Vendime të miratuara në mbledhjen e Këshillit të Ministrave, datë 31 Korrik 2019:

V E N D I M

PËR

PËRCAKTIMIN E BUXHETIT FILLESTAR TË STRUKTURËS SË POSAÇME KUNDËR KORRUPSIONIT DHE KRIMIT TË ORGANIZUAR

Në mbështetje të nenit 100 të Kushtetutës, të pikës 10, të nenit 57, të ligjit nr.95/2016, “Për organizimin dhe funksionimin e institucioneve për të luftuar korrupsionin dhe krimin e organizuar”, me propozimin e ministrit të Drejtësisë dhe të ministrit të Financave dhe Ekonomisë, Këshilli i Ministrave

 

V E N D O S I:

 

1. Strukturës së Posaçme kundër Korrupsionit dhe Krimit të Organizuar i përcaktohet për vitin 2019 buxheti fillestar prej 150 000 000 (njëqind e pesëdhjetë milionë) lekësh, për përballimin e shpenzimeve lidhur me ushtrimin e aktivitetit gjatë vitit 2019.

2. Ngarkohen Struktura e Posaçme kundër Korrupsionit dhe Krimit të Organizuar dhe Ministria e Financave dhe Ekonomisë për ndjekjen e procedurave për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

KRITERET DHE PROCEDURAT PËR MBROJTJEN E VEÇANTË TË MAGJISTRATIT GJATË USHTRIMIT TË FUNKSIONIT OSE PËR SHKAK TË TIJ

Në mbështetje të nenit 100 të Kushtetutës dhe të pikës 2, të nenit 20, të ligjit nr.96/2016, “Për statusin e gjyqtarëve dhe prokurorëve në Republikën e Shqipërisë”, me propozimin e ministrit të Drejtësisë, Këshilli i Ministrave

 

V E N D O S I:

 

1. Magjistratit i sigurohet mbrojtje e veçantë personale, e familjes dhe e pasurisë, sipas parashikimeve të këtij vendimi, kur, gjatë ushtrimit të funksionit ose për shkak të tij, i rrezikohet jeta, shëndeti i tij dhe/ose e/i familjes, si dhe pasuria. Mbrojtje e veçantë i sigurohet edhe magjistratit që nuk e ushtron funksionin ose që ka dalë në pension, në rast se e kërkon, në rast cenimi për shkak të ushtrimit të mëparshëm të funksionit.

2. Me mbrojtje të veçantë personale, të familjes dhe të pasurisë, sipas këtij vendimi, do të kuptohen masat me karakter organizativ e profesional, për sigurimin dhe ruajtjen e veçantë fizike, mbrojtjen e familjes e të pasurisë së magjistratit, si dhe masat e tjera, që lidhen me këtë mbrojtje.

3. Kushtet për të përfituar mbrojtje të veçantë janë, si më poshtë vijon:

a) Prania e rrethanave serioze, që rrezikojnë jetën, familjen ose pasurinë e magjistratit;
b) Prania e lidhjes shkakësore ndërmjet rrethanave serioze dhe ushtrimit të funksionit ose ushtrimit të mëparshëm të funksionit nga magjistrati.

Pavarësisht mungesës së lidhjes shkakësore të përcaktuar në shkronjën “b”, të kësaj pike, magjistratit i sigurohet mbrojtje e veçantë edhe në rast të pranisë së rrethanave serioze që rrezikojnë jetën, familjen ose pasurinë e magjistratit gjatë kohës që magjistrati ushtron funksionin e tij.

4. Kërkesa për mbrojtje të veçantë i paraqitet komisionit përkatës me shkrim nga magjistrati, drejtori i Përgjithshëm i Policisë së Shtetit, ministri i Drejtësisë, kryetari i gjykatës ose drejtuesi i prokurorisë, ku magjistrati ushtron funksionin, si dhe çdo organ tjetër publik që, për shkak të funksionit, merr dijeni për praninë e rrethanave serioze që rrezikojnë jetën, familjen ose pasurinë e magjistratit.

5. Kërkesa për mbrojtje të veçantë përmban:

a) gjenealitetet e plota të kërkuesit;
b) një përmbledhje të fakteve e të rrethanave, që përbëjnë rrezik serioz për magjistratin, të cilat detyrojnë të sigurohet mbrojtje e veçantë, si dhe burimin e provave, ku bazohen ato;
c) llojin e masave që kërkohen dhe kohëzgjatjen e tyre.

6. Kërkesa për mbrojtje i paraqitet Këshillit të Lartë Gjyqësor ose Këshillit të Lartë të Prokurorisë, sipas rastit, nga subjektet e përcaktuara në pikën 4, të këtij vendimi, kur ka të dhëna të besueshme që provojnë se një magjistrati i rrezikohet jeta, familja ose pasuria.

Kur rreziku ndaj magjistratit është serioz dhe i çastit, drejtori i Përgjithshëm i Policisë së Shtetit urdhëron strukturat e Policisë së Shtetit të marrin masa të menjëhershme për të garantuar jetën, familjen ose pasurinë e magjistratit, deri në mbledhjen e komisionit. Komisioni, pas shqyrtimit të kërkesës, vlerëson masat e marra nga strukturat e Policisë së Shtetit dhe vendos, kur është rasti, për vazhdimin e mëtejshëm të tyre.

7. Kërkesat për sigurimin e mbrojtjes së veçantë shqyrtohen, sipas rastit, nga Komisioni për Mbrojtjen e Gjyqtarëve, i cili ngrihet dhe funksionon pranë Këshillit të Lartë Gjyqësor, ose Komisioni për Mbrojtjen e Prokurorëve, i cili ngrihet dhe funksionon pranë Këshillit të Lartë të Prokurorisë, me përbërje, si më poshtë vijon:

a) Një anëtar i Këshillit të Lartë Gjyqësor (në vijim, KLGJ) ose Këshillit të Lartë të Prokurorisë (në vijim, KLP), sipas rastit, me mandat dyvjeçar, të caktuar nga mbledhja plenare;
b) Një përfaqësues i Ministrisë së Drejtësisë, me mandat dyvjeçar, të caktuar me urdhër të titullarit të institucionit;
c) Një përfaqësues i Ministrisë së Brendshme, me mandat dyvjeçar, të caktuar me urdhër të titullarit të institucionit;
ç) Kryetari i Gjykatës ose drejtuesi i Prokurorisë, sipas rastit, pranë së cilës ushtron detyrën magjistrati, për të cilin kërkohet mbrojtje; në rastin e magjistratit, i cili nuk është më në detyrë kryetari i Gjykatës ose drejtuesi i Prokurorisë në detyrë ku ka ushtruar funksionin së fundmi magjistrati;
d) Një përfaqësues të Drejtorisë së Përgjithshme të Policisë së Shtetit me mandat dyvjeçar me urdhër të titullarit të institucionit.

8. Kryetar i Komisionit për Mbrojtjen e Gjyqtarëve është përfaqësuesi i KLGJ-së dhe kryetar i Komisionit për Mbrojtjen e Prokurorëve është përfaqësuesi i KLP-së. Në mungesë të tij, kryetari mund të autorizojë një nga anëtarët e tjerë të komisionit përgjegjës për thirrjen dhe/ose drejtimin e mbledhjes.

9. Kryetari i komisionit ushtron këto funksione:

a) Përgatit, thërret dhe drejton mbledhjet e komisionit;
b) Përfaqëson komisionin në marrëdhëniet me të tretët;
c) Siguron mbështetjen administrative dhe organizative nga këshilli përkatës për funksionimin e komisionit;
ç) Siguron dokumentimin e mbledhjes së komisionit dhe mbajtjen e dokumentacionit, në përputhje me legjislacionin për arkivat;
d) Ushtron çdo detyrë tjetër të caktuar nga legjislacioni në fuqi.

10. Kryetari, menjëherë pas marrjes së kërkesës për mbrojtje, njofton anëtarët e komisionit për mbledhjen e radhës. Komisioni duhet të mblidhet menjëherë dhe jo më vonë se 48 (dyzet e tetë) orë nga paraqitja e kërkesës, sipas pikës 6, të këtij vendimi.

11. KLGJ-ja dhe KLP-ja sigurojnë mbështetjen e nevojshme organizative e administrative për realizimin e funksionit dhe të detyrave të komisionit përkatës.

12. Mbledhjet e komisionit janë të vlefshme kur janë të pranishëm jo më pak se katër anëtarë të tij. Vendimet janë të vlefshme kur miratohen të paktën nga tre anëtarë të pranishëm në mbledhje.

13. Komisioni e ushtron veprimtarinë e tij në mënyrë kolegjiale, sipas rregullave dhe procedurave të parashikuara në këtë vendim, të cilat, plotësohen, për aq sa nuk bie ndesh me dispozitat e këtij vendimi, nga rregullat e parashikuara në legjislacionin për organizimin e funksionimin e organeve kolegjiale. Pjesëmarrja në mbledhjet e komisionit është e detyrueshme. Kryetari i komisionit, në bashkëpunim më Sekretarin e Përgjithshëm të Këshillit, cakton një sekretar, nga radhët e nëpunësve të Këshillit, i cili mban procesverbalin e zhvillimit të mbledhjes.

14. Komisioni, në procesin e shqyrtimit të kërkesave për mbrojtje të veçantë të familjes e të pasurisë, sipas këtij vendimi, mund të kërkojë informacione nga institucione të tjera.

15. Komisioni merr në shqyrtim kërkesën e paraqitur dhe, kur bindet për nevojën e sigurimit të mbrojtjes për magjistratin, shprehet me vendim për të. Vendimi përmban masat konkrete të mbrojtjes së veçantë, numrin e shoqëruesve personalë, kur është rasti, afatin, brenda të cilit sigurohet mbrojtja, si dhe masa të tjera, që lidhen me këtë mbrojtje.

16. Vendimi i komisionit i njoftohet magjistratit nëpërmjet kryetarit të gjykatës ose drejtuesit të prokurorisë, ku ushtron funksionin, dhe strukturave përgjegjëse për mbrojtjen, nga përfaqësuesi i Drejtorisë së Përgjithshme të Policisë së Shtetit. Magjistratit, që nuk e ushtron funksionin ose që ka dalë në pension, i njoftohet vendimi i komisionit pranë vendbanimit të deklaruar.

17. Komisioni, me kërkesë të subjekteve të përcaktuara në pikën 4, të këtij vendimi, kur ka të dhëna të besueshme që provojnë se një magjistrati i rrezikohet jeta, familja ose pasuria, mund të vendosë zgjatjen e afatit të masave të mbrojtjes, nëse rrethanat, për të cilat është siguruar më parë mbrojtja, vazhdojnë të ekzistojnë edhe pas përfundimit të këtij afati.

Në rast se rreziku ndaj jetës, familjes ose pasurisë së magjistratit nën mbrojtje pushon së ekzistuari përpara përfundimit të afatit të mbrojtjes, sipas përcaktimit në vendimin e komisionit, me kërkesën e çdo subjekti të përcaktuar në pikën 4, të këtij vendimi, komisioni mund të vendosë të ndërpresë mbrojtjen e veçantë të magjistratit.

18. Në rast se magjistratit i shkaktohen dëme për jetën, shëndetin, pasurinë e tij ose familjes së tij, gjatë ushtrimit të funksionit ose për shkak të tij, dëmet shpërblehen nga shteti, në përputhje me legjislacionin në fuqi.

19. Vendimi nr.480, datë 6.5.2009, i Këshillit të Ministrave, “Për mbrojtjen e veçantë personale, të familjes dhe të pronës së gjyqtarëve dhe për sigurimin e jetës e të pronës së tyre”, shfuqizohet.

20. Ngarkohen ministri i Drejtësisë, ministri i Brendshëm, Këshilli i Lartë Gjyqësor dhe Këshilli i Lartë i Prokurorisë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

EDI RAMA

 

***

 

V E N D I M

PËR

KRIJIMIN, MËNYRËN E ORGANIZIMIT DHE TË FUNKSIONIMIT TË AGJENCISË KOMBËTARE TË PUNËSIMIT DHE AFTËSIVE

Në mbështetje të nenit 100 të Kushtetutës, të neneve 14, pika 3, dhe 15, pika 6, të ligjit nr.15/2019, “Për nxitjen e punësimit”, të pikës 3, të nenit 9, të ligjit nr.15/2017, “Për arsimin dhe formimin profesional në Republikën e Shqipërisë”, dhe të ligjit nr.90/2012, “Për organizimin dhe funksionimin e administratës shtetërore”, me propozimin e ministrit të Financave dhe Ekonomisë, Këshilli i Ministrave

 

V E N D O S I:

I. DISPOZITA TË PËRGJITHSHME

1. Krijimin dhe mënyrën e organizimit e të fuksionimit të Agjencisë Kombëtare të Punësimit dhe Aftësive (në vijim AKPA), si person juridik, publik, buxhetor, në varësi të ministrit përgjegjës për punësimin dhe zhvillimin e aftësive (në vijim ministri), me seli në Tiranë. AKPA-ja financohet nga buxheti i shtetit dhe burime të tjera të ligjshme, sipas legjislacionit në fuqi.

2. AKPA-ja është tërësia e institucioneve administrative dhe ofruese të shërbimeve të punësimit, të vetëpunësimit dhe të arsimit e formimit profesional, pjesë integrale e sistemit të ministrisë përgjegjëse për punësimin dhe zhvillimin e aftësive.

