëve);
iii. terminaleve të linjave të rregullta të transportit të udhëtarëve, si dhe në vendqëndrimet e taksive;
iv. vendeve të shoqërive të transportit rrugor të pasagjerëve dhe të mallrave;
v. vendeve të depozitimit të ngarkesave, ngarkimit dhe shkarkimit të mallrave;
vi. veprimtarive të tjera të fushës së transportit rrugor, në përgjegjësi të Ministrisë të Infrastrukturës dhe Energjisë.

b) Task-Forca për realizimin e objektit të saj ka të drejtë të kryejë kontrollin e mjeteve në vende të veçanta, të përcaktuara me udhëzim të përbashkët të ministrit përgjegjës për transportin dhe ministrin e Brendshëm.
c) Hartimin e një plani masash administrative dhe organizative për fuqizimin dhe rritjen e frytshmërisë së strukturave që ofrojnë shërbime për transportin rrugor, si dhe për evidentimin e ndalimin e përdorimit të kundërligjshëm në transportin rrugor të pasagjerëve dhe mallrave, të mjeteve që nuk plotësojnë kriteret tekniko-ligjore.
ç) Bashkërendimin e punës me strukturat e Drejtorisë së Përgjithshme të Shërbimeve të Transportit Rrugor, Policisë Rrugore, Autoritetit Rrugor Shtetëror dhe institucionet e tjera shtetërore, për identifikimin dhe zbatimin e masave në funksion të garantimit të zbatimit të kërkesave tekniko-ligjore prej operatorëve ekonomikë, që kryejnë transport pasagjerësh dhe mallrash.
d) Bashkërendimin e punës me strukturat e Drejtorisë së Përgjithshme të Shërbimeve të Transportit Rrugor dhe Policisë Rrugore për ndërhyrjet e nevojshme për zbatimin e masave teknike.
dh) Bashkërendimin e punës me strukturat e Policisë Rrugore, sipas qarqeve, për mbështetjen e veprimeve në terren të punonjësve të Task-Forcës, gjatë ndalimit të veprimtarive të kundërligjshme, që konstatohen gjatë ushtrimit të detyrës në terren.
e) Bashkëpunimin me strukturat e Policisë Rrugore për ndjekjen me përparësi të kallëzimeve të depozituara për shkeljet në këtë aktivitet prej operatorëve apo individëve të ndryshëm.
ë) Kontrollin e zbatimit të detyrave të lëna për strukturat që ofrojnë shërbime për transportin rrugor dhe institucionet e tjera të ngarkuara në përputhje me këtë vendim.
f) Evidentimin e nevojave emergjente për t’i paraprirë punës me ndryshimet e mundshme të kuadrit ligjor, nënligjor e rregullator, të cilat ndikojnë në përmirësimin e treguesve të veprimtarisë në këtë sektor.
g) Çdo detyrë tjetër të ngarkuar nga ministri i Infrastrukturës dhe Energjisë apo këshilli drejtues i DPSHTRR-së.

5. Task-Forca ndihmohet nga sekretariati teknik në detyrat administrative. Ngarkohet ministri i Infrastrukturës dhe Energjisë për ngritjen e këtij sekretariati dhe për përcaktimin e përbërjes e të mënyrës së funksionimit të tij.

6. Task-Forca raporton në mënyrë periodike pranë këshillit drejtues të DPSHTRR-së për konstatimet dhe masat e marra në mënyrë periodike. Këshilli drejtues i DPSHTRR-së ka të drejtë të kërkojë informacion dhe të kryejë kontrolle për çdo çështje të vlerësuar të rëndësishme.

7. Periudha e veprimit të Task-Forcës do të jetë deri më 31 dhjetor 2019.

8. Fondet e nevojshme për funksionimin, shpenzimet, si dhe për bazën e nevojshme materiale dhe teknike do të përballohen nga Drejtoria e Përgjithshme e Shërbimeve të Transportit Rrugor, sipas detajimit të shpenzimeve të miratuara nga ministri i Infrastrukturës dhe Energjisë.

9. Ngarkohen Ministria e Infrastrukturës dhe Energjisë, Ministria e Brendshme, Drejtoria e Përgjithshme e Policisë së Shtetit dhe Drejtoria e Përgjithshme e Shërbimeve të Transportit Rrugor për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

MBULIMIN E SHPENZIMEVE TË MJEKIMIT TË FËMIJËS TIZJANA GJERGJI

Në mbështetje të nenit 100 të Kushtetutës dhe të ligjit nr.109/2017, “Për buxhetin e vitit 2018”, me propozimin e ministrit të Shëndetësisë dhe Mbrojtjes Sociale, Këshilli i Ministrave

V E N D O S I:

1. Mbulimin e shpenzimeve të mjekimit të fëmijës Tizjana Gjergji, në masën 960 000 (nëntëqind e gjashtëdhjetë mijë) lekë.

2. Kjo shumë të përballohet nga Fondi i Sigurimit të Detyrueshëm të Kujdesit Shëndetësor.

3. Pagesa të bëhet me paraqitjen e faturave të institucionit të kurimit.

4. Ngarkohen Ministria e Shëndetësisë dhe Mbrojtjes Sociale dhe Fondi i Sigurimit të Detyrueshëm të Kujdesit Shëndetësor për zbatimin e këtij vendimi.

Ky vendim hyn në fuqi menjëherë.

K R Y E M I N I S T R I

EDI RAMA

***

V E N D I M

PËR

DISA SHTESA DHE NDRYSHIME NË VENDIMIN NR.187, DATË 8.3.2017, TË KËSHILLIT TË MINISRAVE, “PËR MIRATIMIN E STRUKTURËS DHE TË NIVELEVE TË PAGAVE TË NËPUNËSVE CIVILË/NËPUNËSVE, ZËVENDËSMINISTRIT DHE NËPUNËSVE TË KABINETEVE, NË KRYEMINISTRI, APARATET E MINISTRIVE TË LINJËS, ADMINISTRATËN E PRESIDENTIT, KUVENDIT, KOMISIONIT QENDROR TË ZGJEDHJEVE, GJYKATËN E LARTË, PROKURORINË E PËRGJITHSHME, DISA INSTITUCIONE TË PAVARURA, INSTITUCIONET NË VARËSI TË KRYEMINISTRIT, INSTITUCIONET NË VARËSI TË MINISTRAVE TË LINJËS DHE ADMINISTRATËN E PREFEKTIT”, TË NDRYSHUAR

Në mbështetje të nenit 100 të Kushtetutës, të pikës 2, të nenit 4, të ligjit nr.10405, datë 24.3.2011, “Për kompetencat për caktimin e pagave dhe të shpërblimeve”, të pikës 2, të nenit 7, të ligjit nr.152/2013, “Për nëpunësin civil”, të ndryshuar, të ligjit nr.9584, datë 17.7.2006, “Për pagat, strukturat dhe shpërblimet e institucioneve të pavarura kushtetuese dhe institucioneve të tjera të pavarura të krijuara me ligj”, të ndryshuar, dhe të ligjit nr.109/2017, “Për buxhetin e vitit 2018”, me propozimin e Kryeministrit, Këshilli i Ministrave

V E N D O S I:

1. Në vendimin nr.187, datë 8.3.2017, të Këshillit të Ministrave, të ndryshuar, të bëhen shtesat dhe ndryshimet, si më poshtë vijon:

a) Në pikën 1/1 shtohet emërtesa “Instituti i Statistikave”.
b) Në pikën 1/2:

i. shtohet emërtesa “Sekretariati teknik i Këshillit Ekonomik Kombëtar”;
ii. shfuqizohet emërtesa “Instituti i Statistikave”.
c) Në shkronjën “a”, të pikës 1/3, emërtesa “Agjencia Kombëtare e Ujësjellës-Kanalizimeve” zëvendësohet me emërtesën “Agjencia Kombëtare e Ujësjellës-Kanalizimeve dhe Infrastrukturës së Mbetjeve”.

ç) Në shkronjën “b”, të pikës 1/3 dhe kudo në vendim, emërtesa “Inspektorati Shtetëror i Mjedisit, Pyjeve dhe Ujërave” zëvendësohet me emërtesën “Inspektorati Shtetëror i Mjedisit, Pyjeve, Ujërave dhe Turizmit”.

d) Në lidhjen nr.5, që përmendet në pikën 8, emërtesa “Koordinator në Institutin e Statistikave (INSTAT)” shfuqizohet.

dh) Lidhja nr.5/1, që përmendet në pikën 8/1, zëvendësohet me lidhjen me të njëjtin numër dhe titull që i bashkëlidhet këtij vendimi dhe është pjesë përbërëse e tij.

e) Pas pikës 8/8 shtohet pika 8/9, me këtë përmbajtje:

“8/9. Kategoritë e pagave të pozicioneve të punës së nëpunësve për emërtesat “Specialist” deri në “Drejtor ekzekutiv”, në sekretariatin teknik të Këshillit Ekonomik Kombëtar”, janë sipas lidhjes nr.5/9, që i bashkëlidhet këtij vendimi dhe është pjesë përbërëse e tij.”.

ë) Në lidhjen nr.6/3, që përmendet në pikën 9/3, në kolonën “Pozicioni”, pas emërtesës “Drejtor drejtorie” shtohet emërtesa “Koordinator – kategoria III-a”.

f) Pika 9/6 ndryshohet, si më poshtë vijon:

“9/6. Kategoritë e pagave të pozicioneve të punës së nëpunësve për emërtesat “Specialist” deri në “Titullar institucioni” (punonjësit civilë) në Shtabin e Përgjithshëm të Forcave të Armatosura, Komandën dhe Shtabin e Komandës së Doktrinës dhe Stërvitjes, si dhe Qendrën Kombëtare të Kërkim Shpëtimit, janë sipas lidhjes 6/6, që i bashkëlidhet këtij vendimi dhe është pjesë përbërëse e tij.”.

g) Titulli i lidhjes 6/6, që përmendet në pikën 9/6, ndryshohet, si më poshtë vijon:

“Kategoritë e pagave të pozicioneve të punës së nëpunësve për emërtesat “Specialist” deri në “Titullar institucioni” (punonjësit civilë) në Shtabin e Përgjithshëm të Forcave të Armatosura, Komandën dhe Shtabin e Komandës së Doktrinës dhe Stërvitjes, si dhe Qendrën Kombëtare të Kërkim Shpëtimit”.

gj) Pika 10/4 ndryshohet, si më poshtë vijon:

“10/4. Kategoritë e pagave të pozicioneve të punës së nëpunësve për emërtesat “Specialist” deri në “Titullar institucioni” (punonjës civilë) në Komandën dhe Shtabin e Forcës Tokësore, Komandën dhe Shtabin Forcës Detare, Komandën dhe Shtabin e Forcës Ajrore, Komandën dhe Shtabin e Komandës Mbështetëse, Institutin e Gjeografisë dhe Infrastrukturës Ushtarake, Arkivin Qendror të Forcave të Armatosura, Qendrën e Personel Rekrutimit, Agjencinë e Sistemeve të Ndërlidhjes dhe Informacionit, Qendrën e Doktrinës dhe Kërkimit në Komandën e Doktrinës dhe Stërvitjes, Qendrën e Stërvitjes Individuale në Komandën e Doktrinës dhe Stërvitjes, Qendrën e Riparimit dhe Mirëmbajtjes së Teknikës së Forcave të Armatosura në Komandën Mbështetëse, si dhe për punonjësit civilë jomësimorë në Akademinë e Forcave të Armatosura, Akademinë e Nënoficerëve dhe Shkollën e Trupës, janë sipas lidhjes nr.7/4, që i bashkëlidhet këtij vendimi dhe është pjesë përbërëse e tij.”.

h) Titulli i lidhjes 7/4, që përmendet në pikën 10/4, ndryshohet, si më poshtë vijon:

“Kategoritë e pagave të pozicioneve të punës së nëpunësve për emërtesat “Specialist” deri në “Titullar institucioni” (punonjës civilë) në Komandën dhe Shtabin e Forcës Tokësore, Komandën dhe Shtabin Forcës Detare, Komandën dhe Shtabin e Forcës Ajrore, Komandën dhe Shtabin e Komandës Mbështetëse, Institutin e Gjeografisë dhe Infrastrukturës Ushtarake, Arkivin Qendror të Forcave të Armatosura, Qendrën e Personel Rekrutimit, Agjencinë e Sistemeve të Ndërlidhjes dhe Informacionit, Qendrën e Doktrinës dhe Kërkimit në Komandën e Doktrinës dhe Stërvitjes, Qendrën e Stërvitjes Individuale në Komandën e Doktrinës dhe Stërvitjes, Qendrën e Riparimit dhe Mirëmbajtjes së Teknikës së Forcave të Armatosura në Komandën Mbështetëse, si dhe për punonjësit civilë jomësimorë në Akademinë e Forcave të Armatosura, Akademinë e Nënoficerëve dhe Shkollën e Trupës”.

