Gjatë turit të llogaridhënies në Qarkun e Elbasanit, Kryeministri Edi Rama u ndal në Food Buotique “Zejtaria” në Belsh, me fermerë dhe sipërmarrës në agroturizëm e agropërpunim, për paketën e re të mbështetjes financiare dhe mundësitë që ajo hap për agroturizmin. Belshi me buritë natyrore dhe liqenet e shumta është një nga atraksionet turistike të Qarkut, falë edhe investimeve të Programit të rilindjes Urbane, me potencial të lartë zhvillimi të agroturizmit rreth liqeneve.

Ky avantazh i zonës ka tërhequr interesin jo vetëm të fermerëve lokalë, por edhe të sipërmarrësve.  Kryeministri madje ftoi edhe banorët e zonës që jetojnë jashtë që kursimet e tyre t’i investojnë në agroturizëm, duke përfituar nga mundësitë që ofron edhe paketa e mbështetjes financiare të qeverisë. “Çdo emigrant që vjen dhe investon në agroturizëm, mund të rrijë atje ku është, por i kam borxh, nëse nuk fiton me agroturizmin këtu, jo shumë, por shumë më shumë sesa me punën atje. Njëra pjesë është ajo që mbështesim ne. Pjesa tjetër është pjesa e fondeve të Bashkimit Europian,” – nënvizon Kryeministri, ndërsa shtoi edhe lehtësitë fiskale për këdo që investon në agroturizëm, “TVSH 6%, taksë zero mbi fitimin dhe pa asnjë lloj detyrimi tjetër.”

Një nga fermerët e zonës, i cili pas kthimit nga emigracioni zhvilloi me sukses fermën e tij,  nënvizon faktin se kanë nevojë për më shumë informacion për kulturat bujqësore që mund të marrin mbështetje financiare. “Unë jam ish emigrant që kam 4 vite që jam kthyer. Këtu ka shumë potencial, sidomos toka e Dumresë. Kur e fillova para 4 vitesh e fillova me 2 mijë metra dhe brenda 4 vitesh shtova dhe 3 mijë metra të tjerë, por ka një problem se nuk ka shumë informacion se çfarë duhet mbjellë.”

Kryeministri Rama bëri thirrje që fermerët të mos investojnë në kultura, të cilat në fund të ditës shkojnë dëm dhe nuk tregtohen, duke nxitur fokusimin në vetëm disa kultura specifike. “Fokusi është vënë vetëm mbi 15 kultura bujqësore dhe jo mbi gjithë gjërat, në mënyrë që energjitë e njerëzve për të investuar të mos shkojnë dëm. Investimi në disa kultura gabim nuk është përgjegjësie e askujt përveçse e faktit që janë kultura që nuk funksionojnë në treg. Kuptohet që përgjegjësia e qeverisë është të informojë maksimalisht dhe me informimin maksimal të arrihet që të gjithë të fokusohen tek kulturat që financohen dhe kulturat që financohen janë kulturat që kanë treg,” – shprehet Kryeministri Rama.

Kryeministri vuri në dukje edhe mungesën e një pike grumbullimi në Elbasan dhe për këtë ftoi bashkinë dhe sipërmarrës që kanë interes, të mos presin, por të bëhen bashkë e të hartojnë projektin. “Përsa i përket pikës së grumbullimit, më vjen shumë keq se këtu bashkitë nuk janë aktive në këtë proces. Për pikën e grumbullimit nuk ka nevojë të presim IPARD-in, mund të ndërtohet duke ndërtuar një projekt dhe duke marrë mbështetjen e Fondit të Garancisë së fermerëve”, – nënvizon Kryeministri.