3. Misioni i AKPA-së është të sigurojë përmbushjen e të drejtës së shtetasve shqiptarë, të huaj dhe pa shtetësi të huaj, që kanë përfituar statusin e refugjatit si dhe të azilkërkuesit në territorin e Republikës së Shqipërisë, për t’u trajtuar me shërbime dhe programe publike të punësimit, të vetëpunësimit dhe të kualifikimeve profesionale, me qëllim gjetjen e një pune të përshtatshme, brenda dhe jashtë vendit, si dhe ofrimin e këtyre shërbimeve.

4. AKPA-ja e shtrin veprimtarinë në të gjithë territorin e Republikës së Shqipërisë, në këto fusha përgjegjësie:

a) Punësimin dhe vetëpunësimin e shtetasve shqiptarë, të huaj dhe pa shtetësi në territorin e Republikës së Shqipërisë, sipas legjislacionit në fuqi për nxitjen e punësimit;
b) Arsimin dhe formimin profesional, sipas legjislacionit në fuqi për arsimin dhe formimin profesional.

II. PËRGJEGJËSITË FUNKSIONALE TË AGJENCISË KOMBËTARE TË PUNËSIMIT DHE AFTËSIVE

1. AKPA-ja ka përgjegjësi që:

a) të garantojë nivelin e cilësisë së shërbimeve të ofruara për punësimin, vetëpunësimin dhe arsimin e formimin profesional, nëpërmjet monitorimit dhe vlerësimit;
b) të organizojë punën për administrimin dhe zbatimin e programeve aktive e pasive të tregut të punës;
c) të organizojë punën për administrimin e ofruesve publikë të arsimit dhe formimit profesional (AFP), sipas legjislacionit në fuqi për arsimin dhe formimin profesional në Republikën e Shqipërisë;
ҫ) të organizojë punën për menaxhimin, ndjekjen dhe kontrollin e drejtorive rajonale, të zyrave vendore dhe të ofruesve publikë të arsimit e formimit profesional;
d) të sigurojë se funksionet e lidhura me planifikimin, zbatimin, kontabilitetin dhe raportimin financiar për drejtoritë rajonale, zyrat vendore dhe ofruesit publikë të arsimit dhe formimit profesional, kryhen në përputhje me legjislacionin në fuqi.

III. ORGANIZIMI DHE FUNKSIONIMI I AGJENCISË KOMBËTARE TË PUNËSIMIT DHE AFTËSIVE

1. AKPA-ja e shtrin veprimtarinë e saj në të gjithë territorin e Republikës së Shqipërisë. Ajo organizohet, si më poshtë vijon:

a) Në nivel qendror, nëpërmjet drejtorisë qendrore;
b) Në nivel rajonal, nëpërmjet drejtorive rajonale;
c) Në nivel vendor, nëpërmjet zyrave vendore.

2. Struktura dhe organika e AKPA-së, në nivel qendror dhe rajonal, miratohen me urdhër të Kryeministrit, sipas përcaktimeve të legjislacionit në fuqi për organizimin dhe funksionimin e administratës shtetërore. Struktura dhe organika e zyrave vendore dhe ofruesve të arsimit e formimit profesional miratohen nga ministri.

3. AKPA-ja drejtohet dhe përfaqësohet nga drejtori i Përgjithshëm, i cili organizon dhe drejton veprimtarinë e AKPA-së dhe përgjigjet përpara ministrit përgjegjës për punësimin dhe AFP-në.

4. Drejtoritë rajonale raportojnë te drejtori i Përgjithshëm i AKPA-së. Drejtoritë rajonale drejtohen nga drejtorët rajonalë.

5. Zyrat vendore janë të organizuara në nivel sektori dhe janë pjesë të strukturave të drejtorive rajonale.

6. Njësitë e drejtpërdrejta të ofrimit të shërbimeve krijohen dhe mbyllen me urdhër të ministrit përgjegjës për punësimin dhe zhvillimin e aftësive, sipas legjislacionit për organizimin dhe funksionimin e administratës publike.

7. Rregullorja për metodat e brendshme të punës dhe sjelljen e personelit të AKPA-së miratohet nga ministri, me propozimin e drejtorit të Përgjithshëm.

8. AKPA-ja, në nivel qendror, kryen detyrat, si më poshtë vijon:

a) Organizon dhe menaxhon drejtoritë rajonale dhe zyrat vendore të punësimit për garantimin e nivelit të cilësisë së shërbimeve të ofruara, për punëkërkuesit, të punësuarit që kërkojnë të ndryshojnë punë, personat me aftësi të kufizuara dhe grupet e veçanta dhe punëdhënësit;
b) Në bashkëpunim me bizneset dhe aktorë të tjerë, administron dhe monitoron zbatimin me cilësi të programeve të nxitjes së punësimit si dhe bashkëpunon me aktorë të tretë për ofrimin dhe zbatimin me cilësi e në kohë të programeve të nxitjes së punësimit;
c) Administron dhe monitoron procesin e zbatimit të programit të pagesës të të ardhurave nga papunësia, në zbatim të legjislacionit përkatës;
ç) Analizon dhe vlerëson nevojat për burime të domosdoshme (burime njerëzore, financiare, objekte, pajisje, mekanizma financimi etj.) për ofrimin cilësor të programeve aktive dhe pasive të punësimit, si dhe të programeve të arsimit dhe formimit profesional nga ofruesit publikë;
d) Planifikon organizimin dhe shtrirjen e shërbimeve të punësimit dhe të arsimit dhe formimit profesional, siguron dhe optimizion burimet për ofrimin e shërbimeve të punësimit dhe të AFP-së, si dhe planifikon buxhetin në terma afatshkurtër e afatmesëm për strukturat e varësisë;
dh) Administron dhe monitoron veprimtarinë e ofruesve publikë të AFP-së dhe zbatimin nga ana e tyre të kurrikulave kombëtare dhe në nivel ofruesi të AFP-së;
e) Bashkërendon me institucionet përgjegjëse në fushën e arsimit parauniversitar, me institucionin përgjegjës për arsimin, formimin profesional dhe kualifikimet, si dhe partnerët socialë, për të mbështetur ofrimin me cilësi të arsimit dhe formimit profesional nga ofruesit publikë;
ë) Bashkëpunon me institucionin përgjegjës në fushën e licencimeve të biznesit për licencimin e ofruesve privatë të AFP-së dhe monitoron veprimtarinë e tyre, në përputhje me legjislacionin përkatës;
f) Ndërton sistemin e menaxhimit të performancës bazuar në objektiva, si dhe zhvillon e monitoron sistemet e brendshme të vlerësimit në bazë të standardeve (benchmarking) për drejtoritë rajonale dhe zyrat vendore të punësimit e ofruesit e AFP-së;
g) Monitoron zbatimin e standardeve të ofrimit të shërbimeve të punësimit dhe të ofruesve të formimit e arsimit profesional, si dhe propozon përmirësimet e sistemeve të informacionit;
gj) Mbledh dhe analizon rregullisht informacion mbi dinamikat dhe tendencat e tregut të punës nëpërmjet strukturave të varësisë dhe studimeve specifike dhe e raporton në ministrinë përgjegjëse dhe/ose e shkëmben me institucionet e interesuara, publike apo private;
h) Kryen hulumtime periodike në tregun e punës për mbledhjen e të dhënave për numrin e të punësuarve, për kushtet e punës, procesin e rekrutimit, mungesën e aftësive apo të nevojave për trajnim, sipas metodologjive kombëtare dhe ndërkombëtare, të testuara e të miratuara;
i) Siguron mbledhjen, përpunimin dhe shpërndarjen e të dhënave statistikore nga ofruesit publikë të AFP-së, si dhe kryen rregullisht gjurmimin e të diplomuarve të AFP-së;
j) Verifikon që funksionet e lidhura me planifikimin, zbatimin, kontabilitetin dhe raportimin financiar kryhen në përputhje me legjislacionin në fuqi;
k) I propozon ministrisë përgjegjëse për çështjet e punësimit dhe AFP-në akte ligjore dhe nënligjore në fushën e programeve aktive të tregut të punës, si dhe në lidhje me administrimin e ofruesve publikë të AFP-së;
l) Siguron dhe garanton dialogun social nëpërmjet funksionimit të partneriteteve me palët e treta, organizatat punëmarrëse dhe punëdhënëse, si dhe monitoron e siguron mbarëvajtjen e zyrave të pajtimit në çdo qark, sipas legjislacionit të punës në fuqi;
ll) Siguron dhe garanton zbatimin e procesit e të procedurave në zbatim të legjislacionit për vullnetarizmin;
m) I propozon ministrisë përgjegjëse për çështjet e punësimit dhe zhvillimit të aftësive nevojat për ndryshime të kuadrit ligjor rregullator, sipas fushave të përgjegjësisë;
n) Mban regjistrin me certifikatat përfundimtare dhe suplementet e certifikatave të lëshuara nga ofruesit e arsimit dhe formimit profesional;
nj) Kryen studime periodike për tregun e punës apo të një pjese të tij, në nivel kombëtar dhe rajonal;
o) Kryen studime për gjurmimin e të diplomuarve të arsimit dhe formimit profesional;
p) Ushtron kompetenca të parashikuara nga ky vendim dhe nga legjislacioni në fuqi.

9. Drejtoritë rajonale kryejnë detyrat, si më poshtë vijon:

a) Përgatisin planin e punësueshmërisë, në bazë të analizës së tregut rajonal dhe vendor të punës;
b) Zbatojnë programet aktive të tregut të punës, në nivel rajoni;
c) Zbatojnë programe të mbështetjes me të ardhura nga papunësia;
ç) Sigurojnë dhe shpërndajnë informacionin mbi tregun rajonal të punës;
d) Bashkëpunojnë me institucione dhe organizma të tjerë, që zbatojnë programe të ndryshme punësimi apo mbrojtjeje sociale;
dh) Organizojnë punën dhe monitorojnë zbatimin e detyrave nga zyrat vendore;
e) Identifikojnë nevojat për burime njerëzore, financiare, infrastrukturore etj. dhe i përcjellin pranë drejtorisë qendrore.
ë) Hartojnë projektbuxhetin e drejtorisë rajonale dhe e dërgojnë për miratim në AKPA;
f) Zbatojnë programin financiar rajonal.

10. Zyrat vendore kryejnë detyrat, si më poshtë vijon:

a) Ofrojnë shërbime të punësimit për punëdhënësit dhe punëkërkuesit, duke përfshirë informacion rreth tregut rajonal dhe vendor të punës, profilizim të punëkërkuesit dhe referim në shërbimin e caktuar në bazë të nevojave, shërbimin e këshillimit, shërbime ndërmjetësimi, shërbimi orientimi në karrierë, shërbime të specializuara për personat me aftësi të kufizuara;
b) Çdo detyrë tjetër të ngarkuar nga legjislacioni në fuqi.

11. Marrëdhëniet e punës së drejtorit të Përgjithshëm dhe të nëpunësve në drejtorinë qendrore të AKPA-së rregullohen në bazë të dispozitave të legjislacionit për nëpunësin civil. Marrëdhëniet e punës së punonjësve administrativë në drejtorinë qendrore të AKPA-së rregullohen në bazë të dispozitave të Kodit të Punës.

12. Marrëdhëniet e punës, në nivel rajonal e vendor, si dhe ofruesit e arsimit e formimit profesional, rregullohen në bazë të dispozitave të Kodit të Punës. Rekrutimi i punonjësve bëhet nëpërmjet procedurave të konkurrimit të hapur, mbi bazën e rregullave të miratuara në rregulloren për metodat e brendshme të punës dhe për sjelljen e personelit të AKPA-së.

13. AKPA-ja ka stemën, logon dhe vulën zyrtare. Stema e drejtorisë qendrore ka shënimet “Republika e Shqipërisë, Ministria e (emri i ministrisë përgjegjëse), Agjencia Kombëtare e Punësimit dhe Aftësive”, në përputhje me përcaktimin e vendimit të Këshillit të Ministrave, për mënyrën e përdorimit të stemës së Republikës së Shqipërisë.

14. Drejtoritë rajonale, zyrat vendore dhe ofruesit e arsimit e formimit profesional kanë stemat, logot dhe vulat e tyre zyrtare. Stema e secilës drejtori rajonale, zyrë vendore dhe ofruesi të arsimit e formimit profesional ka shënimet “Republika e Shqipërisë, Ministria e (emri i ministrisë përgjegjëse), Agjencia Kombëtare e Punësimit dhe Aftësive, drejtoria rajonale/zyra vendore/ofruesi i arsimit dhe formimit profesional (emri i qarkut/qytetit, ku ka selinë), në përputhje me përcaktimet e vendimit të Këshillit të Ministrave, për mënyrën e përdorimit të stemës së Republikës së Shqipërisë.

15. Vula e AKPA-së e drejtorive rajonale, e zyrave vendore dhe e ofruesve të arsimit e formimit profesional ka elementet dhe formën e përcaktuar e vendimin e Këshillit të Ministrave, për rregullat e prodhimit, të administrimit, të kontrollit dhe të ruajtjes së vulave zyrtare. Vula prodhohet, administrohet dhe ruhet në përputhje me legjislacionin në fuqi.

IV. KËSHILLI KONSULTATIV PËR PUNËSIMIN DHE SEKRETARIATI TEKNIK

1. Këshilli Konsultativ për Punësimin kryen këshillime, merr vendime me konsensus dhe i bën rekomandimet përkatëse AKPA-së.