2. Përjashtimit për vitin 2018, nëpunësit aktualë të njësive të teknologjisë së informacionit të institucioneve të administratës shtetërore, që do të transferohen në përbërje të strukturës dhe të organikës së AKSHI-t gjatë këtij viti, do të vazhdojnë të përfitojnë të njëjtën pagë mujore me atë që përfitonin përpara transferimit pranë AKSHI-t.

3. Për vitin 2019 e në vazhdim, nëpunësit aktualë të njësive të teknologjisë së informacionit të institucioneve të administratës shtetërore, të cilët deri në momentin e transferimit në përbërje të strukturës dhe të organikës së AKSHI-t përfitonin një pagë më të lartë se paga sipas lidhjes 5/1 (përfshirë edhe nëpunësit e transferuar gjatë periudhës qershor-dhjetor 2018), do të vazhdojnë të përfitojnë të njëjtën pagë mujore me atë që përfitonin përpara transferimit pranë AKSHI-t, deri në momentin e ndërprerjes së marrëdhënies juridiko-financiare me këtë institucion.

4. Efektet financiare që rrjedhin nga zbatimi i këtij vendimi të përballohen nga fondet e miratuara për secilin institucion për vitin 2018:

a) për INSTAT-in, Inspektoratin Shtetëror të Mjedisit, Pyjeve, Ujërave dhe Turizmit dhe Agjencinë Kombëtare të Ujësjellës-Kanalizimeve dhe Infrastrukturën e Mbetjeve, të fillojnë nga momenti i transferimit të nëpunësve në pozicionet e reja pas miratimit të strukturave dhe organikave përkatëse; dhe
b) për sekretariatin teknik e Këshillit Ekonomik Kombëtar si dhe për përcaktimet në shkronjat “dh”, “e”, “ë”, “f”, “g” dhe “h”, të pikës 1, të këtij vendimi, të fillojnë pas hyrjes në fuqi të vendimit.

5. Ngarkohen institucionet e administratës shtetërore ku janë të punësuar nëpunësit/punonjësit që do të transferohen gjatë vitit 2018 tek AKSHI-i ta njoftojnë këtë të fundit për kategorinë e pagës dhe pagesën aktuale të këtyre nëpunësve/punonjësve.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA REALIZIMI I PROJEKTEVE “RIKONSTRUKSION I RRUGËS VOSKOPOJË – SHËN PRODHOM” DHE “PARKU JAPONEZ DHE KOPSHTET E KOMUNITETIT”, BASHKIA KORÇË

V E N D O S I:

1. Shpronësimin, për interes publik, të pronarëve të pasurive të paluajtshme, pronë private, që preken nga realizimi i projekteve “Rikonstruksion i rrugës Voskopojë – Shën Prodhom” dhe “Parku japonez dhe kopshtet e komunitetit”, në Bashkinë e Korçës.

2. Shpronësimi të bëhet në favor të Bashkisë Korçë.

3. Pronarët e pasurive të paluajtshme, që shpronësohen, të kompensohen në vlerë të plotë, sipas masës përkatëse që paraqitet në tabelën bashkëlidhur këtij vendimi, për pasuritë “tokë arë” dhe “tokë truall”, me një vlerë të përgjithshme prej 1 831 945 (një milion e tetëqind e tridhjetë e një mijë e nëntëqind e dyzet e pesë) lekësh.

4. Vlera e përgjithshme e shpronësimit, prej 1 831 945 (një milion e tetëqind e tridhjetë e një mijë e nëntëqind e dyzet e pesë) lekësh, të përballohet nga të ardhurat e Bashkisë Korçë, planifikuar në buxhetin e saj.

5. Vlera e shpenzimeve procedurale të përballohet nga Bashkia Korçë.

6. Afati i përfundimit të shpronësimit të jetë tre muaj pas datës së hyrjes në fuqi të këtij vendimi.

7. Afati i përfundimit të punimeve të objektit, në Bashkinë Korçë, të jetë në përputhje me afatet e parashikuara nga kjo bashki.

9. Zyra Vendore e Regjistrimit të Pasurive të Paluajtshme Korçë, brenda 30 ditëve nga data e miratimit të këtij vendimi, në bashkëpunim me Bashkinë Korçë, të fillojë procedurat për hedhjen e gjurmës së projektit në hartën kadastrale, sipas planimetrisë së shpronësimit të miratuar, dhe të bëjë kalimin e pronësisë për pasuritë e shpronësuara në favor të shtetit.

10. Zyra Vendore e Regjistrimit të Pasurive të Paluajtshme Korçë të pezullojë të gjitha transaksionet me pasuritë e shpronësuara, deri në momentin kur do të realizohen procesi i hedhjes së gjurmës së projektit në hartën kadastrale dhe kalimi i pronësisë për pasuritë e shpronësuara.

11. Ngarkohen Ministria e Brendshme, Zyra Vendore e Regjistrimit të Pasurive të Paluajtshme Korçë dhe Bashkia Korçë për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

KRIJIMIN, ORGANIZIMIN DHE FUNKSIONIMIN E QENDRAVE KULTURORE PËR DIASPORËN

Në mbështetje të nenit 100 të Kushtetutës, të pikave 5 e 6, të nenit 6, të ligjit nr.16/2018, “Për diasporën”, të ligjit nr.90/2012, “Për organizimin dhe funksionimin e administratës shtetërore”, dhe të vendimit nr.58, datë 31.1.2018, të Këshillit të Ministrave, “Për miratimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës së Kosovës, për qendrat kulturore në diasporë”, me propozimin e ministrit të Shtetit për Diasporën, Këshilli i Ministrave

V E N D O S I:

1. Krijimin e qendrave kulturore për diasporën (në vijim QKD), si persona juridikë, publikë, në varësi të kreut të misionit diplomatik të akredituar në vendin pritës.

2. QKD-të e ushtrojnë veprimtarinë e tyre në përputhje me ligjin nr.16/2018, “Për diasporën”, dhe i raportojnë, mbikëqyren e koordinohen nga Agjencia Kombëtare për Diasporën (AKD).

3. QKD-të kanë si mision ruajtjen, kultivimin e identitetit kombëtar, gjuhësor, kulturor e arsimor të diasporës dhe forcimin e lidhjeve të saj me institucionet e Republikës së Shqipërisë.

4. QKD-të kryejnë këto funksione administrative:

a) Promovojnë Shqipërinë në ruajtjen, kultivimin e identitetit kombëtar, gjuhësor, kulturor e arsimor të diasporës dhe forcimin e lidhjeve të saj me institucionet e Republikës së Shqipërisë;
b) Nxisin dhe zhvillojnë njohuri për gjuhën, kulturën dhe trashëgiminë kulturore të Shqipërisë;
c) Nxisin bashkëpunimin shkencor, teknik, teknologjik, sportiv e ekonomik, artistik dhe kulturor, ndërmjet Shqipërisë dhe diasporës;
ç) Mbështesin dhe organizojnë rininë dhe grupmoshat e ndryshme të diasporës me aktivitete kulturore, edukative, sportive etj;
d) Bashkëpunojnë me institucione të tjera për të zhvilluar aktivitetin e tyre brenda dhe jashtë vendit;
dh) Kryejnë detyra të tjera të parashikuara nga legjislacioni në fuqi.

5. QKD-të e ushtrojnë veprimtarinë në vendet me interes për diasporën me qëllim mbartjen e trashëgimisë kulturore, të identitetit etj. dhe hapen me marrëveshje dypalëshe me shtetet e këtyre vendeve.

6. Struktura dhe organika e QKD-së miratohen me urdhër të Kryeministrit, me propozim të ministrit përgjegjës për diasporën.

7. QKD-të financohen nga buxheti i miratuar për përfaqësinë diplomatike.

8. Misionet diplomatike ku do të ushtrojnë aktivitetin e tyre QKD-të, funksionet që do të kryejnë, raportet me kreun e misionit si edhe çështje të tjera të veprimtarisë së tyre rregullohen me udhëzim të përbashkët të ministrit përgjegjës për punët e jashtme dhe të ministrit përgjegjës për diasporën.

9. Rregullorja për metodat e brendshme të punës dhe për sjelljen e personelit të QKD-së miratohet me urdhër të kreut të misionit diplomatik, në përputhje me udhëzimin e përbashkët të ministrit përgjegjës për punët e jashtme dhe të ministrit përgjegjës për diasporën.

10. QKD-ja drejtohet nga titullari, i cili administron dhe drejton veprimtarinë e përditshme të saj dhe e përfaqëson atë në marrëdhëniet me të tretët. Për veprimtarinë e tij administrative ai përgjigjet para kreut të misionit diplomatik dhe ministrit përgjegjës për diasporën. Për çështjet që kërkojnë vendimmarrje politike, titullari i QKD-së duhet të marrë mendimin e kreut të misionit.

11. Titullari i QKD-së emërohet dhe lirohet me urdhër të ministrit përgjegjës për punët e jashtme, me propozimin e ministrit përgjegjës për diasporën, në përputhje me pikën 2, të nenit 31, të ligjit nr.23/2015, “Për shërbimin e jashtëm të Republikës së Shqipërisë”.

12. Titullari ushtron të gjitha kompetencat për drejtimin e veprimtarisë së institucionit në përputhje me legjislacionin në fuqi dhe me funksionet e objektivat e QKD-së, si më poshtë:

a) Drejton dhe përfaqëson QKD-në;
b) I raporton kreut të misionit diplomatik, ministrit përgjegjës për diasporën dhe drejtorit Ekzekutiv të AKD-së;
c) Bashkërendon punën ndërmjet strukturave të qendrës dhe cakton detyra dhe objektiva përkatës për t’u realizuar nga këto struktura;
ç) Propozon programin vjetor të veprimtarive të QKD-së, të cilin ia paraqet për miratim kreut të misionit diplomatik dhe për dijeni ministrit përgjegjës për diasporën e drejtorit Ekzekutiv të AKD-së;
d) Kontrollon mbarëvajtjen e aktivitetit të QKD-ve, me qëllim arritjen e objektivave të përcaktuar dhe realizimin sa më të plotë të funksioneve të saj, si dhe merr masat e nevojshme për koordinimin sa më mirë të punës ndërmjet strukturave të QKD-së;
dh) Informon rregullisht dhe përgjigjet te kreu i misionit diplomatik, ministri përgjegjës për diasporën dhe drejtori Ekzekutiv i AKD-së për mbarëvajtjen e aktivitetit të QKD-së dhe për realizimin e funksioneve të saj.

13. Titullarët e QKD-ve, të emëruar në misionet diplomatike, pajisen me pasaportë diplomatike dhe gëzojnë të njëjtin status me diplomatët gjatë periudhës që janë të emëruar në këto misione. Ata marrin gradë diplomatike, në varësi të strukturës së misionit diplomatik, dhe trajtohen financiarisht me pagën, shtesat mbi pagë dhe kompensimin për koston e jetesës sipas gradës së emërimit në misionin diplomatik në vendin ku shërbejnë.

14. Anëtarët e familjes së titullarëve pajisen me pasaporta diplomatike dhe gëzojnë të njëjtin trajtim me familjet e anëtarëve të diplomatëve, sipas ligjit nr.23/2015, “Për shërbimin e jashtëm, të Republikës së Shqipërisë”, dhe të akteve nënligjore në fuqi.

15. Nëpunësit e QKD-ve do të punojnë me kohë të plotë, por nuk do të jenë të akredituar në shtetin pritës. Ata emërohen nga ministri përgjegjës për diasporën, me propozim të kreut të misionit diplomatik.

16. Vulat e QKD-ve kanë formën dhe elementet sipas përcaktimit të vendimit nr.390, datë 6.8.1993, të Këshillit të Ministrave, “Për rregullat e prodhimit, administrimit, kontrollit dhe ruajtjes së vulave zyrtare”.

