Kryeministri Edi Rama ndodhet sot në Vlorë, ku zhvilloi një takim me turoperatorët vlonjatë, të cilët mbajnë një rol të rëndësishëm në zhvillimin turistik dhe të ekonomisë rajonale, – në një bashkëbisedim për gjithë punën e bërë dhe atë që pritet në të ardhmen, duke nisur nga përgatitjet për sezonin veror 2025, me synimin që ai të jetë edhe më i suksesshëm.
* * *
Tani për të shmangur mundësinë që këto pikat e shiut të intensifikohen, në po ia marr kompetencat dhe Ermalit me lejen tënde mund të flas unë se dhe si zëdhënës i Bashkisë së Vlorës. Duke qenë se me Ermalin jemi në komunikim të vazhdueshëm.
Së pari, për temën kryesore për të cilën jemi këtu që është sezoni dhe një nga pikat më të nxehta të marrëdhënieve me qytetarët gjatë sezonit që siç e keni vënë re, është stresi i krijuar nga xhungla e çadrave dhe shezlongëve që pavarësisht se çfarë është bërë në vitet e fundit për t’i disiplinuar, vitin e shkuar kemi konstatuar që ishin ende shumë në anën e privatit.
Kështu që, për këtë arsye edhe në bashkëpunim me kryetarët e bashkive nën udhëheqjen e Kryetarit të Bashkisë së Lezhës që ka krijuar në bregdetin e Lezhës një model shumë të suksesshëm për hir të së vërtetës, edhe për shkak të background-it që ka si polic, që nuk rri dot a kontrolluar çdo mizë që fluturon prandaj dhe na ka shërbyer ekspertiza. Se ne të tjerët nuk e kemi pasur këtë karrierë, që unë nuk e konsideroj një operim, unë e konsideroj realisht nder pa asnjë shaka.
Kemi ndërtuar një plan të ri me një ndarje shumë më të qartë edhe me një balancë shumë më të arsyeshme mes plazheve të menaxhuara nga operatorët turistikë privatë dhe plazheve publike që do menaxhohen nga Bashkitë. Dhe këtu do inkurajoja të gjithë që të ecin në gjurmët e bashkisë së Lezhës në aspektin e asaj që tha Pjerini, të ndërtohet një sistem bashkiak i administrimit ku bashkia, jo thjeshtë të ruajë, por dhe të krijojë një sipërmarrje bashkiake, gjë që mesa kuptova po e bën dhe Bashkia e Himarës, nuk e di Durrësi në çfarë faze është me këtë, por mirë është që të gjitha bashkitë të kenë ofertën e tyre paralele me ofertën e operatorëve privatë dhe t’i ofrojnë qytetarëve një komoditet shezlongesh dhe çadrash me çmime shumë shumë herë më të ulëta. Kuptohet që edhe me një gamë shërbimi më modeste se nuk do ndërtojnë bashkitë dhe beach-bar, për plazhet publike që shumëkush i kërkon të lira, me hapësira ku ka disa që thonë vazhdimisht ne duam thjeshtë të shkojmë siç kemi shkuar përpara dhe pse harrojnë që nuk ka qenë dielli kaq i fortë dhe nxehtësia kaq e madhe përpara por kjo është një gjë që ne duhet ta ofrojmë.
E dyta, shumë e rëndësishme. Unë e dëgjova me vëmendje se ke dhe Vasilin këtu se dhe Vasili ka shoqatën e tij, të përshëndes. Unë dëgjova me vëmendje. Tani duhet të biem dakord për një gjë, që ju bëni shumë mirë që kërkoni sa më shumë. Për tramin në Vlorë të thashë do të na duhej Luli, ne nuk dimë të bëjmë trame. Luli ka bërë një tram në Tiranë, i cili siç e kanë parë qytetarët e Tiranës është shumë i suksesshëm, me një shpejtësi marramendëse, kapërcen të gjithë problematikat që krijohen nga trafiku. E kishte planin që ta çonte deri në Durrës, por për shkak se e zuri gjumi e la vetëm në Tiranë. Kështu që, nuk e di sa mund të bashkëpunohet me të, por shpresoj që mos të arrihet për shkak të tramit që të çohet Vlora në këmbë të thotë duam Lulin kryetar bashkie.
