Qeveria Shqiptare Keshilli i Ministrave
Projektligje të miratuara në mbledhjen e Këshillit të Ministrave, 30 prill 2014
V E N D I M 
PËR
PROPOZIMIN E PROJEKTLIGJIT “PËR SHËRBIMIN PËR ANKESAT DHE ÇËSHTJET E BRENDSHME, NË MINISTRINË  E PUNËVE TË BRENDSHME”
Në mbështetje të neneve 81, pika 1, dhe 100, të Kushtetutës, me propozimin e  ministrit të Punëve të Brendshme, Këshilli i Ministrave
V E N D O S I:
Propozimin e projektligjit “Për Shërbimin për Ankesat dhe Çështjet e  Brendshme, në Ministrinë e Punëve të Brendshme”, për shqyrtim e miratim në Kuvendin e Republikës së Shqipërisë, sipas tekstit dhe relacionit që i bashkëlidhen këtij vendimi.
Ky vendim hyn në fuqi menjëherë.
K R Y E M I N I S T R I
EDI  RAMA
***
P R O J E K T L I GJ
PËR
SHËRBIMIN PËR ANKESAT DHE ÇËSHTJET E BRENDSHME, NË MINISTRINË E PUNËVE TË BRENDSHME
Në mbështetje të neneve 78 dhe 83, pika 1, të Kushtetutës, me propozimin e Këshillit të Ministrave, Kuvendi i Republikës së Shqipërisë
V E N D O S I:
Pjesa e PARË
DISPOZITA TË PËRGJITHSHME
Neni 1
Qëllimi
Ky ligj ka si qëllim të përcaktojë misionin, organizimin, funksionimin, rregullimin e pozitës juridike të Shërbimit për Ankesat dhe Çështjet e Brendshme, si dhe karrierën, detyrat, të drejtat e përgjegjësitë e punonjësit të këtij shërbimi.
Neni 2
Fusha e zbatimit të ligjit 
Shërbimi për Ankesat dhe Çështjet e Brendshme e ushtron veprimtarinë e tij ndaj strukturave të mëposhtme:
a) Policisë së Shtetit;
b) Strukturës përgjegjëse për ruajtjen e personaliteteve të larta shtetërore dhe  të objekteve të rëndësisë së veçantë;
c) Strukturës së Mbrojtjes nga Zjarri dhe për Shpëtimin.
Neni 3
Përkufizimet
Në kuptim të këtij ligji, me termat e mëposhtëm nënkuptohen:
a) “Drejtori i Përgjithshëm”, autoriteti më i lartë drejtues, administrativ, teknik e operacional, përgjegjës për veprimtarinë e shërbimit.
b) “Fusha e veprimtarisë informative të shërbimit”, procesi i grumbullimit, administrimit, vlerësimit, analizimit, vërtetimit, shpërndarjes dhe përdorimit të informacionit, në funksion të parandalimit, zbulimit dhe dokumentimit ligjor të veprave penale, të kryera nga punonjësit e strukturave.
c) “Hetim”, veprimtaria që kryhet në përputhje me Kodin e Procedurës Penale.
 ç) “Inspektim”, veprimtaria që kryen njësia e inspektimit për verifikimin e respektimit të ligjshmërisë nga subjekti i inspektimit, në përputhje me legjislacionin në fuqi.
d) “Ministri”, ministri përgjegjës që mbulon fushën e veprimtarisë shtetërore të rendit dhe sigurisë publike.
dh) “Objektivat vjetorë strategjikë”, qëllimet/synimet e matshme, specifike dhe realiste për zbatimin/realizimin e misionit të shërbimit.
e) “Personeli operacional”, personeli që kryen veprimtarinë informativo – gjurmuese dhe mban gradë.
 ë) “Personeli pa gradë”, personeli që kryen veprimtari inspektuese, të administrimit të ankesave të publikut dhe shërbimeve mbështetëse.
f) “Strukturat”, strukturat e përcaktuara në nenin 2, për efekt referimi të këtij ligji.
g) “Testi i integritetit”,  veprimtaria që përdoret për verifikimin e etikës dhe integritetit të një punonjësi të strukturave.
Neni 4
Misioni
Misioni i Shërbimit është garantimi i zbatimit të ligjit dhe interesave të publikut, mbrojtja nga veprimtaria e mundshme kriminale dhe e kundërligjshme e kryer nga punonjës të veçantë të strukturave pavarësisht nga funksioni dhe grada.
Neni 5
Objekti i veprimtarisë
Objekt i veprimtarisë së Shërbimit janë:
a) Parandalimi, zbulimi dhe hetimi i veprave penale si dhe i shkeljeve të ligjit të kryera nga punonjësit e strukturave gjatë ushtrimit të detyrës dhe për shkak të saj.
b) Pranimi,  administrimi dhe zgjidhja e ankesave ndaj punonjësve të strukturave për mospërmbushje të detyrës sipas standardeve të miratuara me akte normative, për vepra penale dhe shkelje të tjera të ligjit.
c) Inspektimi për verifikimin e respektimit të ligjshmërisë, në përputhje me legjislacionin dhe standardet e miratuara me akte normative.
ç)  Ruajtja e integritetit të punonjësve të strukturave.
d) Kontrolli i pasurisë së pajustifikuar të personave, objekt hetimi, për goditjen e veprimtarisë korruptive dhe kriminale.
dh) Analiza, studime dhe rekomandime të përgjithësuara në bazë të inspektimeve dhe hetimeve për aspekte të rëndësishme të organizimit e të funksionimit të strukturave dhe pritshmërisë së publikut në drejtim të sigurisë publike.
Neni 6
Parimet e veprimtarisë
Parimet bazë, në bazë të të cilave organizohet dhe funksionon Shërbimi, janë:
a) Ligjshmëria;
b) Pavarësia nga strukturat;
c) Objektiviteti;
     ç)  Respektimi i të drejtave dhe lirive themelore të njeriut;
d) Veprimi pa diskriminim;
   dh)  Respektimi i dinjitetit dhe integritetit fizik;
e) Transparenca;
     ë)  Proporcionaliteti;
f) Ruajtja e  informacionit të klasifikuar;
g) Asnjanësia politike;
    gj)  Kontrolli dhe llogaridhënia.
Neni 7
Simbolet dhe betimi
1. Shërbimi ka stemën dhe simbolet e veta, të cilat miratohen me vendim të Këshillit të Ministrave.
2. Punonjësi i Shërbimit, para marrjes së detyrës, betohet sipas procedurës dhe formulës së miratuar me urdhër të ministrit.
Neni 8
Statusi i Shërbimit
1. Shërbimi është person juridik publik, strukturë e veçantë e Ministrisë së Punëve të Brendshme, në varësi të drejtpërdrejtë të ministrit.
2. Statusi i punonjësit të Shërbimit rregullohet sipas këtij ligji.
3. Statusi i Shërbimit nuk ndryshon edhe në gjendje lufte, gjendje të jashtëzakonshme apo fatkeqësie natyrore.
Neni 9
Buxheti
1. Shërbimi ka buxhetin e vet, i cili është zë më vete në buxhetin e ministrisë. Drejtori i Shërbimit është përgjegjës për menaxhimin efektiv dhe me përgjegjshmëri të buxhetit të miratuar, i cili është objekt auditimi.
2. Shërbimi ka një fond të posaçëm që e përdor në funksion të veprimtarisë procedurale penale dhe procesit informativ. Fondi i posaçëm është një zë i veçantë i buxhetit të Shërbimit dhe nuk i nënshtrohet rregullave të prokurimit publik.
3. Kushtet dhe kriteret për përdorimin dhe kontrollin e këtij fondi rregullohen me vendim të Këshillit të Ministrave.
PJESA E  DYTË
ADMINISTRIMI DHE ORGANIZIMI I SHËRBIMIT
KREU I
STRUKTURA
Neni 10
  Administrimi i shërbimit
Administrimi i Shërbimit garanton qëndrueshmërinë në detyrë të punonjësit të Shërbimit dhe vazhdimësinë e veprimtarisë së Shërbimit.
Neni 11
Organizimi dhe struktura
1. Shërbimi është organi i centralizuar dhe organizohet në nivel qendror dhe vendor. Drejtoria e Përgjithshme përbën nivelin qendror të Shërbimit, ndërsa në nivelin vendor strukturat organizohen në drejtori dhe sektorë.
2. Struktura dhe organika e Drejtorisë së Përgjithshme dhe strukturat vendore miratohen nga ministri, me propozimin e drejtorit të Shërbimit.
Neni 12
 Strukturat qendrore dhe vendore të Shërbimit
1. Shërbimi drejtohet nga drejtori i Përgjithshëm dhe e ka selinë në Tiranë.
2. Drejtoria e Përgjithshme përbën nivelin qendror të shërbimit dhe ka këto përgjegjësi:
a) Organizon, planifikon, drejton dhe kontrollon veprimtarinë e drejtorive dhe sektorëve të saj, në nivel vendor;
b) Mbikëqyr kryerjen e funksioneve e të detyrave të Shërbimit të drejtorive e sektorëve të saj, në nivel vendor;
c) Bashkërendon kryerjen e funksioneve dhe të detyrave të njësive organizative të varësisë;
     ç) Kryen detyra në zbatim të këtij ligji, ligjeve të tjera dhe akteve nënligjore që rrjedhin prej tyre.
3. Strukturat në varësi të Drejtorisë së Përgjithshme ngrihen, në përputhje me realizimin e misionit dhe objektivave të veprimtarisë së Shërbimit, në territoret ku ushtrojnë veprimtarinë e tyre strukturat, subjekt i këtij ligji.
4. Strukturat qendrore të Shërbimit kryejnë, për shkelje të ligjit dhe të standardeve të punës të miratuara, verifikime brenda juridiksionit të tyre lëndor dhe territorial.
KREU II
AUTORITETET DREJTUESE
Neni 13
Ministri
1. Ministri është autoriteti më i lartë përgjegjës për organizimin dhe veprimtarinë e Shërbimit.
2. Ministri përcakton objektivat vjetorë strategjikë të kryerjes së detyrave të Shërbimit në përputhje me politikat shtetërore.
3. Ministri siguron bashkëpunimin ndërmjet këtij shërbimi me agjencitë dhe strukturat e tjera të Ministrisë së Punëve të Brendshme, institucionet e zbatimit të ligjit, institucionet e tjera brenda vendit, si dhe institucionet homologe të vendeve të tjera, në bazë të marrëveshjeve të ndërsjella.
4. Ministri ushtron këto kompetenca për veprimtarinë e Shërbimit:
a) Miraton strukturat dhe organizimin e Shërbimit;
b) Përcakton përparësitë e veprimtarisë së Shërbimit bazuar mbi politikat shtetërore dhe pritshmërinë e publikut;
c) Nxjerr urdhra dhe udhëzime në  zbatim të akteve ligjore dhe nënligjore në fuqi për organizimin dhe funksionimin e Shërbimit, për mbrojtjen e informacioneve dhe të burimeve të tyre nga ekspozimi i paautorizuar, për shqyrtimin e pastërtisë së figurës së punonjësve të strukturave, për të cilët kërkohet pajisja me certifikatë sigurie;
     ç) Informohet për të gjithë veprimtarinë e Shërbimit, me përjashtim të burimeve të informacionit dhe personave nën hetim penal.
Neni 14
Drejtori i Përgjithshëm i Shërbimit dhe kriteret e emërimit
1. Drejtori i Përgjithshëm i Shërbimit, në vijim drejtori i Shërbimit, emërohet në detyrë dhe lirohet nga ministri.
2. Drejtor i Shërbimit emërohet personi, që, përveç kritereve të përcaktuara në nenin 80, të këtij ligji, duhet të përmbushë edhe këto kritere:
a) Të ketë shërbyer për një periudhë jo më pak se 14 (katërmbëdhjetë) vjet, në sistemin e drejtësisë (prokuror, gjyqtar), në Shërbim, strukturat e hetimit të krimit në Policinë e Shtetit ose në strukturat informative në SHISH, nga të cilat jo më pak se 3 (tre) vjet në pozicione drejtuese;
b) Të ketë integritet dhe figurë të pastër morale;
c) Të mos ketë qenë i dënuar për vepër penale;
     ç)  Të mos ketë konflikt interesi me detyrën;
d) Të mos ketë punuar në detyrën e mëparshme në kabinetet e drejtorëve të strukturave.
Neni 15
Përgjegjësitë dhe detyrat e drejtorit të Shërbimit
Drejtori i Shërbimit ka këto përgjegjësi dhe detyra:
a) Drejton dhe organizon veprimtarinë e Shërbimit, në përputhje me ligjet, përparësitë dhe objektivat strategjikë të përcaktuar nga ministri;
b) Kontrollon realizimin e përgjegjësive dhe detyrave të Shërbimit;
c) Planifikon dhe menaxhon politikat e rekrutimit, arsimimit, trajnimit, kualifikimit, karrierës së personelit të Shërbimit;
     ç)  Menaxhon dhe kontrollon buxhetin e shërbimit, sipas legjislacionit në fuqi;
d) Përfaqëson Shërbimin në marrëdhëniet me institucionet brenda vendit, organizmat e tjerë ndërkombëtarë dhe strukturat e huaja homologe, me autorizim të ministrit.
Neni 16
Zëvendësdrejtori i Përgjithshëm i Shërbimit dhe kriteret e emërimit
1. Zëvendësdrejtori i Përgjithshëm i Shërbimit, në vijim zëvendësdrejtori i Shërbimit, emërohet në detyrë dhe lirohet nga ministri, me propozimin e drejtorit të Shërbimit.
2. Zëvendësdrejtor i Shërbimit emërohet personi që, përveç kritereve të përcaktuara në nenin 80, të këtij ligji, duhet të përmbushë edhe këto kritere:
a) Të ketë shërbyer për një periudhë jo më pak se 14 (katërmbëdhjetë) vjet në sistemin e drejtësisë (prokuror, gjyqtar), në Shërbim, strukturat e hetimit të krimit në Policinë e Shtetit, nga të cilat jo më pak se 3 (tre) vjet në pozicione drejtuese;
b) Të ketë integritet dhe figurë të pastër morale;
c) Të mos ketë qenë i dënuar për vepër penale;
         ç)  Të mos ketë konflikt interesi me detyrën;
d) Të mos ketë punuar në detyrën e mëparshme në kabinetet e drejtorëve të strukturave.
Neni 17
Përgjegjësitë dhe detyrat e zëvendësdrejtorit të Shërbimit
Zëvendësdrejtori i Shërbimit  ka këto përgjegjësi dhe detyra:
a) Ndihmon drejtorin e Shërbimit në kryerjen e funksioneve në strukturat që ai drejton;
b) Drejton dhe ushtron kontroll të drejtpërdrejtë mbi punonjësit e Shërbimit, në nivel qendror e vendor;
c) Drejton dhe organizon veprimtarinë informative, hetimore dhe studimore;
ç)  Kryen çdo detyrë tjetër të përcaktuar në akte ligjore e nënligjore në fuqi.
Neni 18
Qëndrimi në detyrë i drejtorit dhe zëvendësdrejtorit të Shërbimit   
Drejtori dhe zëvendësdrejtori i Shërbimit:
a) emërohen për një periudhë pesëvjeçare, me të drejtë riemërimi edhe për një periudhë dyvjeçare;
b) kur plotësojnë mandatin e qëndrimit në detyrë ose kur përfundojnë marrëdhëniet e punës sipas shkronjës “d”, të nenit 20, emërohen në strukturat, subjekte të këtij ligji, apo institucione të tjera të administratës shtetërore, në përputhje me funksionin dhe gradën, të ekuivalentuara me vendim të Këshillit të Ministrave me gradat e Policisë së Shtetit;
c) në mungesë të funksioneve organike, dalin në dispozicion me pagën sipas gradës, për një periudhë 2-vjeçare.
Neni 19
Autoriteti për të vepruar në emër të drejtorit të Shërbimit 
1. Ministri cakton zëvendësdrejtorin e Shërbimit të ushtrojë kompetencat dhe detyrat e drejtorit të Shërbimit në këto raste:
a) Kur drejtori i Shërbimit nuk është emëruar ende;
b) Në rast paaftësie ose pezullimi nga detyra të drejtorit të Shërbimit;
c) Në raste të tjera, me kërkesën e drejtorit të Shërbimit.
2. Zëvendësdrejtori i Shërbimit nuk mund të ushtrojë kompetencat e drejtorit të Shërbimit për një periudhë të pandërprerë, më shumë se 6 (gjashtë) muaj.
Neni 20
Rastet e lirimit nga detyra të drejtorit dhe zëvendësdrejtorit të Shërbimit
Marrëdhënia me Shërbimin e drejtorit dhe zëvendësdrejtorit të Shërbimit përfundon nëpërmjet lirimit, në këto raste:
a) Kur humbet shtetësinë shqiptare;
b) Kur dënohet me vendim të formës së prerë të gjykatës për kryerjen e një vepre penale;
c) Kur humbet zotësinë e plotë për të vepruar për arsye shëndetësore në kryerjen e detyrës së tij, vërtetuar nga komisioni kompetent mjekësor;
ç)  Kur mbush moshën e daljes në pension;
d) Kur jep dorëheqjen;
dh) Kur përfundon mandatin e përcaktuar në këtë ligj;
e) Pas 2 (dy) vlerësimeve të njëpasnjëshme negative të punës, të dokumentuara nga ministri, sipas kritereve të përcaktuara në rregulloren e personelit.
Neni 21
 Personeli i Shërbimit
1. Personeli i Shërbimit ndahet në dy kategori:
a) personeli pa grada, i cili përbën jo më pak se gjysmën e personelit të Shërbimit.
b) personeli operacional, i cili kryen veprimtarinë informativo-gjurmuese dhe mban gradë.
2. Personeli i Shërbimit, me përjashtim të punonjësve të shërbimeve mbështetëse, gëzon atributet e policisë gjyqësore në përputhje me Kodin e Procedurës Penale dhe ligjin “Për organizimin dhe funksionimin e policisë gjyqësore”.
3. Personeli i shërbimeve mbështetëse trajtohet sipas legjislacionit për nëpunësin civil.
4. Për nevoja të veçanta të punës apo për realizimin e proceseve të fushave që kërkojnë njohuri të posaçme, Shërbimi punëson personel me kohë të pjesshme ose me kontratë me kohë të caktuar.
5. Rregullat dhe procedurat për kërkesat e përgjithshme të pranimit, marrëdhëniet e punës, të trajnimit, ecurisë në karrierë dhe ndërprerjes së saj, për klasifikimin e niveleve sipas funksioneve organike, përshkrimin e përgjithshëm të punës për çdo kategori, klasë dhe grup, si dhe emërtesat e pozicioneve përcaktohen në rregulloren e personelit, të miratuar nga Këshilli i Ministrave.
KREU III
DETYRIMET E PERSONELIT   
Neni 22
Detyrimi i respektimit të ligjit dhe formimit profesional
Punonjësi i Shërbimit gjatë ushtrimit të detyrës:
a) kryen me profesionalizëm, përgjegjshmëri dhe në përputhje me ligjin detyrat e tij në Shërbim;
b) zbaton rregullat e etikës së shërbimit, si dhe rregullat e etikës së administratës publike.
c) respekton Kushtetutën dhe mbron të drejtat dhe liritë e njeriut, si dhe i shërben interesit publik;
ç) mban përgjegjësi të plotë për ligjshmërinë e çdo veprimi apo mosveprimi të tij, gjatë ushtrimit të detyrës në Shërbim;
d) vepron në përputhje me urdhrat e ligjshëm marrë nga eprorët hierarkikë të Shërbimit, me funksion ose gradë më të lartë, sipas ligjit dhe rregullave të brendshme të Shërbimit;
   dh) përmirëson aftësitë profesionale nëpërmjet formimit profesional dhe trajnimeve të vazhdueshme të financuara nga fondet publike.
Neni 23
Kontrolli, raportimi dhe llogaridhënia
1. Veprimtaria e Shërbimit kontrollohet nga:
a) Kuvendi;
b) Kryeministri;
c) Ministri;
ç)  Prokurori i Përgjithshëm i Republikës së Shqipërisë;
d) Struktura të tjera të ngarkuara me ligj.
2. Personat e autorizuar për të kontrolluar veprimtarinë e Shërbimit duhet të jenë të pajisur me certifikatë sigurie për nivelin e klasifikimit të informacionit që aksesojnë, të lëshuar nga autoriteti kompetent.
Neni 24
Miradministrimi i pronës shtetërore dhe kohës së punës
1. Punonjësi i Shërbimit ka detyrimin e miradministrimit të armatimit, pajisjeve, mjeteve dhe mjediseve që i janë dhënë në përdorim për ushtrimin e detyrës dhe plotësimin e kushteve të punës e të jetesës.
2. Punonjësi i Shërbimit ka detyrimin të shfrytëzojë kohën e punës me efiçencë dhe vetëm për kryerjen e detyrave funksionale.
3. Procedurat për sigurimin dhe administrimin e vlerave materiale të shërbimit miratohen nga Këshilli i Ministrave.
Neni 25
Ruajtja e informacionit të klasifikuar
Punonjësi i Shërbimit ka detyrimin:
a) të sigurojë mbrojtjen dhe mospërhapjen e paautorizuar të informacionit të klasifikuar, për të cilin ka marrë dijeni gjatë ose jashtë kryerjes së detyrës, detyrim ky që vazhdon edhe pasi ai ndërpret marrëdhëniet e punës me Shërbimin;
b) të mos e përdorë informacionin e mbledhur gjatë ushtrimit të detyrës për qëllime të tjera, jashtë atyre të përcaktuara me ligj;
c) të sigurojë mbrojtjen dhe mospërhapjen e të dhënave  personale dhe të atyre që lidhen me veprimtarinë profesionale të personave, të mbrojtura sipas ligjit, me të cilat njihet gjatë ushtrimit të detyrës.
Neni 26
Transparenca dhe përjashtimi nga publikimi
1. Shërbimi ka detyrimin të ushtrojë detyrën me transparencë dhe të realizojë procedura transparente, në masën e lejuar dhe të nevojshme, me qëllim që të krijojë kushte për ushtrimin e kontrollit të saj nga publiku, duke balancuar të drejtën e publikut dhe palëve për informim me mbrojtjen e informacionit të klasifikuar.
2. Shërbimi përjashtohet nga detyrime, në bazë të të cilave kërkohet publikimi i dokumenteve e i të dhënave që përbëjnë informacion të klasifikuar, si dhe burimeve të të dhënave, mjeteve e metodave të punës.
3. Shërbimi ka të drejtë të publikojë çdo informacion të deklasifikuar, sipas së drejtës së publikut për informim dhe në përputhje me legjislacionin për mbrojtjen e të dhënave personale.
Neni 27
Kufizimi i të drejtave politike dhe i së drejtës së grevës
Punonjësi i Shërbimit:
a) nuk ka të drejtë të marrë pjesë në veprimtari politike, brenda ose jashtë orarit zyrtar, apo të shprehë publikisht bindjet dhe preferencat e tij politike;
b) nuk mund të  jetë anëtar i një partie apo organizate politike dhe me veprimtarinë e tij nuk duhet të cenojë natyrën e depolitizuar të institucionit;
c) ka detyrimin të nënshkruajë deklaratën e depolitizimit, si dhe t’i ushtrojë funksionet jashtë ndikimit të bindjeve politike;
     ç) në rast se kandidon në zgjedhjet për Kuvendin e Republikës së Shqipërisë apo për organet e qeverisjes vendore, detyrohet të kërkojë lirimin nga detyra dhe nuk mund të ripranohet më në shërbim.
d) nuk ka të drejtën e grevës.
Neni 28
Respektimi i Shërbimit dhe ndalimi i veprimtarisë jashtë misionit  
1. Punonjësit të Shërbimit i ndalohet:
a) të kryejë veprime të karakterit fyes, shpifës apo denigruese ndaj Shërbimit;
b) të përdorë mjetet, shenjat dhe simbolet e Shërbimit jashtë kryerjes së detyrës.
2. Shërbimit i ndalohet të kryejë veprime për të realizuar qëllime dhe objektiva, që nuk kanë lidhje me misionin e tij ligjor.
Neni 29
 Raportimi i ankesave dhe i shkeljeve
Punonjësi i Shërbimit i raporton eprorit përkatës ose, në mungesë të tij, eprorit më të lartë:
a) çdo ankesë të marrë në lidhje me sjelljen e një punonjësi tjetër të Shërbimit;
b) çdo shkelje të ligjit, për të cilën ai ka dyshime të mjaftueshme të besojë se është kryer nga një punonjës i Shërbimit apo cilido person tjetër, pavarësisht nëse këtë dijeni e ka marrë gjatë kryerjes së detyrës ose në rrethana të tjera.
Neni 30
Deklarimi i interesave privatë dhe pasurisë
Punonjësi i Shërbimit ka detyrimin:
a) të deklarojë interesat privatë dhe pasurinë sipas legjislacionit në fuqi;
b) të mos kryejë veprimtari me apo pa pagesë jashtë detyrës së tij në Shërbim, të cilat pengojnë plotësimin e kërkesave të detyrës apo krijojnë konflikt interesi;
c) të informojë dhe të marrë miratim nga drejtori i Shërbimit për çdo veprimtari me apo pa pagesë që  kërkon të kryejë jashtë detyrës së tij në Shërbim;
ç)  të njoftojë paraprakisht Drejtorinë e Shërbimit, nëse ai, bashkëshorti/ja,
    prindërit, motrat e vëllezërit apo fëmijët e tij ndërmarrin një veprimtari
    apo drejtojnë një biznes që mund të çojë në konflikt interesash me
    kompetencat dhe detyrën e tij dhe të zbatojë urdhrat e drejtorit të
    Shërbimit për parandalimin e konfliktit të interesit;
d) të shmangë çdo konflikt ndërmjet interesit të tij privat dhe interesit
publik në ushtrimin e detyrës në Shërbim.
Neni 31
Rivendosja e dinjitetit
1. Informacionet e grumbulluara nga Shërbimi nuk përbëjnë bazë ligjore për kufizimin e lirive dhe të drejtave themelore të njeriut, si dhe të interesave të personave fizikë e juridikë.
2. Kur si rezultat i veprimeve procedurale të kryera nga Shërbimi, në përfundim të të cilave rezulton se kanë qenë pa bazë ligjore, por si pasojë është dëmtuar rëndë reputacioni i punonjësit të strukturave, Shërbimi ka detyrimin e rivendosjes së dinjitetit të cenuar, nëpërmjet formave të informimit publik dhe zyrtar me shkrim.
Neni 32
Baza e të dhënave të shenjave të gishtave dhe ADN-së.
1. Shenjat e gishtave dhe mostra e ADN-së e të gjithë punonjësve të Shërbimit ruhen në një bazë të dhënash në laboratorin e policisë shkencore, për të përjashtuar të dhënat e tyre nga ato të proceseve hetimore. Marrja e të dhënave i shërben procesit të rekrutimit për ata që aplikojnë për t’u pranuar në Shërbim dhe këto të dhëna u merren të gjithë punonjësve në shërbim, nëse nuk u janë marrë në çastin e marrjes në punë.
