Fjala e Kryeministrit Rama në takimin e Shoqatës së Investitorëve të Huaj në Shqipëri:

Vitin e kaluar, një periudhë jo e largët kohe, u takuam disa javë përpara se te merrja detyrën.

Më lejoni që të sjell në vëmendjen tuaj, edhe njëherë, atë që ju thashë në takimin tonë të parë, sepse mendoj se përgjegjësia për çdo veprim që ne ndërmarrim apo çdo fjalë që themi si politikanë, si përfaqësues të shtetit dhe qeverisë, përbën një element kyç për zhvillimin e vendit.

Nëse politikanët do t’i përmbaheshin atyre që thonë, shumë gjëra do të kishin qenë ndryshe, shumë më mirë, në veçanti në Shqipëri. Për ju, shumë gjëra do të kishin qenë më të lehta dhe investimi juaj do të kishte qenë më i frytshëm për ju dhe për vendin tonë.

Kam vendosur që ato që them të mos jenë thjesht fjalë goje.

Në takimin tonë të fundit, unë thashë se qeveria ishte e vendosur të garantonte një mjedis ekonomik që siguronte garanci ligjore, transparencë dhe parashikueshmëri, si edhe dhe një mjedis investues që do të ishte një vlerë për avantazhin konkurrues të të gjitha kompanive investuese.

Unë ju premtova se do ishim partnerë në zhvillimin e biznesit tuaj dhe vendit tim.

Pak më shumë se 100 ditë nuk janë të mjaftueshme për të siguruar një mjedis ekonomik dhe investues shumë të ndryshëm, por shpresoj se kanë qenë të mjaftueshme për të treguar se ne po lëvizim shpejt në atë drejtim dhe se jemi të besueshëm.

Ndër masat e ndërmarra nga ne deri tani, më lejoni të veçoj ndryshimet në sistemin e taksave. Ai ka ndryshuar nga një sistem që pengonte zhvillimin e vendit, në një taksim të ndershëm që kontribuon në zhvillimin e qëndrueshëm, pa të cilin është e pamundur të sigurosh zhvillimin e çdo investimi.

Sistemi i ndershëm i taksimit lehtëson barrën mbi punën dhe forcon përballueshmërinë e shoqërisë.

Ne e sjellim këtë sistem, të shoqëruar me eliminimin e taksës së korrupsionit. Sipas Bankës Botërore, korrupsion është rritur me më shumë se 100%, kështu nga 10% deri në 22% të taksës mbi të ardhurat që biznesi i madh i paguante qeverisë së kaluar.

Kështu që sistemi i taksimit të ndershëm nuk përbën një barrë për biznesin e madh.  Në të kundërt, ai përfaqëson një inkurajim dhe siguri të qëndrueshme.

Taksa 22% mbi të ardhurat ndaj bizneseve, 12% e të cilës ishte një barrë e fshehtë, ishte një reflektim i qeverisjes që tjetër thoshte e tjetër bënte. Gjë që nuk do të ekzistojë më sot!

Ne i shpallim qëllimet tona. Ne jemi të qartë lidhur me politikat tona. Ne jemi të jemi të hapur për të diskutuar mbi politikat tona dhe zbatimin e tyre, sipas atyre që kemi deklaruar.

Referuar sistemit të taksimit, përsa i përket industrisë fason, ne po punojmë për një marrëveshje të veçantë fiskale, në mënyrë që t’u sigurojmë atyre kushtet fiskale më të mira të mundshme.

Aktualisht, përpara fillimit të zbatimit të sistemit të ri të taksimit, ne kemi krijuar Këshillin Kombëtar Ekonomik, në mënyrë që të mund të punojmë më pranë  së bashku dhe të intensifikojmë ndërveprimin mbi politikat e ndjekura me aktoret kryesorë ekonomik dhe veçanërisht me biznesin e madh.

Shumë shpejt, ne do të krijojmë gjithashtu një Këshill Investimi për intensifikimin e dialogut tonë cilësor me investitorët dhe të sigurojmë qëndrueshmërinë e tij. Ky Këshill duhet që në një kohë të shkurtër të asistojë dhe të bashkëpunojë me qeverinë për zhbërjen e procedurave të paqëndrueshme, procedurave të tejzgjatura, monopoleve dhe korrupsionit në mënyrën e të bërit biznes dhe investimit të Shqipëri.

Sigurisht, ne jemi tejet të interesuar në tërheqjen e më shumë investimeve. Megjithatë, ne e dimë se pikë së pari, si qeveri shqiptare, në fakt, jo ne, por qeveria e mëparshme është në borxh me investitorët e huaj në Shqipëri. Dhe ky është një borxh i komunikimit normal që nuk kalon nëpërmjet klientëve politikë; një borxh i transparencës, mungesa e së cilës u reflektua në veçanti në praktikat përjashtuese, fshehur në skajet më të errëta të kontratave që nuk e panë kurrë dritën e diellit dhe praktikave të pandershme që vendoseshin në skajet e errëta të takimeve me klientët politikë; një borxh respekti që mungonte ndaj shoqërisë, sepse veprimet dhe sjellja e qeverisë së mëparshme i kanë njohur investitorëve të huaj rolin e dikujt që gjen mundësinë të bëhet shumë i pasur, duke shfrytëzuar dhe jo zhvilluar burimet e vendit tonë.