Për të tjerët po thoja, duhet të jemi shumë të vërtete që ka një hile të madhe që e bëni të tërë ju. Një hile me deklarimin e netëve të fjetjes. Më pëlqeu fakti që more frymë thellë sepse në fillim kur të thashë hile, u shikove por dëgjove netë fjetje, i dhe një frymëmarrje të thellë për të stabilizuar në mendje se si do ta përballosh tani këtë fakt që nuk e përballon dot dhe ne tani për t’i dhënë mundësi juve që të dilni faqebardhë nga kjo fazë informaliteti ku kemi ulur TVSH prej vitesh tanimë më poshtë sesa vendet e tjera, 6% nuk e ka asnjë vend në Mesdhe, asnjë nga vendet e rajonit. Ua u kemi ulur 6% pikërisht që të deklaroni sa. Tani ka një shifër që është fantastike këtu që tregon se çfarë bëni ju në fakt. Që thotë që nga 10 milionë e 155 mijë turistë të huaj që e kanë vizituar Shqipërinë, këtu kemi 2023, 3 milionë e 900 mijë netë të deklaruara qëndrimi janë pak si problem.
Ne e kemi studiuar këtë gjë dhe me ekspertistë të huaj dhe dy gjëra do bëjmë. E para për këtë vit do ju japim mundësinë që juve të bëni një para deklarim, që do të thotë që për periudhë 1 maj – 30 shtator, nëse nuk doni as kontrolle, asnjë problem fare dhe të fokusoheni vetëm te klientët jo te inspektorët, një nivel shfrytëzimi 65% në bazë të dhomave dhe për atë nivel do paguani detyrimin tek bashkia. 65%. E dimë që niveli minimal i shfrytëzimit në periudhën 1 maj-30 shtator është më i lartë, e dimë shumë mirë këtë, por duam ta nisim nga ky nivel. E kemi diskutuar dhe me konsulentët e huaj sepse ajo që na intereson është formalizimi i sektorit. Pastaj nga 1 tetori në 30 prill një nivel 20%. Këtu janë bërë gjithë projeksionet, ka një balancë. Ju do dilni me një fitim ekstra përtej fitimit që ju takon, por kjo është një fazë. E dyta përgatituni sepse në 2026 nuk do keni nga të lëvizni më sepse do fusim platformën digjitale e-visitors dhe aty pastaj bëhet e pamundur që të ketë shmangie për gjithë infrastrukturën hoteliere flas. Ana tjetër e medaljes për të cilën duhet të bashkëpunojmë me shoqatat tuaja por që i takon në afatmesëm është të frenojmë informalitetin e madh me apartamente me qira, me shtëpitë me qira. Nuk ka ardhur koha akoma që ata t’ju shqetësojnë siç shqetësojnë gjithë sistemin e mikpritjes së hotelerisë në vendet e mëdha sepse ju keni sot më shumë kërkese seç keni mundësi por hap pas hapi do të shikoni që do duhet të krijohet kjo balancë dhe ata do duhet të formalizohen.
Pika tjetër për parkimet, unë e kam ndarë me disa nga kryetarët e bashkive. Ne kemi një program të ri të Fondit Shqiptar të Zhvillimit. Po punojmë me Himarën, po punojmë me Vlorën, po punojmë për Lezhën. Me Durrësin duam të ndërtojmë një infrastrukturë ekstra të parkimeve. Një infrastrukturë ekstra të cilën e kemi konceptuar dhe nga pikëpamja arkitektonike që të jetë një infrastrukture atraktive. Do përdorim arkitektë për këtë punë për të ndërtuar parkime nën dhe mbi tokësore përgjatë gjithë vijës bregdetare të cilat të jenë një infrastrukturë mbështetëse e gjithë turizmit dhe hotelerisë sepse ne po bëjmë një transformim falë Vangjelit në radhë të parë që dua ta falënderoj dhe sa herë që shoh çfarë bëhet në Himarë habitem ku paska qenë ky njeri, që ne mund ta bëjmë, ne mund ta përmirësojmë Dhërmiun sa të duam siç po e përmirësojmë dhe kush do të shkojë në Dhërmi këtë vit do shohë diçka krejt tjetër nga pikëpamja e sistemimeve, e rregullimeve, por nëse nuk zgjidhim problemin e parkimeve, do ta kemi shumë të vështirë, sepse dyndja është shumë e madhe dhe do jetë më e madhe.
