Vendime të miratuara në mbledhjen e datës 12 mars 2014
V E N D I M
PËR
MIRATIMIN E LISTËS SË BARNAVE QË RIMBURSOHEN NGA FONDI I SIGURIMIT TË DETYRUESHËM TË KUJDESIT SHËNDETËSOR DHE TË MASËS SË MBULIMIT TË ÇMIMIT TË TYRE
Në mbështetje të nenit 100 të Kushtetutës, të neneve 4 e 20, shkronja “c”, të ligjit nr.10383, datë 24.2.2011, “Për sigurimin e detyrueshëm të kujdesit shëndetësor në Republikën e Shqipërisë”, të ndryshuar, dhe të ligjit nr.185/2013, “Për buxhetin e vitit 2014”, me propozimin e ministrit të Shëndetësisë, Këshilli i Ministrave
V E N D O S I:
1. Miratimin e listës së barnave që rimbursohen nga Fondi i Sigurimit të Detyrueshëm të Kujdesit Shëndetësor, që i bashkëlidhet këtij vendimi.
2. Masa e mbulimit të çmimeve të barnave të listës së barnave që rimbursohen, sipas klasifikimit ATC, të jetë 50 për qind deri në 100 për qind, sipas grupeve terapeutike dhe barnave dhënë në pasqyrën I, që i bashkëlidhet këtij vendimi.
3. Masa e mbulimit të çmimit të barnave për alternativën e parë në listën e barnave të rimbursueshme për kategorinë e pensionistëve të jetë 100 për qind.
4. Miratimin e marzheve të diferencuara të tregtimit, përkatësisht në masën 8 për qind, për tregtimin me shumicë, dhe 24 për qind, për tregtimin me pakicë, për barnat e listës së barnave të rimbursueshme, si dhe të marzheve të diferencuara të tregtimit me shumicë e pakicë të disa barnave të listës, sipas pasqyrës II, që i bashkëlidhet këtij vendimi.
5. Efektet financiare të përballohen nga buxheti i vitit 2014, i miratuar për Fondin e Sigurimit të Detyrueshëm të Kujdesit Shëndetësor.
6. Ngarkohet Fondi i Sigurimit të Detyrueshëm të Kujdesit Shëndetësor të përcaktojë kufizimet në përdorimin, sasinë dhe kohëzgjatjen e trajtimit me barnat e kësaj liste.
7. Vendimi nr.102, datë 6.2.2013, i Këshillit të Ministrave, “Për miratimin e listës së barnave që rimbursohen nga Instituti i Sigurimit të Detyrueshëm të Kujdesit Shëndetësor dhe të masës së mbulimit të çmimit të tyre”, shfuqizohet.
8. Ngarkohen Ministria e Shëndetësisë dhe Fondi i Sigurimit të Detyrueshëm të Kujdesit Shëndetësor për zbatimin e këtij vendimi.
Ky vendim hyn në fuqi pas botimit në “Fletoren zyrtare” dhe i fillon efektet e tij në datën 1 prill 2014.
K R Y E M I N I S T R I
EDI RAMA
***
V E N D I M
PËR
PROCEDURAT E REKRUTIMIT, TË PËRZGJEDHJES, TË PERIUDHËS SË PROVËS, TË LËVIZJES PARALELE E TË NGRITJES NË DETYRË PËR NËPUNËSIT CIVILË TË KATEGORISË EKZEKUTIVE, TË ULËT DHE TË MESME DREJTUESE
Në mbështetje të nenit 100 të Kushtetutës dhe të neneve 22, pika 6, 23, pika 5, 24, pika 5, 25, pika 5, 26, pika 4, e 69, të ligjit nr.152/2013, “Për nëpunësin civil”, me propozimin e ministrit të Punëve të Brendshme dhe të ministrit të Shtetit për Inovacionin dhe Administratën Publike, Këshilli i Ministrave
V E N D O S I:
KREU I
DISPOZITA TË PËRGJITHSHME
1. Ky vendim rregullon procedurën e rekrutimit, të emërimit dhe periudhën e provës për nëpunësit civilë të kategorisë ekzekutive, si dhe procedurën e lëvizjes paralele e të ngritjes në detyrë.
2. Njësitë e qeverisjes vendore, për procesin e rekrutimit, me marrëveshje për bashkëpunim ndërkomunitar midis tyre ngrenë njësinë përgjegjëse të përbashkët, nëpërmjet së cilës mund të delegojnë pjesërisht ose plotësisht funksionet e njësisë së tyre përgjegjëse.
KREU II
PRANIMI NË SHËRBIMIN CIVIL NË KATEGORINË EKZEKUTIVE
1. Procedura e pranimit në shërbimin civil organizohet vetëm për kategorinë ekzekutive. Kjo procedurë organizohet në mënyrë të ndarë për grupin e pozicioneve të administrimit të përgjithshëm dhe për çdo grup të pozicioneve të administrimit të posaçëm.
2. DAP-i organizon procedurën e pranimit për të gjitha pozicionet e kategorisë ekzekutive për administratën shtetërore, ndërsa njësitë përgjegjëse në institucionet e pavarura/njësitë e qeverisjes vendore organizojnë procedurën për institucionet respektive.
3. Bazuar në planin vjetor të pranimit, njësia përgjegjëse njofton procedurën e pranimit për çdo grup, duke bërë të njohur edhe planin e zhvillimit të procedurës për secilin grup, jo më vonë se një muaj pas miratimit të këtij plani nga organet përgjegjëse, ose gjatë vitit kur shfaqet e nevojshme si rezultat i krijimit të vendeve vakante në mënyrë të paparashikuar.
4. Për institucionet e administratës shtetërore, shpallja e procedurës së pranimit për secilin grup publikohet në portalin “Shërbimi Kombëtar i Punësimit” dhe faqen zyrtare të DAP-it dhe qëndron e publikuar deri në përfundimin e procedurës së pranimit.
5. Institucionet e pavarura dhe njësitë e qeverisjes vendore bëjnë shpalljen e procedurës së pranimit për secilin grup në portalin “Shërbimi Kombëtar i Punësimit” dhe në stendat e informimit të publikut.
6. Institucionet, përveç mënyrave detyruese të shpalljeve të përcaktuara në pikat 4 dhe 5, të këtij vendimi, mund të përdorin si mënyra alternative të shpalljes së konkurrimit faqen e internetit të institucionit, si dhe çdo mjet tjetër të konsideruar të përshtatshëm për shpalljen, të njohur nga legjislacioni në fuqi.
7. Shpallja e procedurës së pranimit botohet të paktën 60 (gjashtëdhjetë) ditë kalendarike para datës së parashikuar për zhvillimin e konkurrimit.
8. Shpallja në portal dhe në faqen zyrtare të DAP-it përmban këto të dhëna:
a) Fushën kryesore mbi të cilën do të bazohet konkurrimi, si dhe aftësitë dhe cilësitë që do të vlerësohen në konkurrim;
b) Fazat në të cilën do të kalojë konkurrimi, me shkrim dhe me gojë;
c) Numrin e vendeve të planifikuara për të cilat do të bëhet pranimi;
ç) Kërkesat e përgjithshme, në përputhje me nenin 21, të ligjit nr.152/2013, “Për nëpunësin civil”;
d) Përshkrimin e përgjithshëm të punës së grupit/grupeve të administrimit të përgjithshëm/të posaçëm, për të cilin do të zhvillohet konkurrimi;
dh) Kërkesat e veçanta të grupit të administrimit të përgjithshëm/të
posaçëm;
e) Dokumentet që duhet të dorëzohen dhe mënyrën e dorëzimit të tyre;
ë) Afatin e dorëzimit të përcaktuar me datë të saktë kalendarike;
f) Datën e daljes së rezultateve për fazën e vlerësimit paraprak të kandidatëve;
g) Datën, vendin dhe orën ku do të zhvillohet konkurrimi;
gj) Mënyrën e vlerësimit të kandidatëve në fazën e verifikimit paraprak, si dhe në fazën e vlerësimit të kandidatëve;
h) Datën e daljes së rezultateve të konkurrimit;
i) Mënyrën e njoftimit dhe komunikimit me kandidatët.
9. Dokumentacioni duhet të dorëzohet jo më vonë se 30 (tridhjetë) ditë kalendarike nga dita e parë e shpalljes në portalin “Shërbimi Kombëtar i Punësimit”.
10. Lista e dokumenteve që duhet të plotësojë kandidati është sipas lidhjes nr.1, që i bashkëlidhet këtij vendimi dhe është pjesë përbërëse e tij.
KREU III
KOMITETI I PËRHERSHËM I PRANIMIT PËR NIVELIN EKZEKUTIV
1. DAP-i, për institucionet e administratës shtetërore, krijon Komitetin e Përhershëm të Pranimit (në vijim KPP), për pranimin për çdo grup të administrimit të përgjithshëm/të posaçëm.
2. Pranë institucioneve të pavarura dhe njësive të qeverisjes vendore krijohet një Komitet i Përhershëm i Pranimit për secilin institucion.
3. Në përbërje të Komitetit të Përhershëm të Pranimit janë pesë anëtarë, si më poshtë vijon:
a) 1 (një) anëtar nga njësia përgjegjëse, i cili kryeson KPP-në;
b) Për institucionet e administratës shtetërore 2 (dy) anëtarë nga burimet njerëzore të Kryeministrisë/ministrive, pjesë e kategorisë së mesme drejtuese, i përcaktuar me short çdo dy vjet, i organizuar nga DAP-i. Për institucionet e pavarura dhe njësitë e qeverisjes vendore, 2 (dy) anëtarë të zgjedhur nga titullari midis nëpunësve të institucionit, nëse është e mundur të nivelit të mesëm drejtues;
c) 2 (dy) ekspertë të fushës përkatëse, në varësi të fushës së vlerësimit për grupet përkatëse.
4. Ekspertët zgjidhen nga njësia përgjegjëse, për secilën KPP, duke pasur në konsideratë karakteristikat e secilit grup nëpunësish, për të cilët do të zhvillohet procedura e konkurrimit.
5. Ekspertët zgjidhen nga pedagogët e universiteteve apo institucioneve të tjera të arsimit të lartë, ekspertët e licencuar të fushave të ndryshme apo ekspertët që vijnë nga profesionet e rregulluara dhe që kanë të paktën 5 (pesë) vjet eksperiencë në atë pozicion pune/profesion.
6. Të dhënat për ekspertët e përmendur në pikën 3, të kreut III, të këtij vendimi, vendosen në një listë për secilën fushë të vlerësimit. Listat përditësohen nga DAP-i çdo dy vjet dhe në të përfshihen të gjithë ekspertët sipas fushës. Ekspertët nuk kanë të drejtë rizgjedhjeje të menjëhershme. Listat mund të përdoren edhe nga institucionet e pavarura dhe njësitë e qeverisjes vendore.
7. Për secilën KPP, njësia përgjegjëse zgjedh dy ekspertë efektivë dhe dy zëvendësues. Eksperti zëvendësues thirret nga njësia përgjegjëse në rast se ndonjëri prej ekspertëve efektivë ndodhet në pamundësi ligjore për të marrë pjesë në KPP.
8. Në rast mospranimi apo largimi të parakohshëm të një eksperti, ai zëvendësohet nga njësia përgjegjëse me një ekspert tjetër të së njëjtës fushë, për pjesën e mbetur të mandatit. Në këtë rast eksperti nuk përzgjidhet menjëherë pas përfundimit të këtij mandati.
9. Në rast se anëtarët e përcaktuar në shkronjat “a” dhe “b”, të pikës 3, të kreut III, janë në kushtet e pamundësisë ligjore për të qenë anëtarë të KPP-së, ata zëvendësohen me nëpunës të tjerë të të njëjtit institucion, nga organet e emërtesës.
