Vendime të miratuara në mbledhjen e Këshillit të Ministrave, datë 26 Shkurt 2020:
V E N D I M
PËR
NGRITJEN DHE FUNKSIONIMIN E NJËSISË SPECIALE ANTIKORRUPSION DHE ANTIEVAZION
Në mbështetje të nenit 100 të Kushtetutës dhe të nenit 6, të ligjit nr.90/2012, “Për organizimin dhe funksionimin e administratës shtetërore”, me propozimin e Kryeministrit, Këshilli i Ministrave
V E N D O S I:
I. DISPOZITA TË PËRGJITHSHME
1. Ngritjen dhe funksionimin e Njësisë Speciale Antikorrupsion dhe Antievazion (në vijim Njësia) si person juridik publik, buxhetor, në varësi të Kryeministrit, me seli në Tiranë.
2. Njësia financohet nga buxheti i shtetit, burime të tjera të lejuara e të njohura nga legjislacioni në fuqi, si donacione vendase e të huaja, dhe të ardhura të tjera të ligjshme.
3. Misioni i Njësisë është koordinimi ndërmjet ministrive, insti tucioneve qendrore, në varësi të Kryeministrit a ministrave, administratës së prefektit dhe shoqërive tregtare, me kapital pjesërisht a tërësisht shtetëror, me qëllim zbulimin, trajtimin dhe ndëshkimin e praktikave abuzive, korruptive apo arbitrare.
II. PËRGJEGJËSITË FUNKSIONALE TË NJËSISË
4. Njësia ka këto funksione administrative:
a) Mbikëqyr veprimtarinë inspektuese të institucioneve të përmendura në pikën 3, të këtij vendimi, për zbulimin dhe ndëshkimin e rasteve korruptive e abuzive;
b) Koordinon institucionet për nisjen e hetimeve administrative apo auditimeve, kryesisht, me indicie nga institucione publike apo me kërkesë të subjekteve të interesuara, në rast dyshimi për praktika korruptive, që lidhen me veprimtarinë e institucioneve të përcaktuara në pikën 3, të këtij vendimi;
c) Mbledh, analizon dhe verifikon të dhëna e prova nga burime të ndryshme, duke kryer të gjitha veprimet e nevojshme në funksion të përmbushjes së detyrave, për aq sa nuk bien në kundërshtim me legjislacionin në fuqi;
ç) Referon praktikat korruptive dhe abuzive në prokurorinë kompetente, në rast dyshimi për konsumimin e elementeve të veprës penale;
d) Kryen verifikime dhe kontrolle pranë të gjitha institucioneve të përcaktuara në pikën 3, të këtij vendimi, në funksion të garantimit të trajtimit dhe ndjekjes së rasteve korruptive apo abuzive;
dh) Kryen inspektime të përgjithshme apo tematike pranë institucioneve të përcaktuara në pikën 3, të këtij vendimi, kur është e nevojshme;
e) Ndjek dhe zbaton detyrat e përcaktuara nga Komiteti Kombëtar Kundër Korrupsionit dhe Evazionit dhe e informon këtë të fundit për masat e marra kundër korrupsionit, ndjekjes së çështjeve dhe rasteve të dyshuara për korrupsion e paligjshmëri;
ë) Ofron shërbime këshillimi, të ekspertizës e të trajnimit, në bashkëpunim me institucionet publike e private, në seminaret dhe takimet e punës për njohjen e legjislacionit në fuqi në fushën e parandalimit e të luftës kundër korrupsionit, si dhe promovon praktikat e mira;
f) Bashkëpunon me Koordinatorin Kombëtar Kundër Korrupsionit dhe Rrjetin e Koordinatorëve Antikorrupsion për ndjekjen, analizimin dhe trajtimin e praktikave korruptive apo abuzive.
5. Njësia do të përqendrohet në rastet korruptive, abuzive apo të shpërdorimit të strukturave të përmendura në pikën 3, të këtij vendimi, si më poshtë vijon:
a) Administratë publike;
b) Shërbime publike;
c) Regjim i tokës (kompensimi, legalizimi, qiraja, koncesionet etj.)
ç) Leje, licenca dhe autorizime;
d) Prokurim publik;
dh) Shkelje të mundshme penale në fushën tatimore dhe doganore.
6. Institucioni, që i nënshtrohet kontrollit apo verifikimit nga ana e Njësisë, ka për detyrë të vendosë në dispozicion të Njësisë të gjitha dokumentet dhe materialet e kërkuara ose kopje të njësuara me origjinalin e tyre në kohën dhe mënyrën e kërkuar. Në rastet kur ka pengesë ligjore për vënien në dispozicion të dokumenteve të klasifikuara, këqyrja dhe marrja e tyre bëhen sipas legjislacionit në fuqi.
7. Institucioni, që i nënshtrohet kontrollit apo verifikimit, ka për detyrë të japë sqarime e shpjegime për çështje që lidhen me objektin e verifikimit apo të kontrollit si dhe për fakte e rrethana të tjera, që kanë lidhje me to, kur kërkohet nga Njësia.
8. Subjektet, veprimtaria e të cilave është nën verifikim, ftohen të japin sqarime e shpjegime për çështje që lidhen me objektin e verifikimit dhe për fakte e rrethana të tjera, që kanë lidhje me to. Shpjegimet dhe sqarimet mbahen me procesverbal, i cili nënshkruhet nga grupi i punës dhe subjekti. Grupi i punës, gjatë ushtrimit të detyrës, dokumenton çdo sqarim apo shpjegim që u jepet nga persona të tretë. Ballafaqimi i personave të tretë me subjektet mund të bëhet në rastin kur personat e tretë pranojnë dhe kur nuk kërkojnë t’u ruhet anonimati. Për mënyrën, afatet dhe kryerjen e verifikimeve zbatohen rregullat e përcaktuara në Kodin e Procedurave Administrative.
9. Njësia ka akses në bazat e të dhënave shtetërore, sipas nevojave të përcaktuara nga rekomandimet e Komitetit Kombëtar kundër Korrupsionit dhe Evazionit.
10. Në funksion të koordinimit ndërinstitucional dhe vendosjes së prioriteteve ngrihet Komiteti Kombëtar kundër Korrupsionit dhe Evazionit, që ka në përbërje këta anëtarë:
a) Kryeministrin;
b) Ministrin e Drejtësisë;
c) Ministrin e Financave dhe Ekonomisë;
ç) Ministrin e Brendshëm.
11. Me ftesë të Komitetit Kombëtar kundër Korrupsionit dhe Evazionit mund të marrin pjesë Drejtori Ekzekutiv i Autoritetit të Mbikëqyrjes Financiare dhe Inspektori i Përgjithshëm i Inspektoratit të Lartë të Deklarimit dhe Kontrollit të Pasurive dhe Konfliktit të Interesave.
12. Komiteti mblidhet me kërkesë të Kryeministrit, të paktën një herë në 3 (tre) muaj.
13. Njësia bashkëpunon me struktura të vendeve të tjera përgjegjëse për çështjet antikorrupsion, sipas marrëveshjeve të lidhura për këtë qëllim. Në këtë rast, marrëveshjet bëhen nëpërmjet ministrit të Drejtësisë.
14. Ministria e Drejtësisë, me qëllim zbatimin e këtij vendimi, nënshkruan memorandum mirëkuptimi me Inspektoratin e Lartë të Deklarimit dhe Kontrollit të Pasurive dhe Konfliktit të Interesave, Autoritetin e Mbikëqyrjes Financiare, Prokurorinë e Përgjithshme dhe Prokurorinë e Posaçme për nxitjen e bashkëpunimit me Njësinë për çështje të antikorrupsionit dhe antievazionit.
III. ORGANIZIMI DHE FUNKSIONIMI I NJËSISË
15. Njësia organizohet në nivel qendror dhe e shtrin veprimtarinë e saj në të gjithë territorin e Republikës së Shqipërisë.
16. Njësia drejtohet nga drejtori i Përgjithshëm, i cili organizon dhe drejton të gjithë veprimtarinë e Njësisë dhe përgjigjet përpara Kryeministrit. Drejtori i Përgjithshëm emërohet nga Kryeministri.
17. Struktura dhe organika e Njësisë miratohen me urdhër të Kryeministrit, sipas përcaktimeve në legjislacionin në fuqi për organizimin dhe funksionimin e administratës shtetërore, dhe ka në përbërje edhe punonjës të institucioneve të varësisë së Kryeministrisë, Ministrisë së Brendshme dhe Ministrisë së Financave dhe Ekonomisë, me kohë të plotë ose të pjesshme.
18. Rregullat për metodat e brendshme të punës dhe sjelljen e personelit të Njësisë miratohen nga drejtori i Përgjithshëm.
19. Marrëdhëniet e punës së drejtorit të Përgjithshëm dhe punonjësve të Njësisë rregullohen në bazë të dispozitave të Kodit të Punës.
20. Rregullat për përzgjedhjen e punonjësve të Njësisë përcaktohen në rregulloren e brendshme të Njësisë, të miratuar nga drejtori i Përgjithshëm. Punonjësit e institucioneve të tjera, me kohë të plotë ose të pjesshme, përcaktohen nga titullari përkatës, me propozimin e drejtorit të Përgjithshëm të Njësisë Speciale Antikorrupsion dhe Antievazion.
21. Punonjësit e Njësisë nënshkruajnë deklaratë konfidencialiteti dhe pajisen me certifikatë sigurimi të personelit, sipas legjislacionit në fuqi.
22. Punonjësit e Njësisë, përfshirë punonjësit me kohë të plotë nga institucionet e tjera, përfitojnë shtesë mbi pagë në masën 50 000 (pesëdhjetë mijë) lekë në muaj, ndërsa punonjësit me kohë të pjesshme përfitojnë shtesë mbi pagë në masën 25 000 (njëzet e pesë mijë) lekë në muaj.
23. Njësia ka stemën, logon dhe vulën zyrtare. Stema përbëhet nga Stema e Republikës së Shqipërisë, me shënimet “Republika e Shqipërisë, Kryeministria, Njësia Speciale Antikorrupsion dhe Antievazion”, në përputhje me përcaktimet e vendimit të Këshillit të Ministrave për mënyrën e përdorimit të stemës së Republikës së Shqipërisë.
24. Vula e Njësisë ka formën dhe elementet e përcaktuara në vendimin e Këshillit të Ministrave për rregullat e prodhimit, të administrimit, kontrollit dhe ruajtjes së vulave zyrtare. Vula prodhohet, administrohet dhe ruhet në përputhje me legjislacionin në fuqi.
25. Drejtori i Përgjithshëm i Njësisë miraton manualet, procedurat dhe urdhrat e punës, që shërbejnë për përmbushjen e detyrave e të funksioneve të njësisë.