12 milionë arritëm vjet dhe mund të shkojmë 13.5, 14 milion është shumë për një vend me 2.4 milion rezident këtu. Por gjithsesi është pjesë e gjësë, duhet ta përballojë. Përsa i përket asaj që u tha për policinë unë jam shumë darkod, jam absolutisht dakord. Policia ka luajtur një rol fantastik në këtë punë, por tani ka ardhur koha që të minimizohet, por minimizim nuk vjen duke i thënë “ikni dhe vishuni civil”. Zgjidhja është projekti që fillon që kemi lidhur marrëveshjen dhe financimi është bërë me Emiratet e Bashkuara për gjithë monitorimin me kamera inteligjente të të gjithë qyteteve kryesore. Do të fillojmë nga qendrat e qarkut dhe të gjithë rrugëve kombëtare, plus pastaj fokusin do ta kemi tek zonat turistike.
Pra është një tjetër lojë, nuk ka më nevojë fare pastaj për polic, hiç fare, sepse polici do të jetë kudo, por do të jetë digjital, një sy që do të shohi në të gjithë territorin dhe që do të informojë në kohë reale Policinë e Shtetit dhe bashkitë përmes Inteligjencës Artificiale.
Kështu që çdo lëvizje e tepërt çdo edhe një hedhje e një e një kanoçeje bosh në tokë, regjistrohet dhe nuk ka nevojë për të gjëmuar nga mbrapa me inspektorë e policë, lloj-lloj tipash që nuk e kanë problem fare të hedhin gjërat përtokë dhe ndërkohë pasi i hedhin në tokë ça kanë në dorë, marrin telefonin edhe shajnë në Facebook që nuk ka pastërti. Këtë do ta zgjidhim me këtë, me këtë sistem edhe unë jam shumë, shumë i bindur që të jetë një spektakël i vërtetë, sepse e kemi parë si funksionon aty ku funksion, përfshirë edhe shkollat që do të futen në këtë sistem për të rritur sigurinë në shkollë.
Dhe e fundit që kam është për Vlorën specifikisht meqë jemi këtu në Vlorë. Investimi që po zhvillohet në anën tjetër që shkon drejt Radhimës ju e keni parë që është goxha, goxha pozitiv. I vështirë shumë për shkak të gjithë problematikave të hasura, çdo 10 metra me lloj-lloj gjërash, por ambicia është që të shkojmë deri poshtë në Orikum dhe të kemi faktikisht një vijë, edhe plus të zhvillojmë Lungomaren në anën tjetër dhe të kemi një shëtitore që është absolutisht nga më të gjatat në Europë, duke krijuar hapësirë shumë më tepër për zhvillimin.
Aeroporti, pista, që është ishte dhe pjesa më e vështirë për shkak të gjeologjisë është në përfundim, besoj që në fund brenda majit do të kemi pistën të përfunduar, po punohet me terminalet ka pasur probleme me furnizimet dhe për këtë arsye është zgjatur pak procesi, por gjithsesi edhe aeroporti do të përfundojë dhe pastaj do të kalohet në një nivel tjetër problematikash, sepse fluksi do të jetë edhe më i madh.
Projekti i Sazanit dhe i Zvërnecit është në proces. Do të kemi shumë, shumë sfida, sepse kërkesa për të ardhur në Vlorë për të investuar në Vlorë është shumë e madhe. Unë e shoh nga kërkesat që kemi nga investitorë shumë të mëdhenj, edhe për shkak të namit të madh që bëri investimi që do bëhet në Sazan, ka shumë.
Natyrisht që, këto kërkesa nuk mund të akomodohen nga ne, sepse janë kërkesa që duhet të akomodohen në bashkëpunim me pronarët. Por këto tregojnë që kërkesa për Vlorën do të jetë, domethënë kjo tregon që nuk keni parë gjë akoma, as ju as unë, për Vlorën. Vlora do të bëhet shumë shpejt një vend që do të jetë shumë e vështirë të ngjesh vend, edhe do të rriten të ardhurat në mënyrë të jashtëzakonshme për shkak të kësaj.