2. Shenjat e gishtave dhe mostra e ADN-së, të marra për të krijuar këtë bazë të dhënash, shkatërrohen, qoftë në letër apo në formë elektronike, sapo një punonjës ndërpret marrëdhëniet e punës me Shërbimin.
3. Nëse një ish-punonjës ripranohet në Shërbim, shenjat e gishtave dhe mostra e ADN-së rimerren.
KREU IV
TË DREJTAT E PERSONELIT
Neni 33
E drejta e pagës dhe e shpërblimit 
1. Për shkak të natyrës së veçantë të punës, punonjësi i Shërbimit ka përparësi në trajtimin me pagë.
2. Paga e punonjësit të Shërbimit, që gëzon atributet e policisë gjyqësore, caktohet sipas gradës dhe funksionit që punonjësi ka fituar. Paga mujore e tyre përbëhet nga paga bazë, që është paga për gradë apo funksion, dhe nga shtesat mbi pagën bazë në shumë absolute për kushte dhe natyrë të veçantë të vendit të punës e të shërbimit, përfshirë profesionin, kualifikimin dhe kohën e qëndrimit në gradë, për kompensim të privacioneve e humbjeve që i shkaktohen atij për shkak të punës e të shërbimit.
3. Paga e punonjësit pa grada të Shërbimit njësohet me pagën e punonjësve të tjerë të administratës shtetërore.
4. Punonjësit e Shërbimit përfitojnë çdo vit, në fund të vitit financiar, një shpërblim deri në një pagë mujore, të njëjtë me atë të përfituar nga punonjësit civilë dhe punonjësit e tjerë të administratës shtetërore. Ky shpërblim jepet në bazë të një shkalle përpjesëtueshmërie, që pasqyron kohën e punës së kryer nga punonjësi gjatë vitit financiar.
5. Rregullimi i pagës, shpërblimit e ndihmës ekonomike dhe kriteret  e përgjegjësitë për dhënien e tyre miratohen nga Këshilli i Ministrave.
Neni 34
Koha e punës dhe e pushimit
1. Punonjësi i Shërbimit ka të drejtën për pushime vjetore të paguara, si dhe për pushime të tjera me apo pa pagesë.
2. Koha e punës dhe e pushimit për punonjësit e Shërbimit njësohet me atë të punonjësve të tjerë të administratës shtetërore, përveçse kur parashikohet ndryshe në këtë ligj.
3. Pushimi vjetor i pagueshëm për punonjësit e shërbimit është 30 deri në 45 ditë kalendarike dhe jepet i shkallëzuar, sipas niveleve e funksioneve, me përjashtim të personelit mbështetës.
4. Kur për arsye pune e shërbimi, pushimi vjetor nuk mund të jepet brenda vitit, ai duhet të jepet jo më vonë se në muajin mars të vitit pasardhës, Periudha e pushimeve pa të drejtë pagese nuk llogaritet në vjetërsi pune e shërbimi dhe as për efekt të ecurisë në karrierë.
5. Kriteret e masat e përfitimeve dhe llojet e pushimeve të tjera me apo pa pagesë përcaktohen me vendim të Këshillit të Ministrave.
Neni 35
Dhënia e pensionit dhe e përfitimeve suplementare
1. Punonjësi i Shërbimit, përveç përfitimeve që rrjedhin nga ligji për sigurimet shoqërore në Republikën e Shqipërisë, gëzon të drejtën e përfitimeve të tjera shtesë, sipas kushteve dhe kritereve të përcaktuara sipas legjislacionit përkatës për sigurimin shoqëror suplementar.
2. Për efekt të përfitimeve nga legjislacioni përkatës për sigurimin shoqëror suplementar, koha e shërbimit si punonjës i Shërbimit, nga e cila buron e drejta e përfitimeve suplementare, përfshin kohën:
a) e studimit në shkollat e larta ushtarake, të Ministrisë së Brendshme, të Policisë së Shtetit apo në shkolla të larta me natyrë të ngjashme me to;
b) kur është njohur si punonjës i SHKB-së;
c) kur është njohur si ushtarak i Forcave të Armatosura të Republikës së Shqipërisë, si punonjës i Policisë së Shtetit e i Gardës së Republikës, si punonjës i Shërbimit Informativ të Shtetit, si punonjës i Shërbimit Informativ Ushtarak, si punonjës në çdo vend të administratës shtetërore ose në institucionet e drejtësisë, për periudhën që ka ushtruar kompetencat e hetimit të veprave penale;
ç) e ndërprerjes së karrierës në shërbim, për shkak të një vendimi të padrejtë, të cilësuar si të tillë nga gjykata;
d) e trajtimit me pagesë kalimtare;
dh) e njohur si pension i parakohshëm për vjetërsi shërbimi;
e) gjysmën e kohës si punonjës në sektorët joushtarakë, para pranimit si punonjës i SHKB-së;
ë) e qëndrimit në dispozicion, për shkak të pritjes për sistemim në një funksion tjetër, në përputhje me gradën;
f) e shërbimit, që njihet një herë e gjysmë, për funksione të veçanta, me vendim të Këshillit të Ministrave.
3. Punonjësit të Shërbimit i jepen shpërblime ose ndihmë financiare për punë cilësore, për nevoja kulturore brenda fushës së veprimtarisë së shërbimit, për raste sëmundjesh të rënda e fatkeqësish dhe raste të tjera të kësaj natyre, sipas kritereve të përcaktuara me vendim të Këshillit të Ministrave.
Neni 36
Trajtimi me veshmbathje 
1. Punonjësi i Shërbimit trajtohet me veshmbathje një herë në vit, sa masa e një page mujore të vendit të punës, sipas kritereve të përcaktuara me vendim të Këshillit të Ministrave.
2. Njësi të veçanta të Shërbimit pajisen me pajime të veçanta, të cilat i përdorin vetëm gjatë ushtrimit të detyrës, kur kërkohet përdorimi i tyre. Pajimet, mbajtja dhe përdorimi i tyre miratohen me urdhër të ministrit.
PJESA E TRETË
KOMPETENCAT E SHËRBIMIT
KREU I
PROCESI INFORMATIV
Neni 37
Fusha e veprimtarisë informative
1. Veprimtaria informative realizohet nga personeli i shërbimit përgjegjës për fillimin, ndjekjen dhe përfundimin e procesit informativ dhe që mban gradën nga niveli i parë drejtues (hetues) e lart.
2. Procesi informativ i Shërbimit bazohet vetëm në të dhënat e marra në përputhje me ligjet përkatëse dhe me aktet nënligjore të nxjerra në zbatim të tyre.
3. Procesi informativ ushtrohet në përputhje me procedurat e miratuara nga ministri dhe prokurori i Përgjithshëm i Republikës së Shqipërisë, i cili ka të drejtë të ushtrojë kontroll mbi zbatimin e këtyre procedurave.
4. Zbatimi i procedurave të sipërpërmendura rregullohet me akte nënligjore të hartuara nga drejtori i Shërbimit dhe të miratuara nga ministri.
Neni 38
Mbledhja dhe marrja e të dhënave
1. Shërbimi, në përmbushje të misionit dhe detyrave funksionale të përcaktuara në këtë ligj, mbledh, administron dhe shqyrton të dhëna për veprime ose mosveprime të punonjësit të strukturave, pavarësisht nga funksioni e grada, duke shfrytëzuar çdo burim të ligjshëm informacioni për:
a) parandalimin, zbulimin dhe hetimin e veprave penale;
b) parandalimin, zbulimin dhe hetimin administrativ të shkeljeve ligjore në përmbushjen e detyrës.
2. Shërbimi mbledh, administron dhe shqyrton të dhëna edhe për:
a) sigurinë e veprimtarisë së Shërbimit dhe strukturave;
b) interesat dhe pasuritë e punonjësve të veçantë të strukturave, kur ka shkaqe të arsyeshme për ekzistencën apo lindjen e një konflikti interesash.
3. Masat për grumbullimin në fshehtësi të të dhënave zbatohen vetëm në qoftë se ato nuk mund të merren në mënyrë tjetër ose nëse marrja e tyre lidhet me vështirësi të ndryshme.
4. Në rastet kur ekzistojnë mundësi të ndryshme për marrjen në fshehtësi të të dhënave duhet të zgjidhet mundësia që cenon sa më pak liritë dhe të drejtat themelore të njeriut.
Neni 39
Kontrolli i dokumenteve dhe evidencave, kërkimi dhe marrja e të dhënave të mbledhura në mënyrë të ligjshme
1. Punonjësi i Shërbimit ka të drejtë të hyjë, të kontrollojë dhe të marrë dokumente, evidenca dhe informacione, në formë të shkruar ose elektronike, në të gjitha zyrat, sekretaritë, kartotekat, arkivat e mjediset e strukturave ose t’i marrë ato nga çfarëdo burim tjetër informacioni, sipas rregullave të miratuara nga ministri.
2. Për nevoja të verifikimit të një informacioni të administruar, për punonjës të veçantë të strukturave, Shërbimi kërkon deklarata për veprimtaritë e jashtme, dypunësimin, investimet, pasuritë dhe dhuratat ose privilegjet, nga të cilat mund të lindë një konflikt interesi për shkak të funksioneve të tyre si nëpunës publik.
3. Organet e administratës shtetërore, personat fizikë e juridikë, në përputhje me legjislacionin në fuqi, paraqesin të dhënat identifikuese dhe informacionet e mbledhura në mënyrë të ligjshme, kur kërkohen nga Shërbimi dhe që i përkasin objektit të veprimtarisë së tij.
Neni 40
Informimi për të dhëna dhe për vepra penale  
1. Shërbimet informative, strukturat dhe policia gjyqësore informojnë Shërbimin për të dhënat për vepra penale të kryera nga persona, subjekte, objekt i punës së këtij Shërbimi. Mënyra e  informimit parashikohet në udhëzimin e përbashkët të drejtuesve të këtyre institucioneve.
2. Kur punonjësit e institucioneve të tjera shtetërore, për shkak të detyrës, vihen në dijeni për përfshirjen në vepra penale të punonjësve të strukturave, janë të detyruar të njoftojnë direkt dhe menjëherë këtë Shërbim.
Neni 41
Paralajmërimi
1. Drejtori i Shërbimit ose personi i autorizuar nga ai ka të drejtë të paralajmërojë  punonjësin e strukturave për shkelje të cilat nuk përbëjnë vepër penale, të konstatuara dhe të provuara nga njësitë që ushtrojnë funksionin e trajtimit të informacionit, duke vënë në dijeni dhe drejtuesin e institucionit.
2. Paralajmërimi ka si qëllim parandalimin e përfshirjes në veprimtari kriminale të punonjësit të strukturave që ka kryer këto shkelje si dhe njohjen e tij me përgjegjësitë që do të mbajë, në rast përsëritjeje të së njëjtës shkelje apo shkeljeve të tjera.
3. Procedurat, kriteret dhe mënyrat e administrimit të paralajmërimit miratohen nga ministri.
Neni 42
Përpunimi i të dhënave personale
Mbledhja, ruajtja, përdorimi dhe komunikimi i të dhënave personale, për qëllime ligjore të Shërbimit, lejohet vetëm për parandalimin e rrezikut real ose të një vepre penale. Gjatë përpunimit të të dhënave respektohen parimet dhe rregullat e përcaktuara nga legjislacioni për mbrojtjen e të dhënave personale.
Neni 43
Arkivi
1. Për përpunimin, ruajtjen dhe shfrytëzimin e dokumenteve të krijuara gjatë veprimtarisë, Shërbimi ka arkivin e vet, i cili krijohet dhe funksionon sipas legjislacionit në fuqi për arkivat.
2. Procesi i klasifikimit, arkivimit dhe deklasifikimit të dokumenteve kryhet sipas legjislacionit në fuqi.
Neni 44
Përcjellja e informacionit
Kur gjatë ushtrimit të procesit informativ dalin informacione për shkelje apo vepra penale të kryera nga subjekte jashtë juridiksionit të punës së Shërbimit, ato i përcillen institucionit kompetent.
Neni 45
Bashkëpunimi me individë  
1. Shërbimi për përmbushjen e përgjegjësive dhe detyrave krijon marrëdhënie bashkëpunimi me individë, të cilët ndihmojnë hetimin e çështjeve konkrete.
2. Procedurat e këtij bashkëpunimi miratohen nga ministri.
3. Personi, që ka pranuar marrëdhënie bashkëpunimi me Shërbimin, është i detyruar të ruajë sekretin e këtij bashkëpunimi dhe të informacioneve të klasifikuara, derisa të përfundojë detyrimi ligjor për ruajtjen e këtij sekreti.
Neni 46
Bashkëpunimi me institucione shtetërore dhe private
Bashkëpunimi me institucionet e tjera të administratës shtetërore rregullohet me udhëzime/marrëveshje/memorandume bashkëpunimi. Shërbimi bashkëpunon me subjektet shtetërore dhe private duke marrë prej tyre asistencën e nevojshme dhe të dhënat që ato disponojnë në regjistrat, bazat e të dhënave dhe në dokumentacionin zyrtar, si dhe aksesin në to sipas legjislacionit në fuqi.
Neni  47
Bashkëpunimi me agjencitë e huaja homologe
1. Shërbimi bashkëpunon me agjencitë e huaja homologe mbi bazën e marrëveshjeve të bashkëpunimit të miratuara nga instancat përkatëse.
2. Marrëveshjet e bashkëpunimit realizohen vetëm me ato agjenci të huaja homologe, struktura e të cilave merr përsipër detyrimin e përpunimit e të ruajtjes të të dhënave, në përputhje me legjislacionin në fuqi, duke siguruar një shkallë të caktuar të mbrojtjes të të dhënave, të barabartë ose në nivel më të lartë se ajo që garantohet në ligjet e shtetit shqiptar.
KREU II
ADMINISTRIMI I ANKESAVE TË PUBLIKUT
Neni 48 
Pranimi i ankesave dhe informacioneve të publikut
1. Çdo person, përfshirë edhe punonjësit e strukturave, mund të depozitojë në Shërbim një ankesë ose informacion që e percepton si shkelje të ligjit, akteve nënligjore e Kodit të Etikës, gjatë ushtrimit të detyrës ose vepër penale të kryer nga punonjësit e strukturave.
2. Shërbimi:
a) realizon kushte teknike dhe administrative, në nivel qendror dhe vendor, për depozitimin e ankesave dhe informacioneve të qytetarëve, subjekteve shtetërore dhe private, në rrugë elektronike, telefonike, postare, verbale dhe çdo rrugë tjetër ligjore;
b) pranon, administron, shqyrton dhe verifikon ankesat dhe informacionet e publikut ndaj punonjësve të strukturave;
c) merr, administron, shqyrton dhe verifikon ankesat dhe informacionet e publikut  ndaj punonjësve të strukturave të publikuara në media, si dhe në çdo formë tjetër të publikimit;
ç) pranon ankesa edhe kur subjekt i ankesës nuk është punonjësi i strukturës, por strukturat e tyre qendrore apo vendore;
d) pranon ankesa për punonjës të institucioneve të tjera, të cilat i dërgohen për vlerësim e trajtim institucionit kompetent.
3. Kur punonjësit e institucioneve të tjera shtetërore, për shkak të detyrës, marrin ankesa dhe informacione në ngarkim të punonjësve të strukturave, janë të detyruar që t’i përcjellin ato në Shërbim.
Neni 49
Vlerësimi i ankesave
1. Ankesat dhe informacionet e publikut ndaj punonjësve të strukturave vlerësohen dhe trajtohen si informacion i ligjshëm i Shërbimit.
2. Ankesat dhe informacionet e publikut ndaj punonjësve të strukturave, sipas përmbajtjes dhe rëndësisë, iu nënshtrohen procedurave inspektuese ose hetimore.
3. Shërbimi gjykon dhe vendos që të mos e vlerësojë dhe ta trajtojë një ankesë apo informacion kur ajo është:
a) pa vlerë;
b) tendencioze;
c) nga një burim anonim dhe e pabazuar në fakte dhe të dhëna konkrete.
4. Kriteret për vlerësimin e ankesave e të informacionit të publikut dhe procedurat për administrimin, trajtimin e shqyrtimin e tyre përcaktohen nga drejtori i Shërbimit.
Neni 50
Informimi për zgjidhjen e ankesës
Shërbimi:
a) krijon regjistrin dhe dosjen e administrimit të ankesave të qytetarëve ndaj punonjësve të strukturave;
b) krijon kushte teknike elektronike, nëpërmjet të cilave ankimuesi të monitorojë fillimin, ecurinë dhe përfundimin e procesit të shqyrtimit të ankesës;
c) në përfundim të verifikimit të një ankese njofton ankuesin me shkrim për mënyrën dhe kohën e zgjidhjes së ankesës, brenda një afati kohor prej 30 ditësh nga data e marrjes së ankesës.
Kreu  III
VEPRIMTARIA HETIMORE
Neni 51
 Atributet e policisë gjyqësore
1. Personeli i Shërbimit, me përjashtim të punonjësve të shërbimeve mbështetëse, në bazë të Kodit të Procedurës Penale dhe ligjit për organizimin dhe funksionimin e policisë gjyqësore, gëzon atributet e policisë gjyqësore.
2. Personeli i shërbimit, që gëzon atributet e policisë gjyqësore, kryen veprimtari procedurale përgjatë të gjitha fazave të procedimit penal, të urdhëruar apo të deleguar nga prokurori ose me nismën e vet, sipas rregullave të Kodit të Procedurës Penale dhe ligjit për organizimin dhe funksionimin e policisë gjyqësore.
3. Punonjësit e Shërbimit, të parashikuar në shkronjën “a”, të nenit 72, të këtij ligji, gëzojnë atributet e agjentit të policisë gjyqësore.
4. Punonjësit e Shërbimit, të parashikuar në shkronjat “b” dhe “c”, të nenit 72, të këtij ligji, dhe të inspektimit, gëzojnë atributet e oficerit të policisë gjyqësore.
5. Agjenti dhe oficeri i policisë gjyqësore, kur vihet në dijeni për vepra penale të kryera nga punonjës të strukturave, ka për detyrë të pengojë ardhjen e pasojave të mëtejshme, të kryejë hetime dhe të grumbullojë gjithçka që i shërben zbatimit të ligjit penal.
Neni 52
Informimi i hetimeve, ndalimeve dhe arrestimeve
Autoritetet me kompetenca të policisë gjyqësore, në rast se kryejnë hetime, ndalime apo arrestime në flagrancë të punonjësve të strukturave, janë të detyruara të njoftojnë menjëherë Shërbimin për të bashkëpunuar.
Neni 53
Mungesa e elementeve të veprës penale
Në qoftë se nga procesi hetimor vërtetohet se nuk ekzistojnë elementet e një vepre penale, por të shkeljes disiplinore apo administrative, shkelja i referohet strukturave për t’iu nënshtruar procesit disiplinor.
Neni 54
Hetimi i shkeljeve
Nëse nga një proces disiplinor rezulton se një punonjës i strukturave ka kryer një shkelje, që përbën vepër penale, materialet i dërgohen Shërbimit, i cili verifikon, vlerëson dhe referon njoftimin për kryerjen e veprës penale në prokurorinë që e ka në kompetencë.
Neni 55
Veprimtaria analitike studimore
1. Mbi bazën e problemeve të verifikuara gjatë procesit të inspektimit dhe hetimit të veprave penale të kryera nga punonjës të veçantë të strukturave, shërbimi kryen analizë studimore dhe bën rekomandime për drejtuesit e tyre për çështje të zbatimit të ligjshmërisë, për parandalimin e shkeljeve gjatë ushtrimit të detyrës së punonjësve të strukturave.
2. Kjo veprimtari kryhet sipas një programi të miratuar nga drejtori i Shërbimit.
Neni 56
Mbajtja e armës dhe mjeteve të përdorimit të forcës 
1. Të drejtën e mbajtjes së armës e gëzon personeli operacional dhe ai që i lejohet të mbajë armë, sipas ligjit për armët.
2. Në raste të veçanta, ky personel, përveç armatimit, ka të drejtë të mbajë edhe mjete të tjera të përdorimit të forcës dhe të mbrojtjes.
3. Llojet e armatimit dhe të mjeteve të tjera të përdorimit të forcës nga Shërbimi përcaktohen me urdhër të ministrit.
4. Punonjësi e përdor armatimin dhe mjetet e forcës në përputhje me legjislacionin në fuqi për përdorimin e armëve.
Neni 57
Dokumenti i identifikimit
1. Punonjësi i Shërbimit pajiset me dokument identifikimi, që shërben si dëshmi dhe autorizim për të vepruar në emër të Shërbimit.
2. Punonjësi i Shërbimit pajiset me dokument identifikimi, vetëm nëse ka përfunduar me sukses periudhën e trajnimit dhe të vlerësimit.
3. Në raste të kryerjes së teknikave speciale të hetimit, punonjës të caktuar të Shërbimit kanë të drejtë të përdorin identitete të rreme. Procedura për marrjen e këtij identiteti rregullohet me urdhër të ministrit.
4. Forma, të dhënat dhe rregullat për përdorimin e dokumentit të identifikimit përcaktohen me urdhër të ministrit.
KREU IV
TESTI I INTEGRITETIT
Neni 58
Testi i integritetit
1. Shërbimi, në funksion të objektit të veprimtarisë së tij, kryen testin e integritetit për verifikimin e etikës dhe integritetit të një punonjësi të strukturave.
2. Testi i integritetit kryhet mbi bazën e një programi udhëzues specifik për zhvillimin, ekzekutimin, llogaridhënien dhe dokumentimin e tij.
3. Rregullat dhe procedurat për përgatitjen e kryerjen e testit të integritetit përcaktohen me udhëzim të ministrit.
Neni 59
Qëllimi i testit të integritetit
Testi i integritetit ka si qëllim:
a) të ruajë etikën dhe integritetin e punonjësve të strukturave në funksion të standardeve profesionale e etike;
b) të parandalojë korrupsionin në radhët e punonjësve të strukturave;
c) të rritë cilësinë e shërbimeve të ofruara nga këto struktura.
Neni 60
Vlerësimi i programit
1. Për të siguruar zbatimin e ligjshmërisë, integrimin e veprimtarisë së Shërbimit me strukturat, parimet e objektivave dhe zhvillimin e mëtejshëm të programeve të testit të integritetit, krijohet Komisioni Mbikëqyrës i Programit.
2. Përbërja e këtij komisioni përcaktohet me urdhër të ministrit.
3. Në Komisionin e Mbikëqyrjes së Programit merr pjesë 1(një) prokuror.
KREU V
VEPRIMTARIA INSPEKTUESE  
Neni 61
Inspektimi
1. Shërbimi kryen veprimtari inspektuese në përputhje me këtë ligj, Kodin e Procedurës Administrative dhe me aktet e tjera ligjore e nënligjore në fuqi.
2. Procedurat e kryerjes së inspektimeve miratohen nga ministri.
Neni 62
Ushtrimi i kompetencave
1. Veprimtaria inspektuese ushtrohet nga njësia inspektuese nëpërmjet formave të ndryshme të kontrollit: vëzhgimit, auditit, verifikimit, testimit dhe analizës.
2. Njësia e inspektimit ka të drejtën e hetimit administrativ dhe gëzon atributet e  policisë gjyqësore.
3. Përfundimet e inspektimit, kur nuk ekzistojnë elementet e një vepre penale, si dhe rekomandimet për vendimmarrje, i referohen për kompetencë drejtuesve të strukturave.
Neni 63
Fushat e zbatimit të inspektimit
Veprimtaria inspektuese ka për qëllim të kontrollojë zbatimin e ligjshmërisë për përmbushjen e detyrave, administrimit të pronës, pajisjeve e teknologjisë, si dhe burimeve njerëzore dhe financiare.
Neni 64
Natyra e inspektimeve
1. Shërbimi kryen inspektime të planifikuara dhe të paplanifikuara.
2. Inspektim i planifikuar është inspektimi që kryhet në bazë të programit të miratuar në çdo fillim viti nga drejtori i Shërbimit, ku parashikohen strukturat që do t’i nënshtrohen inspektimit.
3. Inspektimi i paplanifikuar është ai inspektim që kryhet jashtë programit të miratuar të Shërbimit, për të cilin nevojitet autorizimi përkatës i drejtorit të Shërbimit.
Neni 65
Arritja e qëllimit të veprimtarisë së inspektimit
Qëllimet e veprimtarisë së inspektimit arrihen nëpërmjet:
a) vlerësimit të respektimit të ligjshmërisë nga subjekti i inspektimit;
b) këshillimit të subjektit të inspektuar për zbatimin sa më korrekt të ligjshëmrisë;
c) urdhërimit të korrigjimit të shkeljeve të ligjshmërisë dhe eliminimit të pasojave që rrjedhin prej tyre;
ç) procedimit dhe hetimit administrativ, referimit të çështjes pranë drejtuesve të strukturave, shoqëruar me rekomandimin për procedim disiplinor dhe marrjen e masave të tjera administrative për shmangien e rreziqeve dhe eliminimin e pasojave që rrjedhin nga shkeljet e ligjshëmrisë.
Neni 66
Mirëkuptimi me strukturën që inspektohet
1. Me marrjen e autorizimit me shkrim, titullari i strukturës, ku bëhet inspektimi, krijon kushte pune dhe udhëzon personelin të japë ndihmesë të plotë për punonjësit e inspektimit të Shërbimit.
2. Pengimi i inspektimit, kur nuk përbën vepër penale, konsiderohet shkelje e rëndë e disiplinës dhe i nënshtrohet procesit të ecurisë disiplinore.
Neni 67
Të drejta të tjera të inspektimit
Njësia e inspektimit, brenda objektit dhe qëllimit të inspektimit, ka edhe këto të drejta:
a) Të kryejë fotografime, filmime apo fotokopjime me mënyra e mjete të tjera teknike për çështje që lidhen me veprimtarinë e subjektit të inspektimit;
b) Të inspektojë çdo dokument apo regjistrim të nevojshëm për verifikimin e respektimit të kërkesave ligjore, përfshirë edhe ato të ruajtura, të krijuara apo të mbajtura në format elektronik apo çdo teknikë tjetër;
c) T’i kërkojë subjektit të inspektimit apo punëmarrësve të tij të kryejnë të gjitha veprimet e nevojshme për të lehtësuar inspektimin;
ç) Të administrojë çdo mjet tjetër prove sipas Kodit të Procedurave Administrative.
Neni 68
Pranimi i rekomandimeve
Drejtuesit e strukturave pranojnë çdo rekomandim të Shërbimit që lidhet me politikat e menaxhimit e të performancës së strukturave dhe përgjigjen me shkrim duke përshkruar veprimet që do të ndërmerren për të shënuar progres për problemin apo dobësitë e vërejtura nga Shërbimi.
Neni 69
Publikimi i raporteve të inspektimit dhe raportit vjetor të shërbimit
1. Raportet e inspektimet dhe procedimet penale pas përfundimit të gjykimit publikohen në faqen e internetit të Shërbimit me rekomandimet përkatëse për strukturat.
2. Në fund të çdo viti kalendarik, drejtori i Shërbimit publikon një raport vjetor për veprimtarinë e Shërbimit, i cili përmban:
a) performancën e Shërbimit në realizimin e përgjegjësive;
b) treguesit e nivelit të korrupsionit dhe shkeljeve të rënda në strukturat;
c) numrin e ankesave të marra dhe të zgjidhura;
ç) përfundimet dhe rekomandimet kryesore në lidhje me funksionet e kompetencat e Shërbimit, si dhe tregues të marrjes në konsideratë të tyre nga ana e drejtuesve të strukturave.
3. Drejtori i Shërbimit, me autorizim të ministrit, organizon takime publike me median, ku paraqet pikat kyçe të raportit vjetor, si dhe informon për çështje të nevojshme që lidhen me aktivitetin e Shërbimit.
PJESA E KATËRT
KLASIFIKIMI I PERSONELIT NË SHËRBIM
KREU I
GRADAT NË SHËRBIM
Neni 70
Gradat 
1. Të drejtën e përfitimit dhe mbajtjes së gradës e ka personeli operacional.
2. Rendi i gradave dhe i funksioneve në Shërbim shkallëzohet nga më e ulëta në më të lartën, sipas lidhjeve e varësive që kanë ndërmjet tyre.
3. Nivelet pasqyrojnë nivelin e organizimit, drejtimit, kontrollit dhe kryerjes së detyrave në Shërbim, si dhe tregojnë pozitën e tyre në të gjithë strukturën organizative të Shërbimit.
Neni 71
Sistemi i gradave dhe karriera
1. Sistemi i gradave përcakton hierarkinë, nivelet e administrimit, si dhe pasqyron marrëdhëniet ndërmjet funksioneve në Shërbim.
2. Karriera e shprehur me hierarkinë e gradave dhe të funksioneve është rendi i përgjegjësive të punonjësve të Shërbimit sipas arsimimit, kualifikimit, aftësive drejtuese e profesionale, rezultateve dhe vjetërsisë në punë.
3. Sistemi i gradave sipas këtij ligji, emërtimet dhe mbajtja e tyre janë e drejtë vetëm e Shërbimit.
Neni 72
Emërtimi i gradave 
1. Emërtimet e gradave në Shërbim sipas niveleve dhe ecurisë në karrierë janë:
a) Niveli zbatues:
i. asistent;
ii. asistent i parë;
iii. kryeasistent.
b) Niveli i parë drejtues:
i. hetues;
ii. hetues i parë;
iii. kryehetues.
c) Niveli i mesëm drejtues:
i. drejtues i Shërbimit;
ii. drejtues i parë i Shërbimit.
ç) Niveli i lartë drejtues:
             i.  Zëvendësdrejtor i Përgjithshëm i Shërbimit;
               ii. drejtor i Përgjithshëm i Shërbimit.
2. Gradat e punonjësve të Shërbimit ekuivalentohen me gradat e punonjësve të Policisë së Shtetit. Marrja e gradës, procedurat për ecurinë në karrierë dhe në gradë janë të njëjta me ato të ligjit për gradat në Policinë e Shtetit.
3. Tabela e funksioneve që i përgjigjet çdo grade, paga për gradë, si dhe ekuivalentimi për efekt pagese dhe karriere me gradat e Policisë së Shtetit bëhen me vendim të Këshillit të Ministrave.
Neni 73
Ulja në gradë dhe funksion
1. Kur shkurtohet numri i funksioneve organike për gradë për shkak të ndryshimeve në strukturën organizative të Shërbimit, punonjësi i Shërbimit i nivelit të parë dhe të mesëm drejtues, që mban gradën që i përket funksionit organik që do të shkurtohet, mund të kërkojë, në mënyrë vullnetare, uljen një gradë më poshtë kur ka vende të lira.
2. Me krijimin e vendeve të lira për gradë, punonjësi i Shërbimit, që ka kërkuar uljen në gradë, rimerr brenda 2 vjetëve gradën e mëparshme, sipas të njëjtit kusht, të përcaktuar në pikën 1, të këtij neni, për të njëjtin funksion që ka pasur ose në një funksion të barasvlefshëm me të.
3. Në rastet e riorganizimit strukturor të Shërbimit, për mungesë funksioni organik që nuk përputhet me gradën që mban punonjësi, me pëlqimin e punonjësit, atij i krijohet mundësia e kryerjes së shërbimit në një funksion më të ulët duke mbajtur gradën që ka, por jo më shumë se 1 vit.
4. Lejohet një mospërputhje gradë-funksion në Shërbim deri në masën 10 % të personelit të sistemit të gradave.
Neni 74
Ruajtja e gradës
1. Punonjësi i Shërbimit, që punësohet në struktura të tjera të administratës shtetërore apo në një organizatë ndërkombëtare në funksione që kanë objekt të punës çështje me natyrë të ngjashme me ato të Shërbimit, rikthehet në të njëjtën gradë, që mbante në çastin e lirimit dhe kjo periudhë i llogaritet vjetërsi për efekt gradimi.
2. Punonjësit, që lirohen nga detyra, veç rasteve të përjashtimit nga detyra, gëzojnë të drejtën e gradës që kishin në çastin e daljes në lirim.
KREU II
KLASIFIKIMI I PERSONELIT PA GRADË TË SHËRBIMIT
Neni 75
Personeli pa gradë
1. Klasifikimi i pozicioneve të personelit pa gradë të Shërbimit bëhet sipas klasifikimit të pozicioneve për shërbimin civil dhe ndahet në këto nivele:
a) Punonjës të nivelit të mesëm drejtues;
b) Punonjës të nivelit të ulët drejtues;
c) Punonjës të nivelit ekzekutiv;
ç)  Punonjës të nivelit zbatues.
2. Klasifikimi i pozicioneve brenda niveleve, sipas funksioneve, bëhet me vendim të Këshillit të Ministrave.
PJESA E PESTË
MARRËDHËNIA E PUNËS DHE DISIPLINA NË SHËRBIM  
KREU I
 PRANIMI NË SHËRBIM
Neni 76
Kritere të përgjithshme të pranimit në Shërbim
Personi që ka të drejtë të konkurrojë, për t’u pranuar si punonjës i Shërbimit, duhet:
a) të jetë shtetas shqiptar;
b) të ketë zotësi të plotë për të vepruar;
c) të përmbushë kërkesat për nivelin arsimor sipas vendit të punës;
ç)  të përmbushë kërkesat për përvojën e nevojshme në punë sipas vendit të punës;
d) të përmbushë kërkesat për njohuri të posaçme profesionale sipas funksionit;
dh) të jetë në gjendje të mirë shëndetësore, sipas një dokumenti mjekësor të miratuar;
e) të jetë i aftë fizikisht për të kryer detyrën, sipas rregullave të testimit të miratuar;
ë) të japë informacionin e kërkuar për punën e tij të mëparshme ose ndonjë çështje tjetër, që lidhet me pranimin e tij në shërbim;
f) të mos jetë dënuar me vendim gjyqësor të formës së prerë për një vepër penale të kryer me dashje. Në rast se personi është dënuar për një vepër penale të kryer nga pakujdesia, duhet të vlerësohen pasojat dhe rrethanat e kryerjes;
g) të mos jetë marrë masa disiplinore e largimit nga detyra shtetërore gjatë shtatë viteve të fundit.
Neni 77
Kriteret e arsimit sipas natyrës punës
1. Punonjësi  i Shërbimit në nivelin e parë dhe të mesëm drejtues duhet të jetë me arsim të lartë profesional, si më poshtë vijon:
a) Personeli operacional: arsimi i lartë policor, niveli i dytë juridik;
b) Personeli pa gradë: niveli i dytë juridik, ekonomik, financë, informatikë ekonomike dhe inxhinieri elektronike.
2. Punonjësit e Shërbimit të shërbimeve mbështetëse në nivelin zbatues duhet të jenë me arsim të mesëm, të përgjithshëm ose profesional.
Neni 78
Përvoja në punë
1. Punonjësit para se të pranohen në Shërbim në strukturat operacionale, duhet të kenë përvojë pune jo më pak se 3 (tre) vjet në shërbime të specifikuara, si më poshtë vijon:
a) Strukturat e hetimit të Prokurorisë;
b) Strukturat e hetimit të krimit të Policisë së Shtetit;
c) Shërbimet me kompetenca të policisë gjyqësore;
ç)  Strukturat informative të SHISH-it;
d) Strukturat e inspektimit të shërbimit, pasi të kenë kryer trajnimin përkatës për vendin e punës.
2. Punonjësit, para se të pranohen në Shërbim në strukturat e inspektimit dhe shërbimeve mbështetëse, duhet të kenë përvojë pune jo më pak se 2 (dy) vjet në shërbime të specifikuara, si më poshtë vijon:
a) Punonjësit e inspektimit: në administratën shtetërore me natyrë të ngjashme pune, sipas vendit të punës.
b) Punonjësit e shërbimeve mbështetëse: në administratën shtetërore;
c) Punonjësit e financës: në administratën shtetërore, në fushën e  menaxhimit financiar ose të financave publike.
Neni 79
Pranimi i drejtpërdrejtë
Për punonjësit e nivelit zbatues me specialitet të veçantë në punë, pranimi kryhet pa konkurrim, me urdhër të drejtorit të Shërbimit.
Neni 80
Kërkesa të posaçme për pranim
1. Punonjësit, që punësohen në Shërbim, krahas kërkesave të mësipërme, duhet të plotësojnë kushtet për t’u pajisur me certifikatë sigurie për njohjen e informacionit të klasifikuar “Sekret shtetëror”.
2. Kur punonjësi nuk i plotëson këto kushte, Shërbimi nuk është i detyruar të japë sqarime.
Neni 81
Procesi i konkurrimit
1. Pranimi në Shërbim bëhet nëpërmjet një procesi të hapur konkurrimi, në bazë të vendeve të lira të punës. Shpallja e vendit të lirë të punës botohet në dy gazeta kombëtare me tirazh të madh. Pranimi kalon në fazat e shqyrtimit dhe të verifikimit paraprak të dokumentacionit, të testimit me shkrim, të intervistës me gojë dhe të verifikimit të figurës.
2. Personi, që pranohet në Shërbim, nënshkruan ditën e parë të punës një kontratë, në përmbajtjen e së cilës ekzistojnë sanksione në rastet e refuzimit për të shkuar në vendin ku është caktuar të shërbejë.
3. Kriteret e veçanta për pranimin në punë, përbërja e komisionit të testimit, procedura e zhvillimit të konkursit dhe rastet e zhvillimit të procedurave të pranimit pa konkurrim përcaktohen në rregulloren e personelit.
Neni 82
Trajnimi, shkollimi dhe kualifikimet jashtë shtetit
1. Kandidati, i cili përzgjidhet për t’u pranuar si punonjës i Shërbimit, duhet të kryejë trajnimin përkatës sipas vendit të punës.
2. Kriteret për trajnimin e punonjësve të Shërbimit përcaktohen në rregulloren e personelit.
3. Mbi bazën e marrëveshjeve të nënshkruara nga drejtori i Shërbimit me drejtorin e Përgjithshëm të Policisë së Shtetit dhe drejtorin e Shërbimit Informativ të Shtetit përcaktohen procedurat e përfshirjes në trajnimet e organizuara pranë institutit të SHISH-it dhe Institucionit Arsimit Policor.
4. Njohja dhe ekuivalentimi i shkollimeve të kryera jashtë shtetit bëhen në përputhje me ligjin për arsimin e lartë.
5. Njohja dhe ekuivalentimi i trajnimeve policore të kryera jashtë shtetit bëhet me urdhër të ministrit.
Neni 83
Vlerësimi i punës
1. Vlerësimi i rezultateve individuale të punës së punonjësit të Shërbimit bëhet një herë në vit, si dhe në rastet e përfundimit të periudhës së provës, transferimit dhe përjashtimit nga ky shërbim.
2. Punonjësi i Shërbimit mund të vlerësohet në një nga këto nivele:
a) “shumë mirë”;
b) “mirë”;
c) “kënaqshëm”;
ç)  “dobët”.
3. Procedurat dhe kriteret e vlerësimit të punës përcaktohen në rregulloren e personelit.
Neni 84
Periudha e provës
1. Punonjësi që punësohet në Shërbim i nënshtrohet një periudhe prove, që zgjat 1 (një) vit nga data e emërimit. Gjatë kësaj periudhe ai është nën kujdesin e një punonjësi me stazh në punë dhe vlerësohet nga eprori më i afërt i tij. Kërkesat për kryerjen e detyrës gjatë periudhës së provës përcaktohen nga drejtori i Shërbimit.
2. Punonjësi në periudhë prove mund të kryejë detyrat funksionale vetëm nën mbikëqyrjen e një specialisti që ka kaluar testimin fillestar, i cili mbikëqyr veprimet e punonjësit në periudhë prove dhe nënshkruan çdo akt të tij. Nënshkrimi është kusht për vlefshmërinë e aktit.
3. Në fund të periudhës së provës, me propozimin e eprorit direkt, drejtori i Shërbimit vendos:
a) konfirmimin si punonjës i Shërbimit, kur personi vlerësohet i aftë për të marrë përsipër realizimin e detyrës;
b) lirimin si punonjës i Shërbimit, kur personi vlerësohet i paaftë për të marrë përsipër realizimin e detyrës. Paaftësia duhet të konfirmohet nga njësia që ka kryer kontrollin dhe inspektimin e punës së këtij personi.
4. Vlerësimi i punës për punonjësit në periudhë prove bëhet një herë në gjashtë muaj.
Neni 85
Transferimi dhe komandimi 
1. Personi, i emëruar në Shërbim në përputhje me gradën/funksionin që ka, mund të caktohet me shërbim kudo, brenda territorit të vendit.
2. Transferimi bëhet gjithmonë për pozicione të cilat janë brenda drejtimit të punës së tyre dhe me kusht që, në këtë rast, për këto pozicione kërkohet e   njëjta gradë/i njëjti funksion.
3. Punonjësi i Shërbimit, për nevoja pune, mund të komandohet me urdhër të drejtorit të Shërbimit për një periudhë jo më tepër se gjashtë muaj ose deri në përfundimin e çështjes.
4. Gjatë kohës së komandimit, punonjësit i ruhet vendi i punës ku merr edhe pagën.
5. Në rastet e komandimit jashtë vendbanimit, punonjësi i komanduar përfiton dietë, sipas legjislacionit në fuqi.
Neni 86
Dorëheqja
1. Punonjësi i Shërbimit mund të njoftojë përfundimin e marrëdhënies në shërbim nëpërmjet paraqitjes së dorëheqjes me shkrim në njësinë e burimeve njerëzore të Shërbimit.
2. Dorëheqja nuk motivohet dhe i prodhon efektet 30 ditë nga data e paraqitjes së saj.
3. Në raste të justifikuara, me kërkesë të motivuar të punonjësit dhe me miratimin e njësisë së përcaktuar sipas pikës 1, të këtij neni, dorëheqja i prodhon efektet përpara afatit 30-ditor nga njoftimi.
Neni 87
Pezullimi nga Shërbimi
1. Punonjësi i Shërbimit pezullohet me urdhër të drejtorit të Shërbimit, kur ndaj tij:
a) fillon ndjekja penale, deri në marrjen e një vendimi të formës së prerë;
b) ka filluar ecuria disiplinore vetëm për shkeljet e rënda disiplinore dhe ka arsye të besohet se vazhdimi i ushtrimit të detyrës pengon hetimin administrativ apo mund të cenojë ushtrimin e përshtatshëm të detyrës. Në këtë rast, afati i pezullimit dhe shtyrja e afatit përcaktohen nga drejtori i Shërbimit.
2. Në rastet e pushimit të çështjes ose marrjes së pafajësisë, punonjësi duhet t’i nënshtrohet ecurisë disiplinore, sipas nenit 95 e në vijim të këtij ligji. Gjatë periudhës së pezullimit punonjësi trajtohet me pagën bazë.
3. Në rast se pas shqyrtimit të çështjes rezulton se punonjësi nuk ka bërë shkelje penale ose disiplinore, ai rifiton të gjitha të drejtat.
4. Në rast se pas shqyrtimit të çështjes rezulton se punonjësi ka bërë shkelje penale ose disiplinore, periudha e kohës së pezullimit nga detyra njihet si vjetërsi shërbimi vetëm për efekt të sigurimeve shoqërore.
Neni 88
Lirimi dhe përjashtimi nga Shërbimi
1. Një punonjës i Shërbimit lirohet nga detyra, kur:
a) deklarohet i paaftë nga ana shëndetësore, me vendim të komisionit mjeko-ligjor;
b) i shkurtohet funksioni organik dhe nuk mund të sistemohet në një funksion tjetër për të njëjtën gradë brenda këtij shërbimi, si dhe nuk pranon uljen në gradë apo në funksion, kur ka mundësi sistemimi;
c) punësohet në struktura të tjera të administratës shtetërore;
ç)  mbush moshën për pension të plotë pleqërie;
d) mbush moshën për pension të parakohshëm dhe kërkon të largohet nga ky shërbim;
dh)  pas dy vlerësimeve “jokënaqshëm” radhazi të rezultateve në punë;
e) zbulohen raste të papajtueshmërisë së funksionit të tij;
ë)  kërkon të lirohet me dëshirën e tij.
2. Një punonjës i Shërbimit përjashtohet nga shërbimi, kur:
a) dënohet me vendim gjyqësor të formës së prerë;
b) ndaj tij merret masa disiplinore e përjashtimit nga Shërbimi, pasi nga ecuria disiplinore është provuar një nga shkeljet e mëposhtme:
i. shkelje e dispozitave të këtij ligji apo akteve të tjera ligjore;
ii. shkelje të betimit;
iii. prishje e imazhit të Shërbimit, duke manifestuar veprime e mosveprime, që bien ndesh me moralin dhe etikën e Shërbimit;
iv. kryerje veprimtarie që krijon konflikt interesash;
v. mungesë në detyrë pa arsye për më shumë se 7 ditë rresht.
3. Në rast se punonjësi dënohet për një vepër penale të kryer nga pakujdesia, vlerësohen pasojat dhe rrethanat e kryerjes së veprës, sipas përcaktimeve të bëra për rrethanat lehtësuese në Kodin Penal.
4. Lirimi dhe përjashtimi i punonjësit të Shërbimit bëhen me urdhër të drejtorit të  Shërbimit.
Neni 89
E drejta e punësimit në strukturat
Punonjësi operacional i Shërbimit, kur ndërpret marrëdhëniet me Shërbimin, me përjashtim të rasteve të përjashtimit nga detyra, si dhe në kuadrin e implementimit të këtij ligji, si dhe kur plotëson kushtet për punësim, ka të drejtë të punësohet në strukturat, në përputhje me arsimin dhe kualifikimin, përvojën në punë dhe kërkesa të tjera ligjore.
Neni 90
Ripranimi në Shërbim
Një punonjës i Shërbimit, i liruar sipas shkronjave “b” dhe “c”,  të pikës 1, të nenit 92, të këtij ligji, mund të ripranohet në Shërbim kur krijohen vende të lira në pozicionin për të cilin ai ka kualifikimin e duhur, duke iu nënshtruar procesit të konkurrimit për pranim në Shërbim.
KREU II
DISIPLINA NË SHËRBIM
Neni 91
Masat disiplinore
1. Çdo veprim ose mosveprim i kryer me faj nga punonjësi i Shërbimit, kur nuk përbën vepër penale, që bie në kundërshtim me rregulloren e disiplinës, vlerësohet shkelje disiplinore e punonjësit të Shërbimit.
2. Shkeljet disiplinore në shërbim ndahen në shkelje të lehta dhe shkelje të rënda të disiplinës, të cilat përcaktohen në rregulloren e disiplinës.
3. Masat për shkeljet disiplinore jepen sipas një procedure administrative, e cila garanton të drejtën për t’u vënë në dijeni, për t’u dëgjuar, për t’u mbrojtur dhe për t’u ankuar.
Neni 92
Llojet e masave disiplinore
1. Shkeljet ligjore dhe mospërmbushja e rregullt e detyrës ndëshkohen deri në përjashtim nga Shërbimi. Përveç shkeljeve më të rënda, dhënia e masave disiplinore duhet të jetë e përshkallëzuar.
2. Llojet e masave disiplinore, veç masave paraprake, të shprehura në rregulloren e disiplinës për personelin me gradë të Shërbimit, janë:
a) vërejtje;
b) vërejtje me shkrim;
c) gjobë, në masën sa paga e punonjësit nga pesë deri në pesëmbëdhjetë ditë pune;
ç)  shtyrje e afatit të gradimit edhe për 12 muaj;
d) ulje në gradë, pa të drejtë konkurrimi për ngritje në gradën e mëparshme për 2 (dy) vjet;
dh)  ulje në funksion;
e) përjashtim nga Shërbimi.
3. Llojet e masave disiplinore, veç masave paraprake, të shprehura në rregulloren e disiplinës për personelin civil të Shërbimit, janë ato të përcaktuara në ligjin për shërbimin civil.
4. Masa disiplinore e dhënë duhet të jetë në përputhje me shkeljen e kryer dhe me pasojat e ardhura prej saj.
5. Ankimimi në gjykatë nuk pezullon ekzekutimin e masës disiplinore.
6. Efektet e masës disiplinore fillojnë pasi të ketë përfunduar procesi disiplinor, ku përfshihen procedurat përkatëse të apelimit dhe pasi të jetë dhënë vendimi përfundimtar.
Neni 93
Shuarja e masës disiplinore
1. Masat disiplinore shuhen nga 1 (një) deri në 7 (shtatë) vjet, sipas afateve të përcaktuara në rregulloren e disiplinës, ndërsa:
a) masa e uljes në gradë shuhet në çastin e rifitimit, pas konkurrimit të gradës së mëparshme;
b) masa e “përjashtimit nga shërbimi” shuhet pas 7 (shtatë vjetësh), por vendimi i përjashtimit nga shërbimi qëndron përgjithmonë në dosjen personale të ish-punonjësit.
2. Pas kalimit të periudhave të përcaktuara në pikën 1, të këtij neni, i gjithë dokumentacioni që lidhet me masat disiplinore vendoset në qendrën e të dhënave të njësisë së personelit dhe ruhet gjatë gjithë kohës së punës të punonjësit.
Neni 94
Rregullorja e disiplinës
Kategoritë dhe llojet e shkeljeve disiplinore, kriteret, rregullat, procedurat dhe dokumentacioni për dhënien e masave disiplinore, si dhe përbërja, mënyra e organizimit dhe e funksionimit të komisionit të apelimit të punonjësve të Shërbimit përcaktohen në rregulloren e disiplinës, të miratuar nga Këshilli i Ministrave.
Neni 95
Hetimi i pavarur i sjelljes së punonjësit të Shërbimit
1. Procedurat për hetimin e ankesave ndaj punonjësve të Shërbimit parashikohen në rregulloren e disiplinës.
2. Kur shkelja përbën vepër penale, hetohet nga zyra e prokurorisë që e ka në juridiksion.
PJESA E GJASHTË
DISPOZITA KALIMTARE DHE TË FUNDIT
Neni 96
Dispozita kalimtare dhe nxjerrja e akteve nënligjore
1. Trajtimi i marrëdhënieve të punës dhe trajtimi ekonomiko-financiar i punonjësve të Shërbimit në karrierë, edhe pas ndërprerjes së saj, deri në miratimin e akteve nënligjore përkatëse, të parashikuara në këtë ligj, bëhet sipas dispozitave ekzistuese.
2. Ngarkohet Këshilli i Ministrave të nxjerrë aktet nënligjore në zbatim të neneve 7, pika 1, 9, pika 3, 21, pika 5,  24, pika 3, 33, pika 5, 34, pika 6, 35, pika 2, 36, pika 1, 72, pika 3, 75, pika 2, dhe 94, të këtij ligji, brenda 6 muajve nga data e hyrjes në fuqi të tij.
3. Ngarkohet ministri të nxjerrë aktet nënligjore në zbatim të neneve 7, pika 2, 11, pika 2, 36, pika 2, 37, pika 3, 39, pika 1, 40, pika 1, 41, pika 3, 45, pika 2, 56, pika 3, 57, pikat 3 e 4, 58, pika 3, 60, pika 2, 61, pika 2, dhe 82, pika 5, të këtij ligji.
4. Aktet nënligjore të nxjerra para datës së hyrjes në fuqi të këtij ligji dhe që nuk bien në kundërshtim me këtë ligj do të zbatohen deri në nxjerrjen e akteve nënligjore në zbatim të këtij ligji.
5. Implementimi i këtij ligji dhe rregullimi i raporteve të personelit pa gradë dhe personelit me gradë do të kryhet brenda 2 (dy) vjetësh nga data e hyrjes në fuqi të këtij ligji.
Neni 97
Shfuqizime
1. Ligji nr.10002, datë 6.10.2008, “Për Shërbimin e Kontrollit të Brendshëm në Ministrinë e Brendshme”, shfuqizohet.
2. Aktet nënligjore, të nxjerra në zbatim të ligjit nr.10002, datë 6.10.2008, “Për Shërbimin e Kontrollit të Brendshëm në Ministrinë e Brendshme”, shfuqizohen brenda 6 (gjashtë) muajve nga data e hyrjes në fuqi të këtij ligji.
Neni 98
Hyrja në fuqi
Ky ligj hyn në fuqi 15 ditë pas botimit në “Fletoren zyrtare”.
K R Y E T A R I
ILIR META
***