26. Ngarkohet Njësia Speciale Antikorrupsion dhe Antievazion dhe të gjitha institucionet e përmendura në këtë vendim për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
RREGULLAT, KUSHTET DHE PROCEDURAT E PRIVATIZIMIT TË BANESAVE QË KANË QENË SUBJEKT I LIGJIT NR.7652, DATË 23.12.1992, “PËR PRIVATIZIMIN E BANESAVE SHTETËRORE”, DHE TË LIGJIT NR.9321, DATË 25.11.2004, “PËR PRIVATIZIMIN E BANESAVE DHE OBJEKTEVE TË KTHYERA NË BANESA, TË NDËRTUARA ME FONDET E SHOQËRIVE DHE TË NDËRMARRJEVE SHTETËRORE”
Në mbështetje të nenit 100 të Kushtetutës dhe të pikave 1, shkronja “a”, e 3, të nenit 77, të ligjit nr.22/2018, “Për strehimin social”, me propozimin e ministrit të Financave dhe Ekonomisë, Këshilli i Ministrave
V E N D O S I:
1. Qëllimi i këtij vendimi është përcaktimi i rregullave, kushteve dhe procedurave të privatizimit dhe përfituesve, pas hyrjes në fuqi të ligjit nr.22/2018, “Për strehimin social”, për banesat ose objektet e kthyera në banesa të ndërtuara nga shteti, të cilat vijojnë të jenë në pronësi të shtetit e rezultojnë të paprivatizuara dhe të paregjistruara në regjistrin kadastral të pasurive të paluajtshme, kur këto banesa:
a) kanë qenë objekt privatizimi sipas ligjit nr.7652, datë 23.12.1992, “Për privatizimin e banesave shtetërore”, por kanë mbetur pa u privatizuar nga familja që e ka poseduar me kontratë qiraje me ish-ndërmarrjet komunale banesa;
b) janë objekt privatizimi dhe janë banesa të ndërtuara deri më 31.12.1999 dhe që i kanë kaluar në administrim dhe/ose pronësi Entit Kombëtar të Banesave (në vijim, EKB) me akte nënligjore, sipas ligjit nr.9321, datë 25.11.2004, “Për privatizimin e banesave dhe objekteve, të kthyera në banesa me fondet e shoqërive dhe ndërmarrjeve shtetërore”.
2. Privatizimi i banesave, që kanë qenë objekt i ligjit nr.7652, datë 23.12.1992, “Për privatizimin e banesave shtetërore”, dhe që, pas hyrjes në fuqi të ligjit nr.22/2018, “Për strehimin social”, figurojnë në pronësi të shtetit, kryhet në emër të personit, i cili ka pasur kontratë qiraje me shtetin para vitit 1992 dhe të personave të tjerë madhorë të familjes, sipas certifikatës së gjendjes familjare të datës 1.12.1992. Kontrata e qirasë ose, në mungesë të saj, dokumente që vërtetojnë qiradhënien para vitit 1992, të parashikuara në shkronjën “a”, të pikës 11, të këtij vendimi, shërbejnë për të vërtetuar personin si përfitues i privatizimit.
3. Privatizimi i banesave dhe i objekteve të kthyera në banesa, që kanë qenë objekt i ligjit nr.9321, datë 25.11.2004, “Për privatizimin e banesave dhe objekteve, të kthyera në banesa me fondet e shoqërive dhe ndërmarrjeve shtetërore” dhe që, pas hyrjes në fuqi të ligjit nr.22/2018, “Për strehimin social”, rezultojnë ende të paprivatizuara, bëhet në emër të personit/ave, që ka/në emrin në listën e trashëguar nga ish-ndërmarrjet shtetërore dhe të personave të tjerë madhorë të familjes, që bëjnë pjesë në certifikatën e gjendjes familjare të datës 1.12.2004.
4. Privatizimi i banesave apo i objekteve të kthyera në fond banese, sipas këtij vendimi, bëhet bazuar në sipërfaqet e banimit, të përcaktuara për normat e strehimit që janë në fuqi në momentin e privatizimit. Çdo sipërfaqe e përfituar mbi atë të normave të strehimit do të llogaritet me çmimin e tregut.
5. Privatizimi i banesave dhe i objekteve të kthyera në banesa, të parashikuara në shkronjën “a”, të pikës 1, të nenit 77, të ligjit nr.22/2018, “Për strehimin social”, bëhet nga subjekti shtetëror që ka në pronësi objektin ose që i ka kaluar pronësia e objektit me vendim të Këshillit të Ministrave, përkatësisht, Enti Kombëtar i Banesave (EKB) ose njësitë e vetëqeverisjes vendore, pasi të jetë lëshuar certifikata përkatëse e pronësisë për çdo njësi banimi. Nëse EKB-ja ka filluar procedurën e transferimit të banesave dhe të objekteve të kthyera në banesa në pronësi të njësive të vetëqeverisjes vendore, këto të fundit përfundojnë procedurën e regjistrimit të këtyre objekteve në emër të tyre dhe kryejnë privatizimin.
6. Pas lëshimit të certifikatës së pronësisë, njësitë e vetëqeverisjes vendore ose EKB-ja cakton strukturën përgjegjëse që përgjigjet për organizimin e punës për privatizimin: shqyrtimin e kërkesave, plotësimin e dokumentacionit të nevojshëm, verifikimin e kushteve ligjore të nevojshme për privatizimin, llogaritjen e vlerave të privatizimit, përgatitjen e vendimit të privatizimit dhe të kontratës për privatizimin.
7. Menjëherë, me marrjen e certifikatës së pronësisë së objektit që do të privatizohet, EKB-ja ose njësia e vetëqeverisjes vendore njofton qytetarët me mjete të njoftimit publik, ku përfshihen afishimi i njoftimit në mjediset e tyre dhe njoftimi elektronik on-line në faqet zyrtare përkatëse, për të paraqitur kërkesat për privatizimin e banesave, objekteve të kthyera në fond banese dhe për procedurat që duhet të ndjekin. Njoftimi përmban informacionin e nevojshëm për objektet që privatizohen.
8. Njësia përgjegjëse për privatizimin në EKB dhe në njësinë e vetëqeverisjes vendore ka për detyrë:
a) të kontrollojë kërkesat e depozituara nga subjektet e interesuara për privatizim;
b) të plotësojë, në bashkëpunim me personat e përcaktuar në pikat 2 e 3, të këtij vendimi, formularët e privatizimit;
c) të evidentojë gjendjen familjare të personave të interesuar për privatizimin sipas pikave 2 e 3, të këtij vendimi;
ç) të llogarisë vlerën e privatizimit për çdo familje;
d) të marrë vendim për pranimin ose refuzimin e privatizimit;
dh) të përgatisë kontratën e privatizimit;
e) të përgatisë dosjen e privatizimit;
ë) të dërgojë dosjen, përfshirë kontratën e privatizimit, për regjistrim në Agjencinë Shtetërore të Kadastrës.
9. Procedura e privatizimit fillon me paraqitjen e kërkesës për privatizim nga:
a) subjekti i pajisur me autorizim nga organet kompetente ose, në rast vdekjeje, të trashëgimtarëve të tij; ose
b) çdo person i autorizuar me prokurë nga subjekti i përcaktuar në shkronjën “a”, të kësaj pike.
10. Kërkesa i dërgohet, brenda 60 (gjashtëdhjetë) ditëve nga njoftimi publik i parashikuar, sipas pikës 7, të këtij vendimi, EKB-së ose njësisë së qeverisjes vendore në territorin administrativ të së cilës ndodhet banesa. Kërkesa duhet të përmbajë të dhënat, si më poshtë vijon:
a) Subjektin që i drejtohet EKB-së ose njësisë së vetëqeverisjes vendore;
b) Të dhënat personale të subjektit kërkues, sipas pikave 9 e 11, të këtij vendimi;
c) Të dhënat lidhur me banesën ose objektin e kthyer në fond banese, për të cilin kërkohet privatizimi;
ç) Datën e kërkesës e nënshkrimin e kërkuesit.
11. Kërkesa e depozituar pranë EKB-së ose njësisë së qeverisjes vendore duhet të shoqërohet me dokumentacionin e mëposhtëm:
a) Dokument që tregon se personi gëzon të drejtën e privatizimit të banesës, të tillë, si: kontrata e qirasë, akti i dhënies ose i marrjes në dorëzim të banesës nga ish-ndërmarrja komunale banesa ose autorizim nga ish-organet administrative publike që e kanë strehuar në atë banesë;
b) Certifikatë e gjendjes familjare e datës 1.12.1992 dhe certifikatë aktuale të gjendjes familjare në momentin e privatizimit për efekt të përcaktimit të sipërfaqes së banesës që i takon familjes, bazuar në normat e strehimit në momentin e privatizimit dhe të përcaktimit të sipërfaqes së tepërt mbi normën e strehimit, nëse ka një të tillë;
c) Dëshmi e trashëgimisë, nëse ka një të tillë, në zbatim të shkronjës “a”, të pikës 9, të këtij vendimi;
ç) Prokurë, nëse ka një të tillë, në zbatim të shkronjës “b”, të pikës 9, të këtij vendimi;
d) Dokument identifikimi i kërkuesit (kartë identiteti dhe/ose pasaportë biometrike).
Dokumentet e listës së mësipërme, që sigurohen nga portali elektronik qeveritar e-Albania, sigurohen nga vetë EKB-ja dhe njësitë e vetëqeverisjes vendore.
12. Pas dorëzimit të kërkesës e të dokumentacionit që shoqëron atë, struktura përkatëse e EKB-së ose e njësisë përgjegjëse për privatizimin plotëson formularët e privatizimit, sipas modelit të parashikuar në shtojcën 1, të këtij vendimi. Formulari shoqërohet me planimetrinë e apartamentit, e cila hartohet e nënshkruhet nga projektues të licencuar, sipas matjeve në vend me shpenzimet e përfituesit të privatizimit. Kur banesa është individuale, planimetria e banesës shoqërohet edhe me planvendosjen e planimetrinë e truallit. Formulari nënshkruhet nga personat përfitues nga privatizimi, sipas pikave 2 e 3, të këtij vendimi, dhe nga përgjegjësi i strukturës së përmendur në pikën 6, të këtij vendimi.
13. Formulari përgatitet në 2 (dy) kopje, nga të cilat njëra i jepet personit përfitues dhe tjetra futet në dosjen e privatizimit nga përgjegjësi për privatizimin në EKB ose njësinë e vetëqeverisjes vendore, që përgatit e administron dosjen e privatizimit.
14. Pas miratimit të kërkesës së personit të interesuar për privatizim dhe plotësimit të formularit, përgjegjësi i EKB-së ose i njësisë së privatizimit përgatit dosjen e privatizimit, e cila përmban:
a) kërkesën e personit për privatizimin e banesës;
b) formularin e privatizimit;
c) certifikatën e gjendjes familjare, sipas përcaktimeve të bëra në pikën 11, të këtij vendimi;
ç) vlerën e privatizimit të truallit e të apartamentit a banesës individuale;
d) planimetrinë e apartamentit ose, në rastin e banesave individuale, planvendosjen e banesës dhe planimetrinë e truallit.
15. EKB-ja ose njësia përgjegjëse e privatizimit identifikon përfituesit e privatizimit, sipas pikave 2 e 3, të këtij vendimi, mbështetur në përcaktimet sipas certifikatës së gjendjes familjare të datës 1.12.1992.
16. EKB-ja ose njësitë përgjegjëse për privatizimin në njësinë e vetëqeverisjes vendore, me paraqitjen e kërkesës, shqyrtojnë dokumentacionin e dosjes në prani të personit të interesuar dhe marrin vendim për:
a) pranimin e kërkesës;
b) refuzimin e kërkesës, kur nuk plotësohen kushtet e dokumentacioni i nevojshëm për privatizim, sipas parashikimeve në këtë vendim;
c) kthimin e kërkesës për plotësimin e mangësive në dokumentacion.
17. Plotësimi i mangësive nga subjekti bëhet brenda 15 (pesëmbëdhjetë) ditëve nga data e marrjes së njoftimit nga EKB-ja ose njësia e vetëqeverisjes vendore. Mosplotësimi i mangësive brenda afatit të përcaktuar më sipër sjell mospranimin e kërkesës.