2. Këshilli Konsultativ për Punësimin, i cili ngrihet në zbatim të nenit 15, të ligjit nr.15/2019, ka këto kompetenca:

a) Diskuton çështjet që lidhen me shërbimet e punësimit dhe programet e nxitjes së punësimit;
b) Nxit bashkëpunimin efektiv ndërmjet organizatave të punëdhënësve dhe organizatave sindikale për çështjet e nxitjes së punësimit;
c) Këshillon lidhur me mënyrën e përdorimit të Fondit Social të Punësimit, sipas parashikimeve të këtij ligji.

3. Ministri, si kryetar i KKP-së, e kryeson vetë këshillin dhe, në mungesë të tij, mund të autorizojë shprehimisht zëvendësministrin për kryesimin e mbledhjeve të tij.

4. Kryetari i Këshillit:

a) thërret mbledhjet dhe i drejton ato;
b) cakton rendin e ditës, drejton diskutimet, bashkërendon punën.

5. Këshilli funksionon, si më poshtë vijon:

a) Mblidhet mbi bazën e një kalendari, por jo më pak se një herë në katër muaj;
b) Kryetari vendos për datën dhe kohën e mbledhjeve të radhës, përveç rasteve kur vetë Këshilli ka vendosur ndryshe;
c) Çdo ndryshim në datën dhe kohën e vendosur për mbledhjet i njoftohet çdo anëtari, në mënyrë që të njihet me këto ndryshime;
ç) Mbledhjet bëhen nëse në to janë të pranishëm të paktën gjysma e anëtarëve të Këshillit.

6. Këshilli mund të propozojë:

a) hartimin dhe zbatimin e politikave, të strategjive dhe të programeve kombëtare për nxitjen e punësimit dhe uljen e papunësisë e përgatitjen e akteve nënligjore;
b) përmirësimin e sistemit të punësimit dhe të zhvillimit të aftësive në përputhje me zhvillimet e sektorëve të ekonomisë dhe interesat e tregut të punës;
c) standardet për vlerësimin e cilësisë së programeve të nxitjes së punësimit;
ç) zhvillimin e politikave dhe të programeve të veçanta, të kërkuara nga ministrat përgjegjës;
dh) bashkëpunimin me organet shtetërore dhe aktorët e interesuar, informimin e tyre dhe koordinimin e iniciativave të përbashkëta.

7. Funksionimi i Këshillit mbështetet nga sekretariati teknik, i cili përbëhet nga dy punonjës të AKPA-së.

8. Sekretariati teknik bashkërendon veprimtarinë e Këshillit dhe kryen këto detyra:

a) Organizon mbledhjet e Këshillit dhe krijon kushtet e nevojshme për zhvillimin e tyre;
b) Komunikon me kryetarin e radhës dhe me anëtarët e Këshillit në lidhje me rendin e ditës, datën, orën dhe vendin e mbledhjes së Këshillit;
c) Shpërndan dokumentacionin e mbledhjes dhe informacione të tjera te anëtarët e Këshillit;
ç) Mban minutat e mbledhjeve të Këshillit;
d) Arkivon dokumentacionin e mbledhjeve të Këshillit.

9. Mënyra e organizimit dhe përgatitja e dokumentacionit të mbledhjeve të Këshillit Kombëtar të Punës përcaktohen në rregulloren e brendshme të miratuar prej tij.

V. DISPOZITA KALIMTARE DHE TË FUNDIT

1. Ngarkohet Ministria e Financave dhe Ekonomisë që, brenda 1 (një) muaji hyrja në fuqi të këtij vendimi:

a) të fillojë procedurën për propozimin e strukturës dhe të organikës së drejtorisë qendrore dhe rajonale/vendore të AKPA-së;
b) të përgatisë strukturën dhe organikën e ofruesve të arsimit dhe formimit profesional dhe t’i miratojë ato pas miratimit të strukturës dhe të organikës së drejtorisë qendrore e drejtorive rajonale;
c) të marrë masat dhe të kryejë veprimet e nevojshme për rishpërndarjen e mjediseve të punës ekzistuese të Shërbimit Kombëtar të Punësimit si dhe për fondet buxhetore të AKPA-së, për vitin 2019.

2. Brenda 3 (tre) muajve nga emërimi, drejtori i Përgjithshëm i AKPA-së duhet të hartojë rregulloren për metodat e brendshme të punës dhe sjelljen e personelit.

3. Deri në fillimin e funksionimit të plotë të AKPA-së, sipas këtij vendimi, Shërbimi Kombëtar i Punësimit dhe strukturat përgjegjëse për menaxhimin e ofruesve të AFP-së vazhdojnë funksionimin e tyre në përputhje me strukturat dhe organikat aktualisht në fuqi.

4. Të gjitha të drejtat, detyrimet, buxheti, si dhe dokumentacioni administrativ e financiar i Shërbimit Kombëtar të Punësimit, si dhe buxheti e dokumentacioni administrativ e financiar i menaxhimit të ofruesve publikë të AFP-së i transferohen AKPA-së, pas ngritjes së saj.

5. Për nëpunësit civilë të Drejtorisë së Përgjithshme së Shërbimit Kombëtar të Punësimit zbatohen dispozitat e legjislacionit për nëpunësin civil, në rastin e mbylljes dhe të ristrukturimit të institucionit. Për punonjësit administrativë dhe punonjësit e tjerë të strukturave aktuale zbatohen dispozitat e Kodit të Punës.

6. Detajimi i numrit të punonjësve, i fondeve të buxhetit të miratuar dhe transferimi i aktiveve të qëndrueshme realizohen në përputhje me ligjin nr.9936, datë 20.6.2008, “Për menaxhimin e sistemi buxhetor në Republikën e Shqipërisë”, të ndryshuar, dhe udhëzimeve standarde të ministrit përgjegjës për financat.

7. Efektet financiare, që rrjedhin nga zbatimi i këtij vendimi, të përballohen nga buxheti i shtetit, nëpërmjet Ministrisë së Financave dhe Ekonomisë.

8. Vendimi nr.42, datë 17.1.1998, i Këshillit të Ministrave, “Për miratimin e statutit të Shërbimit Kombëtar të Punësimit”, të ndryshuar, shfuqizohet.

9. Ngarkohen Ministria e Financave dhe Ekonomisë dhe Departamenti i Administratës Publike për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

DISA SHTESA DHE NDRYSHIME NË VENDIMIN NR.286, DATË 21.5.2018, TË KËSHILLIT TË MINISTRAVE, “PËR DISA RREGULLA TË VEÇANTA PËR PUNËMARRËSIT E PËRKOHSHËM, TË CILËT PUNËSOHEN NGA AGJENCITË E PUNËSIMIT TË PËRKOHSHËM”

Në mbështetje të nenit 100 të Kushtetutës dhe të pikës 2, të nenit 18, të ligjit nr.7961, datë 12.7.1995, “Kodi i Punës i Republikës së Shqipërisë”, të ndryshuar, me propozimin e ministrit të Financave dhe Ekonomisë, Këshilli i Ministrave

V E N D O S I:

 

I. Në vendimin nr.286, datë 21.5.2018, të Këshillit të Ministrave, bëhen shtesat dhe ndryshimet, si më poshtë vijon:

1. Pas pikës 2 shtohet pika 2.1, me këtë përmbajtje:

“2.1. Agjencia e përkohshme e punësimit informon punëmarrësin me marrëdhënie punësimi të përkohshme përpara fillimit të marrëdhënieve të punës për rreziqet specifike në vendin e punës, si dhe mbi çdo kualifikim ose aftësi të posaçme profesionale ose mbikëqyrje të veçantë mjekësore, që kërkon vendi i punës.”.

2. Pika 3 ndryshohet, si më poshtë vijon:

“3. Ndërmarrja pritëse u siguron punëmarrësve të përkohshëm trajnimin e nevojshëm dhe në përputhje me karakteristikat e vendit të punës, njësoj si punëmarrësve të përhershëm, duke marrë parasysh kualifikimin dhe eksperiencën e tyre, me qëllim përmirësimin e aftësive dhe të njohurive të tyre për fushën e pozicionit ku janë punësuar.”.

3. Pas pikës 5 shtohet pika 5.1, me këtë përmbajtje:

“5.1. Punëmarrësit e punësuar nëpërmjet agjencive të përkohshme që bëjnë pjesë në grupet e rrezikuara, sipas legjislacionit në fuqi, mbrohen ndaj rreziqeve që i prekin ata në mënyrë të veçantë. Punëdhënësi siguron për këtë kategori punëmarrësish mbikëqyrje të veçantë mjekësore, sipas legjislacionit në fuqi.”.

II. Ngarkohen Ministria e Financave dhe Ekonomisë, Inspektorati Shtetëror i Punës dhe Shërbimeve Shoqërore si dhe agjencitë e punësimit të përkohshëm për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

DISA SHTESA DHE NDRYSHIME NË VENDIMIN NR.187, DATË 8.3.2017, TË KËSHILLIT TË MINISTRAVE, “PËR MIRATIMIN E STRUKTURËS DHE TË NIVELEVE TË PAGAVE TË NËPUNËSVE CIVILË/NËPUNËSVE, ZËVENDËSMINISTRIT DHE NËPUNËSVE TË KABINETEVE, NË KRYEMINISTRI, APARATET E MINISTRIVE TË LINJËS, ADMINISTRATËN E PRESIDENTIT, KUVENDIT, KOMISIONIT QENDROR TË ZGJEDHJEVE, GJYKATËN E LARTË, PROKURORINË E PËRGJITHSHME, DISA INSTITUCIONE TË PAVARURA, INSTITUCIONET NË VARËSI TË KRYEMINISTRIT, INSTITUCIONET NË VARËSI TË MINISTRAVE TË LINJËS DHE ADMINISTRATËN E PREFEKTIT”, TË NDRYSHUAR

Në mbështetje të nenit 100 të Kushtetutës, të pikës 2, të nenit 4, të ligjit nr.10405, datë 24.3.2011, “Për kompetencat për caktimin e pagave dhe të shpërblimeve”, të pikës 2, të nenit 7, të ligjit nr.152/2013, “Për nëpunësin civil”, të ndryshuar, të ligjit nr.9584, datë 17.7.2006, “Për pagat, strukturat dhe shpërblimet e institucioneve të pavarura kushtetuese dhe institucioneve të tjera të pavarura, të krijuara me ligj”, të ndryshuar, dhe të ligjit nr.99/2018, “Për buxhetin e vitit 2019”, me propozimin e Kryeministrit, Këshilli i Ministrave

 

V E N D O S I:

 

1. Në vendimin nr.187, datë 8.3.2017, të Këshillit të Ministrave, të ndryshuar, të bëhen shtesat dhe ndryshimet, si më poshtë vijon:

a) Titulli i vendimit ndryshohet, si më poshtë vijon:

“Për miratimin e strukturës dhe të niveleve të pagave të nëpunësve civilë/nëpunësve, zëvendësministrit dhe nëpunësve të kabineteve në disa institucione të administratës publike”.

b) Në fund të shkronjës “a”, të pikës 1/3, shtohet emërtesa “Instituti Kombëtar i Trashëgimisë Kulturore”.

c) Në shkronjën “b”, të pikës 1/3:

i. shtohen emërtesat “Qendra e Parandalimit të Krimeve të të Miturve dhe të Rinjve” dhe “Qendra Kombëtare e Librit dhe Leximit”;
ii. shfuqizohen emërtesat “Agjencia e Shërbimit Arkeologjik” dhe “Instituti i Monumenteve të Kulturës”;
iii. emërtesa “Muzeu Kombëtar “Gjethi” zëvendësohet me emërtesën “Muzeu Kombëtar i Përgjimeve “Shtëpia me Gjethe””;
iv. emërtesa “Agjencia Shtetërore për Mbrojtjen e të Drejtave të Fëmijëve” zëvendësohet me emërtesën “Agjencia Shtetërore për të Drejtat dhe Mbrojtjen e Fëmijës”.