10. Njësia përgjegjëse, 7 (shtatë) ditë para fazës së vlerësimit të kandidatëve, njofton Komitetin e Përhershëm të Pranimit për datën e zhvillimit të kësaj faze dhe për listën e kandidatëve.
11. Komiteti merr vendime në praninë e të gjithë anëtarëve të tij.
12. Për çështje procedure vendimet merren me votim nominal.
13. Për vlerësimin e rezultateve të konkurrimit për secilin kandidat, secili prej anëtarëve jep pikët e tij. Në përfundim pikët mblidhen dhe më pas nxirret mesatarja e përgjithshme, e cila përbën edhe vlerësimin përfundimtar të kandidatit.
14. KPP-ja përzgjedh një apo më shumë anëtarë të tij për të kryer sekretimin e testeve të kandidatëve pjesëmarrës.
15. Nëse është e nevojshme, njësia përgjegjëse mund të caktojë pranë KPP-ve, një ose më shumë nëpunës të organikës së tij, për të kryer veprimtarinë e mbështetjes teknike dhe të sekretariatit.
16. Ekspertët pjesëmarrës në KPP shpërblehen me shumën prej 10 000 (dhjetë mijë) lekë për çdo procedurë konkurrimi. Të gjitha shpenzimet përballohen nga buxheti i njësisë përgjegjëse.
17. Njësia përgjegjëse, për shpenzimet e të gjithë procesit të rekrutimit, ka një zë të veçantë në buxhetin e saj.
KREU IV
KONKURRIMI
1. Konkurrimi zhvillohet në dy faza:
a) Verifikimi paraprak, i cili ka për qëllim të verifikojë nëse kandidatët plotësojnë kërkesat e përgjithshme dhe ato të veçanta, të përcaktuara në shpalljen për konkurrim;
b) Vlerësimi i kandidatëve.
2. Njësia përgjegjëse, në bazë të dokumentacionit të paraqitur, jo më vonë se 5 (pesë) ditë pune nga data e mbylljes së pranimit të tyre, bën verifikimin paraprak të kandidatëve, që përmbushin kërkesat e përgjithshme dhe të veçanta, të përcaktuara në shpalljen për konkurrim.
3. Në përfundim të verifikimit sipas pikës 2, të kreut IV, të këtij vendimi, kandidatët, të cilët plotësojnë kërkesat e përgjithshme dhe të veçanta të pozicionit të punës, renditen në një listë sipas rendit alfabetik.
4. Lista e përmendur në pikën 3 më sipër administrohet nga njësia përgjegjëse dhe shpallet:
a) në portalin “Shërbimi Kombëtar i Punësimit” dhe në faqen zyrtare të DAP-it, për administratën shtetërore;
b) në portalin “Shërbimi Kombëtar i Punësimit”, në faqen zyrtare të internetit dhe në ambientet e brendshme, për institucionet e pavaruara dhe njësitë e qeverisjes vendore.
5. Kandidatët, që nuk plotësojnë kërkesat e përcaktuara në shpalljen për konkurrim, renditen në një listë të veçantë, në të cilën tregohen edhe arsyet e mosplotësimit të këtyre kërkesave. Lista administrohet nga njësia përgjegjëse dhe nuk bëhet publike. Kandidatët që nuk janë kualifikuar njoftohen nga njësia përgjegjëse.
6. Brenda 5 (pesë) ditëve kalendarike nga data e shpalljes së listës në përputhje me pikën 4, të kreut IV, të këtij vendimi, kandidati ka të drejtë të paraqesë ankesë pranë njësisë përgjegjëse. Ankuesi merr përgjigje brenda 5 (pesë) ditëve kalendarike nga data e depozitimit të saj.
7. Në vlerësimin e kandidatëve përfshihen:
a) vlerësimi i jetëshkrimit të kandidatëve, që konsiston në vlerësimin e arsimimit, të eksperiencës e të trajnimeve, të lidhura me fushën, si dhe vlerësimet e arritjeve vjetore;
b) vlerësimi me shkrim;
c) intervista e strukturuar me gojë.
8. Totali i pikëve të vlerësimit të kandidatëve është 100, të cilat ndahen përkatësisht:
a) Për vlerësimin e jetëshkrimit (cv) të kandidatëve, që konsiston në vlerësimin e arsimimit, të eksperiencës e të trajnimeve, të lidhura me fushën, si dhe vlerësimet e arritjeve vjetore, 15 pikë;
b) Për intervistën e strukturuar me gojë, 15 pikë;
c) Për vlerësimin me shkrim, 70 pikë.
9. KPP-ja, 24 (njëzet e katër) orë përpara zhvillimit të fazës së vlerësimit të kandidatëve, përgatit një grup pyetjesh për testimin e fushës së njohurive, të aftësive e të cilësive të shpallura sipas pikës 8, të kreut II, të këtij vendimi.
10. KPP-ja, ditën e testimit, përgatit një grup të njëjtë pyetjesh për të gjithë kandidatët për intervistën e strukturuar me gojë. Intervista e strukturuar me gojë ka për qëllim vlerësimin e jetëshkrimit, të njohurive dhe të aftësive të kandidatëve.
11. Nëse kandidati grumbullon të paktën 40 pikë nga vlerësimi me shkrim, ai i nënshtrohet intervistës së strukturuar me gojë.
12. KPP-ja, në përfundim të fazës së vlerësimit të kandidatëve, liston kandidatët fitues me mbi 70 pikë (mbi 70 % të pikëve), duke filluar nga kandidati me rezultatin më të lartë.
13. Kandidatët me pikë të barabarta renditen sipas këtyre kritereve:
a) Në rast se njëri prej kandidatëve përfshihet në kategorinë e personave me aftësi të kufizuar, atëherë ai përzgjidhet i pari në raport me kandidatin tjetër;
b) Në rast se kandidatët janë të gjinive të ndryshme, atëherë renditja bëhet duke u renditur i pari kandidati që i përket gjinisë më pak të përfaqësuar në grupin për të cilin konkurrohet. Gjinia më pak e përfaqësuar përcaktohet nga njësia përgjegjëse;
c) Në rast se nuk mund të aplikohet asnjëra nga alternativat e mësipërme, atëherë renditja e kandidatëve me pikë të barabarta bëhet nëpërmjet shortit.
14. Nëse asnjë nga kandidatët nuk merr 70 pikë (70 % të pikëve), atëherë komiteti vendos përfundimin e fazës së vlerësimit të kandidatëve pa asnjë të përzgjedhur fitues.
15. Njësia përgjegjëse, në kushtet e rezultatit pa asnjë fitues ose me më pak fitues se planifikimi, rihap procedurën e pranimit në shërbimin civil, brenda 3 (tri) ditëve kalendarike nga marrja e vendimit të KPP-së. Në këtë rast, afati i dorëzimit të dokumenteve është 15 (pesëmbëdhjetë) ditë kalendarike.
16. Për institucionet e administratës shtetërore, lista e fituesve shpallet në portalin “Shërbimi Kombëtar i Punësimit” dhe në faqen zyrtare të DAP-it dhe, nëse është e mundur, në faqen e internetit të institucionit.
17. Për institucionet e pavarura dhe njësitë e qeverisjes vendore, lista e fituesve shpallet në portalin “Shërbimi Kombëtar i Punësimit” dhe në stendat e informimit të publikut.
18. Kandidatët, që kanë marrë më pak se 70 pikë (70% të pikëve), renditen në një listë të posaçme, e cila nuk bëhet publike. Kandidatët, që nuk janë shpallur fitues, njoftohen nga njësia përgjegjëse.
19. Administrimi i listës së fituesve të nxjerrë nga KPP-ja bëhet nga njësia përgjegjëse.
20. Njësia përgjegjëse, brenda 3 (tri) ditëve kalendarike nga data e shpalljes së listës fituese, fton kandidatët fitues, duke respektuar renditjen e tyre, të zgjedhin nga lista e pozicioneve ekzistuese të lira, për të cilat kanë konkurruar.
21. Në rast refuzimi të kandidatit fitues për vendet vakante të propozuara apo në rast të mosemërimit të tij në një pozicion vakant ekzistues, kandidati vazhdon të qëndrojë në listën e fituesve për një periudhë dyvjeçare. Këtyre kandidatëve iu propozohen vendet e lira që mund të krijohen gjatë kësaj periudhe.
22. Njësia përgjegjëse, pas marrjes së miratimit zyrtar nga kandidati fitues, nxjerr aktin e emërimit, drejtuar kandidatit dhe institucionit të përzgjedhur.
23. Kandidati, pavarësisht nga e drejta për t’u ankuar në gjykatën administrative, ka të drejtë të bëjë ankim edhe në KPP për rezultatin e pikëve dhe renditjen në listën fituese, brenda 10 (dhjetë) ditëve kalendarike nga data e marrjes së rezultateve të vlerësimit. Ankuesi merr përgjigje brenda 5 (pesë) ditëve pune nga data e depozitimit të ankesës.
KREU V
PERIUDHA E PROVËS
1. Nëpunësi, që emërohet për herë të parë në shërbimin civil, i nënshtrohet një periudhe prove që zgjat një vit nga data e aktit të emërimit.
2. Gjatë periudhës së provës nëpunësi është i detyruar të ndjekë:
a) programin e detyrueshëm të trajnimit për periudhën e provës pranë ASPA-s;
b) udhëzimet e nëpunësit më të vjetër civil, nën kujdesin e të cilit ai është vendosur.
3. Nëpunësi më i vjetër civil përzgjidhet nëpunësi, i cili ka vjetërsinë më të madhe në detyrë dhe që bën pjesë në të njëjtën njësi organizative ku është emëruar nëpunësi në periudhë prove.
4. Nëpunësi më i vjetër civil duhet të jetë i së njëjtës kategori ose i një kategorie më të lartë dhe caktohet nga eprori direkt i nëpunësit në periudhë prove.
5. Eprori direkt, në rast largimi apo pamundësie të ushtrimit të detyrës nga nëpunësi më i vjetër në detyrë, merr masa për zëvendësimin e tij me nëpunësin e dytë më të vjetër në detyrë brenda së njëjtës njësi organizative.
6. Vendimi në përfundim të periudhës së provës merret bazuar në:
a) rezultatin e testimit në përfundim të ciklit të detyrueshëm të trajnimit në ASPA;
b) vlerësimin e rezultateve individuale në punë i cili bëhet sipas procedurave të përcaktuara në vendimin e Këshillit të Ministrave për vlerësimin e arritjeve vjetore.
7. Bazuar në vlerësimet sipas pikës 6, të kreut V, të këtij vendimi, dhe pas marrjes së mendimit me shkrim nga nëpunësi civil më i vjetër, i përcaktuar sipas pikave 4 dhe 5, të kreut V, të këtij vendimi, eprori direkt është i detyruar të vendosë:
a) konfirmimin e nëpunësit civil, nëse ka përfunduar me sukses trajnimin e detyrueshëm në ASPA dhe është vlerësuar të paktën “kënaqshëm”;
b) zgjatjen një herë të vetme deri në 6 (gjashtë) muaj të periudhës së provës, në rast të mospërfundimit me sukses të trajnimit të detyrueshëm në ASPA, pamundësisë së vlerësimit të plotë të nëpunësit, në rastet e mungesës në detyrë të nëpunësit për shkak të trajnimit afatgjatë, raportit mjekësor afatgjatë dhe në raste të tjera, të parashikuara nga legjislacioni në fuqi, të cilat rregullojnë mungesën në detyrë të nëpunësit;
c) moskonfirmimin e nëpunësit civil.
8. Mosrealizimi i procedurës së përcaktuar në pikën 7 më sipër konsiderohet “mospërmbushje detyre” nga eprori direkt.
9. Në rast se gjatë periudhës së provës eprori direkt apo nëpunësi më i vjetër largohet nga ai pozicion pune apo ndodhet në pamundësi të vazhdimit të mëtejshëm të detyrës, ai është i detyruar të bëjë një vlerësim paraprak për nëpunësin në periudhë prove.
