NJOFTIM PËR APLIKIM

 

PËR PËRZGJEDHJEN DHE EMËRIMIN E ANËTARËVE TË KOMITETIT PËR PAKICAT KOMBËTARE

 

Në mbështetje të ligjit nr.96/2017, “Për mbrojtjen e pakicave kombëtare në Republikën e Shqipërisë”, të vendimit nr.286, datë 10.5.2019, të Këshillit të Ministrave, “Për miratimin e procedurave të përzgjedhjes së kryetarit, nënkryetarit dhe anëtarëve të Komitetit për Pakicat Kombëtare” dhe urdhrit nr.20, datë 8.11.2021, “Për ngritjen e komisionit AD-HOC për kryerjen e procedurave përzgjedhëse për anëtarët e Komitetit për Pakicat Kombëtare”, të Sekretarit të Përgjithshëm të Këshillit të Ministrave, nis procedura e hapur e konkurrimit për përzgjedhjen e anëtarëve të Komitetit për Pakicat Kombëtare, e cila bëhet çdo 4 vjet, pas emërimit të kryetarit dhe të nënkryetarit të këtij institucioni.

Procedurat e hapura publike të konkurrimit bëhen nga Kryeministria, bazuar në pikën 4, të nenit 20, të ligjit nr.96/2017, “Për mbrojtjen e pakicave kombëtare në Republikën e Shqipërisë”.

Shpallja për aplikim do të jetë e hapur për një afat 30-ditor.

Kandidatët për anëtarë të KPK-së duhet të plotësojnë këto kritere të posaçme:

1. a) Të njohë gjuhën e pakicës kombëtare përkatëse (vetëm për ato pakica kombëtare që kanë gjuhën e tyre);
2. b) Të ketë eksperiencë pune jo më pak se 5 (pesë) vjet vjetërsie në fushën e mbrojtjes së të drejtave të pakicave.

• Dokumentet që duhet të dorëzohen janë, si më poshtë vijon:

 

• Kërkesë për aplikim;
• Dokument që të provojë vjetërsinë në profesion;
• Mbështetje, me rekomandim nga të paktën 1 shoqatë të regjistruar sipas përcaktimeve të ligjit nr.8788, datë 7.5.2001, “Për organizatat jofitimprurëse”, të ndryshuar, që në statutin e saj ka të përcaktuar si objekt të veprimtarisë mbrojtjen dhe promovimin e të drejtave të pakicës kombëtare përkatëse, sipas përcaktimit në pikën 2, të nenit 3, të ligjit nr.96/2017, “Për mbrojtjen e pakicave kombëtare në Republikën e Shqipërisë”.
• Kopje e letërnjoftimit ;
• Dëshmia e penalitetit;
• Curriculum vitae në gjuhën shqipe (secila faqe e firmosur);
• Dokumente të diplomimit (të noterizuara) si dhe dokumente të përvojës në fushat e kërkuara;
• Dokument që të provojë njohjen e gjuhës së pakicës që do të përfaqësojë (vetëm për ato pakica kombëtare që kanë gjuhën e tyre);
• Kandidatët ,individualisht: mbështetje, me rekomandim , nga të paktën 5 (pesë) individë , që janë personalitete me kontribute të pakicës kombëtare përkatëse ne Republiken e Shqiperise.
• Formular të vetëdeklarimit (të plotësuar e të firmosur), në zbatim të ligjit nr.138/2015, “Për garantimin e integritetit të personave që zgjidhen, emërohen ose ushtrojnë funksione publike”, të ndryshuar;
• Formular të aplikimit (të plotësuar e të firmosur) për informim për zyrtarët përpara emërimit/zgjedhjes në poste të larta, në zbatim të ligjit nr.45/2015, “Për të drejtën e informimit për dokumentet e ish-Sigurimit të Shtetit të Republikës Popullore Socialiste të Shqipërisë”.

(Deklarimi i rremë sjell përjashtimin nga çdo procedurë e mëtejshme e konkurrimit dhe përgjegjësi penale, sipas legjislacionit në fuqi.)

Afati i dorëzimit të aplikimit, deri më 15 dhjetor 2021.

Dokumentet e aplikimit për anëtar të Komitetit të Pakicave Kombëtare të dorëzohen në adresën, si më poshtë vijon:

Adresa: Komiteti Shtetëror i Minoriteteve
Rruga e Durrësit, nr.27
Tiranë, Shqipëri

Tel.: 00355 4 22 56 843