V E N D I M

PËR

PROPOZIMIN E PROJEKTLIGJIT “PËR KARRIERËN USHTARAKE NË FORCAT E ARMATOSURA TË REPUBLIKËS SË SHQIPËRISË”

Në mbështetje të neneve 81, pika 1, dhe 100, të Kushtetutës, me propozimin e ministrit të Mbrojtjes, Këshilli i Ministrave

V E N D O S I:

Propozimin e projektligjit “Për karrierën ushtarake në Forcat e Armatosura të Republikës së Shqipërisë”, për shqyrtim e miratim në Kuvendin e Republikës së Shqipërisë, sipas tekstit dhe relacionit që i bashkëlidhen këtij vendimi.

Ky vendim hyn në fuqi menjëherë.

K R Y E M I N I S T R I 

EDI RAMA

***

P R O J E K T L I GJ

PËR

 KARRIERËN USHTARAKE NË FORCAT E ARMATOSURA TË REPUBLIKËS SË SHQIPËRISË

Në mbështetje të neneve 78 dhe 83, pika 1, të Kushtetutës, me propozimin e Këshillit të Ministrave, Kuvendi i Republikës së Shqipërisë

V E N D O S I:

Neni 1
Objekti

Objekt i këtij ligji është përcaktimi i sistemit të menaxhimit të karrierës ushtarake në Forcat e Armatosura të Republikës së Shqipërisë.

Neni 2
Qëllimi

Ky ligj ka për qëllim përcaktimin e kritereve për pranimin në Forcat e Armatosura, rendin e gradave, përparimin në gradë dhe karrierë, ndërprerjen e karrierës ushtarake, si dhe të autoriteteve përgjegjëse për zhvillimin e karrierës në Forcat e Armatosura.

Neni 3
Subjektet 

Subjekte të këtij ligji janë ushtarakët aktivë të Forcave të Armatosura të Republikës së Shqipërisë, studentët ushtarakë, si dhe ushtarakët në rezervë.

Neni 4
Juridiksioni territorial

Ky ligj zbatohet në të gjithë territorin e Republikës së Shqipërisë, si dhe jashtë territorit të saj për ushtarakët shqiptarë kur ata janë dërguar me mision, shërbim, studime, stërvitje të përbashkëta, mision diplomatik ose në bazë të marrëveshjeve ndërkombëtare dy- ose shumëpalëshe.

Neni 5
Përkufizime

Në kuptim të këtij ligji, me termat e mëposhtëm nënkuptohen:

1.    “Ushtarak aktiv i Forcave të Armatosura”, shtetasi shqiptar i titulluar oficer, nënoficer, ushtar nga autoriteti kompetent, që bën betimin ushtarak dhe shërben në Ministrinë e Mbrojtjes dhe në Forcat e Armatosura.

2.    “Ushtarak në rezervë”, ushtaraku që ka shërbyer në Forcat e Armatosura dhe, pasi ndërpret karrierën ushtarake aktive, përfshihet në strukturat rezervë të Forcave të Armatosura.

3.    “Ushtarak në lirim”, ushtaraku që ka shërbyer në Forcat e Armatosura dhe, pasi ndërpret karrierën ushtarake aktive, nuk përfshihet në strukturat rezervë të Forcave të Armatosura.

4.    “Oficer aktiv i Forcave të Armatosura”, ushtaraku i titulluar si i tillë me urdhër të ministrit të Mbrojtjes.

5. “Nënoficer aktiv i Forcave të Armatosura”, ushtaraku i titulluar si i tillë me urdhër të Shefit të Shtabit të Përgjithshëm të Forcave të Armatosura.

6. “Ushtar/detar aktiv i Forcave të Armatosura”, ushtaraku i titulluar si i tillë me urdhër të Shefit të Shtabit të Përgjithshëm të Forcave të Armatosura.

7. “Student ushtarak”, shtetasi shqiptar që është përzgjedhur për t’u arsimuar në institucionet e përgatitjes së oficerëve të rinj, brenda ose jashtë vendit dhe ka bërë betimin ushtarak.

8. “Kursant”, shtetasi shqiptar:

a) kandidat për oficer aktiv pas përfundimit minimalisht të ciklit të parë të studimeve të larta, brenda ose jashtë vendit, dhe që ndjek kursin përkatës ushtarak në institucionet arsimore ushtarake;
b)    kandidat për ushtar i cili është shpallur fitues pas procedurave të rekrutimit nga institucioni përkatës dhe ndjek kurset për t’u certifikuar për ushtar.

9. “Gradë ushtarake”, titulli dhe shenja që mban ushtaraku i Forcave të Armatosura në uniformën ushtarake.

10. “Gradë për specialitete”, kategoria e gradave ushtarake, e cila u jepet ushtarakëve të profesioneve specifike.

11. “Epror”, ushtaraku i cili, në bazë të gradës apo funksionit, ushtron autoritet mbi ushtarakët vartës.

12.  “Vartës”, ushtaraku, i cili është nën autoritetin e një ushtaraku që ka gradë apo funksion më të lartë.

KREU II
GRADAT DHE KARRIERA USHTARAKE NË FORCAT  E ARMATOSURA

Neni 6
Karriera ushtarake 

Karriera ushtarake është ecuria në funksion dhe rendin e gradave gjatë kryerjes së shërbimit ushtarak aktiv.

Neni 7
Hierarkia ushtarake

1. Hierarkia ushtarake përfshin rendin e funksioneve dhe të gradave.

2. Rendi i gradave dhe i funksioneve në Forcat e Armatosura shkallëzohet nga më i ulëti në më të lartin, sipas lidhjeve e varësive që kanë ndërmjet tyre.

3. Ushtarakët, në varësi të hierarkisë së funksioneve dhe gradave, janë eprorë dhe vartës.

Neni 8
Kategoritë e ushtarakëve

1. Ushtarakët e Forcave të Armatosura janë ushtarakë të shërbimit aktiv dhe ushtarakë në rezervë.

2. Ushtarakët e shërbimit aktiv janë ushtarakë të shërbimit të përkohshëm dhe ushtarakë të shërbimit të karrierës. Ushtarakët e shërbimit të përkohshëm janë oficerët me gradë nëntoger, toger dhe kapiten, nënoficerët me gradë nëntetar dhe tetar dhe ushtarët/detarët. Ushtarakë të shërbimit të karrierës janë oficerët me gradë major, nënkolonel, kolonel dhe oficerët me gradë madhore dhe nënoficerët me gradë rreshter, kapter dhe kryekapter.

3. Ushtarakë të shërbimit aktiv në Forcat e Armatosura janë oficerë, nënoficerë dhe ushtarë/detarë.

Neni 9
Kontrata e shërbimit ushtarak aktiv

1.  Ushtarakët, me pranimin e tyre në shërbimin ushtarak aktiv, nënshkruajnë kontratë, si më poshtë vijon:

a) Për ushtarët/detarët:

i. Kontrata lidhet për një afat jo më pak se 3 vjet me të drejtë ripërtëritjeje. Kohëzgjatja e ripërtëritjes së kontratës është 3-vjeçare dhe nuk duhet të kalohet mosha maksimale e përcaktuar në nenin 14, të këtij ligji.
ii. Kontrata nënshkruhet midis ushtarakut dhe Forcave të Armatosura. Në emër të Forcave të Armatosura nënshkruajnë Shefi i Shtabit të Përgjithshëm të Forcave të Armatosura ose personi i autorizuar prej tij, komandanti i forcës, komandanti i strukturës mbështetëse apo komandantët e strukturave të tjera kryesore, në përputhje me strukturën e Forcave të Armatosura.

b) Për nënoficerët:

i.    Kontrata lidhet për një afat jo më pak se 3 vjet me të drejtë ripërtëritjeje. Kohëzgjatja e ripërtëritjes së kontratës për gradën respektive bëhet sipas përcaktimeve të pikës 2, të nenit 13, të këtij ligji, dhe nuk duhet të kalohet mosha maksimale e përcaktuar në pikën 1, të nenit 14, të këtij ligji.
ii.     Kontrata nënshkruhet midis ushtarakut dhe Forcave të Armatosura. Në emër të Forcave të Armatosura nënshkruajnë Shefi i Shtabit të Përgjithshëm të Forcave të Armatosura ose personi i autorizuar prej tij, komandanti i forcës, komandanti i strukturës mbështetëse apo komandantët e strukturave të tjera kryesore, në përputhje me strukturën e Forcave të Armatosura.

c) Për studentët ushtarakë dhe oficerët:

i. Kontrata lidhet me fillimin e studimeve brenda dhe jashtë vendit. Në kontratë përfshihen koha e arsimimit dhe 6 vjet periudhë shërbimi si oficer në Forcat e Armatosura. Kohëzgjatja e ripërtëritjes së kontratës për gradën respektive bëhet sipas përcaktimeve të pikës 2, të nenit 13, të këtij ligji, dhe nuk duhet të kalohet mosha maksimale e përcaktuar në pikën 1, të nenit 14, të këtij ligji.
ii. Në emër të Forcave të Armatosura për studentët ushtarakë nënshkruan komandanti i Komandës së Doktrinës dhe Stërvitjes, ndërsa për oficerët nënshkruan drejtuesi i njësisë së menaxhimit të personelit në Ministrinë e Mbrojtjes.

2. Në rast shkeljeje të kontratës, shtetasit dhe ushtarakët detyrohen të dëmshpërblejnë shpenzimet për kohën e studimit apo kualifikimit brenda ose jashtë vendit. Urdhri i ministrit të Mbrojtjes për shlyerjen e detyrimit në këto raste përbën titull ekzekutiv dhe për ekzekutimin e tij ngarkohet shërbimi përmbarimor gjyqësor.

3.  Procedurat e lidhjes së kontratës së shërbimit ushtarak aktiv përcaktohen me udhëzim të ministrit të Mbrojtjes.

4. Shtetasit/ushtarakët, që nënshkruajnë kontratë sipas këtij neni, janë të detyruar të shërbejnë në të gjitha strukturat e Forcave të Armatosura, sipas nevojave dhe situatave operacionale, brenda dhe jashtë vendit.

Neni 10
Subjektet përfituese të gradave ushtarake

Në Forcat e Armatosura gradat u jepen oficerëve, nënoficerëve, ushtarëve/detarëve, studentëve ushtarakë dhe ushtarakëve në rezervë.

Neni 11
Klasifikimi i gradave ushtarake

Gradat ushtarake në Forcat e Armatosura klasifikohen:

a) Për oficerët aktivë:

i. grada madhore;
ii. grada të larta;
iii. grada të ulëta.

b) Për nënoficerët aktivë:

i. grada të larta;
ii. grada të ulëta.

Neni 12
Gradat ushtarake 

1. Gradat ushtarake, sipas klasifikimit dhe shërbimit, të renditura nga më e larta te më e ulëta, janë:

a) Për oficerët aktivë:

Klasifikimi             Grada Forca Tokësore/Ajrore          Grada Forca Detare

i. Gradë madhore              Gjeneral lejtnant                                Admiral;
ii. Gradë madhore            Gjeneral major                           Nënadmiral;
iii. Gradë madhore            Gjeneral brigade                       Kundëradmiral;
iv. Gradë e lartë                 Kolonel                                Kapiten i rangut I;
v. Gradë e lartë                 Nënkolonel                          Kapiten i rangut II;
vi. Gradë e lartë                 Major                                  Kapiten i rangut III;
vii. Gradë e ulët                  Kapiten                               Kapiten Lejtnant;
viii. Gradë e ulët                  Toger                                          Lejtnant;
ix. Gradë e ulët                 Nëntoger                                  Nënlejtnant;

b) Për nënoficerët aktivë:

Klasifikimi             Grada Forca Tokësore/Ajrore         Grada Forca Detare

i.      Gradë e lartë                  Kryekapter                             Kryekapter;
ii.     Gradë e lartë                  Kapter                                   Kapter;
iii.    Gradë e ulët                   Rreshter                                 Rreshter;
iv.    Gradë e ulët                   Tetar                                      Tetar;
v.     Gradë e ulët                   Nëntetar                                Nëntetar;

c) Për ushtarët aktivë:

Titulli                      Grada Forca Tokësore/Ajrore           Grada Forca Detare

i. Ushtar                             Ushtar IV               Detar IV;
ii. Ushtar                    Ushtar III               Detar III;
iii. Ushtar                    Ushtar II                Detar II;
iv. Ushtar                    Ushtar I                  Detar I.

ç) Për studentët:

Titulli                                                                         Lloji i gradës

Student                                                                             Kadet

2.  Studentët  shqiptarë, që ndjekin studimet në shkollat ushtarake jashtë vendit, mbajnë uniformën dhe simbolet e gradës së studentit të akademive ushtarake shqiptare, sipas marrëveshjeve dypalëshe me vendet pritëse.

3.     Rekrutët, kur hyjnë në shërbimin aktiv, nuk mbajnë gradë deri në përfundimin me sukses të stërvitjes bazë. Pas përfundimit të kësaj periudhe, kandidatët për ushtarë gradohen “Ushtar I” ose “Detar I”.

Neni 13
Koha e qëndrimit në gradë

1.  Koha minimale e qëndrimit në një gradë për fitimin e gradës së radhës është:

Forca Tokësore/Ajrore          Forca Detare                         Koha në gradë

a) Ushtar I                              Detar I                               1 vit;
b) Ushtar II                             Detar II                               1 vit;
c) Ushtar III                            Detar III                              1 vit;
ç) Ushtar IV                           Detar IV                              3 vjet;
d)  Nëntetar                           Nëntetar                              3 vjet;
dh)  Tetar                               Tetar                                   4 vjet;
e)  Rreshter                           Rreshter                              6 vjet;
ë)  Kapter                              Kapter                                5 vjet;
f)  Nëntoger                           Nënlejtnant                         3 vjet;
g) Toger                                 Lejtnant                              4 vjet;
gj)  Kapiten                             Kapiten lejtnant                   5 vjet;
h)  Major                               Kapiten i rangut III                6 vjet;
i)  Nënkolonel                       Kapiten i rangut II                 5 vjet;
j)  Kolonel                            Kapiten i rangut I                  5 vjet;
k)  Gjeneral brigade               Kundëradmiral                      3 vjet;
l)  Gjeneral major                  Nënadmiral                          3 vjet.

2.  Në rast mospërparimi në gradë, ushtarët me gradën ushtar IV, nënoficerët me gradat nëntetar, tetar dhe oficerët me gradat nëntoger, toger, kapiten, që plotësojnë 14 vite shërbimi aktiv në Forcat e Armatosura, pavarësisht nga parashikimet e pikës 1, të nenit 14, të këtij ligji, dalin në rezervë.

3. Koha e qëndrimit në një gradë në shërbimin aktiv llogaritet nga data e hyrjes në fuqi të urdhrit përkatës për dhënien e gradës.

4. Koha e shërbimit në rezervë nuk llogaritet si kohë qëndrimi në gradë për gradim në shërbimin aktiv.

5. Kriteret për gradimin e oficerëve, nënoficerëve dhe ushtarëve në rezervë përcaktohen me vendim të Këshillit të Ministrave, me propozimin e ministrit të Mbrojtjes.

 

Neni 14
Mosha maksimale e qëndrimit në shërbimin aktiv

1. Mosha maksimale e qëndrimit në shërbimin aktiv është:

Forca Tokësore/Ajrore        Forca Detare                       Mosha në shërbim aktiv

a)   Ushtar I                            Detar I                                         28 vjeç;
b)   Ushtar II                           Detar II                                        29 vjeç;
c)   Ushtar III                          Detar III                                       30 vjeç;
ç)   Ushtar IV                         Detar IV                                       33 vjeç;
d)   Nëntetar                          Nëntetar                                       37 vjeç;
dh)   Tetar                               Tetar                                           41vjeç;
e)   Rreshter                          Rreshter                                      54 vjeç;
ë)   Kapter                             Kapter                                         55 vjeç;
f)   Kryekapter                       Kryekapter                                  57 vjeç;
g)   Nëntoger                          Nënlejtnant                                 30 vjeç;
gj)   Toger                               Lejtnant                                      34 vjeç;
h)   Kapiten                            Kapiten lejtnant                            41 vjeç;
i)    Major                               Kapiten i rangut III                       55 vjeç;
j)    Nënkolonel                       Kapiten i rangut II                        57 vjeç;
k)   Kolonel                            Kapiten i rangut I                         59 vjeç;
l)   Gjeneral brigade               Kundëradmiral                             61 vjeç;
ll)   Gjeneral major                  Nënadmiral                                 63 vjeç;
m)   Gjeneral lejtnant               Admiral                                       65 vjeç.