10.Vlerësimi paraprak merret si bazë nga nëpunësi zëvendësues në vlerësimin e tij përfundimtar.
11.Në rast se marrja e vlerësimit paraprak është e pamundur, nëpunësi zëvendësues bazohet në vlerësimet e herëpashershme.
12.Vendimi i eprorit direkt sipas pikës 7, të kreut V, të këtij vendimi duhet të jetë i arsyetuar dhe i njoftohet nëpunësit brenda 3 (tri) ditëve pune nga data e marrjes së vendimit.
13.Nëpunësi civil, pavarësisht nga e drejta për t’u ankuar në gjykatën administrative, brenda 5 (pesë) ditëve pune ushtron të drejtën e ankimit administrativ ndaj vendimit të eprorit direkt te nëpunësi më i lartë civil i institucionit, i cili merr vendim të arsyetuar për pranimin apo rrëzimin e ankesës brenda 5 (pesë) ditëve pune.
KREU VI
LËVIZJA PARALELE BRENDA SË NJËJTËS KATEGORI
1. Procedura e lëvizjes paralele bëhet për plotësimin e vendeve të lira në kategorinë ekzekutive, të ulët dhe të mesme drejtuese në çdo institucion të shërbimit civil.
2. Kushtet minimale që duhet të plotësojë kandidati për këtë procedurë janë:
a) Të jetë nëpunës civil i konfirmuar, brenda së njëjtës kategori për të cilën aplikon;
b) Të mos ketë masë disiplinore në fuqi;
c) Të ketë të paktën një vlerësim pozitiv;
ç) Të plotësojë kriteret e veçanta të përcaktuara në shpalljen për konkurrim.
3. Shpallja për vendin e lirë, që do të plotësohet nëpërmjet procedurës së lëvizjes paralele, bëhet sipas pikave 4, 5, 6 dhe 10, të kreut II, të këtij vendimi.
4. Shpallja qëndron në portal deri në përfundimin e procedurës së konkurrimit. Në shpallje përcaktohen:
a) pozicioni i punës që është vakant;
b) përshkrimi i përgjithshëm i punës për atë pozicion;
c) kushtet për lëvizjen paralele dhe kriteret e veçanta që duhet të
plotësojnë kandidatët;
ç) dokumentet që duhet të dorëzohen dhe mënyra e dorëzimit të tyre;
d) afati i dorëzimit të përcaktuar me datë të saktë kalendarike;
dh) data e daljes së rezultateve për fazën e verifikimit paraprak të kushteve minimale të procedurës së lëvizjes paralele dhe të përmbushjes së kritereve specifike të vendit të punës;
e) data, vendi dhe ora ku do të zhvillohet intervista;
ë) fushat e njohurive, aftësitë dhe cilësitë që do të vlerësohen në
intervistë;
f) mënyra e vlerësimit të kandidatëve;
g) data e daljes së rezultateve të konkurrimit;
gj) mënyra e njoftimit dhe komunikimit me kandidatët.
5. Shpallja është e hapur për të gjithë nëpunësit civilë të së njëjtës kategori në të gjitha institucionet pjesë e shërbimit civil. Në rastin e lëvizjes paralele, afati i dorëzimit të dokumenteve është 30 (tridhjetë) ditë kalendarike nga momenti i shpalljes në portal.
6. Procedura e lëvizjes paralele përfshin dy faza:
a) Verifikimin e kandidatëve, të cilët përmbushin kushtet e lëvizjes paralele dhe kërkesat e veçanta të përcaktuara në shpalljen për konkurrim;
b) Vlerësimin e kandidatëve, ku përfshihen vlerësimi i jetëshkrimit, eksperienca, trajnimet, kualifikimet e lidhura me fushën përkatëse, si dhe vlerësimet pozitive dhe intervista e strukturuar me gojë.
7. Njësia e menaxhimit të burimeve njerëzore bën verifikimin e kandidatëve, të cilët përmbushin kushtet e lëvizjes paralele dhe kërkesat e veçanta të përcaktuara në shpalljen për konkurrim.
8. Kandidatët, që plotësojnë kushtet e lëvizjes paralele dhe kërkesat e veçanta, të përcaktuara në shpalljen për konkurrim, renditen nga njësia e menaxhimit të burimeve njerëzore sipas rendit alfabetik dhe i paraqiten nëpunësit më të lartë civil të institucionit, brenda të cilit është vendi vakant apo ka në varësi institucionin ku është vendi vakant.
9.Kandidatët që nuk kualifikohen njoftohen individualisht nga njësia menaxhuese e burimeve njerëzore për shkaqet e moskualifikimit.
10. Lista paraprake e verifikimit të kandidatëve shpallet në portalin “Shërbimi Kombëtar i Punësimit” dhe në faqen e internetit të institucionit, ndërsa për institucionet e pavarura dhe njësitë e qeverisjes vendore, në portalin “Shërbimi Kombëtar i Punësimit” dhe në stendat e informimit të publikut.
11. Kandidatët, të cilët rezultojnë të pakualifikuar, brenda 3 (tri) ditëve pune nga data e shpalljes së listës paraprake të verifikimit të kandidatëve, paraqesin ankesat në njësinë e menaxhimit të burimeve njerëzore. Ankesat zgjidhen brenda 3 (tri) ditëve pune nga data e paraqitjes së tyre.
12. Pas përfundimit të procedurës së mësipërme, nëpunësi më i lartë civil i institucionit, brenda 3 (tri) ditëve pune urdhëron ngritjen e komisionit të brendshëm, i cili ka në përbërje tre anëtarë, si më poshtë vijon:
a) 1 (një) përfaqësues nga njësia e burimeve njerëzore të institucionit, kur është e mundur, i të njëjtit nivel ose i një niveli më të lartë se pozicioni që rekrutohet;
b) eprorin direkt;
c) 1(një) përfaqësues nga DAP-i për institucionet e administratës shtetërore. Në rastin e institucioneve të pavarura dhe njësive të qeverisjes vendore, anëtari i tretë emërohet nga titullari i institucionit.
13. Në rast pamundësie të pjesëmarrjes së anëtarëve të mësipërm, sekretari i përgjithshëm dhe njësia përgjegjëse marrin masa për zëvendësimin e tyre me anëtarë të tjerë.
14. Komisioni i brendshëm zhvillon një intervistë me gojë me secilin prej kandidatëve. Komisioni, për intervistën me gojë, përgatit përpara fillimit të vlerësimit një grup pyetjesh, të cilat janë të njëjta për të gjithë kandidatët.
15. Komisioni, në marrjen e vendimit përfundimtar për vlerësimin e kandidatëve, mban në konsideratë edhe rastet kur nëpunësi ka vlerësime pozitive të rezultateve individuale vjetore në punë.
16. Struktura e ndarjes së pikëve të vlerësimit të kandidatëve, është si më poshtë vijon:
a) 40 pikë për dokumentacionin e dorëzuar, i ndarë: 10 pikë për jetëshkrimin, 10 pikë për eksperiencën, 5 pikë për trajnimet, 10 pikë për kualifikimet e lidhura me fushën përkatëse, si dhe 5 pikë për vlerësimet pozitive;
b) 60 pikë intervista me gojë.
17. Komisioni, në përfundim të vlerësimit, përzgjedh kandidatin, i cili renditet i pari me pikët maksimale për t’u emëruar në vendin e lirë. Në rastet e kandidatëve me pikë të barabarta, zbatohet parashikimi i pikës 13, të kreut IV, të këtij vendimi.
18. Nëse nuk ka një fitues, komisioni përfundon procedurën pa asnjë të përzgjedhur dhe institucioni dërgon në njësinë përgjegjëse kërkesën për rekrutimin në kategorinë ekzekutive apo ngritjen në detyrë për kategoritë e tjera.
19. Në rastin e përzgjedhjes së kandidatit fitues, komisioni ia njofton vendimin e përzgjedhjes njësisë përgjegjëse për nxjerrjen e aktit të emërimit.
20. Njësia përgjegjëse, brenda 3 (tri) ditëve kalendarike, shpall fituesin dhe bën aktin e emërimit të kandidatit. Shpallja e fituesit bëhet në portalin “Shërbimi Kombëtar i Punësimit” dhe në faqen e internetit të institucionit, ndërsa për institucionet e pavarura dhe njësitë e qeverisjes vendore, përveç portalit, ajo bëhet edhe në stendat e informimit të publikut.
21. Nëpunësi civil i emëruar nuk i nënshtrohet periudhës së provës.
KREU VII
NGRITJA NË DETYRË
1. Në rastet kur një vend vakant në kategorinë e nivelit të mesëm apo të ulët drejtues nuk plotësohet nëpërmjet procedurës së lëvizjes paralele, njësia përgjegjëse shpall procedurën e ngritjes në detyrë.
2. Plotësimi i vendeve të lira me procedurën e ngritjes në detyrë është i hapur për nëpunësit civilë të një kategorie më të ulët, në të njëjtin institucion apo institucione të tjera të shërbimit civil dhe që plotësojnë minimalisht kushtet e mëposhtme:
a) Të jetë nëpunës civil i konfirmuar;
b) Të mos ketë masë disiplinore në fuqi;
c) Të ketë të paktën një vlerësim pozitiv;
ç) Të plotësojë kushtet e tjera të përcaktuara në vendimin e Këshillit të
Ministrave për klasifikimin e pozicioneve në shërbimin civil;
d) Të përmbushë kriteret e veçanta të përcaktuara në shpalljen për
konkurrim.
3. Rregullat për procedurën e rekrutimit siç parashikohet nga pikat 3-10, të kreut II, pikat 1-17, të kreut III, dhe pikat 1- 23, të kreut IV, të këtij vendimi, do të zbatohen edhe për procedurën e ngritjes në detyrë, me përjashtim të rastit, kur parashikohet ndryshe në këtë kre.
4. Vlerësimi i kandidatëve për ngritjen në detyrë realizohet nga Komisioni i Ngritjes në Detyrë, i cili ka në përbërje:
a) 1 (një) anëtar nga njësia përgjegjëse, i cili kryeson komisionin;
b) Për institucionet e administratës shtetërore, 1(një) anëtar nga burimet njerëzore të institucionit, pjesë e kategorisë se mesme drejtuese, i përcaktuar me short çdo dy vjet i organizuar nga DAP-i. Për institucionet e pavarura dhe njësitë e qeverisjes vendore, 1(një) anëtar i zgjedhur nga titullari midis nëpunësve civilë të institucionit, nëse është e mundur të nivelit të mesëm drejtues;
c) Eprorin direkt të pozicionit, për të cilin zhvillohet konkurrimi;
ç) 2 (dy) ekspertë të fushës përkatëse, në varësi të fushës së vlerësimit.
5. Funksionimi i komisionit të ngritjes në detyrë dhe përzgjedhja e ekspertëve të fushës përkatëse në këtë komision bëhen sipas rregullave të përcaktuara për Komitetin e Përhershëm të Pranimit.
6. Struktura e ndarjes së pikëve të vlerësimit të kandidatëve është, si më poshtë vijon:
Totali i pikëve është 100, nga të cilat:
a) 20 pikë për dokumentacionin e dorëzuar (eksperiencë, trajnime, kualifikime të lidhura me fushën përkatëse, si dhe 2 vlerësimet e fundit pozitive);
b) 40 pikë për intervistën e strukturuar me gojë;
c) 40 pikë për vlerësimin me shkrim.
7. Kandidati/kandidatët fitues është/janë ai/ata që renditet/en i pari/të parët nga kandidatët që kanë marrë të paktën 70 pikë (70% të pikëve). Në rastet e kandidatëve me pikë të barabarta, zbatohen parashikimet e pikës 13, të kreut IV, të këtij vendimi.