ç) Në shkronjën “c”, të pikës 1/3:

i. shtohet emërtesa “Qendra Muzeore Durrës”;
ii. emërtesa “Qendra Kombëtare e Muzeumeve Berat” zëvendësohet me emërtesën “Qendra Muzeore Berat – Muzeu i Ikonografisë “Onufri”, Muzeu Etnografik Berat”;
iii. emërtesa “Muzeu Kombëtar “Gjergj Kastrioti” Krujë” zëvendësohet me emërtesën “Qendra Muzeore Krujë – Muzeu Kombëtar “Skënderbeu”, Muzeu Etnografik Krujë”;
iv. emërtesa “Muzeu Kombëtar i Pavarësisë Vlorë” zëvendësohet me emërtesën “Muzeu Kombëtar i Pavarësisë”;
v. emërtesa “Muzeu Kombëtar i Artit Mesjetar Korçë” zëvendësohet me emërtesën “Muzeu Kombëtar i Artit Mesjetar”;
vi. emërtesa “Qendra Kombëtare e Inventarizimit të Pasurive Kulturore” zëvendësohet me emërtesën “Instituti Kombëtar i Regjistrimit të Trashëgimisë Kulturore”;
vii. emërtesa “Qendra Kombëtare e Veprimtarive Folklorike” zëvendësohet me emërtesën “Qendra Kombëtare e Veprimtarive Tradicionale”;
viii. shfuqizohet emërtesa “Qendra Kombëtare e Librit dhe Leximit”.

d) Pika 4/2 ndryshohet, me këtë përmbajtje:

“4/2. Në Kryeministri, nëpunësit civilë në pozicionet, “Drejtor i Departamentit të Zhvillimit dhe Mirëqeverisjes”, “Drejtor i Departamentit Rregullator dhe Përputhshmërisë”, “Drejtor i Departamentit të Administrimit, Transparencës dhe Antikorrupsionit”, “Drejtor Njësie, Jurist dhe Koordinator në Departamentin Rregullator dhe të Përputhshmërisë”, “Drejtor Njësie, Drejtor Drejtorie dhe Koordinator në Departamentin e Zhvillimit dhe Mirëqeverisjes”, “Drejtor njësie dhe Koordinator në Njësinë e Transparencës dhe Antikorrupsionit”, “Drejtor i Njësisë së Burimeve Kombëtare për Zhvillim”, “Drejtor i Njësisë së Buxhetit dhe Administrimit”, “Drejtor i Drejtorisë së Administrimit të Brendshëm” dhe “Koordinator në Sektorin (Zyrën) e Menaxhimit pranë Sekretarit të Përgjithshëm”, në masën 10 000 (dhjetë mijë) lekë në muaj.”.

dh) Në pikën 5, pas fjalëve “Specialist redaktor në Kuvendin e Shqipërisë” shtohen fjalët “dhe “Specialist stenograf redaktor në administratën e Presidentit”.

e) Në lidhjen nr.6/5, që përmendet në pikën 9.5, shtohen dy rreshta, me këtë përmbajtje:

Drejtor drejtorie në drejtoritë e përmbajtjes
III-a
1
20 000
Drejtor drejtorie në drejtoritë mbështetëse
III-a
1
0

2. Zbatimi i këtij vendimi dhe efektet financiare që rrjedhin prej tij, për vitin 2019, të përballohen nga fondet e miratuara për secilin institucion dhe të fillojnë nga:

i. momenti i transferimit apo emërimit të nëpunësve/punonjësve në strukturat dhe organikat e reja të institucioneve të përmendura në shkronjat “b”, “c” dhe “ç”, të pikës 1, të këtij vendimi;
ii. momenti i hyrjes në fuqi të këtij vendimi, për të gjitha përcaktimet e tjera.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

PROPOZIMIN KUVENDIT TË REPUBLIKËS SË SHQIPËRISË TË KANDIDATURËS PËR KOMISIONER PËR TË DREJTËN E INFORMIMIT DHE MBROJTJEN E TË DHËNAVE PERSONALE

Në mbështetje të nenit 100 të Kushtetutës dhe të nenit 33, të ligjit nr.9887, datë 10.3.2008, “Për mbrojtjen e të dhënave personale”, të ndryshuar, me propozimin e Kryeministrit, Këshilli i Ministrave

 

V E N D O S I:

 

Propozimin Kuvendit të Republikës së Shqipërisë të kandidaturës së z. Besnik Dervishi për Komisioner për të Drejtën e Informimit dhe Mbrojtjen e të Dhënave Personale.

Ky vendim hyn në fuqi menjëherë.

 

K R Y E M I N I S T R I

EDI RAMA

 

***

 

V E N D I M

PËR

MIRATIMIN E RAPORTIT TË PESTË DHE TË GJASHTË PERIODIK KOMBËTAR PËR ZBATIMIN E KONVENTËS SË OKB-SË “PËR TË DREJTAT E FËMIJËS” DHE TË DY PROTOKOLLEVE OPSIONALE TË SAJ “PËR PËRFSHIRJEN E FËMIJËVE NË KONFLIKT TË ARMATOSUR” DHE “PËR SHITJEN E FËMIJËVE, PROSTITUCIONIN E FËMIJËVE DHE PORNOGRAFINË ME FËMIJË”

Në mbështetje të nenit 100 të Kushtetutës, të pikës 4, të nenit 25, të ligjit nr.43/2016, “Për marrëveshjet ndërkombëtare në Republikën e Shqipërisë”, të ligjit nr.7531, datë 11.12.1991, “Për ratifikimin e konventës së OKB-së “Për të drejtat e fëmijës””, të ligjit nr.9834, datë 22.11.2007, “Për aderimin e Republikës së Shqipërisë në protokollin opsional të konventës së OKB-së “Për të drejtat e fëmijëve”, për shitjen e fëmijëve, prostitucionin dhe pornografinë me fëmijë”, dhe të ligjit nr.9833, datë 22.11.2007, “Për aderimin e Republikës së Shqipërisë në protokollin opsional të konventës së OKB-së “Për të drejtat e fëmijëve”, për përfshirjen e fëmijëve në konflikte të armatosura”, me propozimin e Kryeministrit dhe ministër për Evropën dhe Punët e Jashtme, Këshilli i Ministrave

 

V E N D O S I:

 

Miratimin e raportit të pestë dhe të gjashtë periodik kombëtar për zbatimin e konventës së OKB-së “Për të drejtat e fëmijës” dhe të dy protokolleve opsionale të saj “Për përfshirjen e fëmijëve në konflikt të armatosur” dhe “Për shitjen e fëmijëve, prostitucionin e fëmijëve dhe pornografinë me fëmijë”, sipas tekstit që i bashkëlidhet këtij vendimi dhe është pjesë përbërëse e tij.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

MIRATIMIN E RREGULLIT TEKNIK “PËR PËRPUTHSHMËRINË ELEKTROMAGNETIKE TË PAJISJEVE DHE PËRCAKTIMIN E LISTËS SË STANDARDEVE TË HARMONIZUARA”

Në mbështetje të nenit 100 të Kushtetutës dhe të pikës 2, të nenit 5, të ligjit nr.10489, datë 15.12.2011, “Për tregtimin dhe mbikëqyrjen e tregut të produkteve joushqimore”, të ndryshuar, me propozimin e ministrit të Financave dhe Ekonomisë, Këshilli i Ministrave

 

V E N D O S I:

 

1. Miratimin e rregullit teknik “Për përputhshmërinë elektromagnetike të pajisjeve dhe pёrcaktimin e listёs së standardeve të harmonizuara”, sipas tekstit që i bashkëlidhet këtij vendimi dhe është pjesë përbërëse e tij.

2. Standardet e harmonizuara shqiptare, numrat dhe titujt e të cilëve janë përshirë në listën bashkëlidhur këtij vendimi, shërbejnë si dokumente referencë për prezumimin e konformitetit të përputhshmërisë elektromagnetike të pajisjeve me kërkesat thelbësore të objektivave të sigurisë, të përcaktuara në rregullin teknik, sipas pikës 1, të këtij vendimi.

3. Çdo pajisje e vendosur në treg, përpara hyrjes në fuqi të këtij vendimi dhe në përputhje me vendimin nr.1054, datë 23.12.20015, të Këshillit të Ministrave, “Për miratimin e rregullit teknik “Për përputhshmërinë elektromagnetike dhe pёrcaktimin e listёs së standardeve të harmonizuara””, nuk do të pengohet që të bëhet e disponueshme në treg, pas hyrjes në fuqi të këtij vendimi.
Edhe certifikatat e lëshuara në përputhje me vendimin nr.1054, datë 23.12.20015, të Këshillit të Ministrave, “Për miratimin e rregullit teknik “Për përputhshmërinë elektromagnetike dhe pёrcaktimin e listёs së standardeve të harmonizuara””, janë të vlefshme pas hyrjes në fuqi të këtij vendimi.

4. Vendimi nr.1054, datë 23.12.2015, i Këshillit të Ministrave, “Për miratimin e rregullit teknik “Për përputhshmërinë elektromagnetike dhe pёrcaktimin e listёs së standardeve të harmonizuara””, shfuqizohet.

5. Ngarkohen Ministria e Financave dhe Ekonomisë, Drejtoria e Përgjithshme e Akreditimit, Inspektorati Shtetëror i Mbikëqyrjes së Tregut dhe Drejtoria e Përgjithshme e Doganave për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

MIRATIMIN, NË PARIM, TË MARRËVESHJES, NDËRMJET REPUBLIKËS SË SHQIPËRISË DHE KONFEDERATËS ZVICERANE, PËR MBROJTJEN SHOQËRORE

Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Financave dhe Ekonomisë, Këshilli i Ministrave

V E N D O S I:

Miratimin, në parim, të marrëveshjes, ndërmjet Republikës së Shqipërisë dhe Konfederatës Zvicerane, për mbrojtjen shoqërore, sipas tekstit që i bashkëlidhet këtij vendimi.

Ky vendim hyn në fuqi menjëherë.

 

K R Y E M I N I S T R I

EDI RAMA

 

***

 

V E N D I M

PËR

NDRYSHIMIN E PËRGJEGJËSISË SË ADMINISTRIMIT, NGA KËSHILLI I MINISTRAVE TE MINISTRIA E FINANCAVE DHE EKONOMISË, TW PASURISË ME EMËRTIMIN “GODINË RESTORANT DY KATE, STABILIMENT DURRËS”, DHE PËR NJË NDRYSHIM NË VENDIMIN NR.1058, DATË 16.7.2008, TË KËSHILLIT TË MINISTRAVE, “PËR MIRATIMIN E LISTËS SË INVENTARIT TË PRONAVE TË PALUAJTSHME SHTETËRORE, TË CILAT I KALOJNË NË PËRGJEGJËSI ADMINISTRIMI KËSHILLIT TË MINISTRAVE, PËR DREJTORINË E SHËRBIMEVE QEVERITARE”

Në mbështetje të nenit 100 të Kushtetutës dhe të neneve 13 e 15, shkronja “c”, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e ministrit të Financave dhe Ekonomisë, Këshilli i Ministrave

 

V E N D O S I:

 

1. Ndryshimin e përgjegjësisë së administrimit, nga Këshilli i Ministrave te Ministria e Financave dhe Ekonomisë, të pasurisë “Godinë restorant dy kate, stabiliment Durrës”, në përdorim të Drejtorisë së Shërbimeve Qeveritare, sipas listës së inventarit që i bashkëlidhet vendimit nr.1058, datë 16.7.2008, të Këshillit të Ministrave.

2. Pasuria e përmendur në pikën 1, të këtij vendimi, hiqet nga lista e inventarit të pronave të paluajtshme, që i bashkëlidhet vendimit nr.1058, datë 16.7.2008, të Këshillit të Ministrave, “Për miratimin e listës së inventarit të pronave të paluajtshme shtetërore, të cilat i kalojnë në përgjegjësi administrimi Këshillit të Ministrave, për Drejtorinë e Shërbimeve Qeveritare”.

3. Ngarkohen Kryeministria, Drejtoria e Shërbimeve Qeveritare, Ministria e Financave dhe Ekonomisë dhe Agjencia Shtetërore e Kadastrës për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

DISA SHTESA NË VENDIMIN NR.651, DATË 10.11.2017, TË KËSHILLIT TË MINISTRAVE, “PËR DISPOZITAT ZBATUESE TË LIGJIT NR.102/2014, “KODI DOGANOR I REPUBLIKËS SË SHQIPËRISË””

Në mbështetje të nenit 100 të Kushtetutës dhe të neneve 9, 10, 18, 19, 24, 26, 29, 35, 39 deri 42, 47, 51, 58, 62, 64, 71, 83, 94, 98, 100, 108, 115, 118, 119, pika 7, 123, 129, 133, 141, 145, 148, 149 deri 152, 153, pikat 1, 2 e 3, 154, 160 deri 169, 174 deri 177, 181, 184, 188, 190, 193, 196, 200, 202, 206, 209, 212, 216, 226, 238, 240, 245, 248, 284, 286, 287 dhe 288, të ligjit nr.102/2014, “Kodi Doganor i Republikës së Shqipërisë”, të ndryshuar, me propozimin e ministrit të Financave dhe Ekonomisë, Këshilli i Ministrave

 

V E N D O S I:

 

Në vendimin nr.651, datë 10.11.2017, të Këshillit të Ministrave, bëhen shtesat, si më poshtë vijon:

1. Në titullin I, kreu 1, pas pikës 66, të nenit 1, shtohet pika 67, me këtë përmbajtje:

“67. “Zonë e lirë doganore”, është një pjesë e territorit doganor të Republikës së Shqipërisë që i nënshtrohet legjislacionit doganor, në të cilën lejohet të kryhet çdo aktivitet industrial, tregtar ose shërbimi.”.

2. Në titullin VII, pas seksionit 2, të kreut 3, shtohen seksionet 3 dhe 4, me këtë përmbajtje:

“Seksioni 3
Zonat e lira doganore

Neni 648-1
Kushtet e përgjithshme të funksionimit
(Nenet 28, 84, 192, pika 1 dhe 216, të Kodit)

1. Në përputhje me dispozitat e këtij seksioni, dispozitat lidhur me regjimin e magazinimit doganor, të referuara në këtë vendim, zbatohen edhe për qëllime të këtij seksioni.

2. Çdo person juridik, i vendosur në Republikën e Shqipërisë, mund të aplikojë për veprimtari në një zonë të lirë doganore, me kusht që të përmbushë kushtet si dhe detyrimet e përcaktuara në këtë vendim dhe në legjislacionin në fuqi.