17. Stema e QKD-ve përbëhet nga stema e Republikës së Shqipërisë, me shënimet “Republika e Shqipërisë”, “Ambasada përkatëse”, “Ministri për Evropën dhe Punët e Jashtme”, si dhe “Qendra Kulturore për Diasporën”, në përputhje me vendimin nr.474, datë 10.7.2003, të Këshillit të Ministrave, “Për mënyrën e përdorimit të stemës së republikës dhe raportin e përmasave të saj”, të ndryshuar.

18. Ngarkohen ministri për Evropën dhe Punët e Jashtme, ministri i Shtetit për Diasporën, Agjencia Kombëtare për Diasporën dhe Qendrat Kulturore për Diasporën për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

KRIJIMIN, ORGANIZIMIN DHE FUNKSIONIMIN E QENDRËS SË BOTIMEVE PËR DIASPORËN

Në mbështetje të nenit 100 të Kushtetutës dhe të pikës 2, të nenit 23, të ligjit nr.16/2018, “Për diasporën”, me propozimin e ministrit të Shtetit për Diasporën, Këshilli i Ministrave

V E N D O S I:

1. Krijimin e Qendrës së Botimeve për Diasporën (në vijim, QBD), si person juridik publik buxhetor, me seli në Tiranë, në varësi të ministrit përgjegjës për diasporën.

2. QBD-ja është përgjegjëse për:

a) botimin, në përputhje me ligjin nr.9616, datë 27.9.2006, “Për librin në Republikën e Shqipërisë”, të ndryshuar, dhe me ligjin nr.35/2016, “Për të drejtën e autorit dhe të drejtat e tjera të lidhura me to”, të teksteve që do t’i shërbejnë diasporës;
b) redaktimin përfundimtar të teksteve që do të botohen;
c) nxitjen e aksesit on-line të teksteve të veçanta për diasporën;
ç) nxitjen e krijimit të formateve të posaçme për e-book;
d) bashkërendimin e punës me operatorin ekonomik, i cili bën shpërndarjen e teksteve;
dh) koordinimin me institucionet përgjegjëse të Republikës së Kosovës për botimet për diasporën.

3. Shtypja e teksteve të përcaktuara në pikën 2 të këtij vendimi realizohet nga vetë QBD-ja dhe shpenzimet përballohen nga buxheti i shtetit.

4. QBD-ja të përdorë programet e teksteve mësimore të miratuara nga ministria përgjegjëse për arsimin dhe botime të tjera me miratimin e ministrit përgjegjës për diasporën.

5. QDB-ja, me kërkesë të ministrit përgjegjës për arsimin dhe pas miratimit të ministrit përgjegjës për diasporën, boton edhe tekste të tjera nga ato të përmendura në pikën 2 të këtij vendimi.

6. QBD-ja drejtohet dhe përfaqësohet nga drejtori, i cili organizon dhe drejton të gjithë veprimtarinë e qendrës dhe përgjigjet para ministrit përgjegjës për diasporën. Ai emërohet, lirohet ose shkarkohet me urdhër të ministrit përgjegjës për diasporën.

7. Nëpunësit dhe punonjësit e administratës së QBD-së emërohen e lirohen nga drejtori i QBD-së. Marrëdhënia e punës për drejtorin dhe punonjësit e QBD-së rregullohet me Kodin e Punës.

8. Pranë QBD-së funksionon Këshilli Koordinues i Botimeve për Diasporën, si organ këshillimor e vendimmarrës për çështjet e botimeve për diasporën.

9. Këshilli Koordinues i Botimeve për Diasporën është organ kolegjial, i përbërë nga pesë anëtarë, i cili ka përfaqësues nga:

– ministria përgjegjëse për punët e jashtme;
– ministria përgjegjëse për arsimin;
– ministria përgjegjëse për diasporën.
– Akademia e Shkencave e Shqipërisë;
– Biblioteka Kombëtare e Shqipërisë.

10. Këshilli Koordinues i Botimeve për Diasporën ka këto kompetenca:

a) Mbledh dhe shqyrton kërkesat vjetore për botime për diasporën dhe shqyrton kërkesat e herëpashershme, të cilat mund të mos jenë parashikuar në kërkesat vjetore;
b) Miraton programet e botimeve të QBD-së, në përputhje me dokumentet strategjike për marrëdhëniet me diasporën;
c) Planifikon shpërndarjen e teksteve të botuara nga qendra;
ç) Merr vendime për çështje të tjera, në përputhje me detyrimet e legjislacionit në fuqi;
d) I propozon ministrit përgjegjës për diasporën botimin e teksteve të tjera;
dh) I propozon ministrit përgjegjës për diasporën çmimet e shitjeve të teksteve, të cilat vendosen duke respektuar dispozitat e ligjit nr.9616, datë 27.9.2006, të ndryshuar, dhe kategoritë që përfitojnë falas kopje të teksteve të botuara nga QBD-ja, të cilat miratohen me vendim të Këshillit të Ministrave.

Ky këshill ka dhe kompetenca të tjera, në përputhje me ligjin, të ngarkuara nga ministri përgjegjës për diasporën ose drejtori i qendrës.

11. Mandati i anëtarëve të Këshillit Koordinues të Botimeve për Diasporën është 4 vjet, me të drejtë rizgjedhjeje.

12. Anëtarët e Këshillit Koordinues të Botimeve për Diasporën duhet të jenë drejtues të nivelit të lartë të institucioneve të përfaqësuara, të cilët emërohen dhe shkarkohen me urdhër të ministrit përgjegjës për diasporën, me propozim të titullarit të institucionit përkatës. Ministri përgjegjës për diasporën cakton njërin nga anëtarët si kryetar të këtij këshilli.

13. Kryetari dhe anëtari i Këshillit Koordinues të Botimeve për Diasporën shkarkohen para mbarimit të mandatit 4-vjeçar, kur:

a) lirohet ose shkarkohet nga funksioni drejtues që ushtronte në institucionin që përfaqëson;
b) me propozim të titullarit të institucionit të përfaqësuar, për shkak të ndryshimit të misionit e të detyrave që ai kryen në atë institucion;
c) neglizhon kryerjen e detyrave dhe pjesëmarrjen e rregullt në mbledhjet e Këshillit Koordinues të Botimeve për Diasporën.

14. Ministri përgjegjës për diasporën, 30 (tridhjetë) ditë para mbarimit të mandatit 4-vjeçar ose menjëherë pas shkarkimit të anëtarit, i kërkon institucionit të përfaqësuar në Këshillin Koordinues të Botimeve për Diasporën paraqitjen e emrit të kandidatit për anëtar të këtij këshilli.

15. Shpërblimi i kryetarit dhe i anëtarëve të Këshillit Koordinues të Botimeve të Diasporës përcaktohen me vendim të Këshillit të Ministrave.

16. Struktura dhe organika e QBD-së miratohen me urdhër të Kryeministrit, sipas përcaktimeve në legjislacionin në fuqi për organizimin dhe funksionimin e administratës shtetërore.

17. Rregullorja për metodat e brendshme të punës dhe për sjelljen e personelit të QBD-së miratohen nga ministri përgjegjës për diasporën pas propozimit të drejtorit të saj.

18. QBD-ja është institucion buxhetor që financohet nga buxheti i shtetit.

19. Çmimet e shitjes së teksteve të botuara nga QBD-ja dhe kategoritë që mund t’i përfitojnë falas ato përcaktohen me vendim Këshillit të Ministrave, me bashkëpropozim të ministrit përgjegjës për diasporën dhe të ministrit përgjegjës për financën.

20. QBD-ja ka stemën dhe logon e vet zyrtare. Stema përbëhet nga stema e Republikës së Shqipërisë me shënimet “Republika e Shqipërisë”, “Ministri i Shtetit për Diasporën”, “Qendra e Botimeve për Diasporën”, në përputhje me përcaktimet e vendimit të Këshillit të Ministrave për mënyrën e përdorimit të stemës së Republikës së Shqipërisë. Logoja e QBD-së të vendoset në çdo botim, në përputhje me nenin 26, të ligjit 16/2018, “Për diasporën”.

21. Vula e QBD-së ka formën dhe elementet sipas përcaktimit të vendimit të Këshillit të Ministrave për rregullat e prodhimit, administrimit, kontrollit dhe ruajtjes së vulave zyrtare. Vula prodhohet, administrohet dhe ruhet në përputhje me legjislacionin në fuqi.

22. Shtëpia Botuese e Teksteve Mësimore (BOTEM), me hyrjen në fuqi të këtij vendimi, ristrukturohet në Qendra e Botimeve për Diasporën (QBD). Për punonjësit administrativë zbatohen dispozitat e Kodit të Punës.

23. Vendimi nr.843, datë 2.11.2012, i Këshillit të Ministrave, “Për krijimin e Shtëpisë Botuese të Teksteve Mësimore (BOTEM)”, i ndryshuar, shfuqizohet.

24. Ngarkohen ministri i Shtetit për Diasporën, ministri i Arsimit, Sportit dhe Rinisë, ministri për Evropën dhe Punët e Jashtme, Biblioteka Kombëtare e Shqipërisë, Akademia e Shkencave e Shqipërisë dhe Qendra e Botimeve për Diasporën për ndjekjen dhe zbatimin e këtij vendimi.

Ky vendim botohet në “Fletoren zyrtare” dhe hyn në fuqi më 1 janar 2019.

K R Y E M I N I S T R I

EDI RAMA

***

V E N D I M

PËR

MIRATIMIN E PROJEKTDOKUMENTIT TË PROGRAMIT BUXHETOR AFATMESËM 2019 –2021

Në mbështetje të nenit 100 të Kushtetutës dhe të nenit 25, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, me propozimin e ministrit të Financave dhe Ekonomisë, Këshilli i Ministrave

V E N D O S I:

Miratimin e projektdokumentit të programit buxhetor afatmesëm për periudhën 2019-2021, sipas dokumentit që i bashkëlidhet këtij vendimi dhe është pjesë përbërëse e tij.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

DISA NDRYSHIME DHE SHTESA NË VENDIMIN NR.319, DATË 15.4.2015, TË KËSHILLIT TË MINISTRAVE, “PËR MIRATIMIN E STRATEGJISË NDËRSEKTORIALE PËR REFORMËN NË ADMINISTRATËN PUBLIKE 2015-2020”

Në mbështetje të pikës 1, të nenit 100, të Kushtetutës, me propozimin e Kryeministrit, Këshilli i Ministrave

V E N D O S I:

Në vendimin nr.319, datë 15.4.2015, të Këshillit të Ministrave, bëhen këto ndryshime dhe shtesa:

1. Në pikën 2, emërtimi “ministri i Shtetit për Inovacionin dhe Administratën Publike” zëvendësohet me “Zëvendëskryeministri”.

2. Në dokumentin bashkëlidhur vendimit bëhen ndryshimet, si më poshtë vijon:

a) Pas ndarjes “Financimi i strategjisë” shtohet ndarja “Vlerësimi i ri i kostos për planin e ri të aktiviteteve të strategjisë për periudhën 2018-2020”, me përmbajtje sipas tekstit që i bashkëlidhet këtij vendimi.

b) Pas lidhjes nr.1 shtohet lidhja nr.1/1, “Plani i aktiviteteve dhe treguesit për periudhën 2018-2020”, që i bashkëlidhet këtij vendimi dhe është pjesë përbërëse e tij.

c) Pas lidhjes nr.2 shtohet lidhja nr.2/1, “Vlerësimi i detajuar i kostos për zbatimin e Strategjisë Ndërsektoriale për Reformën në Administratën Publike për planin e veprimit për periudhën 2018-2020”, që i bashkëlidhet këtij vendimi dhe është pjesë përbërëse e tij.

