Kryeministri Edi Rama ishte dje në mbrëmje i ftuar nderi, në ceremoninë e ndarjes së çmimeve në Festivalin Ndërkombëtar të Filmit Dokumentar dhe të Shkurtër, “DokuFest”, në Prizren.

Edicioni i këtij viti i DokuFest pati mbështetjen e dy qeverive, Qeverisë së Kosovës dhe Qeverisë së Shqipërisë. Një angazhim  i përbashkët për promovimin e kulturës dhe artit shqiptar.

I ngjitur në skenë për të dorëzuar çmimin e parë në kategorinë “Best nacional film”, Kryeministri Rama e cilësoi DokuFest-in një model i triumfit të vizionit dhe pasionit, çka e ka bërë Dokufest një event jo thjesht kulturor, por një institucion ndërkombëtar kulture, që ka tërhequr vëmendjen edhe të medias së huaj.

“Është një institucion që i bën nder gjithë shqiptarëve dhe është një institucion që përbën një shembull të shkëlqyer për të gjithë ata që e duan kulturën, që e duan kinematografinë dhe një model i jashtëzakonshëm sesi mund të bëhet nga hiçi, falë vetëm vizionit të disa njerëzve dhe këmbënguljes së disa njerëzve. Një institucion që, jo vetëm i bashkon të gjithë shqiptarët, por rrezaton shumë përtej të dy shteteve tona, duke bërë që të flitet për Prizrenin, duke bërë që të flitet për kinemanë duke iu referuar Prizrenit, në revistat dhe në gazetat më të mëdha të botës,” – u shpreh Kryeministri.

Ndërsa i dorëzoi çmimin, regjisorit Bekim Guri, me filmin “Heshtje”, Kryeministri Rama mbështeti edhe apelin e organizatorëve dhe qytetarëve të Prizrenit, për ruajtjen e godinës së kinemanë ku zhvillohet DokuFest.

“Dua t’i bashkohem thirrjes së organizatorëve dhe atyre fëmijëve që folën këtu, në hapje, për kinemanë, që kinemaja të mos bëhet parking. Nga eksperienca ime dua t’i them kryetarit të komunës që kryetarët e bashkive shkojnë e vijnë DokuFest-i po iku, nuk vjen më. Me shumë përulje do t’ju them se fituesi i çmimit “Best nacional film” është Bekim Guri me “Heshtjen”. Për Bekim Gurin, guri i bekimit të festivalit,” – u shpreh Kryeministri.

Duke shprehur mirënjohjen për të gjithë ata që punuan për suksesin e këtij eventi, Kryeministri Rama theksoi mbështetje edhe më të madhe për edicionin e vitit të ardhshëm.