Patjetër që impakti i Vlorës është dhe në vende të tjera.
Ne tani me Durrësin kemi një projekt fantastik që më në fund do të fillojë të realizohet me zgjerimin e plazhit. Në Durrës do të zgjerojmë gjithë vijën e plazhit historik me 100 metra. Kështu që, do kemi një spostim të jashtëzakonshëm të rërës, edhe të mundësisë për të pasur rërë, edhe do kemi dhe shumë më tepër plazh publik për këtë shkak në Durrës, siç ka qenë. Dhe patjetër që do jetë një magnet i ri për të sjellë më shumë investime. Jemi duke punuar me Anin për një tjetër investim shumë të madh në gjirin e Durrësit, paralelisht me portin turistik.
Lezha, që është dukur gjithmonë si provinca e turizmit, në fakt është, po bëhet një qendër, një nga qendrat e rëndësishme, sepse edhe aty kemi disa investime vërtetë shumë, shumë të bukura, qoftë nga sipërmarrës vendas që kanë zhvilluar aktivitetin e tyre në emigracion, edhe disa prej tyre janë duke u kthyer për të investuar, qoftë edhe nga investitorë të tjerë.
Kështu që na mbetet vetëm Kavaja. Kemi pasur probleme primare në Kavajë, por besoj që do ta kapërcejmë atë traumë dhe besoj që me rrugën lidhëse të Kavajës me bregdetin, që është një projekt i kryetarit të bashkisë Kavajës, i cili e përshëndes ka ardhur këtu, e pashë që ishte pak i turbulluar nga primaret, por besoj që, po patjetër me dy gishta gjithmonë. Patjetër, problemi është që të fusim edhe Kavajën në këtë rrjet dhe Fierin. Sepse, janë dy Kavaja dhe Fieri, po Fieri krahas më shumë se Kavaja, sepse në Fier historikisht fierakët kanë bërë plazh atje, mirëpo gjithmonë janë trajtuar si njerëz që jetojnë në kënetë dhe që s’kanë plazh, ose që jetojnë mes grurit dhe s’kanë plazh. Ndërkohë që, Fieri ka një plazh fantastik, edhe Kavaja ka goxha plazh, por gjithmonë quhet plazhi i Durrësit.
Kështu që këto dy plazhe janë shumë shpejt në rrugën e futjes në funksion, aty në plazhin e Kavajës ka disa investime shumë të bukura, por nuk mungon lidhja që kryetari i bashkisë e ka merak.
Por që në Fier kemi një projekt tjetër të jashtëzakonshëm që do ta besojë ta prezantojmë. Projektin kuptohet sipërmarrjen private, por edhe me falë dhe shumë pune që kemi bërë aty për ta pararendur, duke ndërtuar infrastrukturën lidhëse.
Velipoja është në punë dhe në zhvillim.
Kështu që për Sarandën nuk kemi ç’a themi, sepse Saranda duhet vetëm të përballojë impaktin. Po bëjmë investime të rëndësishme me kryetarin e bashkisë, aty edhe shëtitorja e re në Ksamail dhe një sërë gjërash të tjera. Kështu që, besoj që futjen në BE do ta kemi në momentin e duhur. Dhe pastaj, mbas futjes në BE, siç kanë treguar rastet e mëparshme të Kroacisë, të Sllovenisë, të vëndeve të tjera, gjithçka dyfishohet, domethënë vlera e investimeve dyfishohet menjëherë, vlera e pronave dyfishohet dhe fluksi i interesit për të ardhur, për të jetuar, për të punuar, për t’u përzierë këtu me jetën tonë, i evropianëve rritet në mënyrë të ndjeshme, kështu që këto ishin pak a shumë gjërat që do thosha unë nga ana ime edhe ju falenderoj shumë.
Ju falenderojmë shumë për praninë dhe falenderoj gjithë kryetarët e bashkive që kanë ardhur këtu për të ndarë me ne këtë moment për sezonin turistik dhe i garantoj të gjithë qytetarët që ky sezon nga pikëpamja e shqetësimit të tyre të parë që kanë qenë çadrat dhe shezllonet, do të jetë komplet tjetër.
Faleminderit!