ç) Kudo në dokument:

– emërtimi “Agjencia Shqiptare për Ofrimin e Integruar të Shërbimeve” zëvendësohet me “Agjencia e Ofrimit të Shërbimeve Publike të Integruara”;
– shkurtesa “DPZHNH” zëvendësohet me “DZHM” dhe emërtimi “Departamenti i Programimit, Zhvillimit dhe Ndihmës së Huaj” zëvendësohet me “Departamenti i Zhvillimit dhe Mirëqeverisjes”;
– shkurtesa “MF” zëvendësohet me “MFE” dhe emërtimi “Ministria e Financave” zëvendësohet me “Ministria e Financave dhe Ekonomisë”;
– shkurtesa “MIAP”, emërtimi “Ministër/ri i Shtetit për Inovacionin dhe Administratën Publike” dhe fjalët “ministri përgjegjës për administratën publike dhe inovacionin” zëvendësohen me emërtimin “Zëvendëskryeministri”;
– shkurtesa “MSHÇV” zëvendësohet me fjalët “ministri përgjegjës për çështjet vendore”;
– shkurtesat “QKL” dhe “QKR” zëvendësohen me shkurtesën “QKB” dhe emërtimet “Qendra Kombëtare e Licencimit” dhe “Qendra Kombëtare e Regjistrimit” zëvendësohen me emërtimin “Qendra Kombëtare e Biznesit”.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA PROJEKTI “RRUGËT ZËVENDËSUESE M03 PËR NDËRTIMIN E HIDROCENTRALIT TË MOGLICËS”

Në mbështetje të nenit 100 të Kushtetutës, të neneve 5, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, dhe të ligjit nr.109/2017, “Për buxhetin e vitit 2018”, me propozimin e ministrit të Infrastrukturës dhe Energjisë, Këshilli i Ministrave

V E N D O S I:

1. Shpronësimin, për interes publik, të pronarëve të pasurive të paluajtshme, pronë private, që preken nga projekti “Rrugët zëvendësuese M03 për ndërtimin e hidrocentralit të Moglicës”.

2. Shpronësimi të bëhet në favor të Autoritetit Rrugor Shqiptar.

3. Pronarët e pasurive të paluajtshme, që shpronësohen, të kompensohen në vlerë të plotë, sipas masës së kompensimit përkatës, që paraqitet në tabelën që i bashkëlidhet këtij vendimi, për pasuritë “arë”, “kultura bujqësore dhe drufrutorë”, “objekte” dhe “truall”, prej 4 780 005.5 (katër milionë e shtatëqind e tetëdhjetë mijë e pesë pikë pesë) lekësh.

4. Vlera e përgjithshme e shpronësimit për pasuritë “tokë arë”, “kultura bujqësore dhe drufrutorë”, “objekte” dhe “truall”, prej 4 780 005.5 (katër milionë e shtatëqind e tetëdhjetë mijë e pesë pikë pesë) lekësh, të përballohet nga fondi i shoqërisë “Devoll Hydropower”, sh.a.

5. Shpenzimet procedurale, në vlerën 50 000 (pesëdhjetë mijë) lekë, do të përballohen nga fondi i shoqërisë “Devoll Hydropower”, sh.a.

6. Shpronësimi të fillojë menjëherë pas botimit të këtij vendimi në “Fletoren zyrtare”.

7. Pronarët e pasurive të përmendur në listën, që i bashkëlidhet këtij vendimi, për të cilat është bërë shënimi “Konfirmim ZVRPP”, “Vërtetim hipotekar”, “Certifikatë pronësie”, të likuidohen për efekt shpronësimi, në bazë të dokumentacionit të plotë të pronësisë, që do të dorëzojnë pranë Autoritetit Rrugor Shqiptar.

8. Shoqëria “Devoll Hydropower”, sh.a., të kryejë likuidimet, për efekt shpronësimi, në bazë të pikave 4, 5, 6 e 7 të këtij vendimi.

9. Brenda 30 (tridhjetë) ditëve nga data e miratimit të këtij vendimi, Zyra Qendrore e Regjistrimit të Pasurive të Paluajtshme dhe Zyra Vendore e Regjistrimit të Pasurive të Paluajtshme Korçë, në bashkëpunim me Autoritetin Rrugor Shqiptar, të fillojnë procedurat për hedhjen e trupit të rrugës mbi hartat kadastrale, sipas planimetrisë së shpronësimit, që do t’u vihet në dispozicion nga Autoriteti Rrugor Shqiptar dhe, me fillimin e procesit të likuidimit, të fillojë edhe procesi i kalimit të pronësisë për pasuritë e shpronësuara në favor të shtetit.

10. Zyra Qendrore e Regjistrimit të Pasurive të Paluajtshme dhe Zyra Vendore e Regjistrimit të Pasurive të Paluajtshme Korçë të pezullojnë të gjitha transaksionet me pasuritë e shpronësuara deri në momentin do të realizohet procesi i hedhjes së trupit të rrugës mbi hartat kadastrale dhe të bëjnë kalimin e pronësisë për pasuritë e shpronësuara në favor të shtetit.

11. Ngarkohen Ministria e Infrastrukturës dhe Energjisë, Ministria e Financave dhe Ekonomisë, Autoriteti Rrugor Shqiptar, shoqëria “Devoll Hydropower”, sh.a., Zyra Qendrore e Regjistrimit të Pasurive të Paluajtshme dhe Zyra Vendore e Regjistrimit të Pasurive të Paluajtshme Korçë për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

DISA NDRYSHIME DHE SHTESA NË VENDIMIN NR.673, DATË 22.11.2017, TË KËSHILLIT TË MINISTRAVE, “PËR RIORGANIZIMIN E AGJENCISË KOMBËTARE TË SHOQËRISË SË INFORMACIONIT”, TË NDRYSHUAR

Në mbështetje të nenit 100 të Kushtetutës, të nenit 10, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, të ligjit nr.10325, datë 23.9.2010, “Për bazat e të dhënave shtetërore”, të nenit 6, të ligjit nr.90/2012, “Për organizimin dhe funksionimin e administratës shtetërore”, dhe të nenit 11, të ligjit nr.9643, datë 20.11.2006, “Për prokurimin publik”, të ndryshuar, me propozimin e Kryeministrit, Këshilli i Ministrave

V E N D O S I:

1. Në vendimin nr.673, datë 22.11.2017, të Këshillit të Ministrave, të ndryshuar, bëhen këto ndryshime dhe shtesa:

a) Në pikën 5, të kreut II, bëhen ndryshimet e mëposhtme:

i. Në shkronjën “i”, fjalët “… sipas listës nr.2 bashkëlidhur këtij vendimi …” zëvendësohen me “… që janë nën përgjegjësinë e Këshillit të Ministrave …”.

ii. Në shkronjën “j”, fjalët “… për institucionet sipas listës nr.2 bashkëlidhur këtij vendimi…” zëvendësohen me “… për institucionet e administratës shtetërore nën përgjegjësinë e Këshillit të Ministrave …”.

b) Në kreun III bëhen ndryshimi dhe shtesa e mëposhtme:

i. Në pikën 9 hiqen fjalët “sipas listës nr.2 që i bashkëlidhet këtij vendimi.”.

ii. Në pikën 12 shtohet paragrafi, me këtë përmbajtje:

“Drejtori i Përgjithshëm mbështetet nga një zëvendësdrejtor.”.

c) Pika 18, e kreut IV, ndryshohet, si më poshtë vijon:

“18. Institucionet e administratës shtetërore nën përgjegjësinë e Këshillit të Ministrave duhet të dorëzojnë pranë AKSHI-t 1 (një) kopje të dokumentacionit të plotë të çdo sistemi dhe infrastrukture TIK ekzistuese dhe kodin e burimit. Sistemet dhe infrastruktura TIK ekzistuese kalojnë nën administrimin dhe inventarin e AKSHI-t, së bashku me të drejtat dhe detyrimet juridiko-civile përkatëse brenda datës 30 shtator 2018.”.

ç) Lista nr.2 bashkëlidhur vendimit nr.673, datë 22.11.2017, të Këshillit të Ministrave, të ndryshuar, shfuqizohet.

2. Ngarkohen të gjitha institucionet e administratës shtetërore nën përgjegjësinë e Këshillit të Ministrave për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

TRANSFERIMIN NË PRONËSI TË BASHKIVE TË PRONAVE TË PALUAJTSHME SHTETËRORE, QË PËRDOREN PËR KRYERJEN E VEPRIMTARIVE SPORTIVE

Në mbështetje të nenit 100 të Kushtetutës dhe të neneve 3/d, 4, 5, 7 e 8, të ligjit nr.8744, datë 22.2.2001, “Për transferimin e pronave të paluajtshme publike të shtetit në njësitë e qeverisjes vendore”, të ndryshuar, me propozimin e ministrit të Brendshëm, Këshilli i Ministrave

V E N D O S I:

1. Transferimin në pronësi të bashkive të pronave të paluajtshme shtetërore, që përdoren për kryerjen e veprimtarive sportive, sipas formularëve bashkëlidhur këtij vendimi.

Lista, gjithsej 84 (tetëdhjetë e katër) fletë, që i bashkëlidhet këtij vendimi, përbëhet nga:

a) lista e pronave të Bashkisë Berat, 2 (dy) prona, gjithsej 2 (dy) fletë;
b) lista e pronave të Bashkisë Skrapar, 2 (dy) prona, gjithsej 1 (një) fletë;
c) lista e pronave të Bashkisë Klos, 2 (dy) prona, gjithsej 1 (një) fletë;
ç) lista e pronave të Bashkisë Durrës, 10 (dhjetë) prona, gjithsej 4 (katër) fletë;
d) lista e pronave të Bashkisë Krujë, 1 (një) pronë, gjithsej 1 (një) fletë;
dh) lista e pronave të Bashkisë Elbasan, 2 (dy) prona, gjithsej 2 (dy) fletë;
e) lista e pronave të Bashkisë Belsh, 2 (dy) prona, gjithsej 1 (një) fletë;
ë) lista e pronave të Bashkisë Peqin, 3 (tre) prona, gjithsej 2 (dy) fletë;
f) lista e pronave të Bashkisë Librazhd, 2 (dy) prona, gjithsej 1 (një) fletë;
g) lista e pronave të Bashkisë Fier, 9 (nëntë) prona, gjithsej 2 (dy) fletë;
gj) lista e pronave të Bashkisë Rroskovec, 5 (pesë) prona, gjithsej 1 (një) fletë;
h) lista e pronave të Bashkisë Lushnjë, 2 (dy) prona, gjithsej 1 (një) fletë;
i) lista e pronave të Bashkisë Mallakastër, 12 (dymbëdhjetë) prona, gjithsej 6 (gjashtë) fletë;
j) lista e pronave të Bashkisë Gjirokastër, 5 (pesë) prona, gjithsej 2 (dy) fletë;
k) lista e pronave të Bashkisë Tepelenë, 2 (dy) prona, gjithsej 1 (një) fletë;
l) lista e pronave të Bashkisë Memaliaj, 2 (dy) prona, gjithsej 1 (një) fletë;
ll) lista e pronave të Bashkisë Përmet, 7 (shtatë) prona, gjithsej 3 (tre) fletë;
m) lista e pronave të Bashkisë Këlcyrë, 4 (katër) prona, gjithsej 2 (dy) fletë;
n) lista e pronave të Bashkisë Dropull, 8 (tetë) prona, gjithsej 2 (dy) fletë;
nj) lista e pronave të Bashkisë Korçë, 6 (gjashtë) prona, gjithsej 2 (dy) fletë;
o) lista e pronave të Bashkisë Maliq, 9 (nëntë) prona, gjithsej 3 (tre) fletë;
p) lista e pronave të Bashkisë Pustec, 8 (tetë) prona, gjithsej 2 (dy) fletë;
q) lista e pronave të Bashkisë Kolonjë, 4 (katër) prona, gjithsej 3 (tre) fletë;
r) lista e pronave të Bashkisë Devoll, 30 (tridhjetë) prona, gjithsej 12 (dymbëdhjetë) fletë;
rr) lista e pronave të Bashkisë Pogradec, 2 (dy) prona, gjithsej 2 (dy) fletë;
s) lista e pronave të Bashkisë Kukës, 3 (tre) prona, gjithsej 1 (një) fletë;
sh) lista e pronave të Bashkisë Has, 1 (një) pronë, gjithsej 1 (një) fletë;
t) lista e pronave të Bashkisë Lezhë, 7 (shtatë) prona, gjithsej 3 (tre) fletë;
th) lista e pronave të Bashkisë Mirditë, 1 (një) pronë, gjithsej 1 (një) fletë;
u) lista e pronave të Bashkisë Kurbin, 2 (dy) prona, gjithsej 1 (një) fletë;
v) lista e pronave të Bashkisë Malësi e Madhe, 4 (katër) prona, gjithsej 3 (tre) fletë;
x) lista e pronave të Bashkisë Shkodër, 1 (një) pronë, gjithsej 1 (një) fletë;
xh) lista e pronave të Bashkisë Tiranë, 1 (një) pronë, gjithsej 1 (një) fletë;
y) lista e pronave të Bashkisë Vlorë, 9 (nëntë) prona, gjithsej 3 (tre) fletë;
z) lista e pronave të Bashkisë Selenicë, 9 (nëntë) prona, gjithsej 2 (dy) fletë;
zh) lista e pronave të Bashkisë Himarë, 3 (tre) prona, gjithsej 2 (dy) fletë;
aa) lista e pronave të Bashkisë Sarandë, 2 (dy) prona, gjithsej 1 (një) fletë;
bb) lista e pronave të Bashkisë Finiq, 14 (katërmbëdhjetë) prona, gjithsej 4 (katër) fletë.
2. Për pronat e përcaktuara në pikën 1, të këtij vendimi, që janë dhënë me qira ose enfiteozë nga një institucion shtetëror, kontratat e qirasë ose të enfiteozës janë të vlefshme deri në përfundimin e afatit të tyre. Bashkitë janë të detyruara të respektojnë kushtet e kontratës deri në përfundim të afatit të tyre.