3. Autorizimi për veprimtari në zonë të lirë doganore miratohet pas plotësimit të kushteve dhe kritereve të mëposhtme:

a) Përdorimi nga aplikuesi i sistemeve kompjuterike të përpunimit të të dhënave për paraqitjen e deklarimeve dhe njoftimeve doganore elektronike, në sistemin informatik të doganës apo në sisteme specifike të krijuara për këtë qëllim, duke zbatuar dispozitat përkatëse lidhur me këto teknika apo sisteme;
b) Përdorimi i sistemeve të monitorimit me videokamera dhe i ndriçimit. Aplikuesi, për qëllime mbikëqyrjeje dhe kontrolli nga autoritetet doganore është i detyruar që më shpenzimet e tij të bëjë ndriçimin e ambienteve dhe rrethimit, si dhe instalimin, vendosjen, mirëmbajtjen, furnizimin me energji të pandërprerë etj., të sistemeve mbikëqyrëse me videokamera dhe të sigurojë transmetimin on-line dhe ruajtjen e pacenuar të imazheve të regjistruara nga sistemet mbikëqyrëse me videokamera. Sistemi i ndriçimit dhe i videokamerave duhet të mundësojë kontrollin e perimetrit të jashtëm të zonës së lirë doganore, si dhe ambientet e brendshme të tyre. Aplikuesi siguron të gjitha pajisjet e nevojshme për autoritetet doganore, shikueshmërinë on-line të imazheve dhe ruajtjen e imazheve për një periudhë të paktën prej 3 (tre) muajsh. Në rast se ka filluar procedura hetimore/gjyqësore, këto imazhe ruhen deri në përfundim të procesit hetimor dhe/ose gjyqësor. Drejtoria e Përgjithshme e Doganave përcakton vendet dhe këndet e pozicionimit të kamerave në këto ambiente;
c) Vendosja në dispozicion të autoriteteve doganore të ambienteve të punës, të cilat duhet të plotësojnë standardet e përcaktuara nga Drejtoria e Përgjithshme e Doganave;
ç) Rrethimi i zonës së lirë doganore, së paku me gardh metalik të qëndrueshëm me bazament solid, në një lartësi jo më pak se 2 (dy) metra;
d) Shoqëria (aplikuesi), administratori, anëtarët e bordit apo këshillit drejtues dhe punonjësi përgjegjës në shoqërinë aplikuese për çështjet doganore, nuk kanë detyrime doganore të papaguara dhe nuk kanë kryer shkelje penale në fushën doganore dhe të akcizës për një periudhë 5 (pesë)-vjeçare nga data e aplikimit.

4. Pas miratimit, mbajtësi i autorizimit për veprimtari në zonë të lirë doganore, duhet të përmbushë në vazhdimësi kushtet dhe kriteret e përcaktuara, pa cenuar detyrimet dhe rregullat për lindjen e një borxhi doganor.

5. Mbajtësi i autorizimit për veprimtari në zonë të lirë doganore duhet të përmbushë të gjitha kushtet dhe rregullat e përcaktuara në autorizim në lidhje me kontrollin doganor, çlirimin e mallrave, regjistrat e magazinimit të mallrave dhe dispozita të tjera relevante. Në rast se nuk përmbushen të gjitha këto kushte, kjo gjë sjell shfuqizimin apo anulimin e autorizimit dhe për të gjitha mallrat e ruajtura në këtë zonë duhet t’u caktohet menjëherë një destinacion doganor. Në rast se mbajtësi i autorizimit nuk i jep destinacion doganor mallrave, zyra doganore mbikëqyrëse vijon me masat e përcaktuara në kreun IV, të titullit V, të Kodit Doganor.

6. Mbajtësi i autorizimit për veprimtari në zonë të lirë doganore duhet të informojë Drejtorinë e Përgjithshme të Doganave, për të gjithë faktorët e dalë pas miratimit, të cilët mund të ndikojnë në vazhdimësinë apo përmbajtjen e tij.

7. Mbajtësi i autorizimit, për veprimtari në zonë të lirë doganore, duhet të plotësojë të gjitha kushtet e punës për autoritetet doganore, pa asnjë shpenzim nga këto të fundit.

Neni 648-2
Aplikimi për veprimtari në zonë të lirë doganore
(Pika 1, e nenit 27, të Kodit)

1. Aplikimi për veprimtari në zonë të lirë doganore paraqitet pranë Drejtorisë së Përgjithshme të Doganave.

2. Aplikimi bëhet me shkrim, sipas aneksit 14, të shtojcës A, që i bashkëlidhet këtij vendimi dhe është pjesë përbërëse e tij.

3. Aplikimi duhet të shoqërohet me dokumentet e mëposhtme (në formë shkresore dhe elektronike CD, së bashku me materiale fotografike ose filmike):

a) Gjendjen financiare të shoqërisë tregtare dhe statusin e saj, i cili duhet të jetë aktiv;
b) Aktin e disponimit për ambientin/godinën që do të përdoret për këtë qëllim;
c) Vërtetimin, që nuk është dënuar penalisht për vepra penale që lidhen me aktivitetin ekonomik të aplikuesit, ndonjë nga personat e mëposhtëm:

i. Aplikuesi;
ii. Administratori;
iii. Anëtarët e bordit apo këshillit drejtues;
iv. Punonjësi përgjegjës në shoqërinë aplikuese për çështjet doganore.

ç) Planin e organizimit të punës dhe listën e personelit kyç që do të operojë në zonën e lirë doganore dhe që do të ndjekë zbatimin e këtij plani. Listës duhet t’i bashkëlidhet kopje e letërnjoftimeve të personelit;
d) Detyrimin për të siguruar mundësinë për mbyllje me dryn ose plumbosje nga autoritetet doganoretë ambienteve, godinave, instalimeve etj;
dh) Kushtet e ruajtjes dhe të sigurisë së mallrave në këto mjedise, mundësinë e mbikëqyrjes nga autoriteti doganor dhe zyra/ambienti që i ofrohet këtij të fundit;
e) Prezantimin e sistemit dhe të aparaturave matëse, që mundësojnë verifikimin fizik të sasisë gjendje, në çdo moment që do të kërkohet nga autoritetet doganore, si edhe ndarjen e mallrave sipas statusit të tyre;
ë) Listën e mjeteve që disponon operatori për plotësimin e nevojave të ushtrimit të aktivitetit dhe që lidhen me trajtimet, përpunimet, matjet, transportin, kontrollin, ruajtjen dhe sigurinë;
f) Lejen, licencën, aktin e kolaudimit apo të kalibrimit, lejen mjedisore dhe dokumente të tjera që vërtetojnë plotësimin e kushtëzimeve të përcaktuara në këtë vendim dhe në legjislacionin në fuqi që rregullon fusha të veçanta e që mbulojnë aktivitetin e kërkuar.

4. Aplikimi duhet t’i referohet dokumenteve shoqëruese, të cilat duhet të jenë origjinale apo kopje të noterizuara të origjinalit, si prova mbështetëse apo dokumente që kanë lidhje me hollësitë e dhëna në aplikim, paraqitja e të cilave nevojitet për vlerësimin e aplikimit dhe të plotësimit të kushteve e të kritereve.

5. Aplikimi mund të shoqërohet nga dokumente shtesë, në të cilat jepet informacion provues mbi plotësimin e kushteve dhe të kërkesave të përcaktuara në këtë vendim. Të gjitha këto dokumente, prova apo fletë shtesë konsiderohen pjesë përbërëse të aplikimit që ato shoqërojnë. Në aplikim shënohet edhe numri i anekseve.

Neni 648-3
Procedurat përpara miratimit të autorizimit për veprimtari në zonë të lirë doganore
(Neni 27, pika 1, dhe 217, të Kodit)

1. Me marrjen e aplikimit, strukturat në DPD, në bashkëpunim me degën doganore mbikëqyrëse, verifikojnë informacionin e paraqitur. Kur konstatohet se aplikimi nuk përmban të gjitha të dhënat/dokumentet/informacionet e kërkuara, brenda 15 (pesëmbëdhjetë) ditëve nga data e marrjes së aplikimit i kërkohet aplikuesit (operatorit ekonomik) të plotësojë të dhënat/dokumentet/informacionet e duhura, duke i dhënë edhe arsyet e kësaj kërkese. Personi i interesuar duhet të plotësojë informacionin brenda 10 (dhjetë) ditëve nga data e marrjes së kësaj kërkese, në të kundërt aplikimi konsiderohet i refuzuar dhe personi i interesuar mund të aplikojë si për herë të parë.

2. Dega doganore mbikëqyrëse, brenda 15 (pesëmbëdhjetë) ditëve nga data e konstatimit se plotësohen të gjitha kushtet dhe dokumentacioni/ informacionet e sipërpërmendura, procedon me:

a) verifikimin nëse dokumentacioni i paraqitur përputhet me gjendjen reale si dhe me këqyrjen në vend të vendndodhjes/ambienteve për të cilat kërkohet zona e lirë;
b) kushtet e ruajtjes së sigurisë së mallrave në këto ambiente, numrin e dyerve dhe mundësinë e mbylljes me dryn, plumbosjes, mbylljen e dritareve etj.;
c) mundësinë e monitorimit, të mbikëqyrjes, të kontrollit, të ndarjes, të inventarizimit të mallrave etj., nga autoritetet doganore;
ç) verifikimin e vërtetësisë (kur gjykohet e arsyeshme) të të gjithë dokumentacionit të paraqitur nga aplikuesi.

3. Kur konstatohen mosvërtetësi të dokumentacionit të paraqitur, aplikimi refuzohet dhe strukturat doganore duhet të ndërmarrin të gjithë hapat e përcaktuar në legjislacionin në fuqi, përfshirë këtu edhe kallëzimin penal, kur është rasti.

4. Kur konstatohen parregullsi, i kërkohet aplikuesit që të plotësojë apo të rregullojë situatën duke marrë masat e duhura brenda një periudhe kohore prej 15 (pesëmbëdhjetë) ditësh. Në varësi të rrethanave dhe të specifikave të ambientit për qëllime mbikëqyrjeje dhe kontrolli, mund të kërkohet dokumentacion shtesë apo të vendosen kushte të tjera përtej atyre të përcaktuara në këtë vendim.

5. Brenda 10 (dhjetë) ditëve nga përfundimi i procesit të verifikimit apo nga rregullimi i situatës, dega doganore mbikëqyrëse përcjell në DPD një relacion, ku sqarohet në mënyrë të detajuar e gjithë procedura e ndjekur deri në këtë moment, si edhe përfundimi i verifikimeve të kryera.

Neni 648-4
Miratimi i autorizimit për veprimtari në zonë të lirë doganore
(Neni 217 i Kodit)

1. Kur DPD-ja konstaton se aplikimi është i rregullt dhe në përputhje me kushtet dhe kërkesat e këtij vendimi dhe me legjislacionin doganor në fuqi, si edhe konkludohet mbi mundësinë për mbikëqyrje e kontroll, miraton autorizimin për veprimtari në zonë të lirë doganore, sipas aneksit 15, të shtojcës A, që i bashkëlidhet këtij vendimi dhe është pjesë përbërëse e tij.

2. Drejtoria e Përgjithshme e Doganave, në përputhje me përcaktimet e nenit 648-11, kryen aktivizimin në sistemin kompjuterik të fillimit të regjimit të zonës së lirë doganore.

Neni 648-5
Përgjegjësitë e mbajtësit të autorizimit për veprimtari në zonë të lirë doganore
(Nenet 28 dhe 217, të Kodit)

Mbajtësi i autorizimit për veprimtari në zonë të lirë doganore ka përgjegjësi:

a) për mallrat e magazinuara në ambientet e autorizuara;
b) për të siguruar që mallrat nën regjimin e zonë së lirë doganor të mos nxirren/të dalin nga mbikëqyrja doganore;
c) për të përmbushur detyrimet që rrjedhin nga magazinimi i mallrave të mbuluara nga regjimi i zonës së lirë doganore;
ç) për të marrë aprovimin paraprak nga DPD-ja për çdo ndryshim strukturor në ambientet e autorizuara;
d) për të marrë masat për sigurinë e mjediseve të zonës së lirë doganore;
dh) për të siguruar që hyrja/dalja në dhe nga zona e lirë doganore të jetë e sigurt;
e) për zbatimin korrekt të legjislacionit shqiptar në fuqi e në veçanti të legjislacionit doganor lidhur me regjimin e zonës së lirë doganore dhe/ose regjime apo procedura të tjera të nevojshme sipas rastit, si dhe për të zbatuar rregullat e kushtet e tjera të vendosura prej autoriteteve doganore për qëllime mbikëqyrjeje dhe kontrolli;
ë) për të mirëmbajtur dhe përditësuar të dhënat e inventarit dhe vënien e tyre në dispozicion të autoriteteve doganore sa herë që kërkohen për qëllime mbikëqyrjeje dhe kontrolli;
f) për të informuar zyrtarisht me shkrim dhe pa vonesë zyrën doganore mbikëqyrëse, nëse konstaton mospërputhje mes stokut faktik në zonën e lirë doganore dhe stokut sipas sistemit elektronik doganor.

Neni 648-6
Pezullimi i autorizimit për veprimtari në zonë të lirë doganore
(Nenet 28 dhe 217, të Kodit)

1. Autorizimi për veprimtari në zonë të lirë doganore pezullohet nga DPD-ja kur:

a) nga autoritetet doganore konstatohen mospërputhje me përcaktimet e neneve 648-1 deri 648-3;
b) autoriteti doganor ka arsye të mjaftueshme të besojë që një veprim, i cili mund të shkaktojë procedim penal lidhur me shkelje të legjislacionit doganor, akcizës apo atë tatimor, është kryer nga mbajtësi i autorizimit, anëtarët e bordit apo këshillit drejtues, aksionerët e shoqërisë në rast se operatori ekonomik aplikues është një shoqëri aksionare apo personi përgjegjës në shoqërinë aplikuese për çështjet doganore.

2. Para marrjes së vendimit, DPD-ja ia komunikon konstatimet mbajtësit të autorizimit për zonë të lirë doganore. Mbajtësi i autorizimit, për zonë të lirë doganore, ka të drejtë të korrigjojë situatën dhe/ose të shprehë qëndrimin e tij brenda 30 (tridhjetë) ditëve nga data e komunikimit.