8. Nëse konkurrohet për më shumë se një pozicion pune, njësia përgjegjëse, brenda 3 (tri) ditëve kalendarike nga data e shpalljes së listës së fituesve, i propozon kandidatëve fitues, duke respektuar renditjen e tyre, listën e pozicioneve të punës.
9. Njësia përgjegjëse, pas marrjes së miratimit zyrtar nga kandidati fitues, nxjerr aktin e emërimit drejtuar kandidatit dhe institucionit të përzgjedhur.
10. Shpallja e kandidatit fitues bëhet në portalin “Shërbimi Kombëtar i Punësimit” dhe në faqen e internetit të institucionit, ndërsa për institucionet e pavarura dhe njësitë e qeverisjes vendore, përveç portalit, ajo bëhet edhe në stendat e informimit të publikut.
11. Nëse vendi i lirë nuk plotësohet nëpërmjet procedurës së ngritjes në detyrë, një procedurë tjetër e lëvizjes paralele apo ngritjes në detyrë mund të organizohet brenda një afati 3-mujor.
12. Brenda afatit 3-mujor të përcaktuar në pikën 11, vendi vakant për nevojat e institucionit mund plotësohet nga njësia përgjegjëse duke respektuar parashikimin e shkronjës “a”, të pikës 1, të nenit 48, të ligjit 152/2013, “Për nëpunësin civil”.
KREU VIII
PORTALI I REKRUTIMIT NË SHËRBIMIN CIVIL
1. Publikimi elektronik i të gjithë informacionit që i përket rekrutimit, lëvizjes paralele dhe ngritjes në detyrë të nëpunësve civilë realizohet në portalin e “Shërbimi Kombëtar i Punësimit” dhe në faqen zyrtare të DAP-it.
2. Shërbimi Kombëtar i Punësimit është përgjegjës për publikimin elektronik të informacionit në lidhje me rekrutimin, lëvizjen paralele dhe ngritjen në detyrë të nëpunësve civilë, si një nga shërbimet e ofruara në portalin “Shërbimi Kombëtar i Punësimit”.
3. DAP-i është përgjegjës për publikimin elektronik në faqen zyrtare të procedurave dhe informacionit në lidhje me pranimin, lëvizjen paralele dhe ngritjen në detyrë të nëpunësve civilë.
4. Njësitë përgjegjëse të institucioneve të pavarura dhe njësive të qeverisjes vendore janë përgjegjëse për publikimin elektronik të informacionit në lidhje me pranimin, lëvizjen paralele dhe ngritjen në detyrë të nëpunësve civilë, në portalin “Shërbimi Kombëtar i Punësimit”.
5. Institucionet përkatëse, që administrojnë respektivisht portalin “Shërbimi Kombëtar i Punësimit” dhe faqen zyrtare të DAP-it, duhet të marrin masat për të ofruar kapacitetet dhe zgjidhjen me strukturën e nevojshme dhe të përshtatshme për të lehtësuar realizimin praktik dhe operimin e pandërprerë të publikimeve elektronike që lidhen me pranimin në shërbimin civil.
6. Shpenzimet për operimin, mirëmbajtjen dhe përditësimin në mënyrë të vazhdueshme të të gjithë informacionit të publikuar elektronikisht në portalin “Shërbimi Kombëtar i Punësimit” përbëjnë një zë të veçantë në buxhetin e Shërbimit Kombëtar të Punësimit.
7. Shpenzimet për operimin, mirëmbajtjen dhe përditësimin në mënyrë të vazhdueshme të të gjithë informacionit të publikuar elektronikisht në faqen zyrtare të Departamentit të Administratës Publike përbëjnë një zë të veçantë në buxhetin e DAP-it.
8. Vlefshmëria e informacionit, publikimeve dhe dokumenteve të tjera elektronike të publikuara në portal dhe në faqen zyrtare rregullohen nga legjislacioni përkatës për dokumentet elektronike.
KREU IX
DISPOZITA TRANSITORE
1. Deri në vënien në funksionim të portalit “Shërbimi Kombëtar i Punësimit”, përdoren mënyrat e njohura të komunikimit dhe njoftimit, sipas shkronjës “ç”, të pikës 1, të nenit 60, të ligjit nr.8485, datë 12.5.1999, “Kodi i Procedurave Administrative të Republikës së Shqipërisë”.
2. Ngarkohet drejtori i Departamentit të Administratës Publike të nxjerrë udhëzuesin përkatës, për procedurat e detajuara për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
PËRSHKRIMIN DHE KLASIFIKIMIN E POZICIONEVE TË PUNËS NË INSTITUCIONET E ADMINISTRATËS SHTETËRORE DHE INSTITUCIONET E PAVARURA
Në mbështetje të nenit 100 të Kushtetutës dhe të neneve 19 dhe 69, të ligjit nr.152/2013, “Për nëpunësin civil”, me propozimin e ministrit të Punëve të Brendshme dhe të ministrit të Shtetit për Inovacionin dhe Administratën Publike, Këshilli i Ministrave
V E N D O S I:
I. Dispozita të përgjithshme
1. Ky vendim përcakton:
a) klasat e zbatueshme për secilën nga kategoritë e përcaktuara në nenin 19, të ligjit nr.152/2013, “Për nëpunësin civil”;
b) përshkrimin e përgjithshëm të punës dhe kërkesat e përgjithshme për çdo kategori, klasë dhe grup;
c) pozicionet që bëjnë pjesë në çdo kategori, klasë dhe grup;
ç) metodologjinë e klasifikimit të një pozicioni në një kategori, klasë dhe grup të caktuar.
2. Vendimi është i zbatueshëm për të gjitha institucionet pjesë të shërbimit civil, ku përfshihen: institucionet e administratës shtetërore, institucionet e pavarura kushtetuese apo të krijuara me ligj të posaçëm, si dhe qarqet, bashkitë dhe komunat.
3. Për qëllim të këtij vendimi, institucionet e administratës shtetërore janë sipas lidhjes 1, bashkëlidhur këtij vendimi dhe pjesë përbërëse e tij.
4. Përkufizime:
a) “Analisti i punës”, nëpunësi përgjegjës për mbledhjen e informacionit për pozicionin e punës dhe analizimin e këtij informacioni me qëllim përcaktimin e saktë të detyrave, përgjegjësive e kërkesave të veçanta të pozicionit dhe hartimin e përshkrimit të punës;
b) “Aftësi”, zotësia për të kryer një ose disa veprime të vëzhgueshme që kanë si rezultat një produkt të matshëm ose të dukshëm;
c) “Njohuri”, tërësia e njohurive/informacionit që zbatohet direkt në kryerjen e detyrave të pozicionit të punës;
ç) “Vlerësim pune”, zbatimi i metodave për vlerësimin e punës me qëllim përcaktimin e vlerës relative të çdo pozicioni pune në shërbimin civil dhe klasifikimin racional në kategorinë dhe klasën përkatëse.
II. KLASIFIKIMI
5. Klasat e zbatueshme për secilën kategori, si dhe emërtesat e pozicioneve të punës që i përkasin secilës klasë të jenë, si më poshtë vijon:
Kategoria I – Nëpunës civilë të nivelit të lartë drejtues
Klasa Emërtimi i pozicionit
1 Sekretar i Përgjithshëm në Këshillin e Ministrave, Presidencë, Kuvend dhe institucione të pavarura kushtetuese.
2 Sekretar i Përgjithshëm në ministritë e linjës, institucionet e pavarura të krijuara me ligj/drejtor departamenti/ titullarë të institucioneve në varësi të Kryeministrit apo ministrave të linjës.
3 Sekretar i Përgjithshëm në qarqe, bashki, komuna, drejtor i Drejtorisë së Përgjithshme në Kryeministri, ministritë e linjës, institucionet e pavarura të krijuara me ligj/titullarë të institucioneve në varësi të Kryeministrit apo ministrave të linjës.
Kategoria II – Nëpunës civilë të nivelit të mesëm drejtues
Klasa Emërtimi i pozicionit
1 Drejtor i Drejtorisë së Përgjithshme në qarqe, bashki, komuna, drejtor drejtorie në Kryeministri, ministritë e linjës, institucione të pavarura të krijuara me ligj, titullarë të institucioneve në varësi të ministrave të linjës, drejtor drejtorie në institucionet në varësi të Kryeministrit apo ministrave të linjës;
2 Drejtor drejtorie në institucionet në varësi të Këshillit të Ministrave, ministrave të linjës, qarqe, bashki, komuna.
Kategoria III – Nëpunës civilë të nivelit të ulët drejtues
Klasa Emërtimi i pozicionit
1 Shef sektori i nivelit A;
2 Shef sektori i nivelit B.
Kategoria IV – Nëpunës civilë të kategorisë ekzekutive
Klasa Emërtimi i pozicionit
1 Specialist i nivelit A;
2 Specialist i nivelit B;
3 Specialist i nivelit C;
4 Specialist i nivelit D.
6. Këshilli i Ministrave, me propozimin e ministrit përgjegjës për administratën publike, përcakton pozicionet e barasvlefshme për secilën nga klasat e nivelit të lartë drejtues, të mesëm drejtues dhe të ulët drejtues.
7. Vlerësimi i pozicioneve për rastet e parashikuara në pikën 6, të nënndarjes II, të këtij vendimi, bëhet nga Departamenti i Administratës Publike, pas marrjes së kërkesës nga ministri/institucioni i pavarur. Departamenti i Administratës Publike ia përcjell vlerësimin ministrit përgjegjës për administratën publike për propozimin e mëtejshëm në Këshillin e Ministrave.
8. Përshkrimi i përgjithshëm i punës, si dhe kërkesat për pranimin në çdo kategori dhe klasë përcaktohen në lidhjen 2, bashkëlidhur dhe pjesë përbërëse e këtij vendimi.
III. Grupet e pozicioneve të punës
9. Pozicionet e shërbimit civil të kategorisë ekzekutive klasifikohen sipas natyrës së pozicionit në:
a) grupet e pozicioneve të administrimit të posaçëm dhe;
b) grupin e pozicioneve të administrimit të përgjithshëm.
10. Secili grup i administrimit të posaçëm përfshin pozicionet e ngjashme, në një apo më shumë institucione të shërbimit civil, që kanë të bëjnë me ushtrimin e përgjegjësive specifike, kryerja me sukses e të cilave kërkon njohuri dhe aftësi të posaçme, të cilat burojnë dhe lidhen domosdoshmërisht me zotërimin e një apo disa profesioneve të ngjashme.
11. Grupi i pozicioneve të administrimit të përgjithshëm përfshin të gjitha pozicionet që nuk janë pjesë e një grupi të administrimit të posaçëm dhe që kanë të bëjnë me ushtrimin e përgjegjësive të përgjithshme administrative, kryerja me sukses e të cilave kërkon njohuri dhe aftësi të përgjithshme administrative, të cilat nuk burojnë apo lidhen domosdoshmërisht me një ose disa profesione te caktuara.
12. Grupet e pozicioneve të administrimit të posaçëm përcaktohen në lidhjen 3, bashkëlidhur dhe pjesë përbërëse e këtij vendimi.
IV. PROCEDURA DHE FORMATI I PËRSHKRIMIT TË PUNËS
13. Përshkrimi i punës është një përmbledhje e misionit, qëllimit të përgjithshëm, detyrave kryesore dhe përgjegjësive kryesore të pozicionit respektiv të punës. Ai shërben për:
a) të njohur nëpunësin civil me punën që duhet të kryejë;
b) vlerësimin dhe klasifikimin e pozicionit të punës;
c) vlerësimin e rezultateve në punë;
ç) përcaktimin e kërkesave të veçanta për çdo pozicion pune në
shërbimin civil.
14. Përshkrimet e punës hartohen kur krijohen institucione të reja, kur ndryshon mënyra e organizimit të institucionit apo kur kanë ndodhur ndryshime ose miratime të legjislacionit specifik mbi bazën e të cilit funksionon institucioni.