3. Nuk lejohet ndryshimi i destinacionit të objekteve sportive, të përcaktuara në këtë vendim, pavarësisht nga pronësia.

4. Ngarkohen ministri i Brendshëm, kryetarët e bashkive dhe Kryeregjistruesi i Regjistrimit të Pasurive të Paluajtshme i Republikës së Shqipërisë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

EMËRIMIN NË DETYRË TË NJË ANËTARI TË KOMISIONIT KOMBËTAR RREGULLATOR TË SEKTORIT TË FURNIZIMIT ME UJË DHE LARGIMIT E PËRPUNIMIT TË UJËRAVE TË NDOTURA

Në mbështetje të nenit 100 të Kushtetutës dhe të nenit 4, të ligjit nr.8102, datë 28.3.1996, “Për kuadrin rregullator të sektorit të furnizimit me ujë dhe të largimit e të përpunimit të ujërave të ndotura”, të ndryshuar, me propozimin e Kryeministrit, Këshilli i Ministrave

V E N D O S I:

Emërimin e z. Rudolf Papa në detyrën e anëtarit të Komisionit Kombëtar Rregullator të sektorit të furnizimit me ujë dhe largimit e përpunimit të ujërave të ndotura.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

ZGJERIMIN E SIPËRFAQES SË PARKUT KOMBËTAR “MALI I TOMORIT”

Në mbështetje të nenit 100 të Kushtetutës dhe të pikës 1, të nenit 36, të ligjit nr.81/2017, “Për zonat e mbrojtura”, me propozimin e ministrit të Turizmit dhe Mjedisit, Këshilli i Ministrave

V E N D O S I:

1. Zgjerimin e sipërfaqes së parkut kombëtar “Mali i Tomorit”, me një sipërfaqe prej 1383.0758 (një mijë e treqind e tetëdhjetë e tre pikë zero shtatëqind e pesëdhjetë e tetë) ha, sipas hartës dhe kufijve të paraqitur në tabelën e koordinatave, përkatësisht në shtojcat 1 e 2, që i bashkëlidhen këtij vendimi.

2. Nga ky zgjerim, kufiri i parkut kombëtar “Mali i Tomorit” do të ketë një sipërfaqe prej 26106.1758 (njëzet e gjashtë mijë e njëqind e gjashtë pikë një mijë e shtatëqind e pesëdhjetë e tetë) ha.

3. Zona e zgjerimit të parkut përfshin zona bujqësore dhe pyjore, shkurre dhe kullota. Mbulesa e tokës brenda shtesës së sipërfaqes së parkut kombëtar “Mali i Tomorit” jepet në tabelën 1, që i bashkëlidhet këtij vendimi.

4. Sipas zonimit, zona shtesë bën pjesë në zonën e përdorimit tradicional (ZPT), ku zbatohet shkalla e dytë e mbrojtjes.

5. Ministria e Turizmit dhe Mjedisit, në bashkëpunim me ministritë e tjera të linjës dhe me njësitë e qeverisjes vendore, me institucionet kërkimore-shkencore, me përfaqësuesit e biznesit e të pronarëve privatë, organizata të shoqërisë civile, brenda 1 (një) viti nga hyrja në fuqi e këtij vendimi, hartojnë planin shtesë të menaxhimit të sipërfaqes së zgjeruar, si pjesë e planit të menaxhimit të parkut kombëtar, i cili miratohet nga ministri përgjegjës për zonat e mbrojtura mjedisore.

6. Administrata Rajonale e Zonave të Mbrojtura të Qarkut Berat kryen funksionet e administratës së parkut kombëtar “Mali i Tomorit”.

7. Ngarkohen Ministria e Turizmit dhe Mjedisit dhe organet përkatëse të qeverisjes vendore për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

SHPALLJEN E EKOSISTEMIT NATYROR KRASTË-VERJON “PEIZAZH I MBROJTUR”

Në mbështetje të nenit 100 të Kushtetutës dhe të pikës 4, të nenit 12, të ligjit nr.81/2017, “Për zonat e mbrojtura”, me propozimin e ministrit të Turizmit dhe Mjedisit, Këshilli i Ministrave

V E N D O S I:

8. Shpalljen e ekosistemit natyror Krastë-Verjon “Peizazh i mbrojtur”, me një sipërfaqe prej 1469.239 (një mijë e katërqind e gjashtëdhjetë e nëntë pikë dyqind e tridhjetë e nëntë) ha, kategoria V, sipas hartës në shtojcën 1 dhe kufijve të paraqitur sipas tabelës së koordinatave në shtojcën 2, pjesë përbërëse e këtij vendimi.

9. Kjo zonë përfshin territoret urbane, trojet e përziera me tokë bujqësore dhe pyjore, shkurre dhe sipërfaqe ujore. Mbulesa e tokës brenda sipërfaqes së peizazhit të mbrojtur Krastë-Verjon jepet në tabelën 1, që i bashkëlidhet këtij vendimi.

10. Ministria e Turizmit dhe Mjedisit, në bashkëpunim me ministritë e tjera të linjës dhe me njësitë e qeverisjes vendore, me institucionet kërkimore-shkencore, me përfaqësuesit e biznesit e të pronarëve privatë, organizata të shoqërisë civile, brenda 1 (një) viti nga hyrja në fuqi e këtij vendimi, të hartojnë planin e menaxhimit të peizazhit të mbrojtur, i cili miratohet nga ministri përgjegjës për zonat e mbrojtura mjedisore.

4. Administrata Rajonale e Zonave të Mbrojtura të Qarkut Durrës kryen funksionet e administratës së peizazhit të mbrojtur Krastë-Verjon.

5. Ngarkohen Ministria e Turizmit dhe Mjedisit, Agjencia Kombëtare e Zonave të Mbrojtura dhe njësitë përkatëse të qeverisjes vendore për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

DISA NDRYSHIME DHE SHTESA NË VENDIMIN NR.60, DATË 31.1.2018, TË KËSHILLIT TË MINISTRAVE, “PËR PËRCAKTIMIN E NUMRIT TË PUNONJËSVE ME KONTRATË TË PËRKOHSHME PËR VITIN 2018 NË NJËSITË E QEVERISJES QENDRORE”, TË NDRYSHUAR

Në mbështetje të nenit 100 të Kushtetutës dhe të pikës 2, të nenit 18, të ligjit nr.7961, datë 12.7.1995, “Kodi i Punës i Republikës së Shqipërisë”, të ndryshuar, si dhe të nenit 11, të ligjit nr.109/2017, “Për buxhetin e vitit 2018”, me propozimin e ministrit të Financave dhe Ekonomisë, Këshilli i Ministrave

V E N D O S I:

1. Në vendimin nr.60, datë 31.1.2018, të Këshillit të Ministrave, të ndryshuar, bëhen këto ndryshime dhe shtesa:

a) Në pikën 1, numri i punonjësve me kontratë të përkohshme ndryshohet dhe bëhet “… 1 989 punonjës.”.

b) Në lidhjen nr.1, bashkëlidhur vendimit të përmendur në pikën 1, të tij, bëhet shtesa e mëposhtme:

“Në ndarjet “Gr.6, Ministria e Infrastrukturës dhe Energjisë”; “Gr.10, Ministria e Financave dhe Ekonomisë”; “Gr.11, Ministria e Arsimit, Sportit dhe Rinisë”; “Gr.13, Ministria e Shëndetësisë dhe Mbrojtjes Sociale”; “Gr.14, Ministria e Drejtësisë”; “Gr.16, Ministria e Brendshme”; “Gr.18, Shërbimi Informativ Shtetëror”; “Gr.87, Institucione të tjera qeveritare”; dhe “Gr.88, Agjencia për Mbështetjen e Shoqërisë Civile”, shtohen nënndarjet përkatëse, sipas tabelës që i bashkëlidhet këtij vendimi dhe është pjesë përbërëse e tij.”.
2. Efektet financiare për punonjësit e kontraktuar mbulohen nga shpenzimet korrente, të miratuara në buxhetin përkatës të vitit 2018, të njësive të qeverisjes qendrore.

Për punonjësit e kontraktuar për ALUIZNI-n, efektet financiare mbulohen nga të ardhurat e institucionit.

3. Ngarkohen ministritë dhe institucionet e përmendura në këtë vendim të depozitojnë pranë Ministrisë së Financave dhe Ekonomisë detajimin e numrit të punonjësve, kategorinë përkatëse të pagës dhe burimin e financimit të tyre.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA REALIZIMI I PROJEKTIT “SISTEMIM-ASFALTIM I UNAZËS SË QYTETIT, FAZA I”, BASHKIA MALIQ

V E N D O S I:

1. Shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Sistemim-asfaltim i unazës së qytetit, faza I”, Bashkia Maliq.

2. Shpronësimi të bëhet në favor të Bashkisë Maliq.

3. Pronarët e pasurive të paluajtshme, që shpronësohen, të kompensohen në vlerë të plotë, sipas masës përkatëse, që paraqitet në tabelën bashkëlidhur këtij vendimi, për pasurinë “truall”, me sipërfaqe 350 m², me vlerë të përgjithshme 621 250 (gjashtëqind e njëzet e një mijë e dyqind e pesëdhjetë) lekë.

4. Vlera e përgjithshme e shpronësimit, prej 621 250 (gjashtëqind e njëzet e një mijë e dyqind e pesëdhjetë) lekësh, të përballohet nga të ardhurat e Bashkisë Maliq, planifikuar në buxhetin e saj.

5. Vlera e shpenzimeve procedurale të përballohet nga Bashkia Maliq.

6. Afati i përfundimit të shpronësimit të jetë tre muaj pas datës së hyrjes në fuqi të këtij vendimi.

7. Afati i përfundimit të punimeve të objektit, në Bashkinë Maliq, të jetë në përputhje me afatet e parashikuara nga kjo bashki.

9. Zyra Vendore e Regjistrimit të Pasurive të Paluajtshme Maliq, brenda 30 ditëve, nga data e miratimit të këtij vendimi, në bashkëpunim me Bashkinë Maliq të fillojë procedurat për hedhjen e gjurmës së projektit në hartën kadastrale, sipas planimetrisë së shpronësimit të miratuar, dhe të bëjë kalimin e pronësisë për pasuritë e shpronësuara në favor të shtetit.

10. Zyra Vendore e Regjistrimit të Pasurive të Paluajtshme Maliq të pezullojë të gjitha transaksionet me pasuritë e shpronësuara deri në momentin kur do të realizohen procesi i hedhjes së gjurmës së projektit në hartën kadastrale dhe kalimi i pronësisë për pasuritë e shpronësuara.

11. Ngarkohen Ministria e Brendshme, Zyra Vendore e Regjistrimit të Pasurive të Paluajtshme Maliq dhe Bashkia Maliq për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

SHPRONËSIMIN, PËR INTERES PUBLIK, TË PRONARIT TË PASURISË SË PALUAJTSHME, PRONË PRIVATE, QË PREKET NGA REALIZIMI I PROJEKTIT “ZGJERIM I HAPËSIRËS SË VARREZAVE NË FSHATIN SHENEPREMTE”, NJËSIA ADMINISTRATIVE TËRBUF, BASHKIA DIVJAKË

V E N D O S I:

1. Shpronësimin, për interes publik, të pronarit të pasurisë së paluajtshme, pronë private, që preket nga realizimi i projektit “Zgjerim i hapësirës së varrezave në fshatin Shenepremte”, njësia administrative Tërbuf, Bashkia Divjakë.