3. Nëse mbajtësi i autorizimit nuk e rregullon situatën e përmendur në shkronjën “a”, të pikës 1, të këtij neni, brenda 30 (tridhjetë) ditëve, DPD-ja njofton mbajtësin e autorizimit për zonën e lirë doganore mbi pezullimin për një periudhë kohore prej 30 (tridhjetë) ditësh, duke i mundësuar atij marrjen e masave të kërkuara për të rregulluar situatën.

4. Në rastet e referuara në shkronjën “b”, të pikës 1, të këtij neni, DPD-ja pezullon autorizimin deri në fund të procedimit në gjykatë. DPD-ja njofton mbajtësin e autorizimit për këtë qëllim.

5. Kur mbajtësi i autorizimit për veprimtari në zonë të lirë doganore nuk është në gjendje të rregullojë situatën brenda 30 (tridhjetë) ditëve, por mund të japë prova që kushtet mund të përmbushen nëse shtyhet periudha e pezullimit, DPD-ja pezullon autorizimin për një periudhë tjetër prej 30 (tridhjetë) ditësh kalendarike. Për këtë qëllim njoftohet mbajtësi i autorizimit.

6. Gjatë periudhës së pezullimit të autorizimit për veprimtari në zonë të lirë doganore, ambientet, godinat, si dhe instalimet respektive mbyllen me dryn/plumbosje nga zyra doganore mbikëqyrëse. Vetëm nën mbikëqyrjen e zyrës doganore mbikëqyrëse këto ambiente mund të hapen dhe mbajtësi i autorizimit mund të kryejë vetëm veprime që kanë të bëjnë me mirëmbajtjen e pajisjeve apo mallrave si dhe t’u japë destinacion tjetër mallrave që janë në prag të skadencës.

Neni 648-7
Heqja e pezullimit të autorizimit për veprimtari në zonë të lirë doganore
(Nenet 28 dhe 217, të Kodit)

1. Kur mbajtësi i autorizimit për veprimtari në zonë të lirë doganore vlerësohet se ka marrë masat e nevojshme për të plotësuar kushtet dhe kriteret që duhet të përmbushen, DPD-ja heq pezullimin dhe informon mbajtësin e autorizimit. Pezullimi mund të hiqet përpara përfundimit të afatit kohor të përcaktuar në pikat 4 ose 6, të nenit 648-6.

2. Nëse mbajtësi i autorizimit për veprimtari në zonë të lirë doganore dështon të marrë masat e nevojshme brenda periudhës kohore të pezullimit të parashikuar në pikën 4 ose 6, të nenit 648-6, atëherë zbatohet neni 648-9.

Neni 648-8
Pezullimi me kërkesë i autorizimit për veprimtari në zonë të lirë doganore
(Neni 28 i Kodit)

1. Kur mbajtësi i një autorizimi për veprimtari në zonë të lirë doganore nuk është në gjendje të përmbushë përkohësisht ndonjë nga kushtet dhe kriteret e përcaktuara, ai mund të kërkojë pezullimin e tij. Në raste të tilla, mbajtësi i autorizimit njofton Drejtorinë e Përgjithshme të Doganave, duke specifikuar datën kur ai do të jetë në gjendje të përmbushë kushtet dhe kriteret përsëri. Ai, gjithashtu, njofton për masat e planifikuara dhe afatet kohore për përmbushjen e tyre. Edhe në këtë rast aplikohen masat e përcaktuara në nenin 648-6.

2. Nëse mbajtësi i një autorizimi për zonë të lirë doganore dështon të rregullojë situatën brenda periudhës kohore të përcaktuar në njoftimin e tij, DPD-ja mund të autorizojë një shtyrje të arsyeshme, me kusht që mbajtësi i autorizimit të ketë vepruar me vullnet të mirë.

Neni 648-9
Shfuqizimi i autorizimit për veprimtari në zonë të lirë doganore
(Neni 217 i Kodit)

Me propozim të degës doganore mbikëqyrëse të zonës së lirë doganore, DPD-ja shfuqizon autorizimin për veprimtari në zonë të lirë doganore në rastet e mëposhtme:

a) Kur mbajtësi i autorizimit dështon të rregullojë situatën e referuar në pikën 4, të nenit 648-6 dhe në pikën 1, të nenit 648-8;
b) Kur janë identifikuar në mënyrë të përsëritur raste kundërvajtjeje në plotësimin e kushteve për hyrje-daljen e mallrave dhe regjistrimin e tyre;
c) Kur janë kryer shkelje të rënda ose të përsëritura në lidhje me legjislacionin doganor, akcizën apo atë tatimor nga mbajtësi i autorizimit ose personat e tjerë të përcaktuar në shkronjën “b”, të pikës 1, të nenit 648-6, dhe kur ka shteruar e drejta e ankimimit;
ç) Falimentimi i mbajtësit të autorizimit sipas vendimit gjyqësor;
d) Me kërkesë të mbajtësit të autorizimit.

Neni 648-10
Anulimi i autorizimit për veprimtari në zonë të lirë doganore
(Neni 217 i Kodit)

1. Me propozim të degës doganore mbikëqyrëse të zonës së lirë doganore, DPD-ja anulon një autorizim për veprimtari në zonë të lirë doganore, në qoftë se plotësohen të gjitha kushtet e mëposhtme:

a) Autorizimi është dhënë bazuar në informacion të rremë, të pasaktë ose të falsifikuar;
b) Personi, ndaj të cilit është dhënë vendimi, ishte në dijeni ose objektivisht duhej të ishte në dijeni që informacioni i dhënë ishte i rremë, i pasaktë ose i falsifikuar.

2. Anulimi i shtrin efektet që nga data e hyrjes në fuqi të vendimit fillestar, përveçse kur, në përputhje me legjislacionin doganor, në vendim specifikohet ndryshe.

Neni 648-11
Rakordime dhe kontrolle
(Neni 218, 219, 220, 221 dhe 222, të Kodit)

1. Pas miratimit të zonës së lirë doganore, DPD-ja miraton:

a) rregulloren për funksionimin e zonës së lirë doganore. Rregullorja përmban organizimin e zonës, sigurinë e ndërtesave dhe objekteve, sigurinë dhe kushtet e punës, lejet dhe dokumentet e hyrjes së personave në zonë, etj.;
b) regjistrat e paraqitur nga aplikuesi për veprimtari në zonë të lirë doganore.

2. Gjatë ushtrimit të aktivitetit, mbajtësi i autorizimit është i detyruar të regjistrojë dhe të dokumentojë të gjitha hyrjet/daljet e mallrave në zonën e lirë doganore si dhe të paraqesë pranë autoriteteve doganore të zyrës mbikëqyrëse për çdo rast, sipas legjislacionit në fuqi, deklarimet të shoqëruara me dokumentet përkatëse.

3. Brenda datës 5 (pesë) dhjetor të çdo viti, mbajtësi i autorizimit për veprimtari në zonë të lirë doganore, dorëzon pranë autoriteteve doganore të zyrës mbikëqyrëse, raport për gjendjen e mallrave.

4. Të gjitha veprimet për hyrjen/daljen e mjeteve dhe të mallrave në dhe nga zona e lirë doganore janë objekt i njoftimit dhe lejes përkatëse të autoriteteve doganore të zyrës mbikëqyrëse.

Këto veprime mund të kryhen vetëm gjatë orarit të përcaktuar nga autoritetet doganore.

Seksioni 4
Krijimi i zonës së lirë doganore

Neni 648-12

Ministria përgjegjëse për financat i paraqet Këshillit të Ministrave propozimin për krijimin e zonës së lirë doganore, në përputhje me nenin 216, të ligjit nr.102/2014, “Kodi Doganor i Republikës së Shqipërisë”, të ndryshuar.

Neni 648-13
Dokumentet tip që i bashkëlidhen propozimit për krijimin dhe shtrirjen territoriale të zonës së lirë doganore

Propozimit për krijimin dhe shtrirjen territoriale të zonës së lirë doganore i bashkëlidhet dokumentacioni që përbëhet nga:

a) Kërkesa e subjektit, e shoqëruar me informacion në lidhje me aktivitetin e shoqërisë.
b) Planvendosja e territorit që propozohet për krijimin e zonës së lirë doganore, e hartuar nga ekspertë të licencuar, ku të jenë përcaktuar pikat e hyrjes dhe të daljes.
c) Në rastin kur zona e lirë doganore do të krijohet në pasurinë në pronësi të subjektit kërkues, nga ana e tij duhet të dorëzohet përshkrimi i pronës private, vendndodhja e saj, dokumenti i pronësisë, statusi juridik aktual i pasurisë i lëshuar nga Agjencia Shtetërore e Kadastrës, e shoqëruar me hartën treguese të pasurisë.
ç) Në rastin kur zona e lirë doganore do të krijohet në pasuri, jo në pronësi të subjektit kërkues, ky i fundit së bashku me dokumentacionin e përcaktuar në pikën 3, duhet të dorëzojë edhe aktmarrëveshjen paraprake, të lidhur ndërmjet subjektit dhe pronarit të pasurisë.
d) Mendimi i Drejtorisë së Përgjithshme të Doganave.”.

3. Në shtojcën A, pas aneksit 13, shtohen aneksi 14, “Aplikimi për zonë të lirë doganore” dhe aneksi 15, “Autorizim për administrimin e një zone të lirë Doganore”, që i bashkëlidhen këtij vendimi dhe janë pjesë përbërëse të tij.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

NJË SHTESË FONDI NË BUXHETIN E VITIT 2019, PËR DREJTORINË E SHËRBIMEVE QEVERITARE

Në mbështetje të nenit 100 të Kushtetutës, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.99/2018, “Për buxhetin e vitit 2019”, me propozimin e ministrit të Financave dhe Ekonomisë, Këshilli i Ministrave

 

V E N D O S I:

 

1. Drejtorisë së Shërbimeve Qeveritare, në buxhetin e vitit 2019, në zërin “Shpenzime korente”, i shtohet fondi prej 22 494 048 (njëzet e dy milionë e katërqind e nëntëdhjetë e katër mijë e dyzet e tetë) lekësh për fillimin e organizimit të edicionit të 41-të të Konferencës Ndërkombëtare të Komisionerëve të Mbrojtjes së të Dhënave dhe Privatësisë, që do të zhvillohet në datat 21-24 tetor 2019, në Tiranë.

2. Ky fond të përballohet nga fondi rezervë i buxhetit të shtetit, miratuar për vitin 2019.

3. Ngarkohen Ministria e Financave dhe Ekonomisë, Drejtoria e Shërbimeve Qeveritare dhe Komisioneri për të Drejtën e Informimit dhe Mbrojtjen e të Dhënave Personale për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

NJË NDRYSHIM NË VENDIMIN NR.656, DATË 31.10.2018, TË KËSHILLIT TË MINISTRAVE, “PËR PËRCAKTIMIN E MASËS SË SHPËRBLIMIT TË ANËTARËVE TË KËSHILLAVE, BORDEVE OSE KOMISIONEVE TË PËRHERSHME TË NJËSIVE TË QEVERISJES QENDRORE”

Në mbështetje të nenit 100 të Kushtetutës dhe të nenit 4, të ligjit nr.10405, datë 24.3.2011, “Për kompetencat për caktimin e pagave dhe shpërblimeve”, me propozimin e ministrit të Financave dhe Ekonomisë, Këshilli i Ministrave

 

V E N D O S I:

 

1. Në vendimin nr.656, datë 31.10.2018, të Këshillit të Ministrave, bëhet ndryshimi, si më poshtë vijon:

Në lidhjen nr.1, të përmendur në pikën 3, të vendimit, numri maksimal i pagesave në një vit, pavarësisht nga numri i mbledhjeve të kryera, për “Këshillin miratues të projekteve të filmit artistik”, bëhet 6 (gjashtë).

2. Ngarkohen Ministria e Kulturës dhe Qendra Kombëtare e Kinematografisë për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

DISA SHTESA DHE NDRYSHIME NË VENDIMIN NR.768, DATË 12.11.2014, TË KËSHILLIT TË MINISTRAVE, “PËR SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA NDËRTIMI I VENDDEPOZITIMIT SANITAR TË MBETJEVE NË AFËRSI TË MALIQIT DHE RRUGËS HYRËSE, QARKU KORÇË”

Në mbështetje të nenit 100 të Kushtetutës, të neneve 5, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë pronë private për interes publik”, të ndryshuar, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, dhe të ligjit nr.99/2018, “Për buxhetin e vitit 2019”, me propozimin e ministrit të Infrastrukturës dhe Energjisë, Këshilli i Ministrave

 

V E N D O S I:

 

1. Në vendimin nr.768, datë 12.11.2014, të Këshillit të Ministrave, bëhen shtesat dhe ndryshimet, si më poshtë vijon:

a) Tabelës bashkëlidhur vendimit i shtohet lista sipas tabelës bashkëlidhur këtij vendimi.
b) Në pikën 3, të vendimit, sipërfaqja ndryshohet, nga 149 596 (njëqind e dyzet e nëntë mijë e pesëqind e nëntëdhjetë e gjashtë) m2, në 150 469 (njëqind e pesëdhjetë mijë e katërqind e gjashtëdhjetë e nëntë) m2.
c) Në pikat 3 dhe 4, të vendimit, vlera e përgjithshme e shpronësimit të pronarëve ndryshohet, nga 36 021 456 (tridhjetë e gjashtë milionë e njëzet e një mijë e katërqind e pesëdhjetë e gjashtë) lekë, në 36 206 532 (tridhjetë e gjashtë milionë e dyqind e gjashtë mijë e pesëqind e tridhjetë e dy) lekë.