18. Subjekti i interesuar për privatizimin ka të drejtë t’i drejtohet me shkrim EKB-së ose njësisë së vetëqeverisjes vendore për çdo ankim lidhur me përllogaritjet e kryera në formularët e përcaktuar në këtë vendim. EKB-ja ose njësia e vetëqeverisjes vendore ka detyrimin t’i kthejë përgjigje me shkrim ankuesit brenda 10 (dhjetë) ditëve.
19. Vlera e privatizimit përbëhet nga:
a) tarifa e privatizimit të banesës; dhe
b) tarifa e privatizimit të truallit.
Pagesa e vlerës së privatizimit mund të bëhet me pagesë të menjëhershme ose me këste mujore, sipas kushteve që përcaktohen nga njësia e vetëqeverisjes vendore ose EKB-ja.
20. Të ardhurat e krijuara nga privatizimi arkëtohen nga institucioni që ka në pronësi objektin, përkatësisht nga:
a) njësia e vetëqeverisjes vendore;
b) EKB-ja.
21. Tarifa e privatizimit të objektit llogaritet sipas tabelës 1, bashkëlidhur këtij vendimi. Tarifa e privatizimit korrigjohet, për efekt të nivelit të banimit dhe të vendndodhjes, sipas koeficientëve të përcaktuar në tabelat 2 e 3 që i bashkëlidhen këtij vendimi. Për efekt privatizimi, sipas këtij vendimi, banesa të kategorisë së parë vlerësohen banesat që ndodhen në rrugë kryesore. Ndarja e banesave sipas kategorive bëhet nga njësitë e vetëqeverisjes vendore.
22. Tarifa e privatizimit të truallit përcaktohet në përputhje me legjislacionin përkatës në zbatim të shkronjës “a”, të pikës 1, të nenit 77, të ligjit nr.22/2018, “Për strehimin social”, dhe është, si më poshtë vijon:
a) Për zonat urbane të njësive të vetëqeverisjes vendore në Tiranë, Durrës, Shkodër, Vlorë, Elbasan, Pogradec, Lezhë, Krujë dhe Kavajë, 1080 lekë/m2;
b) Për zonat urbane brenda vijave kufizuese të njësive të vetëqeverisjes vendore të tjera, 720 lekë/m2;
c) Për zonat rurale llogaritet duke iu referuar tarifës së privatizimit të truallit në zonën periferike të njësisë së vetëqeverisjes vendore më të afërt me banesën që do të privatizohet e duke shumëzuar këtë tarifë me koeficientin 0.3.
23. Vlera e privatizimit, sipas pikës 19, të këtij vendimi, shumëzohet me indeksin e korrigjimit të çmimeve, duke marrë për bazë muajin dhjetor 1992.
24. Shpenzimet administrative të privatizimit përcaktohen rast pas rasti për çdo privatizim, duke llogaritur të gjitha shpenzimet e kryera për realizimin e procesit të privatizimit, si: regjistrimi i pronës, noterizimi i kontratave, taksa e tatime të aplikueshme e të ngjashme me këto, të cilat mbulohen nga përfituesi i privatizimit.
25. Para nënshkrimit të kontratës, përfituesi i privatizimit paguan shpenzimet administrative të parashikuara në pikën 24, të këtij vendimi. Me pagimin e këtij detyrimi, përfituesi i privatizimit ka të drejtë të nënshkruajë kontratën, duke paguar vlerën e privatizimit në mënyrë të menjëhershme ose me këste mujore të përballueshme, sipas parashikimeve të nenit 3, të ligjit nr.22/2018, “Për strehimin social”, me 2% interesa në vit.
26. Titullari i EKB-së, kryetari i njësisë së vetëqeverisjes vendore ose personat e autorizuar prej tyre lidhin kontratën e privatizimit, ku përcaktohen:
a) palët nënshkruese të kontratës;
b) objekti i privatizimit, apartamenti, banesa individuale dhe trualli përkatës;
c) vlera e privatizimit, që i takon të paguajë personi përfitues;
ç) mënyra e shlyerjes së vlerës së privatizimit;
d) mënyra e arkëtimit të vlerës së privatizimit;
dh) kalimi i së drejtës së pronësisë mbi apartamentin;
e) sanksionet, në rastin e mospërmbushjes në kohë të detyrimit.
27. Kontrata e privatizimit formalizohet me akt noterial dhe mbahet në 4 (katër) kopje identike, prej të cilave: 1 (një) kopje e mban noteri, 1 (një) kopje i jepet subjektit përfitues, 1 (një) kopje mbahet nga struktura përgjegjëse në dosjen e privatizimit dhe 1 (një) kopje së bashku me dokumentacionin e dosjes së privatizimit i dërgohet Agjencisë Shtetërore të Kadastrës për regjistrim nga struktura përgjegjëse e EKB-së ose e njësisë së vetëqeverisjes vendore.
28. Për kontratat e privatizimit me këste mujore, EKB-ja ose njësia e vetëqeverisjes vendore lidh me subjektin/subjektet përfituese kontratë shitjeje me rezervë të pronës, deri në shlyerjen e plotë të vlerës së privatizimit dhe shpenzimeve përkatëse me afat kohor jo më shumë se 15 (pesëmbëdhjetë) vjet. Kjo kontratë bëhet pjesë e dosjes së privatizimit dhe regjistrohet në ASHK me shënimin e rezervës së pronësisë.
29. Me shlyerjen e plotë të vlerës së privatizimit, struktura përgjegjëse për privatizimin, për ndjekjen dhe zbatimin e kontratës së privatizimit në EKB ose në njësinë e vetëqeverisjes vendore, lëshon vërtetimin përkatës, në favor të subjektit përfitues, sipas modelit të shtojcës 2, bashkëlidhur këtij vendimi. Ky vërtetim depozitohet nga përfituesi në Agjencinë Shtetërore të Kadastrës. Me bashkimin e vërtetimit për shlyerjen e plotë të vlerës së privatizimit në dosjen e privatizimit të depozituar në ASHK, pronësia mbi apartamentin, banesën individuale dhe truallin përkatës kalon në favor të personit përfitues.
30. Me regjistrimin në Agjencinë Shtetërore të Kadastrës, personi përfiton të drejtën e marrjes së certifikatës së pronësisë mbi apartamentin a banesën individuale dhe truallit përkatës.
31. Privatizimi, sipas këtij vendimi, ka afat deri në 2 (dy) vjet nga hyrja në fuqi e tij.
32. Subjekti humbet të drejtën për të kërkuar privatizimin e banesës, në të cilën është strehuar, kur:
a) nuk depoziton kërkesën;
b) nuk depoziton dokumentacionin e përcaktuar në pikat 9 e 11, të këtij vendimi;
c) refuzon që të paguajë vlerën e privatizimit të banesës ose të objektit të kthyer në banesë.
33. Kur ndonjë nga anëtarët madhorë të familjes, që figuron si pjesëtar në certifikatën e gjendjes familjare të saj, nuk banon në banesë në momentin e privatizimit, nuk merr njoftimin për privatizim e, për rrjedhojë, nuk dorëzon dokumentacionin e nevojshëm e nuk paraqitet për të lidhur kontratën, EKB-ja ose njësia e vetëqeverisjes vendore bën njoftimin me shpallje publike në faqen e saj zyrtare on-line. Nëse pas 3 (tre) muajve nga shpallja publike personi përsëri nuk paraqitet, atëherë procedura e privatizimit vijon dhe kontrata lidhet me anëtarët e tjerë madhorë të familjes.
34. Kur ndonjë nga anëtarët madhorë të familjes, që figuron si pjesëtar i certifikatës së gjendjes familjare të saj, heq dorë nga privatizimi, atëherë e drejta e tij/saj u kalon anëtarëve të tjerë të familjes, duke u ndarë në pjesë të barabarta sipas rregullave për heqjen dorë, parashikuar në nenin 191, të Kodit Civil.
35. Të gjitha banesat që nuk privatizohen dhe janë në pronësi të njësisë së vetëqeverisjes vendore i shtohen fondit publik të banesave sociale. E drejta e pronësisë mbi banesat e EKB-së që mbeten pa privatizuar kalon në favor të njësive të vetëqeverisjes vendore në territorin e të cilave ndodhet banesa, që t’i shtohen fondit publik të banesave sociale. Shpenzimet administrative për procedurat e kalimit të pronësisë do të përballohen nga njësitë e vetëqeverisjes vendore.
36. Njësia e vetëqeverisjes vendore ose EKB-ja, pas lidhjes së kontratës së privatizimit, hedh të dhënat në vijimësi deri në shlyerjen e plotë të vlerës së privatizimit në librin e privatizimit, i cili krijohet sipas modelit të shtojcës 3, që i bashkëlidhet këtij vendimi.
37. Ngarkohen njësitë e vetëqeverisjes vendore, Enti Kombëtar i Banesave dhe Agjencia Shtetërore e Kadastrës për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
MIRATIMIN E KONTRATËS ME NDARJE PRODHIMI, E NDRYSHUAR DHE E RIFORMULUAR, PËR KËRKIMIN, ZHVILLIMIN DHE PRODHIMIN E HIDROKARBUREVE NË TOKË, NË SHQIPËRI, BLLOKU “2-3”, NDËRMJET MINISTRISË SË INFRASTRUKTURËS DHE ENERGJISË SË SHQIPËRISË (E PËRFAQËSUAR NGA AGJENCIA KOMBËTARE E BURIMEVE NATYRORE/AKBN) DHE SHELL UPSTREAM ALBANIA B.V.
Në mbështetje të nenit 100 të Kushtetutës dhe të nenit 13, të ligjit nr.7746, datë 28.7.1993, “Për hidrokarburet (kërkimi dhe prodhimi)”, të ndryshuar, me propozimin e ministrit të Infrastrukturës dhe Energjisë, Këshilli i Ministrave
V E N D O S I:
1. Miratimin e kontratës me ndarje prodhimi, e ndryshuar dhe e riformuluar, për kërkimin, zhvillimin dhe prodhimin e hidrokarbureve në tokë, në Shqipëri, blloku “2-3”, ndërmjet Ministrisë së Infrastrukturës dhe Energjisë së Shqipërisë (e përfaqësuar nga Agjencia Kombëtare e Burimeve Natyrore/AKBN) dhe Shell Upstream Albania B.V., sipas tekstit që i bashkëlidhet këtij vendimi.
2. Vendimi nr.754, datë 8.7.2009, i Këshillit të Ministrave, “Për miratimin e kontratës, me ndarje prodhimi, për kërkimin, zhvillimin dhe prodhimin e hidrokarbureve, në Shqipëri, në tokë, në blloqe “2–3”, ndërmjet Ministrisë së Ekonomisë, Tregtisë dhe Energjetikës, përfaqësuar nga Agjencia Kombëtare e Burimeve Natyrore (AKBN) dhe “DWM Petroleum AG””, shfuqizohet.
3. Ngarkohet Ministria e Infrastrukturës dhe Energjisë për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
DISA SHTESA DHE NDRYSHIME NË VENDIMIN NR.659, datë 10.10.2019, TË KËSHILLIT TË MINISTRAVE, “pëR MIRATIMIN E STRATEGJISË KOMBËTARE PËR PUNËSIM DHE AFTËSI 2019 – 2022 DHE TË PLANIT TË VEPRIMIT PËR ZBATIMIN E SAJ”
Në mbështetje të nenit 100 të Kushtetutës, me propozimin e ministrit të Financave dhe Ekonomisë, Këshilli i Ministrave
V E N D O S I:
1. Miratimin e disa shtesave dhe ndryshimeve në planin e veprimit dhe pasaportën e indikatorëve të Strategjisë Kombëtare për Punësim dhe Aftësi 2019 -2022, sipas teksteve që i bashkëlidhen këtij vendimi.