2. Shpronësimi të bëhet në favor të Bashkisë Divjakë.

3. Pronari i pasurisë së paluajtshme, që shpronësohet, të kompensohet në vlerë të plotë, sipas masës përkatëse që paraqitet në tabelën bashkëlidhur këtij vendimi, për pasurinë “tokë arë”, me sipërfaqe 300 m2, me vlerë të përgjithshme 109 200 (njëqind e nëntë mijë e dyqind) lekë.

4. Vlera e përgjithshme e shpronësimit, prej 109 200 (njëqind e nëntë mijë e dyqind) lekësh, të përballohet nga të ardhurat e Bashkisë Divjakë, planifikuar në buxhetin e saj.

5. Vlera e shpenzimeve procedurale të përballohet nga Bashkia Divjakë.

6. Afati i përfundimit të shpronësimit të jetë tre muaj pas hyrjes në fuqi të këtij vendimi.

7. Afati i përfundimit të punimeve të objektit, në Bashkinë Divjakë, të jetë në përputhje me afatet e parashikuara nga kjo bashki.

8. Pronari i pasurisë së paluajtshme, që shpronësohet, sipas tabelës bashkëlidhur këtij vendimi, të kompensohet për efekt shpronësimi pasi të ketë paraqitur dokumentacionin e pronësisë pranë Bashkisë Divjakë.

9. Zyra Vendore e Regjistrimit të Pasurive të Paluajtshme Divjakë, brenda 30 ditëve nga data e miratimit të këtij vendimi, në bashkëpunim me Bashkinë Divjakë, të fillojë procedurat për hedhjen e gjurmës së projektit në hartën kadastrale sipas planimetrisë së shpronësimit, të miratuar, dhe të bëjë kalimin e pronësisë për pasuritë e shpronësuara në favor të shtetit.

10. Zyra Vendore e Regjistrimit të Pasurive të Paluajtshme Divjakë të pezullojë të gjitha transaksionet me pasuritë e shpronësuara deri në momentin kur do të realizohen procesi i hedhjes së gjurmës së projektit në hartën kadastrale dhe kalimi i pronësisë për pasuritë e shpronësuara.

11. Ngarkohen Ministria e Brendshme, Zyra Vendore e Regjistrimit të Pasurive të Paluajtshme Divjakë dhe Bashkia Divjakë për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

SHPRONËSIMIN, PËR INTERES PUBLIK, TË PRONARIT TË PASURISË SË PALUAJTSHME, PRONË PRIVATE, QË PREKET NGA REALIZIMI I PROJEKTIT “NDËRTIMI, REHABILITIMI DHE MIRËMBAJTJA E VARREZAVE PUBLIKE SI DHE GARANTIMI I SHËRBIMIT PUBLIK TË VARRIMIT”, NË FSHATIN ZENISHT, BASHKIA MAT

Në mbështetje të nenit 100 të Kushtetutës dhe të neneve 5, pika 1, 20 e 21 të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.109/2017, “Për buxhetin e vitit 2018”, me propozimin e ministrit të Brendshëm, Këshilli i Ministrave

V E N D O S I:

1. Shpronësimin, për interes publik, të pronarit të pasurisë së paluajtshme, pronë private, që preket nga realizimi i projektit “Ndërtimi, rehabilitimi dhe mirëmbajtja e varrezave publike si dhe garantimi i shërbimit publik të varrimit”, në fshatin Zenisht, Bashkia Mat.

2. Shpronësimi të bëhet në favor të Bashkisë Mat.

3. Pronari i pasurisë së paluajtshme, që shpronësohet, të kompensohet në vlerë të plotë, sipas masës përkatëse, që paraqitet në tabelën bashkëlidhur këtij vendimi, për pasurinë “tokë truall”, me sipërfaqe 10 100 m2, me vlerë të përgjithshme 1 151 400 (një milion e njëqind e pesëdhjetë e një mijë e katërqind) lekë.

4. Vlera e përgjithshme e shpronësimit, prej 1 151 400 (një milion e njëqind e pesëdhjetë e një mijë e katërqind) lekësh, të përballohet nga të ardhurat e Bashkisë Mat, planifikuar në buxhetin e saj.

5. Vlera e shpenzimeve procedurale të përballohet nga Bashkia Mat.

6. Afati i përfundimit të shpronësimit të jetë tre muaj pas datës së hyrjes në fuqi të këtij vendimi.

7. Afati i përfundimit të punimeve të objektit, në Bashkinë Mat, të jetë në përputhje me afatet e parashikuara nga kjo bashki.

8. Pronari i pasurisë së paluajtshme, që shpronësohet, sipas tabelës bashkëlidhur këtij vendimi, të kompensohet, për efekt shpronësimi, pasi të ketë paraqitur dokumentacionin e pronësisë pranë Bashkisë Mat.

9. Zyra Vendore e Regjistrimit të Pasurive të Paluajtshme Mat, brenda 30 ditëve nga data e miratimit të këtij vendimi, në bashkëpunim me Bashkinë Mat, të fillojë procedurat për hedhjen e gjurmës së projektit në hartën kadastrale, sipas planimetrisë së shpronësimit, të miratuar, dhe të bëjë kalimin e pronësisë për pasuritë e shpronësuara në favor të shtetit.

10. Zyra Vendore e Regjistrimit të Pasurive të Paluajtshme Mat të pezullojë të gjitha transaksionet me pasuritë e shpronësuara, deri në momentin kur do të realizohen procesi i hedhjes së gjurmës së projektit në hartën kadastrale dhe kalimi i pronësisë për pasuritë e shpronësuara.

11. Ngarkohen Ministria e Brendshme, Zyra Vendore e Regjistrimit të Pasurive të Paluajtshme Mat dhe Bashkia Mat për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

KALIMIN NË PRONËSI TË BASHKISË ROSKOVEC, TË PRONËS ME EMËRTIMIN “POSTA E POLICISË ROSKOVEC” DHE PËR NJË NDRYSHIM NË VENDIMIN NR.250, DATË 24.4.2003, TË KËSHILLIT TË MINISTRAVE, “PËR MIRATIMIN E LISTËS SË INVENTARIT TË PRONAVE TË PALUAJTSHME SHTETËRORE, TË CILAT I KALOJNË NË PËRGJEGJËSI ADMINISTRIMI MINISTRISË SË RENDIT PUBLIK”, TË NDRYSHUAR

Në mbështetje të nenit 100 të Kushtetutës, shkronjës “k”, të nenit 3, të ligjit nr.8744, datë 22.2.2001, “Për transferimin e pronave të paluajtshme publike të shtetit në njësitë e qeverisjes vendore”, të ndryshuar, dhe të neneve 5, 13 e 15, shkronja “c”, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e ministrit të Brendshëm, Këshilli i Ministrave

V E N D O S I:

1. Kalimin në pronësi të Bashkisë Roskovec të pronës me emërtimin “Posta e Policisë Roskovec”, sipas formularit që i bashkëlidhet këtij vendimi, për realizimin e funksioneve me interes vendor.

2. Prona e përcaktuar në pikën 1 të këtij vendimi hiqet nga lista e inventarit të pronave të paluajtshme shtetërore, që i bashkëlidhet vendimit nr.250, datë 24.4.2003, të Këshillit të Ministrave, të ndryshuar.

3. Ngarkohen ministri i Brendshëm, kryetari i Bashkisë Roskovec dhe Kryeregjistruesi i Pasurive të Paluajtshme të Republikës së Shqipërisë për ndjekjen dhe zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA REALIZIMI I PROJEKTIT “SISTEMIM DHE ASFALTIM BRENDA LAGJES “ISA BOLETINI”, FAZA IV”, BASHKIA VLORË

Në mbështetje të nenit 100 të Kushtetutës, dhe të neneve 5, pika 1, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.109/2017, “Për buxhetin e vitit 2018”, me propozimin e ministrit të Brendshëm, Këshilli i Ministrave

V E N D O S I:

1. Shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Sistemim dhe asfaltim brenda lagjes “Isa Boletini”, faza IV”, Bashkia Vlorë.

2. Shpronësimi të bëhet në favor të Bashkisë Vlorë.

3. Pronarët e pasurive të paluajtshme, që shpronësohen, të kompensohen në vlerë të plotë, sipas masës përkatëse, që paraqitet në tabelën bashkëlidhur këtij vendimi, për pasuritë “truall”, me sipërfaqe 16.5 m², dhe “ndërtim”, me sipërfaqe 93.5 m2, me vlerë të përgjithshme 3 766 884 (tre milionë e shtatëqind e gjashtëdhjetë e gjashtë mijë e tetëqind e tetëdhjetë e katër) lekë.

4. Vlera e përgjithshme e shpronësimit, prej 3 766 884 (tre milionë e shtatëqind e gjashtëdhjetë e gjashtë mijë e tetëqind e tetëdhjetë e katër) lekësh, të përballohet nga të ardhurat e Bashkisë Vlorë, planifikuar në buxhetin e saj.

5. Vlera e shpenzimeve procedurale të përballohet nga Bashkia Vlorë.

6. Afati i përfundimit të shpronësimit të jetë tre muaj pas hyrjes në fuqi të këtij vendimi.

7. Afati i përfundimit të punimeve të objektit, në Bashkinë Vlorë, të jetë në përputhje me afatet e parashikuara nga kjo bashki.

9. Zyra Vendore e Regjistrimit të Pasurive të Paluajtshme Vlorë, brenda 30 (tridhjetë) ditëve nga data e miratimit të këtij vendimi, në bashkëpunim me Bashkinë Vlorë të fillojë procedurat për hedhjen e gjurmës së projektit në hartën kadastrale, sipas planimetrisë së shpronësimit të miratuar, dhe të bëjë kalimin e pronësisë për pasuritë e shpronësuara në favor të shtetit.

10. Zyra Vendore e Regjistrimit të Pasurive të Paluajtshme Vlorë të pezullojë të gjitha transaksionet me pasuritë e shpronësuara deri në momentin kur do të realizohen procesi i hedhjes së gjurmës së projektit në hartën kadastrale dhe kalimi i pronësisë për pasuritë e shpronësuara.

11. Ngarkohen Ministria e Brendshme, Zyra Vendore e Regjistrimit të Pasurive të Paluajtshme Vlorë dhe Bashkia Vlorë për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA REALIZIMI I PROJEKTIT “SISTEMIM-ASFALTIM I RRUGËS “BELUL BERISHA””, NË BASHKINË ELBASAN

Në mbështetje të nenit 100 të Kushtetutës, të neneve 5, pika 1, 20 e 21 të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.109/2017, “Për buxhetin e vitit 2018” me propozimin e ministrit të Brendshëm, Këshilli i Ministrave

V E N D O S I:

1. Shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Sistemim-asfaltim i rrugës “Belul Berisha””, në Bashkinë Elbasan.

2. Shpronësimi të bëhet në favor të Bashkisë Elbasan.

3. Pronarët e pasurive të paluajtshme, që shpronësohen, të kompensohen në vlerë të plotë, sipas masës përkatëse, që paraqitet në tabelën bashkëlidhur këtij vendimi, për pasuritë “ndërtesë”, me sipërfaqe 17 m², dhe “truall”, me sipërfaqe 50 m², me vlerë të përgjithshme shpronësimi 1 333 126 (një milion e treqind e tridhjetë e tre mijë e njëqind e njëzet e gjashtë) lekë.

4. Vlera e përgjithshme e shpronësimit, prej 1 333 126 (një milion e treqind e tridhjetë e tre mijë e njëqind e njëzet e gjashtë) lekësh, të përballohet nga të ardhurat e Bashkisë Elbasan, planifikuar në buxhetin e saj.

5. Vlera e shpenzimeve procedurale të përballohet nga Bashkia Elbasan.

6. Afati i përfundimit të shpronësimit të jetë tre muaj pas datës së hyrjes në fuqi të këtij vendimi.

7. Pronarët e pasurive të paluajtshme, që shpronësohen, sipas tabelës bashkëlidhur këtij vendimi, të kompensohen, për efekt shpronësimi, pasi të kenë paraqitur dokumentacionin e pronësisë pranë Bashkisë Elbasan.

8. Afati i përfundimit të punimeve të objektit, në Bashkinë Elbasan, të jetë në përputhje me afatet e parashikuara nga kjo bashki.