2. Vlera prej 185 076 (njëqind e tetëdhjetë e pesë mijë e shtatëdhjetë e gjashtë) lekësh do të përballohet nga Ministria e Infrastrukturës dhe Energjisë, në programin buxhetor “Menaxhim i mbetjeve urbane”, për vitin 2019.

3. Shpenzimet procedurale, me vlerë 50 000 (pesëdhjetë mijë) lekë, të përballohen nga buxheti i vitit 2019, miratuar për Ministrinë e Infrastrukturës dhe Energjisë.

4. Shpronësimi të fillojë menjëherë pas botimit të këtij vendimi në “Fletoren zyrtare” dhe afati i përfundimit të shpronësimit të jetë 3 (tre) muaj pas datës së hyrjes në fuqi të tij.

5. Ngarkohen Ministria e Infrastrukturës dhe Energjisë, shoqëria aksionare “Administrimi i mbetjeve të Qarkut Korçë, KRWM”, Agjencia Shtetërore e Kadastrës dhe Drejtoria Vendore Korçë për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

DHËNIEN E BURSAVE PËR NXËNËSIT E SHKOLLËS SË MESME PROFESIONALE “PETER MAHRINGER”, SHKODËR, PËR VITIN SHKOLLOR 2019 – 2020

Në mbështetje të nenit 100 të Kushtetutës, të neneve 6, 19 e 39, të ligjit nr.69/2012, “Për sistemin arsimor parauniversitar në Republikën e Shqipërisë”, të ndryshuar, të ligjit nr.9522, datë 25.4.2006, “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës së Austrisë, për bashkëpunimin në fushat e kulturës, të arsimit dhe shkencës”, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.99/2018, “Për buxhetin e vitit 2019”, me propozimin e ministrit të Arsimit, Sportit dhe Rinisë, Këshilli i Ministrave

 

V E N D O S I:

 

1. Dhënien nga Ministria e Arsimit, Sportit dhe Rinisë të 84 (tetëdhjetë e katër) bursave të studimit për nxënësit e shkollës së mesme profesionale “Peter Mahringer”, Shkodër, nga të cilat 24 (njëzet e katër) bursa studimi për nxënësit e viteve përgatitore dhe 60 (gjashtëdhjetë) bursa studimi për nxënësit nga viti i parë deri në vitin e katërt të shkollës së mesme profesionale “Peter Mahringer”, për vitin shkollor 2019-2020.

2. Vlera vjetore e bursës do të jetë 92 820 (nëntëdhjetë e dy mijë e tetëqind e njëzet) lekë për nxënës, me qëllim shlyerjen e tarifës mujore të shkollimit dhe për mbulimin e kostos së teksteve mësimore. Vlera e masës së bursës do të paguhet pranë bankave të nivelit të dytë për çdo nxënës/prind/përfaqësues ligjor të nxënësve përfitues.

3. Fondi për mbulimin e këtyre bursave kalon nga Ministria e Arsimit, Sportit dhe Rinisë në institucionin arsimor vendor, përgjegjës për arsimin parauniversitar, Shkodër.
4. Miratimi i këtyre bursave bëhet nga bordi i Fondacionit Shkollor Austriak, në mbështetje të kritereve ekonomike, si dhe të rezultateve të arritura nga secili nxënës/aplikant.

5. Bordi i Fondacionit Shkollor Austriak, pas miratimit të bursave, dërgon dokumentacionin përkatës në institucionin arsimor vendor, përgjegjës për arsimin parauniversitar, Shkodër, i cili, pas konfirmimit të nxënësve që përfitojnë bursë, kalon masën e bursës në llogarinë personale të secilit nxënës.

6. Efektet financiare të mbulohen nga buxheti vjetor i miratuar për Ministrinë e Arsimit, Sportit dhe Rinisë, pa efekte financiare shtesë në buxhetin e shtetit.

7. Ngarkohet Ministria e Arsimit, Sportit dhe Rinisë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

DISA NDRYSHIME DHE SHTESA NË VENDIMIN NR.109, DATË 15.2.2017, TË KËSHILLIT TË MINISTRAVE, “PËR ORGANIZIMIN DHE FUNKSIONIMIN E AGJENCISË SË SIGURIMIT TË CILËSISË NË ARSIMIN E LARTË E TË BORDIT TË AKREDITIMIT DHE PËR PËRCAKTIMIN E TARIFAVE PËR PROCESET E SIGURIMIT TË CILËSISË NË ARSIMIN E LARTË”

Në mbështetje të nenit 100 të Kushtetutës dhe të neneve 14, 15 e 106, të ligjit nr.80/2015, “Për arsimin e lartë dhe kërkimin shkencor në institucionet e arsimit të lartë në Republikën e Shqipërisë”, me propozimin e ministrit të Arsimit, Sportit dhe Rinisë, Këshilli i Ministrave

 

V E N D O S I:

 

1. Në vendimin nr.109, datë 15.2.2017, të Këshillit të Ministrave, bëhen ndryshimet dhe shtesat e mëposhtme:

a) Shkronja “b”, e pikës 27, ndryshohet, si më poshtë vijon:

“b) Anëtarët e huaj, në masën 600 (gjashtëqind) euro;”.

b) Pika 28 ndryshohet, si më poshtë vijon:

“28. Kryetarit dhe anëtarëve, të huaj e shqiptarë, të Bordit të Akreditimit, me rezidencë të përhershme jashtë Shqipërisë, iu mbulohen shpenzimet e udhëtimit e të akomodimit në Shqipëri, për jo më shumë se tri ditë kalendarike për mbledhje.”.

c) Pika 6, e shtojcës 1, ndryshohet, si më poshtë vijon:

“6. Eksperti vendas ose i huaj, që angazhohet në kuadër të plotësimit të kushteve apo për vlerësimin paraprak në kuadër të hapjes dhe/ose riorganizimit të IAL-ve, dhe të programeve të studimit, përzgjidhet nga ministria përgjegjëse për arsimin nga lista e miratuar nga ASCAL-i. Numri i ekspertëve duhet të jetë jo më pak se dy dhe masa e pagesës për të gjithë ekspertët të jetë jo më shumë se 25% e tarifës bazë të parashikuar për vlerësimin e jashtëm të IAL-së dhe/ose programit të studimit, sipas tabelave 2/a dhe 2/b.”.

ç) Në fund të pikës 2, të shtojcës 2, shtohen fjalitë, si më poshtë vijon:

“Vlerësimi i jashtëm në kuadër të akreditimit të parë të programeve profesionale të studimit, si dhe të programeve të studimit të ciklit të parë dhe të dytë në IAL-të publike bëhet i grupuar, aty ku është e mundur dhe për jo më shumë se tri programe, sipas ciklit dhe fushës së studimit në nivel njësie bazë. Tarifat për vlerësimin në kuadër të akreditimit të parë të këtyre programeve të jenë sa 65% e tarifës së secilit program që do të vlerësohet i grupuar, sipas tabelës 2/b.

Në rastet kur njësia bazë ofron një program studimi profesional apo nga një program studimi për ciklin e parë dhe/ose të dytë, tarifat për vlerësimin në kuadër të akreditimit të parë të këtyre programeve të jenë sa 65% e tarifës së programit përkatës, sipas tabelës 2/b.

Ekspertët për vlerësimin e jashtëm, në kuadër të akreditimit të parë të programeve të studimit profesional, si dhe të programeve të ciklit të parë dhe të dytë të studimit në IAL-të publike, paguhen 70% të vlerës së secilit program studimi që vlerësohet i grupuar sipas tabelës 1/b.”.

2. Ngarkohen Ministria e Arsimit, Sportit dhe Rinisë, Ministria e Financave dhe Ekonomisë dhe Agjencia e Sigurimit të Cilësisë në Arsimin e Lartë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

NJË NDRYSHIM NË VENDIMIN NR.107, DATË 10.2.2010, TË KËSHILLIT TË MINISTRAVE, “PËR BOTIMIN, SHTYPJEN, SHPËRNDARJEN DHE SHITJEN E TEKSTEVE SHKOLLORE TË SISTEMIT TË ARSIMIT PARAUNIVERSITAR”, TË NDRYSHUAR

Në mbështetje të nenit 100 të Kushtetutës, të nenit 47, të ligjit nr.69/2012, “Për sistemin arsimor parauniversitar në Republikën e Shqipërisë”, të ndryshuar, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, me propozimin e ministrit të Arsimit, Sportit dhe Rinisë, Këshilli i Ministrave

 

V E N D O S I:

 

1. Pika 6.12, e vendimit nr.107, datë 10.2.2010, të Këshillit të Ministrave, të ndryshuar, ndryshohet, si më poshtë vijon:

“6.12. Nxënësve që ndjekin arsimin fillor në klasën e parë në institucionet arsimore publike u jepen tekstet shkollore të reja, çdo vit, në përdorim falas. Nxënësve, që ndjekin arsimin fillor në institucionet arsimore publike nga klasa e dytë deri në klasën e pestë, u jepen tekstet shkollore në përdorim falas. Çmimi i blerjes së teksteve shkollore mbulohet 100% nga fondet e buxhetit të shtetit, miratuar për ministrinë përgjegjëse për arsimin. Institucionet arsimore publike, si dhe zyrat vendore të arsimit parauniversitar, brenda muajit korrik të çdo viti, përgatisin listën e parashikuar të teksteve për përdorim falas dhe të reja, nga klasa e parë deri në klasën e pestë.

Blerja e teksteve të reja shkollore të nxënësve që ndjekin arsimin fillor nga klasa e parë deri në klasën e pestë në institucionet arsimore publike, në emër të prindërve ose të përfaqësuesve ligjorë, për llogari të nxënësve, realizohet nga institucioni arsimor publik, për llogari të zyrës vendore të arsimit parauniversitar.
Likuidimi i faturës tatimore ndaj shtëpive botuese dhe/ose distributorëve realizohet nga zyra vendore e arsimit parauniversitar, me fondet e miratuara si “Transfertë tek individët”, në buxhetin e ministrisë përgjegjëse për arsimin, në llogarinë bankare të shitësit.

Mënyra e shpërndarjes dhe e administrimit të teksteve për këtë kategori nxënësish përcaktohen me udhëzim të ministrit përgjegjës për arsimin.”.

2. Efektet financiare që rrjedhin nga zbatimi i këtij vendimi janë parashikuar në buxhetin e miratuar për vitin 2019 për Ministrinë e Arsimit, Sportit dhe Rinisë.

3. Ngarkohen Ministria e Arsimit, Sportit dhe Rinisë dhe Ministria e Financave dhe Ekonomisë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

DISA SHTESA DHE NDRYSHIME NË VENDIMIN NR.22, DATË 12.1.2018, TË KËSHILLIT TË MINISTRAVE, “PËR MIRATIMIN E KRITEREVE E TË PROCEDURAVE PËR CERTIFIKIMIN E VEPRIMTARISË SË AGROTURIZMIT DHE NDËRTIMIN E STRUKTURAVE/OBJEKTEVE NË FUNKSION TË TIJ”, TË NDRYSHUAR

Në mbështetje të nenit 100 të Kushtetutës dhe të pikës 2, të nenit 4, të ligjit nr.93/2015, “Për turizmin”, të ndryshuar, me propozimin e ministrit të Turizmit dhe Mjedisit dhe ministrit të Bujqësisë dhe Zhvillimit Rural, Këshilli i Ministrave

 

V E N D O S I:

 

Në vendimin nr.22, datë 12.1.2018, të Këshillit të Ministrave, të ndryshuar, bëhen këto shtesa dhe ndryshime:

1. Pas pikës 2 shtohen pikat 2.1, 2.2, 2.3, dhe 2.4, me këtë përmbajtje:

“2.1. Agroturizmi, si formë e veçantë e turizmit rural, është i orientuar drejt përdorimit të burimeve lokale të turizmit dhe ka si synim nxitjen e modeleve alternative të zhvillimit të produkteve turistike, nxitjen e prodhimit bujqësor/blegtoral, zhvillimin e zonave rurale si dhe krijimin e një tregu të ri për produktet bujqësore/blegtorale.

2.2. Agroturizmi duhet të ofrojë njëkohësisht zotërimin e një ferme bujqësore/blegtorale, shërbimin e akomodimit, të ushqimit dhe të aktiviteteve rekreative.

2.3. Veprimtaria pritëse zhvillohet në fermat bujqësore/blegtorale, në të cilat ofrohen aktivitete të lidhura me prodhimin bujqësor/blegtoral, por duke mos cenuar mjedisin. Përfshirja e vizitorëve në aktivitetet e lidhura me fermën duhet të jetë me qëllim argëtues, edukues apo veprimtari të tjera të lidhura me mjedisin përreth.