15. Si rregull, përshkrimi i punës hartohet nga analisti i punës, në bashkëpunim me eprorin direkt të pozicionit respektiv të punës.
16. Në rastet kur në institucion mungon analisti i punës, përshkrimi i punës hartohet nga drejtuesi i njësisë organizative përgjegjëse për menaxhimin e burimeve njerëzore, në bashkëpunim me eprorin direkt të pozicionit respektiv të punës.
17. Në rastin e krijimit të institucioneve të reja, përshkrimet e punës hartohen nga njësia përgjegjëse për menaxhimin e burimeve njerëzore, në Kryeministri apo në ministrinë nga e cila varet institucioni.
18. Përshkrimi i punës miratohet nga:
a) sekretari i Përgjithshëm i Këshillit të Ministrave, për Kryeministrinë dhe institucionet në varësi të Kryeministrit;
b) sekretari i Përgjithshëm i institucionit të pavarur, për institucionet e pavarura;
c) sekretari i Përgjithshëm i ministrisë, për ministrinë dhe institucionet në varësi të ministrit;
ç) sekretari i Përgjithshëm apo pozicioni ekuivalent me të, për qarqet, bashkitë dhe komunat.
19. Departamenti i Administratës Publike, për institucionet e administratës shtetërore, apo njësia përgjegjëse, për institucionet e tjera pjesë të shërbimit civil, kthejnë për rishikim përshkrimet e punës për pozicionet respektive në rast se vërejnë se ato nuk janë të hartuara në bazë dhe në përputhje me legjislacionin specifik të fushës apo formatin standard të miratuar.
20. Përshkrimet e punës depozitohen në Departamentin e Administratës Publike, për institucionet e administratës shtetërore, apo njësinë përgjegjëse, për institucionet e tjera, pjesë të shërbimit civil.
21. Formati i përshkrimit të punës për pozicionet e shërbimit civil, të jetë sipas lidhjes 4, bashkëlidhur këtij vendimi dhe pjesë përbërëse e tij.
V. PROCEDURA DHE METODOLOGJIA E VLERËSIMIT DHE
KLASIFIKIMIT TË POZICIONEVE TË PUNËS
22. Vlerësimi i pozicionit të punës ka si qëllim të përcaktojë vlerën relative të çdo pozicioni pune në shërbimin civil dhe të mundësojë klasifikimin e tij në kategorinë dhe klasën përkatëse.
23. Vlerësimi i pozicionit të punës kryhet kur:
a) krijohet një pozicion i ri pune;
b) ndryshimi i përshkrimit të punës për pozicionet ekzistuese është aq thelbësor sa kërkon një riklasifikim të pozicionit, në përputhje me detyrat dhe përgjegjësitë e reja;
c) kërkohet në bazë të ligjit ose akteve nënligjore.
24. Procesi i vlerësimit të punës ndjek këto faza:
a) krijimi i komitetit të vlerësimit;
b) identifikimi i pozicionit/pozicioneve të punës që do të vlerësohen;
c) vlerësimi me faktorë dhe pikëzimi sipas metodologjisë së vlerësimit të pozicionit të punës;
ç) klasifikimi i pozicionit të punës në kategorinë, klasën dhe grupin përkatës.
25. Çdo pozicion pune vlerësohet dhe klasifikohet duke u bazuar në përshkrimin e punës.
26. Çdo pozicion vlerësohet lidhur me katër faktorë kryesorë të klasifikimit, të matur përmes kritereve përgjegjëse.
Tabela
Faktori Kriteri 1 Kriteri 2
Zgjidhja e problemit Kompleksiteti Pasoja
Vendimmarrja Lloji i vendimit Liria për të vepruar
Mjedisi menaxhues Fokusi operacional Marrëdhëniet e varësisë
Mjedisi teknik Arsimi
27. Për çdo pozicion përcaktohen pikët për secilin nga faktorët e matur dhe shuma totale e pikëve të katër faktorëve përcakton edhe vlerën relative të pozicionit të punës në shërbimin civil dhe, për rrjedhojë, klasën së cilës ky pozicion i përket.
28. Metodologjia për vlerësimin e punës të jetë sipas lidhjes 5, bashkëlidhur këtij vendimi dhe pjesë përbërëse e tij.
29. Procesi i vlerësimit të punës për çdo pozicion pune kryhet nga një komitet vlerësimi. Komiteti i vlerësimit krijohet nga:
a) sekretari i Përgjithshëm i Këshillit të Ministrave, për Kryeministrinë dhe institucionet në varësi të Kryeministrit;
b) sekretari i Përgjithshëm i institucioneve të pavarura, për institucionet e pavarura;
c) sekretari i Përgjithshëm i Ministrisë, për ministrinë dhe institucionet në varësi të ministrit;
ç) sekretari i Përgjithshëm ose pozicione të barasvlefshme me të në
qark, bashki, komunë.
30. Në rastin e Kryeministrisë, ministrisë, institucioneve të pavarura dhe njësive të qeverisjes vendore, komiteti vlerësues përbëhet nga tre anëtarë, njëri prej të cilëve është i ngarkuar me funksionin e analistit të punës ose ndonjë funksion tjetër të menaxhimit të burimeve njerëzore, kurse dy anëtarët e tjerë janë nëpunës civilë me përvojë në institucion.
31. Në rastin e institucioneve në varësi të Kryeministrit ose ministrit komiteti i vlerësimit përbëhet nga pesë anëtarë:
a) analisti i punës ose një nëpunës tjetër nga njësia e menaxhimit të burimeve njerëzore në institucionin mëmë;
b) analisti i punës ose një nëpunës tjetër nga njësia e menaxhimit të burimeve njerëzore të institucionit për të cilin kryhet procesi;
c) një nëpunës civil me përvojë nga institucioni mëmë;
ç) dy nëpunës civilë me përvojë nga institucioni për të cilin kryhet procesi.
32. Vlerësimi i pozicionit të punës bazohet në analizën e punës dhe përshkrimin e punës.
33. Pas përfundimit të procesit të vlerësimit të pozicioneve të punës për institucionet e administratës shtetërore, propozimet i dërgohen për miratim Departamentit të Administatës Publike.
34. Departamenti i Administratës Publike kontrollon procedurën e ndjekur për vlerësimin e pozicionit të punës, si dhe themelin e propozimit për klasifikim.
35. Departamenti i Administratës Publike, për institucionet e administratës shtetërore:
a) miraton propozimin për klasifikim të pozicionit/pozicioneve të punës;
b) kthen për rivlerësim pozicionin/pozicionet e punës dhe vendos një afat
të arsyeshëm për plotësimin e rivlerësimit.
36. Departamenti i Administratës Publike jep mendim lidhur me vlerësimin e pozicioneve të punës së kryer nga institucionet e pavarura.
37. Departamenti i Administratës Publike këshillon dhe bashkëpunon me njësitë e qeverisjes vendore për vlerësimin e pozicioneve të punës.
38. Departamenti i Administratës Publike përgatit manuale shpjeguese për vlerësimin dhe klasifikimin e pozicioneve të punës.
VI. PARASHIKIME TË TJERA
39. Në rastet e ndryshimit të përshkrimit të punës, ndryshimit të klasifikimit apo kërkesave të vendit të punës, nëpunësit civilë trajtohen sipas nenit 50, të ligjit nr.152/2013, “Për nëpunësin civl”.
VI. DISPOZITA TRANSITORE
40. Të gjitha institucionet e përmendura në pikën 2, të nënndarjes I, të këtij vendimi, të përfundojnë hartimin e përshkrimit të pozicioneve të punës deri në datën 1 korrik 2014.
41. Institucionet e administratës shtetërore të depozitojnë pranë Departamentit të Administratës Publike të gjitha përshkrimet e punës së pozicioneve të shërbimit civil, deri në datën 1 korrik 2014.
42. Vlerësimi i pozicioneve të punës nuk do të prodhojë efekte në sistemin e pagave deri në kryerjen e reformës në këtë sistem.
43. Ngarkohet Departamenti i Administratës Publike për udhëheqjen metodologjike të procesit, si dhe hartimin e manualeve shpjeguese për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
NJË SHTESË NË VENDIMIN NR.53, DATË 21.1.2009, TË KËSHILLIT TË MINISTRAVE, “PËR NGARKIMIN E MINISTRISË SË BRENDSHME PËR KRYERJEN E PROCEDURAVE TË PROKURIMIT PUBLIK, NË EMËR DHE PËR LLOGARI TË KRYEMINISTRISË, MINISTRIVE DHE INSTITUCIONEVE TË VARËSISË, PËR DISA MALLRA DHE SHËRBIME”, TË NDRYSHUAR
Në mbështetje të nenit 100 të Kushtetutës dhe të neneve 11, pika 3, e 75, të ligjit nr.9643, datë 21.11.2006, “Për prokurimin publik”, të ndryshuar, me propozimin e ministrit të Zhvillimit Urban dhe Turizmit, Këshilli i Ministrave
V E N D O S I:
1. Në fund të pikës 1, të vendimit nr.53, datë 21.1.2009, të Këshillit të Ministrave, të ndryshuar, shtohet një paragraf, me këtë përmbajtje:
“Përjashtimisht për vitin 2014, lejohet Ministria e Zhvillimit Urban dhe Turizmit të realizojë vetë procedurat e prokurimit për blerjen e pajisjeve elektronike. Në procedurat e prokurimit përfshihen lidhja e kontratave përkatëse dhe botimi i njoftimit të kontratës së nënshkruar në Buletinin e Njoftimeve Publike.”.
2. Ngarkohen Ministria e Zhvillimit Urban dhe Turizmit dhe Agjencia e Prokurimit Publik për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
MIRATIMIN E STRATEGJISË PËR SHLYERJEN E DETYRIMEVE TË PËRZGJEDHURA TË DISA INSTITUCIONEVE PUBLIKE NË SEKTORIN E ENERGJISË ELEKTRIKE, PËRFSHIRË DHE PROJEKTMARRËVESHJEN E MIRËKUPTIMIT
Në mbështetje të nenit 100 të Kushtetutës dhe të neneve 496 e 514 e në vijim, të ligjit nr.7850, datë 29.7.1994, “Kodi Civil i Republikës së Shqipërisë”, të ndryshuar, me propozimin e ministrit të Energjisë dhe Industrisë, Këshilli i Ministrave
V E N D O S I:
Miratimin e strategjisë për shlyerjen e detyrimeve të përzgjedhura të disa institucioneve publike në sektorin e energjisë elektrike dhe projektmarrëveshjes së mirëkuptimit “Për shuarjen me kompensim të detyrimeve të prapambetura të disa institucioneve publike në sektorin e energjisë elektrike”, që i bashkëlidhen këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
PJESËMARRJEN E SHQIPËRISË NË PANAIRIN NDËRKOMBËTAR “EXPO MILANO 2015”
Në mbështetje të nenit 100 të Kushtetutës, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të ligjit nr.185/2013, “Për buxhetin e vitit 2014”, me propozimin e ministrit të Zhvillimit Ekonomik, Tregtisë dhe Sipërmarrjes, Këshilli i Ministrave
V E N D O S I:
1. Pjesëmarrjen e Shqipërisë në Panairin Ndërkombëtar “EXPO Milano 2015”.
2. Në këtë panair Shqipëria të përfaqësohet nga Komisari i Përgjithshëm i Shqipërisë.
3. Ministri i Zhvillimit Ekonomik, Tregtisë dhe Sipërmarrjes, me urdhër, emëron grupin e punës të kryesuar nga Komisari i Përgjithshëm i Shqipërisë, i cili ka në përbërje:
– Dy përfaqësues nga Ministria e Zhvillimit Ekonomik, Tregtisë dhe Sipërmarrjes;
– Një përfaqësues nga Ministria e Bujqësisë, Zhvillimit Rural dhe Administrimit të Ujërave;
– Një përfaqësues nga Ministria e Kulturës;
– Një përfaqësues nga Ministria e Zhvillimit Urban dhe Turizmit.