9. Zyra Vendore e Regjistrimit të Pasurive të Paluajtshme Elbasan, brenda 30 (tridhjetë) ditëve nga data e miratimit të këtij vendimi, në bashkëpunim me Bashkinë Elbasan, të fillojë procedurat për hedhjen e gjurmës së projektit në hartën kadastrale, sipas planimetrisë së shpronësimit të miratuar, dhe të bëjë kalimin e pronësisë për pasuritë e shpronësuara në favor të Bashkisë Elbasan.

10. Zyra Vendore e Regjistrimit të Pasurive të Paluajtshme Elbasan të pezullojë të gjitha transaksionet me pasuritë e shpronësuara, deri në momentin kur do të realizohen procesi i hedhjes së gjurmës së projektit në hartën kadastrale dhe kalimi i pronësisë për pasuritë e shpronësuara.

11. Ngarkohen Ministria e Brendshme, Zyra Vendore e Regjistrimit të Pasurive të Paluajtshme Elbasan dhe Bashkia Elbasan për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

BASHKËRENDIMIN DHE KOORDINIMIN E PROCESIT TË INTEGRIMIT EVROPIAN, NDËRMJET QEVERISJES QENDRORE DHE NJËSIVE TË VETËQEVERISJES VENDORE

Në mbështetje të nenit 100 të Kushtetutës dhe të neneve 9, pika 1, nënpika 1.1, shkronja “c”, 10, 11, dhe 12, pika 3, të ligjit nr.139/2015, “Për vetëqeverisjen vendore”, me propozimin e ministrit të Brendshëm dhe ministrit për Evropën dhe Punët e Jashtme, Këshilli i Ministrave

V E N D O S I:

1. Krijimin e strukturës së integrimit evropian në çdo bashki, si njësi bazë e vetëqeverisjes vendore, brenda strukturave të tyre administrative ekzistuese, në përputhje me parashikimet e ligjit nr.139/2015, “Për vetëqeverisjen vendore”.

2. Përgjegjësitë e strukturës së integrimit evropian që krijohet në bashki janë, si më poshtë vijon:

a) Bashkërendimi dhe mbështetja e strukturave administrative të bashkisë për zbatimin e politikave, të legjislacionit, të investimeve dhe të shërbimeve të lidhura apo që rrjedhin nga procesi i integrimit evropian, në nivel vendor;
b) Bashkërendimi i strukturave administrative dhe përfaqësimi i bashkisë në marrëdhënien me strukturat e qeverisjes qendrore përgjegjëse për integrimin evropian dhe proceset përbërëse të tij;
c) Bashkërendimi i strukturave administrative të bashkisë për rritjen e kapacitetit përthithës të përdorimit të asistencës së Bashkimit Evropian për procesin e integrimit evropian në nivel vendor;
ç) Bashkërendimi, organizimi dhe drejtimi i aktivitetit publik të bashkisë, me qëllim realizimin e funksioneve të veta apo të deleguara në kuadër të procesit të integrimit evropian dhe të zbatimit të asistencës të Bashkimit Evropian për këtë proces;
d) Mbështetja dhe drejtimi i strukturave administrative të bashkisë për përgatitjen, zbatimin, monitorimin, vlerësimin dhe informimin për projektet e financuara nga programet e asistencës së Bashkimit Evropian për procesin e integrimit evropian në nivel vendor;
dh) Hartimi çdo 6 (gjashtë) muaj ose, nëse kërkohet, sipas rastit, për të informuar Ministrinë e Brendshme dhe Ministrinë për Evropën dhe Punët e Jashtme, lidhur me përmbushjen e kritereve dhe të standardeve që rrjedhin nga procesi i integrimit evropian dhe/ose zbatimit të asistencës së BE-së, për funksionet e veta apo të deleguara të bashkisë;
e) Informimi në mënyrë periodike i publikut dhe i grupeve të tjera të interesit për procesin e integrimit evropian, për politikat e BE-së dhe mundësitë për përfitim nga asistenca e Bashkimit Evropian, nëpërmjet këndeve të Bashkimit Evropian, të cilat krijohen dhe funksionojnë brenda bashkisë;
ë) Administrimi dhe publikimi i informacionit rreth Bashkimit Evropian dhe procesit të integrimit evropian të Republikës së Shqipërisë, në faqen zyrtare të internetit të bashkisë, informacion i cili duhet të ketë formë dhe përmbajtje të unifikuar për të gjitha bashkitë;
f) Organizimi i aktiviteteve informuese dhe promovuese mbi programet dhe projektet e Bashkimit Evropian, me mbikëqyrjen dhe mbështetjen e strukturave të Koordinatorit Kombëtar të Instrumentit të Parazgjerimit (NIPAC).

3. Ministria e Brendshme, në bashkëpunim me/dhe me drejtimin e Ministrisë për Evropën dhe Punët e Jashtme, mbështet, koordinon dhe monitoron forcimin e kapaciteteve të bashkive për përmbushjen e kritereve dhe të standardeve që rrjedhin nga procesi i integrimit evropian për funksionet e veta apo të deleguara të bashkisë dhe ka këto përgjegjësi:

a) Monitoron në mënyrë periodike përmbushjen e detyrimeve nga bashkitë, lidhur me ngritjen e strukturave të integrimit evropian dhe performancën në zbatimin e funksioneve të tyre, sipas përcaktimit të këtij vendimi;
b) Monitoron, mbështet dhe koordinon punën për zgjidhjen e problemeve të hasura, nëpërmjet Agjencisë për Mbështetjen e Vetëqeverisjes Vendore, me qëllim funksionimin e strukturës së integrimit evropian në çdo bashki;
c) Mbështet bashkinë në përcaktimin e fushave, prioriteteve dhe/ose çështjeve ku duhet të orientohet kërkesa e tyre për asistencën e Bashkimit Evropian;
ç) Bashkërendon me bashkitë procesin e vlerësimit kombëtar të performancës së tyre mbi plotësimin e detyrimeve që rrjedhin nga procesi i integrimit evropian;
d) Analizon zbatimin e masave për realizimin e agjendës së integrimit evropian në nivel vendor dhe ndikimin në lidhje me procesin e negociatave për anëtarësimin në Bashkimin Evropian.

4. Ministria për Evropën dhe Punët e Jashtme mbikëqyr, jep orientim strategjik dhe informon mbi procesin e integrimit evropian dhe politikat e programet respektive, të cilat mund të zbatohen në nivel vendor dhe ka këto përgjegjësi:

a) Siguron pjesëmarrjen e përfaqësuesve të njësive të vetëqeverisjes vendore në forumet apo strukturat konsultuese për procesin e integrimit evropian dhe të asistencës së Bashkimit Evropian për këtë proces;
b) Bashkërendon punën me Ministrinë e Brendshme dhe Shkollën Shqiptare të Administratës Publike, lidhur me asistencën dhe mbështetjen e bashkive në procesin e forcimit të kapaciteteve të tyre për procesin e integrimit evropian;
c) Informon mbi asistencën e Bashkimit Evropian për procesin e integrimit evropian, përfshirë programet nga të cilat përfitojnë njësitë e vetëqeverisjes vendore;
ç) Informon bashkitë lidhur me hapjen e thirrjeve për propozime, në kuadër të programeve të ndryshme të financuara nga Bashkimi Evropian, nga të cilat përfitojnë njësitë e vetëqeverisjes vendore;
d) Mundëson konsultimin e bashkive në lidhje me procesin e aplikimeve, duke shërbyer njëkohësisht si pikë lidhjeje e tyre me strukturat përkatëse të menaxhimit të programeve të financuara nga Bashkimi Evropian;
dh) Mbikëqyr kapacitetin dhe masën e përthithjes së asistencës së Bashkimit Evropian nga bashkitë.

5. Ministritë janë përgjegjëse për sigurimin e informacionit të nevojshëm për problemet sektoriale që lidhen me zbatimin e legjislacionit të Bashkimit Evropian, sipas sektorëve që mbulojnë dhe në përputhje me funksionet e bashkive dhe kanë këto përgjegjësi:

a) Të caktojnë personin përgjegjës që do të shërbejë si pika kryesore e komunikimit me Ministrinë e Brendshme;
b) Të japin informacion për projektet e financuara nga Bashkimi Evropian dhe donatorë të tjerë për sektorin që mbulojnë, ku përfitues është bashkia;
c) Të analizojnë të dhënat specifike që dalin nga vlerësimi kombëtar i përformancës së bashkive, lidhur me procesin e integrimit evropian, sipas sektorëve që mbulojnë.

6. Agjencia Kombëtare e Shoqërisë së Informacionit të ngrejë platformën elektronike intranet, të dedikuar për bashkitë, e cila do të shërbejë për ndarjen e praktikave më të mira, eksperiencave dhe informacionit mbi aktivitetet dhe çështjet e Bashkimit Evropian në bashki.

7. Ngarkohen Ministria e Brendshme, Ministria për Evropën dhe Punët e Jashtme, ministritë e linjës dhe bashkitë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

DISA NDRYSHIME DHE SHTESA NË VENDIMIN NR.1707, DATË 29.12.2008, TË KËSHILLIT TË MINISTRAVE, “PËR MIRATIMIN E RREGULLORES PËR LËSHIMIN E PATENTAVE PËR SHPIKJET DHE MODELET E PËRDORIMIT”, TË NDRYSHUAR

Në mbështetje të nenit 100 të Kushtetutës dhe të neneve 11, 17, 18, 20, 26, 29-31, 34, 35, 49, 50, 70, 75, 87, shkronjat “a”-“gj”, 97, 99 e 202, të ligjit nr.9947, datë 7.7.2008, “Për pronësinë industriale”, të ndryshuar, me propozimin e ministrit të Financave dhe Ekonomisë, Këshilli i Ministrave

V E N D O S I:

I. Në rregulloren “Për lëshimin e patentave për shpikjet dhe modelet e përdorimit“, që i bashkëlidhet vendimit nr.1707, datë 29.12.2008, të Këshillit të Ministrave, të ndryshuar, bëhen këto ndryshime dhe shtesa:

1. Kudo në rregullore:

a) emërtimi “Drejtoria e Përgjithshme e Patentave dhe Markave” zëvendësohet me “Drejtoria e Përgjithshme e Pronësisë Industriale”;
b) emërtimet “FP1”; “FP2”; “FP3”; “FP4”; “FP5”; “FP6”; “FP7”; “FP8”; “FP9”; “FP10”; “FP11”; “FP12”; “FP13”; “FP14”; dhe “FP15” zëvendësohen me fjalët “… përkatës të aplikimit …”.

2. Në kreun I bëhen ndryshimet, si më poshtë vijon:

a) Në shkronjën “e”, të pikës 2.1, dhe kudo në rregullore fjalët “… i ndryshuar me ligjin nr.55/2014 …” zëvendësohen me “… i ndryshuar.”;
b) Pika 4 shfuqizohet.

3. Në kreun II bëhen këto ndryshime dhe shtesa:

a) Pika 1.1 ndryshohet, si më poshtë vijon:

“1.1. Aplikimi për lëshimin e një patente bëhet nëpërmjet formularit përkatës të aplikimit, i cili nënshkruhet nga aplikanti ose përfaqësuesi i tij dhe depozitohet pranë DPPI-së. Aplikimi për patentë mund t’i dërgohet DPPI-së nga paraqitësi i kërkesës ose përfaqësuesi i tij edhe me postë, me faks ose on-line nëse DPPI-ja e ofron. Në rastin e dërgimit me faks, aplikanti duhet që, brenda një muaji nga data e dërgimit të faksit, të depozitojë pranë DPPI-së kërkesën në formën e saj origjinale, në të kundërt kërkesa konsiderohet si e paparaqitur.”.

b) Pika 1.4 ndryshohet, si më poshtë vijon:

“1.4. DPPI-ja, ditën që merr në dorëzim formularin përkatës të aplikimit për patentë, shënon mbi formular datën, orën e paraqitjes dhe numrin e kërkesës.”.

c) Pas pikës 5 shtohen pikat 6 dhe 7, me këtë përmbajtje:

“6. Përmbajtja e kërkesës për hartimin e raportit të kërkimit

6.1. Pas marrjes së numrit të aplikimit dhe datës së depozitimit, aplikanti ose përfaqësuesi i tij mund të depozitojë në DPPI kërkesën për hartimin e një raporti kërkimi nga një zyrë kombëtare ose ndërkombëtare, e cila gëzon statusin e Autoritetit Ndërkombëtar për Ekzaminim Paraprak, sipas nenit 32, të Traktatit të Bashkëpunimit për Patentat, ose nga zyra, me të cilat DPPI-ja ka marrëveshje bashkëpunimi, në mënyrë që të përcaktojë nëse shpikja e paraqitur në aplikimin për patentë plotëson kriteret për patentueshmëri, sipas parashikimeve të ligjit nr.9947, datë 7.7.2008, “Për pronësinë industriale”, të ndryshuar.