2.4. Në kuptim të këtij vendimi, me termat e mëposhtëm nënkuptojmë:

a) “Strukturë/objekt akomodues në funksion të agroturizmit”, struktura që vë në dispozicion të turistëve, vendas apo të huaj, individë ose të organizuar në grupe, shërbimet e akomodimit e të pritjes dhe aktiviteteve rekreative në përputhje me kriteret e përcaktuara në këtë vendim.
b) “Fermë”, njësia ekonomike bazë në bujqësi dhe në veprimtaritë ekonomike që lidhen me të. Ferma përfshin një sipërfaqe toke apo veprimtari që kryesisht i kushtohet prodhimit dhe menaxhimit të ushqimit ose prodhimit blegtoral.
c) “Certifikatë paraprake për veprimtari pritëse të certifikuar si agroturizëm”, (në vijim referuar si “Certifikatë paraprake”), certifikata e lëshuar nga ministri përgjegjës për turizmin, bazuar në vendimmarrjen e komisionit vlerësues, për subjektet e reja të referuara në pikën 8/4, të këtij vendimi, që kanë marrë miratimin paraprak të projektidesë nga komisioni. Kjo certifikatë lëshohet për të bërë të zbatueshëm legjislacionin në fuqi për taksën e ndikimit në infrastrukturë.
ç) “Certifikatë “Subjekt i certifikuar për veprimtarinë e agroturizmit”, (në vijim referuar si “Certifikatë”) është certifikata përfundimtare e lëshuar nga ministri përgjegjës për turizmin, bazuar në vendimmarrjen e komisionit vlerësues për subjektet që plotësojnë kriteret e përcaktuara në këtë vendim dhe pas regjistrimit të strukturës akomoduese pranë zyrave të regjistrimit të pasurive të paluajtshme.”.

2. Pika 4 ndryshohet, si më poshtë vijon:

“4. Agroturizmi, si veprimtari, duhet të zhvillohet minimalisht në një nga fermat e mëposhtme:

a) Fermat bujqësore, të cilat kanë të paktën 1 ha tokë të mbjellë me kultura bujqësore;
b) Ferma blegtorale, të cilat mbarështojnë, të paktën, 10 krerë gjedhë ose 100 krerë dele/dhi ose 200 krerë shpendë;
c) Njësitë agrikulturore, të cilat kanë si aktivitet përpunimin e produkteve bujqësore, blegtorale, akuakulturës dhe që plotësojnë kriteret e parashikuara në pikën 6 dhe në shkronjat “a” e “b”, të kësaj pike, të parashikuara në kreun II.”.

3. Pika 5 shfuqizohet.

4. Në pikën 6, fjalët “… duhet të ofrojnë, minimalisht, njërin nga shërbimet e mëposhtme:” zëvendësohen me “… duhet të ofrojnë të gjitha shërbimet e mëposhtme:”.

5. Pika 7 ndryshohet, si më poshtë vijon:

“7. Struktura/objekti akomodues, në funksion të agroturizmit, duhet të ofrojë një kapacitet akomodimi nga 6 deri në 30 dhoma.”.

6. Pika 8 ndryshohet, si më poshtë vijon:

“8. Struktura/objekti akomodues dhe pritës, në funksion të agroturizmit, duhet të respektojë:

a) kushtet e zhvillimit për ndërtim, të përcaktuara në planet e përgjithshme vendore ose në legjislacionin sektorial për planifikimin dhe zhvillimin e territorit;
b) në varësi të llojit të strukturës/objektit, kriteret dhe kushtet e përcaktuara në vendimin nr.730, datë 20.10.2016, të Këshillit të Ministrave, “Për miratimin e rregullores për kushtet, kriteret, tarifat, afatet dhe procedurën për klasifikimin e strukturave akomoduese”, të ndryshuar;
c) atje ku është e mundur, karakteristikat/gjuhën arkitektonike të zonës.”.

7. Pika 8/2. ndryshohet, si më poshtë vijon:

“8/2 Leja e ndërtimit lëshohet nga njësia e vetëqeverisjes vendore, në përputhje me dokumentin e planifikimit vendor në fuqi dhe legjislacionin sektorial për planifikimin dhe zhvillimin e territorit.”.

8. Në pikën 8/3 bëhen këto shtesa dhe ndryshime:

a) Në shkronjën “d”, pas fjalëve “Ministria përgjegjëse …” shtohen fjalët “… për turizmin …”.
b) Në shkronjën “dh”, fjalët “… në regjistrin e integruar të planifikimit të territorit.” zëvendësohen me “… në sistemin e-leje.”.

9. Pas pikës 8/3 shtohet pika 8/4, me këtë përmbajtje:

“8/4. Subjektet e reja, që kërkojnë të ndërtojnë një strukturë/objekt akomodues në funksion të zhvillimit të veprimtarisë pritëse të agroturizmit, duhet të marrin miratimin paraprak të projektidesë nga komisioni vlerësues, i ngritur pranë ministrisë përgjegjëse për turizmin.”.

10. Pikat 9, 10, 11 dhe 12 ndryshohen, si më poshtë vijon:

“9. Subjektet që ushtrojnë veprimtarinë pritëse të agroturizmit, pasi të kenë përmbushur kriteret e përmendura në pikat 4 dhe 6, të kreut II, mund të ofrojnë edhe akomodim në formën e fushimit, me ambiente për vendosjen e çadrave apo të makinave të fushimit. Në këto raste subjekti garanton kushtet bazuar në vendimin nr.730, datë 20.10.2016, të Këshillit të Ministrave, për një kapacitet maksimal prej 15 makinash fushimi.

10. Struktura/objekti, ku ofrohet ushqim dhe pije, duhet të ketë 6 deri në 60 tavolina. Ofrimi i ushqimit dhe i pijeve bëhet në ambiente të përshtatshme dhe duhet të plotësojë kriteret e parashikimeve të legjislacionit në fuqi për sigurinë e ushqimeve dhe kushtet higjieno-sanitare.

11. Ushqimi dhe pijet e ofruara në këto struktura duhet të jenë:

a) jo më pak se 30% të sasisë së tyre me origjinë nga ferma;
b) jo më pak se 40 % të sasisë së tyre, me origjinë lokale, brenda territorit të bashkisë ku ushtrohet veprimtaria e agroturizmit;
c) jo më shumë se 30% e sasisë së tyre me origjinë tjetër.

12. Subjekti që zhvillon veprimtarinë pritëse të agroturizmit duhet të ofrojë/mundësojë për vizitorët e turistët veprimtari argëtuese/çlodhëse, që lidhen me fermën dhe mjedisin përreth.”.

11. Në pikën 13, fjalët “… dhënien e certifikatës “Subjekt i certifikuar agroturizmi” …” zëvëndësohen me “… dhënien, pezullimin dhe/ose shfuqizimin e “Certifikatës paraprake” ose “Certifikatës”…”.

12. Pas pikës 13 shtohet pika 13.1, me këtë përmbajtje:

“13.1. Komisioni vlerësues ka të drejtë, bazuar nga verifikimet e ndërmarra nga ana e tij, kryesisht apo në shkeljet e konstatuara nga organet përkatëse, të shqyrtojë dhe të marrë vendim për pezullimin dhe/ose shfuqizimin sipas rastit të “Certifikatës paraprake” si dhe “Certifikatës” sipas një procedure, e cila garanton të drejtën për t’u informuar, për të kërkuar sqarime rreth fakteve, për t’u dëgjuar dhe për t’u ankuar.”.

13. Pikat 14, 15 dhe 16 ndryshohen, si më poshtë vijon:

“14. Brenda 3 (tre) muajve nga hyrja në fuqi e kësaj dispozite, ministri përgjegjës për turizmin dhe ministri përgjegjës për bujqësinë dhe zhvillimin rural përcaktojnë, me urdhër të përbashkët, rregulloren e funksionimit të komisionit, si dhe procedurat e aplikimit, të vlerësimit paraprak dhe përfundimtar si dhe, sipas rastit, të vendimit për pezullimin dhe/ose shfuqizimin e “Certifikatës paraprake” apo të “Certifikatës”.

15. Subjektet, që aplikojnë për marrjen e “Certifikatës paraprake” apo të “Certifikatës”, paguajnë një tarifë prej 2 000 (dy mijë) lekësh në llogarinë e ministrisë përgjegjëse për turizmin. Të ardhurat nga këto tarifa derdhen në buxhetin e shtetit.

16. Bazuar në vendimmarrjen e komisionit, ministri përgjegjës për turizmin lëshon:

a) certifikatën paraprake “Për veprimtarinë pritëse të certifikuar si agroturizëm”. Kjo certifikatë lëshohet për të bërë të zbatueshëm legjislacionin në fuqi për taksën e ndikimit në infrastrukturë dhe ka vlefshmëri deri në 2 vjet nga dhënia e saj;
b) certifikatën “Subjekt i certifikuar për veprimtarinë e agroturizmit”. Certifikata lëshohet për një periudhë 5-vjeçare, me të drejtë rinovimi, bazuar në kërkesën e subjektit.”.

14. Në pikën 17, pas fjalës “Modeli i …” shtohen fjalët “… certifikatës paraprake dhe …”.

15. Pas pikës 17 shtohen pikat 17/1 dhe 17/2, me këtë përmbajtje:

“17/1. Çdo subjekt i certifikuar për veprimtarinë e agroturizmit është i detyruar të përdorë në ambientet e tij, në një vend të dukshëm dhe në emërtimin tregtar shenjën dalluese, e cila miratohet me urdhër të përbashkët të ministrit përgjegjës për turizmin dhe ministrit përgjegjës për bujqësinë dhe zhvillimin rural.

17/2. Të gjitha subjektet që ushtrojnë veprimtarinë e agroturizmit përfitojnë lehtësira fiskale sipas legjislacionit në fuqi, vetëm pasi të jenë të pajisur me “Certifikatën paraprake” ose “Certifikatën”.”.

16. Pika 18 ndryshohet, si më poshtë vijon:

“18. Në rast konstatimi të shkeljes së kritereve të këtij vendimi, organet përkatëse të bashkive, të inspektoratit të turizmit, organet tatimore ose organet kompetente të inspektimit të ushqimit dhe kushteve higjieno-sanitare, njoftojnë komisionin për shkeljet e konstatuara, brenda 10 (dhjetë) ditëve nga konstatimi i shkeljes.”.

17. Pas pikës 18 shtohet pika 18/1, me këtë përmbajtje:

“18/1. Shfuqizimi i certifikatës “Subjekt i certifikuar i agroturizmit” nga komisioni vlerësues, në rastin kur veprimtaria nuk përdoret për qëllime agroturizmi dhe subjekti ka përfituar lehtësira fiskale përjashtuese (si taksa infrastrukturës etj.), detyron subjektin që t’i kthejë këto përfitime. Përllogaritja bëhet nga organet tatimore/njësitë e vetëqeverisjes vendore.”.

18. Pika 19 ndryshohet, si më poshtë vijon:

“19. Subjektit, të cilit i pezullohet/shfuqizohet “Certifikata paraprake” ose “Certifikata”, nuk mund ta përdorë atë në ambientet e tij ose në emërtimin tregtar. Subjekti mund të aplikojë sërish për marrjen e “Certifikatës” në rast se plotëson kriteret e përcaktuara nga ky vendim.”.

19. Në pikën 20, fjalët “… Subjekt i certifikuar agroturizmi …” zëvëndësohen me “… Certifikatën paraprake” ose “Certifikatën”…”.

20. Pikat 21 dhe 22 ndryshohen, si më poshtë vijon:

“21. Subjektet që aktualisht kanë paraqitur aplikim pranë ministrisë përgjegjëse për turizmin, brenda 6 (gjashtë) muajve nga hyrja në fuqi e kësaj dispozite, të plotësojnë dokumentacionin sipas kritereve dhe kushteve të parashikuara në këtë vendim, për marrjen sipas rastit të “Certifikatës paraprake” apo “Certifikatës.”.

22. Ngarkohen Ministria e Turizmit dhe Mjedisit, Ministria e Bujqësisë dhe Zhvillimit Rural, Ministria e Shëndetësisë dhe Mbrojtjes Sociale, Ministria e Financave dhe Ekonomisë, Agjencia e Zhvillimit të Territorit si dhe organet e vetëqeverisjes vendore për zbatimin e këtij vendimi.”.

Ky vendim hyn në fuqi pas botimit në “Fletoren zyrtare”.

 

K R Y E M I N I S T R I

EDI RAMA

 

***

 

V E N D I M

PËR

EMËRIMIN NË DETYRË TË DREJTORIT TË BIBLIOTEKËS KOMBËTARE

Në mbështetje të nenit 100 të Kushtetutës dhe të nenit 27, të ligjit nr.8576, datë 3.2.2000, “Për bibliotekat në Republikën e Shqipërisë”, të ndryshuar, me propozimin e ministrit të Kulturës, Këshilli i Ministrave

 

V E N D O S I:

 

Z. Piro Misha emërohet drejtor i Bibliotekës Kombëtare.

Ky vendim hyn në fuqi menjëherë dhe botohet në “Fletoren zyrtare”.

K R Y E M I N I S T R I

EDI RAMA

*SHËNIM: BAZUAR NË NENIN 117 TË KUSHTETUTËS SË RSH DHE NENIT 29 TË LIGJIT PËR ORGANIZIMIN DHE FUNKSIONIMIN E KËSHILLIT TË MINISTRAVE, VENDIMET E KËSHILLIT TË MINISTRAVE PUBLIKOHEN NË FLETOREN ZYRTARE DHE HYJNË NË FUQI PAS BOTIMIT TË TYRE. DREJTORIA E KOMUNIKIMIT PRANË KËSHILLIT TË MINISTRAVE PËRPIQET TË BOTOJË NË KOHËN MË TË SHPEJTË TË MUNDSHME VENDIMET E MBLEDHJEVE TË QEVERISË, POR VERSIONI ZYRTAR DHE HYRJA E TYRE NË FUQI BËHET VETËM PASI VENDIMI BOTOHET NE QBZ. SHPESHHERË, VENDIMET E KËSHILLIT TË MINISTRAVE KANË NEVOJË PËR ZBARDHJE TË MËTEJSHME, ÇKA E VONON PUBLIKIMIN E TYRE NË KËTË FAQE.