2. Oficeri me gradë madhore, pavarësisht nga mosplotësimi i moshës së përcaktuar në pikën 1, të këtij neni, dhe i kritereve të përcaktuara në nenet 25 dhe 26, të këtij ligji, nxirret në rezervë apo lirim, kur plotëson njërin nga këto kritere:

a)    Kur pas kalimit të kohës së qëndrimit në një gradë sipas pikës 1, të nenit 13, të këtij ligji, nuk ka marrë gradën e radhës;
b)    Kur nuk ka kuota të lira për konkurrim për gradën e radhës, sipas tabelës së organizimit dhe pajisjeve.

3.  Oficerët, pas marrjes se gradës major dhe nënoficerët pas marrjes së gradës rreshter, nuk nënshkruajnë kontratë, por vazhdojnë shërbimin aktiv të karrierës dhe shërbejnë në shërbimin aktiv sipas përcaktimeve të pikës 1, të këtij neni.

4.  Mosha minimale e pranimit në Forcat e Armatosura është 18 vjeç.

5. Shtetasit, në momentin e titullimit oficer aktiv dhe ushtar/detar aktiv, nuk duhet të kenë mbushur moshën 27 vjeç. Përjashtim bëjnë vetëm shtetasit që do të titullohen oficerë dhe ushtarë/detarë aktivë, të cilët do të jenë personel mjekësor i Forcave të Armatosura dhe në momentin e titullimit nuk duhet të kenë mbushur moshën 32 vjeç.

KREU III
TITULLIMI DHE GRADIMI I USHTARAKËVE AKTIVË 

Neni 15
Titullimi dhe gradimi i ushtarëve aktivë

1. “Ushtar/detar aktiv i Forcave të Armatosura” titullohet shtetasi shqiptar që ka kryer minimalisht arsimin parauniversitar brenda ose jashtë vendit, ka kryer kursin përkatës ushtarak të ushtarit dhe bën betimin ushtarak.

2.     Titullimi “ushtar/detar aktiv” dhe dhënia e gradës së parë të ushtarit/detarit aktiv bëhet me urdhër të Shefit të Shtabit të Përgjithshëm, me propozimin e titullarit të institucionit arsimor dhe stërvitor në Forcat e Armatosura, i cili ka certifikuar kandidatin në përfundim të kursit.

3. Gradat e tjera për ushtarët/detarët aktivë jepen nga:

a)  Shefi i Shtabit të Përgjithshëm për ushtarët/detarët që shërbejnë në Ministrinë e Mbrojtjes, Shtabin e Përgjithshëm dhe strukturat e varësisë së tyre;
b)  Komandanti i forcës për strukturën që drejton dhe ato të varësisë;
c) Komandanti i strukturës mbështetëse për strukturën që drejton dhe ato të varësisë.

4.  Ministri i Mbrojtjes, me propozimin e Shefit të Shtabit të Përgjithshëm, përcakton me udhëzim procedurat dhe kriteret për rekrutimin e ushtarëve/detarëve aktivë.

Neni 16
Titullimi dhe gradimi i nënoficerëve aktivë

1. “Nënoficer aktiv” titullohet ushtari/detari IV, që ka kryer kualifikimin përkatës të nënoficerit.

2.  Titullimi “nënoficer aktiv” dhe dhënia e gradës së parë nëntetar bëhet me urdhër të Shefit të Shtabit të Përgjithshëm, me propozimin e titullarit të institucionit arsimor dhe stërvitor në Forcat e Armatosura, i cili ka certifikuar kandidatin në përfundim të kursit.

3. Gradat për nënoficerët aktivë jepen me urdhër të Shefit të Shtabit të Përgjithshëm, me propozimin e komisionit të karrierës.

4.  Ministri i Mbrojtjes, me propozimin e Shefit të Shtabit të Përgjithshëm, përcakton me udhëzim procedurat dhe kriteret për rekrutimin e nënoficerëve aktivë.

Neni 17
Titullimi dhe gradimi i oficerëve aktivë

1. “Oficer aktiv i Forcave të Armatosura” titullohet shtetasi shqiptar që plotëson një nga kriteret e mëposhtme dhe bën betimin ushtarak:

a)    Të ketë kryer arsimin e lartë ushtarak brenda vendit ose jashtë vendit;
b)    Të ketë kryer arsimin e lartë ushtarak dhe ciklin e parë të studimeve të larta pas arsimimit ushtarak jashtë vendit;
c)    Të ketë kryer ciklin e parë të studimeve të larta, brenda ose jashtë vendit, dhe kursin përkatës ushtarak në institucionet arsimore ushtarake.

2. Titullimi “oficer aktiv” dhe dhënia e gradës së parë të oficerit bëhet me urdhër të ministrit të Mbrojtjes, me propozimin e titullarit të institucionit arsimor dhe stërvitor në Forcat e Armatosura.

3. Grada “Nëntoger” u jepet shtetasve që janë titulluar “oficer aktiv”.

4. Gradat e ulëta dhe të larta të oficerëve jepen me urdhër të ministrit të Mbrojtjes, me propozimin e komisioneve të karrierës.

5.  Gradat madhore u jepen oficerëve me dekret të Presidentit të Republikës, me propozimin e ministrit të Mbrojtjes, përveç gradës së Shefit të Shtabit të Përgjithshëm.

6.  Shefit të Shtabit të Përgjithshëm i jepet grada me dekret të Presidentit të Republikës, me propozimin e Kryeministrit.

7. Grada e Komandantit të Forcave të Armatosura në kohë lufte jepet me dekret të Presidentit të Republikës, me propozimin e Kryeministrit.

Neni 18
Kriteret e përgjithshme për përparimin në gradë

1.     Ushtaraku merret në shqyrtim për marrjen e gradës së radhës, kur plotëson kriteret e mëposhtme:

a)     Të ketë plotësuar kohën e qëndrimit në një gradë sipas pikës 1, të nenit 13, të këtij ligji;
b)     Të ketë arsimimin dhe kualifikimin e nevojshëm për marrjen e gradës së radhës, sipas nenit 20, të këtij ligji;
c)     Më shumë se gjysma e vlerësimeve vjetore gjatë viteve të qëndrimit në gradën që mban të mos jetë më e ulët se “kënaqshëm”;
ç)     Të jetë i aftë fizikisht dhe në gjendje shëndetësore të mirë.

2. Nënoficerët me gradë nëntetar dhe oficerët me gradë nëntoger, toger, shqyrtohen nga komisionet e karrierës vetëm 1 (një) herë për marrjen e gradës së radhës.

3. Nënoficerët me gradë tetar dhe oficerët me gradë kapiten shqyrtohen 2 (dy) herë radhazi  nga komisionet e karrierës për marrjen e gradës së radhës.

4.  Oficerët e karrierës me gradë major, nënkolonel, kolonel dhe nënoficerët e karrierës me gradë rreshter dhe kapter shqyrtohen 3 (tre) herë radhazi nga komisionet e karrierës për marrjen e gradës së radhës.

5.  Oficerët me gradë madhore shqyrtohen vetëm 1 (një) herë nga komisioni i karrierës për marrjen e gradës se radhës.

6. Gradimi, sipas këtij ligji, bëhet në përputhje me nevojat organike të Forcave të Armatosura të Republikës së Shqipërisë.

7.  Shefi i Shtabit të Përgjithshëm, brenda muajit mars të çdo viti, i paraqet ministrit të Mbrojtjes nevojat organike të Forcave të Armatosura për çdo gradë sipas llojit të forcës dhe specialiteteve. Komandantët e forcave dhe komandantët e strukturave mbështetëse, brenda muajit mars të çdo viti, i paraqesin Shefit të Shtabit të Përgjithshëm nevojat organike të strukturave që drejtojnë për çdo gradë sipas llojit të forcës dhe specialiteteve.

8.  Ministri i Mbrojtjes, në zbatim të shkronjës “ç”, të pikës 1, të këtij neni, miraton rregulloren e aftësive fizike, me propozimin e Shefit të Shtabit të Përgjithshëm.

Neni 19
Vlerësimi vjetor i ushtarakut

1. Vlerësimi i vjetor i ushtarakut është procesi i verifikimit të përgjithshëm vjetor të realizimit të objektivave të përcaktuar në detyrë, i aftësive apo dobësive të ushtarakut në kryerjen e detyrave, si dhe cilësive etike e morale të tij. Vlerësimi i rezultateve synon përmirësimin e aftësive profesionale dhe të cilësisë së shërbimit nga ushtarakët.

2.  Ushtaraku vlerësohet në një nga këto nivele:

a) Shkëlqyer;
b) Shumë mirë;
c) Kënaqshëm;
ç) Jo gjithnjë i përshtatshëm;
d) Pamjaftueshëm.

3. Ministri i Mbrojtjes, me propozimin e Shefit të Shtabit të Përgjithshëm, miraton rregulloren e vlerësimit të ushtarakëve.

Neni 20
Arsimimi dhe kualifikimi për përparim në gradë

1.  Ushtarakët e Forcave të Armatosura, për të fituar gradën e radhës, duhet të plotësojnë kriteret e arsimimit dhe të kualifikimit, si më poshtë vijon:

a) Oficerët:

i.    Nëntogeri, për të fituar gradën e togerit, të ketë kryer kursin bazë të oficerit ose kurse të njësuara me të sipas urdhrit të ministrit të Mbrojtjes;
ii.    Togeri, për të fituar gradën e kapitenit, të ketë kryer kursin e avancuar të oficerit ose kurse të njësuara me të sipas urdhrit të ministrit të Mbrojtjes;
iii.    Kapiteni, për të fituar gradën e majorit, të ketë kryer kursin themelor të oficerit të shtabit ose kurse të njësuara me të sipas urdhrit të ministrit të Mbrojtjes;
iv.    Majori, për të fituar gradën e nënkolonelit, të ketë kryer kursin e Komandës dhe Shtabit të Përgjithshëm ose kurse të njësuara me të sipas urdhrit të ministrit të Mbrojtjes;
v. Nënkoloneli, për të fituar gradën e kolonelit, të ketë kryer kursin e lartë të oficerit ose kurse të njësuara me të sipas urdhrit të ministrit të Mbrojtjes;
vi.    Koloneli, për të fituar gradën gjeneral brigade, të ketë kryer kursin e lartë për sigurinë dhe mbrojtjen ose kurse të njësuara me të sipas urdhrit të ministrit të Mbrojtjes;
vii.    Gradimi gjeneral major/nënadmiral dhe gjeneral lejtnant/admiral bëhet në bazë të meritave, përgatitjes dhe aftësive profesionale, të vlerësuara nga Komisioni i Veçantë i Karrierës.

b)    Nënoficerët:

i.    Nëntetari, për të fituar gradën tetar, duhet të ketë kryer kursin bazë të nënoficerit;
ii.    Tetari, për të fituar gradën rreshter, duhet të ketë kryer kursin e avancuar të nënoficerit;
iii.    Rreshteri, për të fituar gradën kapter, duhet të ketë kryer kursin e lartë të nënoficerit;
iv.    Kapteri, për të fituar gradën kryekapter, duhet të ketë kryer kursin e kryekapterit.

c) Ushtarët:

i.    Kursanti, për të fituar gradën ushtar/detar I, duhet të ketë kryer stërvitjen bazë;
ii.    Ushtari/detari I, për të fituar gradën ushtar/detar II, duhet të ketë kryer stërvitjen individuale të avancuar.

2. Kurset dhe kualifikimet e kryera brenda dhe jashtë vendit, për efekt të përparimit në gradë, për të gjitha llojet e gradave, njësohen me urdhër të ministrit të Mbrojtjes, me propozimin e Shefit të Shtabit të Përgjithshëm.

3.  Kurset dhe kualifikimet e kërkuara nga legjislacioni në fuqi, që rregullon aktivitetin e Agjencisë së Inteligjencës dhe Sigurisë së Mbrojtjes dhe të shërbimit të policisë kriminale ushtarake, njësohen me kurset dhe kualifikimet e kërkuara për marrjen e gradave sipas këtij ligji, me urdhër të ministrit të Mbrojtjes.

4. Ministria e Mbrojtjes, me qëllim arsimimin e shtetasve që dëshirojnë të bëhen pjesëtarë të Forcave të Armatosura në të ardhmen, zhvillon politika dhe planifikon fonde buxhetore, si dhe mund të lidhë marrëveshje me institucione të arsimit parauniversitar, profesional dhe të lartë, publike dhe private.

Neni 21
Kriteret e përparimit në gradë për specialitetet

1. Përparimi në gradë për oficerët deri nënkolonel/kapiten i rangut II dhe nënoficerët deri kapter, që kryejnë detyra organike në specialitete në Forcat e Armatosura si mjekë dhe personel i orkestrës frymore, bëhet sipas kritereve të përcaktuara në nenet 13 dhe 14, të këtij ligji, dhe në përputhje me nevojat organike të Forcave të Armatosura.

2. Specifika e këtyre gradave bëhet e dallueshme nëpërmjet dizenjimit të veçantë të tyre.

3. Gradat e përfituara sipas këtij neni ruajnë vlerën juridike vetëm kur mbajtësit e tyre ushtrojnë funksione në specialitetin që është bërë parakusht për marrjen e gradës. Kur ushtaraku nuk ushtron detyrën sipas specialitetit të tij, mban të njëjtën gradë.

4.  Ushtarakët e përcaktuar në pikën 1, të këtij neni, përfitojnë grada të tjera ushtarake të sistemit të karrierës, kur plotësojnë kriteret e tjera të këtij ligji për gradën respektive.

5. Numri i përgjithshëm i personelit, që mban grada për specialitetet, përcaktohet nga ministri i Mbrojtjes, me propozimin e Shefit të Shtabit të Përgjithshëm. Përcaktimi i numrit të personelit që mban grada për specialitete bëhet duke marrë parasysh misionin dhe detyrat e strukturave të Forcave të Armatosura.

Neni 22
Komisionet e karrierës

1. Komisionet e karrierës janë autoritetet përgjegjëse për vlerësimin e përparimit të ushtarakëve në gradë, si dhe për kualifikimet që shërbejnë për marrjen e gradës së radhës.

2. Komisionet e karrierës janë:

a) Komisioni i Veçantë, i cili vlerëson oficerët për marrjen e gradave madhore.
b) Komisioni i Lartë, i cili vlerëson oficerët për marrjen e gradave major/kapiten i rangut III, nënkolonel/kapiten i rangut II, kolonel/kapiten i rangut I, si dhe nënoficerët për marrjen e gradës kryekapter.
c) Komisioni i zakonshëm për oficerët me grada të ulëta, i cili vlerëson oficerët për marrjen e gradave toger/lejtnant dhe kapiten/kapiten lejtnant.
ç) Komisioni i zakonshëm për nënoficerët, i cili vlerëson nënoficerët për marrjen e gradave të radhës, përjashtuar gradën kryekapter.

3. Përbërja e komisioneve të karrierës:

a) Komisioni i Veçantë përbëhet nga:

i. Shefi i Shtabit të Përgjithshëm                                      kryetar;
ii. Një gjeneral major/nënadmiral                                       anëtar;
iii. tre gjeneralë brigade/kundëradmiralë                             anëtarë.

b) Komisioni i Lartë përbëhet nga:

i. një gjeneral major/nënadmiral                                         kryetar;
ii. tre gjeneralë brigade/kundëradmiralë                               anëtarë;
iii. tre kolonelë/kapitenë të rangut I                                      anëtarë.

Në rastet kur shqyrtohen oficerë dhe nënoficerë të Agjencisë së Inteligjencës dhe Sigurisë së Mbrojtjes, në komision marrin pjesë respektivisht edhe dy kolonelë kur shqyrtohen oficerët dhe dy kryekapterë kur shqyrtohen nënoficerët nga kjo Agjenci, me të drejtë vote.

Në rastet kur shqyrtohen nënoficerët e forcave dhe strukturave mbështetëse për marrjen e gradës kryekapter, në komision marrin pjesë edhe dy kryekapterë, me të drejtë vote.

Komisioni i Lartë mblidhet sipas afateve të përcaktuara në urdhrin e Ministrit të Mbrojtjes.

c) Komisioni i zakonshëm për oficerët me grada të ulëta përbëhet nga:

i.     një gjeneral brigade/kundëradmiral                              kryetar;
ii. gjashtë kolonelë/kapitenë të rangut I                               anëtarë.

Në rastet kur shqyrtohen oficerë të Agjencisë së Inteligjencës dhe Sigurisë së Mbrojtjes, në komision marrin pjesë edhe dy kolonelë nga kjo Agjenci, me të drejtë vote.

Komisioni i zakonshëm për oficerët me grada të ulëta mblidhet sipas afateve të përcaktuara në urdhrin e ministrit të Mbrojtjes.

ç)  Komisioni i zakonshëm për nënoficerët përbëhet nga:

i.   një gjeneral brigade/kundëradmiral                                      kryetar;
ii.   tre kolonelë/kapitenë të rangut I                                         anëtarë;
iii.   tre kryekapterë                                                                 anëtarë.

Në rastet kur shqyrtohen nënoficerë të Agjencisë së Inteligjencës dhe Sigurisë së Mbrojtjes, në komision marrin pjesë edhe dy kryekapterë/kapterë nga kjo Agjenci, me të drejtë vote.

Komisioni i zakonshëm për nënoficerët mblidhet sipas afateve të përcaktuara në urdhrin e ministrit të Mbrojtjes.
4. Nuk bëjnë pjesë në komisionet e karrierës:

a)  anëtarët e kabinetit të ministrit të Mbrojtjes;
b)    ushtarakët e shërbimeve inteligjente dhe informative, me përjashtim të rasteve të parashikuara në shkronjat “b”, “c” dhe “ç”, të pikës 3, të këtij neni.

5. Komisionet e karrierës i përfundojnë procedurat e punës së tyre brenda muajit korrik të çdo viti, me përjashtim të Komisionit të Veçantë.

6. Komisionet e karrierës ngrihen me urdhër të ministrit të Mbrojtjes, me propozimin e Shefit të Shtabit të Përgjithshëm.

7. Funksionimi, procedurat e punës, mënyra e vlerësimit të ushtarakëve, gjatë procedurave për vlerësimin e përparimit të ushtarakëve në gradë, si dhe për kualifikimet përcaktohen me urdhër të ministrit të Mbrojtjes, me propozimin e Shefit të Shtabit të Përgjithshëm.

8.  Përjashtim nga sistemi i vlerësimit me pikë bëhet për marrjen e gradave gjeneral major/nënadmiral dhe gjeneral lejtnant/admiral, të cilat vlerësohen në bazë të meritave, përgatitjes dhe aftësive profesionale.

Neni 23
Njësimi i gradave me funksionet organike

Njësimi i gradave me funksionet organike në Forcat e Armatosura përcaktohet me vendim të Këshillit të Ministrave, me propozimin e ministrit të Mbrojtjes.

Neni 24
Pezullimi i ushtarakëve nga detyra

1. Pezullimi është ndërprerja e përkohshme e marrëdhënieve të punës për periudhën sa zgjat arsyeja e ndërprerjes. Në mbarim të kësaj periudhe, ushtaraku emërohet në përputhje me gradën që mban, me përjashtim të rastit kur dënohet me burgim.

2. Ushtaraku pezullohet:

a)    kur ndaj tij fillon ndjekja penale dhe vendoset masa e sigurisë, arrest në burg ose arrest në shtëpi, deri në marrjen e një vendimi të formës së prerë nga gjykata ose kur ndaj tij fillon procedimi penal për vepra penale që lidhen me detyrën;
b)    për periudha studimi më shumë se 6 muaj, të ndërmarra me nismën e vetë ushtarakut dhe në lidhje me profesionin që ai ushtron;
c)    me kërkesën e ushtarakut për të shoqëruar bashkëshortin/bashkëshorten, që emërohet jashtë shtetit në funksione zyrtare. Në këtë rast, pezullimi nuk mund të zgjatë më shumë se katër vjet.

3. Gjatë periudhës së pezullimit, ushtaraku nuk paguhet. Në rastin e parashikuar në shkronjën “a”, të pikës 2, të këtij neni, kur çështja penale pushohet ose kur me vendim gjykate të formës së prerë ushtaraku deklarohet i pafajshëm, ai emërohet në detyrë, i jepet paga bazë me të gjitha përfitimet e tjera që nga çasti i pezullimit.

4. Periudha e kohës së pezullimit nga detyra njihet si vjetërsi grade dhe shërbimi në Forcat e Armatosura, kur pezullimi ndodh për rastin e parashikuar në shkronjën “a”, të pikës 2, të këtij neni, dhe çështja penale pushohet ose kur me vendim gjykate të formës së prerë ushtaraku deklarohet i pafajshëm, ndërsa për rastet e parashikuara në shkronjat “b” dhe “c”,  të pikës 2, të këtij neni, periudha e pezullimit njihet vetëm për efekt të vjetërsisë së gradës.

5.  Pezullimi i oficerit nga detyra bëhet me urdhër të ministrit të Mbrojtjes, ndërsa pezullimi i nënoficerit dhe ushtarit/detarit bëhet me urdhër të autoritetit që ka kompetencën e emërimit.

Neni 25
Dalja në rezervë e ushtarakëve

1. Ushtaraku del në rezervë nga shërbimi aktiv kur ka plotësuar njërin nga kushtet e mëposhtme:

a) Ka plotësuar afatin e parashikuar në kontratë;
b) Ka plotësuar moshën e përcaktuar në nenin 14, të këtij ligji;
c) Ka plotësuar kohën e qëndrimit në shërbimin aktiv sipas pikës 2, të nenit 13, të këtij ligji për gradat respektive;
ç) Ka tre vlerësime vjetore “pamjaftueshëm” gjatë kohës së qëndrimit në një gradë;
d) Paraqet kërkesën dhe ajo miratohet nga organi përgjegjës. Organi përgjegjës kthen përgjigje brenda tre muajve. Në rast se organi përgjegjës nuk kthen përgjigje brenda këtij afati, kërkesa quhet e miratuar.
dh) Kur bëhen shkurtime në numrin e përgjithshëm të personelit të Forcave të Armatosura. Në këtë rast, kriteret e përzgjedhjes së ushtarakëve që dalin në rezervë përcaktohen me udhëzim të ministrit të Mbrojtjes, sipas propozimit të Shefit të Shtabit të Përgjithshëm të Forcave të Armatosura.

2.    Shefi i Shtabit të Përgjithshëm del në rezervë me dekret të Presidentit të Republikës, me propozimin e Kryeministrit.

3.    Oficerët me gradë madhore dalin në rezervë me urdhër të Kryeministrit, me propozimin e ministrit të Mbrojtjes.

4.    Oficerët, përveç atyre që mbajnë grada madhore, dalin në rezervë me urdhër të ministrit të Mbrojtjes, me propozimin e Shefit të Shtabit të Përgjithshëm.

5.    Nënoficerët dalin në rezervë me urdhër të Shefit të Shtabit të Përgjithshëm, me propozimin e komandantit të forcës ose komandantit të strukturës mbështetëse.

6.    Ushtarët/detarët dalin në rezervë me urdhër të Shefit të Shtabit të Përgjithshëm, me propozimin e komandantit të forcës ose komandantit të strukturës mbështetëse.