2. Ngarkohen Ministria e Financave dhe Ekonomisë, Agjencia Kombëtare e Punësimit dhe Aftësive, Agjencia Kombëtare për Arsimin, Formimin Profesional dhe Kualifikimet dhe Inspektorati Shtetëror i Punës dhe Shërbimeve Shoqërore për ndjekjen e zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
NJË SHTESË FONDI NË BUXHETIN E MIRATUAR PËR VITIN 2020 PËR DREJTORINË E SHËRBIMEVE QEVERITARE, PËR PËRBALLIMIN E SHPENZIMEVE TË ORGANIZIMIT TË SAMITIT DIGJITAL TË BALLKANIT PERËNDIMOR
Në mbështetje të nenit 100 të Kushtetutës, të neneve 5 e 45, të ligjit nr.9936/2016, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.88/2019, “Për buxhetin e vitit 2020”, me propozimin e ministrit të Infrastrukturës dhe Energjisë, Këshilli i Ministrave
V E N D O S I:
1. Drejtorisë së Shërbimeve Qeveritare, në buxhetin e miratuar për vitin 2020, në zërin “Shërbime qeveritare”, i shtohet fondi prej 44 000 000 (dyzet e katër milionë) lekësh për përballimin e shpenzimeve të organizimit të “Samitit Digjital të Ballkanit Perëndimor”, që do të organizohet në Tiranë, në datat 2 dhe 3 prill 2020.
2. Efekti financiar prej 44 000 000 (dyzet e katër milionë) lekësh të përballohet nga fondi rezervë i buxhetit të shtetit, miratuar për vitin 2020.
3. Ngarkohen Ministria e Financave dhe Ekonomisë, Ministria e Infrastrukturës dhe Energjisë dhe Drejtoria e Shërbimeve Qeveritare për koordinimin e organizimin e këtij samiti dhe zbatimin e këtij vendimi.
Ky vendim hyn në fuqi menjëherë dhe botohet në “Fletore zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
CAKTIMIN E NJËSIVE ZBATUESE PËR RINDËRTIMIN E SHTËPIVE INDIVIDUALE
Në mbështetje të nenit 100 të Kushtetutës dhe të neneve 13, shkronja “b”, nënndarja “iii”, dhe 16, pika 3, të aktit normativ nr.9, datë 16.12.2019, të Këshillit Ministrave, “Për përballimin e pasojave të fatkeqësisë natyrore”, miratuar me ligjin nr.97/2019, me propozimin e ministrit të Shtetit për Rindërtimin, Këshilli i Ministrave
V E N D O S I:
1. Caktimin e Fondit Shqiptar të Zhvillimit si njësi zbatuese për rindërtimin, sipas projekteve model, të shtëpive individuale të dëmtuara nga tërmeti, jashtë zonave të reja të shpallura në bashkitë: Durrës, Kamzë, Kavajë, Rrogozhinë, Krujë, Kurbin, Lezhë, Mirditë, Shijak dhe Vorë.
2. Caktimin e Bashkisë Tiranë si njësi zbatuese për rindërtimin, sipas projekteve model, të shtëpive individuale të dëmtuara nga tërmeti, jashtë zonave të reja të shpallura në Bashkinë Tiranë.
3. Ngarkohen ministri i Shtetit për Rindërtimin, Fondi Shqiptar i Zhvillimit dhe Bashkia Tiranë për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
EMËRIM NË DETYRË
Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave
V E N D O S I:
Znj. Meri Kumbe emërohet zëvendësministër i Kulturës.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
LIRIM NGA DETYRA
Në mbështetje të nenit 100 të Kushtetutës dhe të pikës 2, të nenit 6, të ligjit nr.9000, datë 30.1.2003, “Për organizimin dhe funksionimin e Këshillit të Ministrave”, me propozimin e Kryeministrit, Këshilli i Ministrave
V E N D O S I:
Znj. Valbona Shujaku, zëvendësministër i Kulturës, lirohet nga kjo detyrë.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
DISA NDRYSHIME DHE SHTESA NË VENDIMIN NR.820, DATË 13.10.2010, TË KËSHILLIT TË MINISTRAVE, “PËR MIRATIMIN E LISTËS SË INVENTARIT TË PRONAVE TË PALUAJTSHME SHTETËRORE TË INSTITUCIONEVE TË VARËSISË, TË CILAT I KALOJNË NË PËRGJEGJËSI ADMINISTRIMI MINISTRISË SË BUJQËSISË, USHQIMIT DHE MBROJTJES SË KONSUMATORIT”
Në mbështetje të nenit 100 të Kushtetutës dhe të neneve 8, pika 3, e 13, të ligjit nr.8748, datë 22.2.2001, “Për pronat e paluajtshme të shtetit”, të ndryshuar, me propozimin e ministrit të Bujqësisë dhe Zhvillimit Rural, Këshilli i Ministrave
V E N D O S I:
1. Në vendimin nr.820, datë 13.10.2010, të Këshillit të Ministrave, bëhen këto ndryshime dhe shtesa:
a) Paragrafi i dytë, i pikës 1, ndryshohet, si më poshtë vijon:
“Lista me nr.57 (pesëdhjetë e shtatë) përfundon me numrin rendor 240 (dyqind e dyzet).”.
b) Listës bashkëlidhur vendimit i shtohet fleta me numër 57 (pesëdhjetë e shtatë).
2. Ngarkohen Ministria e Bujqësisë dhe Zhvillimit Rural e Agjencia Shtetërore e Kadastrës, Drejtoria Vendore Elbasan, për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
KOMPENSIMIN FINANCIAR TË PRONARËVE TË PASURIVE TË PALUAJTSHME QË PREKEN NGA NDËRTIMET INFORMALE
Në mbështetje të nenit 100 të Kushtetutës, të pikave 1 e 3, të nenit 15/1, të ligjit nr.9482, datë 3.4.2006, “Për legalizimin, urbanizimin dhe integrimin e ndërtimeve pa leje”, të ndryshuar, të nenit 163, të ligjit nr.7850, datë 29.7.1994, “Kodi Civil i Republikës së Shqipërisë”, të ndryshuar, dhe të nenit 10, të ligjit nr.133/2015, “Për trajtimin e pronës dhe përfundimin e procesit të kompensimit të pronave”, me propozimin e Zëvendëskryeministrit, Këshilli i Ministrave
V E N D O S I:
1. Kompensimin financiar të pronarëve të pasurive të paluajtshme, pronë private, për sipërfaqet takuese, të zëna nga ndërtimet informale në drejtoritë vendore të Agjencisë Shtetërore të Kadastrës Elbasan, Vlorë, Tiranë Jug, Kamzë-Vorë, Rurale 1, Tiranë Veri, Sarandë, Kukës e Durrës.
2. Masa e kompensimit është 32 006,3 (tridhjetë e dy mijë e gjashtë presje tre) m² dhe vlera e përgjithshme e kompensimit financiar është 437 694 687,9 (katërqind e tridhjetë e shtatë milionë e gjashtëqind e nëntëdhjetë e katër mijë e gjashtëqind e tetëdhjetë e shtatë presje nëntë) lekë, sipas shtojcës nr.1, që i bashkëlidhet këtij vendimi.
3. Për kompensimin financiar të pronarëve të pasurive të paluajtshme, që preken nga ndërtimet pa leje, sipas shtojcës 1, që i bashkëlidhet këtij vendimi, do të veprohet, si më poshtë vijon:
a) Për numrat rendorë, sipas kolonës 13, të shtojcës 1:
Përkatësisht, për numrat rendorë 12, 43, 62 e 64, sipas seksionit të veçantë (kolona 18) të shtojcës 1, që i bashkëlidhet këtij vendimi, shuma e kompensimit financiar vihet në dispozicion nga Agjencia e Trajtimit të Pronës pas miratimit nga kreditori, sipas pikës 12, të vendimit nr.465, datë 22.6.2016, të Këshillit të Ministrave, “Për përcaktimin e procedurave dhe rregullave për kalimin e së drejtës së pronësisë mbi parcelën ndërtimore të objekteve informale”;
b) Për numrat rendorë, sipas kolonës 13, të shtojcës 1:
Përkatësisht, për numrin rendor 117, sipas seksionit të veçantë (kolona 18) të shtojcës 1, që i bashkëlidhet këtij vendimi, shuma e kompensimit financiar vihet në dispozicion nga Agjencia e Trajtimit të Pronës, pa përfunduar procedura e ekzekutimit të detyrueshëm, sipas pikës 13, të vendimit nr.465, datë 22.6.2016, të Këshillit të Ministrave, “Për përcaktimin e procedurave dhe rregullave për kalimin e së drejtës së pronësisë mbi parcelën ndërtimore të objekteve informale”;
c) Për numrat rendorë, sipas kolonës 13, të shtojcës 1:
Përkatësisht, për numrat rendorë 22, 44, 118 e 119, sipas seksionit të veçantë (kolona 18) të shtojcës 1, shuma e kompensimit financiar vihet në dispozicion nga Agjencia e Trajtimit të Pronës, pas zgjidhjes në rrugë gjyqësore të shkakut të kufizimit, sipas pikës 15, të vendimit nr.465, datë 22.6.2016, të Këshillit të Ministrave, “Për përcaktimin e procedurave dhe rregullave për kalimin e së drejtës së pronësisë mbi parcelën ndërtimore të objekteve informale”;
ç) Për numrat rendorë, sipas kolonës 13, të shtojcës 1:
Përkatësisht, për numrat rendorë 16, 52, 53, 54, 55, 56, 61, 68, 69, 70, 71 e 120, sipas seksionit të veçantë (kolona 18) të shtojcës 1, shuma e kompensimit financiar vihet në dispozicion nga Agjencia e Trajtimit të Pronës, pas zgjidhjes në rrugë gjyqësore të mbivendosjes, sipas pikës 16, të vendimit nr.465, datë 22.6.2016, të Këshillit të Ministrave, “Për përcaktimin e procedurave dhe rregullave për kalimin e së drejtës së pronësisë mbi parcelën ndërtimore të objekteve informale”.
4. Për kompensimin e pronarëve përdoren po ato të ardhura që arkëtohen nga drejtoritë vendore të Agjencisë Shtetërore të Kadastrës, si rrjedhojë e kalimit të pronësisë nëpërmjet shitjes së parcelës ndërtimore, si për pasuritë shtetërore, edhe për pasuritë e të tretëve, në favor të objekteve informale që legalizohen.
5. Drejtoritë vendore të Agjencisë Shtetërore të Kadastrës Elbasan, Vlorë, Tiranë Jug, Kamzë-Vorë, Rurale 1, Tiranë Veri, Sarandë, Kukës e Durrës të kryejnë ndryshimet përkatëse për këto pasuri, në regjistrat e pasurive të paluajtshme.