4. Autorizohet Agjencia Shqiptare e Zhvillimit të Investimeve (AIDA) për menaxhimin dhe administrimin e projektit “EXPO Milano 2015”, si dhe të veprimeve financiare nën mbikëqyrjen e grupit të punës të kryesuar nga Komisari, i emëruar sipas pikës 3, të këtij vendimi.
5. Autorizohet Komisari i Përgjithshëm i Shqipërisë për nënshkrimin e kontratës së pjesëmarrjes në Panairin Ndërkombëtar “EXPO Milano 2015”.
6. Komisari i Përgjithshëm i Shqipërisë, në nënshkrimin e kontratës, të udhëhiqet nga tematika kryesore e panairit “Ushqejmë planetin, energji për jetën”, sipas çështjeve të mëposhtme:
a) Shkenca dhe teknologjia për sigurinë dhe cilësinë e ushqimit;
b) Shkenca dhe teknologjia për agrikulturën dhe biodiversitetin;
c) Inovacioni në zinxhirin e shpërndarjes për agroushqimin.
7. Vlera e qirasë për përdorimin e pavionit shqiptar në Panairin Ndërkombëtar “EXPO Milano 2015” është 246 500 (dyqind e dyzet e gjashtë mijë e pesëqind) euro, nga e cila shuma prej 123 250 (njëqind e njëzet e tre mijë e dyqind e pesëdhjetë) eurosh do të përballohet nga buxheti i vitit 2014, miratuar për Ministrinë e Zhvillimit Ekonomik, Tregtisë dhe Sipërmarrjes për këtë aktivitet, ndërsa pjesa tjetër do të përballohet nga buxheti që do të miratohet për vitin 2015 për Ministrinë e Zhvillimit Ekonomik, Tregtisë dhe Sipërmarrjes.
Kostoja e investimit do të vetëmenaxhohet nga zbatuesi i projektit, si dhe nëpërmjet donatorëve privatë, shtetërorë, si dhe burimeve të tjera të ligjshme.
8. Ngarkohen Ministria e Zhvillimit Ekonomik, Tregtisë dhe Sipërmarrjes, Ministria e Financave, Ministria e Bujqësisë, Zhvillimit Rural dhe Administrimit të Ujërave, Ministria e Kulturës, Ministria e Zhvillimit Urban dhe Turizmit, Agjencia Shqiptare e Zhvillimit të Investimeve dhe Komisari i Përgjithshëm i Shqipërisë për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
RREGULLAT E ORGANIZIMIT E TË FUNKSIONIMIT TË SHKOLLËS SHQIPTARE TË ADMINISTRATËS PUBLIKE DHE TRAJNIMIN E NËPUNËSVE CIVILË
Në mbështetje të nenit 100 të Kushtetutës dhe të neneve 8, 9 e 69, të ligjit nr.152/2013, “Për nëpunësin civil”, me propozimin e ministrit të Punëve të Brendshme dhe të ministrit të Shtetit për Inovacionin dhe Administratën Publike, Këshilli i Ministrave
V E N D O S I:
Ky vendim rregullon organizimin dhe funksionimin e Shkollës Shqiptare të Administratës Publike (ASPA), funksionet e organeve të saj, marrëdhëniet institucionale me Departamentin e Administratës Publike (DAP), rregullat bazë për ofrimin e programeve nga ASPA dhe tarifat për këto programe, si dhe trajnimin e nëpunësve civilë.
KREU I
ORGANET DREJTUESE TË SHKOLLËS SHQIPTARE
TË ADMINISTRATËS PUBLIKE
1. Në përputhje me nenin 8, të ligjit nr.152/2013, “Për nëpunësin civil”, këshilli drejtues i ASPA-s ka në përbërje 12 anëtarë, si më poshtë vijon:
a) Kryetarin e këshillit drejtues, rektor i zgjedhur nga Konferenca e Rektorëve;
b) Një përfaqësues nga TND-ja e ministrisë përgjegjëse për arsimin, i përzgjedhur nga ministri përkatës;
c) Një përfaqësues nga TND-ja e ministrisë përgjegjëse për financat, i përzgjedhur nga ministri përkatës;
ç) Një përfaqësues nga TND-ja e ministrisë përgjegjëse për drejtësinë, i përzgjedhur nga ministri përkatës;
d) Një përfaqësues nga TND-ja e ministrisë përgjegjëse për integrimin evropian, i përzgjedhur nga ministri përkatës;
dh) Një përfaqësues nga ministria përgjegjëse për administratën publike;
e) Drejtorin e Departamentit të Administratës Publike;
ë) Një përfaqësues nga Dhoma Kombëtare e Tregtisë;
f) Një përfaqësues nga Universiteti i Tiranës, i zgjedhur nga rektori i këtij universiteti;
g) Një përfaqësues i shoqërisë civile, i zgjedhur nga Komisioni i Çështjeve Ligjore, Administratës Publike dhe të Drejtave të Njeriut;
gj) Dy përfaqësues të qeverisjes vendore, që janë nëpunës civilë të organeve të qeverisjes vendore, të propozuar nga shoqatat e qeverisjes vendore dhe të zgjedhur nga ministri përgjegjës për çështjet vendore.
2. Përfaqësuesit e zgjedhur nga universiteti, biznesi, shoqëria civile dhe shoqatat e qeverisjes vendore duhet të gëzojnë këto cilësi:
a) Të kenë shtetësinë shqiptare;
b) Të kenë integritet moral dhe profesional;
c) Të mos jenë dënuar penalisht me vendim të formës së prerë;
ç) Të mos kenë qenë kandidatë në zgjedhjet e përgjithshme dhe vendore të paktën 3 (tri) vitet e fundit;
d) Të kenë të paktën, 3 (tri) vite përvojë pune.
3. Zgjedhja e anëtarëve të përcaktuar në shkronjat “a”, “ë”, “f”, “g” dhe “gj”, të pikës 1, të këtij vendimi, bëhet brenda 30 (tridhjetë) ditëve nga hyrja në fuqi e tij.
4. Këshilli drejtues i ASPA-s, për rregullat e votimit, axhendës së mbledhjeve e kuorumit të tyre, gjatë punës së tij bazohet në legjislacionin që rregullon organizimin dhe funksionimin e organeve kolegjiale.
5. Mbledhja e këshillit drejtues mund të thirret edhe nga drejtori i ASPA-s ose ai i DAP-it.
6. Këshilli drejtues mblidhet jo më shumë se 4 (katër) herë në vit.
7. Anëtarët e këshillit drejtues, të përcaktuar sipas shkronjave “b”, “c”, “ç”, “d”, “dh” dhe “e”, të pikës 1, të këtij vendimi, nuk mund të dorëhiqen. Anëtarët e tjerë mund të dorëhiqen dhe të zëvendësohen nga i njëjti organ që bën përzgjedhjen e tyre. Anëtarët e dorëhequr qëndrojnë në detyrë deri në momentin e zëvendësimit të tyre.
8. Anëtarët e këshillit drejtues të parashikuar në shkronjat “a”, “ë”, “f”, dhe “g”, të pikës 1, të këtij vendimi, paguhen për çdo mbledhje 10 000 (dhjetë mijë) lekë. Pagesa kryhet nga ASPA dhe llogaritet në buxhetin vjetor të saj.
9. Këshilli drejtues i ASPA-s ka këto kompetenca:
a) Miraton politikat, strategjitë dhe programet e ASPA-s;
b) Miraton projektbuxhetin;
c) Miraton projektstrukturën organizative;
ç) Miraton rregulloren e brendshme të ASPA-s;
d) Miraton politikat e përzgjedhjes dhe formimit në ASPA në bashkëpunim të ngushtë me DAP-in;
dh) Ndjek dhe mbikëqyr ecurinë e programeve formuese të ASPA-s;
e) Miraton raportin vjetor të ASPA-s.
10. Drejtori i ASPA-s emërohet dhe lirohet nga detyra sipas kritereve dhe rregullave të përcaktuara për anëtarët e trupës së nëpunësve civilë të nivelit të lartë drejtues.
11. Drejtori i ASPA-s ka këto kompetenca:
a) Drejton veprimtarinë e institucionit;
b) Përgatit projektstrategjitë për këshillin drejtues;
c) Përgatit projektbuxhetin dhe ia dërgon për miratim këshillit drejtues;
ç) Përgatit projektstrukturën dhe ia dërgon për miratim këshillit drejtues;
d) Përfaqëson ASPA-n në raport me të tretët dhe lidh marrëveshje me institucionet homologe e dhurues të ndryshëm;
dh) Raporton te ministri përgjegjës për administratën;
e) Mbikëqyr ecurinë e programeve trajnuese;
ë) Përgatit, brenda muajit nëntor të çdo viti, programet e trajnimit, në bashkëpunim me DAP-in, dhe i dërgon brenda 10 (dhjetë) ditëve për miratim në këshillin drejtues;
f) Lëshon vërtetimin për ndjekjen, me sukses ose jo, të programeve të nëpunësve civilë në ASPA;
g) Përzgjedh dhe lidh kontratat me trajnerët/lektorët në përputhje me kriteret e vendosura në këtë vendim.
KREU II
BUXHETI I ASPA-s
1. Buxheti i ASPA-s përcaktohet si zë i veçantë në buxhetin e ministrit përgjegjës për administratën publike.
2. ASPA mund të marrë donacione nga dhurues të huaj apo shqiptarë për qëllimin dhe funksionimin e saj.
3. ASPA mund të sigurojë të ardhura nëpërmjet ofrimit të trajnimeve të veçanta që mund të kërkojnë institucionet publike apo private, si dhe botimeve e kërkimeve në fushën e administratës publike.
4. Tarifat e përcaktuara në pikat 7, 8 dhe 10, të kreut III, të këtij vendimi, mblidhen dhe administrohen nga ASPA.
KREU III
PROGRAMET E OFRUARA NGA ASPA DHE TARIFAT
1. ASPA ofron programet e trajnimit të thelluar, të vazhdueshëm dhe të përgatitjeve paraprake për kandidatët jashtë shërbimit civil.
2. ASPA ofron programin e formimit të thelluar për kandidatët për kategorinë e nëpunësve civilë të nivelit të lartë drejtues, anëtarë të TND-së, pa pagesë. Ky program është i detyrueshëm të ndiqet.
3. ASPA ofron, pa pagesë, programin e formimit të thelluar për anëtarët e TND-së të pranuar sipas nenit 29, të ligjit nr.152/2013. Ky program është i detyrueshëm të ndiqet. Anëtarët e TND-së, të pranuar sipas nenit 29, të ligjit nr.152/2013, që ndjekin programin e formimit të thelluar, nuk i nënshtrohen testimit në përfundim të këtij programi.
4. Programi i formimit të thelluar zgjat 280 orë trajnimi dhe zhvillohet 2 (dy) ditë në javë. Ky program realizohet brenda 6 (gjashtë) muajve.
5. Trajnerët për programin e formimit të thelluar duhet të përmbushin kriteret e përmendura në pikën 3, të kreut 6, të këtij vendimi.
6. ASPA ofron program të formimit të thelluar dhe të vazhdueshëm, në bazë të të cilit trajnohen në vazhdimësi dhe në lidhje me punën nëpunësit civilë të të gjitha kategorive, si dhe çdo individ tjetër jashtë këtij shërbimi, vendas ose i huaj.
7. Personat jashtë shërbimit civil që ndjekin programin e formimit të thelluar paguajnë për çdo ditë trajnimi 5 000 (pesë mijë) lekë.
8. Personat jashtë shërbimit civil që ndjekin programet e formimit të vazhdueshëm paguajnë 3 000 (tre mijë) – 7 000 (shtatë mijë) lekë për kurs trajnimi, në varësi të kohëzgjatjes së kursit.