Neni 26
Dalja në lirim e ushtarakëve 

1.    Ushtaraku del në lirim nga shërbimi aktiv kur ka plotësuar njërin nga kushtet e mëposhtme:

a)    Ka plotësuar moshën për pension pleqërie;
b)    Dënohet me burgim me vendim gjyqësor të formës së prerë;
c)    Shpallet i paaftë nga ana shëndetësore për shërbim ushtarak me vendim të komisionit përkatës mjekësor;
ç)      Paraqet kërkesën dhe ajo miratohet nga organi përgjegjës. Organi përgjegjës kthen përgjigje brenda tre muajve. Në rast se organi përgjegjës nuk kthen përgjigje brenda këtij afati, kërkesa quhet e miratuar;
d)    Ka kryer shkelje shumë të rënda disiplinore, sipas përcaktimeve të legjislacionit në fuqi për disiplinën në Forcat e Armatosura të Republikës së Shqipërisë;
dh) Në rastet e parashikuara në pikën 1, të nenit 25, të këtij ligji, kur është mbi moshën e shërbimit ushtarak në rezervë, sipas përcaktimeve të legjislacionit në fuqi për shërbimin ushtarak në Republikën e Shqipërisë.

2. Shefi i Shtabit të Përgjithshëm del në lirim me dekret të Presidentit të Republikës, me propozimin e Kryeministrit.

3.  Oficerët me gradë madhore dalin në lirim me urdhër të Kryeministrit, me propozimin e ministrit të Mbrojtjes.

4.  Oficerët, përveç atyre që mbajnë grada madhore, dalin në lirim me urdhër të ministrit të Mbrojtjes, me propozimin e Shefit të Shtabit të Përgjithshëm.

5.  Nënoficerët dalin në lirim me urdhër të Shefit të Shtabit të Përgjithshëm, me propozimin e komandantit të forcës ose komandantit të strukturës mbështetëse.

6.    Ushtarët/detarët dalin në lirim me urdhër të Shefit të Shtabit të Përgjithshëm, me propozimin e komandantit të forcës ose komandantit të strukturës mbështetëse.

Neni 27
Periudha e qëndrimit të ushtarakut në dispozicion

1. Kur ushtaraku lirohet nga detyra, ai emërohet menjëherë në një detyrë tjetër, në përputhje me arsimimin, specialitetin dhe funksionet organike sipas gradës që mban.

2.     Në raste të veçanta, emërimi në një detyrë tjetër bëhet brenda një periudhe 2-mujore. Gjatë kësaj periudhe, ushtaraku i liruar nga detyra paguhet me pagën mujore të gradës që mban, por jo më shumë se dy muaj.

Neni 28
Ankimi për procedurën e vlerësimit të komisioneve të karrierës

1. Ushtarakët, që janë marrë në shqyrtim për gradën e radhës, mund të ankohen për vlerësimin e komisionit të karrierës te ministri i Mbrojtjes. Ankimet bëhen brenda 10 (dhjetë) ditëve nga data e shpalljes së rezultatit vetëm një herë.

2. Për shqyrtimin e ankesave, ministri i Mbrojtjes krijon një komision të posaçëm të drejtuar nga një ushtarak me gradë madhore.

3. Komisioni i ngritur për shqyrtimin e ankesave vendos lënien në fuqi të vlerësimit të komisioneve të karrierës ose ndryshimin e këtij vlerësimi.

4.Procedurat dhe funksionimi i komisionit të shqyrtimit të ankesave përcaktohen me urdhër të ministrit të Mbrojtjes, me propozimin e Shefit të Shtabit të Përgjithshëm.

Neni 29
Përfundimi i procedurave të gradimit

Gradimet e radhës bëhen vetëm pas përfundimit të procedurave të shqyrtimit të ankesave nga komisioni, sipas nenit 28, të këtij ligji.

Neni 30
Ankimi për procedurën e daljes në rezervë/lirim

1.  Për mosmarrëveshjet që lindin për nxjerrjen në rezervë/lirim nga shërbimi ushtarak në Forcat e Armatosura, ushtarakut, përveç atij me gradë madhore, i lind e drejta të ankohet te ministri i Mbrojtjes brenda 30 (tridhjetë) ditëve nga data e njoftimit për nxjerrjen në rezervë/lirim.

2.  Ministri i Mbrojtjes, brenda 30 (tridhjetë) ditëve, shqyrton dhe vendos për ankesën.

3. Kur mosmarrëveshja nuk zgjidhet ose organi kompetent nuk e ka shqyrtuar kërkesën në afatin e caktuar në pikën 2, të këtij neni, ushtarakut i lind e drejta të ankohet në gjykatën administrative brenda 30 (tridhjetë) ditëve.

4.  Kur akti i shfuqizuar nga gjykata ka të bëjë me nxjerrjen në rezervë ose në lirim të ushtarakut, ai rikthehet në detyrën e mëparshme ose në një detyrë tjetër të të njëjtit nivel me atë të mëparshmen.

Neni 31
Rikthimi në shërbimin aktiv

1. Ushtarakët në rezervë rikthehen në shërbimin aktiv vetëm në rastet kur:

a)    bëhen shtesa në numrin e përgjithshëm të personelit të Forcave të Armatosura;
b)    bëhet mobilizimi i përgjithshëm ose i pjesshëm.

2.    Në rastet e rikthimit në Forcat e Armatosura, ushtarakët mbajnë gradën që kishin në çastin e daljes në rezervë.

Neni 32
Mospërputhjet gradë-funksion

1.     Në rastet e riorganizimit strukturor të Forcave të Armatosura, për mungesë funksioni organik, ushtaraku, me pëlqimin e tij, mund të emërohet në një funksion më të ulët duke mbajtur gradën që ka, por jo për më shumë se 3 vjet.

2.  Mospërputhja e gradave me funksionet organike në Forcat e Armatosura nuk duhet të kalojë masën 10 për qind të numrit të përgjithshëm të personelit ushtarak.

KREU IV
DISPOZITA KALIMTARE DHE TË FUNDIT

Neni 33
Zëvendësimi i emërtesave

Emërtesa “ushtar me pagesë/profesionist”, e përdorur në legjislacionin në fuqi, zëvendësohet me emërtesën “ushtar/detar”.

Neni 34
Rregullimi i gradave të ushtarëve 

Me hyrjen në fuqi të këtij ligji:

a)  ushtarëve profesionistë I , që kanë më pak se 9 muaj në këtë gradë, u jepet grada ushtar I/detar I;
b)  ushtarëve profesionistë I, që kanë më shumë se 9 muaj dhe më pak se 1 vit në këtë gradë, u jepet grada ushtar II/detar II;
c) ushtarëve profesionistë II, që kanë nga 1 deri në 2 vite shërbim në këtë gradë, u jepet grada ushtar III/detar III;
ç)  ushtarëve profesionistë II, që kanë më shumë se 2 vite në këtë gradë, u jepet  grada ushtar IV/detar IV.

Neni 35
Implementimi i daljes në rezervë lirim

Zbatimi i neneve 13 dhe 14, të këtij ligji, do të bëhet duke mos cenuar operacionalitetin dhe gatishmërinë e strukturave të Forcave të Armatosura.
Ministri i Mbrojtjes, me propozimin e Shefit të Shtabit të Përgjithshëm, miraton planin e daljes në rezervë ose lirim të ushtarakëve, kur dalja në rezervë ose lirim sjell cenimin e operacionalitetit dhe gatishmërisë së strukturave të Forcave të Armatosura.

Neni 36
Referenca e jashtme

Kudo në legjislacionin në fuqi, ku bëhet referim në ligjin nr.9171, datë 22.1.2004, “Për gradat dhe karrierën ushtarake në Forcat e Armatosura të Republikës së Shqipërisë”, referenca do të konsiderohet e bërë në këtë ligj.

Neni 37
Aktet nënligjore në fuqi 

Aktet nënligjore të nxjerra para datës së hyrjes në fuqi të këtij ligji dhe që nuk bien në kundërshtim me këtë ligj do të zbatohen deri në nxjerrjen e akteve nënligjore në zbatim të këtij ligji.

Neni 38
Nxjerrja e akteve nënligjore

1. Ngarkohet Këshilli i Ministrave të nxjerrë aktet nënligjore në zbatim të pikës 5, të nenit 13, dhe të nenit 23, brenda 6 muajve nga hyrja në fuqi e këtij ligji.

2. Ngarkohet ministri i Mbrojtjes të nxjerrë aktet nënligjore në zbatim të neneve 9, pika 3, 15, pika 4, 16, pika 4, 18, pika 8, 19, pika 3, 20, pikat 2 dhe 3, 21, pika 1, 22, pika 7, dhe 28, pika 4, brenda 6 muajve nga hyrja në fuqi e këtij ligji.

Neni 39
Shfuqizime

Ligji nr.9171, datë 22.1.2004, “Për gradat dhe karrierën ushtarake në Forcat e Armatosura të Republikës së Shqipërisë”, shfuqizohet.

Neni 40
Hyrja në fuqi

Ky ligj hyn në fuqi 15 ditë pas botimit në “Fletoren zyrtare”.

K R Y E T A R I

ILIR META

***

V E N D I M

PËR

PROPOZIMIN E PROJEKTLIGJIT “PËR AUTORITETET DHE PUSHTETET E DREJTIMIT E TË KOMANDIMIT TË FORCAVE TË ARMATOSURA TË REPUBLIKËS SË SHQIPËRISË”

Në mbështetje të neneve 81, pika 1, dhe 100, të Kushtetutës, me propozimin e ministrit të Mbrojtjes, Këshilli i Ministrave

V E N D O S I:

Propozimin e projektligjit “Për autoritetet dhe pushtetet e drejtimit e të komandimit të Forcave të Armatosura të Republikës së Shqipërisë”, për shqyrtim e miratim në Kuvendin e Republikës së Shqipërisë, sipas tekstit dhe relacionit që i bashkëlidhen këtij vendimi.

Ky vendim hyn në fuqi menjëherë.

K R Y E M I N I S T R I

EDI RAMA

***

P R O J E K T L I GJ

PËR 

AUTORITETET DHE PUSHTETET E DREJTIMIT E TË KOMANDIMIT TË FORCAVE TË ARMATOSURA TË REPUBLIKËS SË SHQIPËRISË

Në mbështetje të neneve 78 dhe 83, pika 1, të Kushtetutës, me propozimin e Këshillit të Ministrave, Kuvendi i Republikës së Shqipërisë

V E N D O S I:

KREU I
DISPOZITA TË PËRGJITHSHME

Neni 1
Objekti

Objekt i këtij ligji është përcaktimi i autoriteteve dhe pushteteve të drejtimit e të komandimit të Forcave të Armatosura të Republikës së Shqipërisë.

Neni 2
Qëllimi

Ky ligj ka për qëllim:

a)    përcaktimin e qartë të pushteteve e të kufizimeve të tyre, të autoriteteve, përgjegjësive, roleve dhe funksioneve të institucioneve dhe organeve të përfshira në sigurimin e mbrojtjes kombëtare të Republikës së Shqipërisë;
b)    zbatimin e parimit demokratik të kontrollit dhe drejtimit civil mbi Forcat e Armatosura;
c)    përcaktimin e përgjegjësisë strategjike dhe operacionale për drejtimin e komandimin e Forcave të Armatosura në kohë paqeje ose në rastet kur vendosen masa të jashtëzakonshme;
ç)  paraqitjen e qartë të zinxhirit të drejtimit dhe të komandimit të Forcave të Armatosura në kohë paqeje ose në rastet kur vendosen masa të jashtëzakonshme.

Neni 3
Fusha e zbatimit

Ky ligj zbatohet për fushën e veprimtarisë së Forcave të Armatosura të Republikës së Shqipërisë.

Neni 4
Subjektet 

Subjekte të këtij ligji janë organet shtetërore të përmendura në nenin 7, të këtij ligji.

Neni 5
Juridiksioni territorial

Ky ligj zbatohet në të gjithë territorin e Republikës së Shqipërisë, si dhe jashtë territorit të saj për ushtarakët shqiptarë kur ata janë dërguar me mision, shërbim, studime, stërvitje të përbashkët, mision diplomatik ose në bazë të marrëveshjeve ndërkombëtare.

Neni 6
Përkufizime

Në kuptim të këtij ligji, me termat e mëposhtëm nënkuptohet:

1.    “Autoritet”, institucioni që gëzon të drejtën e ushtrimit të pushtetit të dhënë me ligj.

2.    “Pushtet”, zotërimi i së drejtës së drejtimit dhe komandimit me qëllim realizimin e misionit kushtetues të Forcave të Armatosura.

3.    “Komandim”, pushteti që i jepet një ushtaraku për drejtimin, bashkërendimin dhe kontrollin e një force ushtarake, si dhe procesi nëpërmjet të cilit një komandant imponon vullnetin e tij dhe përçon synimet e veta te vartësit, me qëllim që të realizojë një veprim të caktuar.

4.    “Drejtim”, përdorimi i ligjshëm i burimeve njerëzore e materiale dhe i procedurave për planifikimin, kontrollin dhe koordinimin e këtyre burimeve për përmbushjen e misioneve e të detyrave të dhëna.

5.    “Drejtim dhe komandim”, procesi, nëpërmjet të cilit drejtuesit civilë dhe komandantët ushtarakë identifikojnë, planifikojnë dhe arrijnë objektivat strategjikë, operacionalë dhe taktikë, duke ushtruar autoritet dhe drejtim mbi burimet njerëzore e materiale.

6.    “Komandant”, ushtaraku komandues, i cili ka pushtetin ligjor për të ushtruar drejtimin dhe komandimin e personelit të Forcave të Armatosura që ka në varësi.

7.    “Autoritet i komandimit”, e drejta e ligjshme e dhënë me anë të emërimit një pozicioni komandimi për të organizuar dhe përdorur forcat, në përmbushje të misioneve të dhëna.

8.    “Drejtim operacional”, pushteti dhe përgjegjësia që ushtrohet nga një autoritet ushtarak për drejtimin dhe kontrollin e forcave të dhëna, për përmbushjen e misioneve dhe detyrave të veçanta.

9.    “Operacion”, veprimi ushtarak ose kryerja e një misioni ushtarak strategjik, taktik, shërbimi, stërvitor ose administrativ, si dhe procesi i kryerjes së luftimit, duke përfshirë lëvizjen, furnizimin, sulmin, mbrojtjen dhe manovrat që nevojiten për të arritur objektivat e çdo beteje ose fushe.

10.    “Planet e veprimit”, plane të natyrës strategjike, operacionale, taktike, ose të lidhura me menaxhimin e burimeve njerëzore e materiale dhe që nënkuptojnë një dokument të shkruar që përvijon kryerjen e misioneve, qëllimet dhe objektivat e caktuar, burimet njerëzore e materiale të kërkuara dhe afatet për kryerjen e tyre.

11.    “Planet specifike të veprimit”, përfshijnë planet e përbashkëta operacionale për operacionet ushtarake që synojnë përmbushjen e objektivave strategjikë dhe operacionalë, brenda një territori dhe periudhe të dhënë kohe.

12.    “Planet e luftës”, plane të natyrës strategjike, operacionale ose taktike dhe që përfshijnë të gjitha misionet, qëllimet dhe objektivat e caktuar, përshkrimin e detyrave e të burimeve njerëzore e materiale, të kërkuara për ekzekutimin e operacioneve nga Forcat e Armatosura, në kohë lufte.

13.    “Urdhër”, një akt që komunikohet me shkrim, me gojë, në mënyrë elektronike ose nëpërmjet sinjaleve dhe që ka natyrë detyruese.

14.    “Forcë”, në varësi të kontekstit të përdorur, nënkupton:

a)    totalin e të gjitha reparteve ushtarake;
b)    secilën prej forcave tokësore, detare dhe ajrore;
c)    një njësi ushtarake të pajisur, të përgatitur dhe të gatshme për të përdorur forcën.

15.    “Forcat e Armatosura”, Forca Tokësore, Detare, Ajrore, strukturat mbështetëse, Shtabi i Përgjithshëm bashkë me strukturat e varësisë si dhe strukturat ushtarake të varësisë së Ministrisë së Mbrojtjes.

16.    “Komandë”, komanda e Forcës Tokësore, Detare dhe Ajrore dhe komandat e strukturave mbështetëse.

17.    “Strukturë mbështetëse”, njësia ushtarake në nivel komande ose brigade, sipas përcaktimeve të bëra në strukturën e Forcave të Armatosura, të miratuar nga autoriteti përgjegjës.

18.    “Direktiva e mbrojtjes”, dokumenti me anë të të cilit ministri i Mbrojtjes jep udhëzime për Forcat e Armatosura lidhur me politikat, çështjet dhe objektivat e sigurisë kombëtare, prioritetin e misioneve ushtarake, prioritetin e projekteve në vazhdim për modernizimin e mbrojtjes dhe nivelet e pritshme të burimeve të planifikuara për një periudhë të dhënë planifikimi.

KREU II
HIERARKIA E AUTORITETEVE DHE PUSHTETEVE TË DREJTIMIT E TË KOMANDIMIT NË FORCAT E ARMATOSURA

   Neni  7
Autoritetet dhe pushtetet e drejtimit e të komandimit 

Hierarkia e autoriteteve të drejtimit e të komandimit të Forcave të Armatosura të Republikës së Shqipërisë është, si më poshtë vijon:

1. Kuvendi i Republikës së Shqipërisë;

2.    Presidenti i Republikës;

3.    Këshilli i Ministrave;

4.    Kryeministri;

5.    Ministri i Mbrojtjes;

6.    Shefi i Shtabit të Përgjithshëm të Forcave të Armatosura;

7.     Shtabi i Përgjithshëm i Forcave  të Armatosura;

8.     Komandantët e forcave tokësore, detare e ajrore;

9.     Komandantët e strukturave mbështetëse;

10.     Komandanti i Forcave të Armatosura, në kohë lufte.

Neni 8
Kuvendi i Republikës së Shqipërisë

Kuvendi i Republikës së Shqipërisë është autoriteti më i lartë në hierarkinë e pushteteve dhe autoriteteve të drejtimit e të komandimit të Forcave të Armatosura dhe ushtron kompetencat e mëposhtme:

a)    Miraton me ligj Strategjinë e Sigurisë Kombëtare dhe Strategjinë Ushtarake të Republikës së Shqipërisë;
b)    Ushtron kontroll për çështje që kanë lidhje me veprimtarinë e Forcave të Armatosura;
c)    Vendos sipas legjislacionit në fuqi për bashkëpunimin ushtarak ndërkombëtar;
ç)  Kur nuk është përcaktuar ndryshe në një marrëveshje ndërkombëtare të ratifikuar, përcakton statusin ligjor të forcave të huaja ushtarake që hyjnë në territorin e Republikës së Shqipërisë;
d) Miraton, me propozim të Këshillit të Ministrave, planet afatgjata të zhvillimit dhe modernizimit të Forcave të Armatosura;
dh)    Miraton numrin limit të Forcave të Armatosura të Republikës së Shqipërisë;
e)  Vendos për aktivizimin, mobilizimin, vënien në dispozicion të burimeve njerëzore dhe materiale për përdorim nga Forcat e Armatosura në kushtet e masave të jashtëzakonshme.

Neni 9
Presidenti i Republikës

1.    Presidenti i Republikës, në cilësinë e Komandantit të Përgjithshëm të Forcave të Armatosura, ushtron pushtetin e dhënë nga Kushtetuta dhe legjislacioni në fuqi.

2.    Presidenti i Republikës, në kohë paqeje, e ushtron drejtimin e Forcave të Armatosura nëpërmjet Kryeministrit dhe ministrit të Mbrojtjes, ndërsa në kohë lufte i drejton Forcat e Armatosura nëpërmjet Komandantit të Forcave të Armatosura.

3.    Presidenti i Republikës, si Komandant i Përgjithshëm i Forcave të Armatosura, ushtron këto kompetenca:

a)    Jep gradat madhore, me propozimin e ministrit të Mbrojtjes;
b)    Emëron, gradon, liron nga detyra dhe nxjerr në rezervë ose në lirim, me propozimin e Kryeministrit, Shefin e Shtabit të Përgjithshëm të Forcave të Armatosura;
c)    Emëron dhe liron nga detyra, me propozimin e ministrit të Mbrojtjes, komandantët e forcave tokësore, detare dhe ajrore;
ç)   Jep dekorata dhe tituj nderi sipas legjislacionit në fuqi;
d)    Urdhëron vendosjen e shkallëve të ndryshme të gatishmërisë luftarake të Forcave të Armatosura, në kushtet e masave të jashtëzakonshme;
dh) Vendos për mobilizimin dhe për provat e gatishmërisë së njësive ushtarake rezervë;
e)    Miraton regjimin, rregullat e gatishmërisë luftarake dhe ngritjen në kushtrim të  Forcave të Armatosura;
ë)   U jep njësive ushtarake, me propozimin e ministrit të Mbrojtjes, flamujt luftarakë;

4.    Presidenti i Republikës i rekomandon Këshillit të Ministrave masa, në varësi të nevojave për:

a) përballimin e rreziqeve që i kanosen Republikës së Shqipërisë ose përballimin e gjendjes së luftës;
b)    krijimin e njësive të reja ushtarake në Forcat e Armatosura;
c)    programe të veçanta për zhvillimin dhe modernizimin e Forcave të Armatosura.

5.    Në rastet e përcaktuara në shkronjat “a”, “b” dhe “c” të pikës 3, të këtij neni, Presidenti i Republikës shprehet brenda 30 ditëve kalendarike nga data e paraqitjes së propozimeve, duke miratuar ose refuzuar propozimin. Refuzimi në çdo rast bëhet i motivuar.

6.    Presidenti, për marrjen e vendimeve të rëndësishme që ka në përgjegjësi, këshillohet me Këshillin e Sigurisë Kombëtare.

Neni 10
Këshilli i Sigurisë Kombëtare

1. Këshilli i Sigurisë Kombëtare është organ këshillimor, i cili mbështet Presidentin e Republikës në ushtrimin e kompetencave dhe përgjegjësive kushtetuese e ligjore.

2.    Këshilli i Sigurisë Kombëtare kryesohet nga Presidenti i Republikës dhe thirret prej tij sa herë që e gjykon të nevojshme e sipas një rendi dite të përcaktuar.

3.    Anëtarët e përhershëm të Këshillit të Sigurisë Kombëtare janë:

a)    Kryetari i Kuvendit;
b)    Kryeministri;
c)    Ministri i Mbrojtjes;
ç)    Ministri i Drejtësisë;
d)    Ministri përgjegjës për punët e brendshme;
dh)  Ministri përgjegjës për financat;
e)    Ministri përgjegjës për transportin;
ë)    Ministri përgjegjës për punët e jashtme;
f)     Shefi i Shtabit të Përgjithshëm të Forcave të Armatosura;
g)    Drejtori i Shërbimit Informativ të Shtetit.

4.    Në raste të veçanta, Presidenti i Republikës mund të ftojë pjesëmarrës të tjerë.

5.    Në rast se anëtarët e Këshillit të Sigurisë Kombëtare për arsye objektive nuk mund të marrin pjesë në mbledhjet e Këshillit, ata autorizojnë zëvendësit e tyre.

6.    Pjesëmarrja e zëvendësve në mbledhjet e Këshillit në çdo rast bëhet me miratimin paraprak të Presidentit.

7.    Këshilli i Sigurisë Kombëtare diskuton dhe jep mendime për çështje të sigurisë, të mbrojtjes, të armë-kontrollit dhe për çdo çështje tjetër në fushën e sigurisë kombëtare.