6. Ngarkohen Agjencia Shtetërore e Kadastrës dhe Agjencia e Trajtimit të Pronave për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
MIRATIMIN E MARRËVESHJES NDRYSHUESE, ME SHKËMBIM LETRASH, TË MARRËVESHJES SË HUAS, NDËRMJET REPUBLIKËS SË SHQIPËRISË DHE FONDIT TË KUVAJTIT PËR ZHVILLIMIN EKONOMIK ARAB, PËR FINANCIMIN E PROJEKTIT “REHABILITIMI I RRUGËS SË LUMIT TË VLORËS”, RATIFIKUAR ME LIGJIN NR.50/2016
Në mbështetje të nenit 100 të Kushtetutës dhe të neneve 12, 19 e 23, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Financave dhe Ekonomisë, Këshilli i Ministrave
V E N D O S I:
Miratimin e marrëveshjes ndryshuese, me shkëmbim letrash, të marrëveshjes së huas, ndërmjet Republikës së Shqipërisë dhe Fondit të Kuvajtit për Zhvillimin Ekonomik Arab, për financimin e projektit “Rehabilitimi i rrugës së lumit të Vlorës”, ratifikuar me ligjin nr.50/2016, sipas tekstit që i bashkëlidhet këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
PËRCAKTIMIN E MASËS, TË KRITEREVE, PROCEDURAVE E DOKUMENTACIONIT PËR VLERËSIMIN DHE PËRFITIMIN E PAGESËS PËR PERSONAT ME AFTËSI TË KUFIZUARA, SI DHE TË NDIHMËSIT PERSONAL
Në mbështetje të nenit 100 të Kushtetutës, të neneve 13 e 17, pika 1, të ligjit nr.57/2019, “Për asistencën sociale në Republikën e Shqipërisë”, dhe të nenit 15, të ligjit nr.8626, datë 22.6.2000, “Për statusin e invalidit paraplegjik dhe tetraplegjik”, të ndryshuar, me propozimin e ministrit të Shëndetësisë dhe Mbrojtjes Sociale, Këshilli i Ministrave
V E N D O S I:
I. KRITERET E PËRFITIMIT TË PAGESËS SË AFTËSISË SË KUFIZUAR
1. Përfitojnë pagesë të aftësisë së kufizuar personat e përcaktuar në shkronjat “a” dhe “b”, të nenit 8, të ligjit nr.57/2019, “Për asistencën sociale në Republikën e Shqipërisë”.
2. Personat me aftësi të kufizuar, që nuk plotësojnë kushtet ligjore për përfitim të pensionit të invaliditetit të punës sipas ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar, të cilët me vendim të komisioneve mjekësore të caktimit të aftësisë për punë përcaktohen se kanë nevojë për përkujdesje, përfitojnë një ndihmës personal me pagesë.
3. Vlerësimi i gjendjes mjekësore të personave të përcaktuar në pikën 1, të këtij kreu, bëhet nga komisionet mjekësore të caktimit të aftësisë për punë (KMCAP) të nivelit të parë, të Shërbimit Social Shtetëror.
4. Përfitojnë, sipas këtij vendimi, personat me aftësi të kufizuar, të përcaktuar në pikën 2, të këtij kreu, të cilët në 5 vitet e fundit para lindjes të së drejtës nuk kanë, së paku, 12 muaj sigurim shoqëror dhe nuk kanë qenë përfitues të pensionit të plotë, të pjesshëm apo të reduktuar të invaliditetit nga skema e sigurimeve shoqërore para hyrjes në fuqi të këtij vendimi.
II. VLERËSIMI I AFTËSISË SË KUFIZUAR
1. Pranë Shërbimit Social Shtetëror do të ngrihen dhe do të funksionojnë 5 (pesë) KMCAP-e të nivelit të parë, që do të vlerësojnë në nivel kombëtar dosjet e personave të përcaktuar në pikën 1, të kreut I, të këtij vendimi, me këtë përbërje:
a) 2 (dy) KMCAP të shëndetit mendor, që do të kenë në përbërje psikopediater dhe psikiatër;
b) 1 (një) KMCAP i kirurgjisë, onkologjisë, ortopedisë dhe reumatologjisë, që do të ketë në përbërje ortoped, onkolog dhe reumatolog;
c) 1 (një) KMCAP për paraplegjinë, tetraplegjinë dhe neurologjinë, që do të ketë në përbërje neurolog;
ç) 1 (një) KMCAP për sëmundje interne (nefrologji, kardiologji, gastroepatologji, endrokrinologji, hematologji, pneumoalergologji), që do të ketë në përbërje internist, kardiolog, nefrolog dhe pneumoalergolog.
2. KMCAP-ja e nivelit të parë përbëhen nga pesë anëtarë, të cilët përcaktohen me urdhër të ministrit përgjegjës për çështjet e shëndetësisë.
3. Në përbërje të çdo KMCAP-je të nivelit të parë mer pjesë, si anëtar me të drejtë vote, edhe një mjek, punonjës i Shërbimit Social Shtetëror.
4. Shpenzimet për pagesën e anëtarëve të KMCAP-së të nivelit të parë përballohen nga buxheti i Shërbimit Social Shtetëror.
5. KMCAP-të e nivelit të parë marrin vendim për grupin e përfitimit, përfitimet dhe afatet e përfitimit për secilin grup, sipas anekseve nr.1 e nr.2, që i bashkëlidhen këtij vendimi.
6. Kundër vendimit të KMCAP-së të nivelit të parë personi mund të bëjë ankim në Komisionin Epror Mjekësor të Caktimit të Aftësisë për Punë (Komisioni Epror).
7. Pranë Shërbimit Social Shtetëror ngrihen 4 (katër) komisione eprore, të cilat përbëhen nga 5 anëtarë për çdo komision dhe që zgjidhen në detyrë nga ministri përgjegjës për çështjet shëndetësore dhe sociale. Komisionet eprore të shërbimit social shtetëror janë:
a) Komisioni Epror për Sëmundje të Përgjithshme;
b) Komisioni Epror për Sëmundje të Shëndetit Mendor;
c) Komisioni Epror për Paraplegjinë dhe Tetraplegjinë;
ç) Komisioni Epror për Verbërinë.
8. Kryetari dhe anëtarët e komisionit epror janë mjekë me përvojë profesionale në fushën e ekspertizës dhe mjeku relator i Shërbimit Social Shtetëror. Anëtari i pestë i komisionit epror është me profesion jurist, me përvojë në fushën e aftësisë së kufizuar dhe përfaqësues i ministrisë që ka në fushën e përgjegjësisë shtetërore çështjet e aftësisë së kufizuar. Anëtarët e komisionit duhet të kenë një figurë të pastër morale dhe të mos jenë të dënuar penalisht. Mandati i anëtarit të komisionit epror është 4-vjeçar dhe me të drejtë rizgjedhjeje.
9. Rregullat e detajuara për organizimin dhe funksionimin e KMCAP-ve të nivelit të parë dhe të komisioneve eprore përcaktohen në rregulloren e miratuar me urdhër të ministrit përgjegjës për çështjet sociale.
10. Shpenzimet për pagesën e anëtarëve të komisioneve eprore përballohen nga buxheti i Shërbimit Social Shtetëror.
11. Masa e shpërblimit mujor të anëtarëve të komisioneve të nivelit të parë dhe komisioneve eprore bëhet në përputhje me legjislacionin në fuqi për përcaktimin e masës së shpërblimit të anëtarëve të këshillave, bordeve ose komisioneve të njësive të qeverisjes qendrore.
12. Anëtarët e komisioneve nuk angazhohen në detyrat e përditshme të ushtrimit të profesionit të tyre dhe punojnë me kohë të plotë gjatë ditëve që janë të mbledhur në komision.
13. Personat me aftësi të kufizuar, të përcaktuar në pikën 1, të kreut I, pajisen me dëshmi zyrtare identifikimi. Kriteret e dhënies së dëshmisë dhe forma e saj përcaktohen në rregulloren e Shërbimit Social Shtetëror.
14. Kriteret mjekësore për vlerësimin e aftësisë së kufizuar, të përcaktuara në pikën 1, të kreut I, përcaktohen në rregulloren e miratuar me urdhër të ministrit përgjegjës për shëndetësinë dhe çështjet sociale.
III. MASA E PËRFITIMIT TË AFTËSISË SË KUFIZUAR
1. Masa e përfitimit për personat me aftësi të kufizuar, e përcaktuar sipas pikës 1, të kreut I, të këtij vendimi, është 10 653 (dhjetë mijë e gjashtëqind e pesëdhjetë e tre) lekë në muaj. Të njëjtën masë pagese përfiton edhe ndihmësi personal i personit me aftësi të kufizuar, i përcaktuar në shkronjën “b”, të nenit 8, të ligjit nr.57/2019, “Për asistencën sociale në Republikën e Shqipërisë”. Pagesa për shkak të aftësisë së kufizuar dhe pagesa e ndihmësit personal indeksohet çdo vit nga Shërbimi Social Shtetëror, në bazë të indeksit të çmimeve të konsumit.
2. Personat me aftësi të kufizuar, që ndjekin një kurs kualifikimi të licencuar ose të akredituar, dhe nxënësit, të cilët ndjekin arsimin e mesëm të lartë, përfitojnë pagesë në masën 200% të pagesës si person me aftësi të kufizuar gjatë kohës që ndjekin kursin e kualifikimit/vitin shkollor vetëm për një dhe gjatë një kursi kualifikimi/viti shkollor, brenda afatit të përcaktuar për kryerjen e kursit të kualifikimit/vitit shkollor.
3. Personat me aftësi të kufizuar, të cilët ndjekin arsimin e lartë në programe studimi të ciklit të parë dhe të dytë, përfitojnë pagesë në masën 300% të pagesës si person me aftësi të kufizuar gjatë kohës që ndjekin studimet vetëm për një dhe gjatë një programi studimi, brenda afatit të përcaktuar për kryerjen e programit të studimit. E njëjta masë pagese zbatohet për personat që ndjekin programin e studimit të ciklit të tretë. Për personat që ndjekin studimet e doktoratës dhe për personat që ndjekin procedurat për fitimin e një titulli akademik, kjo pagesë përfitohet në mënyrë të përhershme, mbi bazën e dëshmisë së lëshuar nga organet kompetente për fitimin e gradës shkencore/titullit akademik.
4. Personat me aftësi të kufizuar, të cilët ndjekin, njëkohësisht, arsimin e mesëm të lartë apo arsimin e lartë dhe një kurs kualifikimi, përfitojnë vetëm njërën nga pagesat.
5. Personat e përcaktuar sipas pikës 2, të kreut I, të këtij vendimi, me plotësimin e moshës dhe të kushteve për përfitim pensioni, sipas përcaktimeve në legjislacionin në fuqi për sigurimet shoqërore, ndërpresin pagesat që përfitojnë sipas këtij vendimi.
6. Pagesa e ndihmësit personal të personit me aftësi të kufizuar, sipas shkronjës “a”, të nenit 8, të ligjit nr.57/2019, “Për asistencën sociale në Republikën e Shqipërisë”, është në masën 11 190 (njëmbëdhjetë mijë e njëqind e nëntëdhjetë) lekë në muaj. Kjo pagesë indeksohet çdo vit nga Shërbimi Social Shtetëror, në bazë të indeksit të çmimeve të konsumit.
7. Përfituesit e pagesës së aftësisë së kufizuar përfshihen në kategorinë e personave ekonomikisht joaktivë, në kuptim të skemës së sigurimeve të detyrueshme të kujdesit shëndetësor.
8. Periudha e shërbimit si ndihmës personal për personat e përcaktuar në shkronjën “a”, të nenit 8, të ligjit nr.57/2019, “Për asistencën sociale në Republikën e Shqipërisë”, të cilët nuk janë ekonomikisht aktivë dhe nuk përfitojnë të ardhura nga skema e sigurimit të detyrueshëm shoqëror, vlerësohet periudhë sigurimi, për efekt përfitimi pensioni, barrëlindjeje, aksidenti në punë, sëmundjeje profesionale dhe sigurimi shëndetësor. Kontributet paguhen në bazë të pagës minimale, për efekt të llogaritjes së kontributit të sigurimit të detyrueshëm shoqëror, dhe përballohen nga buxheti i shtetit.
9. Ndihmësit personalë, që ofrojnë shërbim për më shumë se një përfitues, marrin një shtesë prej 50% të shumave përkatëse për çdo përfitues të shtuar.