6.2. Kërkesa për hartimin e raportit të kërkimit mund të depozitohet në çdo kohë, nëpërmjet formularit të përcaktuar nga zyra dhe të publikuar në faqen e saj zyrtare, në dy kopje identike dhe shoqërohet me pagesën përkatëse për hetim, të përcaktuar nga zyra e zgjedhur prej aplikantit, e cila do të kryeje hetimin, si dhe koston e transferimit të pagesës së raportit të kërkimit.

6.3. DPPI-ja, sipas rastit, mund t’i kërkojë aplikantit të depozitojë përkthimin në gjuhë tjetër të pretendimeve apo dhe të të gjithë përshkrimit të patentës për ta përcjellë atë në zyrën që do të hartojë raportin e kërkimit.

6.4. Kërkesa për hartimin e një raporti kërkimi duhet të përmbajë:

a) të dhënat e aplikantit (emri i personit juridik, kodi, adresa, kodi shtetëror, emri, mbiemri i personit fizik, adresa, kodi shtetëror, adresa e postës elektronike);
b) të dhënat e përfaqësuesit, në rast se kërkesa për kryerjen e një raporti kërkimi paraqitet nga përfaqësuesi i autorizuar (emri i përfaqësuesit të autorizuar, kodi, adresa, kodi shtetëror, adresa e postës elektronike);
c) statusin e aplikantit;
ç) të dhënat e aplikimit të mëparshëm, nëse është pretenduar për prioritet;
d) nënshkrimin e aplikantit ose të përfaqësuesit të tij;
dh) autorizimin e përfaqësimit, në rast se aplikimi depozitohet nga një përfaqësues i autorizuar.

6.5. Aplikuesi ose përfaqësuesi i tij është përgjegjës për korrektësinë e kërkesës së paraqitur, sipas pikave 6.1 deri në 6.4, të këtij neni, dhe i nënshtrohet të gjitha pasojave që lidhen me informacionin e pasaktë të dorëzuar.

7. Shqyrtimi nga DPPI-ja i kërkesës për hartimin e raportit të kërkimit.

7.1. Pas përfundimit të ekzaminimit për formalitetin aplikimit, për të cilin është kërkuar hartimi i raportit të kërkimit, dhe pas aprovimit nga sektori i patentave se aplikimi përmbush kërkesat formale të ekzaminimit, DPPI-ja e përcjell kërkesën për hartimin e raportit të kërkimit në zyrën e zgjedhur nga aplikanti dhe e informon atë ose përfaqësuesin e tij për këtë fakt.

7.2. Nëse, pas ekzaminimit për formalitetin e aplikimit, për të cilin është kërkuar hartimi i raportit të kërkimit, është marrë vendim nga zyra për refuzimin e aplikimit, DPPI-ja do ta konsiderojë të dorëhequr kërkesën e depozituar për hartimin e raportit të kërkimit, do të njoftojë me shkrim aplikantin dhe do t’i kthejë atij pagesat e depozituara për hartimin dhe transferimin e pagesës së raportit të kërkimit.

7.3. Aplikanti për patentë, për të cilën është depozituar një kërkesë për hartimin e raportit të kërkimit, ose përfaqësuesi i tij, pas marrjes së njoftimit nga DPPI-ja se aplikimi i plotëson kushtet formale për ekzaminim, sipas pikës 7.1., duhet të depozitojë në gjuhën angleze të gjithë aplikimin për patentë (pretendimet, abstraktin, përshkrimin e shpikjes, të dhënat e aplikimit për patentë si dhe vizatimet).

7.4. Aplikanti është përgjegjës për pasojat që rrjedhin nga përkthimi i pasaktë i dokumenteve të aplikimit.”.

4. Shkronja “a”, në pikën 2.4., të kreut IV, zëvendësohet me fjalët “… formulari përkatës i aplikimit …”.

5. Shkronja “a”, në pikën 1.1., të kreut XI, zëvendësohet me fjalët “… formulari përkatës i aplikimit për kundërshtimin e patentës …”.

6. Pas kreut XIV shtohen krerët XIV/1 dhe XIV/2, me këtë përmbajtje:

“KREU XIV/1
E DREJTA E PENGUT PËR PATENTAT E SHPIKJEVE

1. Paraqitja e kërkesës

1.1. Kërkesa për regjistrimin e një kontrate garancie ose pengu për një patentë, parashikuar nga neni 36/a, i ligjit, paraqitet pranë DPPI-së nëpërmjet formularit përkatës të aplikimit, me kërkesë të njërës prej palëve në kontratë. Së bashku me kërkesën, aplikanti duhet të depozitojë edhe dokumentet e mëposhtme:

a) Dokumentin e pagesës së tarifës përkatëse;
b) Autorizimin e përfaqësimit, kur paraqitësi i kërkesës nuk është njëri nga palët në kontratë;
c) Dokumentin që vërteton se kemi të bëjmë me një kontratë garancie ose pengu.
2. Shqyrtimi i kërkesës nga DPPI-ja

2.1. DPPI-ja shqyrton kërkesën për regjistrimin e kontratës së garancisë ose të pengut nëse është në përputhje me parashikimet e pikës 1, të këtij kreu, dhe, në rast se ka të meta, njofton aplikantin të bëjë plotësimet e nevojshme brenda 3 muajve nga data e njoftimit. Në të kundërt, kërkesa refuzohet.

2.2. Kur kërkesa për regjistrimin e kontratës së garancisë ose të pengut është në përputhje me parashikimet e pikës 1.1, të këtij kreu, DPPI-ja e regjistron kontratën e garancisë ose të pengut në regjistrin e patentave, njofton aplikantin dhe bën publikimin e saj në Buletinin e Pronësisë Industriale.

KREU XIV/2
PROCEDURA PËR ZBATIMIN E VEPRIMEVE PËRMBARIMORE

1. Paraqitja e kërkesës

1.1. Kërkesa për regjistrimin e një veprimi përmbarimor për një patentë, e parashikuar nga neni 36/b, i ligjit, paraqitet pranë DPPI-së nëpërmjet formularit përkatës të aplikimit, me kërkesë të njërës prej palëve në kontratë. Së bashku me kërkesën aplikanti duhet të depozitojë edhe dokumentet e mëposhtme:

a) Dokumentin e pagesës së tarifës përkatëse;
b) Autorizimin e përfaqësimit, kur paraqitësi i kërkesës nuk është njëri nga palët në kontratë;
c) Dokumentin që vërteton veprimin përmbarimor.

2. Shqyrtimi i kërkesës nga DPPI-ja

2.1. DPPI-ja shqyrton kërkesën për regjistrimin e një veprimi përmbarimor, nëse është në përputhje me parashikimet e pikës 1, të këtij kreu, dhe, në rast së ka të meta, njofton aplikantin të bëjë plotësimet e nevojshme brenda 3 muajve nga data e njoftimit. Në të kundërt, kërkesa refuzohet.

2.2. Kur kërkesa për regjistrimin e një veprimi përmbarimor është në përputhje me parashikimet e pikës 1.1, të këtij kreu, DPPI-ja, me një njoftim zyrtar, njofton, paraprakisht, pronarin e patentës, përpara se të regjistrojë veprimin përmbarimor në regjistrin e patentave dhe të bëjë publikimin e saj në Buletinin e Pronësisë Industriale.”.

7. Në kreun XVI bëhen këto ndryshime dhe shtesa:

a) Shkronja “b”, e pikës 1.1, shfuqizohet;
b) Pas pikës 3.5 shtohet pika 3.6, me këtë përmbajtje:

“3.6. Kur pagesa është kryer, por regjistrimi nuk mund të ripërtërihet ose është ripërtërirë si pasojë e një pagese tjetër, kjo pagesë do të rimbursohet nga zyra.”.

8. Shkronja “a”, në pikën 3.1., të kreut XVII, zëvendësohet me fjalët “… formulari përkatës i aplikimit, i nënshkruar nga pronari i patentës ose përfaqësuesi i tij;”.

9. Shkronja “a”, në pikën 1.1, të kreut XVIII, zëvendësohet me fjalët “… formularin përkatës të kërkesës për apelim, të nënshkruar nga pronari i patentës ose përfaqësuesi i tij;”.

10. Formularët “FP1”, “FP2”, “FP3”, “FP4”, “FP5”, “FP6”, “FP7”, “FP8”, “FP9”, “FP10”, “FP11”, “FP12”, “FP13”, “FP14” dhe “FP15” zëvendësohen me formularët që i bashkëlidhen kësaj rregulloreje.

II. Ngarkohet Drejtoria e Përgjithshme e Pronësisë Industriale për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

***

V E N D I M

PËR

NJË NDRYSHIM NË VENDIMIN NR.1058, DATË 22.12.2010, TË KËSHILLIT TË MINISTRAVE, “PËR KALIMIN E ISH -SHKOLLËS SË ULËT TË NDËRTIMIT (3 KATE) DHE ISH-KONVIKTIT (4 KATE), SHKOZET, DURRËS, NË PËRGJEGJËSI ADMINISTRIMI TË MINISTRISË SË PUNËVE PUBLIKE DHE TRANSPORTIT, PËR ENTIN KOMBËTAR TË BANESAVE, PËR QËLLIM PRIVATIZIMI”

Në mbështetje të nenit 100 të Kushtetutës dhe të neneve 8, 10, 11 e 13, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e ministrit të Financave dhe Ekonomisë, Këshilli i Ministrave

V E N D O S I:

1. Pika 3, e vendimit nr.1058, datë 22.12.2010, të Këshillit të Ministrave, ndryshohet, si më poshtë vijon:

“3. Procedurat e privatizimit të apartamenteve dhe lidhja e kontratës të bëhen brenda 1 (një) viti nga data e hyrjes në fuqi të këtij vendimi. Në rast se personi, sipas listës bashkëlidhur këtij vendimi, nuk paraqitet pranë EKB-së të lidhë kontratën brenda afatit 1-vjeçar, familjes i humbet e drejta e privatizimit dhe objekti do të përdoret nga Enti Kombëtar i Banesave, në zbatim të politikave të strehimit, sipas legjislacionit në fuqi.”.

2. Ngarkohen Ministria e Financave dhe Ekonomisë, Enti Kombëtar i Banesave dhe Kryeregjistruesi i Pasurive të Paluajtshme të Republikës së Shqipërisë të ndjekin procedurat e nevojshme për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

SHËNIM: BAZUAR NË NENIN 117 TË KUSHTETUTËS SË RSH DHE NENIT 29 TË LIGJIT PËR ORGANIZIMIN DHE FUNKSIONIMIN E KËSHILLIT TË MINISTRAVE, VENDIMET E KËSHILLIT TË MINISTRAVE PUBLIKOHEN NË FLETOREN ZYRTARE DHE HYJNË NË FUQI PAS BOTIMIT TË TYRE. DREJTORIA E KOMUNIKIMIT PRANË KËSHILLIT TË MINISTRAVE PËRPIQET TË BOTOJË NË KOHËN MË TË SHPEJTË TË MUNDSHME VENDIMET E MBLEDHJEVE TË QEVERISË, POR VERSIONI ZYRTAR DHE HYRJA E TYRE NË FUQI BËHET VETËM PASI VENDIMI BOTOHET NE QBZ. SHPESHHERË, VENDIMET E KËSHILLIT TË MINISTRAVE KANË NEVOJË PËR ZBARDHJE TË MËTEJSHME, ÇKA E VONON PUBLIKIMIN E TYRE NË KËTË FAQE.

Vendime të miratuara në mbledhjen e Këshillit të Ministrave, datë 26 Korrik 2018
26 Korrik 2018

QEVERIA

MEDIA

QYTETAR

BIZNES

ZBULO SHQIPERINE

Vendime të miratuara në mbledhjen e Këshillit të Ministrave, datë 26 Korrik 2018 26 Korrik 2018

Vendime të miratuara në mbledhjen e Këshillit të Ministrave, datë 26 Korrik 2018
26 Korrik 2018