8.    Këshilli i Sigurisë Kombëtare nuk merr vendime.

9.    Mbledhjet e tij zhvillohen të mbyllura.

 

Neni 11
Këshilli i Ministrave

Këshilli i Ministrave ka këto detyra dhe përgjegjësi:

a)    Përgatit dhe i paraqet për miratim Kuvendit Strategjinë e Sigurisë Kombëtare dhe Strategjinë Ushtarake të Republikës së Shqipërisë;
b)    I propozon Kuvendit ndryshime në numrin limit të personelit të Forcave të Armatosura;
c)    Miraton, me propozimin e ministrit të Mbrojtjes, planin e mobilizimit të përgjithshëm ose të pjesshëm të burimeve njerëzore e materiale të vendit, gjatë periudhës për të cilën kërkohet vendosja e masave të jashtëzakonshme;
ç)  Përcakton pagat dhe trajtimin ekonomik të personelit ushtarak dhe civil që shërben në Forcat e Armatosura;
d)    Përcakton afatet e shërbimit dhe të përdorimit të armatimit, municioneve, teknikës dhe pajisjeve të Forcave të Armatosura, rregullat, procedurat dhe përgjegjësitë për heqjen nga armatimi e përdorimi, si dhe trajtimin e tyre pas heqjes nga armatimi e përdorimi;
dh)  Organizon dhe drejton mbrojtjen civile të Republikës së Shqipërisë dhe vendos krijimin e funksionimin e shtabeve të mbrojtjes pranë qarqeve;
e)    Miraton programe të veçanta për pajisjen dhe modernizimin e Forcave të Armatosura;
ë)  Miraton modelet e uniformave ushtarake, gradave, simboleve, flamujve dhe çdo shenje tjetër dalluese të uniformës ushtarake;
f)    Miraton normat e trajtimit me uniformë të ushtarakëve;
g)    Miraton normat e trajtimit me ushqim të ushtarakëve;
gj) Miraton rezervat materiale në Forcat e Armatosura si dhe përcakton rregullat për krijimin, shkallëzimin, mënyrën e administrimit e të përdorimit të tyre për kohë paqeje dhe të gjendjeve për të cilat kërkohet marrja e masave të jashtëzakonshme;
h)    Përcakton detyrimet e institucioneve dhe subjekteve publike e private për mbajtjen e rezervave të materialeve e të mallrave në interes të mbrojtjes dhe Forcave të Armatosura për situata të veçanta;
i)    Miraton listën e aerodromeve civile, që mund të caktohen si aeroporte rezervë të Forcave të Armatosura gjatë gjendjeve për të cilat kërkohet marrja e masave të jashtëzakonshme;
j)    Nxjerr akte nënligjore për mbrojtjen dhe Forcat e Armatosura të Republikës së Shqipërisë.

 

Neni 12
Kryeministri

Kryeministri ka këto detyra dhe përgjegjësi:
a)    I propozon Presidentit të Republikës emërimin, gradimin, lirimin nga detyra dhe nxjerrjen në rezervë ose lirim të Shefit të Shtabit të Përgjithshëm;
b)    Emëron dhe liron nga detyra, me propozimin e ministrit të Mbrojtjes, oficerët me grada madhore, përveç atyre të përcaktuar në shkronjat “b” dhe “c”, të pikës 3, të nenit 9, të këtij ligji;
c)    Komandon në një detyrë tjetër, me propozimin e ministrit të Mbrojtjes, për një periudhë kohe jo më shumë se 6 muaj, oficerët aktivë me grada madhore, me përjashtim të komandantëve të forcave;
ç)     Nxjerr në rezervë ose lirim, me propozimin e ministrit të Mbrojtjes, oficerët me grada  madhore, me përjashtim të Shefit të Shtabit të Përgjithshëm të Forcave të Armatosura;
d)  Miraton, me propozimin e ministrit të Mbrojtjes, planin e vendosjes dhe përhapjes së Forcave të Armatosura në kohë paqeje;
dh)  Miraton, me propozimin e ministrit të Mbrojtjes, strukturën organizative të Forcave të Armatosura;
e)   Miraton, me propozimin e ministrit të Mbrojtjes, strukturën organizative dhe organikën analitike të Ministrisë së Mbrojtjes dhe Shtabit të Përgjithshëm të Forcave të Armatosura;
ë)     Miraton, listën e aerodromeve ushtarake, që mund të caktohen si aeroporte rezervë të aviacionit civil;
f)   Bashkërendon punën ndërmjet Ministrisë së Mbrojtjes dhe institucioneve të tjera për lajmërimin e popullsisë për rreziqet e fatkeqësisë natyrore, të aksidentit teknologjik dhe për rreziqet e luftës.

Neni 13
Ministri i Mbrojtjes
1.    Ministri i Mbrojtjes është person civil, i cili, nën përgjegjësinë e tij dhe brenda drejtimeve kryesore të politikës shtetërore, drejton veprimtarinë e Forcave të Armatosura në përmbushjen e misionit të tyre kushtetues.

2.    Ministri i Mbrojtjes ka këto detyra e përgjegjësi:

a)    Paraqet për miratim në Këshillin e Ministrave projektin e Strategjisë Ushtarake të Republikës së Shqipërisë dhe projektakte të tjera që kanë të bëjnë me mbrojtjen dhe Forcat e Armatosura;
b)    Paraqet për miratim në Këshillin e Ministrave planet afatgjata të zhvillimit dhe modernizmit të Forcave të Armatosura dhe programet e veçanta në fushën e mbrojtjes, që kërkojnë mbështetje financiare;
c)    Përfaqëson Republikën e Shqipërisë në takimet ndërkombëtare që kanë të bëjnë me çështje të fushës së mbrojtjes. Ministri i Mbrojtjes mund të caktojë një përfaqësues të autorizuar për të marrë pjesë në vend të tij;
ç) Përgjigjet për vendosjen dhe përmbushjen e qëllimeve dhe të objektivave të Ministrisë së Mbrojtjes, nëpërmjet krijimit të një sistemi të përshtatshëm dhe efektiv të menaxhimit financiar dhe kontrollit, si dhe përdorimit të fondeve publike, në mënyrë të ligjshme, me ekonomi, efektivitet dhe frytshmëri;
d) Miraton, me propozimin e Shefit të Shtabit të Përgjithshëm të Forcave të Armatosura, tabelat e organizimit dhe të pajisjeve të Forcave të Armatosura, Ministrisë së Mbrojtjes dhe strukturave të varësisë së saj;
dh)  I paraqet për miratim Kryeministrit, sipas propozimit të Shefit të Shtabit të Përgjithshëm të Forcave të Armatosura, strukturën organizative dhe organikën analitike të Shtabit të Përgjithshëm të Forcave të Armatosura;
e) Emëron dhe liron nga detyra përfaqësuesit ushtarakë të Republikës së Shqipërisë në shtabet dhe organizmat e tjerë ndërkombëtarë si dhe atashetë ushtarakë pranë përfaqësive diplomatike të Republikës së Shqipërisë;
ë)  Propozon te ministri përgjegjës për punët e jashtme akreditimin e atasheve ushtarakë pranë përfaqësive diplomatike të Republikës së Shqipërisë;
f)  Nxjerr urdhra dhe udhëzime për Forcat e Armatosura, në zbatim të
kompetencave të tij;
g)   Miraton direktivën e mbrojtjes;
gj)  Jep  titullin  “oficer  aktiv”  dhe  gradën  e  parë  për oficerët, me
propozimin e titullarit të institucionit arsimor dhe stërvitor në Forcat e Armatosura;
h) Emëron, liron nga detyra, nxjerr në rezervë apo lirim, me propozimin e Shefit të Shtabit të Përgjithshëm, oficerët aktivë të Forcave të Armatosura, me përjashtim të oficerëve me grada madhore;
i)  Gradon, me propozimin e komisioneve të karrierës, oficerët aktivë të Forcave të Armatosura, deri në gradën kolonel;
j)  Komandon në një detyrë tjetër oficerët aktivë të Forcave të Armatosura, për një periudhë kohe jo më shumë se 6 muaj, me përjashtim të oficerëve me grada madhore;
k)  I paraqet për miratim Këshillit të Ministrave, me propozimin e Shefit të Shtabit të Përgjithshëm, modelet e uniformave ushtarake, gradave, simboleve, flamujve dhe çdo shenje tjetër dalluese të uniformës ushtarake;
l)  I paraqet për miratim Presidentit të Republikës, me propozimin e Shefit të Shtabit të Përgjithshëm, njësitë e Forcave të Armatosura, të cilat do të mbajnë flamuj luftarakë;
ll)   Jep medalje sipas legjislacionit në fuqi;
m) I propozon Presidentit të Republikës dhënien e dekoratave dhe titujve të nderit për personelin ushtarak e civil të Forcave të Armatosura sipas legjislacionit në fuqi;
n) Delegon autoritetin e drejtimit operacional, ushtar-grup-skuadër-togë-kompani-batalion dhe të strukturave të njehsuara me to në Forcën Ajrore dhe Forcën Detare te komandat aleate, me të cilat Forcat e Armatosura të Republikës së Shqipërisë kryejnë misione të përbashkëta;
nj)  Miraton politika, udhëzime e procedura standarde për menaxhimin e personelit në Forcat e Armatosura;
o)  Jep, me propozimin e Shefit të Shtabit të Përgjithshëm, simbolet apo shenjat, që mbajnë njësitë ushtarake, si dhe përcakton rregullat e dhënies së tyre;
p)   Miraton, me propozimin e Shefit të Shtabit të Përgjithshëm, normat e materialeve të mirëmbajtjes së armëve, të teknikës dhe të pajisjeve, normat e karburant-lubrifikantëve, të teknikës dhe pajisjeve, kompletin e ushtarakut, normat e përdorimit të materialeve inventar reparti dhe të materialeve të konsumit në Forcat e Armatosura;
q)  Emërton, me propozimin e Shefit të Shtabit të Përgjithshëm, objektet ushtarake;
r)  Miraton politika në fushën e zbulimit, kundërzbulimit dhe sigurisë në Forcat e Armatosura;
rr)   Emëron  dhe  liron  nga  detyra  personelin civil në Ministrinë e Mbrojtjes, Forcat e Armatosura dhe strukturat e varësisë së tyre, përveç atyre që gëzojnë statusin e nëpunësit civil apo që janë në funksione ushtari ose nënoficeri;
s)  Urdhëron pjesëmarrjen e ushtarakëve të Forcave të Armatosura të Republikës së Shqipërisë në stërvitje ushtarake ndërkombëtare, jep lejen për qëndrim të përkohshëm të forcave ushtarake të huaja në territorin e Republikës së Shqipërisë, si dhe jep lejen për tranzitim të forcave ushtarake të huaja nëpër territorin e Republikës së Shqipërisë, sipas legjislacionit në fuqi.

3.    Ministri i Mbrojtjes mund të delegojë te Shefi i Shtabit të Përgjithshëm të Forcave të Armatosura si dhe te komandantët e forcave apo strukturave mbështetëse kompetencat dhe përgjegjësitë e përcaktuara në shkronjat “h”, “i” dhe “rr”, të pikës 2, të këtij neni.

4.    Ministri i Mbrojtjes zëvendësohet nga zëvendësministri i Mbrojtjes në kryerjen e detyrave, në rastet e mungesave, të pamundësisë apo të paaftësisë fizike për të vepruar ose për shkak të një pengese ligjore që has gjatë veprimtarisë së tij.
5.    Ministri i Mbrojtjes, përveç detyrave të përcaktuara në këtë ligj, ushtron edhe detyra të tjera, të përcaktuara nga legjislacioni në fuqi.

Neni 14
Këshilli i Politikave të Mbrojtjes

1.    Pranë ministrit të Mbrojtjes krijohet Këshilli i Politikave të Mbrojtjes si organ këshillimor, i cili mbështet ministrin e Mbrojtjes në ushtrimin e kompetencave dhe të përgjegjësive kushtetuese dhe ligjore.

2.    Këshilli i Politikave të Mbrojtjes kryesohet nga ministri i Mbrojtjes dhe thirret prej tij sa herë që e gjykon të nevojshme.

3.    Anëtarët e përhershëm të Këshillit të Politikave të Mbrojtjes janë:

a)    Zëvendësministri  i Mbrojtjes;
b)    Shefi i Shtabit të Përgjithshëm të Forcave të Armatosura;
c)    Zëvendësshefi i Shtabit të Përgjithshëm të Forcave të Armatosura;
ç)  Sekretari i Përgjithshëm i Ministrisë së Mbrojtjes;
d)    Komandantët e forcave;
dh) Komandantët e strukturave mbështetëse.

4.    Në raste të veçanta ministri i Mbrojtjes mund të ftojë pjesëmarrës të tjerë.

5.    Funksionimi i këtij këshilli përcaktohet me urdhër të ministrit të Mbrojtjes.

6.    Këshilli i Politikave të Mbrojtjes nuk merr vendime.

Neni 15
Shefi i Shtabit të Përgjithshëm të Forcave të Armatosura

1.    Shefi i Shtabit të Përgjithshëm të Forcave të Armatosura përgjigjet përpara Presidentit të Republikës, Kryeministrit dhe ministrit të Mbrojtjes për drejtimin e veprimtarisë së Forcave të Armatosura.

2.    Shefi i Shtabit të Përgjithshëm të Forcave të Armatosura është autoriteti më i lartë ushtarak në gradë dhe në hierarkinë e drejtimit e të komandimit në Forcat e Armatosura të Republikës së Shqipërisë.

3.    Shefi i Shtabit të Përgjithshëm të Forcave të Armatosura përzgjidhet nga radhët e oficerëve me grada madhore të Forcave të Armatosura, në bazë të aftësive profesionale dhe të përvojës.

4.    Shefi i Shtabit të Përgjithshëm të Forcave të Armatosura, me marrjen e detyrës, bën betimin para Presidentit të Republikës.

5.    Shefi i Shtabit të Përgjithshëm të Forcave të Armatosura shërben për një periudhë prej tre vjetësh, me të drejtë riemërimi vetëm për një mandat tjetër.

6.    Shefi i Shtabit të Përgjithshëm të Forcave të Armatosura del në rezervë ose lirim kur:

a)    plotëson afatin e qëndrimit në detyrë;
b)    jep dorëheqjen;
c)    plotëson kushtet për të dalë në pension;
ç)  është në paaftësi fizike apo mendore për ushtrimin e detyrave të tij për një periudhë mbi 6 muaj;
d)  shkel Kushtetutën ose kryen shkelje të rënda të ligjit gjatë ushtrimit të detyrës;
dh)  kryen akte dhe sjellje që diskreditojnë rëndë pozitën e ushtarakut të Forcave të Armatosura.

7.    Në rastet e daljes në rezervë ose lirim sipas shkronjave “a”, “b”, “c” dhe “ç”, të pikës 6, të këtij neni, Shefi i Shtabit të Përgjithshëm të Forcave të Armatosura përfiton trajtim të veçantë. Kriteret dhe masa e këtij trajtimi përcaktohen me vendim të Këshillit të Ministrave, me propozim të ministrit të Mbrojtjes.

8.    Shefi i Shtabit të Përgjithshëm të Forcave të Armatosura drejton Shtabin e Përgjithshëm dhe ka këto detyra e përgjegjësi:

a)     I propozon ministrit të Mbrojtjes planet e zhvillimit dhe të modernizimit të Forcave të Armatosura dhe programet e veçanta në fushën e mbrojtjes, që kërkojnë mbështetje financiare;
b)     Miraton doktrinën e përbashkët ushtarake të Forcave të Armatosura si dhe doktrinat e forcave tokësore, detare, ajrore dhe të strukturave mbështetëse;
c)     Miraton planet e veprimeve të njësive ushtarake të Forcave të Armatosura në kohë paqeje;
ç)  Miraton planet për arsimimin dhe kualifikimin e personelit të Forcave të Armatosura, në përputhje me politikat dhe procedurat e nxjerra nga ministri i Mbrojtjes;
d)  Kontrollon gatishmërinë luftarake dhe merr masa për përmirësimin e saj;
dh)  Bën aktivizimin e Forcave të Armatosura kur kjo gjë urdhërohet nga autoriteti i përcaktuar me ligj;
e) Planifikon rekrutimin dhe menaxhimin e personelit të Forcave të Armatosura, në përputhje me politikat, udhëzimet dhe procedurat standarde për menaxhimin e personelit të Forcave të Armatosura, të miratuara nga ministri i Mbrojtjes;
ë)  Organizon dhe realizon kryerjen e komunikimit për komandimin dhe kontrollin e Forcave të Armatosura;
f)  Organizon kryerjen e vrojtimit, të kontrollit dhe sigurisë së paprekshmërisë së hapësirës territoriale të Republikës së Shqipërisë;
g)  Orienton veprimtarinë e strukturave të zbulimit në Forcat e Armatosura, nëpërmjet miratimit të procedurave dhe standardeve, si dhe monitoron e kontrollon përmbushjen e nevojave për mbështetje me zbulim të Forcave të Armatosura;
gj)  Siguron mbështetjen logjistike për Forcat e Armatosura;
h) Organizon punën për parandalimin, zbulimin dhe dokumentimin e veprimtarive kriminale në Forcat e Armatosura;
i)  Realizon bashkëpunimin me Forcat e Armatosura të vendeve të tjera, në përputhje me planin e Ministrisë së Mbrojtjes;
j)  Zhvillon sistemet e komandimit, të kontrollit, të komunikimit e të njoftimit të të dhënave në Forcat e Armatosura dhe të infrastrukturave ushtarake;
k)  Përfaqëson Forcat e Armatosura të Republikës së Shqipërisë në organizmat ushtarakë ndërkombëtarë;
l)  Planifikon zhvillimin profesional të oficerëve dhe nënoficerëve të Forcave të Armatosura;
ll) Titullon nënoficerët aktivë të Forcave të Armatosura dhe jep gradën e parë të nënoficerit, me propozimin e titullarit të institucionit arsimor dhe stërvitor në Forcat e Armatosura;
m)  Titullon ushtarët aktivë të Forcave të Armatosura dhe jep gradën e parë të ushtarit, me propozimin e titullarit të institucionit arsimor dhe stërvitor në Forcat e Armatosura;
n) Emëron dhe liron nga detyra ushtarët dhe nënoficerët aktivë si dhe personelin civil të Shtabit të Përgjithshëm të Forcave të Armatosura e të strukturave të varësisë së tij, me përjashtim të atyre që gëzojnë statusin e nëpunësit civil ose që janë në funksione oficeri;
nj) Nxjerr në rezervë ose lirim ushtarët dhe nënoficerët aktivë të Forcave të Armatosura;
o)  Gradon, me propozimin e komisioneve të karrierës, nënoficerët aktivë të Forcave të Armatosura;
p)  Gradon ushtarët aktivë të Ministrisë së Mbrojtjes, Shtabit të Përgjithshëm të Forcave të Armatosura dhe strukturave të varësisë së tyre;
q)  Komandon në një detyrë tjetër nënoficerët aktivë të Forcave të Armatosura, për një periudhë kohe jo më shumë se 6 muaj;
r)   Miraton kalimin në emërtesë të personelit nënoficer dhe ushtar;
rr)  Jep medalje apo certifikata, sipas legjislacionit në fuqi;
s)  Drejton përgatitjen dhe gatishmërinë luftarake të Forcave të Armatosura, siguron plotësimin me personel, si dhe merr drejtimin e organizimin e veprimeve ushtarake dhe joushtarake;
sh)  Nxjerr urdhra dhe udhëzime brenda përgjegjësive dhe detyrave që ka;
t)     Kontrollon që sistemi i vlerësimit të ushtarakëve aktivë të Forcave të Armatosura të jetë në përputhje me politikat, udhëzimet e procedurat standarde, të miratuara nga ministri i Mbrojtjes.

9.    Shefi i Shtabit të Përgjithshëm të Forcave të Armatosura mund të delegojë tek organet vartëse ushtarake kompetencat dhe përgjegjësitë e përcaktuara në shkronjat “ll”, “m”, “n” dhe “nj”, të pikës 8, të këtij neni.

10.    Shefi i Shtabit të Përgjithshëm të Forcave të Armatosura zëvendësohet nga zëvendësshefi i Shtabit të Përgjithshëm të Forcave të Armatosura në kryerjen e detyrave në rastet e mungesave, të pamundësisë apo të paaftësisë fizike për të vepruar ose për shkak të një pengese ligjore që has gjatë veprimtarisë së tij.

11.    Shefi i Shtabit të Përgjithshëm të Forcave të Armatosura, përveç detyrave të përcaktuara në këtë ligj, ushtron edhe detyra të tjera, të përcaktuara nga legjislacioni në fuqi.

Neni 16
Shtabi i Përgjithshëm i Forcave të Armatosura

1.    Shtabi i Përgjithshëm i Forcave të Armatosura përbën strukturën organizative më të lartë ushtarake në Forcat e Armatosura.

2.    Shtabi i Përgjithshëm i Forcave të Armatosura organizohet dhe funksionon si shtab i bashkuar me përfaqësues të forcave tokësore, detare dhe ajrore.

3.    Shtabi i Përgjithshëm i Forcave të Armatosura në kohë lufte vepron si shtab për Presidentin e Republikës dhe Komandantin e Forcave të Armatosura.

4.    Shtabi i Përgjithshëm përgjigjet për:

a)    planifikimin dhe rekrutimin e personelit ushtarak në Forcat e Armatosura;
b)    përgatitjen dhe stërvitjen e përbashkët të të tria forcave dhe strukturave mbështetëse;
c)    vlerësimin strategjik të kërcënimeve, rreziqeve dhe marrjen e masave për përballimin e tyre;
ç)  përgatitjen e planeve për mbështetjen logjistike;
d)    planifikimin, bashkërendimin e punës dhe mbështetjen shëndetësore të efektivave të Forcave të Armatosura në kohë paqeje dhe në operacionet luftarake dhe joluftarake brenda dhe jashtë vendit;
dh) bashkëpunimin me autoritetet civile dhe organizatat qeveritare e joqeveritare në interes të realizimit të misionit të Forcave të Armatosura;
e)    programimin e misioneve, operacioneve, trajnimeve dhe stërvitjeve;
ë)     zbatimin e detyrimeve që rrjedhin nga marrëveshjet e bashkëpunimit, ndërveprimin dhe bashkërendimin e punës për stërvitjet e përbashkëta me NATO-n dhe organizmat e tjerë ndërkombëtarë;
f)    hartimin e kërkesave për pajisjen dhe modernizimin e Forcave të Armatosura;
g)    zhvillimin e sistemeve të komandimit, kontrollit, komunikimit dhe informimit në Forcat e Armatosura;
gj) zhvillimin e koncepteve dhe doktrinave, planifikimin, organizimin, mbështetjen me burime, zhvillimin dhe modernizimin, përgatitjen, stërvitjen dhe gatishmërinë operacionale të Forcave të  Armatosura;
h)    planifikimin dhe ndjekjen e arsimimit, kualifikimit dhe ecurisë në karrierë të personelit ushtarak në përputhje me ligjin për gradat dhe karrierën dhe politikat e menaxhimit të personelit në Forcat e Armatosura;
i)    përgatitjen për miratim tek autoritetet vendimmarrëse të strukturës organizative e të planit të vendosjes dhe përhapjes së Forcave të Armatosura;
j)    përgatitjen për miratim tek autoritetet vendimmarrëse të tabelave të organizimit dhe të pajisjeve të strukturave ushtarake;
k)    përgatitjen e planit të përdorimit të Forcave të Armatosura për operacione brenda dhe jashtë territorit të Shqipërisë, duke përfshirë operacionet që kryhen në bazë të nenit V, të Traktatit të NATO-s apo detyrimeve të tjera ndërkombëtare;
l)    përgatitjen e planit të mobilizimit të burimeve njerëzore dhe atyre materiale të vendit;
ll)    përgatitjen për miratim tek autoritetet vendimmarrëse të modeleve të uniformave ushtarake, gradave, simboleve, flamujve dhe çdo shenje tjetër dalluese të uniformës ushtarake;
m)    përgatitjen për miratim tek autoritetet vendimmarrëse të normave të materialeve të mirëmbajtjes së armëve, të teknikës e të pajisjeve, normave të karburant-lubrifikantëve, të teknikës e të pajisjeve, kompletit të ushtarakut, të normave të përdorimit të materialeve inventar reparti dhe të materialeve të konsumit në Forcat e Armatosura.