10. Përfitimi i pagesës së aftësisë së kufizuar nuk llogaritet në të ardhurat e familjes, për efekt të llogaritjes së ndihmës ekonomike.
11. Pagesa për personat që përfitojnë nga ky vendim dhe e ndihmësit personal bëhet një herë në muaj, nëpërmjet shërbimit bankar ose Postës Shqiptare, pranë njësive të vetëqeverisjes vendore ku ka vendbanimin përfituesi.
12. Personave me aftësi të kufizuara, sipas pikës 1, të kreut I, të cilët vlerësohen për herë të parë në KMCAP, u lind e drejta e përfitimit të pagesës në muajin pasardhës, nga data e marrjes së vendimit nga ky komision.
13. Përfitimi i pagesës nga personat me aftësi të kufizuar ndërpritet:
a) kur personi refuzon të kryejë ekzaminimet e kërkuara;
b) kur dokumentacioni për rivlerësim nuk paraqitet sipas afateve të përcaktuara në rregulloret e organizimit, të të drejtave, detyrave dhe funksionimit të komisioneve të vlerësimit;
c) kur personi nuk paraqitet në komisionin epror dy herë radhazi dhe refuzon të kryejë ekzaminimet e kërkuara/mjekimin e rekomanduar/ marrjen e shërbimit të rekomanduar;
ç) kur vërtetohet që personi nuk është rezident në Shqipëri;
d) kur personi ka qëndruar për më shumë se tre muaj jashtë Shqipërisë, me përjashtim të rasteve kur kjo ka ndodhur për arsye shëndetësore;
dh) për personat e përcaktuar në nenin 11, të ligjit nr.57/2019, “Për asistencën sociale në Republikën e Shqipërisë”.
IV. PROCEDURA DHE DOKUMENTACIONI PËR VLERËSIM DHE PËRFITIM PËR SHKAK TË AFTËSISË SË KUFIZUAR
1. Personat, që vlerësohen me aftësi të kufizuar, pajisen nga institucioni i kujdesit shëndetësor, i specializuar me shtretër, me fletën e drejtimit për në KMCAP. Personat, që rivlerësohen për aftësinë e kufizuar, pajisen nga mjeku specialist me epikrizë, në bazë të rekomandimit të mjekut të familjes. Dokumentacioni për vlerësimin/rivlerësimin e aftësisë së kufizuar, së bashku me kopje të dokumentit të identifikimit, dërgohen brenda 5 (pesë) ditëve nga institucioni shëndetësor pranë njësisë administrative ku individi ka vendbanimin.
2. Për personat me aftësi të kufizuar, për të cilët me vendim të komisionit mjekësor është përcaktuar se kanë nevojë për përkujdesje, plotësohet brenda 30 (tridhjetë) ditëve dokumentacioni për ndihmësin personal, sipas përcaktimeve të legjislacionit në fuqi për mënyrën e ofrimit të ndihmesës personale dhe kriteret e përzgjedhjes së ndihmësit personal.
3. Personat me aftësi të kufizuar, të cilët ndjekin arsimin e mesëm të lartë apo të lartë, paraqesin çdo fillim të vitit ri shkollor/akademik dokumentet e mëposhtme:
a) Vërtetimin, të nënshkruar nga titullari dhe sekretari i institucionit arsimor të mesëm të lartë dhe të lartë, ku të shënohen emri dhe mbiemri i personit, niveli i arsimit që ndjek, viti shkollor/akademik dhe kohëzgjatja. Për të vërtetuar frekuentimin e procesit mësimor, vërtetimi lëshohet çdo tre muaj. Vërtetimi për shlyerjen e detyrimeve të çdo sezoni lëshohet vetëm për personat që ndjekin arsimin e lartë;
b) Kopjen e noterizuar të dëftesës së çdo viti dhe kopjen e noterizuar të diplomës në mbarim të shkollës së mesme të lartë apo të lartë, si dhe/ose kopje të dëshmisë së kursit të kualifikimit.
4. Personat me aftësi të kufizuar, të cilët kanë fituar gradë shkencore/titull akademik, paraqesin kopjen e noterizuar të dokumentit që vërteton fitimin e gradës shkencore/titullit akademik.
5. Shërbimi Social Shtetëror në nivel qendror ose rajonal ka të drejtë të verifikojë, me strukturat përgjegjëse për çështjet e arsimit, vlefshmërinë e dokumentit të lëshuar nga ana e institucioneve arsimore.
6. Administratori shoqëror, me marrjen e dokumentacionit nga institucioni shëndetësor, e dërgon atë brenda 24 (njëzet e katër) orëve, me procesverbal, pranë mjekut të drejtorisë rajonale të shërbimit social shtetëror, dhe listën emërore të personave që do të vlerësohen apo do të rivlerësohen, pranë KMCAP-së. Mjeku verifikon nëse dosjet e paraqitura janë të plotësuara me dokumentacionin përkatës dhe, më pas, i përcjell ato në KMCAP. Mjeku mban regjistrin e personave me aftësi të kufizuar, sipas pikës 1, të kreut I, të këtij vendimi.
7. Në rastet e rivlerësimit, administratori shoqëror njofton personin 2 (dy) muaj para përfundimit të afatit të vlerësimit për pajisjen me epikrizën përcjellëse.
8. Personat, të cilëve u ndryshon gjendja shëndetësore brenda afatit të përfitimit, i nënshtrohen procedurës së rivlerësimit me fletëdrejtimi të re.
9. Drejtoritë rajonale të shërbimit social shtetëror, në përfundim të vlerësimit të aftësisë së kufizuar për personat aplikues, hedhin në arkivin elektronik, brenda 10 (dhjetë) ditëve, nga data e vlerësimit/rivlerësimit, dokumentacionin që përmban dosja e përfituesit dhe e dërgojnë atë pranë njësisë administrative, të shoqëruar me njoftimin për vendimin për çdo person.
10. Administratori shoqëror, në bazë të vendimeve të komisionit, përgatit listën e përfituesve të pagesës së aftësisë së kufizuar, të shoqëruar me masën e përfitimit për çdo përfitues, përfshirë edhe përfitimet shtesë, të bazuara në dokumentacionin përkatës, sipas legjislacionit në fuqi. Kjo listë i dërgohet çdo muaj strukturës përgjegjëse për shërbimet sociale në bashki për të kryer pagesat.
11. Struktura përgjegjëse për shërbimet sociale në bashki përgatit listën e plotë dhe masat e përfitimit për përfituesit e pagesave të aftësisë së kufizuar nën juridiksionin e saj dhe mundëson ekzekutimin e pagesave brendava afateve ligjore.
V. PROCEDURA E ANKIMIMIT NË KOMISIONIN EPROR
1. Kundër vendimit të KMCAP-së së nivelit të parë personi mund të bëjë ankim brenda 30 (tridhjetë) ditëve në komisionin epror. Procedura e ankimit kryhet, si më poshtë vijon:
a) Ankimi në komisionin epror bëhet me shkrim dhe dorëzohet pranë drejtorive rajonale të shërbimit social shtetëror;
b) Brenda 10 (dhjetë) ditëve nga data e marrjes së kërkesës, drejtoria rajonale e shërbimit social shtetëror dërgon në Shërbimin Social Shtetëror dosjen e ankimuesit, së bashku me një relacion të hollësishëm, ku argumentohet vendimi i marrë nga KMCAP-ja e nivelit të parë;
c) Shërbimi Social Shtetëror njofton anëtarët e KMCAP-së eprore dhe ankimuesit 7 (shtatë) ditë përpara zhvillimit të seancës së komisionit epror.
2. Mjeku pranë Shërbimit Social Shtetëror, në rolin e relatorit, studion dokumentacionin e dosjes, procedurat e zbatuara në KMCAP-në e nivelit të parë, dokumentacionin e vlerësuar nga ky komision, pretendimet e parashtruara nga ankimuesi dhe përgatit një relacion, ku, ndër të tjera, shprehet edhe për referencën e gjendjes shëndetësore të ankimuesit, sipas kritereve mjekësore orientuese për përcaktimin e aftësisë së kufizuar.
3. Seancat e mbledhjes së komisionit janë të përmuajshme dhe zhvillohen brenda një muaji, nga data e paraqitjes së dokumenteve në Shërbimin Social Shtetëror. Seanca zhvillohet në ditët e caktuara nga komisioni epror, i cili tërhiqet për të marrë vendimin pa praninë e personit. Komisioni epror mblidhet jo më pak se dy herë në muaj dhe kur janë mbledhur jo më pak se 20 dosje.
4. Vendimet e komisionit epror merren me shumicë të thjeshtë votash. Mbledhja mund të zhvillohet edhe në mungesë të njërit prej anëtarëve, por asnjëherë në mungesë të kryetarit. Në rastet kur ka barazi votash, në fund vendos vota e kryetarit të komisionit.
5. Anëtarët e komisionit epror kanë të drejtë të argumentojnë votën e tyre pro ose kundër. Vendimi i komisionit epror plotësohet sipas formatit nr.3, bashkëlidhur këtij vendimi.
6. Vendimi i komisionit epror arkivohet në dosjen përkatëse dhe i njoftohet me shkrim edhe ankimuesit, brenda një afati 8-ditor.
7. Nëse ankimuesit nuk paraqiten para komisionit 2 herë radhazi dhe refuzojnë të kryejnë ekzaminimet e kërkuara apo mjekimin e rekomanduar, komisioni epror merr vendim “pa aftësi të kufizuar”, dhe dosja i kthehet drejtorisë rajonale të shërbimit social shtetëror. Në këtë rast, dosja konsiderohet e mbyllur dhe për rihapjen e saj do të ndiqet procedura si për rastet që paraqiten para komisionit për herë të parë.
8. Komisioni epror nuk mund të marrë në rishqyrtim rastet për të cilat ai është shprehur një herë, në rastet kur ankimuesi ka të njëjtën gjendje shëndetësore, për të cilën pretendohet aftësi e kufizuar.
VI. DISPOZITA TË FUNDIT
1. Nuk i nënshtrohen procedurës së vlerësimit për përfitim si kategori e përcaktuar në shkronjën “a”, të nenit 8, të ligjit nr.57/2019, “Për asistencën sociale në Republikën e Shqipërisë”, në përputhje me përcaktimet në këtë vendim, individët, të cilët janë kategori përfituese e pagesave të aftësisë së kufizuar sipas vlerësimit bio-psiko-social, të përcaktuar në vendimin nr.722, datë 11.11.2019, të Këshillit të Ministrave, “Për përcaktimin e masës, të kritereve, procedurave dhe dokumentacionit për vlerësimin dhe përfitimin e aftësisë së kufizuar e të ndihmësit personal, dhe të strukturave përgjegjëse e të detyrave të tyre”.
2. Vendimi nr.618, datë 7.9.2006, i Këshillit të Ministrave, “Për përcaktimin e kritereve, të dokumentacionit dhe masës së përfitimit të pagesës për personat me aftësi të kufizuar”, i ndryshuar, shfuqizohet.
