Shqipëria po kalon një fazë transformimi të gjithanshëm, ku reformat strukturore, investimet strategjike dhe procesi i integrimit europian po ecin paralelisht për të ndërtuar një shtet më modern, më konkurrues dhe më afër standardeve të Bashkimit Europian. Nga infrastruktura, energjia dhe sektori i ujit, te shëndetësia, arsimi, inovacioni, zhvillimi ekonomik dhe forcimi i institucioneve, ndryshimet e viteve të fundit kanë krijuar baza të reja për rritje të qëndrueshme dhe përmirësim të cilësisë së jetës së qytetarëve.

 

* * *

Turizëm europian, përvojë shqiptare

Shqipëria ka kaluar nga një destinacion në zhvillim, në një atraksion turistik me rëndësi ndërkombëtare, duke u pozicionuar sot në hartën globale të turizmit. Nga rreth 2 milionë vizitorë disa vite më parë, vendi mirëpret mbi 12 milionë turistë, ndërsa investimet e huaja janë rritur në mënyrë eksponenciale, duke arritur në rreth 1.5 miliardë euro në vit. Nga një vend ku deri dje nuk afrohej asnjë investitor, sot ngjall një interes të jashtëzakonshëm për investime.

Ky transformim nuk është vetëm statistikë turistike, por një ndryshim strukturor i ekonomisë. Turizmi kontribuon sot me rreth 21% të PBB-së, gjeneron mijëra vende pune dhe ka aktivizuar zhvillimin e zonave rurale, bregdetare dhe malore. Ai ka shërbyer si katalizator për sektorë të tjerë si ndërtimi, transporti, bujqësia dhe shërbimet.

Paralelisht, rritja e vizitorëve në site kulturore (+51%) tregon se turizmi po kthehet në një urë lidhëse mes ekonomisë dhe identitetit kulturor. Shqipëria po kalon nga një model turizmi sezonal dhe voluminoz në një model cilësor, të qëndrueshëm dhe gjithëvjetor, të harmonizuar me standardet europiane.