Neni 17
Forcat tokësore, detare dhe ajrore

Forcat tokësore, detare dhe ajrore përbëjnë komponentët operacionalë tokësorë, detarë dhe ajrorë për mbrojtjen ushtarake të vendit.

Neni 18
Komandanti i forcës dhe strukturës mbështetëse

1.    Komandimi dhe drejtimi i drejtpërdrejtë i forcave dhe strukturave mbështetëse realizohet nga komandanti përkatës.

2.    Komandanti i forcës apo strukturës mbështetëse përgjigjet për gjendjen, përgatitjen, mobilizimin, gatishmërinë luftarake, drejtimin operacional, zhvillimin e doktrinës, të operacioneve, të planifikimit, të programimit, të pajisjes e të modernizimit, si dhe për menaxhimin e burimeve njerëzore të forcës apo strukturës mbështetëse që drejton.

3.    Komandanti i forcës apo strukturës mbështetëse raporton drejtpërdrejt te ministri i Mbrojtjes dhe Shefi i Shtabit të Përgjithshëm të Forcave të Armatosura.

4.    Komandanti i forcës apo strukturës mbështetëse i paraqet për miratim Shefit të Shtabit të Përgjithshëm të Forcave të Armatosura:

a)  doktrinën e forcës apo të strukturës që drejton;
b)  planet afatgjata dhe programet vjetore për forcën që drejton;
c) planet dhe programet vjetore e afatmesme të zhvillimit e të modernizimit për forcën që drejton;
ç)  projektet për strukturën e forcës që drejton;
d)  programet e përgatitjes dhe ato të kualifikimit të personelit, brenda dhe jashtë vendit;
dh)  të dhëna për plotësimin me personel të strukturës që drejton;
e)    planin për arsimim e kualifikim të personelit për forcën që drejton.

5.    Komandanti i forcës apo strukturës mbështetëse ka këto përgjegjësi:

a)  Miraton manualet e luftimit dhe të teknikës për forcën që drejton;
b)    Paraqet kërkesat buxhetore dhe ndjek zbatimin e buxhetit sipas akteve ligjore e nënligjore të menaxhimit të sistemit buxhetor;
c)    Siguron që sistemi i vlerësimit të ushtarakëve aktivë në forcën apo strukturën mbështetëse që drejton të zbatohet në përputhje me politikat, udhëzimet e procedurat standarde, të miratuara nga ministri i Mbrojtjes;
ç) Emëron dhe liron nga detyra ushtarët dhe nënoficerët aktivë si dhe personelin civil të forcës apo strukturës mbështetëse që drejton, me përjashtim të atyre që gëzojnë statusin e nëpunësit civil ose që janë në funksione oficeri;
d)   Gradon ushtarët aktivë të forcës apo strukturës mbështetëse që drejton;
dh)  Jep medalje apo certifikata sipas legjislacionit në fuqi;
e)  Planizon dhe kryen operacione luftarake dhe joluftarake;
ë)  Siguron nivelin e kërkuar të gatishmërisë dhe përgatitjes luftarake;
f)  Siguron kapacitetet dhe gatishmërinë e nevojshme për realizimin e misionit të ngarkuar;
g)  Monitoron dhe vëzhgon hapësirën territoriale me qëllim paralajmërimin në kohë të kërcënimeve dhe rreziqeve me kapacitetet e veta apo në bashkëpunim me NATO-n dhe vendet e tjera partnere;
gj) Përgatit stërvitjet e përbashkëta me forcat e tjera, në nivel operacional, për përballimin e kërcënimeve apo rreziqeve që kërcënojnë sigurinë e vendit;
h) Nxjerr urdhra dhe udhëzime të karakterit ushtarak dhe administrativ brenda kompetencave të tij.

6.  Komandanti i strukturës mbështetëse, përveç detyrave të përcaktuara në pikën 5, të këtij neni, ka dhe këto përgjegjësi:

a)    Siguron mbështetjen me shërbime të Forcave të Armatosura;
b)    Mbështet Forcat e Armatosura në fushën e stërvitjes, arsimimit, standardizimit dhe zhvillimit të doktrinës;
c)  Organizon dhe drejton programet profesionale të arsimimit ushtarak, stërvitjes ushtarake bazë dhe kurseve për zhvillimin e aftësive ushtarake për Forcat e Armatosura;
ç)  Përgatit doktrinën e përbashkët dhe konceptet e stërvitjes së avancuar për të mbështetur stërvitjen dhe përgatitjen e Forcave të Armatosura.

7.    Përveç detyrave të përcaktuara në këtë ligj, komandanti i forcës apo strukturës mbështetëse ushtron edhe detyra të tjera, të përcaktuara nga legjislacioni në fuqi.

8.    Komandanti i forcës apo strukturës mbështetëse zëvendësohet nga zëvendëskomandanti në kryerjen e detyrave në rastet e mungesave, të pamundësisë apo të paaftësisë fizike për të vepruar ose për shkak të një pengese ligjore që has gjatë veprimtarisë së tij.

Neni 19
Detyrat dhe përgjegjësitë e komandantëve të strukturave të tjera

Detyrat dhe përgjegjësitë e komandantëve, në nivel më të ulët se përcaktimet e këtij ligji, përcaktohen me rregullore të veçantë, të miratuar nga ministri i Mbrojtjes, me propozimin e Shefit të Shtabit të Përgjithshëm.

KREU III
FORCAT E ARMATOSURA NË KUSHTET E MASAVE TË JASHTËZAKONSHME

Neni 20
Përdorimi i Forcave të Armatosura gjatë gjendjes së luftës

 

1.    Gjendja e luftës shpallet me ligj nga Kuvendi ose me dekret të Presidentit të Republikës sipas dispozitave të Kushtetutës së Republikës së Shqipërisë.

2.    Autoritetet që shpallin gjendjen e luftës, shpallin me të njëjtën procedurë dhe vendosjen e paqes.

3.    Gjendja e luftës apo vendosja e paqes njoftohet nga të gjitha mjetet e informimit të publikut.

4.    Në aktin e shpalljes së gjendjes së luftës përcaktohen qartë të drejtat dhe liritë themelore që kufizohen në përputhje me nenin 175, të Kushtetutës së Republikës së Shqipërisë.

5.    Me shpalljen e gjendjes së luftës apo me vendosjen e paqes, Kuvendi vendos, sipas rastit, gjendjen e mobilizimit apo të çmobilizimit të përgjithshëm ose të pjesshëm.

6.    Pas shpalljes së gjendjes së luftës, Forcat e Armatosura fillojnë ekzekutimin e planeve të luftës për mbrojtjen kombëtare.

7.    Presidenti i Republikës, si Komandanti i Përgjithshëm i Forcave të Armatosura, gjatë gjendjes së luftës bashkëpunon me Këshillin e Ministrave dhe Kryeministrin për operacionet ushtarake.

Neni 21
Komandanti i Forcave të Armatosura 

1.    Komandanti i Forcave të Armatosura është eprori ushtarak më i lartë në gjendje lufte dhe përgjigjet para Presidentit të Republikës dhe Kryeministrit për drejtimin e Forcave të Armatosura.

2.    Komandant i Forcave të Armatosura emërohet në kohë lufte nga Presidenti i Republikës, me propozimin e Kryeministrit, një nga oficerët aktivë me grada madhore.

3.    Emërimi dhe lirimi nga detyra bëhen nga Presidenti i Republikës, me propozimin e Kryeministrit.

4.    Komandanti i Forcave të Armatosura ka këto detyra dhe përgjegjësi:

a)    Ndjek dhe zbaton masat e gatishmërisë për mbrojtjen e vendit gjatë gjendjes së luftës;
b)    Ndjek dhe realizon kalimin e formacioneve të Forcave të Armatosura nga organizimi i kohës së paqes në atë të luftës;
c)    Informon Presidentin e Republikës periodikisht për gjendjen dhe situatën në vend;
ç)     Urdhëron kufizimin e lëvizjes së lirë, për aq kohë sa është e nevojshme, të qytetarëve në një pjesë ose në të gjithë territorin e Republikës së Shqipërisë;
d) Ndjek dhe mbikëqyr zbatimin dhe respektimin e ligjit të luftës në Forcat e Armatosura, si dhe përcakton kompetencat dhe përgjegjësitë e vartësve të tij për zbatimin e këtij ligji;
dh)  Organizon bashkëveprimin me autoritetet civile në rastet kur është në interes të operacioneve luftarake dhe përcakton kompetencat për këtë bashkëpunim duke vendosur prioritetet;
e)     Në zbatim të kompetencave të tij nxjerr urdhra që janë të detyrueshëm për zbatim si për autoritetet ushtarake, ashtu dhe për ato civile.

5.    Vendimet e Komandantit të Forcave të Armatosura për përdorimin e Forcave të Armatosura në veprimet ushtarake në kohë lufte miratohen nga Presidenti i Republikës.

Neni 22
Përdorimi i Forcave të Armatosura gjatë gjendjes së jashtëzakonshme

1.    Gjendja e jashtëzakonshme vendoset me ligj nga Kuvendi sipas dispozitave të  Kushtetutës së Republikës së Shqipërisë.

2.    Me vendosjen e gjendjes së jashtëzakonshme, Forcat e Armatosura, me vendim të Kuvendit, pas kërkesës së Këshillit të Ministrave, mund të ndërhyjnë për rivendosjen e rendit, vetëm kur forcat e policisë nuk janë në gjendje ta kryejnë këtë detyrë.

3.    Gjatë gjendjes së jashtëzakonshme Kryeministri është drejtpërdrejt përgjegjës për drejtimin e Forcave të Armatosura, përmes hierarkisë së drejtimit e të komandimit.

4.    Pas përfundimit të gjendjes së jashtëzakonshme Kryeministri i raporton Kuvendit për përdorimin e Forcave të Armatosura gjatë kësaj periudhe.

5.    Veprimet, që ndërmerren nga Forcat e Armatosura gjatë gjendjes së jashtëzakonshme, duhet të jenë në përpjesëtim me shkallën e rrezikut dhe duhet të synojnë rivendosjen sa më të shpejtë të funksionimit normal të shtetit.

Neni 23
Përdorimi i Forcave të Armatosura gjatë gjendjes së fatkeqësisë natyrore 

1.    Gjendja e fatkeqësisë natyrore vendoset nga Këshilli i Ministrave sipas dispozitave të Kushtetutës së Republikës së Shqipërisë.

2.    Me vendosjen e gjendjes së fatkeqësisë natyrore, Forcat e Armatosura, me vendim të Këshillit të Ministrave, mund të ndërhyjnë për eliminimin e pasojave të ardhura nga fatkeqësia natyrore apo aksidenti teknologjik.

3.    Gjatë gjendjes së fatkeqësisë natyrore Kryeministri është drejtpërdrejt përgjegjës për drejtimin e Forcave të Armatosura, përmes hierarkisë së drejtimit e të komandimit.

KREU IV
DISPOZITA KALIMTARE DHE TË FUNDIT

Neni 24
Nxjerrja e akteve nënligjore

1.    Ngarkohet Këshilli i Ministrave të nxjerrë aktet nënligjore në zbatim të shkronjave “c”, “ç”, “d”, “e”, “ë”, “f”, “g”, “gj”, “h” dhe “i”, të pikës 1, të nenit 11, si dhe të pikës 7, të nenit 15, të këtij ligji.

2.    Ngarkohet Kryeministri të nxjerrë aktet nënligjore në zbatim të shkronjave “d”, “dh”, “e” dhe “ë” të pikës 1, të nenit 12, të këtij ligji.

3.    Ngarkohet ministri i Mbrojtjes të nxjerrë aktet nënligjore në zbatim të shkronjave “d”, “g”, “o”, “q” dhe “rr”, të pikës 2, të nenit 13, të këtij ligji.

Neni 25

Aktet nënligjore, të miratuara para hyrjes në fuqi të këtij ligji dhe që nuk bien në kundërshtim me të, do të zbatohen deri në nxjerrjen e akteve nënligjore në zbatim të këtij ligji.

Neni 26
Shfuqizime

Ligji nr.8671, datë 26.10.2000, “Për pushtetet dhe autoritetet e komandimit e të drejtimit strategjik të Forcave të Armatosura të Republikës së Shqipërisë”, të ndryshuar, shfuqizohet.

Neni 27
Hyrja në fuqi

Ky ligj hyn në fuqi 15 ditë pas botimit në “Fletoren zyrtare”.

K R Y E T A R I

ILIR  META

***
V E N D I M
PËR
PROPOZIMIN E PROJEKTLIGJIT “PËR DISA NDRYSHIME DHE SHTESA NË LIGJIN NR.10186, DATË 5.11.2009, “PËR RREGULLIMIM E PRONËSISË MBI TRUALLIN SHTETËROR NË ZONAT ME PËRPARËSI TURIZMIN”, TË NDRYSHUAR
Në mbështetje të neneve 81, pika 1, dhe 100, të Kushtetutës, me propozimin e ministrit të Zhvillimit Urban dhe Turizmit, Këshilli i Ministrave
V E N D O S I:
Propozimin e projektligjit “Për disa ndryshime dhe shtesa në ligjin nr.10186, datë 5.11.2009, “Për rregullimim e pronësisë mbi truallin shtetëror në zonat me përparësi turizmin”, të ndryshuar”, për shqyrtim e miratim në Kuvendin e Republikës së Shqipërisë, sipas tekstit dhe relacionit që i bashkëlidhen këtij vendimi.
Ky vendim hyn në fuqi menjëherë.
K R Y E M I N I S T R I
EDI  RAMA
#
P R O J E K T L I GJ
PËR
DISA NDRYSHIME DHE SHTESA NË LIGJIN NR.10186, DATË 5.11.2009, “PËR RREGULLIMIM E PRONËSISË MBI TRUALLIN SHTETËROR NË ZONAT ME PËRPARËSI TURIZMIN”, TË NDRYSHUAR
Në mbështetje të neneve 78 dhe 83, pika 1, të Kushtetutës, me propozimin e Këshillit të Ministrave, Kuvendi i Republikës së Shqipërisë
V E N D O S I:
Në ligjin nr.10186, datë 5.11.2009, “Për rregullimin e pronësisë mbi truallin shtetëror në zonat me përparësi turizmin”, të ndryshuar, bëhen këto ndryshime dhe shtesa:
Neni 1
Në pikën 1, të nenit 2, bëhen ndryshimet dhe shtesat e mëposhtme:
1. Shkronjat “c”, “d” dhe “ë” ndryshohen, si më poshtë vijon:
“c) “Person i stimuluar” është personi fizik apo juridik, i cili ka përfituar titullin e personit të stimuluar në përputhje me ligjin nr.7665, datë 21.1.1993, “Për zhvillimin e zonave që kanë përparësi turizmin”, të shfuqizuar.”.
“d) “Njësi e ndërtuar” është objekti ose tërësia e objekteve apo e apartamenteve, të ndërtuara brenda kufirit të zonës për të cilën personi ka fitur titullin person i stimuluar.”.
“ë) “Truall” është e gjithë sipërfaqja e tokës brenda zonës së stimuluar sipas kufirit të lejes së miratuar të sheshit të ndërtimit.”.
2. Shkronja “f” shfuqizohet.
3. Pas shkronjës “g” shtohen shkronjat “h”, “i” dhe “j”, me këtë përmbajtje:
“h) “Plan rilevimi” quhet plani i përgatitur nga ALUIZNI pas përditësimit në terren, ku paraqitet gjendja faktike e zonës së stimuluar sipas kufijve të miratuar në lejen e sheshit.
  i)  “Objekt i ndërtuar” është objekti, për të cilin është përfunduar konstruksioni dhe mbulesa.
  j)  “Veprimtari joturistike në zonë me përparësi turizmin” janë ato veprimtari të dhëna në përputhje me shkronjën “b”, të nenit 4, të ligjit nr.7665, datë 21.1.1993, “Për zhvillimin e zonave që kanë përparësi turizmin”, të shfuqizuar.”.
Neni 2
Në nenin 3 bëhen këto ndryshime dhe shtesa:
1. Pika 1 ndryshohet, si më poshtë vijon:
“1. Ky ligj zbatohet për kalimin e së drejtës së pronësisë subjekteve të interesuara apo personave të stimuluar mbi njësitë e ndërtuara dhe truallin brenda zonës së stimuluar si dhe për veprimtaritë joturistike në zonë me përparësi turizmin.”.
2. Pas pikës 2 shtohet pika 3, me këtë përmbajtje:
“3. Procedurat e këtij ligji do të aplikohen edhe për personat që ushtrojnë “veprimtari joturistike në zonë me përparësi turizmin.”.
Neni 3
Shkronja “b”, e pikës 1, të nenit 4, ndryshohet, si më poshtë vijon:
“b) Dokumentacionin që provon veprimin juridik ndërmjet personit të stimuluar dhe subjektit të interesuar për kalimin e së drejtës së pronësisë mbi njësinë e ndërtuar.”.
Neni 4
Në nenin 5 bëhen këto ndryshime dhe shtesa:
1. Shkronjat “b”, “c”, “ç” dhe “e”, të pikës 1, ndryshohen, si më poshtë vijon:
“b) marrëveshjen e qirasë apo të zhvillimit të lidhur ndërmjet personit të stimuluar dhe qiradhënësit nëse është lidhur një marrëveshje e tillë;
 c)  lejen e ndërtimit apo lejen e sheshit të ndërtimit;
 ç)  projektin arkitektonik të miratuar;
 e) vërtetim nga AKT-ja për detyrimet e marrëveshjes së qirasë, të llogaritura deri në momentin e zgjidhjes së marrëveshjeve.”.
2. Pas shkronjës “e” shtohen shkronja “f” dhe paragrafi, me këtë përmbajtje:
“f) Vendimin e organeve kompetente për dhënien e titullit person i  stimuluar, nëse e disponon.”.
…
“Pika 1, e këtij neni, do të zbatohet edhe për subjektet të cilat kanë zhvilluar një veprimtari joturistike në zonë të stimuluar.”.
Neni 5
Pas nenit 7 shtohet neni 7/1, me këtë përmbajtje:
“Neni 7/1
Procedura e kalimit të pronësisë mbi truallin
1. Nëse marrëveshja e qirasë ose e zhvillimit është e lidhur me personin e stimuluar në truall shtetëror (data e lidhjes së marrëveshjes është përpara datës së kthimit dhe kompensimit fizik nga AKKP-ja) dhe pas verifikimit nga ZRPP-ja ky truall shtetëror ka ndryshuar statusin juridik duke iu kthyer personave të tretë, ALUIZNI përfundon procesin duke bërë kalimin e pronësisë së truallit në favor të subjektit të interesuar apo personit të stimuluar.
2. Këshilli i Ministrave miraton procedurat e kompensimit financiar të personave të cilët preken nga zbatimi i pikës 1, të këtij neni.”.
Neni 6
Pika 2, e nenit 8, shfuqizohet.
Neni 7
Në nenin 9 bëhen këto ndryshime dhe shtesa:
1. Pika 1 ndryshohet, si më poshtë vijon:
“1. “Subjekti i interesuar ose personi i stimuluar ka të drejtë të kërkojë blerjen e truallit në funksion të njësisë së ndërtuar, të cilën provon se e gëzon mbi bazën e dokumenteve të paraqitura në përputhje me nenet 4 dhe 5, të këtij ligji.”.
2. Pas pikës 4 shtohen pikat 5 e 6, me këtë përmbajtje:
“5. Në përfundim të procesit të përcaktuar në pikën 1, të këtij neni, dhe përfundimit të regjistrimit fillestar të pasurisë truall dhe njësi e ndërtuar, për truallin që mbetet i lirë brenda kufirit të miratuar nga plani i rilevimit (i tillë si sheshe, troje funksionale, pishina, sipërfaqe të gjelbëruara etj), ALUIZNI-t i lind e drejta t’iu kalojë në bashkëpronësi të detyrueshme, të patjetërsueshme në favor të të gjitha subjekteve të interesuara dhe/ose personit të stimuluar, në përputhje me kuotën e pjesëmarjes në bashkëpronësi.
Rrugët brenda zonës së stimuluar do të kalojnë me titull pronësie rrugë shtet.
6. Personi i stimuluar ka të drejtë të kërkojë blerjen e gjithë truallit të miratuar sipas planit të rilevimit, nëse nuk ka kërkesa nga subjektet e interesuara.”.
Neni 8
Pikat 1 dhe 3, të nenit 10, ndryshohen, si më poshtë vijon:
“1. Çmimi i truallit brenda zonës së stimuluar përcaktohet në bazë të hartës së vlerës së tokës, të miratuar me vendim të Këshillit të Ministrave.”.
 “3. ALUIZINI lidh kontratën e shitjes për kalimin e së drejtës së pronësisë mbi truallin, sipas modelit tip, si dhe njofton me shkrim subjektin e interesuar ose personin e stimuluar që plotëson kushtet e parashikuara në këtë ligj dhe për masën e çmimit.  Modeli tip i kontratës së shitjes miratohet me urdhër nga ministri përgjegjës.”.
Neni 9
Shkonja “a”, e pikës 3, të nenit 11, shfuqizohet.
Neni 10
Në nenin 14, të kreut III, “Procedura e përllogaritjes së çmimit të truallit”, bëhen ndryshimet e mëposhtme:
1. Pika 1 ndryshohet, si më poshtë vijon:
“1. Çmimi i truallit të paguhet i plotë.”.
2. Pika 2 shfuqizohet.
3. Pika 3 ndryshohet, si më poshtë vijon:
“3. Të ardhurat nga kalimi i së drejtës së pronësisë së truallit ndahen, si më poshtë vijon:
· 80% të vlerës në buxhetin e shtetit për fondin e kompensimit financiar të parashikuar nga ligji nr.9235 datë 29.7.2004, “Për kthimin dhe kompensimin e pronës”, të ndryshuar, për Agjencinë e Kthimit dhe Kompensimit të Pronave;
· 20% të vlerës për llogari të ALUIZNI-t.
Të ardhurat e realizuara nga tarifat dhe tatimet administrohen sipas neneve 13 dhe 15, të këtij ligji.”.
Neni 11
Fjalia e fundit, e nenit 15/1, ndryshohet, si më poshtë vijon:
“Detyrimet e prapambetura llogariten nga AKT-ja deri në momentin e zgjidhjes së marrëveshjes.”.
Neni 12
Në nenin 16, të kreut IV, “Dispozita të fundit”, bëhen ndryshimet dhe shtesa e mëposhtme:
1. Pika 1 shfuqizohet.
2. Pika 2 ndryshohet, si më poshtë vijon:
“2. Mospagimi i çmimit nga subjekti i interesuar ose personi i stimuluar brenda 6 muajve nga njoftimi me shkrim, sipas pikës 3, të nenit 10, të këtij ligji, sjell penalitete në masën 10 për qind të çmimit total të truallit për çdo muaj vonesë.”.
3. Pas pikës 2 shtohet pika 3, me këtë përmbajtje:
“3. Nëse personi i stimuluar ka kryer shtesa mbi lejen e ndërtimit, do të ketë penalitete sipas nenit 43, të ligjit nr.9482, datë 3.4.2006, “Për legalizimin, urbanizimin dhe integrimin e ndërtimeve pa leje”, të ndryshuar”.
Neni 13
Dispozita kalimtare dhe të fundit
1. Të gjitha njësitë e ndërtuara, të cilat janë në proces legalizmi, pas hyrjes në fuqi të këtij ligji, do t’i nënshtrohen zbatimit të këtij ligji dhe akteve nënligjore të dala në zbatim të tij.
2. Të gjitha subjektet e interesuara apo personat e stimuluar, të cilët, në momentin e hyrjes në fuqi të këtij ligji, nuk e kanë lidhur ende kontratën për kalimin e pronësisë mbi truallin, do të trajtohen sipas këtij ligji.
    Ky ligj hyn në fuqi 15 ditë pas botimit në “Fletoren zyrtare”.
K R Y E T A R I
ILIR  META

© Qeveria Shqiptare Keshilli i Ministrave 2022. Të gjitha të drejtat e rezervuara.