3. Ngarkohen Ministria e Shëndetësisë dhe Mbrojtjes Sociale, të gjitha organet e administratës shtetërore shëndetësore e sociale dhe njësitë e vetëqeverisjes vendore për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
NJË NDRYSHIM NË VENDIMIN NR.600, DATË 9.10.2018, TË KËSHILLIT TË MINISTRAVE, “PËR MIRATIMIN E SHËRBIMIT TË SIGURISË PUBLIKE NË 150 INSTITUCIONE TË ARSIMIT PARAUNIVERSITAR DHE TË KRITEREVE PËR OFICERËT E SIGURISË”
Në mbështetje të nenit 100 të Kushtetutës, të ligjit nr.69/2012, “Për sistemin arsimor parauniversitar në Republikën e Shqipërisë”, të ndryshuar, dhe të nenit 37, të ligjit nr.108/2014, “Për Policinë e Shtetit”, të ndryshuar, me propozimin e ministrit të Arsimit, Sportit dhe Rinisë, Këshilli i Ministrave
V E N D O S I:
1. Shkronja “e”, e pikës 4, të vendimit nr.600, datë 9.10.2018, të Këshillit të Ministrave, shfuqizohet.
2. Ngarkohen Ministria e Arsimit, Sportit dhe Rinisë, Ministria e Brendshme dhe Ministria e Financave dhe Ekonomisë për zbatimin e këtij vendimi.
Ky vendim hyn në fuqi pas botimit në “Fletore zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
PËRBËRJEN, KRITERET DHE DETYRAT E BORDIT TË ADMINISTRIMIT TË FONDIT SOCIAL TË PUNËSIMIT DHE MËNYRAT E PËRDORIMIT TË TIJ
Në mbështetje të nenit 100 të Kushtetutës dhe të pikës 6, të nenit 21, të ligjit nr.15/2019, “Për nxitjen e punësimit”, me propozimin e ministrit të Financave dhe Ekonomisë, Këshilli i Ministrave
V E N D O S I:
I. DISPOZITA TË PËRGJITHSHME
Ky vendim ka për qëllim të përcaktojë përbërjen, kriteret dhe detyrat e Bordit të Administrimit të Fondit Social të Punësimit si dhe mënyrat e përdorimit të tij.
II. BORDI I ADMINISTRIMIT TË FONDIT SOCIAL TË PUNËSIMIT
1. Fondi Social i Punësimit krijohet për të siguruar nxitjen e punësimit, integrimin dhe përfshirjen sociale të personave me aftësi të kufizuara, përfshirë personat që nuk dëgjojnë dhe invalidët e punës, të vlerësuar pjesërisht të aftë për punë nga komisionet përkatëse, dhe administrohet nga Bordi i Administrimit të Fondit, si organ kolegjial, i cili e ushtron veprimtarinë e tij ekzekutive vendimmarrëse në mënyrë kolegjiale.
2. Bordi i administrimit të fondit përbëhet nga nëntë anëtarë, si më poshtë vijon:
a) Zëvendësministri i ministrisë përgjegjëse për çështjet e punësimit;
b) Zëvendësministri i ministrisë përgjegjëse për financat;
c) Zëvendësministri i ministrisë përgjegjëse për mbrojtjen sociale;
ç) Dy përfaqësues të punëdhënësve, të përzgjedhur nga organizatat dhe dhomat e përfaqësimit të punëdhënësve/organizatat më të përfaqësuara të punëdhënësve. Kandidatët, që përfaqësojnë organizatat e punëdhënësve, duhet të jenë nga sektorët që kanë punësuar persona me aftësi të kufizuara;
d) Një përfaqësues i personave me aftësi të kufizuara, i përzgjedhur nga organizata të shoqërisë civile, me eksperiencë pune dhe fokus në ndihmesën e personave me aftësi të kufizuara;
dh) Dy ekspertë të pavarur, të caktuar nga organizatat e shoqërisë civile, me eksperiencë pune dhe fokus në ndihmesën e personave me aftësive të kufizuara;
e) Një përfaqësues nga agjencia përgjegjëse për punësimin dhe aftësitë.
3. Përzgjedhja e anëtarëve të bordit bazohet mbi këto procedura:
a) Anëtarët e bordit, të cilët i përkasin organeve të administratës publike, caktohen nga ministrat përkatës, përgjegjës për çështjet e punësimit, të financave dhe mbrojtjes sociale;
b) Anëtarët e tjerë të bordit, të përcaktuar në shkronjat “ç”, “d” e “dh”, të pikës 2, të kreut II, përzgjidhen nga ministri përgjegjës për çështjet e punësimit dhe zhvillimit të aftësive, pas propozimit të kandidaturave, sipas kritereve të përcaktuara me urdhër të ministrit përgjegjës për çështjet e punësimit dhe zhvillimit të aftësive.
4. Anëtar i bordit mund të përzgjidhet personi, i cili plotëson kriteret e mëposhtme:
a) Të ketë ekspertizë të vërtetuar në një prej fushave, si aftësia e kufizuar, tregu i punës, arsimi dhe aftësimi profesional, menaxhimi i biznesit, planifikimi strategjik dhe financiar, marrëdhëniet shoqërore dhe ndërmarrjet sociale;
b) Të ketë përvojë pune profesionale mbi 5 vjet në fushat e veprimtarisë, të cilat lidhen me detyrën;
c) Të ketë referenca pozitive nga bashkëpunëtorët e mëparshëm;
ç) Të jetë me integritet të lartë dhe të mos ketë qenë i dënuar për kryerjen e ndonjë vepre penale.
5. Kryetari i bordit është zëvendësministri përgjegjës për çështjet e punësimit.
6. Afati i qëndrimit në detyrë të kryetarit dhe anëtarit të bordit është 3 vjet, me të drejtë rizgjedhjeje për një mandat të dytë.
7. Anëtari i bordit shkarkohet para afatit nga ministri përgjegjës për çështjet e punësimit dhe zhvillimit të aftësive nëse vërtetohet se ai:
a) dënohet nga gjykata, me vendim të formës së prerë, për një vepër penale;
b) është në pamundësi fizike ose mendore për të ushtruar funksionet e ngarkuara, për një periudhë mbi gjashtë muaj;
c) shkel rëndë rregullat e etikës së punës, të cilat përcaktohen nga bordi në rregulloren e funksionimit;
ç) nuk përmbush detyrat e caktuara sipas ligjit;
d) jep dorëheqjen.
8. Bordi merr vendime me shumicë të thjeshtë të anëtarëve të pranishëm. Nevojitet një shumicë e cilësuar prej 2/3 të numrit të përgjithshëm të anëtarëve të tij në rastet kur ai vendos për:
a) emërimin apo shkarkimin e kryetarit të bordit;
b) miratimin dhe ndryshimin e rregullores së funksionimit të bordit;
c) zgjedh sekretarin e bordit nga anëtarët e tij.
9. Gjatë veprimtarisë së tyre, anëtarët e bordit nuk marrin pjesë në proceset përzgjedhëse dhe vendimmarrëse kur ka konflikt interesi.
10. Anëtarët e bordit shpërblehen për veprimtarinë e tyre. Masa e shpërblimit dhe numri i mbledhjeve përcaktohet sipas vendimit nr.656, datë 31.10.2018, të Këshillit të Ministrave, “Për përcaktimin e masës së shpërblimit të anëtarëve të këshillave, bordeve ose komisioneve të përhershme të njësive të qeverisjes qendrore”.
III. DETYRAT E BORDIT TË ADMINISTRIMIT TË FONDIT
1. Bordi i Administrimit të Fondit Social të Punësimit ushtron detyrat e mëposhtme:
a) Administron Fondin Social të Punësimit, në përputhje me ligjin nr.15/2019, “Për nxitjen e punësimit”, dhe rregulloren e funksionimit të bordit;
b) Miraton strategjitë dhe planin e veprimit vjetor për përdorimin e fondit, duke përcaktuar prioritetet e veprimit, raportet përkatëse të shpenzimeve vjetore për secilin prioritet dhe duke ndërmarrë veprimet e nevojshme për zbatimin dhe financimin e projekteve për nxitjen e punësimit të personave me aftësi të kufizuar;
c) Miraton programet që financohen nga Fondi Social i Punësimit, në përputhje me procedurat ligjore dhe me rregulloren e funksionimit, dhe miraton nivelet dhe vlerat e financimit për projektet e paraqitura;
ç) Miraton rregulloren e brendshme të funksionimit të bordit;
d) Miraton të hyrat dhe shpenzimet vjetore, raportet e auditimit financiar dhe raportet periodike të veprimtarisë së fondit;
dh) Analizon dhe miraton raportet e monitorimit e të vlerësimit të impaktit të projekteve të financuara nga fondi ose të kontraktuara nga ekspertë ose organizata;
e) Merr vendime dhe miraton dokumentet që lidhen me veprimtarinë e fondit.
2. Mënyra dhe procedurat më të hollësishme të funksionimit të Bordit të Administrimit të Fondit përcaktohen në rregulloren e funksionimit, e cila miratohet prej tij.
IV. MËNYRA E PËRDORIMIT TË FONDIT SOCIAL TË PUNËSIMIT
1. Bordi administron të ardhurat e Fondit Social të Punësimit në bazë të:
a) parimeve të konkurrimit të hapur e të përzgjedhjes publike;
b) trajtimit në mënyrë të drejtë e të barabartë të aplikimeve, në kushte të ngjashme ndërmjet tyre;
c) zbatimit të procedurave transparente, të thjeshta dhe të kontrollueshme;
ç) nxitjes së pjesëmarrjes së subjekteve publike dhe jopublike në identifikimin e nevojave e të përparësive dhe të bashkëpunimit të tyre për zbatimin e projekteve.
2. Fondi Social i Punësimit përdoret vetëm për financimin e projekteve me programe që synojnë:
a) punësimin;
b) vetëpunësimin;
c) rehabilitim për punë;
ç) aftësimin dhe riaftësimin profesional;
d) orientimin dhe këshillimin për punësim;
dh) shërbime mbështetëse;
e) përshtatjen e vendit të punës për personat e parashikuar në shkronjën “c”, të pikës 4, të nenit 3, të ligjit për nxitjen e punësimit;
ë) programe riintegrimi social;
f) mbështetjen për nxitjen e punësimit të familjarëve të personave me aftësi të kufizuar;
g) përshtatjen e vendit të punës, duke përfshirë rikonstruksionin, për çdo person të punësuar sipas parashikimeve të pikës 5, të nenit 21, të ligjit nr.15/2019, “Për nxitjen e punësimit”.
3. Aplikimi për programe të financuara nga fondi bëhet në bazë të njoftimit për “thirrje për propozime”, i cili shpallet në Buletinin e Njoftimeve Publike të Agjencisë së Prokurimit Publik dhe në faqen e internetit të institucionit përgjegjës për punësim e aftësi. Bordi hap procedurën e aplikimeve duke u bazuar në:
a) fondet në dispozicion;
b) prioritetet e përcaktuara nga politikat shtetërore, legjislacioni në fuqi dhe në politikat e financimit të projekteve/programeve, pas konsultimit me Këshillin Konsultativ të Punësimit, në përputhje me nenin 15, të ligjit për nxitjen e punësimit.
4. Të drejtën për të aplikuar për programe të financuara nga fondi e kanë çdo entitet kombëtar dhe ndërkombëtar publik/privat jofitimprurës dhe punëdhënësit, veprimtaria e të cilëve është e lidhur me fushën e punësimit, të aftësimit profesional dhe zhvillimit të programeve të parashikuara në pikën 2, të këtij kreu, dhe që ushtrojnë veprimtarinë e tyre në Shqipëri.
5. Bordi, në varësi të llojit të programit që do të financohet nga fondi, përcakton dhe miraton kriteret e vlerësimit, fushat e financimit, kriteret e aplikuesit dhe afatin e aplikimit, të cilat përfshihen në dokumentet e konkurrimit dhe shpallen publikisht.