Kështu që, ndërkohë që po mundohemi ta bëjmë Shqipërinë një vend tërheqës për investitorë të huaj seriozë, më interesa të ndryshme, nga bizneset e vogla në sipërmarrjet e mëdha. Dhe ndërkohë që bashkëpunojmë me ju për të tërhequr më shumë investime te huaja direkte në Shqipëri; le të sigurohemi më parë që kushtet më të mira të jenë prezente për ju, njerëzit që po investojnë tashmë dhe kanë investuar në vendin tone, pavarësisht vështirësive.

Ne duam të ndryshojmë modelin ekonomik të Shqipërisë, pasi është e qartë që ky model i ka prodhuar përçarje sociale, ka lejuar abuzimin me burimet e vendit dhe ka lejuar keqpërdorimin e potencialit për tërheqjen e investimeve të huaja ne vend.

Model i ri mbështetet shumë në përdorimin e frytshëm të këtij potenciali. Në këtë kuadër, bashkëpunimi ynë në këtë çështje bëhet më i rëndësishëm. Është jetësor.

Megjithatë, në mënyrë që të arrijmë këtë, ne duhet të ndryshojmë mënyrën e qeverisjes së vendit. Dhe shpresoj që ju ta keni vënë re ndryshimin.

Kështu që, dëshiroj që para së gjithash t’ju uroj juve, një vit plot me premtime të mbajtura nga qeveria shqiptare.

Së dyti, uroj që ky vit të jetë një periudhë transformimi për imazhin e investitorit të huaj në Shqipëri.

Së treti, uroj që ky vit të jetë koha kur ne, së bashku, të arrijmë të nxjerrim rolin thelbësor të investitorit si një aktor në krijimin e progresit dhe mirëqenies së qytetarëve dhe shoqërisë sonë.

Dhe e fundit, por jo më pak e rëndësishmja, për sa kohë këto janë kushte të lidhura me njëra-tjetrën, ju uroj të gjithëve një 2014 shumë produktive, angazhuese dhe mbi të gjitha  shpërblyese!

 

***

 

Shoqata e Investitorëve të Huaj në Shqipëri (FIAA) zgjodhi t’ia jepte kartolinën e parë të saj të urimit për vitin 2014, Kryeministrit Edi Rama, si vlerësim për përpjekjet e qeverisë për përmirësimin e klimës së biznesit.

“Me rastin e shkëmbimit tradicional të shkëmbimit të urimeve për një vit të suksesshëm midis Shoqatës së Investitorëve të Huaj dhe Qeverisë Shqiptare, shoqata shpreh vlerësimin më të madh për Qeverinë Shqiptare dhe për përpjekjen që bëhen për përmirësimin e klimës së biznesit. Shoqata jonë shpreh angazhimin për rritjen e përpjekjeve tona për rritjen e të gjitha investimeve të investitorëve që operojnë në tregun shqiptar.”  

Ky është urimi dhe mesazhi që FIAA-s i drejtoi Kryeministrit, i ftuar ta lexonte vetë dhe pas së cilës, ndonëse iu drejtua me një batutë drejtuesve të Shoqatës se ishte “i sigurt që teksti është gjithmonë i njëjtë për çdo Kryeministër”, shprehu besimin se qeveria do ta meritonte këtë vlerësim dhe se, madje, edhe kartolina e ardhshme do të ruante të njëjtin vlerësim.

“Shpresoj që kartolina tjetër me urime do të jetë më pak rozë, në qoftë se ne vërtetë do e meritojmë që të kritikohemi, por, nga ana tjetër, le të jetë me të njëjtat fjalë, në qoftë se ne do të kemi vepruar mirë dhe do meritojmë të komplimentohemi për punën që kemi bërë. Besoj që ne do të kemi këtë të dytën, që të meritojmë një kartolinë të tillë, me të gjitha këto urime dhe komplimente që më bëhen.”

Kryeministri Rama ftoi dhe garantoi çdo biznesmen në Shqipëri që të ndjehet i lirë për të shprehur mendimet e tij, “pa pasur frikën që ditën e nesërme, Departamenti i Taksave apo i Tatimeve do t’i trokasë në derë dhe t’i kërkojë llogari: pse ju thatë këtë gjë apo pyetët për këtë gjë.”

“Shpresoj dhe kam shumë besim, se kësaj here nuk do të kemi më të tilla gjëra. Ka filluar ndryshimi. Gjithashtu ,viti do të tregojë se ndryshime të tjera do të vijnë dhe këto ndryshime do të vijnë vetëm nëse ne punojmë të gjithë së bashku, secili bazuar dhe mbështetur tek ideja e qartë për pozicionin e tjetrit që ka përballë, por, gjithashtu, të gjithë të mbështetemi tek interesi i përbashkët për të zhvilluar biznesin, për të zhvilluar investimet, për të krijuar vende të reja pune. Dhe shpresojmë që së fundi të krijohen edhe figura të adhuruara për biznesmenet apo biznesmenët, të tillë që shoqëria jonë deri tani ka pasur vetëm për artistët, këngëtarët, të cilët vërtetë kryejnë një punë shumë të mirë dhe paguhen. Pra, edhe ata që paguajnë, biznesmenët, meritojnë të kenë admirimin tonë. Pra, kjo gjë duhet të ndodhë edhe me ju,” – përfundoi Kryeministri.