9. Në programin e formimit të vazhdueshëm përfshihen:
a) Trajnimi i detyrueshëm gjatë periudhës së provës, i përcaktuar në nenin 24, të ligjit 152/2013, “Për nëpunësin civil”;
b) Trajnimi për zhvillimin e karrierës së nëpunësve të administratës publike dhe për përparimin në pagë;
c) Trajnimin për përshtatje profesionale, në rastet e ndryshimit të kërkesave të vendit të punës;
ç) Trajnimi me karakter të posaçëm për kryerjen e detyrave të veçanta për nëpunësit e administratës publike.
10. ASPA ofron mundësinë e përgatitjes paraprake të kandidatëve për të marrë pjesë në konkurrimin e hapur për kategorinë ekzekutive, kundrejt tarifës prej 5 000 (pesë mijë) lekësh.
11. Kriteret dhe dokumentet e kërkuara për personat jashtë shërbimit civil, që dëshirojnë të ndjekin programet e ASPA-s, përcaktohen nga drejtori i ASPA-s dhe bëhen publike në faqen online të ASPA-s e të DAP-it.
KREU IV
TRAJNIMI I NËPUNËSVE CIVILË
1. Nëpunësi civil i nënshtrohet veprimtarive të detyrueshme, të përgjithshme dhe të veçanta të trajnimit në ASPA, në këto raste:
a) gjatë periudhës së provës;
b) me urdhër të drejtpërdrejtë të eprorit, kur shihet e nevojshme për formimin e nëpunësit civil, bazuar në vlerësimin e rezultateve në punë;
c) për programe trajnimi të përcaktuara nga DAP-i, në përputhje me politikat e përgjithshme të trajnimit, për të paktën 60 (gjashtëdhjetë) orë trajnimi në vit, për nëpunësit civilë të nivelit të mesëm dhe të lartë drejtues;
ç) për programet e formimit profesional për çdo hap të pagës;
d) për përshtatje profesionale, në rastet e ndryshimit të kërkesave të vendit të punës.
2. Për trajnimet e parashikuara në pikën 1, të kreut IV, të këtij vendimi, nëpunësi i nënshtrohet testimit në fund të trajnimit. Trajnimi konsiderohet i ndjekur me sukses nëse merr, të paktën, 50% të pikëve në testim.
3. Procedurat për testimin dhe vlerësimin parashikohen në rregulloren e brendshme të ASPA-s.
4. Nëpunësi civil mund të trajnohet jashtë vendit, në kuadrin e përgjithshëm të programeve të trajnimit, të organizuara nga institucioni në përputhje me programet e përgjithshme të trajnimit, për një periudhë për jo më shumë se një muaj. Në mbarim të këtyre trajnimeve, nëpunësi duhet të rikthehet në vendin e mëparshëm të punës, për jo më pak se tre vjet.
5. Kur nëpunësi refuzon të kthehet në vendin e mëparshëm të punës, sipas parashikimit të dhënë në pikën 4, të kreut IV, të këtij vendimi, ai duhet të dëmshpërblejë institucionin për shpenzimet e trajnimeve.
6. Nëpunësi civil mund të kryejë trajnime në institucione të tjera trajnuese përveç ASPA-s, deri në një muaj, me iniciativën e tij, por për detyrën që ai kryen, me propozimin e përbashkët të eprorit e të drejtuesit të njësisë së menaxhimit të burimeve njerëzore të institucionit dhe me miratimin e titullarit të institucionit.
7. Nëpunësi civil mund të kryejë trajnime nga 1 (një) muaj deri në 2 (dy) vjet, jashtë apo brenda vendit, të ndërmarra me iniciativën e tij, por për detyrën që ai kryen. Gjatë kësaj kohe ai pezullohet nga shërbimi civil.
8. Të gjitha institucionet e administratës publike detyrohen që, për trajnimet e parashikuara në pikat 4, 6 dhe 7, të kreut IV, të këtij vendimi, të dërgojnë informacionin pranë ASPA-s dhe Departamentit të Administratës Publike.
KREU V
PAGESA GJATË PERIUDHËS SË TRAJNIMIT
1. Trajnimi në Shkollën Shqiptare të Administratës Publike kryhet pa shkëputje nga puna. Gjatë kohës së trajnimit nëpunësi merr pagën e plotë.
2. Trajnimi brenda ose jashtë vendit i organizuar nga institucioni është me shkëputje nga puna. Gjatë periudhës së trajnimit deri në një muaj, nëpunësi merr pagën e plotë, përjashtuar shtesat për vështirësi dhe kushte pune.
3. Për periudhën e trajnimit që kalon një muaj, sipas parashikimit të pikës 2, të kreut V, të këtij vendimi, nëpunësit i ndërpritet paga.
KREU VI
KRITERET PËR TRAJNERËT
1. Për zhvillimin e trajnimeve, ASPA lidh me trajnerët një apo disa nga tipet e këtyre kontratave:
a) Kontratë për trajnimin e trajnerëve;
b) Kontratë për trajnimin e nëpunësve të administratës publike dhe të tjerë;
c) Kontratë për hartimin e kurrikulave dhe të materialeve trajnuese.
2. Trajnerët me të cilët lidhet kontrata, sipas shkronjave “a” dhe “b”, të pikës 1, të këtij kreu, ndahen në tri kategori:
a) Trajnerë të kategorisë së ulët, trajnerët që kanë një diplomë “Master i shkencave” ose “Master i arteve të bukura” apo të barasvlefshme me to, sipas legjislacionit të arsimit të lartë, dhe 3 – 5 vite përvojë pune në fushën përkatëse;
b) Trajnerë të kategorisë së mesme, trajnerët që kanë një diplomë “Master i shkencave” ose “Master i arteve të bukura” apo të barasvlefshme me to, sipas legjilacionit të arsimit të lartë, dhe 6 – 10 vite përvojë pune në fushën përkatëse ose trajnerët që kanë një diplomë postmaster apo të barasvlefshme me të, sipas legjislacionit të arsimit të lartë, dhe, minimalisht, 3 vite përvojë pune në fushën përkatëse;
c) Trajnerë të kategorisë së lartë, trajnerët që kanë një diplomë “Master i shkencave” ose “Master i arteve të bukura” apo të barasvlefshme me to, sipas legjislacionit të arsimit të lartë, dhe mbi 11 vite përvojë pune në fushën përkatëse ose trajnerët që kanë një gradë apo titull shkencor.
3. Trajnerë, me të cilët lidhen kontratat e parashikuara në shkronjën “c”, të pikës 1, të kreut VI, të këtij vendimi, zgjidhen ata individë që kanë një diplomë “Master i shkencave” ose “Master i arteve të bukura” apo të barasvlefshme me to, sipas legjislacionit të arsimit të lartë, dhe një përvojë pune në fushën përkatëse më të madhe se 11 vjet ose individët që kanë një gradë apo titull shkencor.
4. Masa e pagesës për trajnerët përcaktohet në kontratë dhe llogaritet në varësi të kategorisë së trajnerit e të orëve të trajnimit, përkatësisht:
a) për kontratat e parashikuara në shkronjat “a” dhe “b”, të pikës 1, të kreut V, të këtij vendimi, masa e pagesës për çdo orë trajnimi 60 – minutëshe të jetë sipas lidhjes nr.1, që i bashkëlidhet këtij vendimi dhe është pjesë përbërëse e tij;
b) për kontratat e parashikuara në shkronjën “c”, të pikës 1, të kreut V, të këtij vendimi, masa e pagesës për hartimin e kurrikulave apo të materialeve të trajnimit, të nevojshme për zhvillimin e 6 orëve 60-minutëshe trajnimi të jetë 12 000 (dymbëdhjetë mijë) lekë;
c) në rastet e hartimit të kurrikulave apo të materialeve të trajnimit për më pak se 6 orë trajnimi 60-minutëshe pagesa të llogaritet në përpjesëtim me orët e trajnimit;
ç) në rastet e rishikimit të kurrikulave pagesa të jetë deri në 50% të pagesës së përcaktuar sipas shkronjës “b”, të kësaj pike.
5. Vendimi nr.220, datë 13.2.2013, i Këshillit të Ministrave, “Për krijimin dhe funksionimin e Shkollës Shqiptare të Administratës Publike dhe trajnimin e nëpunësve të administratës publike”, shfuqizohet.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
KALIMIN E PRONËS SË PALUAJTSHME SHTETËRORE, ME EMËRTIMIN “KONVIKTI I SHKOLLËS SË GJUHËVE TË HUAJA “ASIM VOKSHI”, TIRANË”, NË PËRGJEGJËSI ADMINISTRIMI TË MINISTRISË SË MIRËQENIES SOCIALE DHE RINISË DHE PËR NJË NDRYSHIM NË VENDIMIN NR.834, DATË 13.12.2006, TË KËSHILLIT TË MINISTRAVE, “PËR MIRATIMIN E LISTËS SË PJESSHME TË INVENTARIT TË PRONAVE TË PALUAJTSHME SHTETËRORE, QË JANË NË JURIDIKSIONIN TERRITORIAL DHE ADMINISTRATIV TË BASHKISË TIRANË, TË QARKUT TË TIRANËS”
Në mbështetje të nenit 100 të Kushtetutës dhe të neneve 10, 12, 13, 14 e 15, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e ministrit të Mirëqenies Sociale dhe Rinisë, të ministrit të Punëve të Brendshme dhe të ministrit të Arsimit dhe Sportit, Këshilli i Ministrave
V E N D O S I:
1. Kalimin e pronës së paluajtshme shtetërore, me emërtimin “Konvikti i Shkollës së Gjuhëve të Huaja “Asim Vokshi”, Tiranë”, ndodhur në zonën kadastrale 8160, S-13, me numër pasurie 5/74, në përgjegjësi administrimi të Ministrisë së Mirëqenies Sociale dhe Rinisë në funksion të ushtrimit të veprimtarive në fushën e përgjegjësisë së kësaj ministrie dhe/ose të institucioneve në varësi të saj.
2. Heqjen e pronës së përcaktuar në pikën 1, të këtij vendimi, nga lista e inventarit të pronave të paluajtshme shtetërore, e cila i bashkëlidhet vendimit nr.834, datë 13.12.2006, të Këshillit të Ministrave.
3. Ministria e Mirëqenies Sociale dhe Rinisë nuk mund ta ndryshojë destinacionin e pronës së përcaktuar në pikën 1, të këtij vendimi, ta tjetërsojë ose t’ua japë në përdorim të tretëve.
4. Ngarkohen ministri i Mirëqenies Sociale dhe Rinisë, ministri i Punëve të Brendshme dhe kryeregjistruesi i Pasurive të Paluajtshme të Republikës së Shqipërisë për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
DISA NDRYSHIME DHE SHTESA NË VENDIMIN NR.953, DATË 12.12.2012, TË KËSHILLIT TË MINISTRAVE, “PËR MIRATIMIN E RREGULLORES PËR KRITERET DHE PROCEDURAT E LICENCIMIT TË SUBJEKTEVE PËR USHTRIMIN E AKTIVITETIT NË FUSHËN E VLERËSIMIT TË PASURIVE TË PALUAJTSHME”
Në mbështetje të nenit 100 të Kushtetutës dhe të ligjit nr.10081, datë 23.2.2009, “Për licencat, autorizimet dhe lejet në Republikën e Shqipërisë”, me propozimin e ministrit të Zhvillimit Urban dhe Turizmit, Këshilli i Ministrave
V E N D O S I:
Në vendimin nr.953, datë 12.12.2012, të Këshillit të Ministrave, bëhen këto ndryshime dhe shtesa:
1. Kudo në vendim dhe rregulloren bashkëlidhur tij, emërtimi “Ministria e Punëve Publike dhe Transportit” zëvendësohet me “Ministria e Zhvillimit Urban dhe Turizmit”.