6. Aplikuesit dorëzojnë pranë sekretarit të bordit dokumentacionin e kërkuar, me qëllim përgatitjen e dosjes dhe përcjelljen për shqyrtim e miratim në bord. Sekretari i bordit ndjek hapat e mëposhtëm:
a) Pranon aplikimet, kërkesat, propozimet, komunikimet dhe dokumentacionin për shqyrtim e miratim nga bordi;
b) Përcjell në bord kërkesat e paraqitura nga punëdhënësit për subvencion për rikonstruksionin dhe përshtatjen e vendit të punës për punësimin e personave me aftësi të kufizuar;
c) Organizon mbledhjet e bordit, duke përgatitur dhe administruar dokumentacionin që shqyrtohet në to;
ç) Kryen komunikimet me palë të treta, për llogari të bordit;
d) Zbaton vendimet e bordit, ndjek realizimin, monitoron zbatimin e projekteve të financuara e të subvencionimeve të dhëna nga bordi;
dh) Mban të dhënat dhe raportet financiare, harton dhe administron programimin financiar të fondit, në përputhje me legjislacionin e zbatueshëm;
ë) Përgatit dhe harton planifikimin strategjik dhe orientimet vjetore të përdorimit të fondit për qëllimet e përcaktuara nga ligji;
gj) Mbledh të dhëna, informacione dhe statistika të lidhura me veprimtarinë e fondit.
7. Kontrata, e lidhur ndërmjet përfituesit të projektit dhe institucionit përgjegjës për punësimin dhe aftësitë, duhet të përmbajë, të paktën, mënyrën e transferimit të fondit, dokumentacionin dhe mënyrën e raportimit financiar e të performancës, llojet e shpenzimeve, të njohura e të pranueshme, format e kontrollit, përfshirë detyrimin e përfituesit për të vënë në dispozicion të autoriteteve kompetente të auditimit, të jashtme dhe të brendshme, dokumentacionin për veprimtarinë financiare të kryer, mënyrën e dokumentimit të shpenzimeve dhe produktit/rezultateve të projektpropozimit të financuar, si dhe kushtet apo përgjegjësitë e tjera të ndërsjella dhe penalitetet, në rast moszbatimi të kontratës. Kontrata me çdo subjekt fitues të programit lidhet nga institucioni përgjegjës për punësim dhe aftësi.
8. Pagesa e fondit të përfituar bëhet me këste, në varësi të kohëzgjatjes dhe në përqindje të barabarta, por, gjithmonë, jo më shumë se 50% në fillim të projektit, kundrejt dokumentacionit dhe faturës/faturave, që vërtetojnë shpenzimet e kryera. Bordi merr vendim për t’i paguar përfituesit këstin e fundit vetëm pas vlerësimit të raportit përfundimtar të monitorimit dhe ecurisë (vlerësimit) të impaktit të projektit të financuar, të hartuar nga institucioni përgjegjës për punësim dhe aftësi, sipas parashikimeve të pikës 9, të këtij kreu.
9. Çdo projekt i financuar monitorohet nga bordi për zbatimin e veprimtarive të financuara dhe verifikimin e realizimit të qëllimeve të përdorimit të fondit. Institucioni përgjegjës për punësimin dhe aftësitë monitoron progresin e realizuar, duke e krahasuar atë me objektivat dhe shpenzimet e paraqitura në aplikim, dhe harton raportin përfundimtar.
Përfituesi ka detyrimin të dorëzojë raportin përfundimtar të veprimtarisë dhe bilancit financiar jo më vonë se 30 ditë nga përfundimi i veprimtarisë.
Bordi ka të drejtë të kërkojë informacion shtesë nga përfituesi, si gjatë zbatimit të kontratës, ashtu edhe pas vlerësimit të raporteve të veprimtarisë.
Vlerësimi kryhet jo më vonë se 30 ditë nga data e marrjes së raporteve.
V. DISPOZITA TË FUNDIT
1. Anëtarët e bordit, përfaqësues të organeve të administratës publike, caktohen nga ministrat përgjegjës jo më vonë se 30 ditë nga data e hyrjes në fuqi të këtij vendimi.
2. Anëtarët e tjerë të bordit, të cilët nuk janë përfaqësues të organeve të administratës publike, përzgjidhen nga ministri përgjegjës për çështjet e punësimit dhe zhvillimit të aftësive, jo më vonë se 60 ditë nga data e hyrjes në fuqi të këtij vendimi.
3. Efektet financiare, që rrjedhin nga zbatimi i këtij vendimi, të përballohen nga buxheti i Ministrisë së Financave dhe Ekonomisë dhe Fondi Social i Punësimit.
4. Ngarkohen Ministria e Financave dhe Ekonomisë dhe Agjencia Kombëtare e Punësimit dhe Aftësive për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
MIRATIMIN E NDRYSHIMIT TË STATUSIT, NGA KATEGORIA E RESURSIT “TOKË BUJQËSORE” NË “TOKË URBANE”, TRUALL, TË PASURISË ME NUMËR 12/28, ZONA KADASTRALE 3532, BASHKIA ROSKOVEC
Në mbështetje të nenit 100 të Kushtetutës dhe të pikës 5/2, të nenit 11/1, të ligjit nr.8752, datë 26.3.2001, “Për krijimin dhe funksionimin e strukturave për administrimin dhe mbrojtjen e tokës”, të ndryshuar, me propozimin e ministrit të Bujqësisë dhe Zhvillimit Rural, Këshilli i Ministrave
V E N D O S I:
1. Miratimin e ndryshimit të statusit, nga kategoria e resursit “tokë bujqësore” në “tokë urbane”, truall, për sipërfaqen ndërtimore, të pasurisë me numër 12/28, zona kadastrale 3532, Bashkia Roskovec, sipas certifikatës së pronësisë të pasurisë, hartës treguese dhe lidhjes nr.1, që i bashkëlidhen këtij vendimi.
2. Drejtoria e Administrimit dhe e Mbrojtjes së Tokës, Qarku Fier, të pasqyrojë në dokumentacionin kadastral (LN) ndryshimin e resursit nga “tokë bujqësore” në “tokë urbane”, truall, të pasurisë me numër 12/28, zona kadastrale 3532, Bashkia Roskovec.
3. Ngarkohen Ministria e Bujqësisë dhe Zhvillimit Rural, Këshilli i Qarkut Fier dhe Drejtoria Vendore e Agjencisë Shtetërore të Kadastrës Fier për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
***
V E N D I M
PËR
NDRYSHIMIN E PËRGJEGJËSISË SË ADMINISTRIMIT, NGA MINISTRIA E MBROJTJES TE MINISTRIA E INFRASTRUKTURËS DHE ENERGJISË, PËR AUTORITETIN RRUGOR SHQIPTAR, TË NJË SIPËRFAQEJE TRUALLI FUNKSIONAL DHE OBJEKTI, NGA PRONA NR.190, ME EMËRTIM “REGJIMENTI I HELIKOPTERËVE” DHE TË DISA SIPËRFAQEVE TRUALL FUNKSIONAL, NGA PRONAT NR.1136, ME EMËRTIM “RADIODRITA”, DHE NR.1137, ME EMËRTIM “HELIODROMI I REPARTIT USHTARAK NR.3340”, ME VENDNDODHJE NË FARKË, TIRANË, SI DHE PËR NJË NDRYSHIM NË VENDIMIN NR.515, DATË 18.7.2003, TË KËSHILLIT TË MINISTRAVE, “PËR MIRATIMIN E LISTËS SË INVENTARIT TË PRONAVE TË PALUAJTSHME SHTETËRORE, TË CILAT I KALOJNË NË PËRGJEGJËSI ADMINISTRIMI MINISTRISË SË MBROJTJES”, TË NDRYSHUAR
Në mbështetje të nenit 100 të Kushtetutës dhe të neneve 13 e 15, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e ministrit të Mbrojtjes, Këshilli i Ministrave
V E N D O S I:
1. Ndryshimin e përgjegjësisë së administrimit, nga Ministria e Mbrojtjes te Ministria e Infrastrukturës dhe Energjisë, për Autoritetin Rrugor Shqiptar, të një sipërfaqeje trualli funksional dhe objekti, me sipërfaqe të përgjithshme prej 792.9 (shtatëqind e nëntëdhjetë e dy pikë nëntë) m², nga prona nr.190, me emërtim “Regjimenti i helikopterëve”, të një sipërfaqeje trualli funksional prej 863.23 (tetëqind e gjashtëdhjetë e tre pikë njëzet e tre) m², nga prona nr.1136, me emërtim “Radiodrita”, dhe të një sipërfaqeje trualli funksional prej 2 341 (dy mijë e treqind e dyzet e një) m², nga prona nr.1137, me emërtim “Heliodromi i repartit ushtarak nr.3340”, me vendndodhje në Farkë, Tiranë, sipas planvendosjeve që i bashkëlidhen këtij vendimi dhe janë pjesë përbërëse e tij, për t’i përdorur për ndërtimin e rrugës publike, në segmentin rrugor “Unaza lindore Tiranë loti 2”.
2. Në listën e inventarit të pronave të paluajtshme shtetërore, që i bashkëlidhet vendimit nr.515, datë 18.7.2003, të Këshillit të Ministrave, “Për miratimin e listës së inventarit të pronave të paluajtshme shtetërore, të cilat i kalojnë në përgjegjësi administrimi Ministrisë së Mbrojtjes”, të ndryshuar, të hiqet sipërfaqja truall funksional dhe objekt, me sipërfaqe të përgjithshme prej 792.9 (shtatëqind e nëntëdhjetë e dy pikë nëntë) m², nga prona nr.190, me emërtim “Regjimenti i helikopterëve”, sipërfaqja truall funksional prej 863.23 (tetëqind e gjashtëdhjetë e tre pikë njëzet e tre) m², nga prona nr.1136, me emërtim “Radiodrita”, dhe sipërfaqja truall funksional prej 2 341 (dy mijë e treqind e dyzet e një) m², nga prona nr.1137, me emërtim “Heliodromi i repartit ushtarak nr.3340”, me vendndodhje në Farkë, Tiranë, sipas planvendosjeve, dhe të shtohen në listën e inventarit të pronave të paluajtshme shtetërore që i kanë kaluar në përgjegjësi administrimi Ministrisë së Infrastrukturës dhe Energjisë, për Autoritetin Rrugor Shqiptar.
3. Ministrisë së Infrastrukturës dhe Energjisë dhe Autoritetit Rrugor Shqiptar u ndalohet të ndryshojnë destinacionin e përdorimit të sipërfaqeve të pronave, të përcakuara në pikën 1, të këtij vendimi, t’i tjetërsojnë ose t’ua japin ato në përdorim të tretëve.
4. Për sigurinë dhe ruajtjen e pronave, Ministria e Infrastrukturës dhe Energjisë, nëpërmjet Autoritetit Rrugor Shqiptar, para fillimit të punimeve, të ndërtojë rrethimet në kufijtë e rinj të pronave, duke i kthyer në gjendjen e tyre të mëparshme, të kryejë spostimin e rrjeteve inxhinierike që prek gjurma e ndërtimit të segmentit rrugor, sipas parametrave dhe kushteve teknike dhe për këtë të hartohet aktmarrëveshje ndërmjet Ministrisë së Infrastrukturës dhe Energjisë, të përfaqësuar nga Autoriteti Rrugor Shqiptar, dhe Shtabit të Përgjithshëm të Forcave të Armatosura, të përfaqësuar nga Komanda e Forcës Ajrore.
5. Ngarkohen Ministria e Mbrojtjes, Ministria e Infrastrukturës dhe Energjisë, Autoriteti Rrugor Shqiptar dhe Agjencia Shtetërore e Kadastrës për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
ERION BRAÇE
