Deri pak muaj më parë, lumi i Fan i Vogël ishte kthyer në një problem madhor për Mirditën. Në muajin janar të këtij viti, në fshatin Mashtërkor të Oroshit, lumi doli nga shtrati si rezultat i reshjeve dhe ndryshoi rrjedhën e tij, duke rrezikuar jetën e banorëve, dëmtuar mijëra tokë bujqësore, tubacionet kryesore të ujësjellësit për 16 mijë banorët e Rrëshenit dhe kanalet kulluese të autostradës. Por një situatë e tillë u evitua plotësisht gjatë shirave të fundit, pas investimit prej 33 milionë lekë për ndërtimin e mbrojtjes lumore, e përbërë nga argjinatura dhe 12 penela tërthore me gjatësi 10 metra. Ishte falë këtij investimi që u shmang dalja e lumit nga shtrati. Ndrec Dedaj, kryetari i Bashkisë Mirditë e vlerësoi investimin shumë të rëndësishëm jo vetëm për banorët e Oroshit e Rrëshenit, por edhe si njëinvestim që mbron edhe autostradën nga gërryerja e ujërave, dëmtimin e ujësjellësit dhe rrjetit elektrik. “Është parandalues për ujësjellësin, për linjën elektrike, për shkollën e fshatit, shtëpitë këtu. Po të mos ishte bërë ky investim do të kishte nxjerrë jashtë funksioni edhe rrugën nacionale,” – tha Dedaj.

* * *

Në dy pika të rrugës së Kombit, për shkak të mungesës së një studimi serioz gjeologjik gjatë ndërtimit të saj është krijuar një problematikë e mprehtë që thellohet veçanërisht në periudhën e dimrit. Nga reshjet e fundit është evidentuar çarje masive e malit duke sjellë rrëshqitjen e dherave mbi trupin e rrugës, duke vështirësuar qarkullimin e vënë seriozisht në rrezik jetën e udhëtarëve. Kryeministri Rama inspektoi gjendjen në një prej këtyre pikave në segmentin Rrëshen-Kalimash. Drejtori i Emergjencave Civile, Shemsi Premçi, shpjegoi se çarja e malit është rreth 60 centimetra. “Nga matjet që bënë specialistët e shërbimit gjeologjik, ishte shumë e thellë rrëshqitja këtu, por më e thellë ishte ajo në fshatin Klos. Parashikohet të çahet i gjithë mali. Është larguar 60 centimetra,” – tha Premçi.

Duke evidentuar gjendjen e rënduar, Kryeministri Rama nënvizoi se zgjidhja e këtij problemi do të jetë puna e parë që do bëhet në mirëmbajtjen e rrugës.  “Kjo do jetë ndërhyrja e parë që do bëhet për ta sistemuar në mënyrë që mos thellohet kjo çarje dhe mos ketë pasojë të tmerrshme për gjithë projektin. Kështu është, janë bërë pa studime gjeologjike të mirëfillta, pa ndjekur gjithë procesin teknik ashtu si duhet, por sidoqoftë besoj se do jetë shumë shpejt e stabilizuar kjo pjesë e ndërkohë do fillojë punë për përfundimin e për mirëmbajtjen në vazhdimësi gjatë gjithë viteve, që mos ketë asnjë problem,” – theksoi Kryeministri.