2. Në rregulloren e miratuar bashkëlidhur vendimit bëhen ndryshimet e mëposhtme:
a) Pika 3, e kreut II, ndryshohet, si më poshtë vijon:
“3. Komisioni i posaçëm i dhënies së licencave profesionale për vlerësimin e pasurive të paluajtshme miratohet me urdhër të ministrit të Zhvillimit Urban dhe Turizmit.
Komisioni përbëhet nga 7 (shtatë) anëtarë:
– Dy përfaqësues nga Ministria e Zhvillimit Urban dhe Turizmit;
– Një përfaqësues nga Ministria e Zhvillimit Ekonomik, Tregtisë dhe Sipërmarrjes;
– Një përfaqësues nga Fakulteti i Inxhinierisë së Ndërtimit;
– Një përfaqësues nga Shoqëria e Vlerësuesve të Pasurive të Paluajtshme;
– Një përfaqësues nga Zyra Qendrore e Regjistrimit të Pasurive të Paluajtshme;
– Sekretari i sekretarisë teknike, detyrën e të cilit e kryen punonjësi i Drejtorisë për Licencimin, Standardizimin dhe Antikorrupsionin, në Ministrinë e Zhvillimit Urban dhe Turizmit.
Kryetar i komisionit është një nga përfaqësuesit e Ministrisë së Zhvillimit Urban dhe Turizmit.”.
b) Në pikën 8, të kreut III, pas fjalës “… Licencimit …” shtohen fjalët “… Standardizimit dhe Antikorrupsionit …”.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
RIALOKIMIN E NUMRIT TË PUNONJËSVE DHE TË FONDEVE BUXHETORE NË NJËSITË E QEVERISJES QENDRORE PËR VITIN 2014
Në mbështetje të nenit 100 të Kushtetutës, të nenit 44, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, dhe të neneve 11 e 17, të ligjit nr.185/2013, “Për buxhetin e vitit 2014”, me propozimin e ministrit të Financave, Këshilli i Ministrave
V E N D O S I:
1. Numri i punonjësve të Departamentit të Administratës Publike shtohet me 21 veta dhe bëhet, gjithsej, 43 veta.
2. Numri i punonjësve të Agjencisë Kombëtare për Shoqërinë e Informacionit shtohet me 10 veta dhe bëhet, gjithsej, 45 veta.
3. Numri i punonjësve të Autoritetit Shtetëror për Informacionin Gjeohapësinor pakësohet me 6 veta dhe bëhet, gjithsej, 15 veta.
4. Numri i punonjësve të Drejtorisë së Sigurimit të Informacionit të Klasifikuar pakësohet me 7 veta dhe bëhet, gjithsej, 30 veta.
5. Numri i punonjësve të Drejtorisë së Përgjithshme të Arkivës së Shtetit reduktohet me 16 veta dhe bëhet, gjithsej, 139 veta.
6. Numri i punonjësve të Agjencisë Telegrafike Shqiptare pakësohet me 42 veta dhe bëhet, gjithsej, 40 veta.
7. Në buxhetin e vitit 2014, miratuar për Departamentin e Administratës Publike, në programin “Menaxhimi dhe zhvillimi i administratës publike”, zëri “Shpenzime personeli”, shtohet fondi prej 9 390 mijë lekësh.
8. Në buxhetin e vitit 2014, miratuar për Drejtorinë e Sigurimit të Informacionit të Klasifikuar, në programin “Shërbime të tjera”, zëri “Shpenzime personeli”, pakësohet fondi prej 3 000 mijë lekësh.
9. Në buxhetin miratuar për vitin 2014, në programin “Shërbimi për Shoqërinë e Informacionit”, në zërin “Shpenzime personeli”, bëhen ndryshimet e mëposhtme:
a) Agjencisë Kombëtare të Shoqërisë së Informacionit i shtohet fondi prej 11 100 mijë lekësh.
b) Autoritetit Shtetëror për Informacionin Gjeohapësinor i pakësohet fondi prej 3 490 mijë lekësh.
10. Në buxhetin e vitit 2014, miratuar për Agjencinë Telegrafike Shqiptare, në programin “Veprimtaria telegrafike e ATSH-së”, zëri “Shpenzime personeli”, pakësohet fondi prej 6 000 mijë lekësh.
11. Në buxhetin e vitit 2014, miratuar për Drejtorinë e Përgjithshme të Arkivave së Shtetit, në programin “Planifikimi, menaxhimi dhe administrimi”, zëri “Shpenzime personeli”, pakësohet fondi prej 8 000 mijë lekësh.
12. Ngarkohen institucionet e përmendura më sipër dhe Ministria e Financave për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
MIRATIMIN, NË PARIM, TË MARRËVESHJES NDRYSHUESE NË MARRËVESHJEN KUADËR TË HUASË, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE BANKËS PËR ZHVILLIM TË KËSHILLIT TË EVROPËS (CEB), PËR FINANCIMIN E PROGRAMIT TË REFORMIMIT TË QENDRËS SPITALORE UNIVERSITARE “NËNË TEREZA”, TIRANË, FAZA I
Në mbështetje të nenit 100 të Kushtetutës, të nenit 26, të ligjit nr.9665, datë 18.12.2006, “Për huamarrjen shtetërore, borxhin shtetëror dhe garancitë shtetërore të huasë në Republikën e Shqipërisë”, dhe të neneve 5 e 7, të ligjit nr.8371, datë 9.7.1998, “Për lidhjen e traktateve dhe marrëveshjeve ndërkombëtare”, me propozimin e ministrit të Shëndetësisë dhe të ministrit të Financave, Këshilli i Ministrave
V E N D O S I:
Miratimin, në parim, të marrëveshjes ndryshuese në marrëveshjen kuadër të huasë, ndërmjet Këshillit të Ministrave të Republikës së Shqipërisë dhe Bankës për Zhvillim të Këshillit të Evropës (CEB), për financimin e programit të reformimit të Qendrës Spitalore Universitare “Nënë Tereza”, Tiranë, faza I, sipas tekstit bashkëlidhur këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
***
V E N D I M
PËR
DISA SHTESA DHE NDRYSHIME NË VENDIMIN NR.35, DATË 29.1.2014, TË KËSHILLIT TË MINISTRAVE, “PËR PËRCAKTIMIN E NUMRIT TË PUNONJËSVE ME KONTRATË TË PËRKOHSHME PËR VITIN 2014 NË NJËSITË E QEVERISJES QENDRORE”, TË NDRYSHUAR
Në mbështetje të nenit 100 të Kushtetutës, të pikës 2, të nenit 18, të ligjit nr.7961, datë 12.7.1995, “Kodi i Punës i Republikës së Shqipërisë”, të ndryshuar, dhe të nenit 11, të ligjit nr.185, datë 28.12.2012, “Për buxhetin e vitit 2014”, me propozimin e ministrit të Financave, Këshilli i Ministrave
V E N D O S I:
1. Në vendimin nr.35, datë 29.1.2014, të Këshillit të Ministrave, bëhen këto shtesa dhe ndryshime:
a) Pas pikës 3 shtohet pika 3.1, me këtë përmbajtje:
“3.1. Përjashtimisht për punonjësit e kontraktuar nga Instituti i Statistikave, të cilët merren me anketimet, miratimi i numrit të tyre, përcaktimi i afateve kohore dhe specifikime të tjera bëhen sipas udhëzimit të përbashkët të Institutit të Statistikave dhe Ministrisë së Financave.”.
b) Fjalia e dytë, e pikës 4, ndryshohet, si më poshtë vijon:
“Përjashtimisht për QTTB-të, për punonjësit e SHISH-it (Shtëpitë e pushimit) dhe të Shërbimit Gjeologjik Shqiptar, efektet financiare përballohen vetëm nga të ardhurat e vetë institucionit.”.
2. Efektet financiare për zbatimin e këtij vendimi përballohen nga shpenzimet korrente të miratuara në buxhetin përkatës të institucioneve për vitin 2014.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
MIRATIMIN E EMËRIMIT TË Z. DHIMITRI TOLE NË DETYRËN E KRYETARIT TË KËSHILLIT TË STATISTIKAVE
Në mbështetje të nenit 100 të Kushtetutës dhe të pikës 6, të nenit 10, të ligjit nr.9180, datë 5.2.2004, “Për statistikat zyrtare”, të ndryshuar, me propozimin e Kryeministrit, Këshilli i Ministrave
V E N D O S I:
Miratimin e emërimit të z. Dhimitri Tole në detyrën e kryetarit të Këshillit të Statistikave.
Ky vendim hyn në fuqi menjëherë.
K R Y E M I N I S T R I
EDI RAMA
***
V E N D I M
PËR
EMËRIMIN NË DETYRË TË DISA ANËTARËVE TË BORDIT MBIKËQYRËS TË AGJENCISË PËR MBËSHTETJEN E SHOQËRISË CIVILE
Në mbështetje të nenit 100 të Kushtetutës dhe të neneve 8 e 13, të ligjit nr.10093, datë 9.3.2009, “Për organizimin dhe funksionimin e Agjencisë për Mbështetjen e Shoqërisë Civile”, me propozimin e Kryeministrit, Këshilli i Ministrave
V E N D O S I:
Emërimin në detyrë të disa anëtarëve të bordit mbikëqyrës të Agjencisë për Mbështetjen e Shoqërisë Civile, përfaqësues nga organizatat e shoqërisë civile, si më poshtë vijon:
– Z. Ismail Ademi;
– Z. Alban Dudushi;
– Znj. Kozara Kati;
– Z. Aldo Merkoçi;
– Z. Adrian Thano.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PЁR
KRYERJEN NË MËNYRË ELEKTRONIKE TË PROCEDURAVE KONKURRUESE TË KONCESIONIT/PARTNERITETIT PUBLIK PRIVAT
Nё mbёshtetje tё nenit 100 tё Kushtetutёs, të nenit 22, të ligjit nr.125/2013, “Për koncesionet dhe partneritetin publik privat”, dhe të neneve 22 e 75, të ligjit nr.9643, datë 20.11.2006, “Për prokurimin publik”, të ndryshuar, me propozimin e Kryeministrit, Kёshilli i Ministrave
V E N D O S I:
1. Publikimi i dokumenteve të procedurave konkurruese të koncesionit/ partneritetit publik privat dhe dorëzimi i ofertave të operatorëve për këto procedura do të zhvillohen me mjete elektronike.
2. Vendimi nr.268, datë 18.4.2012, i Këshillit të Ministrave, “Për kryerjen në mënyrë elektronike të procedurave konkurruese të dhënies së koncesionit”, shfuqizohet.
3. Ngarkohet Agjencia e Prokurimit Publik të nxjerrë udhëzimet përkatëse për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
*SHËNIM: BAZUAR NË NENIN 117 TË KUSHTETUTËS SË RSH DHE NENIT 29 TË LIGJIT PËR ORGANIZIMIN DHE FUNKSIONIMIN E KËSHILLIT TË MINISTRAVE, VENDIMET E KËSHILLIT TË MINISTRAVE PUBLIKOHEN NË FLETOREN ZYRTARE DHE HYJNË NË FUQI PAS BOTIMIT TË TYRE. DREJTORIA E KOMUNIKIMIT PRANË KËSHILLIT TË MINISTRAVE PËRPIQET TË BOTOJË NË KOHËN MË TË SHPEJTË TË MUNDSHME VENDIMET E MBLEDHJEVE TË QEVERISË, POR VERSIONI ZYRTAR DHE HYRJA E TYRE NË FUQI BËHET VETËM PASI VENDIMI BOTOHET NE QBZ. SHPESHHERË, VENDIMET E KËSHILLIT TË MINISTRAVE KANË NEVOJË PËR ZBARDHJE TË MËTEJSHME, ÇKA E VONON PUBLIKIMIN E TYRE NË KËTË FAQE.
